Dwok winjiri peri ku Yehova udok kendo tek

KUBANG’ oro, rombe dupa ma pigi tek ma jukejukoyo kud i cokiri mi Jukristu gibedwogo. Kepar kite m’anyong’a bedo ko “lee i polo” tek ng’atuman m’i kindgi udwogo! (Luka 15:7, 10) Kan idwogo i cokiri, ng’ey nia Yesu, jumalaika man Yehova en gire de gitie ku mutoro ma lee nineno nia idoko acel mi cokiri kendo. Re kinde m’ibedwoko winjiri peri ku Yehova udok kendo tek, icopo nweng’iri ku peko ma tung’ tung’. Pekone moko tie ang’o? Lembang’o ma romo konyi nivoyogi?

PEKO M’ICOPO NWENG’IRI KO

Umego ku nyimego ma dupa ginwang’iri nia fodi asu cwinygi utur kadok i ng’ei ma gidaru dwogo i cokiri de. Saa moko nyo ibenyang’ i kite m’ubimo Daudi uwinjere ko. Kadok i ng’ei ma Mungu uweko dubo pare de, asu eyero kumae: “Kier usagu i kuma.” (Zab. 40:12; 65:3) Kadok ng’atini udaru dwogo i bang’ Yehova de, re asu pidocwinye copo sende man lewic de romo nege pi oro ma dupa. Nyamego Isabelle utimo oro ma kadhu 20a woko kinde ma jukoye kud i cokiri. Ewacu kumae: “Niyiyo nia Yehova romo timo ira kisa ubino lembe ma tek dit.” Tekene cwinyi utur, icopo doko ng’ic kendo i thenge mi tipo. (Rie. 24:10) Dong’ itim kero timba lembuno kud unweng’i.

Jukurucel lundo lworo makugi, ka giparu pi tic m’ukwayu gitim kara winjiri migi ku Yehova udok kendo kakare. I ng’ei m’Antoine udwogo i cokiri, ewacu kumae: “Agam anwang’u nia ve wiya udaru wil ku lembe ceke m’aponjo man m’abed atimo ma nwang’u fodi jukoya ngo.” Ka ng’atini ubewinjere kumeno, eromo miyere ngo kud amora i lembe mi tipo.

Kenen lapor moko: wakemak nia avuvu ma tek ukoto man urungo ot pa ng’atu moko ku rac; ndiri copo maku ng’atu maeno kan eparu pi saa man tic ma bikwayere pi nigiero ode kendo. Kumeno bende, ka winjiri peri ku Yehova unyothere pi dubo ma pek m’itimo, icopo nwang’u nia bikwayu itim tic ma tek kara iyik winjirine udok kakare. Re ibitimo lembuno kendi ngo.

Yehova ubekwayuwa kumae: “Wubin kawono man wek [wayiku] lembe karacelo.” (Isa. 1:18) Idaru timo tic ma tek pi niyiko lembe udok atira. Yehova umeri pi kero maeno m’itimo. Kepar nyanok: Dwogo m’idwogo ko i bang’ Yehova uketho ecopo tiyo kudi ni lapor pi ninyutho ma cwinye tek nia Sitani tie jandra!​—Rie. 27:11.

Calu m’idwogo i bang’ Yehova, nyutho nia idaru coro ceng’ini kude, man eng’olo nia en de ebicoro ceng’ini kudi. (Yak. 4:8) Etie rac ungo ka jumange gibeneno nia idwogo kendo i cokiri; re ubekwayu itim lembe mange m’uweko maeno. Mito imediri nidwoko mer m’i kindwu ku Wuru man Jarimbi ma Yehova udok tek. Icopo timo lembuno nenedi?

KETH LEMBAKECA M’ICOPO TUNDO I KUMGI

Kepim niketho lembakeca m’iromo tundo i kumgi. Ng’ey nia kathere peri mi tipo, niwacu ng’eyong’ec m’itie ko iwi Yehova man iwi paradizo m’eng’olo pi nindo m’ubino ubedo kakare. Ento eno ubekwayu nia ipidh ng’iyo mi Jukristu kendo; ku lapor, nirweyo lembanyong’a wang’ ma pol, nicidho i coko, man nibedo thirithiri karacelo kud umego ku nyimego. Kenen lembakeca moko m’icopo ketho.

Bed iwec nja i bang’ Yehova. Wuru ma Yehova ung’eyo nia tek pidocwinyi ubedoti asu asu pi kosa m’itimo, ecopo bedo tek iri nirwo i bang’e. (Rum. 8:26) Ento ‘mediri nirwo;’ kor ni Yehova nia ibemito dit ibed jarimbe. (Rum. 12:12) Umego Andrej ubepoy kumae: “Pidocwinya ubed udota lee mandha pi kosa m’atimo, man lewic ubed unega magwei. Re kan aai arwo ci, awinjara ma ber, cwinya de kwiyo suu.” Tek ibesayu kpe gin m’icopo rwo pire, kesom rwo m’ubimo Daudi ugam urwo kinde m’eloko cwinye; jukiewe i Zaburi mi 51 ku 65.

Ponj Biblia wang’ ma pol. Ponji mi Biblia bigiero kumi i thenge mi tipo, man bikonyi kara mer peri ku Yehova udok tek. (Zab. 19:7-11) Umego Felipe ukoro kumae: “Abino mbe ku program mi somo Biblia nja man mi ponje; eno uketho adoko ng’ic, e anyayu can i Yehova. Amito ngo atur cwiny Yehova kendo, pieno aketho nia ukwayu apang program mi ponji para ma segi, man alube cuu.” In de icopo timo kumeno. Kan ibemito jukonyi kara ilond thiwiwec m’ibitiyo ko pi ponji peri ma segi, iromo kwayu jarimbi moko m’uteng’ini i tipo ukonyi.

Dwok mer peri kud umego ku nyimego udok kendo kakare. Jumoko ka gidwogo i cokiri, lworo benegogi nia jumange binenogi ku wang’gi ma rac. Nyamego Larissa uyero kumae: “Lewic ugam ukwodo wiya ma rac dit. Anwang’u nia anyayu can ma lee i umego ku nyimego para. Paru maeno ugalu i wiya pi nindo ma dupa.” Ng’ey m’umbe jiji nia judong cokiri man jumange ma giteng’ini i tipo gitie kud ava mi konyi kara idwok winjiri peri ku Yehova udok kendo kakare. (Nen sanduku ma thiwiye tie, “Judong cokiri gicopo timo ang’o?”) Dwogo peri unyayu anyong’a lee i igi, man gibemaru ibed ku mutoro!​—Rie. 17:17.

Dong’ girang’o ma biketho ibicoro ceng’ini ku cokiri? Miyiri zoo i lembe m’umego ku nyimego gibetimo: eno ke nicidho i coko man nidikiri wang’ ma pol i rweyo lembanyong’a. Nitimo lembe maeno bikonyi nenedi? Umego Felix uyero kumae: “Dhanu mi cokiri ubino kuro dwogo para kud ava ma lee. Anyang’ nia kara jumara andha. Nikum kony migi ceke, anwang’ara nia atie kendo acel mi cokiri, nia Yehova udaru timo ira kisa, man nia acopo medara nitimo ire.”​—Nen sanduku ma thiwiye tie, “Icopo timo ang’o?”

CWINYI KUD UTUR!

Sitani bimedere asu nikelo peko lee i kumi kara ikwii, ma in ke ibemito idwok winjiri peri ku Yehova kakare. (Luka 4:13) Pieno bed ayika; dwok thenge peri mi tipo udok tek kawoni.

Yehova ung’olo pi rombe pare kumae: “Abiyenyo maeno m’urwinyo, man abidwoko maeno ma juriemo woko, man abitwio maeno m’utur, man abimio tego ni maeno ma kume lith.” (Eze. 34:16) Yehova udaru konyo dhanu dupa niyiko winjiri migi kendo kude. In de ng’ey nia ebemito ekonyi kara imediri nidwoko winjiri m’i kindwu kude udok tek nisagu.