Yesu uponjo iwi lalu gamiri man iwi maru awiya

Kinde ma Yesu ku julubne giai kud i Galilaya, gikadhu kulo Yordani man ging’olo yo piny kud i Perea. Saa ma Yesu ubino i Perea wang’ ma tokcen, ekoro paru pa Mungu iwi lalu gamiri ni Jufarisayo. (Luka 16:18) Kawoni giwodho penji kendo iwi lembe maeno pi nimulo i Yesu.

Musa ukiewo nia ng’atini copo riemo dhaku kan enwang’u “lemblewic moko” i kume. (Poi mi Cik 24:1) Paru ubino tung’ tung’ ikum thelembe ma copo ketho julalu gamiri. Jumoko giyio nia jucopo lalu gamiri kadok iwi thelembe ma tijgi mbe de. Eno uketho Jufarisayo gipenjo Yesu kumae: “Cik uyio ni ng’atu moko ya eriem cege kum lembe ceke?”​—Matayo 19:3.

Kakare nijengere iwi paru pa dhanu pi niculo wang’ penji migi, Yesu ukoro cuu thelembe m’uketho Mungu ucaku the gamiri, eyero kumae: “Wusomo ngo, nia ng’atu m’ucwiogi ku kwong’a ecwiogi ni nico ku nyaku, man ewacu kumae, Kum lembe nini nico biweko won ku min, man ebibedo ndhu ku cege; gin ario de gibidoko ni kum aceli? Kum kumeno gibibedo ario kendo ngo, ento ndhu kum acel. Ka kumeno gin ma Mungu ribo karacelo, dong’ dhanu kud upok kindgi.” (Matayo 19:4-6) Kinde ma Mungu uribo Adamu giku Eva i gamiri, epangu ngo nia nindo moko kindgi ubin ulal.

Jufarisayo gimaku theleb Yesu ndhu keca, gipenje kumae: “Ka ke yang’ Musa ng’olo ya jumi waraga ma juwodho ko mon mir ang’o, jukethe cen de?” (Matayo 19:7) Yesu udwoko igi kumae: “Musa uyio ya wuwodh mon mu ni kum nwang’ cwinywu: ento ugambre ku kwong’a ebedo kumeno ngo.” (Matayo 19:8) Wec ma nia “ku kwong’a” ubenyutho ngo rundi pa Musa, ento ubenyutho gamiri ma kwong’a ma Mungu ucaku there i Eden.

Ing’eye Yesu ukoro lemandha moko ma pire tek, ewacu kumae: “Man awacu iwu kumae, ng’atu ma tek biwodho cege, ma ku pi tarwang’ ungo, [ku dhu Jugiriki, por·neiʹa], eporo mange de nwang’u egiero gier.” (Matayo 19:9) Eno nyutho nia Giragora uyio julal gamiri kende kende ka ng’atu acel utimo tarwang’.

Lembuno ucwalu julub niyero kumae: ‘Tek lembe pa nico bedo kumeno ku cege, nwang’u gamiri kulokane mbe.’ (Matayo 19:10) Andha, ka ng’atini ubemito mondo i gamiri, ecikere ning’eyo nia ebibedo i ie pi nja!

Iwi bedo jamusuma ke, Yesu ukoro nia jumoko gitie kumeno pilembe ginyoliri ma gimbe ku tego mi timo ribiri. Jumange ke juwodho tego migi mi timo ribiri mi tek tek. Ento jukurucel gitwoniri gigi kud ava mi timo ribiri, kara gimiiri lee i tic mi Ker. Pieno Yesu uketho cwiny julubne kumae: “Ng’atu ma lembe nini [musuma] jole ire, wek ejole”.​—Matayo 19:12.

Kawoni dhanu ucaku kelo awiya migi ma thindho ibang’ Yesu. Re julub gikwerogi, copere gibemito ngo dhanu ucung’iri ikum Yesu. Saa ma Yesu uneno gibekwero, lembene uton i ie man ewacu igi kumae: “Wuwek nyithindho ma thindho gibin i bang’a; kud wukwergi: kum Ker pa Mungu en e mi wagi joni. Andha ayero iwu kumae, ng’atu ma tek bijolo Ker pa Mungu calu nyathin ma nyanok ungo, ebimondo i ie ki ngo.”​—Marko 10:14, 15; Luka 18:15.

Ponji maeno pire tek mandha! Wacikara nibedo mol man ayika niyio ponji calu awiya ma thindho, eno biketho wabijolo Ker pa Mungu. Kawoni Yesu unyutho mer pare ibang’ awiya ma thindho; eting’ogi i kore man emio igi mugisa. Ebenyutho kit mer maeno ni dhanu ceke ma gibejolo “Ker pa Mungu calu nyathin ma nok.”​—Luka 18:17.