PONJI MI 25
Yeny pa Mungu tie ang’o piwa?
Biblia unyutho nia kwo mi dhanu tie adundo man epong’ ku peko. (Yob 14:1) Nyo eno re m’utie kit kwo ma Mungu ubemito wabed ko? Kan ungo, yeny pare tie ang’o piwa? Nyo yeny parene bitimere nindo moko de? Biblia udwoko wang’ penji maeno i ayi ma romo juko cwinywa. Wakenen.
1. Yehova ubemito wabed ku kwo ma nenedi?
Yehova ubemito wabed ku kwo ma ber magwei. Pirang’o wabeyero kumeno? Kinde m’ecwiyo dhanu ma kwong’a, niwacu Adamu giku Eva, ekethogi i podho mir Eden, m’ubino paradizo, niwacu kabedo ma leng’ ma yerere ngo. I ng’eye, “Mungu mio mugisa igi: man Mungu wacu igi kumae, Wunyol, wumedru de, wupong’ ng’om, man wudwoke wor iwu.” (Thangambere 1:28) Yehova umito nia ginyol awiya, gidwok ng’om zoo ni paradizo, man gigwok lei bende. Yeny pare ubino nia dhanu ceke gibed ku yotkum ma leng’, man gikwo rondo ku rondo.
Kadok lembe ceke unyothere man gin ma nwang’u ekeco pi dhanu ubetimere ngo de,a re yeny parene ulokere ngo. (Isaya 46:10, 11) Asu ebemito dhanu ma gibewore gikwo rondo ku rondo, ke i ng’om ma leng’ mandha.—Som Lembanyutha 21:3, 4.
2. Wacopo timo ang’o kara wakwo kud anyong’a tin eni?
Yehova ucwiyowa ku “yeny mi tipo” i iwa, niwacu ava mi winjo lembe pare, mi ng’eye, mi timo ire man mi lubo telowic pare i kwo mwa. (Som Matayo 5:3-6.) Ebemito nia wabed ku winjiri ma ceng’ini kude, ‘wawoth i yo pare ceke, wamare, man watim ire kud adundewa ceke.’ (Poi mi Cik 10:12; Yakobo 2:23) Ka wabeworo Yehova, wacopo kwo kud anyong’a mandha kadok wabenyego ku peko ma tung’ tung’, pilembe nwang’u wabekwo nimakere ku cik pare.
MED NYANG’ PERI
Wakenen kawoni mer ma lee ma Yehova unyutho kinde m’ebeyiko ng’om piwa, man wanen gin ma Lembe pa Mungu ubeponjo iwi thelembe m’uketho Mungu ucwiyowa.
3. Yeny pa Yehova utie nia dhanu gibed ku kwo ma ber
Nen VIDEO, man wuwec iwi penji m’ulubo e:
Pirang’o Mungu ucwiyo ng’omi?
Biblia uyero nia Yehova uketho “kwo ma rondo ku rondo” i adunde dhanu (Eklizia 3:11, NWT). Wuwec iwi penji m’ulubo e:
Nimakere ku verse maeni, yeny pa Yehova tie ang’o piwa?
4. Yeny pa Yehova ulokere ngo
Som Zaburi 37:11, 29 man Isaya 55:11, man i ng’eye wuwec iwi penji m’ulubo e:
Wang’eyo nenedi nia lembe ma Yehova ukeco piwa ulokere ngo?
Ecopere nidoyiko kendo ot ma judaru wenjo man m’unyothere. Kumeno bende, kadok dhanu udaru nyotho ng’om maeni de, Mungu bidoyike man ebidoko kendo ma leng’ pi dhanu m’umare
5. Woro Yehova re ma miyo iwa anyong’a mandha i kwo
Ning’eyo thelembe m’uketho wabekwo romo miyo iwa anyong’a. Nen VIDEO, man i ng’eye wuwec iwi penji m’ulubo e:
Bero ang’o ma Terumi unwang’u kinde m’etuc ning’eyo thelembe m’anzilo mi kwo?
Som Eklizia 12:13, man i ng’eye wuwec iwi penji m’ulubo e:
Yehova utimo iwa lembe dupa dit ma beco. Dong’ wan ke wacikara nitimo ang’o ire?
NG’ATU MOKO ROMO PENJI KUMAE: “Pirang’o Mungu ucwiyowa ma ke eng’eyo nia wabitho athoa?”
Icopo dwoko nenedi?
I ADUNDO
Yehova ubemito wakwo kud anyong’a man rondo ku rondo iwi ng’om keni, ma lembe ceke tie leng’ man beco kwa iwa. Ka wabetimo ire kud adundewa ceke, kwo mwa bedo kud anyong’a mandha, kadok i nindo ma tin eni.
Penji mi poyowic
Yeny pa Yehova ular ubino ang’o pir Adamu giku Eva?
Wang’eyo nenedi nia lembe ma Yehova ukeco kunoke mito pare pi dhanu ulokere ngo?
Iromo timo ang’o pi nibedo ku kwo mir anyong’a mandha?
TIM SAYUSAC
Nen gin m’unyutho nia podho mir Eden ubedo nuti andha.
Nen gin m’uketho cwinywa tie tek nia ng’om mwa eni bibedo nuti nja ku nja de.
Nen gin ma Biblia uyero nia copo konyi kara ibed ku kwo mir anyong’a.
Jalwo moko ubino paru nia etie ku piny ceke. Re nen gin n’uketho edok enwang’u nia karaman ekoso lembe moko i kwo pare.
a I thiwiwec m’ulubo, wabineno gin m’uketho tin wabekwo ngo calu ma Mungu ukeco.