Nyoliri pa awiya kelo alokaloka i gamiri: nenedi?

Nyoliri pa nyathin copo kelo mutoro man bende peko ni nico ku dhaku i gamiri. Calu wutie junyodo manyen, wucopo zungo nineno nia wubetio ku saa man kero mwu mapol pi nidieng’ pi nyathin. Koso nindo man alokaloka i kite mi winjiri copo niroyo peko i mer mwu. Pieno bikwayere nia wun ario ceke wutim alokaloka i kwo mwu kara wudieng’ pi nyathin man wugwok bende gamiri mwu. Juk mi Biblia copo nikonyowu nenedi kara wunyeg ku peko maeno?

1 NG’EI ALOKALOKA MA COPO WOK I KWO MWU KA NYATHIN UNYOLERE

LEMBE MA BIBLIA YERO: “Mer ciro lembe hai man ebedo ber.” Bende, mer ‘yenyo gin ma pare gire ngo, lembe ton i ie ngo.’ (1 Jukorinto 13:4, 5) Calu itie mego manyen, ukwayu idieng’ akeca pi nyathin peri. Ento, ng’ei nia won ot peri copo nwang’u nia iwenje, pieno wii kud uwil nia en de etie ku yeny ma nia idieng’ pire. Ku cirolembe man bero, icopo nikonye eng’ei nia en de ecikere nidiko cinge i dieng’ pi nyathin.

“Wu cogmon . . . wubed ku mon mu calku ng’eyong’ec.” (1 Petro 3:7) Ng’ei nia dhaku peri bibayu saa man tego pare mapol pi nidieng’ pi nyathin. Etie ku tic manyen, pieno ticne copo ninure, niole, kunoke nituro cwinye. Saa moko ecopo doko kwiny kudi, ento tim kero nikwiyo kumi asu, pilembe “ng’atu ma ng’ecwiny make pio ngo e ber ma sagu jarukara.” (Lembrieko 16:32) Ng’ii i lembe, man mii ire kony m’ubekwayere.​—Lembrieko 14:29.

LEMBE M’ICOPO TIMO:

• Wego: Kony dhaku ku dieng’ pi nyathin, kadok diewor. Jwig saa m’ibed itimo i tic mange kara itim saa akeca ku dhaku man nyathin peri

• Mego: Ka won ot peri ubemito nikonyi ku nyathin, kud ikwer konyne. Ka ebetimo ngo ticne kite m’ukwayere de, kud icaye, ento nyuth ire ku yoo kite ma jutimo ko ticne

2 WUKETH TEGO UBED I MER MWU

LEMBE MA BIBLIA YERO: “Gibidoko kum acel.” (Thangambere 2:24) Kadok wutie ku ng’atu mange manyen (nyathin) i ot mwu de, wi i kud uwil nia in ku jadhogi mi gamiri wutie asu “kum acel.” Tim kero peri ceke niketho mer mwu umedere nibedo tek.

Min ot, nyuth foyofoc peri pi kony man dikocing’ pa won ot peri. Nyutho foyofoc peri copo bedo ni “leng’kum [keyo kum].” (Lembrieko 12:18) Won ot, yer ni dhaku peri nia imare dit man nia pire tie tek dit iri. Yunge pi dieng’ ma ebedieng’ ko pi ot mwu.—Lembrieko 31:10, 28.

“Ng’atu moko kud uyeny ire gire ento pa wadi re.” (1 Jukorinto 10:24) Bed itim bero kwa ni jadhogi mi gamiri. In ku jadhogi mi gamiri, wunwang’ saa mi weco i kindwu, man saa ma ng’atuman winjo ko wec pa wadi man pa wadi. Kud wutwonuru ku ribiri ma nico ribere ko ku mer ku dhaku pare. Pong’ yeny pa jadhogi mi gamiri. Biblia yero kumae: “Kud wukwer ribru karacelo, ma tek wukuripo pire ngo.” (1 Jukorinto 7:3-5) Pieno, wuwec i wi lembe nino thwolo thwolo wun ario. Cirolembe man nyang’ ku jadhogi mi gamiri, biketho tego i mer mwu.

LEMBE M’ICOPO TIMO:

• Wiwu kud uwil ninwang’u saa ma wubed ko iie wun ario kendwu

• Tim nyithilembe ma copo ketho jadhogi mi gamiri unen nia imare, calu ve nikiewo ire wec moko kunoke nimiyo ire nyathi giramia moko

3 PONJ NYATHIN PERI

LEMBE MA BIBLIA YERO: “Ugambre ma fodi i mukere ing’eyo lembagora ma leng’ ma copo dwoki riek kum both.” (2 Timoteo 3:15) Pangi lembe ma ibitimo pi niponjo nyathin peri. Kadok iwang’ nyoliri, copo pare mi gwoko lembe tie lembe ma wang’u ijo. Ma fodi nyathin peri ni ic, ecopo ning’iyo dwendi man niwinjere kite ma ibewinjiri ko. Som ire lembe ma fodi etie nyanok. Kadok ecopo nyang’ ungo i gin ma ibesomo de, som maeno bikonye nimaru somo piny kinde ma ebidongo.

Kud ipar nia nyathin peri tie nyanok akeca, nia ecopo ngo niwinjo kite ma ibeyero ko ire lembe iwi Mungu. Wek ewinji kite ma irwo ko ni Yehova. (Poi mi Cik 11:19) Kadok kinde ma wubetuko kude, wec kude i wi piny ma Mungu ucwio. (Zaburi 78:3, 4) Nok nok kinde ma ebedongo, nyathin peri binwang’u nia imaru Yehova man en de ebiponjo nimare.

LEMBE M’ICOPO TIMO:

• Kwai Yehova i rwo nia emi iri rieko mi ponjo nyathin peri

• Bed idok kendo kendo iwi wec kunoke lembe ma pigi tek ni nyathin peri kara eponj lembene ma fodi etie nyanok