Cokiri ‘ucaku kwo i kwiyocwiny’

1, 2. Saul ugam umito nitimo ang’o i Dameski?

JURUWOTH m’upangu nitimo lembe ma rac gidhingo Dameski. Gibecigamu julub pa Yesu ma gidagu lee pi nitwiyogi man niterogi i Yeruzalem i wang’ judongo mi Sanedrini ma kwinyo udaru opo i igi.

² Nwang’u dong’ jatel wi ungu maeno ma nyinge Saul, udaru dikere i nek pa ng’atu moko.a Ceng’ini eni, egam ecwaku nia juwagi ucany Stefano ma jalub mandha pa Yesu, ku kidi kara etho. (Tic. 7:57–8:1) Calu ma ragedo ma Saul unyayu i kum julub pa Yesu ma kwo i Yeruzalem uromo ngo wang’e, edoko ve lum ma jucwinyo mac i kume pi nimewo lak ragedo amewa. Emito edar cen the dini ma julwong’o nia “Yojuni,” m’ebed eparu nia utie dini ma rac ve thong’om.​—Tic. 9:1, 2; nen sanduku ma thiwiye tie, “Dito ma saul ubino ko i Dameski” i mbaya mi 61.

3, 4. (a) Lembang’o m’unwang’u Saul? (b) Wabidwoko wang’ penji ma kani?

³ Rek kumeni, der moko ucaru Saul. Ju ma gibino wotho kugi gineno derne ento gizungo lembene lee man gikoso gin ma giyer. Saul udoko abinga, e epodho i ng’om. Ma wang’e copo neno piny ungo, ewinjo dwal moko uai kud i polo m’uwacu kumae: “Saul, Saul, pirang’o ibenyayu ragedo i kuma?” Wii Saul unyothere man epenjo kumae: “In i ng’a, Rwoth?” Dwokowang’ lembe ma e ma jumiyo ni Saul ufoudare magwei: “An a Yesu m’ibenyayu ragedo i kume.”​—Tic. 9:3-5; 22:9.

⁴ Wacopo nwang’u ponji ma kani i wec ma kwong’a ma Yesu uyero ni Saul? Ning’iyo i lembe m’utimere kinde ma Saul ubeloko cwinye copo miyo iwa bero ma kani? Man wacopo nwang’u ponji ma kani niai kud i kite ma cokiri utiyo ko ku saa mi kwiyocwiny m’uwok i ng’ey ma Saul uloko cwinye?

“Pirang’o ibenyayu ragedo i kuma?” (Tic mi Jukwenda 9:1-5)

5, 6. Wec ma Yesu uyero ni Saul ubeponjowa ku lembang’o?

⁵ I saa ma Yesu ung’olo Saul i gengi mi Dameski, epenje ngo kumae: “Pirang’o ibenyayu ragedo i kum julub para?” Calu ma wanwang’u malu no, eyero kumae: “Pirang’o ibenyayu ragedo i kuma?” (Tic. 9:4) Andha, Yesu bewinjo litho mi ragedo ma julub pare gibenwang’iri ko.​—Mat. 25:34-40, 45.

⁶ Tek jubesendi pi yiyoyic m’itie ko i Kristu, cwinyi ubed tek nia Yehova giku Yesu zoo ging’eyo lembe m’ibekadhu kud i iye. (Mat. 10:22, 28-31) Saa moko nyo pi kawoni Yehova romo kabu ngo amulaic perine. Poy nia Yesu ugam uneno kite ma Saul udiko ko cinge i nek pa Stefano, man kite ma Saul ubed uwayu ko julub ma weg bedopwe kud i udi migi i Yeruzalem. (Tic. 8:3) Ento Yesu utimo ngo lembe moko i saa maeca. Kadok kumeno de, nikadhu kud i bang’ Kristu, Yehova umiyo ni Stefano man ni julub mange de tego ma gibino ku yenyne pi nigwoko bedoleng’ migi.

7. Icikiri nitimo ang’o kara icir ragedo?

⁷ In de icopo ciro ragedo tek itimo lembe m’ulubo e: (1) Keci nigwoko bedoleng’ peri, kadok nwang’u lembang’o ngi. (2) Kway kony i bang’ Yehova. (Filip. 4:6, 7) (3) Wek culo kwor i cing’ Yehova. (Rum. 12:17-21) (4) Bed ku genogen ma nia Yehova bimiyo iri tego mi ciro nitundo m’ebijigo ko amulaicne.​—Filip. 4:12, 13.

“Umira Saul, Rwoth . . . uora” (Tic mi Jukwenda 9:6-17)

8, 9. Anania ugam uwinjere nenedi pi tic ma jumiyo ire?

⁸ I ng’ey ma Yesu udwoko wang’ penji pa Saul ma nia, “In i ng’a, Rwoth?” emedo kumae: “Ai malu imond i adhura, man jubiwok yero iri gin m’ukwayu itim.” (Tic. 9:6) Jutero Saul ma wang’e tho i pacu pare i Dameski, kaka m’ewok ekwiro iye cam man erwo pi nindo adek. I saa ma rom eno, Yesu unyutho pi Saul ni jalub moko ma nyinge Anania m’ubino kwo i adhura maeno mi Dameski, ma ‘Juyahudi zoo giweco pire ber’.​—Tic. 22:12.

⁹ Copere nia wi Anania ugam ulal! Kepar nyanok: Yesu Kristu m’uai ucer man m’utie Jatel wi cokiri ubino weco i bang’e athothi, man eng’iye pi tic moko ma segi. Ebino rwom ma segi andha, ento tije maeni utie tic ma tung’! Kinde ma juyero ni Anania nia ukwayu ecidh ewec ku Saul, edwoko kumae: “Rwoth, awinjo pi ng’atu maeni i bang’ dhanu dupa, man pi lembe ceke ma reco m’etimo i kum jumaleng’ peri i Yeruzalem. Man judongo mi julam gimiyo ire dito m’ebino ko kakeni pi nitwiyo dhanu ceke ma gibelwong’o nyingi.”​—Tic. 9:13, 14.

10. Inwang’u ponji ma kani iwi Yesu i kite m’eweco ko ku Anania?

¹⁰ Yesu ujuko ngo Anania kinde m’enyutho lembe m’ubedieng’o cwinye. Ento ekoro ire terere gin m’ukwayu etim. Bende enyutho ire yung kinde m’ekoro ire thelembe m’uketho ebemito nia ecidh etim tic maeno ma segi. Yesu uyero pi Saul kumae: “Ng’atu maeni utie agulu m’ang’iyo kara uyey nyinga uter ni thek, ni jubim, man ni nyithindho mir Israel. Kum abinyutho ire kamaleng’ masendi ceke m’ebisendere ko pira.” (Tic. 9:15, 16) Anania unyutho woro ni Yesu ndhundhu. Esayu kaka Saul ma janyay ragedo man eyero ire kumae: “Umira Saul, Rwoth Yesu m’uwok iri i gengi kinde m’ibebino kakeni uora kara icak neno piny man kara tipo ma leng’ uromi.”​—Tic. 9:17.

11, 12. Lembe m’ukadhu i kind Yesu, Anania, man Saul ubemiyo iwa ponji ma kani?

¹¹ Lembe m’ukadhu i kind Yesu, Anania man Saul uketho wabenyang’ i lembe dupa dit. Ku lapor, Yesu ubetelo wi tic mi rweyo lembanyong’a ku kero pare zoo tap calu m’elar eng’olo nia ebitimo. (Mat. 28:20) Kadok nwang’u i nindo ma tin Yesu ubeweco ngo i bang’ ng’atuman athothi de, re m’umbe jiji, ebetelo wi tic mi rweyo lembanyong’a nikadhu kud i bang’ jamiru mandha ma kawoni eketho iwi juruot pare. (Mat. 24:45-47) I the telowic pa Guriri m’utelowic, jubed juoro jurwey lembanyong’a man juyab yo pi ninwang’u dhanu ma gibemito giponj lembe lee iwi Kristu. Calu ma waneno i wic m’ukadhu, unwang’ere nia dupa m’i kind dhanu maeno gigam girwo pi ninwang’u telowic pa Mungu, e ndhundhu Jumulembe pa Yehova utundo i bang’gi.​—Tic. 9:11.

¹² Anania uyiyo tic ma jumiyo ire ku woro, e enwang’u mugisa. Nyo ibeworo lembang’ola mi miyo lembatuca mii, kadok nwang’u ticne benyayu lworo i ii? Ni jumoko, nicidho ot kubang’ ot man nirombo ku dhanu ma ging’eyo ngo, piko lworo lee i igi. Jumange ginwang’u nia etie lembe ma tek nirweyo ni dhanu kaka ma gibetimo iye tic migi, i gengi, kunoke nikadhu kud i telefon, nyo ke barua. Poy nia Anania uvoyo lworo pare man enwang’u rwom mi konyo Saul ninwang’u tipo ma leng’.b Anania unwang’u adwogi ma ber pilembe eketho genogen pare iwi Yesu man eneno Saul calu umin. Calu Anania, wan de wacopo voyo lworo mwa tek watie ku genogen ma nia Yesu ubetelo wi tic mi rweyo lembanyong’a, tek wakethara kaka jumange, man tek waneno kadok dhanu ma ng’oyo ndiri magwei de nia gicopo doko umego ku nyimego mwa.​—Mat. 9:36.

“Ecaku rweyo pi Yesu” (Tic mi Jukwenda 9:18-30)

13, 14. Tek ibeponjo Biblia ma re fodi ilimo ngo batizo, icopo nwang’u ponji ma kani niai kud i lapor pa Sauli?

¹³ Saul ugalu ngo nicaku tiyo ku ponji m’enwang’u. I ng’ey ma kume ukey, elimo batizo man ecaku dikere karacelo ku julub mi Dameski. Re etimo lembe mange de. “Ndhundhu ecaku rweyo pi Yesu i sinagog nia ng’atu maeni utie Wod Mungu.”​—Tic. 9:20.

¹⁴ Tek ibeponjo Biblia ma re fodi ilimo ngo, nyo ibibedo calu Saul man ibimaku yub mi limo batizo nimakere ku gin m’ibeponjo? Andha, Saul ugam uneno udu ma Kristu utimo ku wang’e, man m’umbe jiji eno umiyo amora mi tic i kume. Re dhanu mange de nuti ma gineno udu ma Yesu utimo. Ku lapor, ungu moko mi Jufarisayo unene kinde m’ebino keyo cing’ ng’atu moko m’utal, man Juyahudi ma wendgi lee ugam ung’eyo nia Yesu ucero Lazaru. Re ju ma dupa m’i kindgi gimediri asu niwinje ngo, gidoko kadok judhoge bende. (Mark. 3:1-6; Yoh. 12:9, 10) Tung’ ku dhanu maeno, Saul utimo alokaloka. Pirang’o Saul uyiyo nidoko jalub pa Kristu ma ke jumange giyiyo ngo e? Pilembe egam elworo Mungu nikadhu dhanu man ebino ku foyofoc lee pi kisa ma Yesu unyutho ire. (Filip. 3:8) Tek in de iyiyo ve en, ibiweko ngo gin moko acel de uceri ku dikiri i tic mi rweyo lembanyong’a man ku pong’o lembe m’ukwayere pi nilimo batizo.

15, 16. Saul utimo ang’o i sinagog ma tung’ tung’, man Juyahudi mi Dameski gijolo lembe pare nenedi?

¹⁵ Kepar pi ng’eicwiny m’unego udul dhanu man kite ma igi uwang’ ko lii kinde ma Saul ucaku rweyo pi Yesu i sinagog ma tung’ tung’! Gipenjo kumae: “Eni tie ngo ng’atu m’usendo ju ma gin’i Yeruzalem ma gibelwong’o nying’ maeni?” (Tic. 9:21) Kinde ma Saul ubino koro thelembe m’ucwale niloko paru pare iwi Yesu, enyutho “atira tira nia eni tie Kristu.” (Tic. 9:22) Nikoro lembe atira atira cwalu ngo dhanu zoo niyiyo. Eno copo wilo ngo paru mi jukuhaya kunoke mi dhanu ma gikethiri migi nikwo nimakere ku lemsuru. Re asu Saul uwekere ngo.

¹⁶ Oro adek i ng’eye, Juyahudi mi Dameski gibed gijai asu i dhu Saul. Tokcenne, gisayu yore mi nege cen. (Tic. 9:23; 2 Kor. 11:32, 33; Gal. 1:13-18) Kinde ma porolembe migine uwok kamaleng’, Saul ucaku timo tic pare i aponda man eweko julure ku katoko kud i wang’ gang’ kidi moko mir adhura. Luka ulwong’o ju ma gikonyo Saul niringo uthieno maeca nia “julub pare,” niwacu pa Saul. (Tic. 9:25) Wec maeni ubenyutho nia i kind ju ma giwinjo lembanyong’a ma Saul urweyo i Dameski, jumoko kokoro gijolo lembene ma ber man gidoko julub pa Kristu.

17. (a) Dhanu gibed gijolo lemandha mi Biblia i ayi ma nenedi? (b) Ukwayu wamedara nitimo ang’o, man pirang’o?

¹⁷ Kinde m’icaku nyutho pi lembanyong’a m’ibeponjo ni jupewu, jurimbi, man jumange, igam iparu nia gin ceke gibiyiyo lemandha mi Biblia pilembe etie terere. Saa moko nyo jumoko gifoyo, ento jumange gifoyo ngo. Copere nyo jupewu kunoke juruot peri ma dhe gibekwo kudi ve itie jadegi migi. (Mat. 10:32-38) Enke, tek ibemediri niteng’o copo peri mi nyamu i lembe nimakere ku Lembagora man imediri nikwo calu Jakristu, saa moko kadok ju ma gikethiri ni judegi peri de giromo loko paru migi.​—Tic. 17:2; 1 Pet. 2:12; 3:1, 2, 7.

18, 19. (a) Kinde ma Barnaba ucero bang’ Saul, adwogine ubino ang’o? (b) Wacopo lubo lapor pa Barnaba giku Saul nenedi?

¹⁸ Kinde ma Saul umondo i Yeruzalem, m’umbe jiji julub ginyang’ kpe nia nyo andha en de edoko jalub. Ento saa ma Barnaba ucero bang’ Saul, jukwenda giyiye, man ebedo karacelo kugi pi nindo moko. (Tic. 9:26-28) Saul ubino ku wang’e, enke lewic ubino nege ngo i kum lembanyong’a. (Rum. 1:16) Erweyo i Yeruzalem ku tegocwinye, ma ke de i kabedo maeni re m’enyayu ragedo ma tek i kum julub pa Yesu Kristu. Ndiri umaku ju ma gibed gitimo ku Saulgi saa ma gineno nia jumayu jadit migi, e gisayu yore mi nego de en nica. Biblia ukoro kumae: “Saa m’umego giwinjo lembe maeni, giloro [ku Saul] piny i Kaisaria man giwok giketho ecidho i Tharso.” (Tic. 9:30) Saul ujwigere i the telowic ma Yesu umiyo nikadhu kud i cokiri. Saul man cokiri bende unwang’u berone.

¹⁹ Nen nia Barnaba umiyere pi nikonyo Saul. M’umbe jiji timo maeni ma ber uketho jutic pa Yehova maeni ma weg amora gitudo mer ma tek mandha i kindgi. Calu Barnaba, nyo in de itie ayika nikonyo ju m’utundo ma nyen i cokiri, nirweyo kugi man nikonyogi kara gimediri i thenge mi tipo? Tek itimo kumeno ibinwang’u mugisa lee mandha. Kan itie jarwey lembanyong’a ma nyen, nyo in de icopo yiyo kony ma jubemito nikonyi ko calu ma Saul utimo? Ibimedo bodho peri mi rweyo lembanyong’a kan ibed irweyo karacelo ku jurwey m’uteng’ini i tije, anyong’a peri bimedere, man wubitudo mer ma bigalu pi kwo mwu zoo.

“Dhanu dupa gicaku yiyo Rwoth” (Tic mi Jukwenda 9:31-43)

20, 21. Dhanu pa Mungu mi rundi ma con ku ma kawoni gitiyo nenedi ku kare m’unen kinde ma gibino “kwo i kwiyocwiny”?

²⁰ I ng’ey ma Saul udoko Jakristu man ecidho museme i Yeruzalem, “cokiri ma n’i Yudea, man i Samaria gicaku kwo i kwiyocwiny.” (Tic. 9:31) Julub gitiyo nenedi ku saa ma ber maeni? (2 Tim. 4:2) Biblia uyero nia, “gidoko tek.” Jukwenda karacelo kud umego mange ma gibino ku rwom i cokiri giteng’o yiyoyic mi julub; bende gimaku tela i cing’gi pilembe cokiri “ubino wotho i lworo pa Yehova man i jukojuk ma tipo ma leng’ ubemiyo.” Ku lapor, Pethro utiyo ku saa maeno pi niteng’o julub ma n’i adhura mi Luda i pambu mi Saron. Kero m’etimo uketho ju dupa ma gibed gikwo i kabedo maeca “gilokiri i bang’ Rwoth.” (Tic. 9:32-35) Julub gigam giketho ngo wigi i kum lembe mi kwo migi gigi ento gimiyiri pi nigwokiri i kindgi man nirweyo lembanyong’a. Adwogi mi lembene ubino ang’o? Cokiri “umedere ameda.”

²¹ I kum oro 1990, Jumulembe pa Yehova mi ng’om ma dupa gicaku “kwo i kwiyocwiny” ma rom kumeno. Ungu mi lemgamba ma tung’ tung’ m’ubino sendo dhanu pa Mungu pi oro ma dupa gijik, man kaka moko jucaku rweyo lembanyong’a m’umbe peko kadok nwang’u jukejukwero de. Kaka mange lundo juthumo wang’ cik m’ukwero tic mwa. Jumulembe pa Yehova elufu piere swa girweyo kamaleng’ kinde ma kare unen igi, e adwogine ubino dwong’ akeca.

22. Icopo tiyo nenedi ku nindo m’ibekwo i iye i kwiyocwinyi?

²² Nyo ibetiyo ma ber ku bedagonya m’itie ko? Tek ibekwo i ng’om ma Jukristu gitie agonya i iye, Sitani copo mito nia imiyiri zoo nisayu jukupiny kakare nisayu Ker. (Mat. 13:22) Kud iwek wii uwil. Ka fodi wubekwo i nindo mi kwiyocwiny, tii ma ber ku kare maeno. Bed ku pidoic ma nia eno tie kare mi miyo lembatuca mii man mi teng’o cokiri. Poy nia lembe copo lokere rek i kwo peri.

23, 24. (a) Wanwang’u ponji ma kani niai kud i lembe ma Biblia ukoro iwi Thabitha? (b) Wacikara nitimo ang’o?

²³ Wakewec iwi lembe m’unwang’u jalub ma nyinge Thabitha, kunoke Dorka.c Ebed ekwo i Yopa, adhura moko m’ubino bor ungo ku Luda. Nyamego maeno ma won bedopwe ubed utiyo ku saa man bodho pare ku rieko, m’epong’ “ku tic ma beco man ebed emiyo giramiya dupa ni jucan.” Rek kumeni, twoyo umake man etho. Tho pare unyayu can ma lee i julub mi Yopa, asagane i montho m’ebed etimo igi bero dupa. Kinde ma Pethro utundo i ot ma jubino yiko iye avuje pi kuny, etimo udu ma nwang’u fodi jakwenda pa Yesu Kristu m’utimo acel de mbe. Pethro urwo man ecero Thabitha! Kepar pir anyong’a m’unego montho karacelo ku julub mange kinde ma Pethro unyutho igi Thabitha ma dong’ utie kwo! Lembe maeno utielo cwinygi lee mandha pir amulaic ceke ma nwang’u ubebino i wang’gi! Ku lemandha, udu maeno “ugam ung’eyere i Yopa ceke, man dhanu dupa gicaku yiyo Rwoth.”​—Tic. 9:36-42.

²⁴ Lembe maeni ma mulo adunde ma Biblia ukoro iwi Thabitha ubemiyo iwa ponji ario ma pigi tek. (1) Kwo kadhu pio akeca. Dong’ pire tie tek lee nia wabed ku nying’ ma ber yor i bang’ Mungu ka fodi kare unen! (Ekl. 7:1) (2) Genogen mi cer bipong’o andhandha. Yehova uneno lembe dupa ma beco ma Thabitha utimo, man emiyo ire sukulia. Wan bende ebipoy pi tic mwa ma tek man ebicerowa tek watho i wang’ Armagedon. (Ebr. 6:10) Dok nwang’u kawoni wabekadhu kud i “saa mi peko” kunoke wabekwo “i kwiyocwiny,” wek wamedara nimiyo lembatuca mii iwi Kristu.​—2 Tim. 4:2.