Batizo tie ang’o?
Lembe ma Biblia udwoko
Batizo tie niroyo ng’atini zoo i pii man niwodhe kud i iye.a Eno re m’uketho Yesu bende ucidh ulimo i kulo ma pii tie lee i iye. (Matayo 3:13, 16) Rom rom kumeno, Jaethiopia moko ugam ukwayu nia jumii ire batizo kinde ma giwok kaka ma “pii” utie lee i iye.—Tic mi Jukwenda 8:36-40.
Thelembe mi batizo
Biblia uporo batizo ku niyiko ng’atini. (Jurumi 6:4; Jukolosai 2:12) Batizo ma ng’atini maku i pii, nyutho nia etho i kit kwo pare ma con man ecaku nikwo kwo ma nyen calu Jakristu m’uthierere ni Mungu. Batizo man lembe ma ng’atini timo kara etund i iye, utie yub ma Mungu umaku en kara ng’atune ubed ku pidocwiny ma ber m’ujengere iwi yiyoyic m’etie ko i lam ma Yesu Kristu uthiero. (1 Pethro 3:21) Pi thelembe maeno, Yesu uponjo nia julub pare gicikiri nilimo batizo.—Matayo 28:19, 20.
Nyo batizo lwoko dubo cen?
Ungo. Biblia ubeponjo nia dubo mwa copo kabere nikum rimb Yesu kende. (Jurumi 5:8, 9; 1 Yohana 1:7) Ento kara ng’atini unwang’ bero mi lam ma Yesu uthiero, ukwayu enyuth yiyoyic i Yesu, ewek kit kwo pare ma con man ecak kwo nimakere ku ponji pa Yesu man elim batizo.—Tic mi Jukwenda 2:38; 3:19.
Nyo Biblia ucwaku miyo batizo ni awiya ma thindho?
Ungo, ecwaku ngo. Paru ma nia jumii batizo ni awiya ma thindho umbe i Biblia. Dini moko gitie ku timo mi miyo “batizo” ni awiya ma thindho (gikiro pii i kumgi kunoke gikonjo pii i wigi) man gimiyo igi nying’.
Does the Bible teach infant baptism?
Batizo mi Jukristu utie pi dhanu ma giteng’ini, ma gicopo nyang’ man giyiyo “lembanyong’a iwi Ker pa Mungu.” (Tic mi Jukwenda 8:12) Ebekwayu ng’atini ular uwinj lembe pa Mungu, eyiye man eyew dubo pare. Eno tie lembe ma nyathin ma nyanok copo timo ngo.—Tic mi Jukwenda 2:22, 38, 41.
M’umedo maeno, Biblia unyutho nia Mungu neno awiya mi Jukristu leng’ i wang’e nikum gwokobedoleng’ mi junyodo migi. (1 Jukorintho 7:14) Ka nwang’u batizo mir awiya ma thindho utie ku tic i wang’ Mungu, nwang’u yeny ma nia enengi leng’ nikum gwokobedoleng’ pa ng’atu mange ubedo mbe.b
Paru ma cuu ngo iwi batizo mi Jukristu
Paru ma cuu ngo: Nikiro pii i kum ng’atini kunoke nikonjo pii i wiye, tie tap ve juroye vuc i the pii.
Lemandha: Batizo ceke ma juweco pigi i Biblia, jubed juroyo dhanune aroya i the pii. Ku lapor, kinde ma jalub ma Filipo ubino miyo batizo ni Jaethiopia, gigam “giloro i pii” kan emiyo ire batizone. E i ng’eye, “giwok kud i pii.”—Tic mi Jukwenda 8:36-39.c
Paru ma cuu ngo: Biblia unyutho nia con, kinde ma jubed jumiyo batizo ni juruot zoo, awiya ma thindho de ubed ulimo. Ku lapor, Biblia uyero pi jakur moko mir adhura mi Filipi kumae: “En karacelo ku dhanu m’i ot pare zoo gilimo batizo.”—Tic mi Jukwenda 16:31-34.
Lemandha: Lembe ma Biblia ukoro nia utimere kinde ma jakur maeno ulokere, unyutho nia dhanu ceke ma gigam gilimo batizo ginyang’ i “lembe pa Yehova” man ‘anyong’a unegogi lee.’ (Tic mi Jukwenda 16:32, 34) Lembe maeno uketho wanyang’ nia i kind juruot pa jakur maeno awiya ma thindho m’ulimo batizo ubino mbe, pilembe nwang’u fodi gicopo nyang’ ungo i lembe pa Yehova.
Paru ma cuu ngo: Yesu uponjo nia kwayu jumii batizo ni awiya kinde m’ewacu nia Ker utie mir awiya ma thindho.—Matayo 19:13-15; Marko 10:13-16.
Lemandha: Kinde ma Yesu uwacu lembe maeno, ebino weco ngo iwi batizo. Ento ebino nyutho nia ng’atini ucikere nibedo calu nyathin, niwacu ebed ng’atu ma mol man ma yiyo nia juponje, kara erom pi Ker pa Mungu.—Matayo 18:4; Luka 18:16, 17.
a Wec mi dhu Jugiriki ma juloko nia “batizo” uai kud i wec mange ma thelembene tie “niroyo i.” Nen buku Theological Dictionary of the New Testament, Volim I, mbaya 529.
b Buku moko (The International Standard Bible Encyclopedia) uwacu nia “i Lembariba Manyen, gin moko acel de mbe m’unyutho nia jubed jumiyo batizo ni awiya ma thindho.” Bukune umedo nia timo maeno unyai nisagu pilembe “junyang’ cuu ngo i kum bero pa batizo man jumedo kor lembene nisagu,” niwacu jucaku yero nia ka ng’atini ulimo batizo ci, nwang’u dubo pare ulwokere.—Volim 1, mbaya 416-417.
c I buku moko (New Catholic Encyclopedia) i the thiwiwec “Batizo (i Biblia),” jukoro kumae: “Ubenen kamaleng’ nia i Kanisa ma con, jubed juroyo dhanu vuc i pii kinde ma jubemiyo igi batizo.”—Volim 2, mbaya 59.