ሁሉም ፈተናዎች የሚያበቁበት ጊዜ አላቸው

የሚያጋጥሙን ፈታኝ ሁኔታዎች በቀላሉ ተስፋ ሊያስቆርጡን ይችላሉ፤ በተለይ ለረጅም ጊዜ ሲቀጥሉ ሁኔታው ይበልጥ ከባድ ይሆንብናል። ዳዊት፣ ንጉሥ ሳኦል የሚያደርስበት መከራ አንድ ቀን እንደሚያበቃና ይሖዋ ቃል በገባው መሠረት ንጉሥ እንደሚሆን ያውቅ ነበር። (1ሳሙ 16:13) ዳዊት እምነት የነበረው መሆኑ በትዕግሥት ይሖዋን እንዲጠባበቅ ረድቶታል።

ችግር ሲያጋጥመን ብልሃት፣ እውቀት ወይም የማመዛዘን ችሎታ ተጠቅመን ችግሩን መፍታት እንችል ይሆናል። (1ሳሙ 21:12-14፤ ምሳሌ 1:4) አንዳንድ ችግሮች ግን ከመጽሐፍ ቅዱስ መሠረታዊ ሥርዓቶች ጋር በሚስማማ መልኩ አቅማችን የፈቀደውን ሁሉ ብናደርግም ላይቀረፉ ይችላሉ። እንዲህ ያሉ ሁኔታዎች ሲያጋጥሙን በትዕግሥት ይሖዋን ልንጠባበቅ ይገባል። በቅርቡ ይሖዋ፣ ያጋጠሙንን መከራዎች በሙሉ በማስወገድ ‘እንባን ሁሉ ከዓይናችን ያብሳል።’ (ራእይ 21:4) ከችግራችን እፎይታ የምናገኘው ይሖዋ ጣልቃ ገብቶ ስላስወገደልንም ሆነ በሌሎች ምክንያቶች፣ ስለ አንድ ነገር እርግጠኞች ነን፦ ሁሉም ፈተናዎች የሚያበቁበት ጊዜ አላቸው። ይህን ማወቃችን በተወሰነ መጠንም ቢሆን ያጽናናናል።

በተከፋፈለ ዓለም ውስጥ አንድነት ያለው ሕዝብ የሚለውን ቪዲዮ ተመልከት፤ ከዚያም የሚከተሉትን ጥያቄዎች ለመመለስ ሞክር፦

• በደቡባዊ ዩናይትድ ስቴትስ የሚኖሩ አንዳንድ ክርስቲያኖች ምን ተፈታታኝ ሁኔታዎች አጋጥመዋቸው ነበር?

• ትዕግሥትና ፍቅር እንዳላቸው ያሳዩት እንዴት ነው?

• “ይበልጥ አስፈላጊ [በሆኑት] ነገሮች” ላይ ትኩረት ማድረጋቸውን የቀጠሉት እንዴት ነው?—ፊልጵ 1:10