Saka 11 Folad

Ano mihodop kita ci Yihofaan i, mamilifok to adihayay a sakaraheker, o cecay i, o mamilifok toya malahdaway ni Atam aci Ifa a kihcod, mahawpay ko tahadaˈocay a ˈorip. Ci Atam aci Ifa caka kahi mihodop ci Yihofaan, awaay ko tangongolay a olah nangra to Kawas. Soˈlin mihaen ko saˈosi nangra, kamayan paˈoripen ni Yihofa cangra, mihofoc to wawa, hanaca o niyah ko misaˈosi sasamaan pasifanaˈ to wawa. ˈArawhan, misaˈosi ci Atam aci Ifa eca ka picada to pikowan ni Yihofa tada mafolaay, samanen o sakakaay wawa nangra ci Kain mipatayay to safa, matomesay ko mariˈangay ato misatekeday a waywayan no lekakawa no tamdaw. (Satapangan 4:8; 6:11-13) Kawra, maharekayto ci Yihofa milimasmas to mamilidong to makahiay mihodop Cingranan a teloteloc ni Atam aci Ifa. (Yohani 6:38-40, 57) Ano minanam kiso to adihayay a sifanaˈ ni Yihofa, mafanaˈ iraay ko mihadidiay ato olah Ningra, wa matongal ko olah iso Cingranan. Cowa ko mamitodong kiso to waywayan ni Atam aci Ifa, wa misaˈosi a patafang to tireng ci Yihofaan. w19.03 2 fiedac 3 fatac; 4 fiedac 9 fatac

Ano sapisiniˈadaˈaw to tao i, Saˈicelen ita a cipinang to o manan ko malifaay no paro no lomaˈ ato salikaka a pasangaray, ciharatengho to kaemangay tamdaw, matoˈasay, adadaay ato malahdaway ko salawina a tamdaw i kasakopang. Ngaˈayay licayen ita samanay ko pakayraan nangra, ano mihadak cangra to nafalocoˈan a sowal i, songilaˈen a mitengil ko sowal nangra. Fanaˈen cangra, soˈlinay kita a patado miharateng to pasangar nangra, misaˈicel a padama cangranan. Mihaen ko demak ita, o tano waywayan a paihkal to maolahay to salikaka. (1 Yohani 3:18) Ano padama kita to tao i, tooren ko pakayraan no tao a misalof, samanen cowa ka hecahecad ko harateng no tamdaw ano tahalifa to pasangaray, o roma tamdaw makahiay pasowal to pasangaray no niyah, o roma tamdaw cowa ka kahi a pasowal. Soˈlin sapadamaaw kita cangranan, kawra cowa ka ngaˈay kita miniknik a milicay to notekedan a demak nangra. (1 Tisalonika 4:11) Latekay pasowalay cangra to nafalocoˈan a harateng, cowa ko mamihai kita to harateng ningra, kawra cacadaen ita o ningra a harateng konini. Salakaten ita mitengil ko sowal ningra, hamaan macaloh pasowal to harateng no niyah.—Matay 7:1; Yakop 1:19. w19.03 19 fiedac 18-19 fatac.

Makokiˈay kiso itini kaˈayaw no ˈalomanay somowal to kimad no Kawas han? Tinakoen ci Nihimiya. Itiniay i lomaˈ no hongti a matayal cingra. Tiya mafanaˈ cingra to kamayan maperar ko ˈadipel no Yirusalim i, cowaho ka salofen ko fawahan no lowil, tada masomaday. (Nihimiya 1:1-4) Licayen no hongti ci Nihimiya hano caka hemek kiso, maedeng marawraway ci Nihimiya itiya. Tangsolay cingra mitolon halo pacaˈof to hongti, telocto taˈangayay ko sapadama no hongti to finawlan no Kawas. (Nihimiya 2:1-8) Saka tosa tinakoan ci Yona. Tiya ocoren ni Yihofa cingra mirikec to Ninifi a tamdaw i, tada matalaway ci Yona, palaliyocay a milaliw. (Yona 1:1-3) Kawra pakayni sapadama ni Yihofa, salikor malaheciay ni Yona koniya demak. O milasilan ningra a lihaf ngaˈayay ko pifiyor to Ninifi tamdaw. (Yona 3:5-10) Mikitini ci Nihimiyaan mananamay ita, ˈayaw no pacaˈof i, mitolonho masakalimlaan. Roma i, o tinakoan ni Yona mahapinangay ita, ano samaanto ko talaw ita, wa ngaˈay padama ci Yihofa kitaanan padotoc a mihodop Cingraanan. w19.01 11 fiedac 12 fatac

Ano mitoor kita to soˈlinay kimad a maˈorip, wa milingat to kalalaˈed no niyah to salawina ato widang alatek. Patadoan ni Yis ko nisawawaan a mitolon: ‘Nanay, pakaynien Iso i sowal Iso ko pisafangcal i cangraan. O soˈlinay kimad ko sowal Iso.’ (Yohani 17:17) “Pisafangcal i cangraan” ngaˈay tano “pacinowasen cangra” sanay. Micadaay kita to soˈlinay kimad i, wa malacinowas to kalo a tamdaw, cowa to ka malacafay toniya hekal. Samanen, mafalicay ko harateng no mita, mitooray to palinian no Fangcalay Cudad a maˈorip, alatek iraay ko masasiromaay a pinengneng no tao kitaanan. Cowa ko misaˈadaay kita to tao, kawra, iraay ko roma salawina ato widang palidlid sanay a miliyas kitaanan, mangalef misafelitay to pihakelongan no mita. Cowa ko kafahkaˈan koni, samanen, o sowal ni Yis: “O mamalaˈada no tamdaw ko paro no lomaˈ ningra.” (Matay 10:36) Kawra, mikiˈokay ci Yis kitaanan, soˈlin kinafalahay kita to dafong pakayni sapiˈacaaw to soˈlinay kimad, kawraan mikikakaay ko mamalifok ita a dafong to malahdaway. w18.11 6 fiedac 11 fatac

Misaaretengay ko tarokos ci Pawlo to salikaka, miceriday cingra i satolon pakayni i salikaka a miakoˈid to Kawas, halo patikami cingra to salikaka paihkal to pisaareteng cangraanan. Itini Loma 16:1-15, somowalay ci Pawlo to 27 ngangan no salikaka. Somowal cingra to pisiˈayaw ni Priskila aci Akuila to katalawan, ‘caay ka limla cangra to ˈorip’ a midipot ci Pawloan. Masowalayho ni Pawlo ci Fipi, na midamaay cingranan, midamaayho to ˈalomanay tamdaw. Pakahemekan ningra ko kaolahan ningra, marorayay matayal saki Kawas a Krisciyang. (Loma 16:1-15) Soˈlin mafanaˈay ci Pawlo to iraay ko dangoc no salikaka, kawra, ikakaay ko pinengneng ningra to makapahay capeling no salikaka. Haratengen, ano matengil no Lomaay salikaka ko sapakahemak ni Pawlo i tikami, maedeng taˈangayay ko sapakalalok cangranan. Telocto, matongalay ko kalawidang nangra ci Pawloan. Ano ngaˈayay ko sasowalen ato waywayan no salikaka, wa pakahemeken iso cangra han? w19.02 16 fiedac 8-9 fatac

Alatek adihayay ko dangoc no niyah, marariday a mararaw. Mihaenay edengan o malefotay tamdaw ko ngangaˈay mitafo to madimadiay, ato cowa pisafelit to palinian ni Yihofa han? Cowa ko dangoc aca ko minengnengan ni Yihofa. ˈOlic 130:3 sanay: “Ano nitilidan Iso ko raraw niyam i, cima ko mamaedeng a miliyas to pitefoc Iso saw?” Mafanaˈay ci Yihofa to cowa ko malefotay kita, mararaway ko demak, kawra makahiay Cingra misodod kitaanan. (ˈOlic 86:5) O roma i, citolasay ko ˈicel ita, cowa pisaali ci Yihofa midemak to mataˈlifay ko ˈicel ita a demak. (ˈOlic 103:12-14) Ano sapitafoaw to madimadiay ato cowa pisafelit to palinian ni Yihofa i, o olah ko sakakaay. Pakayni i olah ato madimadi to kakarayan Wama, cowa ko cidangocay, o masongilaˈay. Ano misiˈayaw kita to sapalifet i, kamayanay misarocod maolah ci Yihofaan, mahaen wa ngaˈay kita [mitafo to madimadi ato caka pisafelit to palinian Ningra. (1 Rayray 28:9; Matay 22:37) Samanen, mafanaˈay kita to moecelay palinian ni Yihofa, hanaca o harateng ita, o sapaka hemekaw to kakarayan a Wama. Maolahay kita ci Yihofaan, ˈayaw no misaˈosi isalakatay miharateng Cingraanan. Patahkal to nika o madimadiay tamdaw kita. w19.02 3 fiedac 4-5 fatac

Ano mitoor kita to palinian no Kawas a midemak, wa milifok to epoc, wa matongal ko tanektek no pakasoˈlin no mita. (Yakop 1:2, 3) Ano maharateng ko cisiniˈadaay a Wama pakayni kitaanan a maliko, wa masalo ko falocoˈ ita, micerid a pakahemek to falocoˈ Ningra. (Taneng 27:11) Ano tahalifa kita to sapalifet, o sangaˈayay a toki paihkal to madimadi to Kawas i pidokoan. (ˈOlic 119:113) Nikawrira, wa misarocod kita a maolah ci Yihofaan, misetek to falocoˈ midoedo to limoˈot Ningra, halo midofdof to araaw Ningra. (1 Hongti 8:61) Soˈlin, cowa ko malefotay kita, mararaway ko demak. Kawra ano mararaw kita, haratengen ko tinakoan no Hongti ci Hicikiya. Na mararaway cingra, ikorto pasasiyoray, padadotoc ira ko ‘makoracay falocoˈ’ midoko ci Yihofaan. (Isaya 38:3-6; 2 Rayray 29:1, 2; 32:25, 26) Cacongeden ita ko sakayhid ni Satan, aka papiwaraken cingra to harateng no mita. Wa mitolonho kita, micangacang ci Yihofaan pafeli kitaanan to ‘midofdofay a falocoˈ’.​—1 Hongti 3:9; ˈOlic 139:23, 24. w19.01 18-19 fiedac 17-18 fatac

Pacaˈof to salicay, saka ciepoc no niyah. (Isaya 48:17) Misamaanay hani? Saka cecay, ano sapacaˈofaw kiso, oha mamisongilaˈ misaday to lalakaw no saˈopo. Malalok kita a misaday, wa matongal ko kacipinang to Kimad no Kawas, matongal ko kafanaˈ sasamaan misaka dademak to minanaman. Saka tosa, misaˈicel kita pacaˈof, wa matongal ko kaolah to saˈopo. Saka tolo, tona misaˈicelay kita misaday to sapacaˈof, soˈlin halafinto ko romiˈad i, maharatengayho koya nano sowal ita. O roma i, paihkal kita to pakasoˈlinan wa pahemek ci Yihofaan. Mafanaˈay kita makahiay ci Yihofa mitengil to sowal ita, misaaretengay to mihadakan ita a ˈicel mipacaˈof. (Malaki 3:16) Misaˈicel kita pakahemek Cingraanan, paparahekeren Ningra kita, paihkal to kasemer kitaanan. (Malaki 3:10) Mahapinangay ita adihayay ko lalangian ita pacaˈof i kasaˈopoan. w19.01 8 fiedac 3 fatac; 9-10 fiedac 7-9 fatac

Citanengay ko pakayraan ni Yihofa a pasifanaˈ to sikawdan Ningra, cowa ka pafeli Cingra to adihayay sarikec kitaanan, mihadidiay a pasifanaˈ kitaanan midofdof tono olah a sarikec. Tokel Ningra kitaanan mitoor to safalod Ningra a maˈorip, ˈinteh to tatiihay a demak. Itini toniya demak, o Pasifanaˈ i Lotok ni Yis o mikiriwiˈay a tinakoan, oniya kimad mitadtaday to soˈlinay lalangian no tamdaw a midemak to tatiihay demak. (Matay 5:27, 28) Ano irato ko faelohay hekal, no Hongti Kitakit no Kawas a hongti ci Kristo, wa padotoc a pasifanaˈ kitaanan, padama kitaanan mahecad cingraanan ko pinengneng to moecelay ato mararaway a demak. (Hipray 1:9) Wa palefoten ni Kristo ko tireng ato falocoˈ no mita. Haratengen hena, cowato ko aira ko mararaway a harateng ita itiya, cowa ko mamafiyor no raraw a malotay. Saikor, wa milifok kita to mikiˈokan ni Yihofa kitaanan a ‘ˈodingaray a pasalat’. (Loma 8:21) Iraay ko tolas no pasalat ita, o mamicada to sakayat no maolahay to Kawas ato maolahay to tao a falocoˈ. Misaaliay ci Yihofa kitaanan mitodong to ciolahay falocoˈ Ningra, ngaˈ ira ko soˈlinay a pasalat.​—1 Yohani 4:7, 8. w18.12 23 fiedac 19-20 fatac

Maˈaraway no faˈinay ko fafahi, “ira ko caay ka tatodong a demak”, wa ngaˈayto malalikong. Soˈlin cowa pitadtad ko sarikec to, o maanan kora “caay ka tatodong a demak”, maedeng o pakidemay anca o kaacekan a demak, cowa ko mimingay a raraw. (Limoˈot 23:14) Ka adayayan i, itini i lintad ni Yis, ˈalomanay Yutaya tamdaw tano ‘masakenaay a lalangian’ a malalikong. (Matay 19:3) Cowa ko sapahecadaw kita tora Yutaya a tamdaw. O pairasolay ci Malaki, somowalay cingra to pinengneng no Kawas to malalikongay. Itini i lintad ningra, misafakofakoay ko falocoˈ no ˈalomanay faˈinayan, malalikongay to “kalakapahanho a fafahi” no niyah, alatek saka cifafahiyaw to midokoay to makaniway kawas a kaying. Sowal ni Malaki: ‘ˈIntehay ko Kawas to malalikongay.’ (Malaki 2:14-16) Cowa ka falic ko pinengneng no Kawas to raramod, tiya mararamod ci Atam aci Ifa i, sanay ci Yihofa: “Malacecay ato fafahi ningra, o malacecayayto ko tireng nonini a tatosaay.” (Satapangan 2:24) Mahecaday ko pinengneng ni Yis to Wama ningra, sanay: “O nipalacecayan no Kawas i, aka palicinowasen no tamdaw.”​—Matay 19:6. w18.12 11 fiedac 7-8 fatac

O roma salikaka soˈlinay malinah tayra i maraayay a pala, o waywayan nangra mahecaday o pairasolay ci Isayaan, tiya milicay ci Yihofa: “Cima ko malo aocoren Ako saw? Cima ko mangalayay a patado tamiyanan saw?” Pacaˈof han ni Isaya: “Kakoto! Ocoren kako!” (Isaya 6:8) Iraay ko makahiay a falocoˈ iso a matayal, ngaˈay padiˈo to tahidang a matayal i likakawa no kawas han? Masowal ni Yis ko mitosilay ato palo nisawawaan to tamdaw a tayal i, sanay ko sowal: “Orasaka, ngitangiten ko tapang no cipanayay a papiocor to mamatayal a mipanay,” sanay. (Matay 9:38) Wa ngaˈay kiso malinah tayra i misaaliay to mitosilay a pala, tano misakafahay a saaroˈan a matayal han? Anca wa ngaˈay kiso padama to tao malaˈosi koniya patosokan han? Miharateng ko ˈalomanay salikaka, tayra i misaaliay to “matayalay” a pala misakafah o sangaˈayay a pakayraan paihkal to kaolah no niyah to Kawas ato tao. Haratengen wa ngaˈayho kiso midemak to maanan, ano o maanto ko demak iso, ano pakayniay ci Yihofaan ko pisaˈicel wa taˈangay ko hemek. w18.08 27 fiedac 14-15 fatac

Itini i Ratoh no Fangcalay Cudad, ngaˈay mahela ita ko pinengneng ni Yihofa to dafong ato hafay. Mipiliˈ ci Yihofa ci Yosif aci Mariyaan a midimokos to wawa Ningra, cowa ka cihafay ko lomaˈ noniya mararamoday. (Lifi 12:8; Luka 2:24) Ya hofocen ci Yis i, “[telian] i toptop no paefaan, nawhani awaayto ko malokafotiˈan nangra i pilafinan a lomaˈ.” (Luka 2:7) Ano makahi ci Yihofa i, wa ngaˈay Cingra milimasmas to wawa Ningra itini ngaˈayay a kitiraan. Kawra, pakayni ci Yihofaan, o sakakaay paitinien i midokoay to Kawas a paro no lomaˈ a palahad ci Yisan. Mikitini pihofoc ci Yisan a maˈoningay, wa ngaˈay mananam ita ko harateng ni Yihofa to dafong ato hafay. Anini, misaˈicelay ko roma wama wina, ira ko adihayay a dafong no wawa, soˈlin o pihaen to demak wa malingat ko kalalaˈed no wawa aci Yihofa. Kawra, o harateng ni Yihofa, paitinien i sakakaay miteli ko noˈadingoan a demak. Mihaenay, misaka dademakan iso ko harateng ni Yihofa a minengneng to demak han? O waywayan iso paihkalay to maanan hani? w18.11 24 fiedac 7-8 fatac

O pipowaran no lipahak ci Yihofa, makalimay Cingra lipahak kita. Adihayay ko sapafeli Ningra to sakalipahak ita a lalangian. (Limoˈot 12:7; Patnakay 3:12, 13) Anini, sapadotocaw a lipahak cowa ko madoloay. Misamaanay hani? Adihayay ko mamiˈafas to lipahak ita a pakayraan, tinakoen, mapatay ko salawina anca mafalah no kasakopang, ira ko pasangaray no raramod anca awa ko katayalan. Ano mararid macacoli to paro no lomaˈ, malikaf no cafay matayal anca cafay micudad, pakayni pihakelongan micada to sapalak anca mapalit, tahalifa to hatiniay demak sapadotocaw lipahak pasangarayto. O roma i, cato ka tanoktok ko tireng, halafin ko adada anca matoled ko falocoˈ, o papalahdaw to lipahak ita konini. Soˈlin hatira, ‘oya lipahakay, o dengan a mikowanay,’ ci Yis Kristo, makalimay paira to sahinom ato lipahak no tamdaw. (1 Timoti 6:15; Matay 11:28-30) O pasifanaˈan i lotok, masowalay ni Yis ko pina capeling, wa ngaˈay padama kitaanan, itini pisiˈayaw to sapalifet i hekal ni Satan kamayan padotoc a lipahak. w18.09 17-18 fiedac 1-3 fatac

O roma tamdaw ikor no mafanaˈ to cowa ka tatodong to safalod no Fangcalay Cudad ko nanaman no niyah, cowato pitoor to nanaman a midemak. (Taneng 23:23) Kawra o roma tamdaw pasangaray misawad toniya nanaman, samanen mafanaˈay cangra o kalo a tamdaw naifalocoˈay a maolah to nanaman, mangalef ko milingatay to mitaˈongay to mapatayay a nanaman, hato calemcemay cangra to cowa ko mamakahi ko salawina ato widang micada to kafalic nangra. Wa samaan ko hademak ita hani? Ngaˈay kita mikitini taˈarawan no tao minanam to sasamaan timolo misalof to demak no niyah. O Ifiso o hinakawasay a niyaroˈ, mihaenay oya misasakawasay a tamdaw i, sasamaan ko demak a miˈaca to soˈlinay kimad hani? Sowal no Fangcalay Cudad: “Patayraen no ˈalomanay a cikawasay ko cudad nangra a misaˈopo. Todohen nangra a mifalah konini i kaˈayaw no ˈalomanay. Saˈosi han nangra ko ˈaca nonini a cudad i, lima a ˈofad (50,000) a rimood no ekim. (Dmak 19:19, 20) Oniya madimadiay a Krisciyang, soˈlin mihadakay to ˈakawangay sapiˈaca, kawra milifokay to kadofahay a sapalemed no Kawas. w18.11 7 fiedac 15-16 fatac

Mitaˈlif ko Israil tamdaw to Yortan ˈAlo, caka halafin, malitemohay ni Yosuwa ko mitatoyay to fonus a faˈinayan, o pipasowal noya faˈinayan to saaroˈan, “o mikomoday a sofitay no Tapang a Kawas kako,” sanay, maharekayto misaday, mamidipot to finawlan no Kawas. (Yosuwa 5:13-15) Ihkalay ko safanaˈ no coyoh ci Yosuwaan, padama cingranan sasamaan a milood to Yiriko a niyaroˈ. Nikawrira, tengilen koniya safanaˈ, hato cowa ko ngaˈayay a halaka, tinakoen, pakaynian ni Yihofa i coyoh palimoˈot ko polong a faˈinayan micada to kerit, oniya demak o saka pahanhan nangra to pina romiˈad, ho caka ngaˈay a milood. (Satapangan 34:24, 25; Yosuwa 5:2) Oya awaay ko ˈicel a sofitay no Israil wa saan a miharateng, “Ano fahal sa ko ˈada miˈodis i, wa samaan kami midipot to paro no lomaˈ hani?” Dotoc i, mifekaday ko kafahkaˈan a demak! Matalaway ko Yiriko a tamdaw to Israil tamdaw, mihaenay, “o sakacaaw picomod no Israil saka, masongilaˈ a maˈdef ko ˈadawang no Yiriko.” (Yosuwa 6:1) Ira ko hatiniay a kafalic no demak, maedeng matongalay ko pitiˈer no Israil tamdaw to sakayat no Kawas. w18.10 23 fiedac 5-7 fatac

Wa samaan kita a mitodong to misapoeneray a taˈarawan ni Pawlo hani? Isalakat, laliyasen ita ko sapipatakaraw no tamdaw a harateng, samanen mitadiˈecay kita to sadama ni Yihofa ngaˈ malaˈosiay ko tayal Ningra. Haharatengen ita samaanay ko pinengneng no niyah to mitosilan a tamdaw. Wa mahecad kita to i kilacay a tamdaw, misakakinih ko pinengneng to romaroma finacadan han? Masaka hemekan i, ano milimasmas ko icowacowaay pala a Misawacayay Tamdaw ni Yihofa to mitosilay i, miharatengay to icowaay a tamdaw, cowaho ka tahatengil to ngaˈayay lihaf. Sapadamaaw to tamdaw mafanaˈ to ngaˈayay lihaf, o roma salikaka minanamay to sowal ato nanaman no cecay finacadan, soˈlin oniya finacadan cowa ka saaretengen no tamdaw, kamayan mihaen ko demak nangra. Ano mitosil ko Misawacayay Tamdaw ni Yihofa to hatiniay a tamdaw i, cowa pisatakaraw to niyah, misaˈicelay a cipinang cangranan, padama cangranan minanam to soˈlinay kimad. w18.09 4 fiedac 9, 11 fatac

Mipatayan no Loma tamdaw ci Yuta. O roma Yutaya tamdaw, soˈlin cowa pakinaliay ˈifowa ko falocoˈ, kawraan hinatalaay cangra malo mikowanay a ˈaˈideman ci Misiya. O longoc no Yutaya tamdaw, ano ira ci Misiya i, ngaˈay milidong cangranan paliyas to pikowan no Loma. (Luka 2:38; 3:15) O tamdaw itiya, pasoˈlinay to papatireng ci Misiya i hekal to Hongti Kitakit, ano mihaen o maliyasay i cowacowa pinaay soˈot ˈofad a Yutaya tamdaw, wa patikol i niyaroˈ. Paputisemay a Yohani na miocoray to nisawawaan milicay ci Yisan: “Kiso koya nisowalan ni Yohani to tatayni a tamdaw haw? Ano eca i, o mamitalaho kami to roma a tamdaw haw?” Sanay. (Matay 11:2, 3) Sakafanaˈaw ci Yohani, ira ko roma ˈaˈideman palaˈosi to hatokel no Yutaya tamdaw hokira. O roma, o tatosaay a nisawawaan tayra i Imaus malitemoh ko patikolay maˈorip a Yisan, harateng nangra mamilidong ci Misiya to Israil sanay. (Luka 24:21) Ikorto, masaˈopo ko tarokos, milicay cangra to patikolay maˈorip a Yisan: “Tapangaw, anini kiso a palowad to kitakit no Israil han?” Sanay.​—Dmak 1:6. w18.06 4 fiedac 3-4 fatac

Ano matengil ita ko pakayniay i finawlan ni Yihofa a safanaˈ i, kakiriwiˈen a misinanot, samanen padotocay ci Satan a mikokot to madimadiay a sikawdan no Kawas. (Paˈarawan 12:10) Na pasowalay ci Yis o misafelitay tano “masamaamaanay a tatiihay a sowal” mipalafo to nisawawaan ningra. (Matay 5:11) Paifalocoˈen ita ko sapatalipaˈelal ni Yis, ano mihaen matengil ita ko pakayniay i finawlan ni Yihofa a mararaway a safanaˈ i, cowato ko mamacekid. Maolahay kiso tano tingnaw anca tano soci a patikami to kafanaˈan a tamdaw ato widang han? Ano maolahay kiso a mihaen to demak, ano maˈaraw iso ko safaelohay a sinpong ato safanaˈ anca matengil ko cecay milifetan, makalimay mahecad to paratohay to sinpong a tamdaw, malo sakacecay a milasilay tamdaw hokira? Kawrira, ˈayaw no papasadak kiso tono tingnaw ato soci a lihaf i, licayenho ko niyah: “Soˈlinay mafanaˈ kako to matatodongay a lihaf konini han? Mafanaˈay kako to samaanay ko soˈlinay demak han?” Ano cowa ka fanaˈ kiso to soˈlinay anca makaniway koniya lihaf, ano fanaˈ han ko tao, itini kalalaˈed no Krisciyang wa patenak kiso to mararaway a lihaf alatek. Mihaenay, ano cisasaay kiso toniya lihaf, aka pasadaken ko mararaway a lihaf. w18.08 3-4 fiedac 3, 6-7 fatac

Harateng ni Yis pakayni i hinapaladaˈ a lipahak kita. Tocerid, maolahay ko tamdaw to hinapaladaˈay a waywayan. Soˈlin cowa ka sahto sa miakoˈid ko tamdaw to hinapaladaˈ no mita, kawra o roma tamdaw wa pakayni hinapaladaˈ ita mapakalalok, misaˈosi a paladaˈ to tamdaw. O cecay hinapaladaˈay a demak wa paira to makapahay minaroˈan halatek. Mihaenay, ano ecato ka semer ko tamdaw to mihadakan ita, wa padotoc kita makahi a paladaˈ. O hinapaladaˈay a tamdaw cowa pilongoc to papatikolen. O sowal ni Yis: “Ano patala kiso to tadamaanay a tahka i, kao pakoyoc a tamdaw, tatiihay ko tireng, o mapiˈiway, o mapohaway a tamdaw ko tatahidangen. Ta mapalemed kiso.” (Luka 14:13, 14) O cecay patemeran no Kawas a tamdaw pasowalay cingra: “O siniˈadaay a pafeli i pakosiya a tamdaw to kakaenen i, o mamalemed cingra.” Roma tamdaw pasowalayho: “O mafanaˈay a miharateng to pakosiya a tamdaw i, tada o malemeday.” (Taneng 22:9; ˈOlic 41:1) Mihaenay, hanipaladaˈ kita to tamdaw, samanen padamaen ko tao wa lipahak kita. w18.08 21-22 fiedac 15-16 fatac

Anini, sapilifokaw to soˈlinay lihaf ato matatodong ko pitadtad to macadaay a lihaf cowa ko madoloay, samanen ngaˈayay pasoˈlinen a lihaf cowa ka hakowa, anca cowa ka songilaˈ ko lalakaw. Tona cowa ka lefot kita mifiyoray to saka tatodong no pisaˈosi no mita. Sasamaan kita miremo to hatiniay a sapalifet hani? Kalimlaan ko kafanaˈ ita to safalod no Fangcalay Cudad ato saka dademaken, o cecay safalod i, ano caho ka tengil ko samaanay ko soˈlinay demak tangsol sa a misaˈosi, mihaen to demak cowa ko inanengay oha papakangodo to niyah. (Taneng 18:13) Patalipaˈelalay ko Fangcalay Cudad kitaanan hamaan patelas a pakasoˈlin to maamaan a lihaf. (Taneng 14:15) Saikoray, ano hakowato ko halafin ita malo Krisciyang, wa misinanot eca ka pitadiˈec to taneng no niyah. Tooren ita ko soˈlinay a lihaf a inaneng ko pisaˈosi, mihaen wa madipot no safalod no Fangcalay Cudad kita. w18.08 7 fiedac 19 fatac

Pakayni i nanom micada to paputisem, pakapapotalay kita a paihkal to oni Yihofa ko niyah, makahi a midofdof Cingranan. Paihkalay ci Yis to mahecaday a harateng, o picada ningra to paputisem mahecaday o pasowalay ci Yihofaan: “Kawasaw ako, tada maolah kako a midoedo to [araaw] Iso.” (ˈOlic 40:7, 8) Samaanay ko pipacaˈof ni Yihofa to picada ni Yis to paputisem hani? Sanay ko sowal no Fangcalay Cudad: “Maherek ci Yis micada to paputisem, tangsol sa ci Yis a macakat nai nanom. Itiya i, mafawah ko kakarayan. Maˈaraw ni Yohani ko nika epod no [fangcalay saocor] a matiya o topi patefo i tireng ni Yis. Itiya i, ira ko ngiha nai kakarayan. Sowal sa, ‘O kakaolahan Ako a wawa konini. O kakahemekan Ako cingra.’ ” (Matay 3:16, 17) Soˈlin ono kakarayan Wama ci Yis, kawra mahemekay ci Yihofa pakaˈaraw to wawa makahi misarocod to falocoˈ ato harateng midofdof to araaw Ningra. Patafangen ita ko niyah ci Yihofaan, wa mahecad a mahemek Cingra, wa palemed kitaanan.​—ˈOlic 149:4. w18.07 23 fiedac 4-5 fatac

Tiya pasowal ci Mosi to “niyam” i, o niyah aci Aron ko mitoroˈan ningra. Ora sowal ningra paihkalay to cowa ka ngodo ko niyah ci Yihofaan, samanen cowa panokayen ningra ci Yihofaan koniya sapidemak to kafahkaˈan a ˈicel. Itini ˈOlic 106:32, 33 sanay: “Pakaketeren haca no finawlan . . . i tatihi no Miripa a nemnem, saka, halo ci Mosi a mapakaroray to nano demak nangra. Tona tada [mapakangolaw] nangra ci Mosi saka, pasowal sato cingra to caay ko sasowalen a sowal.” (Saˈosi 27:14) Cowa panokayen ni Mosi ko ˈdil ci Yihofaan. Ikor, pasowalan ni Yihofa ci Mosi aci Aron: ‘Safelitay kamo to limoˈot Ako.’ (Saˈosi 20:24) Tada o pakidemay a raraw konini! Iˈayaw, na misaˈosiay ci Yihofa to cowa ko papacomoden ko Israil tamdaw i Kanan pala, samanen misafelitay cangra to Kawas. (Saˈosi 14:26-30, 34) Mihaenay, mahecaday ko pisawkit ni Yihofa to pisafelit ni Mosi, o masadafdafay konini. Cowa ka ngaˈay micomod i Mikiˈokan a Pala. w18.07 14-15 fiedac 9, 12-13 fatac

Pakayni saka ecaaw pakapolin to salikaka i noˈadingoan anca tatiih ko makapahay falocoˈ, makahi kita a misawad to kaolahan no niyah. O roma Krisciyang itini ˈayaw no minanam to Fangcalay Cudad, iraay ko haliepahay a nanaman, mansa misaˈosiay cato piˈenip to epah. Cowa ka ciharateng kita mararaw cangra to mahecaday a raraw, samanen o mamidokaˈ konini to noˈadingoan nangra. (1 Korinto 6:9, 10) Mihaenay, ano tahidangen ita ko salikaka tayni i lomaˈ mitaheka, ano caka kahi cingra komaen to epah, cowa ka ngaˈay paciecien ita cingra, mihaen ngaˈ o maolahay to salikaka. Maedeng 20 ko mihecaan ni Timoti, maharateng ko mitosilan no niyah mahaopay ko Yutaya tamdaw, misaˈosiay to micada to kerit, ci Timoti mahecaday ci Pawloan, cowa ka ciharateng cangra pakapolin to tamdaw i noˈadingoan. (Dmak 16:3; 1 Korinto 9:19-23) Wa makahi kiso mitodong to taˈarawan ni Timoti, pakayni haepoc no roma tamdaw a kinafalah to haepoc no niyah han? w18.06 18-19 fiedac 12-13 fatac

Haratengen hena, malitemoh iso ko cowa pidoko to Kawas a kafahalan a tamdaw, hakowaay ko kafanaˈ iso cingraanan? Edengan mafanaˈ kiso to ngangan ato pising ningra. Kawra, isalakat malitemoh iso ko cecay Misawacayay Tamdaw ni Yihofa, mafanaˈto kiso o maolahay ci Yihofaan cingra, roma i, samanen manengnengay no Kawas ko makapahay a pinangan ningra, ho micada cingraanan malo paro no lomaˈ no Kawas. (Yohani 6:44) Mihaen, soˈlin cowa ka hecad ko kalomahadan, finacadan, ato kitakit, hato o mala widangayto kamo. Ano malitemoh iso ko roma midokoay to Kawas a tamdaw i, wa kahnay mahapinangto mahecaday o somowalay kamo to ‘makoracay a sowal’. Mafanaˈay kamo to maka mitiˈeray to Kawas, midofdof to mahecaday palinian no waywayan, mahecaday ko hatokel no ikor. Saka cipinangaw kiso to cecay tamdaw, mafanaˈ toniya demak ngaˈ, mihaen wa ngaˈayto ira ko pakasoˈlin namo, hanaca patireng to halafinay a kalawidang. w18.12 21 fiedac 9-10 fatac

Itini i pikayat ni Kristo, ihkalay a mifanaˈ ko kasacefang no mikayatay to malohemay malitengay, o ˈalafang a Krisciyang cowa ko mamicada to kerit. (Dmak 15:19, 20) Kawra, mataˈlifayto ko pina miheca, ˈalomanay a Yutaya Krisciyang kamayanay mikerit to wawa, wa cisasa kita halatek, “Ano mapalahdawayto ko Sarikec ni Mosi pakayni noka patay ni Yis, misamaanay hano hayenho ni Yis halafin ko lacongis pakayni i mikeritay a demak hani? (Kolosay 2:13, 14) Sapicadaaw to faelohay a pinengneng misaaliay to toki, mihaenay o roma Yutaya a Krisciyang misaaliay to adihayay a toki misalof to noka pinengneng. (Yohani 16:12) O roma nangra pasangaray micada, sakairaaw no ngaˈayay kalalaˈed ato Kawas, cowato ko kalimlaan ko kerit. (Satapangan 17:9-12) O roma tamdaw matalaway ano caka hecad ko demak no niyah to Yutaya tamdaw, wa tahacada to sapalak. (Kalatiya 6:12) Ikor to pakaynian ni Kristo ci Pawloan patilid to tikami, mikayat to itiyaay a Krisciyang.​—Loma 2:28, 29; Kalatiya 3:23-25. w18.10 24-25 fiedac 10-12 fatac

Miocoran ni Kayafas ko sofitay, misalafii milepel ci Yisan. Mafanaˈay ci Yis to mihalakaan nangra, mansa malacafayay to tarokos komaen to saikoray a lafi, papisaday cangranan to funus. Ikorto mikitini toniya tosa funus mananamay no tarokos ko kalimelaan a sapasifanaˈ. (Luka 22:36-38) Toya dadaya, tano funusan ni Pitiro miˈodis koya milepelay ci Yisan a mariˈangay tamdaw. O sakangolaw ni Pitiro, salafii sanay cangra a milepel ci Yisan, tada cowa ka sadafdaf konini. (Yohani 18:10) Hananay ni Yis pasowal ci Pitiro: “Cofelen ko funus iso. O mitatoyay to funus a tamdaw i, o funus ko sakapatay ningra.” (Matay 26:52, 53) Tada kalimelaan ko sapatalipaˈelal ni Yis, oniya sapatalipaˈelal mahecaday o satolon ni Yis isalakat, cowa ka ngaˈay mikapot ko nisawawaan toni hekal. (Yohani 17:16) Dengan ko Kawas ko ngangaˈay misalof to cowa ka sadafdaf a demak. Kawra, wa nga’ay kita milifok to rihadayay ato kakelec. Itini toniya masasifoday a hekal, maedeng mahemekay ci Yihofa kamayan a malacecay makelec ko finawlan Ningra.​— Cifaniya 3:17. w18.06 7 fiedac 13-14, 16 fatac

Saka dademakayho ci Satan to pakidemay sapalak pacieci kitaanan ecato ka madimadi ci Yihofaan. Tinakoen, saka dademaken ningra ko mirikecay mikeceng to mitosilay a demak no mita, anca tano cafay matayal, cafay micudad a milikaf to pihakelongan ita ato pakayraan a maˈorip. (1 Pitiro 4:4) Mifiyoran ni Satan ko salawina ita, misawi kitaanan ecato pirienang to saˈopo. (Matay 10:36) Ano tahalifa kita to hatiniay pasangaray wa samaanto hani? Saka cecay, haratengen mamilood ci Satan kitaanan, miˈodis cingra kitaanan o kafanaˈanto ita a demak. (Paˈarawan 2:10) Saka tosa, cacipinang kita to tatodong noniya pasangaray a demak. Sowal ni Satan, itini aca i kadepocan no tamdaw ngaˈ mihodopay to Kawas, ano tahalifa to sapalifet wa miliyas to Kawas sanay. (Yopu 1:9-11; 2:4, 5) Saka tolo, wa mitiˈer kita to ˈicel ni Yihofa a miremo to sapalifet, aka mapawan, cowa ko mamiliyas ci Yihofa kitaanan.​—Hipray 13:5. w18.05 26 fiedac 14 fatac

Ano cowa ka olah ko cilomaˈay to lihaf no Kitakit no Kawas, cowa ka ngaˈay kita misakahemaw to pilingat no mitosilay a demak. Soliˈlin caka olah ko ˈalomanay tamdaw to patenakan ita a lihaf, kawra, mihapinangay cangra to sasowalan ato waywayan ita. Maˈaraw nangra sanengseng ko caˈedong ita, ira ko mangodongay ato masediay a pising, ikorto, wa mahapinang nangra to mararaway ko pinengneng no niyah to Misawacayay Tamdaw ni Yihofa alatek. Ci Saresiaw aci Alinta iraay ko mahecaday a milifetan. Sanay ko sowal cangra : “Cecay liyad, adadaay kami hato cowa ka tayra kakahaday potal mitosil. Tiya miliyaw kami tayra kakahaday potal i, milicayay ko mitaˈlifay tamiyanan: ‘Ngaˈayayho kamo han? Maˈiwilay kami tamowanan.’” Itini mifolesakay to sapaloma no Kitakit no Kawas a demak, ano eca paselaˈ ko kamay ita, wa ngaˈay mihadak to ˈicel palaˈosi to “o mamapatenakho ko ngaˈayay a ratoh i polong no hekal” a demak. (Matay 24:14) Tada kalimelaan i, mahemekay kita milifok ko niyah to hemek no Kawas, samaanen maolahay Cingra to polong ‘mihadidiay a ciheci’ a tamdaw!​—Luka 8:15. w18.05 16 fiedac 16-18 fatac

Mararawto ko tamdaw cato kalefot ikor, padotocay ci Yihofa a pakalalok to tamdaw. Ikor no misafelit ci Atam aci Ifa, tangsolay ci Yihofa pafeli to saka tanoktokaw a lalangian i teloteloc nangra. Soˈlinay iraay ko hatokel no tamdamdaw, samanen paˈayaway ko Satapangan 3:15 a somowal, oya “katelangan a ˈoner” ci Akoma Satan ato tatiihay a waywayan ningra wa maemin a mapalaˈafo. (Paˈarawan 12:9; 1 Yohani 3:8) O sikawdan ni Yihofa ci Nowa itiniay i ciraraway a hekal maˈorip, itiya ci Nowa aca ato paro no lomaˈ ko midokoay ci Yihofaan. Samanen matenakay ko mariˈangay ato malafoay a demak, ci Nowa matoleday ko falocoˈ ningra. (Satapangan 6:4, 5, 9, 11; Yuta 6) Kawraan, pasowalan ni Yihofa ci Nowa papalaˈafoen koya ciraraway a hekal itiya, pasowalayho cingranan midemak to maanan a madipot ko ˈorip no paro no lomaˈ. (Satapangan 6:13-18) Tada taˈangayay ko sapakalalok ni Yihofa ci Nowaan. w18.04 15 fiedac 1-2 fatac

Soˈlin cowa ka fanaˈ kita a masasowal, wa ngaˈay a pakalalok to tamdaw. Sapakalalokaw to tamdaw cowa ko pasangaray, tinakoen ngaˈayay damsayen ko pising masedi cingranan, ano caka tawa kora tamdaw tisowanan, maedeng iraay ko pasangaray no falocoˈ ningra, misaaliay to mamitengil a tamdaw. Ano tengil han iso ko sowal ningra i, wa masayar ko falocoˈ ningra halatek. (Yakop 1:19.) O cecay cecay tamdaw ngaˈayay pakalalok to misaaliay to sahinom a salikaka, mahaen o mitilidan no hongti ci Solomon: “Ano matatodong ko sowal iso i, tada makapahay. O ngaˈayay a ratoh i, o miselakay to falocoˈ a patanektek to tireng.” (Taneng 15:23, 30) O roma sapakalalok a pakayraan malacafay a romadiw noˈadingoan a radiw. (Kolosay 3:16; Dmak 16:25.) Samanen ‘mangataayto koya romiˈad’ ni Yihofa, tada kalimelaan ko pakalalolalok no Kriciyang.​—Hipray 10:25. w18.04 23-24 fiedac 16, 18-19 fatac