Saka 2 Folad

Itini i sera ci Yis tada siniˈadaay to tamdaw, malifetay no tamdaw ko olah ni Yis cangranan, makahiayto a mitengil to lihaf no Hongti Kitakit. Misaˈicel kita mitodong ci Yisan palahad to siniˈadaay falocoˈ, wa ngaˈayto padama to tamdaw i pitosilan. Samaanen ita siniˈada ko mitosilan a tamdaw hani? Patadoen ita miharateng ko falocoˈ nangra, ano maolahay kita to sasamaanen no tao kita a micada, haenen ita a micada cangra. (Matay 7:1) Haratengen ko saali no tao, ano mitosil i, hamaan oyaan sa a sowal, tooren ko harateng no tao a misalof to mitosilay a pakayraan. Licayen cingra to matatodongay salicay ngaˈ, cipinang to harateng ningra. (Taneng 20:5) Somowalto cingra i, wa mahapinangto ita o maanan ko hamamitemer i falocoˈ ningra a Kimad no Fangcalay Cudad. Tooren ita ko saali ningra a padama, mihaen i, mitodongay kita to taˈarawan ni Yis.​—1 Korinto 9:19-23. w19.03 20 fiedac 2 fatac; 22 fiedac 8-9 fatac

O waywayan ni Atam aci Ifa, paihkalay cangra to, cowa piakoˈid to nano demak ni Yihofa cangranan. Kita cecacecay tamdaw ngaˈayay paihkal to, cowa ko mamalecad kita ci Ataman aci Ifaan. Pakasoˈlinay kita edengan ci Yihofa citatodongay a misaˈosi to palinian no ngaˈayay tatiihay, mansa micada kita to inoˈ, misawacay to olah ita to kakarayan Wama ci Yihofaan, halo misarocod a mitiˈer Cingranan. Ikor no micada kita to inoˈ wa misiˈayaw to maanan sapalifet hani? To romiˈamiˈad oha mamitoor to palinian ni Yihofa a maˈorip, cowa kono niyah a palinian. Ano padotoc kiso mitongal to kafanaˈ to Fangcalay Cudad, ato mararid a micawmaˈ to salikaka, halo fanekfekay a padama to tao mafanaˈ to sidaˈitay a Wama i kakarayan i, wa ngaˈay mahecad to pinaay soˈot ˈofad a Krisciyang, mitoor to palinian ni Yihofa a maˈorip. (Hipray 10:24, 25) Ano mamisaˈosi kiso i, doedoen ko pakaynian ni Yihofa i Fangcalay Cudad ato likakawa Ningra a sapatalipaˈelal tisowanan. (Isaya 30:21) Ano mihaen ko demak iso, wa malaˈosi ko kihcod a demak.​—Taneng 16:20. w19.03 7 fiedac 17-18 fatac

Adihayay ko sapafeli ni Yihofa kitaanan noˈadingoan a kakaenen, tinakoen o sapasifanaˈ no casi, wangcan a lalakaw ato saˈopo. Mikitini pitengil to cecay kimad, micekiw to cecay lalakaw anca minengneng to kamok no JW Tilifi, miharateng kiso: “Coko misaalian ako konini han?” Wa samaan kita paihkal to nai falocoˈay a miakoˈid ci Yihofaan hani? (Kolosay 3:15) O cecay pakayraan i micerid i satolon miakoˈid Cingranan pafeli kitanan to makapahay sapatelong. O roma pakayraan paihkal to piakoˈid ci Yihofaan i, mikorac to Kasaˈopoan. Wa micerid kita a miasik ato mikinsa to Hongti Kitakit Kasaˈopoan, o citatodongay to laepa ato mayku a salikaka, songilaˈen a misaka dademak. Songilaˈen ita midimokos ko Kasaˈopoan, mihaen cowato ko tataˈangay ko sasalofen, halafinto a saka dademaken. Ano mihaen, ngaˈayto saka dademaken no likakawa no Kawas ko sapakiyaho, patireng anca misafaeloh to Kasaˈopoan itini roma kilac. w19.02 18 fiedac 17-18 fatac

Miceriday ci Yopu miharateng to misangaˈan ni Yihofa a maamaan. (Yopu 26:7, 8) Mihayay ci Yopu citolasay ko kafanaˈ to serayan, ano maharateng ningra ko sera, ˈoˈol, kakereng i, nai falocoˈay a mangodo to Kawas. Misaaretengay cingra to sowal no Kawas, sanay: “Mararid kako a maˈimer to limoˈot Ningra.” (Yopu 23:12) Nai falocoˈay a mangodo ci Yopu to kasapaan a demak ni Yihofa. Mangodoay ato maolah cingra to kakarayan Wama [a pakahemek Cingraanan. Mihaenay matongalay ko sapitafoaw to madimadiay.] Ngaˈayay nanamen ita ko taˈarawan ningra. Mikikakaay ko adihay no kafanaˈan ita to kasapaan a masangaˈay, ngaˈayay kita miˈosi to polong a Fangcalay Cudad, tangongol ko kafanaˈ ci Yihofaan. O mananamay ita a kihcod, ngaˈayay padama to niyah tangongol ko pikangodo ci Yihofaan. Ano mangodo kita to Kawas, misaareteng to araaw Ningra, wa matongal ko olah Cingraanan, makalimay a midoedo Cingraanan, misetek to falocoˈ mitafo to madimadiay ato cowa pisafelit to palinian Ningra.​—Yopu 28:28. w19.02 5 fiedac 12 fatac

Nano litengan tahanini, romaroma mikowanay misamsamay to finawlan no Kawas. O pakayraan mahawpay ko pikokot kitaanan, samanen, ‘tatooren niyam ko Kawas, cowa ko tatooren ko tamdawˈ. (Dmak 5:29) Alatek malikaf, mapalit kita, anca masaloyaˈ to tireng. Kawra, padamaay ci Yihofa kitaanan, caka tano tatiihay ko pacoˈay to tatiihay, soˈlin tahalifaay to sapalifet, kamayan mitafo to damsayay. Nengnengen ita ko tatoloay a Hipray kapah​—ci Hananiya, Misali aci Acariya. Damsayay cangra a mitadtad to lalangian, eca ka pitaˈong to samiyay. Ano ecato ka pilidong ci Yihofa i, makahiay cangra midoedo Cingraanan tangasa i patay. (Taniil 3:1, 8-28) Ano tahalifaay kita to sapalifet i, sasamaan kita mitodong to taˈarawan no tatoloay Hipray kapah a madimadi ci Yihofaan hani? Sapoeneren ko falocoˈ, pasoˈlin to Kawas mamidama kitaanan a midemak to matatodongay a demak. (ˈOlic 118:7) Ano mapakokot no tao i, tano damsayay, mikangodoay a waywayan pacaˈof cangraanan ngaˈ ngaˈay. (1 Pitiro 3:15) Aka a papipalaken ko maanan a demak to kalalaˈed no niyah ato kakarayan Wama. w19.02 10-11 fiedac 11-13 fatac

Sapaˈicelaw to timolo a pakayraan i, midotim to hatokel no ikor, oniya tokel pakayniay i patafangan ni Kristo a sapatefoc. (Yohani 3:​16; Ifiso 1:7) ˈAyaw no Piharatengan to Kapatay ni Yis a Saˈopo pina lipay, iraay ko toki ita mitongal to piakoˈid to sapatefoc a limasmas. Tooren ita ko limasmas miˈosi to sinael, pairaen ko mangodoay falocoˈ, miharateng to ˈayaw ato ikor no mapatay ci Yis a sinael. Mihaen, ano mirienang kita to Lafi no Tapang wa matongal ko kacipinang to, kalimlaan a tatodong no tahapinangan a dafong, ato kasapaan noniya kinafalah. Ano cipinang kita to nano demak ni Yihofa aci Yis, ngaˈay paraheker kitaanan ato salawina, wa matongal ko pakasoˈlin to hatokel no ikor, wa ira ko ˈicel timolo a mihadidi. (Hipray 12:3) Miakoˈiday kita to kakarayan a Sakakaay Saysi ci Yis, padotocay cingra paihkal to hatiniay a capeling, patado kitaanan a micangacang. (Hipray 7:​24, 25) Ano miakoˈiday kita ci Yisan, wa midofdof to sapalimoˈot ningra, madimadi a miharateng to kapatay ningra.​—Luka 22:19, 20. w19.01 22 fiedac 8 fatac; 23-24 fiedac 10-11 fatac

Pafelian ni Yihofa kita to toki pakahemek Cingranan. Pacaˈof kita i kasaˈopoan i, “mato o sapatoˈaya i Cingranan,” o matiniay a sapatoˈaya cowa ko tao ko papatado kitanan a pacakat. (Hipray 13:15) Hai, ano mahecaday o sapatoˈaya ko nika pacaˈof ita, o mamisaali ci Yihofa to mamalecad ko kahacecay a sapacaˈof han? Cowa! Ano tahidangen no salikaka kiso mitapay to titi, papisaday tisowanan to kakaenen, wa calemcem kiso alatek, kawra wa kamayan kiso misarocod misaday to kaolahan no ˈalomanay a kakaenen. O saˈopo mahecaday o malacafayay to widang a mitaheka, o Tatapangan ita ci Yihofa maharekayto misaday to ˈaredetay a dateng, itini kasaˈopoan a mitaheka. (ˈOlic 23:5; Matay 24:45) Misaday kita to kantangay sapacaˈof, mahecaday miˈorongay to mimingay sapatelong, wa mahemek ci Yihofa, samanen mafanaˈay Cingra miˈorongay kita to sangaˈayay a dafong no niyah. Mihaenay songilaˈen ita a misaday ato misarocod a pacaˈof, ano mihaen cowa ko pitaheka aca to misadayan ni Yihofa kadofahay a kakaenen, wa ngaˈayho paladaˈ to salikaka to mikiriwiˈan ita a misaday a sapatelong. w19.01 8 fiedac 3 fatac; 13 fiedac 20 fatac

Itini i lintad no Fangcalay Cudad, o mararaway pihakelongan mahawpay ko kaackan a madadiˈi. (Hosiya 4:13, 14) O hatiniay a pidoko tada mioratay to cowa ka lefot a tamdaw. Kawra, o mararaway pihakelongan cowa pafeli to tamdaw to midaˈocay a lipahak. Sanay ci Tafiti: “Oya mihakelongay a tamdaw to romaroma a kawakawas i, o sakararid nangra a mapades.” O mihakelongay to mararaway pidoyongan a tamdaw sapatoˈaya hananay ko wawa a mipatafang to makaniway kawas. (Isaya 57:5) Tada kaˈintehan ni Yihofa koniya awaay ko siniˈadaay a waywayan! (Yirimiya 7:31) O aniniay a mararaway pidoyongan pakiyadiay to malafoay madadiˈiay a waywayan, mahawpay ko tongsinlien. Harateng no roma tamdaw o pasalatay a waywayan konini sanay, kawra o kaadayayan a teloc no hatiniay a demak, mikitini lintad no Fangcalay Cudad cowa ka falic tahanini. (1 Korinto 6:18, 19) Mahaen o maˈaraway ita, ‘adihayay ko roray’ no hatiniay a tamdaw. Mihaenay, kapah a tamdaw, tengilen ko sowal no kakarayan a Wama. Pakasoˈlin, midofdof to Kawas pakayni tisowanan, o sangaˈayay. Haratengen, o pidokaˈ no tatiihay demak mataˈlifay ko caay ka halafin a hemek.​—Kalatiya 6:8 w18.12 27-28 fiedac 16-18 fatac

Ano maˈodang ko raramod no Krisciyang, o madimadiay i raramod a tamdaw wa misaˈosi to sasamaan ko demak. Sowal ni Yis, o makoracay tamdaw, iraay ko tatodong a mipiliˈ to milikong, ikor miliyaw a ciraramod. (Matay 19:9) Kawra, wa ngaˈay a misodod, mahaen o picada ni Hosiya ci Komilan. Patikolto ci Komil i, pasowalan ni Hosiya cingra, akato ka dadiˈi to roma faˈinayan. O cecay a liyad, cowa ka dadiˈi ni Hosiya ci Komilan. (Hosiya 3:1-3, ato roma pihongyak.) Ikor, miliyaw ci Hosiya madadiˈi ci Komilan. Mihaen ko demak ni Hosiya tahapinangan to makahiay ci Yihofa miliyaw a micada to Israil tamdaw, padotoc malo finawlan Ningra. (Hosiya 1:11; 3:4, 5) O maanan ko mamananam ita hani? O makoracay tamdaw ano padotoc a madadiˈi to raramod, paihkal to misododanto koya mararaway. (1 Korinto 1:11; 3:4, 5) Ano mihaen ko saˈosi no makoracay tamdaw, awaayto ko lalangian no Fangcalay Cudad a malalikong, o kakalacafay to raramod misaˈicel a tano harateng no Kawas a misalof to raramod. w18.12 13 fiedac 13 fatac

Ano micekiw kita i, songilaˈen misimsim ko harateng ni Yihofa, wa padama konini kitaanan, ano tahalifa to pasangaray no ikor, wa padama kitaanan inaneng ko misaˈosian. Mihaen, soˈlin o tatangsol kita misaˈosi to demak cowa ko mamarawraw. Haratengen ko pakayraan ni Yosif, tiya kayhiden no fafahi ni Potifa cingra i, tangsolay cingra a minaˈay. Maedeng na midotimay ci Yosif to pinengneng ni Yihofa to raramod, mafanaˈ to mitokelay ko Kawas madimadi to raramod. (Satapangan 39:8, 9) Sanay ko sowal ni Yosif to fafahi ni Potifa: “Saka, maanen ako ko pidemak to matiniay a tatiihay a ciraraw i kaˈayaw no Kawas saw?” O sowal ni Yosif paihkalay to iraay ko ni Yihofa a harateng ningra. Samaanay kita hani? Ano mikalona ko cafay matayal tisowanan, anca ira ko patikamiay tisowanan i soci to kaackan a sasing, wa samaan ko demak iso hani? ˈAyaw no tahalifa to pasangaray i, ano maharekayto kita a midotim to harateng ni Yihofa, hanaca misaˈosi to falocoˈ tano harateng Ningra a misaˈosi, wa madolo kita matatodong ko demak. w18.11 25 fiedac 13-14 fatac

O roma micacekiway tamdaw pakayni saka 18 sinael ngaˈayay haenen ko somowal: “Wa pakayni kako i Tatapangan mahemek a maacang, wa pakayni kako i Kawas lipahak a makelo.” Mikitini sakiˈok ni Yihofa tada taˈangayay ko malifokay ita a sapakalalok! Cowa ko makapahay aca a sakiˈok ko sapafeli ni Yihofa kitaanan, mikiˈokayho Cingra to palaˈosien Ningra ko araaw no Niyah. Mihadakay ko Hapakuk to cecay kalimlaan a lihaf wa tiˈeren ci Yihofa. (Hapakuk 2:4) Sa padotocaw kita pakasoˈlin ci Yihofaan, kalimlaan ko pitongal to kalawidang ita Cingraanan, mihaenay pahecaden ita ci Hapakuk, (1) padotoc a mitolon, pasowalen ci Yihofa to cariraw ato ka ciharateng no niyah a demak, (2) songilaˈen mihakelong ko Kimad no Kawas ato sakayat no likakawa Ningra, ato (3) madimadi ci Yihofaan, mihadidi mitala Cingraanan. Ci Hapakuk satapang masasowal to Kawas i masomadayho, ikorto matomesay ko pakasoˈlin ato lipahak. Todongen ita ko taˈarawan ningra, wa malifet ko mahecaday o wama ko pitakec ni Yihofa kitaanan. Manaokaniw, itiniay kita toniya ciraraway a hekal, o cimaho ko ngangaˈay pafeli kitaanan to hatiniay taˈangay a sasayar hani? w18.11 17 fiedac 8-9 fatac

Iraayho ko cecay lalangian papakasoˈlinen no Krisciyang, tangongolay ko olah ni Yihofa cangranan. Itini Yohani 3:16 sanay ko sowal: “Tada maolah ko Kawas to tamdamdaw. Saka, padeteng sa Cingra a pafeli to dengan a wawa Ningra to sakaecaaw ka tekop no cimacima a pasoˈlinay a mitiˈer i Cingraan. O sakaciˈorip nangra to midaˈocay.” Ano ci Yis tangongolay ko olah kitaanan, makahi a kinafalah to ˈorip no niyah. O hatiniay a olah tada kasapaanto! Sowal no Fangcalay Cudad, “ano o padesto, ano o pisemsemto, awaay ko pakapaliyasay titaanan naitini tonini a nipatalahkalan no Kawas i tapang ita ci Yis Kristoan a olah Ningra.” (Loma 8:35, 38, 39) O olah ni Yis patanektekay kitaanan. Latekay pakayni pasangaray malotayay kita, awaayto ko ˈicel midemak to noˈadingoan. Kawra, maharateng ko olah ni Kristo kitaanan, wa paˈicel kitaanan padadotoc a mihadidi. (2 Korinto 5:14) O olah ni Yis pafeliay kitaanan to haˈicel a tanektek, soˈlin tahalifa to pades, sapalak anca matoled, macariraw, cowa ko raranikay a misawad. w18.09 14 fiedac 8-9 fatac

Ano sapidoedoaw kita to soˈlinay kimad a midemak, wa micada ato midofdof to kihcod a limoˈot ni Yihofa. Wa paisalakaten ita miharateng ko soˈlinay kimad, midofdofho to safalod no Fangcalay Cudad a maˈorip. Pahecaden ita ci Tafiti tanektek ko falocoˈ, misaˈicel a midoedo to soˈlinay kimad no Kawas a midemak. Ano caka pisaˈosi ko falocoˈ ita mihaen to demak, wa misatapang milomal to o maan ko mihadakan no niyah a sapiˈaca, alatek sapialaaw to namifalahan a dafong. Cowa ko kalitosa aca ko cacadaen ita a soˈlinay kimad, o kihcod ko cacadaen, mafanaˈto dadoedoen no niyah ko ‘kihcod a soˈlinay kimad.’ (Yohani 16:13) Songilaˈen ita misaka dademak ko toki, hoeca piliyas to soˈlinay kimad. Latekay, caka pisinanot kita adihayay ko mapalakay a toki i lawla, kaolahan, misangwang, minengneng to tilifi. Soˈlin cowa ko mararaway koniya demak, kawra maˈafasay ko sapicekiw ato sapidemakaw to noˈadingoan demak a toki. w18.11 10 fiedac 7-8 fatac

Ano fahal sa ko kafalic i nokaˈorip ita i, alatek calemcemay ko falocoˈ, taˈangayay ko saroero. (Taneng 12:25) Alatek pasangar a micada to hatiniay a kafalic, pakayni toniya pakayraan, samaanen ita ‘parihaday to falocoˈ’ hani? (ˈOlic 131:1-3) Anini, soˈlin misiˈayaw kita to tatiihay a pakayraan, wa ngaˈay matinako ita ko sapafeli no Kawas a rihaday, o hatiniay a rihaday ngaˈayay midipot to falocoˈ ato ponoˈ no mita. (Filipi 4:6, 7) Mihaenay, ano mamatolem no cariraw ko harateng ita i, cangacangen ko sadama ni Yihofa, o sapafeli Ningra a rihaday wa padama kitaanan padotoc a mihodop Cingraanan, cowa ko mamisawad. O fangcalay saocor no Kawas cowa ko padama aca patikol to marihaday ko falocoˈ no mita, mikayatho kitaanan misinanot to roma a sinael, patalipaˈelalay kitaanan padotoc misakareteng to noˈadingoan a demak.​—Yohani 14:26, 27 w18.10 27 fiedac 2 fatac; 28 fiedac 5, 8 fatac

Iraay ko cecay dafong mikiˈayaway to misangaˈan no tamdaw, pakidemay ko pidokaˈ to tamdaw, o misamangahay! O misamangahay tamdaw mafanaˈay ko niyah to cowa ko soˈlinay, kawra padetengho cangra milipalaw to tao. O cima ko “misangaˈay” to saka cecay a mangah hani? Ci Akoma. Sowal ni Yis ci Akoma ‘o wama no misamangahay,’ sanay. (Yohani 8:44) Hacowaay ci Akoma pasowal to saka cecay a mangah hani? ˈAyaw no pina patek miheca, saka cecay faˈinayan fafahiyan ci Atam aci Ifa, lipahakay a maˈorip i Itin. Ikor, pasowalan ni Akoma ci Ifa to saka cecay a mangah. Mafanaˈay ci Akoma to palimoˈotan no Kawas ci Atam aci Ifa, hamaan komaen to ‘pafafidaˈay to ngaˈayay tatiihay’ a heci, ano misafelit cangra toniya limoˈot, wa mapatay cangra. Kawra pakaynian ni Satan i cecay ˈoner pasowal ci Ifa: “Caay ka patay kamo [saka cecay mangah]. O sakasaan no Kawas i, mafanaˈ Cingra nawhani ano komaen kamo to heci noya kilang i, mafohato ko mata namo, o mamatiyato o Kawas kamo, maedeng kamo a mihapinang to ngaˈayay ato tatiihay.”​—Satapangan 2:15-17; 3:1-5. w18.10 6 fiedac 1-2 fatac

Sapadotocaw kita to tingalaway a falocoˈ, wa misinanot to iraay ko cikaditay anca mararaway a harateng no niyah hokira. Ano misaˈicel kita padotoc to makoracay a harateng, ci Yihofa wa micada to pidoko no mita. (2 Korinto 4:2; 1 Timoti 1:5) O sowal no Fangcalay Cudad “maˈaraw no tamdaw [ko Kawas], caayto ko mamaˈorip” sanay, kawra, hano pasowalay ci Yis to tingalaway ko falocoˈ a tamdaw, wa “maˈaraw” ko Kawas hani? (Kasadakan 33:20) Itini Kirisiya Sowal, o “maˈaraw” sanay iraay ko “tano ponoˈ, cipinang, mafanaˈ” sanay a tatodong. Mansa ano mafanaˈ kita ci Yihofaan, maolah to makapahay a capeling Ningra, wa ‘tano falocoˈan a mata’ pakaˈaraw to Kawas. (Ifiso 1:18) Cowa ko kafanaˈ aca to capeling ni Yihofa, ano sinanoten ita to samaanay ci Yihofa padama kitaanan i, wa “maˈaraw” ita ko Kawas. (Yopu 42:5) Wa ngaˈayho kita misamocek i sapalifon ni Yihofa, mikiˈokay Cingra to papafelien Ningra ko padotocay makorac ato madimadiay a tamdaw. w18.09 20 fiedac 13, 15-16 fatac

Saka dademaken ita ko mananamay a soˈlinay kimad, papalemeden ni Yihofa kita. O sifanaˈ o taˈeneran no taneng, kawra o taneng milingatay to misaˈosian no mita. Sowal no Fangcalay Cudad citanengay ko kakonah sanay, samanen mafanaˈay cara itini i kaciherangan, mihoped to kakaenen. (Taneng 30:24, 25) ‘O taneng no Kawas’ ci Kristo, samanen sahtoay o kahemekan no Wama ko midemakan ningra. (1 Korinto 1:24; Yohani 8:29) Mitafo kita to misapoeneray ato misaka dademak to mananamay a soˈlinay kimad, o papalifonen no Kawas kita. (Matay 7:21-23) Mihaenay, wa misaˈicel kita palo pisapoeneran no tamdamdaw a mihodop ci Yihofaan a kitiraan ko kasakopang. Ano sapi saka dademakaw to mananamay ita i, misaaliay to toki ato mihadidiay, kawra ano makahi kita mihaen to demak, paihkalay to iraay ko misapoeneray a capeling no niyah, hanaca o misapoeneray ko falocoˈ a tamdaw aninito noikorto, mamilifok to sapalemed. w18.09 7 fiedac 18 fatac

O misangaˈay Tatapangan, na mitokelay a malacafay to malefotay tamdaw palaˈosi to araaw Ningra. Ikor cowato ka lefot ko tamdaw, kawra o madimadiay tamdaw wa ngaˈayho malacafay ci Yihofaan a matayal. Tinakoen, mitenak kita to ngaˈayay lihaf no Hongti Kitakit ato padama to tao malo Krisciyang, mahecaday ‘o kapot ita ko Kawas matayal’. (1 Korinto 3:5-9) Malacafay kita to ciˈicelay misangaˈay Tatapangan, milaheci to kalimlaan a tayal Ningra, tada kalikoanto! Kawra, coko mitosilay ato padama to tao malo Krisciyang aca ko tayal, ngaˈayho kita pakayni i roma pakayraan malacafay ci Yihofaan a matayal. Tinakoen, padama to paro no lomaˈ ato salikaka, paihkal to hinalafangay, makahi mirienang to masasiromaay a tayal i likakawa no Kawas, ato mitongal to adihayay a tayal ci Yihofaan. (Kolosay 3:23) Kawra aka pararinien ko tao ato niyah, samanen o mihecaan, tanoktok no tireng, kaˈoripan ato inaneng no cecacecay a tamdaw, cowa ka hecad, mansa o katayal ci Yihofaan cowa ka hecad. w18.08 23 fiedac 1-2 fatac

Mikiˈokan ni Yihofa ci Hapakuk, padama cingraanan to mamalifok ningra ko sapacaˈof, cato ka halafin wa malahdaw ko kacalemceman ningra. Mihaen ko demak ni Yihofa, mahecaday o pasowalay ci Hapakukan: “Ka pihadidi, pakasoˈlinen Kako, soˈlin manayar ko kafalic no pakayraan, oha papacaˈofen Ako ko micangacangan iso.” Patalipaˈelalan ni Yihofa ci Hapakuk, maharekayto Cingra misaˈosi to toki palaˈosi to sakiˈok, hato pakalalokay ci Hapakukan a mitala. Saikor, cowa ka lakisaw ko mitokelan ni Hapakuk. Mihadidi kita a mitala ci Yihofaan, misongilaˈ mihakelong to limoˈot Ningra kitaanan, wa matongal ko pakasoˈlin no falocoˈ, ano o mananto ko malifaay a sapalifet ngaˈayay mitafo to rihadayay a falocoˈ. Misaaliay ci Yis kitaanan mitiˈer ci Yihofaan, wa tooren ko toki no Niyah palaˈosi to araaw, hamaan patelas kita misaˈosi to hahacowa a “toki ato romiˈad” ko Kawas midemak. (Dmak 1:7) Aka a pisawad kita, sapoeneren ko falocoˈ, mitiˈer to Kawas, mihadidi a mitala Cingraanan, sangaˈayen misaka dademak ko toki misaˈicel a mihodop ci Yihofaan.​—Marko 13:35-37; Kalatiya 6:9. w18.11 16 fiedac 13-14 fatac

Ci Pitiro malecaday to Yutaya tamdaw itiya, mikikaemangho o cikaditay ko ˈalafang a tamdaw sanay, kawra dotocto a malifaay ni Pitiro misalofay to pinengneng ningra to hatiniay tamdaw. Tinakoen, maˈaraway ni Pitiro ko mapolosi. (Dmak 10:​9-​16) Malecaday kita ci Pitiroan, tatiyawcaen ko kemoday falocoˈ no niyah iraay ko misakakinihay a harateng hokira, makahiho a micada to sapadama no tao. Wa midemakho kita to maanan hani? Ano misakakahad kita to falocoˈ, wa malowid no olah ko misakakinihay a falocoˈ. (2 Korinto 6:11-13) Edeng ko mahecaday ko finacadan, ngasaw, kitakit, sowal a tamdaw ko misawidangan iso han? Maolah kiso misakakahad to micawmaˈan a widang han? Ngaˈay kiso mitahidang to cowa ka hecad a lalengawan malacafay mitosil, ato tahidangen cangra tayni i lomaˈ macacawmaˈ kalacafay komaen. (Dmak 16:14, 15) Ano mihaen ko demak wa matongal ko olah i falocoˈ iso, awaayto ko misakakinihay i falocoˈ iso. w18.08 9 fiedac 3, 6 fatac; 10 fiedac 7 fatac

O roma Misawacayay Tamdaw ni Yihofa itini roma pakayraan mafiyoray no hekal. Tinakoen, o kero nangra i picawmaˈan ato waywayan, cowa ka tatodong to Krisciyang. O roma tamdaw itini picawmaˈan a wangcan paketingay to sasing no niyah ato miterek to sowal, ora paketingan nangra a lalakaw paihkalay to midoedoay ko harateng no niyah tono hecian. kawra o waywayan nangra tatiihay ko pilingat toya misaˈicelay midofdof to palinian no Fangcalay Cudad a salikaka. (1 Pitiro 2:11, 12) Oniya hekal miowingay to ‘coos no tireng, coos no mata, pahiyoay to dafong a waywayan.’ (1 Yohani 2:16) Kawra, oni Yihofa kita, mihaenay patalipaˈelalay ko Fangcalay Cudad kitaanan ‘falahen ko caka ngodo a falocoˈ ato coos no hekal, toni lekakawa matatodong ko harateng, moecel, mangodo ko kaˈorip.’ (Titus 2:12) O pakayraan ita a maˈorip, mahaopay ko sasowalen, komaen ato nanaman komaen to epah, o caˈedong, waywayan ato matayal, papahapinangen ko tao to misacecayay kita maolah ci Yihofaan. w18.07 25 fiedac 13-14 fatac

Ano padotoc kita halamham ci Yihofaan, cato ka pakayni i waywayan no tao a maketer, hato mapalak ko kalalaˈed no niyah aci Yihofaan. Ano mahecad kita ci Mosian, itini likakawa no Kawas ira ko kalimlaan a ˈinorong, ngangalefen ko pisinanot tonini. Soˈlin kita o cecacecay tamdaw o mamisinanot, padotoc misaˈicel milaheci to sakalidong no niyah a demak, haratengenho ita cowa ka tano koˈicaway a palinian ko sapisawkit ni Yihofa kitaanan. (Filipi 2:1) Kawraan, ano matongal ko ˈinorong ita, wa ikaka ko haˈinorong ita ci Yihofaan. (Luka 12:48) Ira ko soˈlinay a olah ita ci Yihofaan, wa awato ko maanan a demakan to ngangaˈay pakapolin ato miketon to olah no Kawas kitaanan. (ˈOlic 119:165; Loma 8:37-39) Itini i pasangaray siˈayawen a ˈawaled maˈorip, nanay padotoc kita halamham to ‘maroˈay i kakarayan a Tatapangan’, misaˈicel cipinang to araaw Ningra. (ˈOlic 123:1) Nanay tahadaˈoc eca ka pakayni waywayan no tao a mapalak ko kalalaˈed no niyah aci Yihofa. w18.07 16 fiedac 19-20 fatac

Mahemekay kita pakaˈaraw to katongal no finawlan ni Yihofa. 2017 miheca, mataˈlifay ko 1,000 ˈofad ko pacekiwan no Misawacayay Tamdaw ni Yihofa. Itiniay mahapinang, pataengaday ko sikawdan no Kawas to likat nangra! Roma i, masaˈofaday maolahay to Fangcalay Cudad a tamdaw, mirienangay to Piharatengan to Kapatay ni Yis a Saˈopo. Mikitini saˈopo mahapinangay nangra, o sapatefoc o sapaihekal no Kawas to ciolahay falocoˈ. (1 Yohani 4:9) Anini, soˈlin cowa ka hahecad ko sowal no finawlan ni Yihofa, kamayanay makelec a malacecay pakahemek ci Yihofaan. (Paˈarawan 7:9) Ano o maanto ko sowal ita, icowa ko kitiraan, wa ngaˈay ‘mahecad o likat pataengad i ˈaˈayaw no tamdamdaw.’ (Filipi 2:15) Misarocod kita a mitosil, micowat to kakelec, padotoc a mikecol, wa ngaˈay paˈdil ci Yihofaan. w18.06 21 fiedac 1-3 fatac

O caˈof ni Yis paihekalay to misamacayay ko harateng ningra, milengo to soˈlinay kimad i tamdaw, hato cowa ko kalimelaan ko kakaenen. Papitosilan no Kawas i tamdaw ci Yis, mahaopay koniya Samariya fafahiyan. Pakaynien ci Yisan, o mitosilay a demak mahecaday o kakaenen ningra. (Yohani 4:32-34) Kawrira, ci Yakop aci Yohani cowaho ka fanaˈ masadafdaf ko picada to tamdaw. Tiya malacafay cangra ci Yisan, mitaˈlif to Samariya i, sapikilimaw to pilafinan itira. Cowa ka kahi ko itiraay tamdaw micada cangranan, mangolaway ci Yakop aci Yohani, somowal to papatefaden ko namal palaˈafo toya niyaroˈ, kawra mirikecan ni Yis cangra. (Luka 9:51-56) Ora cowa ka kahi micada to papotalay a tamdaw ano itiniay i Kalili niyaroˈ nangra, maedeng eca ka hatira ko kangolaw nangra halatek, ono ka pisaˈada nangra to tao, o pakayniay misakakinihay harateng. Ikor, itini Samariya ci Yohani mitosil, iraay ko ngaˈayay minaroˈan, ano tikolen ningra miharateng tada mararawayto isaˈayaw ko waywayan no niyah.​—Dmak 8:14, 25. w18.06 10-11 fiedac 12-13 fatac

Kedecen ita kono soˈlinay kimad a safaked to tatelecan, wa mitoor to soˈlinay kimad a maˈorip, i kihecod a pakayraan cowa ko mamisamangah. Misamaanay hani? Samanen o misamangahay, o ciˈicelay a lalosidan ni Satan, o mamidokaˈ to mimangahay tamdaw ato pasoˈlinay to mangah a tamdaw. (Yohani 8:44) Mihaenay, soˈlin cowa ko malefotay kita, wa misaˈicel miliyas to misamangahay. (Ifiso 4:25) Cowa ko madoloay mihaen to demak, 18 ko mihecaan ci Apih sanay ko sowal: “Ano misamangah tolatekay mafalahay ko fangafang.” Hano sasoˈliˈlin ko sowal hani? Ci Fitoriya 23 ko mihecaan, sanay cingra: “Ano soˈliˈlin ko sowal iso nolatekay, anca midopo to pihakelongan, masamsamay no tao, kawra mihaen to demak, cowa ko mamasipon kiso, samanen matongalay ko pasoˈlin no falocoˈ, ato kangaˈay no kalalaˈed ci Yihofaan, hanaca mamatongal ko pikangodo no maolahay tisowanan a tamdaw.” Mihaenay a micerid “tano soˈlinay kimad misafaked to tatelecan” tada o ciepocay! w18.05 28 fiedac 3, 5 fatac

Malingaday ko kaetih noniya hekal, kalimelaan ko padotoc ita a mikecol. Itini matatodongay a toki, o papalaˈafoen ni Yihofa koniya ciraraway a hekal, awaay ko hasasa tonini. (Matay 24:42-44) ˈAyaw nonini, wa mihadidi kita, mitafo to talipaˈelalay, micekiw to Fangcalay Cudad to romiˈamiˈad ato padotoc a mitolon. (1 Pitiro 4:7) Ngaˈayay todongen ita ko taˈarawan no salikaka, padotocay cangra mikecol a pataengad to likat no niyah, mansa taˈangay ko lipahak. Patomesen ita ko ciepocay noˈadingoan a demak i nokaˈorip, micerid a micawmaˈ to Krisciyang, mihaen o mamatongal ko lipahak hato kalikiay ko toki mataˈlif sanay ko harateng. (Ifiso 5:16) Soˈlin cowa ko malefotay kita, kawrira papihodopan ni Yihofa kita i Cingraan, mafanaˈ tonini taˈangayay ko pakalalok kitaanan. Pakayni sapadamaaw kitaanan, pafeliay to ‘malo sidaˈitay a tamdaw’, o malohemay malitengay no kasakopang, tangongolay ko piakoˈid no mita ci Yihofaan. (Ifiso 4:8, 11, 12) Mihaenay ano miliyaw ko malohemay malitengay milisoˈ tisowanan i, mameten ko toki a minanam cangranan, tengilen ko limoˈot nangra, mihaen to demak wa taˈangay ko macadaay iso a haepoc. w18.06 24-25 fiedac 15-18 fatac

Pasowalan ni Yis ko nisawawaan, cowa ko itini aca i olah ningra, ‘wa mararid i olah [ningra].’ Hano mihaen ko sowal ni Yis hani? Samanen ira ko mihadidiay a pinangan no tamdaw ngaˈ, ngaˈay fanekfek to kaˈorip no Krisciyang. Itini Yohani 15:​4-​10 toni pina sinael, kinapinaay masowal ni Yis ko ‘mararid’ sanay a tilid, paihkal to kalimlaan ko mihadidiay. Samaan kita paihkal to makalimay ko niyah mararid i olah ni Yis, milifok to pihayda ningra hani? Midofdof to limoˈot ni Yis. Misaaliay ci Yis kitaanan mitodong cingranan, samaanay ko demak ningra hani? Sanay ko sowal ni Yis: ‘Midofdofay kako to limoˈot no Wama, hato marariday i olah Ningra.’ Soˈlinay ci Yis patireng to taˈarawan no mita. (Yohani 13:15) Midoedo to limoˈot ni Yis a mitosil paihkalay to maolahay kita to Kawas, samanen o limoˈot ni Yis paihkalay to harateng no Wama ningra. (Matay 17:5; Yohani 8:28) Tano waywayan kita paihkal to maolahay ci Yihofaan aci Yisan, mihaen wa ngaˈay materek i olah Nangra. w18.05 18 fiedac 5-7 fatac

O kapah tamdaw wa misaˈosi itini picudadan, katayalan ato romaroma pakayraan. Ano mafanaˈ kiso to o maanan ko patosokan no niyah, wa madoloto matatodong ko misaˈosian. Ano kahenay kiso mihalaka, pasayra i patosokan a misaˈicel, kakaliki a malaˈosi. Anini, o dademakay i cowacowa a kasakopang a kapah citatodongay to papakahemeken no mita. Patafangan nangra ko niyah ci Yihofaan, misarocod ko falocoˈ micangacang to noˈadingoan a patosokan. Ciepocay ko kaˈorip no hatiniay kapah, misaˈicelay mitoor to sakayat ni Yihofa a dademak, mahawpay ko paro no lomaˈ makayatay no Kawas. Sowal no hongti ci Solomon: “Sarocoden ko falocoˈ a mitiˈer ci Yihofaan, i masamaamaanay a demak iso, pasayraen i Kawas ko falocoˈ iso, ta pasifanaˈen Ningra kiso to ngaˈayay a malo lalan no falocoˈ iso.” (Taneng 3:5, 6) O pinengneng ni Yihofa, masaka limelaan ko kapah i kasakopang, tangongolay ko olah ni Yihofa cangranan, wa dipoten, kayaten ato palemeden cangra. w18.04 26 fiedac 7 fatac; 27 fiedac 9 fatac

O tarokos ci Yohani i, o hecek no kasakopang no salakatay Krisciyang. Itini ratoh cudad, matiliday ningra ko mitosilay a demak ni Yis, kasemeran kora maˈoningay, itiyaho tahanini a Krisciyang milifokay to sapakalalok. Tinakoen, edengan ci Yohani ko somowalay, misaaliay ci Yis to nisawawaan paihekal to masasiolahay falocoˈ. (Yohani 13:35) O mitilidan ni Yohani a tolo tikami adihayay ko kalimelaan a kimad. Tinakoen, ano mararaw kita a matoled ko falocoˈ, wa ngaˈay mikitini 1 Yohani 1:7 a sinael milifok to sapakalalok, somowalay ko sinael. O remes ni Yis “mikoracay titaanan a mipalasawad to polong no raraw ita.” Ano tatiih ko falocoˈ no niyah i, maˈosi ko 1 Yohani 3:20 a sinael: “Ikakaay no falocoˈ ita ko Kawas a mafanaˈ to maamaan” sa i, coko taˈangayay ko piakoˈid ita ci Yihofaan han? O roma, edengan ci Yohani ko somowalay, “o kasadakan no olah ko Kawas,” sanay. (1 Yohani 4:8, 16) O mitilidan ni Yohani saka tosa ato saka tolo a tikami, pakahemekan ningra koya padotocay ‘midoedo to soˈlinay kimad dademak’ a Krisciyang.​—2 Yohani 4; 3 Yohani 3, 4. w18.04 18 fiedac 14-15 fatac