PONJI MIR 7

Niyero wec kubang’e kubang’e

Luka 1:3

LEMBE M’ICOPO TIMO: Tii ku lembe m’isayu man m’inwang’u nia tie tap, pi nikonyo ju m’ubewinji ginyang’ i ponji m’ibemio.

Tim sayusac i kaka m’anzilo. Jeng ponji peri iwi Biblia, man woth besome. Kan ibemito weco iwi lembe mi rieko mi ng’om, iwi lembang’eya, iwi lembe m’ugam utimere, kunoke ibemito tio ku paru moko mange pi nitielo the ponji peri, lar inyang’ cuu nia gin m’ibeciyero utie andha kumeca.
Kor lembene ve m’etie ko. I wang’ nitio ku giragora moko, kelar inyang’ nia Yehova umito ponjo ang’o nikadhu kud i giragorane. Keth ponji peri uromb ku lembe mange mi Biblia, man bende ku girasoma pa ‘jamiru mandha man ma riek.’ (Mat. 24:45) Tek ibetio ku paru moko m’uai i girasoma m’uweko mi Jumulembe pa Yehova, kud ilok kum lembe ma ng’atu m’ukiewe uyero.

Kud imed kor lembe nikadhu mukero, man kud icor kwan swa. Bed ku weng’i: ka juyero, “dhanu moko” kud idwoke ni “dhanu ma pol,” “nindo moko” kud udok nia “nja,” man “copere” kud udok ni “m’umbe piem.”
Nyam i lembe ku juwinj. Kan iai isomo giragora moko, kunoke iai iweco iwi lembe moko m’inwang’u, penj penji moko ku rieko kunoke mii lapor iwi lembene pi nikonyo juwinj ginyang’ ma ber.