Penji moko ma yot ma in de icopo penjo

Mary giku Johna ma won ot pare gikwo i tung ng’om moko ma i iye jucopo rweyo lembanyong’a ni jutic m’uai i ng’om mi Philippines. I saa mi thong’om mi Korona, Mary ucaku ponjo Biblia ku dhanu mi ng’om ma thugi kende ngo, ento bende mi ng’om mange. Etimo nenedi?

Mary ubed upenjo juponj Biblia pare kumae: “Nyo ing’eyo ng’atu moko mange de ma copo maru eponj Biblia?” Tek giyero nia ging’eyo, ekwayugi nia ginyuth pire igi. Nipenjo penji ma yot maeno bedo kwa ku matoke ma ber. Pirang’o? Pilembe wang’ ma pol, dhanu ma gimaru Lembe pa Mungu gimito giwec iwi lembe ma gibeponjo ku wedi migi man jurimbgi ma gidieng’ pigi. Nipenjo penji maeni udaru kelo adwogi moko ma kani?

Japonj Biblia pa Mary moko ma nyinge Jasmin uweco pi Mary ni juponj Biblia mange ang’wen. Kristine m’ubino acel m’i kindgi ugam umaru ponjine lee dit uketho ekwayu Mary nia gibed giponji wang’ ario kubang’ yenga. Saa ma Mary upenje ka nyo eng’eyo ng’atu moko mange m’umaru niponjo Biblia, Kristine udwoko nia, “Eyo, abinyutho iri jurimba moko.” Pi yenga moko kende ci Kristine unyutho pi Mary ni jurimbe ang’wen ma gibino mito giponj Biblia. I ng’eye, Kristine unyutho pire ni jurimbe mange de, man jumoko m’i kindgi utelo jumange bende.

Kristine ubino mito nia wedi pare mi Philippines de giponj Biblia. Pieno eweco ku nyaku pare m’Andrea. Ku kwong’a Andrea uparu kumae: ‘Jumulembe gitie ungu mi dini moko ma tung’, giyiyo ngo Yesu man gitiyo kende kende ku Lembariba ma Con.’ Ento i ng’ey ponji ma wang’ acel kende ci ewilo paru ma rac m’ebino ko iwi Jumulembe pa Yehova. I saa mi ponji pare, ebed eyero kumae: “Lembe moko ci ma Biblia uyero nwang’u e lemandha!”

I ng’ey kare, Andrea unyutho pi Mary ni jurimbe ario ku jaratic wadi moko ma ceke gicaku ponjo Biblia. Bende, Mary ubino ng’eyo ngo nia karaman wayu Andrea ma wang’e tho ma nyinge Angela de ubed uwinjogi i saa mi ponji. E ceng’ acel, Angela ukwayu Andrea unyuth pire ni Mary man ekwayu ponji mi Biblia pire gire. Angela umaru gin m’ebino ponjo lee mandha. Pi dwi acel kende ci emaku verse dupa ku wiye, man emito gibed giponj wang’ ang’wen kubang’ yenga! Ku kony p’Andrea, ecaku timo coko nja ku yore mi video.

Kinde ma Mary uwinjo nia Joshua ma won ot pa Kristine ubed uwinjogi i saa ma gibeponjo Biblia, Mary upenje ka nyo en de eromo maru edikere i ponjine. Joshua uyero kumae: “Abiwinjo awinja kende; ento kud ipenja ku penji moko acel de. Tek ipenja ke abiwok cen.” I kind dakika abic ma kwong’a, epenjo penji nikadhu Kristine man emito nia en de eponj Biblia.

Penji ma yot ma Mary upenjo uketho ecaku ponjo Biblia ku dhanu dupa. Emiyo ju ma pol m’i kindgi ni jurwey mange. I zoo Mary ucaku ponji mi Biblia ku dhanu 28 mi ng’om ang’wen ma tung’ tung’.

Jasmin ma japonj Biblia ma kwong’a ma waweco pire i acaki, ulimo batizo i dwi mir 4, 2021. Kristine ke ulimo i dwi mir 5, 2022 man edok i Philippines pi nibedo ku juruot pare. Juponj Biblia mange ario ma Kristine unyutho pigi ni Mary de gilimo batizo. Angela ulimo batizo dwi ma nok i ng’ey Kristine, man kawoni etie jayab yo ma nja. Joshua ma won ot pa Kristine ku nyaku migi m’Andrea man bende juponj Biblia mange dupa gibetimo mediri ma ber.

I rundi ma kwong’a, lembanyong’a umew pio pio mandha i kind wedi ku jurimo. (Yoh. 1:41, 42a; Tic. 10:24, 27, 48; 16:25-33) Ineno nenedi ka in de ipenjo juponj Biblia peri man jumange ma gimaru niponjo Biblia ku penji ma e: “Nyo ing’eyo ng’atu moko mange de ma copo maru eponj Biblia?” Ng’a ng’eyo wend ponji mi Biblia m’iromo caku nikadhu kud i penji ma yot maeni ma in de icopo penjo?