Nwang’ ponji ikum abidhe ma Wonabali ubidho ko Yesu

Tap ing’ei ma Yohana umio batizo ni Yesu, tipo pa Mungu utelo wie i yamba. Ebino ku lembe dupa m’ukwayu enyam ie. I saa m’emaku ie batizo, ‘polo ugam uyabere ire.’ (Matayo 3:16) Pieno egam epoi ikum lembe ma Won uponje ko man m’ebed etimo saa ma fodi etie i polo. M’umbe jiji, ebino ku lembe dupa m’ukwayu enyam igi!

Yesu utimo nindo 40 i yamba, dieceng’ ku diewor. I nindo maeno zoo gin moko acel de mbe m’ecamu. Ing’eye kinde ma kec usage, Sitani Wonabali ubino ibang’e pi nibidhe, eyero ire: “Tek in i wod Mungu, ng’ol nia kidi maeni dok ni kwen.” (Matayo 4:3) Yesu ukwero abidhe maeno, pilembe eng’eyo nia etie rac nitio ku tego m’etie ko i kite mir udu, pi nipong’o yeny pare gire.

Wonabali ujik ungo keno. Esayu kit abidhe mange. Eketho Yesu i amulaic nia epiei piny ku wi usimbru mir hekalu. Ento Yesu upimo ngo nyanok de nitimo lembe maeno ma wang’u ijo. Yesu utio ku Lembagora pi ninyutho nia etie rac niketho Mungu i amulaic.

Kendo i abidhe mir adege, ku yo moko, Wonabali unyutho “ire ker ceke m’i ng’om, ku dwong’ne de; man ewacu ire kumae, gin maeni ceke abimio iri, tek ibipodho piny irwo de i bang’a.” Yesu ukwero kendo magwei, eyero kumae: “Ai kakeni, Jok!” (Matayo 4:8-10) Eweko ngo kaka ni abidhe ucwale nitimo lembe marac, kum eng’eyo nia thier maleng’ jucikiri nitimo ni Yehova kende. Andha, eng’io nigwoko bedoleng’ pare ni Mungu.

Wacopo ninwang’u ponji ikum abidhe maeno, man ikum kwer m’ekwero ko abidhene. Abidhe maeno utimere andha, eno ubenyutho nia Wonabali utie ng’atu m’unuti andha, etie ngo paru moko marac ma ni i dhanu calu ma jumoko beparu. Etie ng’atu m’utie andha, re ma kume nen ungo. Lembe maeno ubenyutho bende nia ker ceke mi ng’om maeni utie pa Wonabali, man en re m’ebetelo wigi. Ka nwang’u ker maeno utie pare ngo, nyo eromo tio kude pi nibidho Kristu?

M’umedo maeno, Wonabali uwacu nia tekene Yesu urwo ire tap, ebimio ire ker ceke mi ng’om maeni. Wonabali copo nibidho wan bende i yo marom, saa moko ecopo ketho lembe moko iwang’wa, m’utelwa kara wadok julonyo, kunoke wabed ku dito. Etie iwa ni lembe mi rieko nilubo lapor pa Yesu, ma wagwok ko bedoleng’ mwa ni Mungu kadok nwang’u wanwang’ara iwang’ abidhe ma lee de! Re poi nia Wonabali uweko Yesu pi “nindo moko” kende. (Luka 4:13) Lembuno copo nitimere iwa bende, pieno wan de wacikara nibedo ku wang’wa.