Lam ma Yesu uthiero ubino “jamgony pi dhanu dupa” nenedi?
Lembe ma Biblia udwoko
Lam ma Yesu uthiero utie yo ma Mungu utiyo ko pi nilaru dhanu kunoke pi nibodhogi kud i dubo man tho. Biblia uwacu nia rimb Yesu m’ucwir utie jamgony m’eculo. (Juefeso 1:7; 1 Pethro 1:18, 19) Pieno, Yesu uyero nia ebino i ng’om kara “emii kwo pare ni jamgony pi dhanu dupa.”—Matayo 20:28.
Pirang’o watie ku yeny mi “jamgony pi dhanu dupa”?
Jugam jucwiyo Adamu m’ubino ng’atu ma kwong’a m’umbe dubo, niwacu ebino ng’atu ma leng’. Ebino ku copo mi kwo rondo ku rondo, ento kinde m’edubo ni Mungu, ebayu copo maeno. (Thangambere 3:17-19) I ng’eye kinde m’enyolo awiya, gin de gigam gilagu dubo man kosobedoleng’. (Jurumi 5:12) Pi thelembe maeno, Biblia uwacu nia Adamu ‘ulworere’ man elworo bende nyithindhe ni ng’eca mi dubo man tho. (Jurumi 7:14) Calu ma nyithindhene zoo gileng’ ung’o, ng’atu moko mbe i kindgi ma copo dong’iewo gin m’Adamu ugam ubayu.—Zaburi 49:7, 8.
Kisa ugam umaku Mungu lee i kum nyikway Adamu pilembe gibino mbe ku genogen. (Yohana 3:16) Ento nimakere ku cik mi bedopwe pa Mungu, ugam ukwayere nia thelembe moko m’atira ubed unuti kan ewek igi dubo migi. (Zaburi 89:14; Jurumi 3:23-26) Mungu umaru dhanu lee, pieno egam emaku yub m’urombo ku cik kara ewek dubo migi man kara edare mi magwei. (Jurumi 5:6-8) Jamgony utie yub maeno m’urombo ku cik.
Jamgony utie ku tic ma kani?
I Biblia, wec ma nia “jamgony” copo bedo ku thelembe adek mae:
Etie cul.—Wel 3:46, 47.
Emiyo gony, kunoke war.—Ai 21:30.
Ebedo valer ma rom ku mi gin ma jubecule pire, kunoke mi gin m’eumo.a
Wakenen kite ma lembe maeno upong’o ko iwi jamgony ma Yesu Kristu uculo.
Cul. Biblia uwacu nia ‘jung’iewo’ Jukristu “ku welpiny.” (1 Jukorintho 6:20; 7:23) Welpiny maeno utie rimb Yesu, ma kude ‘eng’iewo dhanu ni Mungu niai kud i suru ceke, dhok ceke, kodhi dhanu ceke, man thek ceke.’—Lembanyutha 5:8, 9.
Gony. Lam ma Yesu uthiero ugonyowa kud i dubo “nikadhu kud i jamgony.”—1 Jukorintho 1:30; Jukolosai 1:14; Juebrania 9:15.
Valer ma rom. Lam ma Yesu uthiero utie tap valer mi gin ma Adamu ubayu, niwacu kwo mi dhanu m’umbe dubo. (1 Jukorintho 15:21, 22, 45, 46) Biblia uwacu kumae: “Calu ni kum ng’atu acel m’uturo cik [Adamu], dhanu dupa gidoko judubo; kumeno bende ni kum ng’atu acel m’uworo cik [Yesu Kristu], dhanu dupa bidoko weg bedopwe.” (Jurumi 5:19) Eno ubekonyowa ninyang’ nia pirang’o tho pa ng’atu acel copo bedo ni jamgony pi dubo mi dhanu dupa. I andha, lam ma Yesu uthiero utie “jamgony m’uromo pi dhanu ceke” ma gibetimo lembe m’ukwayere pi ninwang’u berone.—1 Timoteo 2:5, 6.
a I Biblia, wec mi dhok ma jukiewo iye Biblia ma juloko nia “jamgony” miyo paru mi cul, kunoke mi gin moko ma pire tek ma juculo. Ku lapor, wec mi dhu Juebrania kaphar thelembene tie “niumo.” (Thangambere 6:14) Wang’ ma pol enyutho niumo dubo. (Zaburi 65:3) Kopher ma tie wec mange m’urombo kude lundo nyutho welpiny ma juculo pi niumo gin moko kunoke pi niware. (Ai 21:30) Rom rom kumeno, wec mi dhu Jugiriki lytron ma wang’ ma pol juloko nia “jamgony,” jucopo loke bende nia “wel cul ma juculo pi nigonyo.” (Matayo 20:28) Ju ma gibed gikiewo piny i dhu Jugiriki gibed gitiyo ku wec maeno pi ninyutho welpiny ma juculo pi nigonyo ng’atu ma jumaku i lwiny kunoke pi nigonyo ng’eca.