Saka 9 Folad

Na paihkalay ci Yis to siniˈada ci Martaan aci Mariyaan. Pakayni kapatay ni Lacarus pakidemay ko kasomad ni Marta aci Mariya, maˈaraw ni Yis ko kasomad nangra, ‘teraˈ sanay ko losaˈ ningra.’ (Yohani 11:32-35) Ano papatikolen ni Yis paˈorip ci Lacarus i, o kacilosaˈ ningra cowa ko pakayniay kalahdaw no widang, o kacipinang to adada no falocoˈ ni Marta aci Mariya. Mafanaˈ to siniˈadaay ci Yis to tamdaw, tada misayaray kitanan, hato maolahay kita cingranan. Mahemekay kita mala hongtiayto ci Yis i Hongti Kitakit no Kawas, caka halafin wa palahdawento ningra ko kihcod a pades. O lekakawa no tamdaw itini pikowanan ni Satan manaholayto, ano tahalifetay ci Yis to kaˈorip no tamdaw, iraay ko tatodong ningra a milidong to tamdaw pasadak i karorayan. Mafanaˈay ci Yis siniˈadaay to kalonay no mita, ira ko mahaenay a hongti tada lipahakayto!​—Hipray 2:17, 18; 4:15, 16. w19.03 17 fiedac 12-13 fatac

Mitokelay kita misaˈicel ko niyah i mitosilay a demak, misongilaˈ padama to tamdaw a mafanaˈ to Kawas, kawra cowa ko kalimlaan a lalangian kita. (1 Korinto 3:6, 7) Soˈlinay i, ci Yihofa ko misolotay to tamdaw, a makalim saka fanaˈaw Cingranan. Roma i, mitengil anca caka pitengil ko tamdaw to ngaˈayay lihaf, o falocoˈ ningra ko piˈarawan. (Matay 13:4-8) O kasapaan a singsi ci Yis toniya hekal, kawra ˈalomanay ko cowa picada to sapasifanaˈ ningra a kimad. Mihaenay, misaˈicel kita a padama to tamdaw mafanaˈ to soˈlinay kimad, soˈlin caka kahi cangra mitengil, cowa ko mamatoled ko falocoˈ ita. Ano siniˈada kita to tao i pitosilan, wa paira to adihayay haepoc. Wa matongal ko kaolah ita a mitosil, tahatanam to hemek no paladaˈay, wa ngaˈayho padama toya [‘matatodongay ko falocoˈ to mamangaˈay milayap to midaˈocay ˈorip a tamdaw,’ makahi a micada to ngaˈayay lihaf. (Dmak 13:48) Mihaenay, ‘ano ira ko toki ita i, kao ngaˈayay ko demak i tamdamdaw.’ (Kalatiya 6:10) Mihaen ko demak ita, wa tahatanam to hemek a paˈdil to kakarayan Wama!​—Matay 5:16 w19.03 25 fiedac 18-19 fatac

Hongti ci Tafiti sanay ko sowal: ‘O tadamaanay ci Yihofa, o papakahemeken.’ (ˈOlic 145:3) Tangongolay ko olah ningra ci Yihofaan, o hatiniay a olah, miocoray cingraanan makalim ‘ilalomaˈ no kasakopang, papahemek’ to Kawas. (1 Rayray 29:10-13; ˈOlic 40:5) Nohatini o cecay pakayraan ita a pakahemek ci Yihofaan i, pacaˈof to salicay i kasaˈopoan. Maolahay kita itini kasaˈopoan matengil ko masakenaay a sapacaˈof. Tinakoen, maolahay kita to kantangay nai falocoˈay a caˈof no kaemangay. Ano mihadak ko tamdaw to nafalocoˈan a harateng, pakalalokay kitaanan. O roma tamdaw soˈlin kalingodoay anca minanamayho to sowal ita, satimolo saan a pacaˈof to salicay, masemeray kita to pisaˈicel nangra. (1 Tisalonika 2:2) Wa ngaˈay kita samaan a mikoˈid cangranan hani? Ano maharek ko saˈopo wa ngaˈay koˈiden ita cangra to nika pihadak to pakalalokay a sapacaˈof nangra. Ano kitato i, ano mirienang a pacaˈof, o cecay a pakayraan miakoˈid cangranan, ano mihaen kita i, o mamapakalalok no tao kita, hanaca o papakalalok kita to tao.​—⁠Loma 1:11, 12. w19.01 8 fiedac 1-2 fatac; 9 fiedac 6 fatac

Masomaday koniya mamoetepay faˈinayan. Ciadadaay to midengaay a adada no fanges, hato awaay ko hatokel. Kawra, cecay romiˈad maˈaraway nangra ko Tadamaanay a Singsi ci Yis. Na matengilay nangra to miadahay cingra to masakenaay a adada, pakasoˈlin ci Yisan mamiadah to adada nangra. Maedeng miakoˈiday cangra to sidaˈit ni Yis cangranan. Nikawrira, cecayay aca ko patikolay a paihkal ci Yisan to piakoˈid ningra. Oniya maadahay a Samariya tamdaw mitemeray ko falocoˈ, mansa ‘lekal sa a paˈdil to Kawas.’ (Luka 17:12-19) Mahecaday kita toniya Samariya tamdaw, a miakoˈid to sidaˈitay kitaanan a tamdaw. Itini paihkal to piakoˈiday, patirengay ci Yihofa to taˈarawan ita. Ano masemeray Cingra to midokoay Cingranan a tamdaw i, papalifon cangranan. (2 Samuil 22:21; ˈOlic 13:6; Matay 10:40, 41) Palimoˈotay ko Fangcalay Cudad kitaanan “tona o kakaolahan no Kawas a wawa kamo saka, o tatodongen namo Cingra.” (Ifiso 5:1) Mihaenay, ano sapitodongaw kita ci Yihofaan wa paihkal to miakoˈiday. w19.02 14 fiedac 1-2 fatac; 15 fiedac 4 fatac

O cecay kaying salikaka, pasowal to singsi cowa ko mamirienang cingra to caay ko kahemekan ni Yihofa a misalawlaay to romiˈad a demak. Pakalomalomaˈ a milisoˈ ko cecay maomoyay kapah salikaka i, malitemohay ko namilikafay to Misawacayay tamdaw a cafacafay micudad. Mitokelay ko tawki to cecay faˈinayan salikaka, midemak to cowa ka moecel ato milipalaway a demak. Ano eca ka tooren ko saali no tawki wa mafalah ko tayal, kawra, kamayanay cingra mitadtad to sapi tooraw cingra to palinian no Kawas, malo moecelay a tamdaw. (Loma 13:1-4; Hipray 13:18) Oniya tatoloay a salikaka paihkalay to maanan a capeling hani? Alatek mahapinangay iso ko timoloay ato caay pisamangah a capeling. Madimadi cangra ci Yihofaan i, cowa pisafelit to palinian Ningra, pakayni to nika madimadi nangra maedeng malikoay ci Yihofa toniya tatoloay salikaka, ano kitato i, maolahay a malikoen ko Wama i kitanan. w19.02 2 fiedac 1-2 fatac

O Rikec ni Mosi mikiriwiˈay midipot to awaay ko ˈicel midipot to niyah a tamdaw, tinakoen o pakoyoc, maponengay, pacarcaray a tamdaw. O misawkitay no Israil “aka pisamsam to pacarcaray a maroˈ i tamowanan a tamdaw ato pakoyoc. Aka piala to rikoˈ no maponengay to malo sapatampo ningra.” (Limoˈot 24:17) Ciharatengay ci Yihofa to poeneray ko saaroˈan a tamdaw. Ano mikariˈang to hatiniay tamdaw, o sasayfangen ni Yihofa. (Kasadakan 22:22-24) Misaaliay ci Yihofa to mikeriday a tamdaw kaolahen a micada ko midimokosan nangra a tamdaw. ˈIntehay ko Kawas to maamaan milingatay to maˈodangay a raraw, midipot to finawlan Ningra, mangalefay oya pakoyoc tamdaw, nanay sadafdafen a micada cangra sanay ci Yihofa. (Lifi 18:6-30) Ano pakasoˈlin kita tatano masadafdafay ko picada ni Yihofa kitaanan, matongal ko kaolah ita Cingraanan. Roma, maolah kita ci Yihofaan ato moecelay palinian Ningra, wa maolah to tao a tano masadafdafay a micada cangraanan. w19.02 24-25 fiedac 22-26 fatac

Samaanen ita midipot ko harateng no niyah eca ka mafiyor ni Satan hani? Tano tinakoan a mitadtad. Palimoˈotay ci Yihofa kitaanan, ‘o maˈodangay ato masamaamaanay a kaacekan ato maˈanofay a demak’, ilalomaˈ no mita, “caay ka ngaˈay a masowal.” (Ifiso 5:3) Ano masasowalay ko cafay no katayalan ato picudadan to kaacekan a sowal, wa samaan ko hademak ita hani? O makapahay falocoˈ no mita alatek mahecaday to mikecolay a tamdaw, mirikec kitaanan. (Loma 2:15) Kawra, wa mitengil kita a midofdof to “mirikecay a ngihaˈ” no makapahay falocoˈ han? Anca masolotay no tao a sapitengilaw to maanan ko sowal nangra, anca sapinengnengaw to kaacekan a coka han? Itini toniya toki, “ˈedefen ita ko fawahan,” tangsol a mifalic to hasowal anca tangsol a miliyas. Alatek o cafay no katayalan ato picudadan, sapiparoaw to mararaway a harateng i ponoˈ no mita, anca pacieci kitaanan midemak to mararaway a demak, ira ko timolo ita ngaˈ, maconged koniya saroero. Kawra, mafanaˈay ci Yihofa to pisaˈicel no mita, papafelien Ningra kita to ˈicel ato taneng a miconged to harateng ni Satan.​—2 Rayray 16:9; Isaya 40:29; Yakop 1:5. w19.01 17-18 fiedac 12-13 fatac

Ci Solomon cipayciay cifadangalay, na toor hananay ningra ko harateng no niyah a maˈorip, sanay pasowal to niyah: “Dada, lifeten a lipahak, karihaked a malemed.” (Patnakay 2:1-10) Patirengay cingra to lomaˈ ato makapahay a koying, haratengay sanay a midemak. Ikorto samaanay ko harateng ningra hani? Masaloay a lipahak cingra han? Paihkalay ci Solomon to harateng no niyah, sanay ko sinael anini. Mikitini i nalifetan ni Solomon adihayay ko mananamay ita, ngaˈay sarocoden a misimsim. Cowa ka ciharateng ci Yihofa, madokaˈto ngaˈ mananam iso ko sapasifanaˈ, tokel Ningra tisowanan midofdof Cingranan, misaareteng to araaw Ningra, kawra ira ko pakasoˈlinay falocoˈ iso, ngaˈ maremo koniya demak. O kalimlaan a capeling ko pakasoˈlinay, hanaca cowa ko mamatoled ko pakasoˈlinay a tamdaw, caay ka tawal Ningra ko nano tayal namo ato ‘nipipatalahkal namo to olah i Cingraan.’ (Hipray 6:10) Mihaenay, saˈicelen a palahad ko tanektekay a pakasoˈlin, wa mahapinang iso, mafanaˈay ko kakarayan Wama to o maanan ko sangaˈayay tisowanan.​—ˈOlic 32:8. w18.12 22 fiedac 14-15 fatac

Pakasoˈlinay to Kawas ko noˈadingoan a tamdaw, hanaca tano harateng no Kawas a minengneng to demak. O mahaenay a tamdaw makahiay micada to sakayat no Kawas, misetek to falocoˈ midofdof Cingraanan. (1 Korinto 2:12, 13) Toniya demak patirengay ci Tafiti to taˈarawan, sanay romadiw cingra: ‘O mililaman ako a hafay ci Yihofa, o makapahay epah i takid ako.’ (ˈOlic 16:5) O misowalan ni Tafiti a ‘hafay’ mahawpay ko tanektekay kalalaˈed ningra ato Kawas, hanaca miceriday cingra pasayra i Kawas milongoc to sadipot. (ˈOlic 16:1) Mihaen to demak ‘palipahakay to fangcalay falocoˈ ’ ni Tafiti. Pakayni cingraanan awaay ko mikikakaay ko hemek i piingid to Kawas. (ˈOlic 16:9, 11) O misaaretengay to lawla ato hafay a tamdaw, cowa ka tahatanam to lipahak ni Tafiti. (1 Timoti 6:9, 10) Palahad kiso to pakasoˈlin ci Yihofaan ato midoko Cingraanan, wa ciepoc ko kaˈorip, masalo ko falocoˈ. Samaan kiso paˈicel to pakasoˈlinay falocoˈ hani? Palaken ko toki kalacafay to Kawas, miˈosi to Kimad Ningra, mihapinang to misangaˈan Ningra a kihcod, misimsim to makapahay capeling Ningra, mahawpay ko olah Ningra tisowanan.​—Loma 1:20 w18.12 25-26 fiedac 7-8 fatac

Cowa ko sapaini aca ko sowal ni Pawlo, oniya sinael palimoˈotay to Krisciyang, mikangodo ato misalimla to raramod. Mahaenay ko pinengneng iso to raramod han? Ano ciraramodayto kiso, mikangodoay kiso ato misalimlaay to raramod han? Ano mikangodoay kiso to raramod, o mitodongay to taˈarawan ni Yis. Mikangodoay ci Yis to raramod. Tiya licayen no Farisay tamdaw ci Yis, samaan ko pinengneng to malalikongay i, miliyawan ni Yis ko pinengneng no Kawas to saka cecay a raramod, sanay cingra: “Liyasen no tamdaw ko mama ato ina ningra . . . Malacecayto ko tireng noya tatosaay.” Dotoc pasowalayho cingra: “O nipalacecayan no Kawas i, aka palicinowasen no tamdaw.” (Marko 10:2-12; Satapangan 2:24) O sowal ni Yis paihkalay to, o limasmas no raramod mikitiniay i Kawas, o tahadaˈocay ko kalalaˈed no raramod. Cowa pihai ko Kawas ci Atam aci Ifa malalikong. Salakat, o limasmas no Kawas to raramod i Itin, cecay ko faˈinay cecay ko fafahi, oniya “tatosaay” wa tahadaˈoc a malacafay. w18.12 10-11 fiedac 2-4 fatac

Mahecaday ko pinanam ita to soˈlinay kimad, isatapang aca, mahapinangay ita to kalimlaan ko pidofdof to saali ni Yihofa. Ikorto, palidlid sa macakat kita i noˈadingoan, matongalay ko kacipinang to harateng ni Yihofa, cipinang to o manan ko kaolahan Ningra, o manan ko kapiliˈan Ningra, ato pinengneng Ningra to demak. Samanen mitodongay kita to pakayraan ni Yihofa a miharateng. Soˈlin minanam to harateng ni Yihofa a midemak, wa ira ko lipahak, kawra cowa ko madoloay a midemak nolatekay, samanen cowa ko malefotay tamdaw kita. Cipinangay kita to pinengneng ni Yihofa pakayni i makoracay a waywayan, o dafong ato hafay, o mitosilay, patelas misaka dademak to ˈirang ato romaroma a demak, alatek i, cowa ka cipinang to misamaanay hano ira ko hatiraay a harateng Ningra. Nikawrira, samaan kita matongal matongal a mafanaˈ tano harateng ni Yihofa a minengneng to demak hani? Micekiw to Kimad no Kawas, cipinang to harateng Ningra, dotimen ko pakayraan Ningra a miharateng ato misaˈicel a pahecad to harateng Ningra. w18.11 23-24 fiedac 2-4 fatac

Itiniay ci Hapakuk i pasangaray lintad a maˈorip, adadaay ko falocoˈ ningra, samanen, i taliyok ningra adihayay ko mararaway, mariˈangay a tamdaw. Miharateng ci Hapakuk: “Oniya tatiihay tamdaw ato demak, wa hacowa a mahererek hani? Hano ecaho pidemak ci Yihofa hani?” O maˈaraway ni Hapakuk sahtoay miroeroay ko finawlan to tamdaw, cowa ka sadafdaf ko waywayan. Awaayto ko pinang ni Hapakuk, mansa micangacang cingra ci Yihofaan misalof to demak. Harateng ni Hapakuk cowa ka ciharateng ci Yihofa to finawlan, cowa ko tatangsol a midemak sanay. Na iraay ko mahecaday a harateng iso toniya madimadiay a sikawdan han? O cowato ka pitiˈer ci Hapakuk ci Yihofaan, cowato pakasoˈlin to sakiˈok ni Yihofa hokira? Cowa ka hatira! O hinapec ato kacalemceman ni Hapakuk ci Yihofa ko pasowalan ningra cowa ko tamdaw, paihkalay konini soˈlin matoled cingra pakasoˈlinayho ci Yihofaan. Masomaday a maorat cingra, samanen cowa ka cipinang cingra, hano ecaho pidemak ko Kawas, hano palifaen cingra to hatiniay a roray. w18.11 14 fiedac 4-5 fatac

Tahidangen ni Yis koya mifotingay a Pitiro aci Antiri malo ‘milifokay to tamdaw a mifotingay’, ‘tangsolay misawad to tafokod’ cangra mikotod ci Yisan. (Matay 4:18-20) Manaokaniw, cowa ka sahto sa ko minanamay to Fangcalay Cudad a tamdaw mamihaen misawad to katayalan, samanen sowal no Fangcalay Cudad, o tamdaw iraay ko ˈinorong midimokos to paro no lomaˈ. (1 Timoti 5:8) Kawra, ˈalomanay minanamay to soˈlinay kimad a tamdaw wa mifalic to harateng no niyah minengneng to payci, pakahapinang to iraay ko mikikakaay to hafay ko kalimlaan a demak. Nengnengen ko milifetan no cecay kaemangay fafahiyan. Masalalomaˈay no kaˈorip ko pimali to kawefo ni Mariya, o patosokan ningra malo misiayay to kawefo, kadofah ko kaˈorip. Ikor, misatapangay ci Mariya minanam to Fangcalay Cudad, iraay ko sadama no Fangcalay Cudad to kaˈorip ningra. Mahapinangayho ni Mariya, cowa ko ngangaˈay micangacang to hafay ko niyah, a kamayan macakat i noˈadingoan. (Matay 6:24) Mihaenay, sawad hananay ni Mariya ko malo misasiayay to kawefo a patosokan, o lipahakay a misakafahay cingra no hatini, tada iraay ko epoc no kaˈorip sanay a miharateng. w18.11 5 fiedac 9-10 fatac

30 ko mihecaan, sawadan ni Yis ko misasayhoay a tayal, samanen mafanaˈay cingra to kalimlaan ko pasifanaˈay to soˈlinay kimad. Sowal ningra miocoran no Kawas cingra tayni hekal, milasil to ngaˈayay lihaf no Hongti Kitakit. (Matay 20:28; Luka 3:23; 4:43) O kalimlaan no kaˈorip ni Yis, wa mitenak to soˈlinay kimad, mitokelay cingra mirienang ko roma tamdaw toniya tayal. (Matay 9:35-38) Cowa ko sayho kita alatek, kawra o mitenakay to ngaˈayay lihaf a singsi kita. Masakalimlaan a tayal koni, mirienangay ko Kawas tonini, mihaenay o ‘kalacafayay to Kawas’ kita a matayal. (1 Korinto 3:9; 2 Korinto 6:4) Pakasoˈlinay kita ‘o sowal ni Yihofa o soˈlinay kimad’. (ˈOlic 119:159, 160) Mihaenay, pasoˈlinen ita to wa ngaˈay ko niyah, ‘matatodong ko pipasifanaˈ to sowal no Kawas.’ (2 Timoti 2:15) O kalimlaan a lalosidan ko Fangcalay Cudad, pasifanaˈ to tamdaw mafanaˈ ci Yihofaan, ci Yisan ato Hongti Kitakit no Kawas, mihaenay papadotoc kita pacakat to inaneng misaka dademak to Fangcalay Cudad. w18.10 11 fiedac 1-2 fatac

Kalafongohen no faˈinay ci Yis Kristo, mitodong to taˈarawan ni Yis, wa madoloto a mikangodo ko fafahi to faˈinay. (Ifiso 5:22-25, 33) Mikangodo ko fafahi to faˈinay wa patado cingranan a miharateng. Makakangodo ko wama wina, sidaˈit a macacada, ngaˈay patireng to taˈarawan no wawa. O roma, papasifanaˈ cangra to wawa, samaan patado to tao a miharateng. Tinakoen, ngaˈayay rikecen no wama wina ko wawa, aka misacikacikay i kasaˈopoan. Ano ˈorongen no wama wina ko wawa mirienang to cawmaˈ i, ngaˈayay fanaˈen ko wawa mipacaˈi to matoˈasay tamdaw, salakaten cangra a miala to kakaenen. Ano midemakay ko wawa to ngaˈayay a demak, patado mifohat to fawahan, pakahemeken cangra. Mihaen to demak wa ira ko ngaˈayay pifiyor cangranan, wa matanam nangra, ‘O paladaˈay ikakaay ko lipahak to milayapay.’ w18.09 29 fiedac 5-6 fatac

Aninito anca noikor, o sakayat no Hongti ci Yis Kristo wa ngaˈay padama kitaanan. Ngaˈayay haratengen ita mikitini faelohay limasmas malifokay no niyah ko maanan a epoc. Itini pakalomaˈay a pidoko i, ngaˈayay kiso milengo to malifokay no niyah a epoc, mikitini kafalic no saˈopo ato pitosil, wa mahapinang iso, mihaen to demak ngaˈayay pakalalok to niyah, ngaˈayho pakalalok to paro no lomaˈ. Ano cipinang kita to araaw noniya sakayat ato haepoc kitanan, wa makahito a mihakelong. Cipinangay kita, lowanen no likakawa ko mitepangan a cudad ngaˈayay mahoped ko adihayay payci, saka dademaken ko soci, pingpan wa ngaˈay padama to ˈalomanay tamdaw mitengil to ngaˈayay lihaf. Mitokelay ci Kristo kitaanan, misongilaˈ a misakadademak to dafong no likakawa no Kawas, mihaen ko demak ita, o midamaay ci Kristoan. Misarocod kita midopo to sakayat ni Kristo, wa ngaˈay paˈicel to pakasoˈlinay falocoˈ no tao, wa ngaˈayho micowat to kakelec i kalalaˈed. w18.10 25-26 fiedac 17-19 fatac

Minanam kita ci Yihofaan, madaˈmaˈ to matoleday a tamdaw, mihaen, wa mahapinang nangra to mitengilan ni Yihofa ko satolon nangra. (2 Korinto 1:3-6) Kawra, aka malefot ko saali to salikaka. Pakidem ko saali to salikaka tahira malefotay, cowa ko matatodongay, o sakatoled no niyah konini. Ngaˈayay i, pairaen ko maroyaroyay a pinengneng to salikaka. (Patnakay 7:21, 22) Hanaca, cowa pisaali ci Yihofa to madimadiay sikawdan Ningra tahira i malefotay ko demak. Ano todongen ita ko Kawas, wa makahi a misodod to caka lefot no tao. (Ifiso 4:2, 32) Hamaan tatiihay ko demak iso han ko matoleday a tamdaw, ihkalen a pakahemek ko nano demak nangra. Ano matengil no matoleday salikaka ko nai falocoˈay a pakahemek no mita, wa mapaˈicel cangra, wa pakayni i demak no niyah a lipahak. Hamaan palalinien ita ko matoleday salikaka to roma a salikaka, mihaen wa matongal ko hemek nangra a mihodop to Kawas.​—Kalatiya 6:4. w18.09 16 fiedac 16-17 fatac

Pakaynien ci Yisan ko sowal, noˈadingoan kakaenen mahawpay ko pidoedo to araaw no Kawas. Mahecad o kakomaen to dafong ngaˈayay marenec ato milifok to haled, midoedo to araaw no Kawas wa ngaˈay paˈicel kitaanan, matongal ko pakasoˈlin to tahadaˈoc maˈorip a hatokel. O citanengay tamdaw misaka dademakay to sapasifanaˈ no Kawas. (ˈOlic 107:43) Pairaay to taˈangayay epoc ko taneng, o sasaˈicelen ita a micangacang. Sowal no Fangcalay Cudad, o kihcod kaolahan no tamdaw awaay ko pakaliniay to taneng, samanen “o citanengay a tamdaw i, mafanaˈ to soˈlinay a tatodong no ˈorip ningra . . . O citanengayto, o mafanaˈayto a tamdaw i, o malemeday.” (Taneng 3:13-18) Somowalay ci Yis: “Mafanaˈ kamo tonini a demak. Saka, ano milaheci kamo tonini i, o malemeday kamo.” (Yohani 13:17) Ano padadotoc ko nisawawaan ni Yis mitoor to sapasifanaˈ ningra a midemak, wa milifok to tahaceremay a lipahak, wa padotoc cangra midoedo to sapasifanaˈ ni Yis, halo mitodong to taˈarawan ningra. w18.09 4 fiedac 4-5 fatac

Mikitini salimoˈot no Kawas ci Ataman aci Ifaan ngaˈay mahapinang, soˈlin itini i Itin, satapang edeng cangra aca tatosa, mitokelay ko Kawas cangranan patado miharateng to sakangaˈay no tao. Palemedan ni Yihofa ci Atam aci Ifa, mahofoc to teloteloc, ho miedef ko tamdaw i cikiw, halo pamatang to sera. (Satapangan 1:28) O caciharateng ci Atam aci Ifa to sakalipahak no teloteloc, mahecad o kaciharateng no misangaˈay Tatapangan to masangaˈay a pinaˈorip. O araaw ni Yihofa mamacowat ko Lakoing i polong no cikiw, palemed to tamdamdaw. O tada taˈangayay a tayal konini, misaaliay ci Ataman aci Ifaan malacafay to teloteloc a milaheci toniya demak ngaˈ ngaˈay. O malefotay a tamdaw kalimlaan ko kalacafay ci Yihofaan, ngaˈ macowat ko Lakoing ato malaˈosi ko araaw no Kawas. Mihaen, wa ngaˈay cangra milifok to paselaˈan no Kawas. (Hipray 4:11) Haratengen, oniya demak na papaira to taˈangayay a losiyang ato hemek no tamdaw. Patado ko tamdaw miharateng to sakangaˈay no tao a kinafalah to niyah, wa tatangongol ko karenec ato milifok to adihayay sapalemed. w18.08 18-20 fiedac 2, 8-9 fatac

Ano matongangan no tao kita sasamaan hani? Ci Yis ato paputisemay a Yohani na tahalifaay to mahaenay a demak. (Matay 11:18, 19) Samaanay ci Yis misiˈayaw to hatiniay cowa ka soˈlin a sakokot hani? Cowa ka pipalak cingra to toki ato ˈicel a mipaˈading to niyah, nao patalipaˈelalay to tamdaw mihapinang to nano demak ato sapasifanaˈ ningra. Mahaen o sowal ni Yis: ‘Citanengay a waywayan paihkalay to moecelay.’ (Matay 11:19) Mikitini toniya maˈoningay wa mananam ita ko maanan hani? Latekay, cowa ka sadafdaf ko sowal no tao kitaanan, mangalef milikafay kitaanan. Makalimay kita o niyah ko misaali to masadafdafay, mikorac to ngangan. Mihaenay, sasamaanto kita hani? Ano patenak ko tamdaw to cowa ka soˈlin a lihaf pakayni kitaanan, wa ngaˈay tano pakayraan ita a maˈorip pahapinang to tamdaw to soˈlinay a waywayan no mita. O malifetay ni Yis paihkalay, ira ko ngaˈayay a waywayan no Krisciyang, wa ngaˈay misawacay to mararaway ko sapakokot no tamdaw kitaanan. w18.08 6 fiedac 11-13 fatac

O sasinanoten i, ci Kain, ci Solomon ato i Sinay Lotok a Israil tamdaw, iraay ko toki nangra pasasiyor, patatikol. (Dmak 3:19) Cowa ka ranikay ci Yihofa a misawad to mararaway a tamdaw, tinakoen, misododan ni Yihofa ci Aron. Anini, patalipaˈelalay ci Yihofa kitaanan, pakaynian Ningra i Fangcalay Cudad, mitepangan cudad, sidaˈitay a limoˈot no Krisciyang a padama kitaanan. Tengilen ita ko limoˈot, wa ngaˈay pasoˈlin tatano sidaˈitay ko sapicada ni Yihofa kitaanan. O mikiriwiˈay a sidaˈit ni Yihofa ngaˈayay palaˈosi to makapahay araaw Ningra. (2 Korinto 6:1) Oniya sidaˈit pairaayto toki ita ‘mifalah to cowa ka ngodo a falocoˈ ato coos no hekal’. (Titus 2:11-14) Ano itiniho kita toniya lekakawa a maˈorip, o pisacecay a maolah ci Yihofaan wa tahacada to sapalifet alatek. Nanay fanekfek kita midopo ci Yihofaan! w18.07 21 fiedac 20-21 fatac

Sasamaan kita paˈicel to misaˈosian, micangacang to pihayda ni Yihofa hani? Haratengen ita ko tosa kalimelaan a demak. Saka cecay: Tatahadaˈoc ci Yihofa miharateng ato masemer to madimadiay mihodop Cingranan a tamdaw. (Hipray 6:10; 11:6) O “moecelay” ci Yihofa, cowa ko mamapawan to madimadiay a sikawdan Ningra ato madimadiay a demak nangra. ‘Mafanaˈay Cingra to lalan no moecelay tamdaw,’ mafanaˈay to sasamaan milidong cangranan paliyas to sapalifet. (ˈOlic 1:6; 2 Pitiro 2:9) Saka tosa, ci Yihofa tano cowa ka harateng ita a pakayraan mihayda kitaanan. Midemak ko roma tamdaw to ngaˈayay o sapaˈaraw aca to tamdaw, kawra, sowal no Fangcalay Cudad cowa ko mamalifok nangra ko sapalifon ni Yihofa, samanen tiya pakahemeken no tamdaw cangra i, malifokayto nangra ko polong a sapalifon. (Matay 6:1-5) O roma tamdaw terep sanay a midemak to ngaˈayay, ˈarawhan cowa ka haydaen no tamdaw, kawra, sowal ni Yis o Wama ningra wa ‘milonok a mihapinang’, mitoor to ngaˈayay waywayan nangra a palifon cangranan. w18.07 9 fiedac 8, 10 fatac

Awaay ko pinang ni Pitiro, cowa ka fanaˈ to o maanan ko hasowal ni Yihofa cingraanan. Toya toki, o miocoran ni Kornilius a sikawdan mikilimay ci Pitiroan, itini i sakayat no fangcalay saocor ci Pitiroan mihakelongay toya sikawdan tayra i lomaˈ ni Kornilius. Ano o potal aca ko minengnengan ni Pitiro a misaˈosi, tahadaˈocto cowa ko mamicomod i lomaˈ ni Kornilius. O Yutaya tamdaw cowa ka tayra i lomaˈ no ˈalafang a tamdaw. O maanan ko mifalicay ci Pitiroan, hato masawad ningra ko cilamitayto a misakakinihay harateng, makahi a micomod i lomaˈ ni Kornilius hani? Taˈangayay ko milingatan no maˈaraway ni Pitiro a mapolosi cingranan, malifokayho ningra ko sakayat no fangcalay saocor. Matengil ni Pitiro ko sowal ni Kornilius ato milifetan ningra, masemeray ko falocoˈ, itini pipatemer no fangcalay saocor sanay ko sowal: “Soˈlinay mahapinangto ako imatini ko nika caay ko misakakinihay ko Kawas. Ano masamaamaanayto a tamdaw no kasakitakit i, ano o mitaˈongay to Kawas ano o moecelay ko demak a tamdaw i, layapen no Kawas cingra.” (Dmak 10:34, 35) Oniya faelohay a pinengneng mahemekay ci Pitiro, taˈangayay ko pilingat cingranan. w18.08 9 fiedac 3-4 fatac

Soˈlin, cowa ko mamidemak kita to kaˈintehan no Kawas a demak, kawra itini kaˈorip adihayay a demakan, cowa ka ihekal ko saˈosi no Fangcalay Cudad. Ano mahaenay i, wa samaan a mafanaˈ kita to o maanan a demakan ko kaolahan no Kawas hani? Toniya demak, oya mapahatatanamay no Fangcalay Cudad a makapahay falocoˈ, wa ira ko sapadama. Taˈangayay ko olah ni Yihofa, mihadakay Cingra to adihayay a safalod no Fangcalay Cudad, mikayat to makapahay a falocoˈ no mita, sanay ko sowal Ningra: “Ci Yihofa Kako o Kawas iso, to saka ciepoc iso, pasifanaˈen Ako kiso, pahapinangen Ako kiso to rarakaten iso a lalan.” (Isaya 48:17, 18) Sarocoden ita ko falocoˈ a misimsim to safalod no Fangcalay Cudad, wa ngaˈay makayat ko makapahay falocoˈ, masalof a masangaˈ padama kitaanan matatodong ko misaˈosian. Safalod ngaˈayay o taˈenengan no soˈlinay kimad anca o tatooren a palinian ko tatodong, ngaˈayay sapiharateng anca o taadoan a midemak. Cipinang kita to safalod no Fangcalay Cudad, wa cipinangto harateng ni Yihofa mafanaˈ to samanay hano pafeli Cingra to sarikec kitaanan. w18.06 17-18 fiedac 5, 8-10 fatac

Itini pasataay a demak, o misakapotay ni Hiroti sapikilimaw to dangoc ni Yis, samanen ano manaˈay ci Yis a pasata, wa ngaˈay pakokoten nangra ci Yis to mitowakangay to mirikecay. O roma, ano mihai ci Yis a pasata, o mikotoday ci Yisan a tamdaw, wa miliyasto cingranan, sanay ko harateng nangra. Misinanotay ci Yis, itini nopasataay a demak mitafoay to misatenokay. Mafanaˈay ci Yis to maˈanofay a waywayan no milisataay itiya, kawra cowa ka ciharateng cingra to sapisakahemawaw no tamdaw to kalimelaan a demak, edeng o Hongti Kitakit no Kawas ko sasoˈlin a misaysay to pasangaray. Patirengay ci Yis to taˈarawan no nisawawaan, soˈlin hato ngaˈayay ko harateng no mirikecay, kawra cowa ko ngangaˈay ko Krisciyang mikapot to mirikecay, oha mamitala to Hongti Kitakit no Kawas, pasoˈlin to mamisalof ko Kawas to tatiihay a demak. Mihaenay, wa mitafo to misatenokay ko Krisciyang, pakayni cowa ka sadafdaf a demak, cowa ko mamihadak to harateng no niyah, cowa ko mamilikaf. (Matay 6:33) ˈAlomanay Misawacayay Tamdaw ni Yihofa na maolahay to mirikecay a demak, kawra malaˈosiay ko pisalof to harateng no niyah. w18.06 6 fiedac 9-11 fatac

Cowa ko malafoay aca a demak ko sapikayhid ni Satan to coyoh, pafeliayho to fadangalan no coyoh a mikowan to tamdaw. O nihalakaan ni Satan, o sapicongedaw to kasadak no ‘teloc no fafahiyan.’ (Satapangan 3:15) Ano samaanto i, mitefadan ni Yihofa ko Taˈangayay a Lenlen itiya, palakisaw to nihalakaan ni Satan ato tatiihay coyoh. O malafoay a demak ato misatakalaway a harateng taˈangayay ko pifiyor to tamdaw. Oya mikotoday ci Satanan a coyoh, na mihodopay to Kawas to walwalan a miheca, soˈlin ngaˈayay ko kitiraan nangra, kawra pakihater hananay ko mararaway a coos cilamit i falocoˈ. Mahecaday, o cecay Krisciyang pinaayto polo miheca a dademak i likakawa no Kawas, soˈlin itiniay makoracay noˈadingoan a kitiraan cingra, o cikaditay a coos wa cilamit i falocoˈ haratek. (1 Korinto 10:12) Mihaenay, wa padotoc kita mikinsa to falocoˈ no niyah, mifalah to malafoay a harateng ato misatakalaway a waywayan!​—Kalatiya 5:26; Kolosay 3:5. w18.05 25 fiedac 11-12 fatac

Ci Pawlo pakayni caka olah no Yutaya tamdaw to lihaf no Kitakit no Kawas matoleday ko falocoˈ. Kawra, cowa ka sawaden ni Pawlo cangra. Pakayni i pinengneng ni Pawlo to Yutaya tamdaw, sanay ko sapatikami ningra to Lomaay a Krisciyang: “Salikakaaw, o longoc no falocoˈ ako a mitolon i Kawas to saki Israil i, o sapaˈoripaw no Kawas cangraan. Mipawacay kako to lalok nangra to saki Kawas.” Nikawrira, caay ko nano fanaˈ nangra konini a lalok. (Loma 10:1, 2) Padotocay a mitosil ci Pawlo to Yutaya tamdaw, samanen, “o longoc no falocoˈ ako a mitolon,” sanay cingra. Nai falocoˈay cingra a mitokel to sakalidongaw no Yutaya tamdaw. (Loma 11:13, 14) Micangacang cingra to Kawas, padama to Yutaya tamdaw micada to lihaf no Kitakit no Kawas. Sanay ko sowal ni Pawlo: “Mipawacay kako to lalok nangra to saki Kawas.” Maˈaraway ningra ko ngaˈayay no Yutaya tamdaw, pasoˈlin cangranan ano micada to matatodongay sakayat, wa ngaˈay malo fanekfekay a Krisciyang, samanen mahecaday ko pakayraan ni Pawlo. w18.05 13 fiedac 4 fatac; 15-16 fiedac 13-14 fatac

Kita o cecacecay tamdaw oha mamisinanot to pakayraan ato saali no roma tamdaw, mahaen o nano sowal ni Pawlo to Hiprayay a Krisciyang: “Orasaka, fiyacen ko marorayay a kamay ato rarimaay a tosor namo. Kararid a pakayra i moecelay a lalan a romakat. Ta caay ka ngalef ko piˈiw no waˈay iso. Ta maadahto ko waˈay iso.” (Hipray 12:12, 13) Mihaenay, kita o polong a tamdaw, mahaopay ko kaemangay tamdaw, wa ngaˈay somowal a pakalalok to roma tamdaw. Pakalalokan ni Pawlo ko Filipiay a salikaka: ‘Ano pakayniay kamo ci Kristoan a mapakalalok, mahinom i olah, itini noˈadingoan a malacacawmaˈ, ira ko rihaday no falocoˈ i, o mamisaheci a palipahak i takowanan. Ano mihaen i, palecaden ko harateng namo, palecaden ko olah, cecayen ko harateng, cecayen ko falocoˈ. Itini i kihecod a demak, aka halicongis, aka pisaidahidahi, sapoeneren ko falocoˈ, ikakaay ko tao to niyahan han ko pinengneng. Aka pisikor tono niyah aca a demak, sikoren ko demak no tao.’​—Filipi 2:1-4. w18.04 22-23 fiedac 10, 12 fatac

Pakaynian ni Yihofa ci Yisan padama kita a mihepol to raraw ato patay, pakayniay sakangaˈayaw ita misaka dademak to ˈorip a mihodop Cingraanan. Sakaecaaw kita a mikasimaan a misaka dademak to pasalat, sangaˈayay pakayraan i misarocod to falocoˈ, mirienang to noˈadingoan a demak, mihaen kita ecato ka fiyor no pinangan no hekal a micangacang to notekedan a saaroˈan. (Kalatiya 5:16) Tinakoen, itini i lintad ni Nowa ato paro no lomaˈ ningra, matomesay ko mariˈangay ato malafoay a demak, kawra cowa ka hecad cangra to taliyokay a tamdaw, misamacay micangacang to notekedan a patosokan ato coos. O paro no lomaˈ ni Nowa samaanay eca ka fiyor no hekal tamdaw hani? Misamacayay cangra to patorodan ni Yihofa a demak. Patirengay cangra to tamina, misaday to kakaenen no niyah ato ˈaˈadopen, mirikecayho to romaroma tamdaw. Itini Satapangan 6:22 sanay: ‘Mihaenay ko demak ni Nowa, kihecod limoˈot no Kawas cingranan, mitooran ningra a midemak.’ Telocto, milakowitay ci Nowa ato paro no lomaˈ to Taˈangayay Lenlen.​—Hipray 11:7. w18.04 10-11 fiedac 8, 11-12 fatac

Ci Satan ato tatiihay coyoh cowa ko pisaka dademak aca to mirikecay, misaka dademakayho to mararaway pidoyongan ato lekakawa no misasingdiay a miorat to “polong no tamdaw i hekal.” (Paˈarawan 12:9) Misaka dademakan ni Satan ko mararaway pidoyongan miresap to pakayniay ci Yihofaan a kaniw. O roma, sapihimedaw ci Satan to ngangan no Kawas. (Yirimiya 23:26, 27) Telocto, o soˈlinay ko harateng a tamdaw midokoay ko niyah to Kawas sanay, ˈarawhan o midokoay to tatiihay a coyoh. (1 Korinto 10:20; 2 Korinto 11:13-15) Pakaynianho ni Satan i lekakawa no misasingdiay miresap to kaniw. Tinakoen, micangacang to hafay wa ira ko hemek sanay papiharateng to tamdaw ko lekakawa no misasingdiay. (Taneng 18:11) Pakasoˈlinay ko ˈalomanay tamdaw toniya kaniw, hakelong no ˈorip malakoliay no “hafay,” eca ka pihodop to Kawas. (Matay 6:24) Telocto, soˈlin na maolahay ko tamdaw to Kawas, o maolahay to hafay a falocoˈ, “miˈcoay” to maolahay to Kawas a falocoˈ.​—Matay 13:22; 1 Yohani 2:15, 16. w18.05 23 fiedac 6-7 fatac