በአገልግሎት ረገድ ክህሎታችንን ማዳበር—የመጽሐፍ ቅዱስ ትምህርት በተባለው መጽሐፍ እንዴት መጽሐፍ ቅዱስን ማጥናት እንደሚቻል ማሳየት

አስፈላጊ የሆነው ለምንድን ነው? ብዙ ሰዎች በነፃ መጽሐፍ ቅዱስን እናስጠናለን ስንላቸው ምን ማለት እንደፈለግን ላይገባቸው ይችላል። ከሌሎች ሰዎች ጋር በቡድን እንዲማሩ ወይም የተልእኮ ትምህርት እንዲከታተሉ የምንጠይቃቸው ሊመስላቸው ይችላል። በመሆኑም እንዲያጠኑ በመጋበዝ ብቻ ከመወሰን ይልቅ እንዴት ማጥናት እንደሚችሉ ለምን አታሳዩአቸውም? በጥቂት ደቂቃዎች ውስጥ ምናልባትም ደጃፋቸው ላይ እንደቆማችሁ መጽሐፍ ቅዱስን ማጥናት ቀላልና እውቀት የሚያስጨብጥ መሆኑን ልታሳዩአቸው ትችላላችሁ።

ይህን ማድረግ የሚቻለው እንዴት ነው?

ራሳችሁን ካስተዋወቃችሁ በኋላ የቤቱ ባለቤት የወደፊቱ ጊዜ ያሳስበው እንደሆነ ጠይቁት።
ብዙ ሰዎች እንደ እሱ እንደሚሰማቸው ግለጹለት፤ ከዚያም የመጽሐፍ ቅዱስ ትምህርት የተባለውን መጽሐፍ ላይ የርዕስ ማውጫ አሳዩት። መጽሐፍ ቅዱስ ስለ ወደፊቱ ጊዜ የሚናገረውን ሐሳብና ሌሎች ርዕሰ ጉዳዮችን፣ ይህ መጽሐፍ ለመረዳት ቀላል በሆነ መንገድ እንደሚያብራራ ከገለጻችሁ በኋላ የእሱን ትኩረት የሚስበው የትኛው ምዕራፍ እንደሆነ ጠይቁት።
መጽሐፉን ስጡትና እሱ የመረጠውን ምዕራፍ እንዲያወጣ አድርጉ። በምዕራፉ መጀመሪያ ላይ ያሉት ጥያቄዎች በአንቀጾቹ ውስጥ መልስ እንደሚያገኙ አስረዱት።
ግለሰቡ የማይከብደው ከሆነ የመጀመሪያውን አንቀጽ እንዲያነብ ጋብዙት። ከዚያም ለአንቀጹ የተዘጋጀውን ጥያቄ ካነበባችሁለት በኋላ መልሱ ላይ አብራችሁ ተወያዩ። ለመልሱ ድጋፍ የሚሆኑ ጥቅሶችን አውጥታችሁ አብራሩለት። የጥያቄዎቹን መልሶች እንዴት ምልክት እንዳደረጋችሁባቸው ከራሳችሁ መጽሐፍ ላይ አሳዩት።
በመቀጠል በሁለተኛው አንቀጽ ላይ ተወያዩ፤ በዚህ ጊዜ ግን የምታነጋግሩት ሰው መልሱን በራሱ አባባል እንዲገልጽ አበረታቱት።
አመስግኑት፤ እንዲሁም በቀሪዎቹ አንቀጾች ላይ ለመወያየት ቀጠሮ ያዙ።
ሁኔታው አመቺ ከሆን በjw.org ላይ የወጣውን መጽሐፍ ቅዱስን የምናስጠናው እንዴት ነው? የተባለውን ቪዲዮ አሳዩት።

በዚህ ወር እንዲህ ለማድረግ ሞክሩ፦

ይሖዋ ጥናት ለማስጀመር የምታደርጉትን ጥረት እንዲባርክላችሁ በጸሎት ጠይቁት።—ፊልጵ. 2:13
አገልግሎት ስትወጡ ቢያንስ አንድ ጊዜ፣ የመጽሐፍ ቅዱስ ትምህርት በተባለው መጽሐፍ እንዴት መጽሐፍ ቅዱስን ማጥናት እንደሚቻል ለማሳየት ወይም መጽሐፍ ቅዱስን የምናስጠናው እንዴት ነው? የተባለውን ቪዲዮ ለማሳየት ጥረት አድርጉ።