Kite mi kwo kud akwiyacwiny ku wat peri

Gamiri tie acaki mi kwo manyen mi juruot. Kadok ibimediri nimaru man niworo junyodo peri de, ng’atu ma pire tek akeca iri kawoni i ng’om dong’ utie jadhogi mi gamiri. Ecopo bedo tek ni wat peri moko niyiyo lembuno. Re juk mi Biblia copo konyowu nibedo asu kugi i akwiyacwiny, man i saa marom eno, nicego i mer i gamiri mwu manyen.

1 MEDIRI NIBEDO KU NEN MABER IWI WAT PERI

LEMBE MA BIBLIA YERO: “Yung wuru ku meru.” (Juefeso 6:2) Kadok itie ku oro adi, icikiri nimediri niyungo man niworo junyodo peri. Ng’ei nia calu jadhogi mi gamiri tie bende nyathin pa ng’atini, ecikere nidieng’ pi junyodo pare. “Mer kumira nege ngo,” pieno, kud inen nia ve winjiri pa jadhogi mi gamiri ku jupagi ubemio iri can.​—1 Jukorinto 13:4; Jugalatia 5:26.

LEMBE M’ICOPO TIMO:

• Wek nilongo lembe m’akeca, calu ve niyero nia “nja nja jupewu gibed gicaya acaya” kunoke “gin moko ci m’abed atimo keni foyo ngo i meru”

• Kepim nineno lembe kite ma jadhogi mi nyom ubeneno

2 SAA MOKO, CUNGI KIKIKI I WI LEMBE M’ING’OLO

LEMBE MA BIBLIA YERO: “Nico biweko won ku min, man ebimoko kum cege: man gibidoko kum acel.” (Thangambere 2:24) Kan igamu dhaku kunoke igiero, junyodo peri copo niparu nia fodi asu itie i the loc migi, e gicopo caku nimondo akeca i lembe mi gamiri mwu nikadhu kiew.

In ku jadhogi mi gamiri re m’ucikuru nineno mupaka ma kani ma wubiketho igi, e wunyuth lembene igi ku mer. Wucopo niyero igi lembene terere ento re ku tegowic ungo. (Lembrieko 15:1) Jwigiri, wec ma yoo, man cirolembe bikonyowu kara wubed ku winjiri maber ku wat mwu man wumeduru ‘nireyo lembe the tiendwu i mer.’​—Juefeso 4:2.

LEMBE M’ICOPO TIMO:

• Kan ineno nia junyodo mwu ubemondo akeca i kwo mi ot mwu, wec i wi lembene ku jadhogi mi gamiri i saa m’ukwayere

• Wuwinjuru karacelo nia wubiyiko lembene nenedi