Saka 10 Folad

Soˈlin caka hecad kita ci Yihofaan aci Yisan pafesel ko pinengneng to falocoˈ no tamdaw, kawra wa ngaˈay kita misaˈicel a cipinang to nafalocoˈan no tao, misinanot to saali nangra. (2 Korinto 11:29) Cowa ka lecad kita to hekal tamdaw a misateked, “aka kao demak no tireng a cecay ko haharatengen. Halo notaoen a demak a miharateng. (Filipi 2:⁠4) Mikiriwiˈay ko malohemay malitengay no kasakopang a siniˈada to tao. Mapatoroday cangra midimokos to siri no Kawas, iraay ko ˈinorong pasowal to Kawas. (Hipray 13:17) Sapadamaaw ko malohemay malitengay to salikaka, cacipinang to pakayraan nangra. Sasamaan ko demak no malohemay malitengay hani? Ano cisiniˈadaay ko malohemay malitengay i, wa mipalak to toki a ciharateng to salikaka. Wa milicay cingra to pakayraan no tao, ikor misongilaˈ mihadidi a mitengil to sowal no tao. Latekay, roma Krisciyang sapihadakaw to nafalocoˈan a demak, kawra cowa ka fanaˈ to sasamaan a pasowal, itiya o malohemay malitengay ano mihadidi a mitengil i, tada kalimlaan. (Taneng 20:⁠5) Makahi ko malohemay malitengay mihadak to toki no niyah, wa matongal ko olah no salikaka cangranan, pakasoˈlin cangranan, mamatongalto ko kalawidang i kalalaˈed.​—Dmak 20:⁠37. w19.03 17 fiedac 14-17 fatac

Paihkal to nai falocoˈay a miakoˈid kita mahecaday o papatahekaen, ano paladaˈay kita to tao, mamatongal ko ˈaredet no kakaenen. Mahecaday, ano miakoˈiday ko tao kitaanan i, lipahakay ko falocoˈ ita; ano miakoˈid kita to tao i, wa lipahak cangra. Paihkal kita to miakoˈiday i tamdaw, wa cipinang ko tao, o sadama anca sapafeli ningra, iraay ko epoc. Mihaen ko demak ita matongal ko kalawidang i kalalaˈed. Matiya o aniniay a saniel, paihkal kita to miakoˈiday iraay ko epoc. Haratengen hena, o cecay a ekim a lingko telien i linkim a sala, tada fangcalay a matedi! Ano macadaay ko hatiniay a sapatelong, wa samaan ko harateng iso? Ano paihkalen iso ko nai falocoˈay a miakoˈiday, o harateng no tao wa mahecad o micadaay to kalimlaan a sapatelong. Roma i, tano ekim misangaˈan a lingko ano halafinto ko toki cowa ko mamapalak, o paihkalan iso a nai falocoˈay a miakoˈid wa tahacerem a maharateng no tao. w19.02 15 fiedac 5-6 fatac

Komaenay ci Atam aci Ifa to heci noya ‘sapihapinang to ngaˈayay tatiihay a kilang’, ora saˈosi nangra paihkalay to harateng no niyah: Cowa ka kahi cangra mitiˈer ci Yihofaan ato palinian Ningra, ciharatengay o niyah saan misaˈosi to palinian no ngaˈayay ato tatiihay. Teloc i? Malahdaway nangra ko kalawidang ci Yihofaan, ato tahadaˈocay a ˈorip, parocokayho to raraw ato patay i teloteloc. (Loma 5:12) Haratengen hena ko nalifetan no Iciyopiyaay a tapang, cowa ka lecad cingra ci Ataman aci Ifaan, tiya tosilen ni Filip cingra i, miakoˈiday cingra to nano demak ni Yihofa aci Yis i cingranan, mansa tangsol micada to inoˈ. (Dmak 8:34-38) Ano mahecad kita toniya tapang a misaˈosi, patafang to tireng halo micada to inoˈ, mahecaday o pasowalay ci Yihofaan: Miakoˈiday kita to nano demak Ningra aci Yis kitanan, ato mitiˈeray kita Cingranan, mihai to iraay ko fadangalan Ningra, patireng to palinian no ngaˈayay ato tatiihay. w19.03 2 fiedac 1-2 fatac

Pakaynien i mihodopay to Kawas a tamdaw, “madimadiay cangra ato cowa pisafelit to palinian ni Yihofa,” tatodong nora misarocoday ko falocoˈ maolah Cingranan, tanektekay a mitiˈer Cingraanan, ˈayaw no mamisaˈosi salakatho, mamiharateng to araaw ni Yihofa. Itini Fangcalay Cudad, o tatodong no “madimadiay” hananay i, awaay ko patelac, awaay ko samoˈ, masongilaˈay, sanay ko tatodong. Tinakoen, saˈosi no Rikec ni Mosi, patoˈaya ko Israil tamdaw ci Yihofaan i, o awaay ko samoˈ a ˈaˈadopen ko patoˈayaen. (Lifi 22:21, 22) Cowa ka ngaˈay patafang to masamoˈay ato adadaay a ˈaˈadopen. Misaaretengay ci Yihofa to tanoktokay ato masongilaˈay a sapatoˈaya. (Malaki 1:6-9) Misamaanay hani? Ngaˈayay tano tinakoen a mitadtad: Ano micakay kita to dafong i, o losay, o cudad anca lalosidan, cowa ka olah kita to cidangocay, anca cangoˈot ko keskes, oyaan awaay ko dangoc a dafong ko kaolahan ita. Mahecaday ko pinengneng ni Yihofa kitaanan, paihkal to olah ato madimadi i, sarocoden, sahecien. w19.02 3 fiedac 3 fatac

Sapidipotaw to falocoˈ no mita, cowa ko piconged aca to pifiyor no tatiihay demak, micadaho to matatodongay a harateng. Haratengen ko isaˈayaway a tinakoan. O misimaway tamdaw sapicongedaw to ˈada, wa miˈedef to fawahan, kawra, nolatekay papacomoden ningra ko kakaenen ato romaroma dafong. Ano caka fawahen ko fawahan no lowil, wa macahiw a mapatay ko finawlan. Mahecaday, kita i, “fafawahen ko fawahan” no falocoˈ ita, ho ngaˈay micada to sapahaled no harateng no Kawas. O Fangcalay Cudad iraay ko harateng ni Yihofa, mansa misaliyaliyaw kita a miˈosi to Sowal no Kawas, wa makayat no harateng no Kawas ko harateng ato waywayan ita. Ano miˈosi to Fangcalay Cudad i, sasamaan ko demak ita ngaˈ, micada to taˈangayay a epoc hani? Mitolon o masakalimlaan. Padama kitaanan mihapinang to, o ‘kasapaan’ ko sowal Ningra.” (ˈOlic 119:18) O roma i, tangongolen ita a midotim ko miˈosian a lalakaw. Ano mitolon kita, micekiw anca midotim, wa manaˈeng i falocoˈ ko Sowal no Kawas, wa matongal matongal a maolah to harateng ni Yihofa.​—Taneng 4:20-22. w19.01 18 fiedac 14-15 fatac

Mafanaˈay ci Yihofa to cowa ka hecad ko ˈicel ato pakayraan no mita, ano misarocoday kita patoˈaya to sangaˈayay i, misaaretengan Ningra maemin. Haratengen ko litengan Israil tamdaw, o maanan ko sapatoˈaya ci Yihofaan. O roma Israil tamdaw ngaˈayay patoˈaya to lopayˈay siri anca lotok siri, o roma Israil tamdaw manikaway, o sapatoˈaya nangra o “tosa no lotok topi anca tosa no lomaˈ topi,” ano caka pakaˈaca to tosa ˈayam, ngaˈayay miala to ‘sangaˈayay emi’ a patoˈaya. (Lifi 5:7, 11) Soˈlin madoloay ko ˈaca no emi, kawra ano o sangaˈayay a emi ko sapatoˈaya, kamayan a misaareteng ci Yihofa to hatiniay a sapatoˈaya. Anini, o sidaˈitay a Kawas pakayni sapacaˈof ita i kasaˈopoan mahecaday ko pinengneng, cowa pisaali Cingra to kahacecay mahecad ci Apolosan mafanaˈ a mikimad, anca mahecad ci Pawloan mafanaˈ a misaharaterateng. (Dmak 18:24; 26:28) O tokel ni Yihofa i, misarocod kita, mihadak to sangaˈayay a sapacaˈof. Maharatengay iso ko pakiyahoan noya maponengay a tosa tangloy han? Minengneng ci Yihofa cingraanan o kalimlaan, samanen patoˈayaan ningra ko sangaˈayay no niyah.​—Luka 21:1-4. w19.01 8-9 fiedac 3-5 fatac

Mafanaˈay kita o kakaˈintehen no tamdaw ko Krisciyang. Paˈayaway ci Yis, itini salikoray romiˈad, wa tahacada ko nisawawaan ningra to pakidemay sapalak. (Matay 24:9; Yohani 15:20) O sapairasol ni Isaya mirikecay kitaanan, cowa ko kaˈinteh aca no ˈada kitaanan, misaka dademakho to masakenaay lalosidan a milood kitaanan. Oniya lalosidan mahawpay ko makaniway sowal a milipalaw to tamdaw, tano mangah a mitongangan kitaanan, ato tano mariˈangay a pakayraan mipalak kitaanan. (Matay 5:11) Cowa ko mamiconged ci Yihofa to ˈada tano lalosidan a milood kitaanan. (Ifiso 6:12; Paˈarawan 12:17) Kawra, aka matalaw kita. Masowalayto ni Yihofa, o sapilood kitaanan a lalosidan, ‘wa awa ko kapo.’ (Isaya 54:17) Mahecad ano taˈangay ko ˈorad i, o cafiˈ no lomaˈ wa ngaˈay midipot kitaanan, “piparawraw no mariˈangay a tamdaw”, oha dadipoten ni Yihofa kita. (Isaya 25:4, 5) Awaay ko pakayraan no ˈada ita paira to tahadaˈocay a dokaˈ no mita. (Isaya 65:⁠17) O ˈada no finawlan no Kawas, ‘wa eminen a palaˈafoen.’​—Isaya 41:11, 12 w19.01 6-7 fiedac 13-16 fatac

Kaemangay, maolahay ci Yihofa to pasalat, o maolahay to pasalat ko pisangaˈ Ningra tisowanan. Kawra, tokel Ningra tisowanan matatodong ko pisaka dademak to pasalat, hongaˈay madipot ko niyah. Mafanaˈay kiso to roma a kapah, minengnengay cangra to kaackan a lalakaw, patelas madadiˈi to tao, mirienang to katalawan a onto, haliepahay, miselip to etok. Toyanan mahemekay cangra, ikorto ka adayayan ko teloc nangra, madengaay no adada, mahiyanay no epah ato etok, anca mapatayay. (Kalatiya 6:7, 8) Mahapinangay, ora misowalan nangra a “psalat”, milipalaway to niyah, mikayatay to ka adayayan a teloc. (Titus 3:3) Midofdof ci Yihofaan o saka ciepoc no mita, wa ngaˈay tanoktok ko tireng, ngaˈayho ira ko pasalat no mita. (ˈOlic 19:7-11) Cowa ka hatini aca, matatodong ko pisaka dademak iso to pasalat, mitoor to malefotay a sarikec ato safalod no Kawas a dademak, mihaen wa pakasoˈlin ko Kawas ato wama wina tisowanan, wa matongal ko sapafeli nangra a pasalat tisowanan.​—Loma 8:21. w18.12 22-23 fiedac 16-17 fatac

Ikor no mararaw ci Atam i, cowato kalefot ko tamdaw hato mapatayay, mafiyoray ko limasmas no raramod. Mikitini sowal ni Pawlo cipinangay kita, tiya mitadtad cingra to cowato ko mamidofdof ko Krisciyang to sarikec ni Mosi i, ano mapatay ko cecay i, o kalalaˈed no raramod wa mahererekayto, oya maˈoripayho wa ngaˈay miliyaw a ciraramod. (Loma 7:1-3) O sapafeli no Kawas to Israil a sarikec, mahawpay ko limasmas no raramod. ˈAyaw no pafeli ko Kawas to sarikec, adihayayto ko fafahi no roma Israil a faˈinayan, soˈlin ikorto mihaiay ko sarikec toniya demak, kawra midipotay ko sarikec to fafahiyan ho eca ka masamsam. Tinakoen, ano cifafahi ko faˈinayan to koli, ikor cifafahi to saka tosa, oha papafelien ningra koya koli to kakaenen, rikoˈ ato madadiˈiay a demak, samanen misaaliay ko Kawas to faˈinay, padotoc midipot ato midimokos to fafahi. (Kasadakan 21:9, 10) Anini, cowato ko mamidofdof to sarikec ni Mosi, kawra mikitini i sarikec mahapinangay ita to misaaretengay ci Yihofa to limasmas no raramod. Ano hatiraay i, coko mamatongal ko pikangodo ita to raramod han? w18.12 10 fiedac 3 fatac ; 11 fiedac 5-6 fatac

Maharek ci Hapakuk pasowal ci Yihofaan to hinapec ato kacalemceman i, wa miharateng cingra to sasamaan ci Yihofa a midemak alatek. O iraay ko siniˈadaay a falocoˈ ni Yihofa, hanaca o cipinangay to harateng a Wama, Cowa ka keter Cingra to pihadak ni Hapakuk to harateng no niyah. Mafanaˈay ko Kawas to pisadak aca ni Hapakuk to nano roray ato somad no niyah. Pasifanaˈan ni Yihofa ci Hapakuk to sasamaan ko hateloc no cowa ka madimadi a Yutaya tamdaw, hanaca o saka cecay ci Hapakuk a mafanaˈ to mangataayto ko sapisawkitaw ni Yihofa. Pafanaˈen ni Yihofa ci Hapakuk to, maharekayto misaday Cingra a midemak, wa kaliki Cingra mitefoc toya mariˈangay a Yutaya tamdaw. O sowal ni Yihofa ‘itini romiˈad namo’, tatodong i, wa malaod ko sayfang itini i lintad ni Hapakuk. O sapacaˈof ni Yihofa cowa ka hecad to maharatengay ni Hapakuk, paliˈayaway pasowal ci Yihofa to mamacada no Yutaya tamdaw ko adihayay a pades. w18.11 15 fiedac 7-8 fatac

Pakayra i cowaho pinanam to soˈlinay kimad a tamdaw, samaanay ko pinengneng iso hani? O tarokos ci Pawlo itini sefi no Yutaya, soˈlin padamaay to mimingay ko kafanaˈ to Kawas a tamdaw, kawra cowa ko Yutaya aca a tamdaw ko padamaan ningra. Sakinacecay ni Pawlo miliwko a mitosil, o mitaypiyaway ci Pawlo aci Parnapas to makaniway kawas ci Cius aci Hirmis, sanay ko pinengneng no Likaoniya a tamdaw, palo tadamaanay a tamdaw ko picada cangranan. Ci Pawlo aci Parnapas makalimay sapicadaaw to kaolah no tamdaw hokira? Itini iˈayaway milisoˈan nangra a niyaroˈ tahacadaay to sapalak, harateng nangra o ngaˈayay a toki misaidahidahi sanay han? Anca ngaˈayay saka dademaken koniya kacingangan a toki, patenak to ngaˈayay lihaf sanay han? Cowa ka pihaen ko harateng nangra! Tangsolay ci Pawlo aci Parnapas paihkal to cowa pihai cangra to harateng no ˈalomanay, cicih han nangra —ko rikoˈ, tayra ilalomaˈ no tamdamdaw, taˈangay ko piowaw: ‘Nawiro matini ko demak namo saw? Nao tamdaw aca kami, malecaday tamowanan ao malonayay a tamdaw.’​ —Dmak 14:8-15. w18.09 4-5 fiedac 8-9 fatac

Ano sapicadaaw to soˈlinay kimad a midoedo to palinian no Fangcalay Cudad a maˈorip i, wa makahi a misalof to harateng ato waywayan ngaˈ. Sowal ni Pitiro: “Kao mitengilay to sowal kamo. Akato pihakelong to masamaamaanay a ˈanof namo a matiya o demak namo yo mafokilho kamo to Kawas. Kamatiya o nika fangcal no mitahidangay tamowanan a Kawas ko nika fangcal namo i polong no demak namo.” (1 Pitiro 1:14, 15) Tatiihay ko waywayan nolitengan a Korinto a tamdaw, mansa, ano sapiˈacaaw cangra to soˈlinay kimad, wa misongilaˈ a mifalic to nokaˈorip no niyah ngaˈ. Anini, iraay ko ˈalomanay tamdaw pakayni sapiˈacaaw to soˈlinay kimad a misawad to tatiihay a waywayan. Pasowalay ci Pitiro: “Naniti:yaho kamo a midemak to kaolahan no roma a finacadan a demak a maˈotit, maˈanof, malasang, haliacang tono hekal. Malaliepah kamo. O kaˈosian ko demak namo a mitaˈong to samiyay. Maedengto. Akato piliyaw to matiraay.”​—1 Pitiro 4:3. w18.11 6 fiedac 13 fatac

Samaan kita mafanaˈ to o cima ko ‘citatodongay milifok to tahadaˈocay ˈorip a tamdaw’ hani? Mahecad o saka 1 hahekalan a Krisciyang, pakayni i pitosil a mikilim to hatiniay a tamdaw. Tooren ita ko sakayat ni Yis: “Ano micomod kamo to tataˈangay a niyaroˈ ano eca i, o mamangay a niyaroˈ i, [kilimen ko o cima ko matatodongay a tamdaw.]” (Matay 10:11) Oya cowa ka soˈlin ko waywayan, misatakalaway anca caka olah to noˈadingoan a tamdaw, cowa ko mamilongoc kita to mamicada cangra to ngaˈayay lihaf. Oya soˈlinay ko harateng, misapoeneray ko falocoˈ, makalimay to soˈlinay kimad a tamdaw ko kilimen ita. Ano mahela ita ko hatiniay tamdaw, sasamaan ko hademak hani? Haratengen ko pakayraan ni Yis misasayho, salakatay cingra mikilim to matatodongay a kilang, dotoc sangaˈen pala dafong, o fawahan, taloˈodan anca roma dafong. Ano mahela ko matatodongay a kilang i, mihadakay ci Yis to lalosidan misaka dademak to inaneng no sayho a misangaˈ to dafong. Mahecaday, wa misaˈicel kita ngaˈ padama to moecelay ko falocoˈ a tamdaw malo Krisciyang.​—Matay 28:19, 20 w18.10 12 fiedac 3-4 fatac

O paratohay a Filipan o ngaˈayay a taˈarawan, soˈlin misiˈayaw cingra to kafalic no pakayraan, kamayan misarocod to mitosilay a demak. Fanekfekay ci Filip midemak to faelohay a minilnilan. (Dmak 6:1-6) Ikor no pakayni soˈlinay kimad mapatay ci Stifano, itini Yirusalim mifekaday ko mipalakay to Krisciyang a pakayraan. O Krisciyang pakayni sapalak maliwasakay tayra cowacowa pala, kawra kamayan padotoc a ˈifowa ci Filip matayal saki Yihofaan, tayra i niyaroˈ no Samariya a mitosil, samanen ˈalomanay tamdaw itira cowaho pakatengil to ngaˈayay lihaf. (Matay 10:5; Dmak 8:1) Makahiay ci Filip micada to sakayat no fangcalay saocor tayra i roma pala, mansa saka dademaken ni Yihofa cingra tayra i cowaho pakatengil to ngaˈayay lihaf a kilac mitosil, itiya ˈalomanay Yutaya tamdaw misakahemaway to Samariya tamdaw, kawra awaay ko misakakinihay a harateng ni Filip, milasilay cingra i Samiriya tamdaw to ngaˈayay lihaf, telocto “lacecay sanay ko falocoˈ” no tamdaw a misinanot to sowal ni Filip. (Dmak 8:6-8) Kamayan ci Filip misarocod to mitosilay a demak, telocto cingra ato paro no lomaˈ milifokay to kadofahay a sapalemed ni Yihofa.​—Dmak 21:8, 9. w18.10 30 fiedac 14-16 fatac

Kinacecayay, ci Yis itini Tikapolis i, iraay ko miˈorongay to madoˈengay a tamdaw miˈaraw cingranan. (Marko 7:31-35) Cowa ka i ˈaˈayaw no ˈalomanay tamdaw a miadah toniya tamdaw, paliyasan cingra a miadah. Mahapinangay ni Yis koniya masamoˈay faˈinayan marawraway ilalomaˈ no ˈalomanay, hato misatekeday a miadah cingranan. Mikitini mananamay ita ko maanan hani? Soˈlin awaay ko pakayraan ita tano kafahkaˈan a miadah to tamdaw, kawra wa ngaˈay misinanot to saali no salikaka, miharateng to nafalocoˈan nangra. Mafanaˈay ci Yis to harateng noniya madoˈengay, patado a miharateng cingranan. Malecaday, patado kita a miharateng to matoˈasay ato malonayay ko tireng a salikaka. O kasakopang no Krisciyang cowa ko tano kalikiay ko demak ko kafanaˈan no tamdaw, ao ciolahay a falocoˈ. (Yohani 13:34, 35) Samanen iraay ko olah ita, masa makahi misaˈicel a padama to matoˈasay ato masamoˈay ko tireng a tamdaw, mirienang to saˈopo ato mitosil, soˈlin caka hakowa ko mademakay nangra, wa kamayan kita padama cangranan.​—Matay 13:23. w18.09 29-30 fiedac 7-8 fatac

Misalimlaay ci Yihofa to madimadiay sikawdan Ningra, ano ci Yis misaodoˈay minengneng kitaanan, mansa makahi pakayni kitaanan kinafalah to ˈorip. (Kalatiya 2:20) Ano tangongolay ko olah ita to salikaka i, wa damsay ko picada cangraanan. Ano sapakahemekaw to falocoˈ nangra i, wa longocen ita ko “sakararihaday ato sakasasipaˈicel to falocoˈ a demak.” (Loma 14:19) Hinatalaay kita to faelohay hekal, samanen itiya wa awa ko adada, lalood, patay, sapalak, pasangaray no paro no lomaˈ ato romaroma katoledan a demak. Hererek no pikowan ni Yis, wa patatikol to malefot ko tireng. O mitaˈlifay to saikoray a sapalifet a tamdaw, wa malo wawa no Kawas, milifok to ‘ciˈdilay a pasalat no wawa no Kawas’. (Loma 8:21) Nanay padadotoc kita tano olah a paˈicel to salikaka, masasidama, nanay malaˈafang kita tayra i faelohay hekal! w18.09 14 fiedac 10 fatac; 16 fiedac 18 fatac

Micekiw to Fangcalay Cudad, cowa ko kaliki a minengneng to lalakaw ato pikonis aca ilaenoay to sapacaˈof. O haharatengen ita, oniya lalakaw ngaˈay padama kitaanan mihapinang to, o maanan a capeling ni Yihofa, o pakayraan Ningra a dademak ato pinengneng Ningra. Misaˈicel kita a mihapinang, hano misaali ci Yihofa kitaanan midemak to cecay a demak ato hano mirikec Cingra to cecay a demak. Ngaˈay kita miharateng to kaˈorip ato falocoˈ no mita, o manan ko sasalofen. Soˈlin, micekiw kita to lalakaw i, cowa ko mamadotim a maemin ko kalimlaan, kawra, ano micekiw kita i, mihadak to kalitosa a toki a misongilaˈ a midotim to lalakaw, wa taˈangay ko sapadama kitaanan. (1 Timoti 4:15) Micerid a midotim to Kimad no Kawas, wa ira ko maanan ngaˈayay a minaroˈan hani? Ngaˈay kita pasoˈlin to o malefotay ko harateng no Kawas. Satapang kita minanam tano harateng Ningra a minengneng to demak, ikorto, mikitini falocoˈ micada to harateng Ningra. ‘Faelohto’ ko harateng ita, palahadho to faelohay a pakayraan miharateng. (Loma 12:2) Matongal matongal mafanaˈ tano harateng Ningra a minengneng to demak. w18.11 24 fiedac 5-6 fatac

Pasowalay ci Pawlo o niyah ato romaroma Krisciyang, o ‘kalacafayay to Kawas a matayal’, samanen mitosilay cangra, ato pasifanaˈay to soˈlinay kimad. (1 Korinto 3:6) Anini ngaˈay malo cafay no Kawas kita, o pakayraan i, patafangen ko toki, tireng ato dafong, misongilaˈ a midemak to sapatorod no Kawas a mitosilay a demak. O tada sakaliko no mita konini! Makahi kita misadak to toki ato ˈicel mitosil pasifanaˈ to tamdaw, wa taˈangay ko hemek. Awaayto ko pakafiloay to hemek a macakat i noˈadingoan ko pacekiwan a tamdaw. Maˈaraw ko pacekiwan pakayni ka cipinang to soˈlinay kimad a mahemek, matongal ko pakasoˈlin no falocoˈ, mifalic to niyah ato paladaˈ to mananamay i tamdaw, pasangaray a sowalen ko kahemek no mita. Mahecaday ko harateng ni Yis, miocoran ningra ko 70 tamdaw a mitosil, samanen ngaˈayay ko minaroˈan ‘lipahakay a minokay’ cangra, pakahemekay konini ci Yisan.​—Luka 10:17-21. w18.08 20 fiedac 11-12 fatac

Ano pakidem ko pitadiˈec ita to taneng no niyah mamifekad ko pasangar. Latek cowaho ka masaheci a mafanaˈ to kihcod a demak, kawra cipinangayto kako mafanaˈ a misaˈosi to demak wa saan kita a miharateng. Roma i, ano eca ka langaˈay kita to salikaka i kasakopang, wa mifiyor kitaanan matatodong ko pisaˈosi alatek. Ano haharateng han ko lacongis i kalalaˈed to salikaka, wa misatapang caka pakasoˈlin to salikaka. Telocto, ano matengil ita ko mararaway lihaf pakayni toniya salikaka i, wa kahnay a pakasoˈlin. Mihaenay haratengen ita, ano ira ko macangalay harateng to salikaka wa miapoh kitanan eca pakahapinang to demak, mararawto ko pisaˈosi. (1 Timoti 6:4, 5) Hamaan palamiten ita ko maˈinapay i falocoˈ, mihaen ecato ka fiyor ko pisaˈosi no niyah. Hamaan papiˈmeten ko tatiihay harateng to niyah, padadotocen a maolah ko salikaka ita, mikifalocoˈ a misodod cangranan.​—Kolosay 3:12-14. w18.08 6-7 fiedac 15, 18 fatac

O tamdaw, ci Yihofa ko misangaˈay, mihaenay o tamdamdaw sahtoay oni Yihofa. (ˈOlic 100:3; Paˈarawan 4:11) Kawraan, itini likisi no tamdaw, mikiriwiˈay ko Kawas mipiliˈ to roma tamdaw malo Ningra. Itini ˈOlic 135 fedengan somowalay, o midokoay ci Yihofaan a Israil tamdaw iti:yaho, o ‘mikiriwiˈay a hafay’ Ningra. (ˈOlic 135:⁠4) Pairasolay ci Hosiya wa ira ko ˈalafang a tamdaw malo finawlan ni Yihofa. (Hosiya 2:23) Samaanay matatodong ko sapairasol ni Hosiya hani? Mipiliˈan ni Yihofa ko ˈalafang a tamdaw, pafeli cangranan to hatokel kalacafay ci Kristoan a mala hongti. (Dmak 10:45; Loma 9:23-26) O mapasimalay no fangcalay saocor a tamdaw masalalomaˈay no “fangcalay a finawlan”, o ‘mikiriwiˈay a hafay’ ni Yihofa cangra. (1 Pitiro 2:9, 10) Anini adihayay ko madimadiay a Krisciyang iraay ko tokel itini i cikiw tahadaˈoc a maˈorip, samaanay ko pinengneng ni Yihofa cangranan hani? Panganganan ni Yihofa cangra to ‘finawlan’ Ningra, o ‘mipiliˈan’ Ningra a tamdaw.​—Isaya 65:22. w18.07 22 fiedac 1-2 fatac

O soˈlinay Kriscyang wa mitodong ci Kristoan, samanen hinapaladaˈay cingra itiniho fafekang no sera, patireng to ngaˈayay taˈarawan no mita. (Matay 20:28) Ngaˈayay licayen ita ko niyah: “Wa ngaˈay kako midemak to maanan, padama to niyah itini kihcod a demakan mikotod to taˈarawan ni Yis hani?” (1 Pitiro 2:21) Samaan kita pakahemek ci Yihofaan hani? Minanam to ngaˈayay taˈarawan Ningra aci Kristo, ciharateng to kangaˈayan no tao, haratengen to sasamaan padama to tao. Pakayni ciolahay a Samariya tamdaw a tinakoan, paihkalay ci Yis mitokelay cingra to nisawawaan misaˈicel padama to tao, soˈlin cowa ka hecad ko serangawan i, padotocen a mihaen ko demak. (Luka 10:29-37) Pasowal ci Yis toniya tinakoan i, samanen iraay ko milicayay cingranan a Yutaya tamdaw: ‘O cima ko kaolahen ako a tamdaw hani?’ Paihkalay ko caˈof ni Yis, ano sapakahemekaw to Kawas i, samatiyaen oya Samariya tamdaw makahi a hinapaladaˈ. w18.08 19 fiedac 5-6 fatac

Pakayni ka madimadi ni Mariya midimokos ato palahad ci Yisan, padotocay ci Yihofa a mihayda cingranan hokira? Soˈlinay mihaen ko demak ni Yihofa, mitilidan Ningra ko nano demak ni Mariya i Fangcalay Cudad. Itini pitosil ni Yis to tolo miheca ira ko kalitosa, maponengayto ci Mariya, mansa materekay i Nacali a maˈorip. Soˈlin awa ko toki ni Mariya kalacafay ci Yisan a talacowacowa mitosil, kawra tiya patayen ci Yis i, padotocay ci Mariya i tatihi ni Yis. (Yohani 19:26) Mapatayto ci Yis, malacafayay ci Mariya to romaroma nisawawaan itini Yirusalim tahira i Kocinsic. (Dmak 1:13, 14) Toya romiˈad, matefaday ko fangcalay saocor i tireng no nisawawaan, maedeng mapasimalay no fangcalay saocor ci Mariya, ano mahaenay i, ira ko toki ningra itini kakarayan tahadaˈoc a malacafay ci Yisan. Hakelong no ˈorip ni Mariya madimadiay, o hatiniay a sapalifon cingranan tada o taˈangayay sakaliko! w18.07 9-10 fiedac 11, 14 fatac

Itiniho i fafekang no sera ci Yis mitosil i, pasifanaˈay to nisawawaan to taˈenengan a kimad, padama cangranan cipinang to maanan a waywayan ato demakan, wa ira ko masamanay a minaroˈan. Tinakoen pasowalan ningra ko nisawawaan, o ˈintehay wa mikayhid to tamdaw tano mariˈangay ko saka dademak, o maˈodangay harateng wa mikayat to saka ˈaˈodangaw to tamdaw. (Matay 5:21, 22, 27, 28) Saka tatodongaw no pidemak no makapahay falocoˈ no niyah, wa micada kita to sakayat no safalod no Fangcalay Cudad, o hatiniay a waywayan ko ngangaˈay paˈdil to Kawas. Itini roma pakayraan, mitoor ko Krisciyang to makayatay no Fangcalay Cudad a makapahay falocoˈ, cowa ka hecad ko misaˈosian. Tinakoen ko komaenay to epah, cowa piconged ko Fangcalay Cudad to tamdaw matatodong ko kakomaen to epah, kawra mirikecay to pakidemay komaen to epah ato malasangay. (Taneng 20:1; 1 Timoti 3:8) Sakoniya sowal, harateng no cecay Krisciyang, cowa pakidem ko niyah komaen to epah, hamaanto miharateng to roma a lalangian han? Cowa ka hatira, soˈlin mihayi ko makapahay falocoˈ ningra mihaen to demak, kawra, o haharatengenho ningra wa tatiih ko makapahay falocoˈ no tao hokira. w18.06 18 fiedac 10-11 fatac

Misaheciay ci Yis patalipaˈelal to nisawawaan miliyas to tamod nangra, oya sapasifanaˈ ato miowingan nangra a demak. (Matay 16:6,12) O sasinanoten ita i, itini ikor no sapidopoaw ko ˈalomanay ci Yisan a mala hongti, patalipaˈelalay ci Yis to nisawawaan, aka mafiyor no tamdaw, sanay ano makelec ko kalaliting no pihakelongan ato mirikecay i, wa mifekad ko mariˈangay a demak. Pasifanaˈan ni Yis ko nisawawaan misatenok i mirikecay ko saaroˈan, mihaenay, mihalakaay ko ˈaˈideman no saysi ato Farisay tamdaw sapipatayaw ci Yisan. Kalaˈadaan no mirikecay ato pihakelongan ci Yis, calemcem to mamipalak ci Yis to saaroˈan nangra. Sanay ko sowal nangra: “Ano pakonira han ita koya tamdaw i, pasoˈlin asa ko tamdamdaw i cingraan. Ano hatira i, o tatayni ko Loma a tamdaw a mipeleng to pitaˈongan ita ta patayen nangra ko finawlan ita!” (Yohani 11:48) Mihaenay, oya Sakakaay Saysi ci Kayafas mihalakaay sapipatayaw ci Yisan.​—Yohani 11:49-53; 18:14. w18.06 6-7 fiedac 12-13 fatac

O roma misangaˈan ni Satan a talakal o kafahekaˈ no tamdaw to misakawasay a ˈicel. Anini, cowa ko mararaway aca a pidoyongan ko sapikayhid ni Satan to tamdaw a maolah to demak no tatiihay coyoh, kala saka dademakan ningra ko lawla a milenaf to misakawasay a ˈicel. Tinakoen, o ika, tasalamaan no tingnaw misakapahay tono misakawasay a ˈicel. Sasamaan kita ngaˈ eca ka lefong i talakal hani? Itini pipiliˈ to salama, cowa ko ngangaˈay kita milongoc to mamihadak ko likakawa no Kawas to tahapinangan, pasifanaˈ to tamdaw to o maanan a salama ko ciepocay, o maanan a salama ko tatiihay. O papahatatanamen ita ko ngaˈayay falocoˈ no niyah, mafanaˈ mitoor to safalod no Fangcalay Cudad a mipiliˈ to salama. (Hipray 5:14) Saka dademaken ita koniya limoˈot wa ngaˈay inaneng ko misaˈosian. Ngaˈayay licayen ita ko niyah: “O mipiliˈan ako a salama paihkalay to misamangahay ko niyah han? Ano mafanaˈ ko pacekiwan anca milisoˈan a tamdaw to mipiliˈan ita a salama, o misaka dademakay kako to sapasifanaˈ no Fangcalay Cudad wa saan cangra miharateng han? Ano saka dademaken ita ko mitenakan no niyah a soˈlinay kimad, wa madoloto a miliyas to talakal ni Satan.​—1 Yohani 3:18. w18.05 25 fiedac 13 fatac

Sasamaan kita mitodong to taˈarawan ni Pawlo hani? Saka cecay, fanekfek kita mikilim to ‘citatodongay milifok to tahadaˈocay ˈorip’ a tamdaw. Saka tosa, mitolon kita milongoc to Kawas padama toniya tamdaw makahi micada to soˈlinay kimad. (Dmak 13:48; 16:14) Fafahiyan salikaka ci Silefana mangataayto ko 30 miheca misakafah, sanay ko sowal: “ˈAyaw no mingata kako to cecay lomaˈ a mitosil i, milongoc kako ci Yihofaan padama takowanan, ira ko tawlikay a haratengan.” O roma, milongocay kami to Kawas miocor to coyoh mikayat tamiyanan, mahela ko ngaˈayay ko falocoˈ a tamdaw. (Matay 10:11-13; Paˈarawan 14:⁠6) Ci Lopote mataˈlifay ko 30 miheca misakafah, sanay cingra: “Mafanaˈay ko coyoh to pakayraan no mitosilan ita a tamdaw, ngaˈay malacafay to coyoh a mitosil tada pakahemekay takowanan.” Saka tolo, misaˈicelay kami mikilim to kangaˈayan no cilomaˈay. Ci Kalo, o malohemay malitengay cingra, sanay ko sowal: “Sapihapinangaw to ngaˈayay ko falocoˈ no cilomaˈay, sinanoten a minengneng kora tamdaw, masediay ko pising, sidaˈitay minengneng anca mikifalocoˈay mihadak to salicay hokira.” Todongen ita ci Pawlo, wa ngaˈay ‘mihadidi a ciheci.’ w18.05 15-16 fiedac 13, 15 fatac

Ano matengil ko na padamaan no niyah a tamdaw madimadi to Kawas, wa taˈangayay ko sapakalalok kitaanan, mahaen o sowal no tarokos ci Yohani: “Ano matengil ako ko nipidoedo no wawa ako to sowal no Kawas i, awaay ko ikakaay nonini a lipahak ako.” (3 Yohani 4) Ngaˈayay misawacay ko ˈalomanay misakafahay tonini. Ano tahatengil cangra to padamaan no niyah a tamdaw, mitafoay to madimadi, malo misakafahay, maedeng mahemekay a mapakalalok cangra. Mihaenay, ano matoled ko cecay misakafahay, ngaˈayay lomalen ko makapahay minaroˈan no demak nangra i salakat, oha papaira to sahinom cangranan konini. ˈAlomanay kasakilac kantok somowalay, maharek cangra ato fafahi milisoˈ to kasakopang i, macadaay ko mikoˈiday a tikami no salikaka, tada taˈangayay ko sapakalalok cangranan. Miakoˈid ko salikaka to malohemay malitengay, misakafahay, milakowitay to riyar, matayalay no Pitil, wa adihay ko sapakalalok toniya madimadiay a salikaka. w18.04 23 fiedac 14-15 fatac

Cowa pidofdof ci Solomon toniya limoˈot, 700 ko fafahi. Cowa ka hatini aca, iraayho ko 300 fafahiyan ningra. (1 Hongti 11:3) ˈAlomanay fafahi ningra cowa ko Israil tamdaw, hanaca midokoay to makaniway kawas. Mihaenay, misafelitay ci Solomon to roma a sarikec no Kawas, cowa ka ngaˈay mararamod to ˈalafang a fafahiyan. (Limoˈot 7:3, 4.) Palidlid sanay ci Solomon miliyas to sarikec ni Yihofa, salikor midemakay to pakidemay a raraw. Patirengay cingra to pipatafangan a cadada noya fafahiyan kawas ci Astartan ato makaniway kawas ci Kimos, hanaca kalacafayay toya ˈalomanay fafahi ningra midoko to makaniway kawas. Na patirengay ci Solomon i Yirusalim to fangcalay sefi ni Yihofa, kawra ikorto patirengay to pipatafangan a cadada no makaniway kawas i ˈaˈayaway a lotok no Yirusalim! (1 Hongti 11:5-8; 2 Hongti 23:13) Halatek milipalawan ni Solomon ko niyah, ano padotoc itini fangcalay sefi a patafang, o sasododen ni Yihofa ko misafelitay a waywayan ningra sanay a miharateng. Nikawrira, cowa ko mamisodod ci Yihofa to tatiihay demak. w18.07 18-19 fiedac 7-9 fatac

O paeferan ni Satan kitaanan a “cinamalay a panaˈ” o milingatay ci Yihofaan a mangah, tinakoen—cowa ka olah ci Yihofa tisowanan, awaay ko ciharatengay tisowanan, sanay a harateng. 19 ko mihecaan ci Iciyang, awaay ko kapo no niyah, sanay a miharateng, sanay ko sowal ningra: “Miraayay ci Yihofa takowanan, cowa ka kahi misawidang Cingra takowanan, sanay kako miharateng isalakat.” Ano ira ko mahaenay harateng i, samaanay ci Iciyang hani? Sanay cingra: “Mitongalay to pasoˈlin no falocoˈ ako ko saˈopo. Mirienang kako to saˈopo isaˈayaw aroˈ sanay i tadimocokan, cowa ka pacaˈof to salicay, awaay ko ciharatengay takowanan, sanay a miharateng. Kawra, misadayay to kako nohatini to lalakaw no saˈopo, ano masaˈopo i, kinapinaay kako pacaˈof to salicay. O nalifetan ni Iciyang mitadtaday to kalimelaan a kimad: O sapatada no sofitay, cowa ka ngaˈay mifalic ko pakeciw, kawra ono pasoˈlinay falocoˈ a sapatada ita, ngaˈayay falicen ko pakeciw, ngaˈay taˈangay ngaˈayay kaeming, no niyah a haretang ko piˈarawan. (Matay 14:31; 2 Tisalonika 1:3) Mihaenay i, mitongal to pasoˈlinay a falocoˈ tada kalimelaanto! w18.05 29-30 fiedac 12-14 fatac

Ikor no tahalifa ko milaocay to kapalitan to ˈatoray i, mafalicay ko waywayan, misaaliayto sapadama. (Dmak 16: 25-34) Mahecaday onini, o roma tamdaw soˈlin caay sapitengilaw to lihaf no Fangcalay Cudad, kawra ano tahalifa cangra to taˈangayay kafalic i, mamafalic ko harateng halatek, misaali to sapadama. Tinakoen, fahal saan malahedaw ko ngaˈayay katayalan a fahekaˈen. O roma tamdaw iraay ko pakidemay a adada rawraw sanay ko harateng, anca mapatay ko kaolahan a tamdaw masomad ko falocoˈ. Wa misatapang miharateng to araaw no tamdaw maˈorip, caayho ka harateng nangra konini i saˈayaw. Mihaen ko harateng nangra halatek, “Maanen ako ko demak ta mapaˈorip kako saw?” Mihaenay, ano tosilen ita ko hatiniay tamdaw i, sapitengilaw cangra to mitenakan ita a hatokel halatek. Madimadi kita to mitosilay a demak, itini kaolahan no tao a mitengil i, ngaˈay mihinom cangranan.​—Isaya 61:⁠1 w18.05 19-20 fiedac 10-12 fatac

ˈAlomanay tamdaw anini maapohay no kawas noniya lekakawa, cowa ka fanaˈ to mapalitay no mararaway pihakelongan, kicay ato lekakawa ko niyah. (2 Korinto 4:4) Malikoay kita a mihakelong to taˈarawan ni Yis, padama to tamdaw mafanaˈ ci Yihofaan, midoko to pafeliay to pasalat a Kawas. (Matay 28:19, 20) Kawrira, adihayay ko malifaay a sapalifet i pitosilan. Itini roma kitakit, cowa ka olah ko tamdaw to mitosilan a ratoh, paihkalay ko roma tamdaw to tatiihay waywayan. Kawra, ano palimoˈotay ci Yihofa kitaanan mitosil to tamdaw, lalicayen ita ko niyah: “Wa ngaˈay kako misaka dademak to pasalat, mitongal to demak no Hongti Kitakit han?” Mafanaˈay ko ˈalomanay finawlan ni Yihofa to cowato ka hakowa ko toki noniya lekakawa, hato midoloay to kaˈorip a mirienang to misakafahay demak. (1 Korinto 9:19, 23) O roma misakafahay itiniay niyaroˈ no niyah a mitosil, o roma malinahay i misaaliay to mitosilay a kilac dademak. Tada mahemekay kita pakaˈaraw to ˈalomanay tamdaw ngaˈay ko pisaka dademak to pasalat a dademak ci Yihofaan!​—ˈOlic 110:⁠3. w18.04 11-12 fiedac 13-14 fatac