Penji mi jusom
“Jumalaika ma jung’iyo” ma juweco pigi i 1 Timoteo 5:21 gitie jukani?
Jakwenda Paulo ukiewo ni Timoteo ma jadit cokiri wadi kumae: “Abeng’olo iri ma tek i wang’ Mungu, i wang’ Kristu Yesu man i wang’ jumalaika ma jung’iyo, nia iwor telowic maeni m’ibeng’iyo ko i lembe ceke cuu man m’umbe akoyakoya.”—1 Tim. 5:21.
Ku kwong’a, wakenenu nia jumalaika maeni gitie ngo jukani. Ubenen kamaleng’ nia gitie ngo i kind ju ma wendgi 144000. Kinde ma Paulo ubekiewo ni Timoteo, nwang’u fodi Jukristu ma juwiro gicaku ngo nicer pi nidok i polo man nwang’u fodi jukwenda ku jumange ma juwiro gidoko ngo giracwiya mi tipo. Pieno “jumalaika ma jung’iyo” romo nyutho ngo gin.—1 Kor. 15:50-54; 1 Thes. 4:13-17; 1 Yoh. 3:2.
Bende, “jumalaika ma jung’iyo” eno romo nyutho ngo jumalaika ma gijai ni Mungu i saa mi pii ma dit m’uumo ng’om zoo. Jumalaika maeno gidok i ng’ete pa Sitani man gidoko pajogi ma Yesu ujai igi. (Tha. 6:2; Luka 8:30, 31; 2 Pet. 2:4) I nindo m’ubino, jubitwiyogi i longoro ma there mbe pi oro 1000 man i ng’eye jubinyothogi karacelo ku Wonabali.—Yuda 6; Nyu. 20:1-3, 10.
“Jumalaika ma jung’iyo” ma Paulo uweco pigi ucikiri nibedo jumalaika ma n’i polo man ma gibediko cing’gi ku “Mungu [man] Kristu Yesu,” ma ceke juweco pigi i verse ma rom.
Jumalaika ma gigwoko bedoleng’ migi wendgi elufu swa. (Ebr. 12:22, 23) Ubeyenyo nen nia gin ceke ngo ma gitimo tic ma rom i saa de ma rom. (Nyu. 14:17, 18) Poy nia saa moko jumiyo tic mi nego juaskari mir Asiria elufu dak acel pier abora wi abic (185000) zoo ni malaika acel. (2 Ub. 19:35) Ento copere nia udul jumalaika moko gitie ku tic mi coko “gin ceke ma ketho jukier man jutimrac cen kud i Ker pa [Yesu].” (Mat. 13:39-41) Copere nia jumange ke “gibecoko jupare ma jung’iyo karacelo” pi niterogi i polo. (Mat. 24:31) Man jumange lundo jung’olo igi nia ‘gigwokwa i yo mwa ceke.’—Zab. 91:11; Mat. 18:10; nen lembe m’uyenyo rombo kude i Matayo 4:11; Luka 22:43.
Copere nia “jumalaika ma jung’iyo” ma juweco pigi i 1 Timoteo 5:21, ubino jumalaika ma jumiyo igi tic ma segi m’ugwaku kum dhanu pa Mungu. I verse mange m’udhoko kum maeni, Paulo umiyo juk mi rieko iwi ayi ma judong cokiri gitim ko tic migi man iwi ayi ma cokiri unyuth ko igi woro. Eyero nia ukwayu judong cokiri gipong’ rwom migi “ceke cuu man m’umbe akoyakoya,” man nia ukwayu ngo gibed gimak yub kunoke gipok lembe vur vur. Thelembe ma dwong’ m’ukwayu ucwalgi niworo telowic ma Paulo umiyo ku kony mi tipo ma leng’ utie nia gibetimo tic migi “i wang’ Mungu, i wang’ Kristu Yesu man i wang’ jumalaika ma jung’iyo.” Pieno ubenen kamaleng’ nia jumalaika moko gitie ku tic mi konyo cokiri, calu ve nigwoko jutic pa Yehova, nitelo wi tic mi lembanyong’a man nidwoko rapor mi gin ma gineno ni Yehova.—Mat. 18:10; Nyu. 14:6.