Pirang’o Jumulembe pa Yehova giyiyo ngo ciko rimo?

Paru ma cuu ngo ma dhanu tie ko

Lemandha: Waii nisayu yath ma cuu piwa giwa man pi juruot mwa i kadhiri ma wacopo. Kinde ma waberemo, wacidho i bang’ munganga m’utiye ku ng’ec mi thieth man mi timo operasio m’umbe rimo. Wabefoyo kumediri m’ubetimere iwi lembe m’uneno yath. I andha, thieth m’umbe rimo ma juketho pi jurutwoyo ma gitiye Jumulembe, jubetiyo kude kawoni pi bero mi dhanu ceke. Tin i ng’om ma pol, jaratwoyoman copo ng’iyo en gire niuro peko ma ciko rimo romo nyayu i kumjo, calu ve remo ma mondo i kumjo i yore mi rimo, ayi ma rac ma kumwa jolo ko lembe ma nyen m’ubemondo i iye, man kosa ma romo vuth ni munganga en gire.

Vupo: Jumulembe pa Yehova giyiyo nia yiyoyic re ma bodho ng’atu m’uberemo.

Lemandha: Watimo ngo udu pi nikeyo kum jararemo.

Vupo: Thieth m’umbe ciko rimo camu sente ma lee.

Lemandha: Thieth ma kwayu ngo ciko rimo, beine tek hai ungo.a

Vupo: Jumulembe ma dupa, uketh’i iye awiya gibetho kubang’ oro pilembe gikwero ciko rimo.

Lemandha: Wec maeno utie ndra ma dit. Wang’ ma pol, ba munganga gitimo operasio ma tek ma calu ve operasio mir adunde, mi cogo, man mi thubo wathkum m’umbe niciko rimo.b Jururemo ma dupa, uketh’i iye awiya ma thindho ma gikwero ciko rimo, wang’ ma pol gikey rom kunoke nisagu ju ma juciko rimo i kumgi de.c I lembe maeno zoo, ng’atu moko acel de mbe ma romo yero ku tap nia jararemo bitho pilembe ekwero kud jucik rimo i kume kunoke nia ebikwo pilembe eyiyo nia jucik rimo i kume.

Pirang’o Jumulembe pa Yehova giyiyo ngo ciko rimo?

Thelembene ujengere iwi yiyoyic ma gitiye ko nimakere ku dini migi ento ungo i kum lembe m’uneno yath. Lembariba ma con ku ma nyen ceke ung’olo iwa nia wakoyara cen kud i kum rimo. (Thangambere 9:4; Lembe mi Julawi 17:10; Poi mi Cik 12:23; Tic mi Jukwenda 15:28, 29) Bende, i wang’ Mungu rimo nyutho kwo. (Lembe mi Julawi 17:14) Pieno, wacerara ngo nitiyo ku rimo kende kende pi niworo Mungu, ento bende pilembe en re m’etiye jamii kwo.

Loko paru

Pi kare moko, ba munganga ma pol gibino ku nen ma nia bodho ma kud jucik ko rimo niwacu thieth m’umbe rimo ubed unen ni lembe ma ketho kwo i ariti, kunoke ninegiri anega zoo, ento giloko paru migi i kind oro m’ukadhu ceng’ini eni. Ku lapor, i 2004, thiwiwec ma juwodho i girasoma moko m’uweco iwi lemb ponjiri m’uneno thieth uyero nia “bodho ma dupa ma jutiyo ko pi jururemo ma gitiye Jumulembe pa Yehova, jubicaku tiyo kude pi dhanu ceke i oro m’ubino.”d I 2010, thiwiwec moko ma juwodho i girasoma ma julwong’o Heart, Lung and Circulation uyero nia “‘operasio m’umbe rimo’ bibedo ngo mi Jumulembe pa Yehova kendgi, ento wang’ ma pol ebidoko ni ayi operasio ma pire tek lee.”

Tin i wang’ ng’om zoo, ba munganga elufu swa gitiyo ku gwoko rimo kaka moko pi nitimo operasio ma dongo m’umbe ciko rimo. Bodho maeno ma judwoko ko rimo ma jular jugwoko kaka moko i kumjo jutiyo kude kadok i ng’om m’udongo man jururemo ma gitiye ngo Jumulembe pa Yehova re ma gikwaye.