Saka 12 Folad

Cipinangay ci Yis to masiˈayaway no cowa kalefot a tamdaw a pasangaray, mafanaˈayho to nafalocoˈan nangra, mansa matemeray ko falocoˈ no tamdaw. Itini i sera ci Yis i, ‘mikihatiyaay malipahak to lipahakay a tamdaw, mikihatiyaay tomangic to tomangicay a tamdaw.’ (Loma 12:15) O roma tinakoan i, tiya lipahak a minokay koya 70 nisawawaan to kalaˈosi no mitosilan a minaroˈan i, ‘matemeray no fangcalay saocor, taˈangay ko hemek’ ni Yis. (Luka 10:17-21) Kinacecayay, maˈaraw ni Yis ko salawina ni Lacaros pakayni kapatay ni Lacaros a masomad, ‘cedaˈahay ko falocoˈ, tada mararomay.’ (Yohani 11:33) O malefotay a Yis hano ngaˈay sidaˈit to cowa kalefot a tamdaw, ira ko siniˈadaay a falocoˈ hani? Sakakaay lalangian pakayniay kaolah to tamdaw. Mahecad masowalay i ˈayaway lalakaw, ci Yis ‘lipahakay to nisangaˈan ningra a tamdamdaw.’ (Taneng 8:31) Oniya olah miocoray ci Yisan a cipinang to harateng no tamdaw, sowal no tarokos ci Yohani ‘cipinangay to falocoˈ no tamdaw’ ci Yis sanay.​—Yohani 2:25.w19.03 20 fiedac 1-2 fatac

Palahdawan ni Satan ko hafay ato matayalay ni Yopu, mitonganganayho ci Yopuan. Miˈodisan ni Satan ko paro no lomaˈ ni Yopu, mipatay to 10 a wawa ningra. Midokaˈayho to tireng ningra, mikitini fongoh tahira saripaˈ, manoˈnoˈay ko dokaˈ, tada adadaay. Pakidemay ko somad no fafahi ningra, singki sanayto, papisawad ci Yopuan a madimadi to Kawas, kapatay ko ngaˈay. Soˈlin sakapatayaw ci Yopu, kawra kamayan a mitafo to madimadi. Ikor, o roma a pakayraan ko sapiˈodis ni Satan ci Yopuan. Saka dademakan ni Satan ko tatoloay widang ni Yopu a misetiˈ cingraanan, oniya tatoloay pinaay romiˈad malacafay cingraanan, awaay ko sahinom cingraanan. Awaay ko siniˈada nangra a mirikec ato milikaf cingraanan, somowal to o Kawas ko pairaay to roray ni Yopu, cowa ka ciharateng ko Kawas to pitafo ni Yopu to madimadi sanay. Somowalayho to tatiihay a tamdaw ci Yopu, mansa micada to hatiniay a sayfang sanay.—Yopu 1:13-22; 2:7-11; 15:4, 5; 22:3-6; 25:4-6. w19.02 4 fiedac 7-8 fatac

Matalaw to maanan a demak cowa ko tatiihay. Tinakoen, o kakangodoen a mikatalaw ci Yihofa, mipakahemek Cingranan. Ci Atam aci Ifa ano iraay ko mikangodoay a mikatalaw ci Yihofaan, ecato ka pisafelit cangra ci Yihofaan. Ikor no misafelit cangra to Kawas i, o ngaˈayay falocoˈ nangra, pahapinangay to mararaway ko niyah. O paparocoken nangra ko raraw ato patay i teloteloc. Cipinangay ci Atam aci Ifa misafelitay ko niyah to limoˈot no Kawas, mangodoay to nika wacay no tireng no niyah, mansa tano papah a mitahepo to tireng. (Satapangan 3:7, 21) Misaaliay kita mikangodo a mikatalaw ci Yihofaan, kawra hamaan pakidem a matalaw to patay. Milimasmasay ci Yihofa wa ngaˈay tahadaˈoc a maˈorip kita. Ikor no mararaw, ano soˈlin a pasasiyor kita, wa sododen ni Yihofa kita. Pakayni pakasoˈlin ita to patafangan ni Yis a sapatefoc ko sapisodod ni Yihofa to raraw no mita. O kalimlaan a pakayraan ita paihkal to pakasoˈlin, patafangen ko tireng i Kawas micada to inoˈ.​—1 Pitiro 3:21. w19.03 5-6 fiedac 12-13 fatac

Adihayay ko lalangian no Israil tamdaw paihkal to miakoˈiday. Mitefadan ni Yihofa ko 10 a pades i Icip, paliyas to kalakoli nangra. Patayanho no Kawas ko sofitay no Icip i Kahngangay a Riyar, ho caka malaˈafo no ˈada cangra. Tada miakoˈiday cangra ci Yihofaan, halo romadiway pakahemek Cingranan. Kawra, padotocay cangra paihkal to nai falocoˈay a miakoˈid hokira? Malifa no Israil tamdaw ko faelohay sapalifet i, kahenayay cangra mapawan to nano demak ni Yihofa cangranan. Cangoˈotay cangra to piakoˈid ci Yihofaan ato cowa kasemer to nidemakan Ningra. (ˈOlic 106:7) Sowal no Fangcalay Cudad: “Itira toya kohkohan a ngaliwngiw ci Mosian aci Aronan ko polong no Israil a finawlan.” O ngaliwngiway cangra ci Yihofaan. (Kasadakan 16:2, 8) Masomaday ci Yihofa to waywayan no finawlan Ningra, pasowalan Ningra cangra, edengan ci Yosuwa aci Kalip, oya lintad a Israil tamdaw wa mapatay i kohkohan maemin.​—Saˈosi 14:22-24. w19.02 17 fiedac 12-13 fatac

Cowa pisaali ci Yis to misataˈangay a misalisin to kapatay ningra a palosiyang to niyah. Pasowalan ningra ko nisawawaan, cecay miheca kinacecay tano kantangay a limasmas, miharateng to kinafalah ningra. (Yohani 13:15; 1 Korinto 11:23-25) O misaalian a dafong no Lafi no Tapang kantangay, cowa ko misatakaraway ci Yis. O kakarayan a Hongti iraay ko misapoeneray a capeling tada kahemekanto. (Filipi 2:5-8) Samaanen ita mitodong ko misapoeneray a capeling ni Yis hani? Isalakat haratengen ko saali no tao, cowa ko niyah. (Filipi 2:3, 4) ˈAyaw no kinafalah ci Yis to ˈorip a dadaya, mafanaˈay cingra to mamisemsem a mapatay cingra, mafanaˈay to mamasomad ko tarokos to nika patay ningra, mankora, patadoay cingra a miharateng cangranan, mansa kalasaka dademakan ko saikoray dadaya pasifanaˈ, pakalalok ato mihinom to tarokos. (Yohani 14:25-31) Tada misapoeneray ci Yis, o kaciharateng ningra to haepoc no tao ikakaay to piharateng to niyah, o ngaˈayay a taˈarawan ita cingra! w19.01 21 fiedac 5-6 fatac

Ano maharateng iso pakamay a pacaˈof sakahadakaw sanay ko falocoˈ han? Hatiraayto, ano pacaˈof ko ˈalomanay tamdaw i marawraway ko falocoˈ. Mihaen a calemcem kiso paihkalay to iraay ko misapoeneray a capeling iso, minengneng to tao mikikakaay ko kangaˈay to niyah, o hatiniay a capeling o kaolahan ni Yihofa. (ˈOlic 138:6; Filipi 2:3) Mitokelay ci Yihofa tisowanan pakahemek Cingraanan, hanaca itini kasaˈopoan pakalalok to salikaka. (1 Tisalonika 5:11) Maolahay ci Yihofa tisowanan, papadamaen Ningra kiso timolo a pacaˈof. Iraay ko pina sinael wa ngaˈay pakalalok kitaanan timolo a pacaˈof. Sowal no Fangcalay Cudad [latekay iraay ko dangoc no sowal ita, latekay cowa ka tatodong ko kasomowal ita. (Yakop 3:2) Nikawrira, cowa pisaali ci Yihofa kitaanan a malefot, cowa ko mamihaen ko salikaka a misaali kitaanan. (ˈOlic 103:12-14) Mahecaday o paro no lomaˈ ita ko salikaka, hanaca maolahay kitaanan. (Marko 10:29, 30; Yohani 13:35) Cipinangay cangra, ano pacaˈof kita i, latekay cowa ka fanaˈ misamaan a ihkal a mihadak to harateng no niyah. w19.01 8 fiedac 3 fatac; 10-11 fiedac 10-11 fatac

O kapah a tamadaw itini toniya hekal cowa ko madoloay midofdof toniya limoˈot, kawra oha ngangaˈay a mademak nangra. Kapah tamdaw, ira ko sadama no Kawas tisowanan, oha mamalaˈosi, hanaca cowa ko kakaemangan aca a malaˈosi, oha mamalaˈosi ko hakelong no ˈorip. Dotocto, nengnengen ita ko tosa a tinakoan, o cecay o pilowid no Israil tamdaw to Mikiˈokan a Pala, o roma o noka sasiˈayaw ni Tafiti aci Koliyat. Ya mangata tono Israil tamdaw ko Mikiˈokan a Pala i, cowa pisaali ko Kawas cangraanan pacakat to sapilood a ˈicel anca minanam a milood, pasowalay cangraanan midofdof to limoˈot Ningra, mitadiˈec Cingraanan. (Limoˈot 28:1, 2; Yosuwa 1:7-9) Matengil no kalo a tamdaw ko mahaenay limoˈot, cowa ka tatodong wasa miharateng. Kawra misawacayay ko demak to o sangaˈayay a limoˈot konini, samanen padotocan ni Yihofa a pakalowid ko finawlan Ningra to Kanan a tamdaw. (Yosuwa 24:11-13) Tolasen ko sowal, sapidofdofaw to Kawas ira ko pakasoˈlinay falocoˈ wa ngaˈ, o hatiniay a pakasoˈlin o papalaˈosi to tamdaw. O cowa ka falic a soˈlinay kimad konini, ngaˈayay saka dademaken anini. w18.12 25 fiedac 3-4 fatac

O roma miliyasay to soˈlinay kimad a tamdaw, samanen pasangaray cangra micada to pisalof no likakawa a mitadtad to sinael; O roma tamdaw mirienangay to kapot no misafelitay to kimad a tamdaw, Ikor, misetek ko falocoˈ cangra a miliyas ci Yihofaan ato kasakopang. Soˈlin o papahecad cangra to tarokos ci Pitiroan pakasoˈlin ci Yisan. (Hipray 3:12-14) O roma tamdaw cowa ka fanaˈto palidlid sanay miliyas to soˈlinay kimad, mahecad to tamina manaˈonay maˈalol nai lawac no ˈalo, mitadtad ko Fangcalay Cudad to hatiniay kafalic, hato ‘mapawpaway a maˈalol’ sanay. (Hipray 2:1) O hatiniay tamdaw cowa ka hecad o misaˈosiay mihawad to soˈlinay kimad a tamdaw, samanen cowa ko padetengay cangra miliyas to soˈlinay kimad. Kawra, kamayan mipalak cangra to kalalaˈed no niyah aci Yihofa, mangalef malahdaway ko kalawidang ci Yihofaan. w18.11 9 fiedac 5-6 fatac

Ano sakacakataw i pihodop ci Yihofaan, makahi kiso micada to adihayay a sapahatatanam han? Ngaˈay kiso misaˈicel patatodong to palinian mirienang to SKE. Oniya sapahatatanam wa ngaˈay padamato mieminay to toki matayal a salikaka, micudiyapto wa ngaˈay matongal ko tayal no Hongti Kitakit. Misingsiay mirienang toni pihatatanaman a tamdaw, mamakahi micada to kihcod a tayal. Wa makahi kiso micada to hatiniay sapahatatanam, milifok to adihayay a tayal han? (1 Korinto 9:23) O finawlan no Kawas kita, paihkalen ko hinapaladaˈay a harateng, to romiˈamiˈad ciharatengay to saali no tao. Makahi kita patafang saki tao, halo paihkal to olah ato siniˈada to tao. Ano marariday kita a midemak wa mahemek, ato rihadayay ko falocoˈ. (Kalatiya 5:22, 23) Ano hakowato ko demak iso ci Yihofaan, ano todongen ci Yihofa hinapaladaˈ, hanaca kalacafay Cingranan matayal, o mamarenec a lipahak!​—Taneng 3:9, 10. w18.08 27 fiedac 16-18 fatac

Wa milicay ko roma tamdaw alatek: “Samaan ko pakayraan ngaˈ ngaˈay ko Krisciyang malalikong, miliyaw a ciraramod hani?” Milengo ci Yis to milikongay i, sanay cingra: “O misawaday to fafahi no tireng a ciramod to roma a fafahiyan i, o maˈodangay cingra a pararaw to saˈayaway a fafahi ningra. Mahaen ko fafahi ano misawad to faˈinay no tireng a ciramod to roma a faˈinayan i, o maˈodangay cingra.” (Marko 10:11, 12; Luka 16:18) Mitokelay ci Yis mikangodo ko tamdaw to limasmas no raramod. Ano milikong ko cecay faˈinayan to madimadiay a fafahi, ikor ciramod to roma, o maˈaˈodangayto. O fafahiyan ano mihaen to madimadiay a faˈinay, o maˈaˈodangayto. Samanen cowa ka hererek ko kalaliting no raramod, samanen minengneng ko Kawas, kamayan o “cecayay ko tireng” no raramod. Mihaenay ko sowal ni Yis, ano patelas a likongen no faˈinay ko madimadiay fafahi i, wa pakararaw to fafahi to maˈodangay alatek, hano mahaen hani? Samanen cowa ko ngangaˈay koniya fafahiyan miliyaw a cifaˈinay, kawra pakayni sakaˈorip miliyaw a cifaˈinay, mahecaday o maˈodangayto cingra. w18.12 11 fiedac 8-9 fatac

Ikor no pasowalen ni Hapakuk ci Yihofa to nafalocoˈan a sowal rihadayayto ko falocoˈ, misaˈosiay ko falocoˈ padotoc a mitala ci Yihofaan, pakasoˈlin to mamidemak Cingra. Ira ko hatiniay a harateng ni Hapakuk cowa ko cecayay liyad a pakasoˈlin, miliyaway cingra paˈicel to saˈosi no falocoˈ, sowal ningra ‘wa sapater sa mitala to kapadesan a romiˈad’ sanay. (Hapakuk 3:16) Mikitini misaˈosian ni Hapakuk ngaˈayay mananam ita ko maanan hani? Saka cecay, ano o maananto ko malifaay ita a pasangaray, aka pisawad mitolon ci Yihofaan. Saka tosa, o hahakelongen ita ko sakayat no pakaynian ni Yihofa i Kimad Ningra ato likakawa Ningra kitaanan. Saka tolo, oha mamihadidi kita mitala ci Yihofaan, misarocod to falocoˈ mitiˈer Cingraanan, pakasoˈlin to maharekayto Cingra misaˈosi to toki palahdaw to roray no mita. Ano mahecad kita ci Hapakukan, padotoc pasowal ci Yihofaan to nafalocoˈan a harateng, mihakelong Cingraanan ato mihadidi a mitala Cingraanan, mihaen o rarihaday ko falocoˈ ita, ira ko ˈicel mihadidi. O sapafeli ni Yihofa kitaanan a tokel, wa padama kitaanan padotoc a mihadidi, soˈlin misiˈayaw to masakenaay a pasangaray, wa ngaˈayho a lipahak. O sapafeli no Kawas kitaanan a tokel patongalay to pakasoˈlin no falocoˈ ita, pakasoˈlin to mamidemak ko kakarayan a Wama.​—Loma 12:12 w18.11 15-16 fiedac 11-12 fatac

Samaanay ko pinengneng no Kawas to pakapolinay to tao hani? Sowal ni Yis: “O [pakapolinay] to cecay nonini a sasafaay a mitiˈeray i takowanan i, o nika soˈot no liˈel ningra i tataˈangay a fokeloh a tailangan a mafahkol i riyar ko ngaˈay.” (Marko 9:42) Oniya ciˈicelay a sowal ni Yis, paihkalay o pakidemay a raraw ko pakapolinay to tao a demak! Mahecaday ko harateng ni Yis to kakarayan a Wama, mansa ngaˈay pakasoˈlin kita, ano haratengay saan ko tamdaw midemak to pakapolinay to Krisciyang a demak, cowa ko mamahemek ci Yihofa. (Yohani 14:9) Mahecaday ko harateng ita ci Yihofaan aci Yisan han? Paihkalay to maanan ko waywayan ita hani? O kaolahan ita a nanaman ci rikoˈ ato pilafa, ano o kapiliˈan ato mamifekad ko mararaway a harateng no salikaka, wa makahi kita pakayni saka ciepoc no salikaka a misawad to kaolahan no niyah, itini no caˈedongan a demak hokira? w18.11 25 fiedac 9-10 fatac

Hano pairaen ita ko madimadiay ato cowa pisafelit to palinian Ningra hani? Cisasaay ci Satan ci Yihofaan, cisasaay cingra to araaw ita midoko to Kawas. Pakaditay cingra to ngangan ni Yihofa, mitonganganay Cingraanan, o mariˈangay a mikowanay Cingra, misatekeday ato misamangahay, sanay. Ka adayayan i, ci Atam aci Ifa mikapotay ci Satanan, misafelit ci Yihofaan. (Satapangan 3:1-6) Ngaˈayay ci Atam aci Ifa mitongal to olah ci Yihofaan, kawra misiˈayaw to hinapec ni Satan i, cowa ka marocek ato masongilaˈ ko olah nangra. Mihaenay, wa ira ko tamdaw ngaˈay [paihkal to madimadiay] ci Yihofaan hokira? Aira ko tamdaw mitafo to madimadi han? O hatiniay a hinapec, mafekaday i tireng ni Yopu. (Yopu 1:8-11) Mahecaday cingra kitaanan cowa ka lefot, mararaway ko demak, [kawra madimadiay ci Yopu, cowa pisafelit to palinian ni Yihofa,] hato maolahay ci Yihofa cingraanan. w19.02 3-4 fiedac 6-7 fatac

Misaka dademakan ni Yis koniya sapatinako, a mitadtad to pisalimla no roma tamdaw to soˈlinay kimad no Hongti Kitakit no Kawas. Sapikilimaw ko misasingdiay to kalimlaan a cincu, ikor mahelaayto. Oniya cincu tada pasangarayto, kawra sapiˈacaaw cingra, tangsol “pacakay to maamaan ningra a maemin.” (Matay 13:45, 46) O mahelaay ita a soˈlinay kimad mahecaday a pasangar ˈacaen, ano o soˈlinay kimad no Hongti Kitakit, anca o kalimlaan a sifanaˈ no Fangcalay Cudad, wa makahi kita tangsol a mihadak to sapiˈaca, a sapilifokaw to soˈlinay kimad. Misaareteng kita to soˈlinay kimad, cowa ko ‘papaˈaca’ ciraan. (Taneng 23:23) Ka adayayan i, o roma midokoay to Kawas a tamdaw, cowa to pisaareteng to soˈlinay kimad, ‘paˈacaay’ to soˈlinay kimad, cowa ka ciharateng kita mahaen cangraanan! Ano mikifalocoˈ kita a maolah to soˈlinay kimad, cowa ko ‘papaˈaca’ to soˈlinay kimad, wa mitengil to limoˈot no Fangcalay Cudad, ‘midoedo to soˈlinay kimad a midemak.’ (3 Yohani 3, 4) ‘Midoedo to soˈlinay kimad a midemak,’ micapiday to waywayan, paro kalimlaan i nokaˈorip ko soˈlinay kimad, mahecad ko waywayan to soˈlinay kimad. w18.11 9 fiedac 3 fatac

Cowa ka piocor ko coyoh to Israil tamdaw milood to Yiriko a niyaroˈ, misaaliay cangranan to romiˈamiˈad, kina cecay mitaliyok toniya niyaroˈ. Hanaca padotoc enem a romiˈad, mihaen to demak. Saka pito romiˈad, kina pito a mitaliyok to niyaroˈ. Harateng no roma sofitay, tada mipalakay to toki ato ˈicel konini, kawraan, o mikeriday to Israil tamdaw ci Yihofa, ihkalay mafanaˈ sasamaan to demak, tooren no Israil tamdaw ko sakayat a midemak, teloc to, cowa ko paˈicel aca to pakasoˈlin to falocoˈ, maliyasay ko sapisiˈayaw to sofitay no Yiriko a malalood. (Yosuwa 6:2-5) Mikitini toniya maˈoningay, mananamay ita ko maanan hani? Latekay, cowa ka cipinang kita to samaanay, hano misalof ko likakawa to cecay demak anca iraay ko faelohay a limasmas. Tinakoen, o roma tamdaw misatapang misaka dademak to soci pingpan, micekiw, mitosil ato masaˈopo, iraay ko sasa no harateng. Kawra, ikor to mahapinangay misaka dademak to no wangcan a lalakaw, adihayay ko epoc. Ano maˈaraw ita, to ngaˈayay minaroˈan i noka falic, pakayni faelohay a limasmas malahdaway ko sasa no falocoˈ, matongalay ko tanektek no pakasoˈlin no mita, hanaca, matongalay ko makelecay falocoˈ no salikaka. w18.10 23 fiedac 8-9 fatac

Mahaenay ko pitokel no tamdaw ci Misiyaan, mansa mitokelay ko Kalili a tamdaw, malahongti nangra ci Yis. Harateng nangra, o sangaˈayay a ˈaˈideman ci Yis, samanen kasemeran ko kimad ningra, ngaˈayay miadah to adadaay, mihadak to kakaenen no tamdaw. Ikor no pafecolen ni Yis ko 5,000 faˈinayan i, mahapinangay ningra ko harateng no ˈalomanay, sanay ko sowal no Fangcalay Cudad: “Mafanaˈ ci Yis to nika o tatayni cangra a miala a pacieci i cingraan a palahongti. Saka, liyas sato cingra a cecay a talalotok.” (Yohani 6:10-15) Tocila noniya demak, mafasaway ko harateng no ˈalomanay, itini lawac no Kalili a riyar, pasayra i ˈalomanay ci Yis a mitadtad to tayal ningra, o papaira to haepoc no Israil kitakit i noˈadingoan, coko pakadafongay, mansa pasowal ci Yis: “Aka ka tayal kamo to sapialaaw to mamalahedaw a kakaenen. O nika tayal to sakaciˈorip to midaˈocay ko ngaˈay.”​—Yohani 6:25-27. w18.06 4 fiedac 4-5 fatac

Itiyaay a tamdaw matiya ‘o mapaekelay a penen’ anca ‘mamalanto a keliw’, mafanaˈay ci Yis to harateng nangra, patadoay ci Yis ciharateng, siniˈadaay, mihadidiay cangranan. (Marko 10:14) Soˈlin, caka haen kita ci Yisan mahapinang ko demak a pasifanaˈ to tamdaw, kawra ngaˈayho kita patado miharateng to mitosilan i kilac a tamdaw, tinakoen, tano samaanay a pakayraan pasowal cangranan, ihacowa a toki milisoˈ cangranan, anca hakowa ko toki a materek hokira. Anini, mapaekelay no misasingdiay ko ˈalomanay tamdaw, hanaca masamsamay no mirikecay ato ˈaˈideman no kalodoyongan, marawraw cangra a matiya o malafelay. (Matay 9:36) Telocto maketer cangra toni hekal, matoleday ko falocoˈ. Mihaenay, o lalakaw no sowal ato ngiha sidaˈit a patado miharateng masaka limlaan! Masolot no lihaf ita ko ˈalomanay tamdaw, cowa ko kafanaˈ aca ita misaka dademak to Fangcalay Cudad, pakayniayho pipatado ita miharateng, soˈliˈlin a ciharateng cangranan. w18.09 31-32 fiedac 13-14 fatac

Ano mafanaˈ kita to misaaliay ko niyah to noˈadingoan, wa micangacang to sadama ato sakayat no Kawas. Mihaenay, wa micerid kita komaen to noˈadingoan a kakaenen, misinanot to saali ni Yihofa, hanaca misalimla to kalalaˈed no niyah aci Yihofa, mihaen wa ngaˈay milifok kita to soˈlinay a lipahak. Wa matongal ko pakasoˈlin ita ci Yihofaan, pasoˈlin to kakahnay malaˈosi ko sakiˈok Ningra. (Titus 2:13) Patireng kita to tangongolay kalawidang ci Yihofaan, ngaˈay milifok to tahadaˈocay a lipahak. Sanay ko sowal no tarokos ci Pawlo: “Kararid kamo a lipahak to nika lacecay namo [aci Yihofa]. Miliyaw kako a pasowal i tamowanan, kalipahak kamo”! (Filipi 4:4) Ano ciharatengay kita malo soˈlinay widang ni Yihofa, minanamto Kimad no Kawas. (Taneng 3:13, 18) Sapadotocaw kita a lipahak, o piˈosi aca to Fangcalay Cudad cowaho ka edeng, saka dademakenho ko mananamay. Pasowalay ci Yis to kalimlaan mihaen ko demak, sanay ko sowal: “Mafanaˈ kamo tonini a demak. Saka, ano milaheci kamo tonini i, o malemeday kamo.” (Yohani 13:17; Yakop 1:25) Ano sapirenecaw kita to saali no niyah i noˈadingoan, hanaca ira ko soˈlinay a lipahak, wa misaˈicel misaka dademak to soˈlinay kimad. w18.09 18 fiedac 4-6 fatac

Cipinangay ato ciharatengay ci Ipafras to salikaka. Mapalit ci Pawlo kalacafayay cingranan, kawra kamayan a misinanot to saali no salikaka i noˈadingoan. (Filimon 23) Soˈliˈlinay a ciharateng cingra to salikaka, paihkal to cowa pisateked a harateng. Patado kita to roma salikaka a mitolon iraay ko epoc, mangalef ano ihkalen ita a misadak ko ngangan nangra. (2 Korinto 1:11; Yakop 5:16) Itini satolon wa ngaˈay hadaken iso ko ngangan no nima hani? Mahecad ci Ipafrasan, ˈalomanay Krisciyang patadoay to salikaka a mitolon, o roma patadoay to tahapadesay a paro no lomaˈ mitolon, o roma patadoay to tahasiˈayaway to sakayhid, anca mamisaˈosi to kalimlaan demak a tamdaw mitolon, ano mitolon kita ngaˈayay haratengen ko mapatayay ko salawina a tamdaw, tahalifaay to lalood anca pasangaray ko sakaˈorip a tamdaw. Soˈlinay, ˈalomanay salikaka misaaliay to patado ita cangranan a mitolon, wa mikitini cangra i hatiniay satolon milifok to haepoc. w18.09 5-6 fiedac 12-13 fatac

Pasowal ko tarokos ci Pawlo toniya sowal i, cowa ko pafeli aca to tamdaw to dafong, mahawpay ko pakalalok, mikayat, padama to iraay ko saali a tamdaw. (Dmak 20:31-35) Tano sowal ato waywayan ci Pawlo pasifanaˈ kitanan to sasamaan kinafalah to toki no niyah, ˈicel, ciharateng ato maolah to tamdaw. Mahapinangay no mikingkiway to siyakay a tamdaw, o hinapafeliay wa malipahak ko falocoˈ sanay. Milengoay ko cecay lalakaw: “O sowal no ˈalomanay a tamdaw, ano midemak to ngaˈayay i, mamalifok ko taˈangayay a lipahak.” Somowalay ko mikingkiway a tamdaw, padama to tamdaw ‘matongalay ko araaw ato epoc no kaˈorip, samanen mihaen to demak mirenecay to sasafaay a saali no tamdaw.’ Mihaenay, ngaˈay padama kita to ˈalomanay a tamdaw hamaan ko lifon, mihaen to demak tanoktokay ko tireng, matongalay ko lipahak. Mihayay kita toniya sowal, samanen sowal no misangaˈay to tamdaw a Yihofa o paladaˈay ikakaay ko lipahak to milayapay.​—2 Timoti 3:16, 17. w18.08 22 fiedac 17-18 fatac

Paliˈayaway pasowal ci Isaya ci Yisan, “caay pakaynien ningra i maˈaraway ningra ato matengilay ningra a lihaf ko nipihapinang ningra to dademaken a mikowan,” hanaca ‘tano moecelay ko pisawkit to pakoyoc a tamdaw.’ (Isaya 11:3, 4) Oniya sapaˈayaw misayaray kitaanan, misamaanay hani? Samanen, aniniay a hekal sahto o misakakinihay ato misakahmaway minengneng to tao, mansa hinatalaay kita to malefotay a pisawkit ni Yis, cowa kao papotal ko nengnengen ningra a misawkit to tamdaw. Tocerid misawkitay kita to tamdaw alatek, kawra cowa ko malefotay a tamdaw kita, pasangaray mahecad ci Yisan matatodong ko pisawkit to tao, tano papotalay a pakayraan ko pisawkit. Mihaenay haw i, itini i hekal ci Yis palimoˈotay to tarokos: ‘Aka kao papotal aca ko nengnengen a misawkit to tamdaw. Tooren ko moecelay a palinian misawkit to tamdaw.’ Mitokelay ci Yis kitaanan mitodong cingraanan, aka kao papotal aca ko nengnengen a misawkit to tamdaw. w18.08 8 fiedac 1-2 fatac

Soˈliˈlin cowa ka pakatengil kita to ngihaˈ no Kawas nai kakarayan, kawra pakaynian ni Yihofa i Fangcalay Cudad a pasowal kitanan ato pafeli to sakayat Ningra. O fangcalay saocor ni Yihofa padamaay to ‘madimadiay citanengay a koli’ a paladaˈ to noˈadingoan a kakaenen to sikawdan Ningra. (Luka 12:42) Anini, cowa ko miinsacan ato nai tingnaw aca a lalakaw, iraayho ko tano ika a minengnengan a lalakaw, tada kadofahayto ko noˈadingoan no mita! Nanay o Kimad no Kawas pafeli to pakasoˈlinay falocoˈ ita to, i kapalay ni Yihofa ko kihcod, pakasoˈlinho wa palahdawen ni Yihofa ko pairaan ni Satan atoya tatiihay a hekal a dokaˈ no mita. Songilaˈen ita mitengil ko ngihaˈ ni Yihofa. Mihaen ko demak ita i, wa tanoktok a misiˈayaw to aniniay ato noikoran a sapalifet, hatoya sapatalipaˈelal no Fangcalay Cudad: ‘Ka mihadidi kamo, malaheci ko araaw no Kawas no ikor i, wa malifok ko saparaheker no Kawas.’​—Hipray 10:36. w19.03 13 fiedac 17-18 fatac

Samanen halafinayto malo ˈaˈideman no Israil tamdaw ci Mosi, saka fanaˈaw ci Yosuwa to samaanay ko pinengneng no Israil tamdaw to pikerid ningra haratek. (Limoˈot 34:8, 10-12) O cecay taˈarawan to Fangcalay Cudad a cudad, milengo to Yosuwa 1:1, 2 sanay ko sowal: “Ano litenganto, aninito, mafalic ko sapikerid a fadangalan mifekaday to fodifod no lekakawa.” (Yosuwa 1:9-11) Paihkalay ko Fangcalay Cudad, pakaynian ni Yihofa i coyoh, mikayat ci Yosuwa ato Israil tamdaw, onini a coyoh, o feseniˈan a wawa no Kawas, oya “Sowal,” sanay. (Yohani 1:1; Kasadakan 23:20-23) Padamaan ni Yihofa ko Israil tamdaw, mahererek ko pikerid ni Mosi cangraanan, ikor i, ngaˈay mananam to faelohay a ˈaˈideman ci Yosuwa. w18.10 22-23 fiedac 1-4 fatac

Mafanaˈay ci Yihofa to makahiay mihodop Cingranan a tamdaw, hanaca mitilidan ko ngangan nangra i piharatengan a cudad Ningra. Ano makalimay kita matilid ko ngangan no niyah i piharatengan a cudad ni Yihofa, wa mitoor to pina palinian. Ihekalay ci Malaki a mifanaˈ, oha ‘mamangodo kita ci Yihofaan’ ato ‘miharateng’ to ngangan Ningra. Kawra, ano midoko kita to roma kawas ato dafong, o papadengen ko ngangan ita mikitini piharatengan a cudad ni Yihofa. (Kasadakan 32:33; ˈOlic 69:28.) Mihaenay, patafang to tireng ci Yihofaan cowa ko piketon aca to sowal midofdof to araaw Ningra, halo picada to paputisem, samanen o cecayay aca liyad koniya demak, kahenayay mataˈlif. Midopo kita ci Yihofaan, nohatini tahadaˈoc wa midofdof Cingranan, hakelong no ˈorip ono Ningrato kita.​—1 Pitiro 4:1, 2. w18.07 23-24 fiedac 7-9 fatac

Cowa ko fahal sanay malaˈosi konini, oha ‘pasayra’ matenesay kita a macakat, tatodong noni papadotoc a misaˈicel ngaˈ ngaˈay. Pasayra i matenesay macakat mahaopay ko pitongal to sifanaˈ no Fangcalay Cudad, ato mitongal to micalepay miharateng a ˈicel, mihaenay oha mamiˈosi kita to Fangcalay Cudad to romiˈamiˈad. (ˈOlic 1:1-3) Patirengayto kiso toniya patosokan han? Miˈosi kiso to Fangcalay Cudad to romiˈamiˈad, mamatongal ko kacipinang iso to sarikec ato safalod ni Yihofa, wa matongalho ko kacipinang iso to Fangcalay Cudad. Pakaynien i Krisciyang ko sowal, sakakaay kalimelaan a sarikec ono olah a sarikec. Pasowalan ni Yis ko nisawawan: “Ano masasiolaholah kamo i, pakayni tonini ko sakafanaˈ no tamdamdaw to nika o nisawawaan ako kamo,” sanay. (Yohani 13:35) Oya pasadakan a safa ni Yis ci Yakop sanay ko sowal, ‘o olah saˈakawangay a sarikec.’ (Yakop 2:8) O roma, masowalay ni Pawlo: ‘O olah o palaˈosiay to sarikec.’ (Loma 13:10) Ano ‘o olah ko Kawas’, mansa misaˈicel ko Fangcalay Cudad to kalimelaan ko olah.​—1 Yohani 4:8. w18.06 19 fiedac 14-15 fatac

Soˈlin paketeren no Israil tamdaw ci Yihofa, kawra mapakangolaway ci Mosi. Cowa pakaˈimer cingra, telocto somowalay to mafolaay a sowal. Mafiyoray no waywayan no tao ci Mosi, telocto cowa ka padotoc mihalamham ci Yihofaan. Sakinacecay no Israil tamdaw a ngaliwngiw i, tano matatodongay a pakayraan ko pisaysay ni Mosi to pasangaray. (Kasadakan 7:6) Kawra, pinaayto poloˈ miheca ci Mosi mikerid to misafelitay a Israil tamdaw, palidlid sanay malahdaw ko mihadidiay a falocoˈ cangranan, maketerayto a matoled. Hato misamacayay ci Mosi to harateng no niyah, mapawanto a paˈdil ci Yihofaan hokira? O mahaenay ci Mosian madimadiay a pairasolay makalisangaayho ko falocoˈ a mapolin, ano kitato wa mahecad a mararaw alatek. Mangataayto micomod ci Mosi i Mikiˈokan a Pala, kita anini mangataayto micomod i mikiˈokan no Kawas a faelohay hekal. (2 Pitiro 3:13) Cowa sakalahdawaw kita toniya sapalemed. Sapilifokaw to sapalifon no Kawas, wa padotoc kita halamham ci Yihofaan, padotoc a midofdof to araaw Ningra.​—1 Yohani 2:17 w18.07 15 fiedac 14-16 fatac

Awaay ko pakayraan ni Satan pacieci to tamdaw mitoor to harateng ningra a dademak. (Yakop 1:14) Anini, cowa ka fanaˈ ko ˈalomanay tamdaw to pahecaday to harateng ni Satan ko demak no niyah. Kawraan, ikor no minanam cangra to soˈlinay kimad, wa misaˈosi to mamihodop to Kawas, anca midama ci Satanan. (Dmak 3:17; 17:30) Ano saˈosien ita ko falocoˈ midofdof to araaw no Kawas, awa ko pakayraan ni Satan papisawad to madimadi no mita. (Yopu 2:3; 27:5) Iraayho ko maanan cowa ko mamadangar ni Satan ato tatiihay coyoh a demak hani? Cowa ka somowal ko Fangcalay Cudad to mafanaˈay ci Satan ato tatiihay coyoh to nafalocoˈan a harateng no tamdaw, edeng ci Yihofa aci Yis ko ngaˈayay mihaen to demak. (1 Samuil 16:7; Marko 2:8) Ano misaˈicel kita itini sasowalan ato waywayan pahecad to araaw no Kawas, wa ngaˈay pakasoˈlin to cowa ko hahayen ni Yihofa ci Akoma paira to tahadaˈocay a dokaˈ no mita. (ˈOlic 34:7) Pafeselen ita ko pinengneng to nisahalakaan ni Satan, kawra cowa ko mamatalaw cingranan. Iraay ko sadama ni Yihofa, soˈlin o cowa ka lefot a tamdaw wa ngaˈay pakalowid ci Satanan. Ano coˈayen ita ci Akoma, wa miliyas cingra kitaanan a milaliw.​—Yakop 4:7; 1 Pitiro 5:9. w18.05 26 fiedac 15-17 fatac

Haratengen hena, wa tayra kiso i maraayay a niyaroˈ, mirienang to kalimlaan a demak, oha halafin kiso a mikalic to faso ngaˈ tahira. Tayra sa kiso i ciyataw sapikalicaw to paliding, ˈarawhan adihayay ko tamdaw ato faso, awaayto ko pinang iso. Kawra, mafanaˈayho kiso to tatalacowa ko lingad, o maanan ko kakalicen a faso, samanen, ano patelas sa kiso a mikalic to faso i, wa cowa ko tatahira i kahiceraan. Anini, o kapah tamdaw mahecaday o mamikalic to faso a tamdaw. Malingad cangra a miliwko o rarakaten i hakelong nokaˈorip. Tolatekay taˈangayay ko macadaay nangra a saroero, cowa ka fanaˈ to hahacowa mimamet to toki a dademak ato sasamaan ko sasaˈosien. Kapah tamdaw, kilimen ko patosokan no niyah, mihaen ngaˈ mafanaˈ kiso a misaˈosi. Salicay i, wa pasicowa kiso a romakat hani? Kapah tamdaw, samacayen ko falocoˈ micangacang to noˈadingoan a patosokan, papikayaten ci Yihofa itini kihcod nokaˈorip iso, mahawpay ko picudadan, katayalan ato paro no lomaˈ iso. Misarocod ko falocoˈ iso mihodop ci Yihofaan i, ngaˈay pasoˈlinen iso papalemeden ni Yihofa kiso, palaˈosi to kaˈorip iso. w18.04 25 fiedac 1-3 fatac

Kamayan ci Yifta midofdof to miketonan a sowal, patayra to wawa i fangcalay sefi i Silo, hakelong no ˈorip itira a dademak ci Yihofaan. (Kakitaan 1:30-35) Itini toniya demak, tada masomaday ci Yifta, kawrira mikikakaay ko pasangar no fafahiyan wawa ningra a micada. Ikorto, kamayan makahi cingra a mitoor to saˈosi no wama a midemak. (Kakitaan 11:36, 37) Sawad hananay no wawa ni Yifta ko saka ciraramodaw ato saka ciwawaaw, awaayto ko pakayraan miterek to ngangan ato hafay no lalomaˈan. Mahapinangay, tada misaaliay to sapakalalok ato sahinom ko wawa ni Yifta. Sowal no Fangcalay Cudad: “Nanitiya a ira ko matiniay a pinangan no Israil: To mihecahecaan i, miliyas ko fafahiyan no Israil to lomaˈ to sepat a romiˈad, tayra cangra” a pakahemek to fafahiyan wawa no Kiliyat tamdaw ci Yifta. (Kakitaan 11:39, 40) Anini, ˈalomanay ko cowa ka ciraramod a Krisciyang misaka dademakan ko toki no niyah “matayal to saki Tapang,” citatodongay cangra micada to sapakahemek ato sapakalalok.​—⁠1 Korinto 7:32-35. w18.04 17 fiedac 10-11 fatac

Adihayay ko coyoh kalacafayay ci Satanan a mitowakang to Kawas. ˈAyaw no Taˈangayay Lenlen, mikayhidan ni Satan ko roma coyoh madadiˈi to fafahiyan no tamdaw. Tano tahapinangan a pakayraan ko pilengo no Fangcalay Cudad to pikapot noniya coyoh ci Satanan. Somowalay ko sinael to miasikan no wikol no kangic ko cecay no kalitolo a fuˈis, mifahekol i cikiw. (Satapangan 6:1-4; Paˈarawan 12:3, 4) Tiya miliyas koniya coyoh to taˈangayay paro no lomaˈ no Kawas i, paihkalay cangra to mikapotay ci Satanan. Kawra, oniya mitowakangay a coyoh iraay ko lekakawa. Ano ci Satan iraay ko mahecaday o Hongti Kitakit no Kawas a lekakawa, o hongti noniya lekakawa cingra. Ci Satan itini kitiraan noˈadingo milekakawaay to tatiihay a coyoh, pafeli to fadangalan i tatiihay a coyoh, papikowan cangranan toniya hekal. (Ifiso 6:12) Pakaynian ni Satan i noˈadingoan a lekakawa ningra mionting ko mirikecay no tamdaw. w18.05 23 fiedac 5-6 fatac

Latekay mahecaday o wama ko Kawas a misalof kitaanan, pakayni ko paihkal to olah kitaanan. Makahiay ci Tafiti micada to limoˈot no Kawas. Tangongolay ko pisimsim ni Tafiti to harateng no Kawas, micada to sakayat no Kawas, tano harateng Ningra ko pinengneng to demak. Minanam kiso to pidemak ni Tafiti, mamatongal ko kaolah ci Yihofaan, a makalim midofdof to Kawas, matongalho ko katenes i noˈadingoan. Sanay ko sowal ni Keliseting: “Ano micekiw ato midotim to maˈosiay a lalakaw, o pakayniay takowanan ko pitilid ni Yihofa, sanay ko harateng ako!” Ano pairaan iso ko noˈadingoan a harateng, wa madolo tano harateng no Kawas ko pinengneng toniya hekal ato hanoikor no hekal. Patongalen ni Yihofa kiso to sifanaˈ a micalep cipinang to demak, ciharatengay Cingra tisowanan cipinang to, o maanan ko masakalimlaan a demak i nokaˈorip iso, misaˈosi to matatodongay a saˈosi, ato paira to pakasoˈlinay a harateng a mitala toha noikor.​—Isaya 26:3 w18.12 26 fiedac 9-10 fatac