PONJI MI 48
Ng’ii jurimbi ku rieko
Jurimo ma ceng’ini gimedo mutoro mwa i saa mir anyong’a, man gikonyowa i saa mi peko bende. Ento Biblia ucimo wang’wa nia dhanu ceke ngo re ma tie jurimo ma beco. Dong’ wacopo ng’iyo jurimo ma beco nenedi? Nyithi thiwiwec m’ulubo e bidwoko wang’ penji maeno.
1. Jurimbi giromo bedo kud atelatela ma nedi i wii?
Wabed wayenyo kwanyu timo mi dhanu ma wabenwang’ara kugi saa ma pol. Nik’ebed timo ma ber kunoke ma rac, wabikwanye kokoro kadok wabenwang’ara kugi kaka ma rom kunoke nyo wabedikara kugi i yore mir internet. Biblia uyero lemandha, nia “ng’atu ma wotho ku jurieko bidoko riek, ento ng’atu m’ubedikere ku jukusegu (niwacu ju m’umaru ngo Yehova) lembe bitime.” (Lembrieko 13:20, NWT) Jurimo m’umaru Yehova man m’ubetimo ire gicopo konyi kara kindwu medere nibedo ceng’ini ku Yehova man kara imak yub ma cuu. Ento jurimo m’umaru ngo Yehova, niwacu ma gitie ngo i cokiri, giromo ketho kindwa cot acota kude. Eno re m’uketho Biblia ubekwayuwa nia wang’ii jurimbwa ku rieko. Ka jurimbwa tie ju m’umaru Mungu, gibibedo kud atelatela ma cuu i wiwa man wan bende wabibedo kud atelatela ma cuu i wigi. Bende, wabibedo ku kaka mi ‘medara nitielo cwinywa i kindwa man niteng’ara i kindwa.’—1 Juthesaloniki 5:11.
2. Jurimo m’ibeng’iyo romo ketho Yehova winjere nenedi?
Ka Yehova ubeng’iyo jurimbe, elondogi alonda. Biblia yero nia jurimbe ma ceng’ini tie “ju m’atira.” (Lembrieko 3:32) Dong’ Yehova copo winjere nenedi ka wan walund wabeng’iyo jurimo m’umare ngo? Ma jiji mbe, eromo foyo ngo nyanok de! (Som Yakobo 4:4.) Ento ka wakwero jurimo ma reco, man watheyo mer ku Yehova man bende ku ju m’umare, wabifoyo iye man ebilondowa wabed jurimbe.—Zaburi 15:1-4.
MED NYANG’ PERI
Wakenen kawoni nia pirang’o pire tie tek lee ya wang’ii jurimo m’atira, man wanen kite m’icopo theyo ko mer ma bibedo iri ni mugisa.
3. Nen ber ku jurimo ma reco
Dhanu ceke m’umaru ngo Mungu man cik pare, gitie jurimo ma reco. Nen VIDEO, man i ng’eye wuwec iwi penji m’ulubo e:
Ka waneno ber ungo, wacopo caku theyo mer ku jurimo ma reco nenedi?
Som 1 Jukorintho 15:33, man i ng’eye wuwec iwi penji m’ulubo e:
Kit dhanu ma nedi ma copo bedo jurimo ma reco? Pirang’o?
Som Zaburi 119:63, man i ng’eye wuwec iwi penji m’ulubo e:
Icopo ng’eyo nenedi nia ng’atini romo bedo jarimo m’atira?
Nyingyen acel m’utop romo tobo wagi m’udong’. Ka jarimo ma rac ke romo nyothi rukani?
4. Kadok ju m’ukoc kudwa romo doko iwa ni jurimo ba beco
Biblia ukoro pi Daudi giku Yonathan ma gibino jumaco moko ario mi Israel ma con. Oro migi ugam ukoc bor dit man Yonathan ubino wod ubimo bu, re gibino jurimo mi tuko ngo. Som 1 Samwil 18:1, man wuwec iwi penji m’ulubo e:
Pirang’o jurimbwa gicikiri nibedo ngo kwa dhanu ma watie kugi adiyo kunoke mi kit kwo mwa?
Som Jurumi 1:11, 12, man i ng’eye wuwec iwi penji m’ulubo e:
Jurimo m’umaru Yehova gicopo tielo cwinygi i kindgi nenedi?
I video m’ulubo e, kenen kite m’umego moko m’aradu utuc ninwang’u ko jurimo kaka ma nwang’u egeno ngo nyanok de. Nen VIDEO, man i ng’eye wuwec iwi penji m’ulubo e:
I video maeni, pirang’o cwiny junyodo p’Akil ubino dieng’ pi jurimbe mi kalasi?
Lembang’o m’ukeutelo Akil i bang’ jurimo maeca ku kwong’a?
Edok enwang’u jarimo m’atira nenedi?
5. Kite mi nwang’u man mi bedo jarimo ma cuu
Nen kite m’iromo nwang’u ko jurimo ma beco, man kite ma in giri de iromo bedo ko jarimo m’atira. Nen VIDEO.
Som Lembrieko 18:24 man 27:17, man i ng’eye wuwec iwi penji m’ulubo e:
Jurimo mandha gicopo konyiri nenedi i kindgi?
Nyo itie ku jurimo ma beco ma kumeno? Kan ungo, icopo timo ang’o kara inwang’ moko?
Som Jufilipi 2:4, man i ng’eye wuwec iwi penji m’ulubo e:
Kara inwang’ jurimo ma beco, ubekwayu in giri ilar ibed jarimo ma cuu. Icopo nyuthiri nia itie jarimo ma cuu nenedi?
Kara inwang’ jurimo ma beco, kwayu in giri ilar ibed jarimo ma cuu
DHANU MOKO BEYERO KUMAE: “Kakare nikoso jurimo magwei, cika ke ibed ku jarimo moko kokoro kadok ma rac. E rac e rac ekonyo.”
In ke icopo yero ang’o?
I ADUNDO
Ka wabeng’iyo jurimbwa ku rieko, wabifoyo i Yehova man wan giwa de wabinwang’u bero.
Penji mi poyowic
Pirang’o Yehova neno ku tek jurimo ma wabeng’iyo?
Wacikara niuro kit jurimo ma nenedi?
Iromo timo ang’o pi nitwiyo rimo ku dhanu m’umaru Yehova?
TIM SAYUSAC
Nen kite ma jurimo m’atira gicopo konyo kowa i saa mi peko.
“They mer kud umego ma fodi ajiki utundo ngo” (Otkur ma Wiw, dwi mir 11, 2019)
Kepar lembe moko m’iromo timo kara inwang’ jurimo ma beco.
Lembang’o m’ukwayu ing’ey iwi jurimo ma junwang’u i internet?
I kpawa ma thiwie tie, “Ava wego bino nega lee,” kenen gin m’ucwalu jalwo moko nidong’iyo jurimo mange.