Saka 8 Folad

O kamok no saˈopo patalipaˈelalay kitaanan, patadoay ci Yihofa aci Yis kitaanan midemak to maanan. Tada miakoˈiday kita, mihaenay wa misaˈicel a mitodong to taˈarawan ni Yis to romiˈamiˈad. (2 Korinto 5:14, 15) Roma i, miakoˈiday kita to kinafalah ni Yihofa to Wawa Ningra, mansa mapakalalokay kita a pakahemek Cingranan, mihadak to nai falocoˈay a sapacaˈof i saˈopo. Sasamaan kita paihkal to tangongolay ko olah no niyah ci Yihofaan aci Yisan hani? O cecay pakayraan i, makahi a kinafalah to pinapina demak. Tinakoen, o saˈopo to kalo a romiˈad, itiniay i dadaya, malotayayto ko ˈalomanay; o roma saˈopo, itiniay i pilipayan, o pipahanhanan no ˈalomanay a toki. Ano maroray kita a mirienang to saˈopo, wa maˈaraw ni Yihofa ko pisaˈicel ita han? Hano eca! Maolahay kita ci Yihofaan, miremoay to pasangaray a mirienang to saˈopo, maˈaraway ni Yihofa, misalimlaay Cingra to kinafalah no mita.​—Marko 12:41-44. w19.01 29 fiedac 12-13 fatac

Tahalifaay ci Yis to masiˈayaway ita a sapalifet. Tinakoen, lomahaday ci Yis itiniay i manikaway a lomaˈ. Minanamay cingra i midipotay a wama ci Yosifan to aretengay tayal. (Matay 13:55; Marko 6:3) ˈAyaw no misatapang ci Yis a mitosil, maedeng mapatayayto ci Yosif, mafanaˈay ci Yis to kasomad no malahdaway ko salawina a demak. Mafanaˈayho ci Yis, eca ka lecad ko pihakelongan no paro no lomaˈ, samaanay ko pakayraan. (Yohani 7:5) Tahalifaay ci Yis toniya demak, mansa ngaˈayay mihapinang to pisiˈayaw ita to sapalifet ato harateng no mita.Mikitini midemakan ni Yis a kafahkaˈan a demak, mahapinang ita to siniˈadaay ci Yis to tamdaw. Coko pakayniay ˈinorong ko pidemak to kafahkaˈan, o pakayniay “sasiniˈada sa ci Yis i cangraan.” (Matay 20:29-34; Marko 1:40-42) Tinakoen, na paliyasan ningra ko cecay madoˈengay i ˈalomanay tamdaw a miadah, na patikolan ningra paˈorip ko edengan wawa no cecay maponengay.​—Marko 7:32-35; Luka 7:12-15. w19.03 16 fiedac 10-11 fatac

ˈAyaw no patay ni Yis, iraay ko taˈangayay a saroero ningra, mafanaˈay cingra, edengan madimadi patafang to ˈorip, wa ngaˈay malifok no tamdaw ko tahadaˈocay a ˈorip. (Loma 5:18, 19) Mafanaˈayho ci Yis, o waywayan ningra malingatay ko paˈdil to Wama. (Yopu 2:4) Oya salikoray a lafi, macacoliayho ko tarokos to ‘o cima ko satadamaanay’, ato ‘malacongisay’ cangra. Kawra, cowa ka ngolaw ci Yis. Miliyawayho cingra tano siniˈadaay, tanoktokay a pakayraan, damsayay a pasifanaˈ cangranan, to samaanen misalof to tatiihay a waywayan, ikor pakahemekay ci Yis to nisawawaan madimadiay midama cingraanan. (Luka 22:24-28; Yohani 13:1-5, 12-15) Ngaˈay todongen ci Yis, soˈlin ira ko saroero, mitafoayho to madaˈmaˈay a waywayan. Haratengen, o sowal ato midemakan ita alatek pakararaway to tao, ano mihaen ko harateng ita i, wa madoloto a midoedo to limoˈot ni Yihofa. (Taneng 12:18; Yakop 3:2, 5) Kita i, parariden pakahemek to kangaˈayan no tao.​—Ifiso 4:29. w19.02 11-12 fiedac 16-17 fatac

Midipotay ko sarikec to tamdaw caka mapatelas a makokot no tao. O mapakokotay tamdaw iraay ko fadangalan mafanaˈ to cima ko mikokotay cingranan. (Limoˈot 19:16-19; 25:1) Roma, awaawasa tatosa ko misawacayay tamdaw, ngaˈ masaˈosi ko raraw no makokotay. (Limoˈot 17:6; 19:15) Ano cecay ko pakaˈaraway to raraw, soˈlin cowa ko mamasaˈosi ko raraw, kawra wa maliyas ko raraw no niyah cowa ka saan, samanen mafanaˈay ci Yihofa to raraw ningra. Kihcod a demak ni Yihofa o masadafdafay, patirengay to malefotay taˈarawan ita. Wa palifonen Ningra ko madimadiay midofdof to palinian Ningra a tamdaw, wa mitefoc to kasimaanay misaka dademak to fadangalan a tamdaw. (2 Samuil 22:21-23; Icikil 9:9, 10) O roma tamdaw mararaway ko demak, cowa picada to sasayfang. Kawra, ano maraod ko misaˈosian ni Yihofa a toki, oha sasawkiten Ningra. (Taneng 28:13) Ano eca ka pasasiyor ko mararaway tamdaw, maraod ko toki wa mafanaˈto cangra, “Tada o katalawan ita ko nipitefoc no maˈoripay a Kawas i titaanan.”​—Hipray 10:30, 31. w19.02 23-24 fiedac 20-21 fatac

Ci Mosi o mihalamhamay to sakayat ni Yihofa a madimadiay sikawdan, sowal no Fangcalay Cudad cingranan “matiya o pakaˈaraway to caay ka ˈaraw a Kawas ko nika kodait no falocoˈ ningra.” (Hipray 11:24-27) Miliyas ko Israil tamdaw to Icip caka tosa folad, ˈayaw no tahira i Sinay Lotok cangra, mifekaday ko pakidemay a demak. Ngaliwngiway ko Israil tamdaw to kaawa no nanom. Tada maketeray cangra, ngaliwngiwayho ci Mosian, mansa pasayra ci Mosi ci Yihofaan a micangacang: “Samaanen ako konini a finawlan? Sapitekolan sa cangra i takowanan to fakeloh a mipatay!” (Kasadakan 17:4) Pacaˈofan ni Yihofa ci Mosi, pafeli cingranan to ihkalay a sakayat. Papitatiwan ni Yihofa ci Mosi to cokor, misetiˈ to fakeloh no Horip a lotok, powal sanayto ko nanom nai fakeloh. Sowal no Fangcalay Cudad: “Doedo han ni Mosi konini a demak a paˈaraw i kakrikridan no finawlan.” Irato ko nanom no Israil i, masaysayayto koniya demak.​—Kasadakan 17:5, 6. w18.07 13 fiedac 4-5 fatac

O roma pakayraan ni Yihofa paˈicel kitaanan, pakaynian i kasakopang a pakalalok kitaanan. Ano tangongolay ko olah ita ci Yihofaan, wa tangongol ko olah to salikaka, misarocod to ˈicel no niyah, padama cangranan i noˈadingoan ato no falocoˈan a patanektek cangranan. (1 Yohani 4:19-21) Pakalalokay ko tarokos ci Pawlo to Krisciyang, sanay ko sowal: “Orasaka, haenento o demak namo anini ko nika sasipaˈicel namo a masasipadama.” (1 Tisalonika 5:11) Cowa ko malohemay malitengay aca ko mamihinom to tamdaw​—o polong a Krisciyang wa ngaˈay mitodong to taˈarawan ni Yihofa aci Yis, padadotoc a mihinom ato pakalalok to salikaka. (Loma 15:1, 2) O roma salikaka matoleday ko falocoˈ, misaaliay cangra to piadah no ising ato cemel. (Luka 5:31) O malohemay malitengay ato roma tamdaw mafanaˈay to​—cowa ko ising ko niyah a miadah tono falocoˈan a adada, kawra wa ngaˈay mihadak cangra to sadama, “paˈicelen ko matoleday a tamdaw. Padamaen ko tadancaay a tamdaw. Kao kodaitay ko falocoˈ namo to saki cangraan a maemin.”​—1 Tisalonika 5:14. w18.09 14-15 fiedac 10-11 fatac

Matongal ko kafanaˈ ita ci Yihofaan, wa matongal ko pitiˈer Cingraanan. Samaan kita ngaˈ, matongal ko kafanaˈ ci Yihofaan hani? Micekiw to Fangcalay Cudad to romiˈamiˈad ato midotim to micekiwan lalakaw. Maˈoningay no Fangcalay Cudad to samaanay ci Yihofa a midipot to finawlan Ningra isalakat, oniya lalakaw wa ngaˈay paˈicel to pakasoˈlin no falocoˈ ita, padama kitaanan pakasoˈlin to mamidipot Cingra kitaanan anini. Tano fangcalay a sowal ko pitadtad ni Isaya to sasamaan ci Yihofa a midipot kitaanan. Sowal Ningra mahecaday ci Yihofa to pakaenay a tamdaw, mahecaday o tofor a siri ko sikawdan no Kawas. Somowalay ci Isaya pakayni ci Yihofaan: “O mamatiya o pidipot no pakaenay to masafelaway a siri ko nipidipot no Tapang to finawlan Ningra. O sasaˈopoen Ningra ko tofor a siri a miˈafofo.” (Isaya 40:11) Ano mahapinang ita ci Yihofa tano ciˈicelay a fadangalan a mitakec kitaanan i, oha rarihaday ko falocoˈ no mita. Pakayni sapadamaaw tisowanan rihaday ko falocoˈ a misiˈayaw to pasangaray, songilaˈen a misimsim ko aniniay a sinael, mihaen wa ngaˈayto tanektek kita a misiˈayaw to masakenaay a sapalifet i ˈaˈayaw. w19.01 7 fiedac 17-18 fatac

Misaˈicelay kiso milaheci to noˈadingoan a patosokan han? Alatek misaˈicelay kiso miˈosi to Fangcalay Cudad to romiˈamiˈad, anca misalof to pipaihkal ato sapasifanaˈ a inaneng. Ano o mananto ko patosokan iso, ano maˈaraw iso ko ngaˈayay minaroˈan anca pakahemek ko tao to nika cakat iso, samanay ko harateng iso hani? Maedeng masaloay, mahemekay kiso. Mahemek kiso samanen mitodongay kiso ci Yisan, misaˈicel isalakat a midofdof to araaw no Kawas. (Taneng 27:11) Ano pasayra kiso i noˈadingoan a patosokan talaˈayaw, o mamasalo ko falocoˈ, samanen o nano demak iso, cowa ko mamalahorac. Sowal no tarokos ci Pawlo: ‘Katanektek a tomireng, kararid midemak to demak no Tapang, samanen mafanaˈay to cowa ko mamalahorac ko nano roray namo.’ (1 Korinto 15:58) Ano palalinien, micangacangay to ngangan ato hafay ko hakelong no ˈorip hato malaˈosiay nengnengen, salikor awaay ko kapo.​—Luka 9:25. w18.12 22 fiedac 12-13 fatac

O misowalan ni Tafiti o noikoran a romiˈad, wa mitoor ko tamdamdaw to moecelay a palinian no Kawas maˈorip i sera. (2 Pitiro 3:13) Paˈayaway ko Isaya 65:22: “O mamatiya o nika kakayaˈ no ˈorip no kilang ko nika kakayaˈ no ˈorip no finawlan Ako.” Paihkalay konini to hahalafin ko ˈorip no tamdaw. Paˈarawan 21:1-4 sanay, o dadimokosen no Kawas ko finawlan Ningra, palemed cangraanan, o cecay a lemed wa itini moecelay faelohay hekal “caayto ko mamapatay,” sanay. Malahdaway ni Atam aci Ifa ko Lakoing, kawra iraayho ko tokel ita maˈorip itira mikiˈokay ko Kawas to papalemed to polong a tamdaw, patemeran Ningra ci Tafiti paˈayaw to mamilifok to sera ko misapoeneray ato moecelay tamdaw, tahadaˈoc maroˈ i sera. (ˈOlic 37:11) Pakaynianho no Kawas ci Isayaan paˈaraw kitaanan to makapahay hanoikor, milongoc kita to saka laˈosiaw no hatokel. (Isaya 11:6-9; 35:5-10; 65:21-23) Hacowa a malaˈosi hani? Itiya kalaˈosian no sakiˈok ni Yis toya mararaway tamdaw a romiˈad. (Luka 23:43) Wa ngaˈay kiso maˈorip i Lakoing! w18.12 7 fiedac 22-23 fatac

Wa ngaˈay kita misongilaˈ a miliyas to harateng no hekal han? Ecato, samanen itiniay kita toniya hekal a maˈorip, awaawa sa mingataay to harateng no hekal. (1 Korinto 5:9, 10) Tinakoen, itini i pitosilan, marariday a mitengil to mararaway sasowalen, kawra cowa ko haharateng han ita kora mararaway sasowalen, cowa ko hahaien ita. Mansa pahecaden ita ci Yis, tangsol sa miconged to harateng ni Satan. Cowa konini aca, misaˈicel kita miliyas to harateng no hekal. Sasamaan kita ngaˈ, saka ecaaw piingid to harateng no hekal hani? O pakayraan i, sasinanoten a mipiliˈ to widang. Palimoˈotay ko Fangcalay Cudad kitaanan, aka mararid a micawmaˈ to cowa pidoko ci Yihofaan a tamdaw, ho eca ka madenga nangra. (Taneng 13:20; 1 Korinto 15:12, 32, 33) Ano liyasen ita ko lalakaw no sinkalong, mariˈangay anca maˈodangay a lawla, ecato ka warak no ‘pacoliay to sifanaˈ no Kawas’ a harateng.​—2 Korinto 10:5. w18.11 21 fiedac 16-17 fatac

Sasamaan kita wa ngaˈay makelec ko safaked no soˈlinay kimad, midoedo to soˈlinay kimad a maˈorip hani? O cecay pakayraan i, saˈicelen ita a pasifanaˈ ko tamdaw to soˈlinay kimad. Mihaen ko demak wa ngaˈay mikelec mimetmet to funus no fangcalay saocor, oya ‘kimad no Kawas’. (Ifiso 6:17) Kita o cecacecay tamdaw wa ngaˈay pacakaten ko sapasifanaˈ a inaneng, ‘matatodong ko pisaka dademak to soˈlinay kimad.’ (2 Timoti 2:15) Saka dademaken ita ko Fangcalay Cudad padama to tamdaw miˈaca to soˈlinay kimad ato mifalah to mararaway a sasowalen, mihaen o palomaay to kimad no Kawas i falocoˈ nangra, wa padama kitaanan misaˈosi to falocoˈ midoedo to soˈlinay kimad a midemak. O soˈlinay kimad, o kalimlaan a sapatelong ni Yihofa kitaanan, oniya sapatelong malifokay ita ko tada ciepocay a dafong, o tangongolay kalawidang to kakarayan a Wama. Pasifanaˈay ko Wama to soˈlinay kimad kitaanan, mikiˈokay Cingra to tatahadaˈoc pasifanaˈ kitaanan, mihaenay haw i, adihayayho ko mamananam ita. Mansa, sakaretengen ita ko soˈlinay kimad, mahecad to kalimlaan a ˈodo. Dotocen ita ‘miˈaca ko soˈlinay kimad’, aka a paˈacaen.​—Taneng 23:23. w18.11 8 fiedac 2 fatac; 12 fiedac 15-17 fatac

O mitosilay a demak ni Nowa iˈayaw no Lenlen mahawpay ko pirikec to tamdaw mangataayto ko sakalaˈafo. Sinanoten samaanay ko sowal ni Yis: “Iˈayaw no kalenlenan a romiˈad i, komaen, mitaˈowak, cifaˈinay, cifafahi ko tamdamdaw tangasa i picomodan na Nowa i tamina. Tangasa i nika iraan no Lenlen a mikeric i cangraan a maemin i, caay ka fanafanaˈ cangra. O mamahaen ko nipiliyaw noya tamdaw a tayni.” (Matay 24:38, 39) Soˈlin caka pisikol ko tamdaw to sarikec ni Nowa itiya, o madimadiay a Nowa kamayan padotoc milasil to mikitiniay ci Yihofaan sakalaˈafo a lihaf. Anini, milasil kita to lihaf no Hongti Kitakit, pairaay to hatoki no tamdaw cipinang to araaw no Kawas i tamdaw. Mahecaday kita ci Yihofaan, makalimay micada ko tamdaw to soˈlinay kimad a ‘maˈorip’. (Icikil 18:23) Pakalomalomaˈ kita mitosil anca itini kaˈalomanan a misawacay i, wa misaˈicel pasifanaˈ to tamdaw mangataayto ko Hongti Kitakit no Kawas, hanaca wa palaˈafo to tatiihay a hekal.​—Icikil 3:18, 19; Taniil 2:44; Paˈarawan 14:6, 7. w18.05 19 fiedac 8-9 fatac

Itini roma kitakit ato kilac micongeday to noˈadingoan a tayal. Ano mahaen ko pakayraan, misaali ko mirikecay tisowanan somowal to pakayniay salikaka a demak i, wa samaan ko caˈof iso hani? Wa fanaˈen iso ko “kihcod” a demak han? Haratengen, tiya milicay ko tapang no Loma ci Yisan i, cowa pacaˈof to kihcod a demak. Mihaen ko demak ni Yis mahecaday to safalod no Fangcalay Cudad, “ira ko katomerepan, ira ko kacaciyawan a romiˈad.” (Patnakay 3:1, 7; Matay 27:11-14) Mihaenay, ano mahaen ko pakayraan wa misinanot kita, aka a pairaen ko katalawan no salikaka. (Taneng 10:19; 11:12) Ora mararaway ano o salawina anca o ngaˈayay widang iso, wa samaan ko demak iso hani? O soˈliˈlinay ko hasowal. (Taneng 21:28) Wa soˈliˈlin kita mihadak to kafanaˈan a demak, cowa ka ngaˈay miliflif anca miraraw to mifekaday a demak. Soˈlin a mafanaˈ ko malohemay malitengay to mifekaday a demak ngaˈ, mihadak to matatodongay a sadama, padama to mararaway a tamdaw misalof to kalawidang ci Yihofaan.​—Yakop 5:14, 15. w18.10 10 fiedac 17-18 fatac

Samaan kita paihkal to olah, pakalalok to matoleday ko falocoˈ a salikaka hani? O cecay pakayraan, o misongilaˈ a mitengil. (Yakop 1:19) Patado kita to tao miharateng, misongilaˈ a mitengil o paihkalay to olah. Saka fanaˈaw to matoleday harateng no tao, ngaˈayay damsay ko pilicay. Soˈliˈlin ko waywayan, lopayˈay ko pising, wa ngaˈay mihinom to matoleday a salikaka. Ano pasowal to maharatengay ko matoleday a salikaka i, pairaen ko mihadidiay, hamaan ketonen ko sowal nangra, mihaen matongal ko kafanaˈ ita to harateng nangra. Wa pakasoˈlin ko matoleday salikaka kitaanan, madoloto micada to sapakalalok ita a sowal. Ano mafanaˈ cangra to nai falocoˈay ita a olah, wa milifok to sasayar. w18.09 14 fiedac 10 fatac; 15 fiedac 13 fatac

O miˈacaay to soˈlinay kimad a tamdaw wa misadak to toki. Ano mitengil to lihaf no Hongti Kitakit, micekiw to Fangcalay Cudad ato mitepangan cudad, micada to pipacekiw to Fangcalay Cudad, misaday to lalakaw no saˈopo anca mirienang to saˈopo, oha mamipalak to toki. Mihaenay, wa mikitini kita i cowa ko kalimlaan a demak ‘miˈaca’ to toki. (Ifiso 5:15, 16) Wa hakowa ko papalaken a toki cipinang to taˈeneran a kimad no Fangcalay Cudad hani? Awaay ko masaˈosiay a caˈof nonini. Nikawrira, o taneng ni Yihofa, pakayraan a dademak ato waywayan Ningra, awaay ko tolas ita a misolap. (Loma 11:33) O saka cecay mitepangan a Mikecolay, patinakoay to “cecay hana” ko soˈlinay kimad, sanay ko lalakaw: “Hamaan masaloen to cecay a hana no soˈlinay kimad. Ano cecay ko hana maedengto, nimaan adihay ko hana hani. Ka padotoc a mipitin, mikilim.” Soˈlin wa awa ko tolas no toki ita noikor, pakayniay ci Yihofaan a sifanaˈ cowa ko mamaemin ita a minanam. Mihaenay, songilaˈen misaka dademak ko toki, miˈaca to soˈlinay kimad. w18.11 5 fiedac 7 fatac

‘Mafanaˈ to saali’ no fafahi malacafay a maˈorip​—‘mafanaˈ to saali’ ngaˈayay hongyaken to patadoay miharateng ato cipinangay, o cipinangay ato patadoay miharateng, o malalitingay. (1 Pitiro 3:7; ato roma pihongyak.) Mafanaˈay ko faˈinay to o cafay ningra ko fafahi, soˈlin adihayay ko kasasiroma, kawra caay pakarini cowa ka saan. (Satapangan 2:18) Mihaenay, wa miharateng ko faˈinay to nafalocoˈan no fafahi, mikangodo cingranan, hato kalimlaan cingra saan ko piharateng. O patadoay to fafahi miharateng a faˈinay, ano kalacafay to roma fafahiyan i, wa miharateng to nafalocoˈan no fafahi. Cowa ko mamikalona to roma fafahiyan, cowa ko aira ko makalimay a harateng. O mahecaday a safalod ngaˈayay saka dademaken i soci ato sapicawmaˈ a wangcan. (Yopu 31:1) Oha mamadimadi ko faˈinay i kihcod a demakan to fafahi, mihaen ko demak ningra, cowa ko kaolah aca to fafahi, pakayniay kaolah to Kawas, hanaca ˈinteh to kaˈintehan no Kawas a demak.​—ˈOlic 19:14; 97:10. w18.09 29 fiedac 3-4 fatac

Misaka dademak kita to Kimad no Kawas, hano o sapalifet konini? O cecay lalangian i, ano matatodong ko demak no tamdaw, misaaliay to misapoeneray a capeling, kawra sapaihkalaw to misapoeneray, cowa ko madoloay. Itini ‘saikoray romiˈad’, i taliyokay ita a tamdaw paihkalay to “o mamalamisatekeday ko tamdaw, o maˈanofay to payso, o pasenengay, o misatakaraway ko falocoˈ, cowa pakaˈmet to tireng,” mahaenay tatiihay a harateng. (2 Timoti 3:1-3) Matenakay ko safanaˈ ato miowingay ko tamdaw to misatekeday a waywayan, o papotal no Krisciyang cowa pihai to hatiniay waywayan alatek, kawra i falocoˈ masemeray cangraanan. (ˈOlic 37:1; 73:3) Wasaan ko harateng no cecay tamdaw alatek: “Isalakat miharateng to sakangaˈay no tao, o masaka limlaan han? Ano mahaen ‘o sasafaay’ ko demak ako, wa mikangodo ko tao takowanan han?” Ano mafiyor no misatekeday harateng no hekal kita i, wa mipalak to kalalaˈed ita to salikaka ato saaroˈan ita malo Krisciyang alatek. Kawra, ano micekiw kita to ngaˈayay taˈarawan no madimadiay sikawdan i Fangcalay Cudad, ato mitodong cangranan, wa milifok to sapalemed no Kawas. w18.09 3 fiedac 1 fatac

ˈAyaw no masangaˈ ko kihcod i, edeng ci Yihofa ko materekay, kawrira cowa ko niyah aca ko maharatengay ni Yihofa, misangaˈay Cingra to coyoh ato tamdaw o citanengay a pinaˈorip, pafeli cangranan to kalimlaan a ˈorip, ‘lipahakay a Kawas’ ci Yihofa maolahay paladaˈ to ngaˈayay a dafong. (1 Timoti 1:11; Yakop 1:17) Maolahay Cingra mahemek kita, mansa pasifanaˈ kitaanan makahi a hinapaladaˈ. (Loma 1:20) Palecadan no Kawas to tireng Ningra misangaˈ to tamdaw. (Satapangan 1:27) Tatodong i, misangaˈan kita ngaˈay paihkal to capeling Ningra. Ano makalimay kita mahemek ira ko epoc no kaˈorip, wa minanam to taˈarawan ni Yihofa, ciharateng ato hinapaladaˈ to tamdaw. (Filipi 2:3, 4; Yakop 1:5) Mihaen ko demak ita, hano aira ko hemek hani? Samanen misangaˈ ci Yihofa kitaanan wa ngaˈay mikitini pipaladaˈ milifok to hemek. Soˈlin cowa ko malefotay kita, kawra wa ngaˈayho mitodong to hinapaladaˈay a harateng ni Yihofa. Mitokelay ci Yihofa kitaanan mitodong Cingranan, mansa mahemek Cingra pakaˈaraw kitaanan hinapaladaˈ to tamdaw.​—Ifiso 5:1. w18.08 18-19 fiedac 1-2, 4 fatac

O nisawawaan ni Kristo coko pisinanot aca to sowal ni Yis, dofdofayho to limoˈot ningra a midemak. Cowa ka calemcem pakayni i “saki ˈorip.” (Luka 21:34) Ano samaanto ko pakayraan, hakowaay ko roray, madimadiay cangra ci Yihofaan. O roma pakayraan a mitengil midofdof ci Yisan i, o malacafay to mikayatay a salikaka a matayal. (Hipray 13:7, 17) O likakawa no Kawas ingata a miheca, adihayay ko mafalicay a limasmas, mahawpay ko pakayraan ato lalosidan no mitosilay, limasmas no saˈopo, patireng, misangaˈ to Hongti Kitakit kasaˈopoan a pakayraan. Tano ciolahay ko likakawa no Kawas misongilaˈ a misimsim, ikor ngaˈ pafeli to sakayat kitanan, tada miakoˈiday kita cangraanan. Ano tooren ita ko limasmas no likakawa no Kawas a midemak, wa parahekeren ni Yihofa kita. w19.03 10-11 fiedac 11-12 fatac

Ano o cecay lihaf ano cowa ka soˈliˈlin a maemin i, wa pakararaw to tao. Nengnengen ita iti:yaho, itiniay i kaetip no Yortan ˈAlo a Israil tamdaw, mifekaday ko maanan a demak. (Yosuwa 22:9-34) Matengilay nangra ko cecay lihaf, oya itiniay kawali no Yortan ˈAlo a Israil tamdaw, patirengay to taˈangayay patafangan cadada. Soˈlin o matatodongay koniya lihaf, kawra cowa ko komodan no demak. Nikawrira, oya itiniay kaetip no Yortan ˈAlo a Israil tamdaw, saˈosi sanay to misafelitay ko salikaka nangra ci Yihofaan. (Yosuwa 22:9-12) Kao ngaˈayay ˈayaw no mamilood i, miocoran nangra ko madimadiay tamdaw mitiyawca to samaanay ko demak. O maanan ko mahapinangay nangra hani? Cowa ko papatoˈaya, o mamalo sapisawacay. Patireng cangra to patafangan cadada o sapasifanaˈ to teloteloc a tamdaw, o madimadiay a sikawdan ni Yihofa cangra. Itiniay kaetip no Yortan ˈAlo a Israil tamdaw, maedeng mahemekay a mahapinang no niyah ko soˈlinay demak, eca ka pitoor to cidangocay a lihaf mipalaˈafo to salikaka nangra. w18.08 5 fiedac 9-10 fatac

Mihaen o sowal ni Pawlo, o midokoay to Kawas a tamdaw wa midemak to tatiihay a demak alatek. Oniya marefongay i sakayhid a tamdaw mihaydaay ci Yihofa cangranan sanay miharateng. Kawrira, o piharateng aca no tamdaw misawidang ci Yihofaan, anca madimadiay ko niyah to Kawas saan ko sowal, cowa pitaypiyaw konini to milifokay ko niyah to hemek no Kawas. (1 Korinto 10:1-5) Pakayni kanayar ni Mosi i Sinay Lotok marawraway ko Israil tamdaw, o Krisciyang anini pakayni kanayar no pisawkitan romiˈad ato faelohay hekal wa marawraw alatek, wa halafinho a malaˈosi koniya makapahay tokel, anca cowa ko mamalaˈosi, saan miharateng. Ano caka falahen ita ko hatiniay harateng, wa pasayrato i no dafongan a micangacang halatek, misakahmaw to araaw ni Yihofa. Palidlid sato kita a miliyas to Kawas alatek, salikor midemak to nacowaho ka harateng no niyah a tatiihay a demak. w18.07 21 fiedac 17-18 fatac

Anini, ano mafanaˈ ci Yihofa to ngangan no mita, wa milifok kita to adihayay sapalemed. Sasamaan ko hademak ita ho mafanaˈ ci Yihofa kitaanan hani? O mamaolah kita Cingranan ato patafang to hakelong noˈ orip dademak i Cingranan. (1 Korinto 8:3) Sasamaan kita padadotoc mitafo to ngaˈayay kalawidang to kakarayan a Wama hani? Tengilen ko limoˈot ni Pawlo, palimoˈotan ni Pawlo ko Kalatiyaay a Krisciyang aka a masolot no ‘malonayay cangoˈotay a mararaway harateng’, mahaopay ko picangacang to pihayda no hekal. (Kalatiya 4:9) Macakatayto ko saka cecay hahekalan a Krisciyang i noˈadingoan, malo kafanaˈan no Kawas a tamdaw, kawra sowal ni Pawlo ‘patatikolay micada to’ mamahorac a demak. Tatodong no sowal ni Pawlo: “Ano matenesay a tamdaw kamo, hano patikolho midemak to mafolaay awaay ko epoc a demak hani?” w18.07 8 fiedac 5-6 fatac

Cowa ko tatahacada kita to roray i noka raraw, ngaˈ minanam to sapasifanaˈ, o maˈoningay no Fangcalay Cudad, o taˈarawan ita a sapasifanaˈ. Micekiw kita to Fangcalay Cudad ato midotim to maˈoningay i lalomaˈ, o ngangaˈay micada to makapahay a sakayat no Kawas. Tinakoen, misafelitay ci Tafiti to limoˈot no Kawas maˈaˈodang ci Patsipaan, mansa micadaay to taˈangayay a roray. (2 Samuil 12:7-14) Ano micekiw toniya maˈoningay i, wa ngaˈay kita miharateng: “Wa samaan ci Tafiti a miliyas to saka ˈaˈodangaw ci Patsipaan a midemak toniya taˈangayay a raraw hani? Ano tahasiˈayaw kako to mahecaday sakayhid i, wa ira ko ˈicel a miconged han? Wa mahecad kako ci Yosifan miconged to sakayhid, anca mahecad ci Tafitian a mapadik hokira?” (Satapangan 39:11-15) Ano haratengen ita ko teloc no mararaway, wa ngaˈay misaˈosi ko falocoˈ ‘kaˈitehen ko tatiihay’.​—Amos 5:15. w18.06 17 fiedac 5, 7 fatac

O cowa ka sadafdaf a demak, milingatay to saka sasongtol no mirikecay. Itini lintad ni Yis, ciharatengay ko tamdaw to milisataay a demak. Itini lintad ni Yis, adihayay ko papasataen no tamdaw, o nodafongan a sata, sera ato lomaˈ a sata. O maˈanofay a waywayan no milisataay mitongalay to aretengay a ˈinorong no tamdaw. Ngaˈayay micakay to kihecod kaolahan nangra a dafong, mikitira a mietan to payci. O saka cihafay no ˈaˈideman no milisataay no Yiriko ci Cakay, mikitiniay pisaˈfit to ˈalomanay. (Luka 19:2, 8) O adihayay milisataay itiya, mahecaday ci Cakayan misaˈfitay to ˈalomanay. O ˈada ni Yis tano pasataay a demak mipalafo ci Yisan. O makowanay no Loma a tamdaw, papasata to cecay “sapasata a payci” itiya. (Matay 22:16-18) Tada mapiliˈay ko Yutaya tamdaw to pasataay, samanen ano pasata, mahecaday o mihaiyay to makowanay no Loma ko niyah. w18.06 5-6 fiedac 8-10 fatac

Ano midama ko tamdaw ci Satanan, o sapafeli ni Satan a epoc tahadaˈoc, cowa ko papakalini to misadakan nangra a ˈicel. (Yopu 21:7-17; Kalatiya 6:8) Mafanaˈ kita to hakowaay ko ˈicel ni Satan a mifiyor, wa ira ko maanan a haepoc no mita hani? Ano mafanaˈay to caˈof noniya salicay, wa ira ko matatodongay pinengneng no mita to mirikecay, papadama kitanan matongal ko fanekfek a mitosil. Tokel ni Yihofa kitaanan mikangodo to cifadangalay a mirikecay. (1 Pitiro 2:17) Ano cowa ka sasongtol ko sarikec no mirikecay ato palinian no Kawas, wa midofdof kita to sarikec. (Loma 13:1-4) Kawraan, wa mitafo kita to misatenokay, eca ka pidama to yofayof anca ˈaˈideman no mirikecay. (Yohani 17:15, 16; 18:36) O roma, mafanaˈay kita to sapihimedaw ci Satan to ngangan ni Yihofa, mipalak to ngangan Ningra, mihaenay makalimay kita sapadamaaw to tamdaw mafanaˈ to Kawas. Malitaˈangay kita malo Misawacayay Tamdaw ni Yihofa, misawacay to ngangan no Kawas. Mafanaˈay kita, o malifokay a sapalemed a maolah to Kawas ikakaay ko kaadihay to epoc no hafay ato dafong.​—Isaya 43:10; 1 Timoti 6:6-10. w18.05 24 fiedac 8-9 fatac

Ano tahalifa ko raramod to sapalifet i, wa ngaˈayto malicinowas ko raramod han? Soˈlin cowa pitadtad ko Fangcalay Cudad to ngangaˈay pakayni maanan a lalangian a malalicinowas ko raramod, kawra sanay ko sowal ni Pawlo: “Ano ira ko cifaˈinayay a salikaka to caayho pipasoˈlin ci Kristoan i, ano maolah koya faˈinay a cicafay to fafahi ningra i, aka piliyas toya faˈinay.” (1 Korinto 7:12, 13) Oniya safalod matatodongay i aniniay a Krisciyang. Kawra, oya cowa pidoko to Kawas a faˈinay mariˈangay to fafahi, cowa ka “cicafay to fafahi”. Tinakoen, cowa pidoko to Kawas a faˈinay pakidemay mariˈang a midokaˈ to fafahi, mangalef miroeroay to ˈorip no fafahi. Alatek caka sapitamorongaw to midipot to fafahi ato paro no lomaˈ a ˈinorong, miconged to fafahi mihodop to Kawas. Ano samaanay ko harateng no faˈinay, hato cowa ka olah cicafay to fafahi, sanay ko harateng no fafahi alatek, mansa, o hatiniay a pakayraan ngaˈay malacinowas. Nikawrira, o roma Krisciyang misiˈayaway to mahecaday a pakayraan, cowa ka lalicinowas ko raramod nangra, padotocay cangra mihadidi a misalof to kalalaˈed nangra. w18.12 13 fiedac 14, 16 fatac; 14 fiedac 17 fatac

Itini Luka 8:5-8, 11-15 pakayni i mifolesakay a tinakoan, o sapaloma, o ‘sowal no Kawas’ anca, o lihaf no Kitakit no Kawas, o sera, mitaypiyaway to falocoˈ no tamdaw. O mifolesakan no maomahay, ano o sapaloma no emi, matefaday i ngaˈayay sera ko sapaloma, cilamit, cicengoˈ lomahad malo emi, ikor, Ciheci ko emi to ‘simoˈotay a heci’. Ano micada kita a mikelec midofdof to kimad no Fangcalay Cudad, mahecad i sapatinako ni Yis materekay ko sapaloma i ngaˈayay a sera. Ikorto, cilamitay ko sapaloma no soˈlinay kimad i falocoˈ no mita, lomahaday, mahecad malo emi ko sapaloma, mangataayto a ciheci. Mahaen o heci no emi, cowa ko malengaway a emi, o faelohay a sapaloma, mahecaday onini, o minaroˈan no heci ita, cowa ko faelohay a nisawawaan, o faelohay a sapaloma no Kitakit no Kawas. Sasamaan kita a ciheci to faelohay sapaloma no Kitakit no Kawas hani? Ano patenak kita to lihaf no Kitakit no Kawas, o mifolesakay to sapaloma i falocoˈ no mita. (Luka 6:45; 8:1) Mihaenay, o mifolesakay a sapatinako pasifanaˈay kitaanan, ano padotoc kita patenak to lihaf no Kitakit no Kawas, mahecaday o ‘mihadidiay a ciheci’. w18.05 14 fiedac 10-11 fatac

Cowa ko pakalalok aca ni Pawlo to salikaka, makahiyay pakayra cangranan a kinafalah to kihecod no niyah. (2 Korinto 12:15) Wa mihaen ko malohemay malitengay, cowa ko tano sowal aca cangra a pakalalok, ato mihinom to salikaka, wa tano waywayan a paihekal to nika ciharateng cangranan. (1 Korinto 14:3) Mihadak to sapirikec wa ngaˈay pakalalok to tamdaw. Kawrira, wa minanam ko malohemay malitengay to taˈarawan i Fangcalay Cudad, ngaˈ ngaˈay tano pakalalokay a pakayraan a mihadak to sapirikec. Toniya pakayraan, patirengay ci Yis to mikiriwiˈay a taˈarawan, sinanoten ko ihekalay a sapalimoˈot ningra to Aciyaay a kasakopang. Papalimoˈot ci Yis to Ifiso, Pirkamum, Tiyatira a kasakopang i, salakatayho a pakahemek cangraanan. (Paˈarawan 2:1-5, 12, 13, 18, 19) Pakayni pisadak to sapalimoˈot, o taˈarawan ni Yis tada o ngaˈayay nanamen no malohemay malitengay. w18.04 22 fiedac 8-9 fatac

O wama ato wina misaˈicelay a misinanot to tanoktok no tireng no wawa, tinakoen mikorac to lomaˈ, mifalah to saka ciadada no tamdaw a dafong. Mahecaday, iraay ko ˈinorong no wama wina a midipot to wawa, ho eca ka waraken ni Satan ko falocoˈ nangra. Ano mamipalak to harateng no wawa a ika, kamok no tilifi, tahalamaan no tingnaw, wangcan, hamaan papingataen ko wawa. Misaaliay ci Yihofa to wama wina midimokos to tanoktok no wawa i noˈadingoan. (Taneng 1:8) Mihaenay, wa tooren no wama wina ko palinian no Fangcalay Cudad a misaˈosi, pasowal cangraanan o maanan ko ngaˈayay, o maanan ko tatiihay, halo padama to wawa cipinang to lalangian iso. (Matay 5:37) Ano palidlid saan ko wawa lomahad, papasifanaˈen no wama wina ko wawa, samaan mitoor to palinian ni Yihofa a misawkit to o maanan ko ngaˈayay, o maanan ko mararaway. (Hipray 5:14) Sakalimlaan i, haratengen no wama wina, wa hapinangen no wawa ko waywayan iso.​—Limoˈot 6:6, 7; Loma 2:21. w19.01 16 fiedac 8 fatac

O kaemangay tamdaw, wa ngaˈay patireng kiso to patosokan, misawidang to matoˈasay tamdaw, tengilen ko pilomal nangra to malifetay i pihodop ci Yihofaan. O hatiniay milifetan wa patanektek to pakasoˈlin no falocoˈ iso, mihaen wa matongal ko kalim iso ato matoˈasay sapataengadaw to likat no soˈlinay kimad. O roma, kita mapolong ngaˈay mahemek a militemoh to mirienangay to saˈopo a faelohay tamdaw. O mamitongal to makelecay konini, ho makalim cangra micomod i kapot no mita, malacafay a pasadak to likat. Ano kiso ko manilnilay misikay to ˈayaw mitosil a saˈopo, ngaˈayay miharateng to sasamaan padama to matoˈasay salikaka. O pitosilan a kilac no matoˈasay, matatodongay han? Ngaˈayay kiso tahidangen ko kaemangay pacafay cangranan han? Oya matoˈasayto anca tatiihay ko tireng caka ngaˈay mararid mitosil a tamdaw, wa ngaˈay kiso patado cangranan miharateng han? Ciharateng kiso to salikaka, misinanot to saali nangra, mihaen to demak ano kaemangayto matoˈasayto, adihayay anca mimingay ko malifetay a tamdaw wa fanekfekto a mitosil.​—Lifi 19:32. w18.06 23-24 fiedac 10-12 fatac

O sapafeli no Kawas a pasalat padamaay kitanan miliyas to pipalit no raraw ato patay, cowa ko sasaloyaˈen ko sapafeli no Kawas a pasalat. Pakayni sapatefoc a limasmas, wa ngaˈay lipahak ato tingalaw ko falocoˈ ita a mihodop to Kawas. (ˈOlic 40:8) Papaihkal kita to piakoˈid i Kawas ato sakaretengen ko pinengneng to kalimlaan a pasalat. Palimoˈotay ko tarokos ci Pitiro kitanan, hamaan sapisaloaw to coos notekedan a mikasimaan misaka dademak to sapafeli no Kawas a pasalat. O salimoˈot ni Pitiro coko papiharatengay kitanan to mifekaday a demak no Israil tamdaw i kohkoh han? Anini, wa mahecad ko raraw ita halatek, misiˈayaway to adihayay a sakayhid. O sakayhid noniya hekal ni Satan, mahawpay ko kakaenen, pilafa to caˈedong, halama ato romaroma a demak. O kowangkaw no misasingdiay misaka dademakay to haiyo a pacakay to dafong, mifekaday ko kalim no tamdaw sapiˈacaaw tora dafong, ˈarawhan cowa ko kalimlaan. Ano caka talipaˈelal kita, wa marefong i talakal, mikasimaan misaka dademak to kalimlaan a pasalat. w18.04 10 fiedac 7-8 fatac