PONJI MIR 4

Nilar yiko paru mi dhanu i wang’ somo giragora

Matayo 22:41-45

LEMBE M’ICOPO TIMO: I wang’ nisomo giragora moko, lar iyik paru mi juwinj peri cuu.

Ng’ei thelembe m’uketho ibecisomo giragora. I wang’ nisomo giragora moko, yer lembe ma copo telo nen mi juwinj iwi paru ma pire tek m’ibemito ketho nwoc i wie i giragorane.

Nen lembe ma tung’ tung’ m’ugwaku kum giragorane. Tek ibecisomo verse moko, man ibenyutho nia ng’a m’uweco i versene, kunoke ng’a m’ukiewo buku ma versene nwang’ere i ie, yer lembe ma tap.
Keth junen nia Biblia ubamu zoo. Tek ibeweco ku dhanu ma giyio Mungu, nyuth igi kamaleng’ nia Biblia tie Lembe pa Mungu. Eno biketho gibinyang’ cuu nia rieko mandha nwang’ere i Biblia kende.
Mii ava ma julub ko giragora. Penj penji, kunoke wodh lembe moko ma verse re ma bidwoko wang’e, kunoke nyuth cik mir ukungu ma lembakora moko mi Biblia bikonyo juwinj ginyang’ i ie ma ber.

Par pi lembe ma ju m’uwinji gidaru ng’eyo iwi giragora m’ibecisomo man iwi lembe m’ibeponjo. Kadok juwinj ging’eyo giragorane ma ber de, i wang’ nisome, lar iyer wec ma copo mio igi ava mi lube, man konygi gikwany lembe moko ma nyen kud i giragorane.