Dubo tie ang’o?
Lembe ma Biblia udwoko
Dubo tie timo ceke, kite ma ng’atini winjere ko kunoke paru m’urombo ngo ku cik pa Mungu. Eketho i iye nitimo lembe ma cuu ngo m’uturo cik pa Mungu kunoke nitimo gin m’umaku piny ungo i wang’ Mungu. (1 Yohana 3:4; 5:17) Biblia uweco bende iwi dubo mi wilwic, niwacu nitimo ngo gin moko m’atira.—Yakobo 4:17.
I dhok ma jukiewo iye Biblia, wec ma juloko nia dubo thelembene tie ‘nikilo kunoke ning’uro gin moko vi.’ Ku lapor i Israel ma con, ungu mi juaskari moko gibino jubodho lee i ng’uro kidi, gibed ging’uro “tap kwa.” I dhok ma con, jubed juyero lembe maeno nia ‘gikier ungo,’ kunoke “gidubo ngo.” (Jupoklembe 20:16) Pieno, dubo utie nikoso woro cik ma leng’ ma Mungu uketho.
Calu Mungu tie Jacwic, etie ku twero mi ketho cik ni dhanu. (Lembanyutha 4:11) Wabiwodho ire wel pi gin ma wabetimo.—Jurumi 14:12.
Nyo ecopere nia ng’atini kud udub nyanok de?
Copere ngo. Biblia uwacu nia “kawa ceke wadubo man warem ni dwong’ pa Mungu.” (Jurumi 3:23; 1 Ubimo 8:46; Eklizia 7:20; 1 Yohana 1:8) Pirang’o etie kumeno?
I acaki, dhanu ma kwong’a, niwacu Adamu giku Eva gibed gidubo ngo. Pirang’o? Pilembe Mungu ugam ucwiyogi leng’, i ayine. (Thangambere 1:27) Ento kinde ma gidubo ni Mungu, gidoko dhanu ma leng’ ungo. (Thangambere 3:5, 6, 17-19) Kinde ma ginyolo awiya, awiyane gigam gilagu dubo man kosobedoleng’ migi. (Jurumi 5:12) Eno tie tap lembe m’ubimo Daudi mir Israel uyero. Eyero kumae: “Junyola i kier.”—Zaburi 51:5.
Nyo dubo moko tie rac nisagu mange?
Eyo. Ku lapor, Biblia uwacu nia dhanu mir adhura mi Sodoma ma con gibino ‘judubo dit apila’ niwacu dubo migi bino “dit hai.” (Thangambere 13:13; 18:20) Wakenen lembe adek ma ketho jucopo yero nia dubo moko tie rac nisagu kunoke nia etie pek.
Racu. Biblia ubecimo wang’wa nia waurara i kum dubo ma reco ma calu ve lembasasa mi tarwang’, rwo ni ayi gin m’acwiya, kwalu kwo, mero, ayeki, nek man weco ku tipo. (1 Jukorintho 6:9-11; Lembanyutha 21:8) Biblia unyutho nia dubo maeno ukoc ku dubo ma ng’atini timo m’umbe ning’eyo, ku lapor, wec kunoke timo moko ma timo jumange rac. (Lembrieko 12:18; Juefeso 4:31, 32) Enre, Biblia ubemiyo amora i kumwa nia wacikara ngo nicayu dubo moki ci, pilembe gicopo cwaluwa nituro cik pa Mungu i ayi ma rac magwei.—Matayo 5:27, 28.
Thelembe. Dubo moko tie ma ng’atini timo pilembe eng’eyo ngo gin ma Mungu ubekwayu i bang’e. (Tic mi Jukwenda 17:30; 1 Timoteo 1:13) Kadok nwang’u Biblia uwacu ngo nia dubo maeno kabang’gi mbe de, re enyutho nia gikoc ku dubo ma ng’atini timo akakaka, niwacu eturo cik pa Mungu mi tek tek. (Wel 15:30, 31) ‘Adunde ma rac’ re ma cwalu ng’atini nitimo dubo mir akakaka.—Yeremia 16:12.
Wang’ ma ng’atini time i iye. Biblia unyutho nia tung’ tung’ utie i kind dubo ma jutimo wang’ acel, ku dubo ma dong’ udil adila pi nindo ma lee. (1 Yohana 3:4-8) Dhanu ma ‘gibetimo dubo akakaka,’ i ng’ei ma dong’ ging’eyo kite ma giromo timo ko lembe m’atira, gibinwang’u pokolembe pa Mungu.—Juebrania 10:26, 27.
Dhanu ma gitimo dubo ma pek gicopo nwang’u nia kosa ma gitimone ubenurogi. Ku lapor, Ubimo Daudi ukiewo kumae: “Kier para umo wia: Calu ter ma pek ginura.” (Zaburi 38:4) Re Biblia ubemiyo genogen mae: “Dong’ jadubo wek yo pare, man won gondri pidoic pare; man wek edwog i ba Yehova, e kisa binege i kume; man ba Mungu mwa, kum ebiweko ire ma gwei.”—Isaya 55:7.