Saka 7 Folad

Itiniay kita i ‘pasangaray siˈayawen a ˈawaled’ maˈorip, ˈayaw no ira ko faelohay hekal, miliyaw a dipayal koniya cikiw, wa matongal ko pasangar no kaˈorip no mita. (2 Timoti 3:⁠1) Mihaenay, lalicayen ita ko niyah: “Pasayra kako cimaanan micangacang to sadama ato sakayat hani?” ˈAyaw no pina patek miheca, cecay mitiliday to ˈOlic mihayay, ano tahalifa ko tamdaw to pasangaray i, o hahalamham ci Yihofaan. (ˈOlic 123:1-4) Masowalay no mitiliday to ˈOlic, o pihalamham ita ci Yihofaan mahecaday o pihalamham no koli to tawki sanay, hano mihaen ko sapatinako ningra hani? Mihalamham ko koli to tawki cowa ko sapilifokaw aca to kakaenen ato sadipot, wa padotoc cingra misinanot to harateng no tawki, hanaca mitoor to harateng no tawki a midemak. Mahecaday, wa micekiw kita to Fangcalay Cudad to romiˈamiˈad, cipinang to o maanan ko araaw ni Yihofa kitaanan, hanaca midoedo to sakayat Ningra. Mihaen ko demak ita, itini pisaalian ita a toki wa padama ato midipot ci Yihofa kitaanan. w18.07 12 fiedac 1-2 fatac

Tatodong nora sowal ni Yis, cowato ko ‘mamala koli no raraw’, mamatedal nai sataˈangayay mipaekelay ato miroeroay a noka koli o sanay. (Yohani 8:34) Ano mafalod no raraw kita, o mamadolo a mararaw ko demak, nolatekay, miharatengay kita to saka tatodongaw ko demak, anoca iraay ko ˈicel a midemak, ˈarawhan tona mafiyoray no raraw, cowato ka pidemak kita. Mankora, mala koliay no raraw kita, pairaay to somad, roray ato patay ko teloc. (Loma 6:23) Edeng ano maliyas ita ko nika pifalod no raraw ngaˈ, ngaˈay a malifok ko salakatay a milifokan ni Atam aci Ifa a soˈlinay pasalat. Sowal ni Yis, ‘ano mararid kamo mitoor to sowal ako’ sa i, tatodong noni sowal, ano sapilifokaw ko tamdaw to pasalat, mitoor to patirengan ningra a saˈosi, o sanay. (Yohani 8:31) O patafangayto to tireng a Krisciyang kita, awaayto ko fadangalan a miˈimer to tireng no niyah, halo mamakahi a midofdof to sapalimoˈot ni Kristo a maˈorip wangaˈ. (Matay 16:24) Mikiˈokan ni Yis, ano mihaen to demak kita i, mamicada to pakaynian ni Yihofa i sapatefoc a soˈlinay pasalat. w18.04 7 fiedac 14-16 fatac

Latekay, cowa ka tatodong ko harateng no finawlan no Kawas, kamayan a siniˈada ci Yihofa cangranan. Haratengen ko tinakoan ni Yona, miocoran no Kawas cingra tayra i Ninifi a milasil to sasawkit a lihaf, ikor pasasiyoray ko Ninifi tamdaw, hato misododan no Kawas cangra. Oniya minaroˈan cowa ka hemek ci Yona, ‘mangolaway’ cingra, samanen cowa kala ˈosi ko sapairasol ningra. Kawra, mihadidiay ci Yihofa cingranan, padama cingranan a misalof to harateng. (Yona 3:⁠10–​4:11) Saikor, mananamay ni Yona ko sapasifanaˈ, misaka dademakan ni Yihofa cingra mitilid toniya malifetay, saka ciepoc no mita. (Loma 15:⁠4) O pakayraan ni Yihofa micada to finawlan Ningra ngaˈay pakasoˈlin kita, siniˈadaay Cingra to midokoay Cingranan a tamdaw. Cipinangay Cingra to citolasay ko ˈicel ita, “caay palitemoh Cingra tamowanan to caay ko mamahadidi namo a salifet.” (1 Korinto 10:13) Tada misayaray to tamdaw konini! w19.03 16 fiedac 6-7 fatac

O Rikec ni Mosi mahawpay ko polong no kaˈorip no Israil tamdaw, cowa ko midokoay aca to Kawas a demak, misaysayho to lacongis ato mararaway a demak. Nengnengen ita ko laenoay tinakoan. Ano mipatay to tamdaw, cowa ko tatangsol a sawkiten mipatay. Wa mikadkad ko malohemay malitengay toniya demak, ikor ngaˈ misawkit to papatayen hokira. (Limoˈot 19:2-7, 11-13) Misawkitho ko malohemay malitengay to polong a demak i nokaˈorip, misaysay tono paycian ato pasangaray no raramod. (Kasadakan 21:35; Limoˈot 22:13-19) Ano masadafdaf ko pisaysay, midofdof ko Israil tamdaw to sarikec, wa ciepoc ko polong a tamdaw paˈdil ci Yihofaan. (Lifi 20:7, 8; Isaya 48:17, 18) Mitokelay ci Yihofa tano olah ato masadafdafay micada to tamdaw i nokaˈorip. Misinanotay Cingra to sasowalen ato waywayan ita, mafanaˈay tono tekedan a demak ita. w19.02 23 fiedac 16-18 fatac

Ano ira ko saroero i, mitafo to madaˈmaˈay, cowa ko madoloay. Alatek o sowal ita cicekayto, cowato ka ngodo to tao. Ano mihaen i, sasinanoten ko taˈarawan ni Yis. Salikorayto pina folad ci Yis i hekal, misiˈayaw to taˈangayay a saroero. Mafanaˈay cingra wa misemsem ko niyah, ikor patayen. (Yohani 3:14, 15; Kalatiya 3:13) ˈAyaw no kinafalah to ˈorip cingra pina folad, tada malotayay ko niyah sanay cingra. (Luka 12:50) ˈAyaw no patafang to ˈorip pina romiˈad, sanay cingra: “Marawraw ko falocoˈ ako.” O satolon ni Yis mahapinangay ita to misapoeneray cingra, midoedoay to Kawas. (Yohani 12:27, 28) Timoloay cingra misiˈayaw to ˈada. ˈArawhan tano pakangodoay, misamsamay a pakayraan ko pipatay nangra ci Yisan. Nikawrira, hakowato ko macadaay ni Yis a saroero ato adada, kamayan midofdof to araaw no Kawas a midemak. Tada o sangaˈayay a taˈarawan ita ci Yis, soˈlin misemsem cingra kamayan mitafo to madaˈmaˈay.​—Isaya 53:10. w19.02 11 fiedac 14-15 fatac

Ano misiˈayaw kita to pasangar i, sapirienangaw to saˈopo, misaaliay to timolo. O roma salikaka tahalifa to sapalifet a maroray, matoled anca misemsem to adada, kamayanho mirienang to saˈopo. O roma salikaka micada to pakidemay a sapalak no paro no lomaˈ, anca mirikecay miconged to tayal nangra, kawra kamayan a mirienang to saˈopo. Misaˈicel kita mirienang to saˈopo, wa pakalalok to mapalitay a Krisciyang. (Hipray 13:⁠3) Matengil nangra ko milifetan no mita, wa matongal ko tanoktok no pakasoˈlin nangra, wa timolo a mitafo to madimadi. Tiya mapalit ko tarokos ci Pawlo i Loma i, ano tahatengil cingra to salikaka, madimadi a midoko to Kawas, lipahakay ko harateng ningra. (Filipi 1:3-5, 12-14) Itini iˈayaw anca ikor no matedal cingra, patikami cingra to Hipray a Krisciyang, palimoˈot cangranan aka pisawad a masaˈopo, hanaca “kararid a masasiolaolah ato salikaka.”​—Hipray 10:25 w19.01 28 fiedac 9 fatac

Misaka dademakan ni Satan ko ika ato kamok no tilifi, mitenak to harateng ningra. Mafanaˈay cingra, o pacamol to tawcikel a lawla, wa miorat to sapisimsim ato harateng no mita, hanaca mifiyor to waywayan ita. Ci Yis tano tawcikel a pakayraan pasifanaˈ to nisawawaan, tinakoen oya sidaˈitay a Samariya tamdaw ato malafelay wawa a sapatinako. (Matay 13:34; Luka 10:29-37; 15:11-32) Mihaenay, mafanaˈay ko mafiyoray no harateng ni Satan a tamdaw, misaka dademakay to citawcikelay a lawla, oha maminahol kitaanan. Mansa, pairaen ita ko matatodongay a pinengneng to lawla. O roma a ika ato kamok no tilifi, iraay ko sapasifanaˈ, cowa ko maminahol to harateng ita, kawra sasinanoten ita, ano mipiliˈ to lawla i, licayen ko niyah: [“Ikor no pinengneng toniya ika anca kamok no tilifi i, ‘doedo han ako ko niharatengan a midemak,’ cowa ko mararaway, wa saan kako han?”] (Kalatiya 5:19-21; Ifiso 2:1-3) Ano mahapinang iso, iraay ko harateng ni Satan no kamok, wa samaan ko demak iso hani? O laliyasen ko hatiniay a lawla, mahecad o piliyas to midengaay a adada. w19.01 15-16 fiedac 6-7 fatac

Itini pipakalalok to tao patirengay ci Yis to mikiriwiˈay a taˈarawan. Kawra ˈayaw no tayni i hekal cingra, masinanotayto no madimadiay a sikawdan no Kawas ko kalimelaan to sapakalalokaw to tao. Tinakoen, tiya misiˈayaw ko Yutaya tamdaw to saroero no Assiriya i, misaˈopoan ni Hicikiya ko ˈaˈideman no sofitay ato finawlan pakalalok cangranan, telocto “pakayni tonini a sowal no hongti a mapaˈicel ko finawlan.” (2 Rayray 32:6-8) O roma tinakoan ci Yopu, misaaliay cingra to sapakalalok, kawra oya tatoloay a widang ningra patongalay to cariraw ningra. Pasowalan ni Yopu cangra sasamaan a mihinom to tamdaw, ano cingra ko mihinomay, o sapakalalok ato sahinom ko hasowal, milowan to roray nangra. (Yopu 16:1-5) Ikorto, mikitiniay ci Yopu ci Ilihuan aci Yihofaan milifok to sapakalalok.​—Yopu 33:24, 25; 36:1, 11; 42:7, 10. w18.04 16-17 fiedac, 6, 8-9 fatac

Mitadtaday ci Isaya to sasamaan ci Yihofa patanoktok to finawlan Ningra, sowal Ningra: ‘Mahecaday ci Yihofa o ciˈicelay a tayni, o fadangalan Ningra ko sapikowan.’ (Isaya 40:10) Itini Fangcalay Cudad tocerid tano “fadangalan” a tilid mitaypiyaw to ˈicel. Mihaenay, sowal no Fangcalay Cudad, ‘fadangalan Ningra ko sapikowan,’ patalipaˈelalay kitaanan o ciˈicelay a Hongti ci Yihofa. Iˈayaw, misaka dademakan Ningra ko taˈangayay a ˈicel, midipot ato padama to sikawdan Ningra; anini, wa padotoc Cingra paˈicel ato midipot to mitiˈeray Cingraanan a tamdaw. (Limoˈot 1:30, 31; Isaya 43:⁠10) Mikiˈokay ci Yihofa: “Patanekteken Ako kiso.” Ano mipalak ko ˈada kitaanan i, wa tooren ni Yihofa koniya sakiˈok. Anini, itini roma kilac, misarocod ko ˈada miconged to mitosilay a tayal anca demak no likakawa no Kawas. Soˈlin mahaen, cowa ko papakidem ko calemcem ita toniya salood. O sapafeli ni Yihofa a sakiˈok, o papaˈicel kitaanan a pakasoˈlin, sanay ko sowal Ningra: ‘O sapilood tisowanan a lalosidan, wa awa ko kapo.’​—Isaya 54:17 w19.01 5-6 fiedac 12-13 fatac

Cowa ka hecad ko tamdaw ato ˈaˈadopen, iraay ko saali no tamdaw to noˈadingoan, mihaenay edengan ci Yihofa ko mamisalo toniya saali. (Matay 4:4) Ano mitengil kiso to Kawas, wa ngaˈay micalep ko kafanaˈ to demak, halo milifok to taneng ato lipahak. Pakaynian ni Yihofa i Fangcalay Cudad ato sapafeli no ‘madimadiay citanengay a koli’ to kadofahay a noˈadingoan a kakaenen, ho ngaˈay masaloen kiso i noˈadingoan. (Matay 24:45) Oniya noˈadingoan a kakaenen adihayay masasiroma, hanaca kadofahay! (Isaya 65:13, 14) Ano komaen kiso to noˈadingoan a kakaenen, mamilifok to taneng ato sapisimsim a inaneng, oniya capeling wa midipot kisowanan. (Taneng 2:10-14) O taneng ato inaneng a misimsim wa padama kisowanan, cowa ko mamalipalaw no misamangahay, tinakoen, cowa ko papasoˈlin to “awaay ko Misangaˈay a Tapang”, anca milifok to adihayay a payci ato dafong ngaˈ ira ko hemek, sanay a mararaway kimad. O taneng ato inaneng a misimsim, wa ngaˈayho padama kisowanan mihapinang to samaanay a coos, o mararaway, ato samaan mifalah toniya coos no tireng. Mihaenay padotoc kiso mikilim to taneng no Kawas, palahaden ko inaneng a misimsim, halo misakareteng toniya capeling. w18.12 20 fiedac 6-7 fatac

O ˈorip ita wa mahecad ko “kakayaˈ no ˈorip no kilang”. O roma kilang pina:ay patek ko ˈorip, ano hahatira ko ˈorip no tamdaw, wa tanoktok ko tireng wangaˈ. Mihaenay ano ngaˈay maˈorip i pairasolan ni Isaya a pala, mahecaday i lakoing. Cowa ko sowal aca, samanen wa malaˈosi ko sapairasol ni Isaya. I sawni milengoan a sapairasol ato lakoing no ikor, iraay ko maanan kalaliting hani? Mahapinangay ita, wa milifok ko polong a tamdaw to sapalemd no Kawas noikor. Cowato ko mamatalaw to ˈaˈadopen ato mariˈangay tamdaw. O mapohaway, madoˈengay ato cisamoˈay wa maadahayto. O tamdaw papatireng to niyah a lomaˈ, komaen to cihaleday a kakaenen. Ano o ˈorip i, wa ikaka ko halafin to kilang. Paihkalay ko adihayay a sinael, oniya makapahay a hatokel mangataayto malaˈosi. Nikawrira, harateng no roma tamdaw pakidemay ko pitadtad toniya sapairasol sanay, Hano pakasoˈlin kiso to mamiliyaw ira ko lakoing i sera hani? O kasapaan a tamdaw ci Yis wa pacaˈof toniya salicay.​—Luka 23:43. w18.12 5 fiedac 13-15 fatac

O harateng no tamdaw ngaˈayay falicen, o hatiniay a kafalic milingatay to picada to samaanay a harateng. Ano misimsim kita to harateng no Kawas, wa mahapinang to o matatodongay ko harateng Ningra, padama kitaanan pahecad ko harateng ita to harateng Ningra. Ano makalimay kita ira ko mahecaday ni Yihofa a harateng, ‘aka madenga nonini a hekal.’ Cowa ka ngaˈay kita minanam to micoliay to harateng no Kawas a sasowalen. Tano tinakoan a mitadtad: Saka tanoktokaw ko tireng no tamdaw, mansa komaen to cihaleday a kakaenen. Kawra, ano mararid cingra komaen to maponiˈay a kakaenen, wa tanoktokho cingra han? Ano minanam kita to harateng ni Yihofa, kawra ano makahi kita mafiyor no mararaway a sasowalen, wa awaayto ko haepoc no mita. w18.11 21 fiedac 14-15 fatac

Seteken ita ko falocoˈ to romiˈamiˈad midoedo to soˈlinay kimad a midemak. Patinakoan no Fangcalay Cudad to safaked no sofitay ko soˈlinay kimad. Itini lintad no Fangcalay Cudad, o safaked no sofitay ngaˈayay midipot to tatelecan ato tireng. Kawra, kedecen ko safaked ngaˈ ira ko sadipot, ano mahokaˈ cowa ko papadama to tatelecan. Samaan ko demak ita, ngaˈay ko soˈlinay kimad mahecad o safaked a midipot kitaanan hani? Kelecen a mitafo to soˈlinay kimad, mihaen o mamadipot no soˈlinay kimad kita, eca ka fiyor no mararaway a harateng, wa ngaˈayho padama kitaanan matatodong ko pisaˈosi. Ano misiˈayaw to sakayhid ato pasangaray i, papadama ko soˈlinay kimad kitaanan misaˈosi ko falocoˈ midemak to matatodongay demak. Itiyaho a sofitay ano caka cisafaked cowa ka pilood, cowa ko ngangaˈay kita mihelong to soˈlinay kimad a safaked, anca mahokaˈ ko safaked, oha mamisaˈicel kita “mikelec” to safaked no soˈlinay kimad, midoedo to soˈlinay kimad a maˈorip. w18.11 12 fiedac 15 fatac

Ano sapakahelaaw to soˈlinay kimad, wa misaˈicel kita ngaˈ, anca makahiho a kinafalah to kihcod a milifok to soˈlinay kimad. Sowal no mitiliday to Taneng, ‘miˈaca’ kita to soˈlinay kimad, anca malifok ko soˈlinay kimad, sasinanoten hamaan ‘paˈacaen’ anca mahiday ko soˈlinay kimad. O roma dafong cowa papaycien, kawra misaaliayho kitaanan misaˈicel ngaˈ malifok ko dafong. Mihongyakan i Taneng 23:23 a ‘miˈaca’ a tilid no Hipray iraay ko ‘malifokay’ a tatodong. Ano hongyaken to ‘miˈaca’ anca ‘malifokay’, sahtoay mamihadak to ˈicel ngaˈ, anca tano mafafalicay a pakayraan milifok to ciepocay a dafong. O laenoay tinakoan, wa mitadtad to o maanan ko tatodong no ‘miˈacaay’ to soˈlinay kimad. Ano itini icifa, iraay ko cowa papaycien a pawli, oniya pawli cowa ko fahal saan mahadak i eto no lomaˈ ita, tatayra kita i icifa panokay to pawli. Toniya sapatinako, soˈlin cowa pipalak kita to payci miˈaca to pawli, kawra mamipalak kita to toki ato ˈicel tayra i icifa. Mahecaday, o soˈlinay kimad cowa ko tatano payci a miˈaca, kawra ano sapilifokaw to soˈlinay kimad, oha mamihadak kita to ˈicel ngaˈ ngaˈay. w18.11 4 fiedac 4-5 fatac

Kinacecayay, na mitahidangan ni Yis ci Pitiro, Yakop aci Yohani macokacok a tayra i ˈakawangay a lotok, maˈaraway nangra ko mapolosi. Matediay ko pising ni Yis ato rikoˈ ningra. Maˈarawayho no tarokos ci Mosi aci Iliya, malalengoay cangra aci Yis to pakayniay i patay ato piliyaw ni Yis a maˈorip. (Luka 9:29-32) Dotoc, matahepoay no cecay tadengalay a ˈoˈol ko tarokos, matengilay nangra ko ngiha no Kawas nai ˈoˈol. Oniya mapolosi mitaypiyaway, ano malo Hongti no Hongti Kitakit no Kawas ci Yis i, wa ira ko fadangalan ato ˈodingar. Maedeng makowaday ci Yis a misaday misiˈayaw to noikoran a roray ato patay. Oniya mapolosi patanoktokay to pakasoˈlinay falocoˈ no tarokos, ira ko ˈicel mitafo to madimadi, padotoc midemak to patorodan cangranan a tayal. Ikor no 30 mihecaan, malengoay no tarokos ci Pitiro to mafalicay ko tireng a mapolosi, hatiraay mafekaday a demak itiyaho, cowa ka tawal i ponoˈ ningra.​—2 Pitiro 1:16-18. w19.03 10 fiedac 7-8 fatac

O soˈlinay Krisciyang wa midemak to maanan, ho mahapinang no tao to cowa ka lecad cangra to mihakelongay to mararaway pidoyongan hani? “Kao soˈlinay ko sowal” ita. (Cikariya 8:16, 17) Ano taˈangayay anca mimingay a demak, wa soˈliˈlin ko sowal to kafahalan tamdaw, cafay matayal, widang ato paro no lomaˈ. Kaemangay tamdaw, sapirienangaw kiso to kapot no widang han? O roma kaemangay itini ˈaˈayaw no paro no lomaˈ ato kasakopang ngaˈayay ko waywayan, kawra ano malacafay to potalay no kasakopang a tamdaw i, anca itini picawmaˈan a wangcan masiromaayto ko demak. Mihaen a tosa ko palinian o milipalaway to wama wina, kasakopang, milipalawayho ci Yihofaan. Ka pisinanot ko kaemangay, hamaan o milipalaway to niyah ato tamdaw ko kaˈorip. (ˈOlic 26:4, 5) Haratengen, ano o ngoyos aca ko mikangodoay ci Yihofaan, miraay ko falocoˈ, mafanaˈay ci Yihofa. (Marko 7:6) Tengilen ita ko limoˈot no Fangcalay Cudad: “Aka ka ˈinal to ciraraway a tamdaw, kararid ko falocoˈ iso a [midoko ci Yihofaan].”​—Taneng 23:17. w18.10 9 fiedac 14-15 fatac

O noˈadingoan a paro no lomaˈ ko finawlan no Kawas, tano kasasiolah ko kafanaˈan no ˈalomanay. (1 Yohani 4:21) Samaanay cangra masasiolah hani? Alatek, taˈakay ko kinafalah nangra patado to salikaka, kawra, maolahay to salikaka a pakayraan sakakaay i, o tano mimingay a demak, tinakoen o patadoay miharateng a sowal, anca o sidaˈitay a waywayan. Ano tano sidaˈitay, patadoay miharateng a pakayraan micada to tao i, o ‘mitodongay to Kawas’ koni. (Ifiso 5:1) Ci Yis mitodongay to Wama ningra, malefotay a patahkal to capeling no Wama. Sowal ni Yis: “Kamo o marorayay ato karetengay ko ˈinorong a tamdamdaw i, katayni i takowanan a maemin ta pahanhanen ako kamo. O damsayay kako. O poeneray ko falocoˈ ako.” (Matay 11:28, 29) Ano mitodong kita ci Yisan “mafanaˈay a miharateng to pakosiya a tamdaw”, wa pakahemek to kakarayan a Wama, wa mahemekho ko niyah. (ˈOlic 41:1) Mihaenay haw i, naitini i paro no lomaˈ, kasakopang, ato pitosilan a patado miharateng to tao. w18.09 28 fiedac 1-2 fatac

O roma pakayraan malacafay to Kawas a matayal i, ikor no mapades, padama to tahapadesay a salikaka. Tinakoen, pakiyaho kita a padama cangranan. (Yohani 13:34, 35; Dmak 11:27-30) Wa ngaˈay kita padama cangranan milosimet ato miliyaw patireng to lomaˈ. O cecay fafahiyan salikaka i Polan ci Kafolila, mapalakay no cedas ko lomaˈ ningra, padamaay ko ingataay kasakopang a salikaka, hato fanekfekay ko falocoˈ ningra. Sowal ni Kafolila: “Akato sowalen ko malahdaway a dafong​—samanen o dafong aca kora, sapasowalaw kako tamowanan to o maanan ko malifokay ako. Ikor no tahalifa toniya demak pakasoˈlinay kako, masalalomaˈ no kasakopang a Krisciyang, tada taˈangayay sakaliko, o masakahemekan a demak.” ˈAlomanay tahapadesay a salikaka micada to sapadama, ikakaay ko malifokay to malahdaway sanay ko harateng. Roma i, mihadakay to sadama a Krisciyang malacafay to Kawas a matayal, tada masaloay ko falocoˈ.​—Dmak 20:35; 2 Korinto 9:6, 7. w18.08 26 fiedac 12 fatac

Ano sapisongilaˈaw kita midipot to falocoˈ no niyah, hapinangen ko maanan a demak, mamipalak kitaanan i, mihaen o saka dipot no niyah. Oya ‘midipot’ sanay maharatengay ko tayal no iti:yaay a mikecolay tamdaw. Itini romiˈad ni Solomon, tomirengay ko mikecolay tamdaw i fafekang no lowil, misinanot to taliyokay a demak, ano maˈaraw ko katalawan i, mamihadak to sarikec. Mikitini i tayal no mikecolay tamdaw, wa cipinang kita to samaanen ita midipot ko falocoˈ, miliyas to pifiyor ni Satan. O mikecolay tamdaw wa malacafay to misimaway to fawahan. (2 Samuil 18:24-26) Ano mingata ko ˈada i, o mikecolay ato misimaway tamdaw mamiˈedef to fawahan, midipot to niyaroˈay a finawlan. (Nihimiya 7:1-3) Mahecaday, ano o ngaˈayay falocoˈ no tamdaw mapahatatanamay no Fangcalay Cudad a malo makapahay a falocoˈ, ano sapicomodaw ci Satan anca sapifiyoraw to harateng no niyah ato nafalocoˈan, halaka anca kaolahan ita i, o makapahay falocoˈ ita wa mihadak to sarikec. Tatengilen ita a miliyas ko katalawan, mahecad o mikecolay tamdaw miˈedefay to fawahan. w19.01 17 fiedac 10-11 fatac

Wa o palinian no Fangcalay Cudad ko sapisaˈosi no malohemay malitengay to kaemangay salikaka, eca ko pinengneng no niyah ato nanaman no hekal a misawkit. (2 Timoti 3:16, 17) O malohemay malitengay ano mafiyor no serangawan no niyah, eca ka tano palinian no Fangcalay Cudad a minengneng to salikaka, ano mahaen ˈalomanay iraay ko tatodong a salikaka, awato ko pakayraan a manilnil. Nengnengen ko tinakoan no cecay kitakit, o malohemay malitengay no kasakopang patorodan i cecay padamaay sikawdan ko kalimlaan a ˈinorong, ngaˈayay ko demak ningra. Mihayay ko malohemay malitengay to matooray noniya padamaay sikawdan ko palinian no malohemay malitengay i Fangcalay Cudad, kawra cowaho ka nilnilen cingra malo malohemay malitengay. O harateng no matoˈasay a malohemay malitengay i kasakopang, kaemangayho koniya padamaay sikawdan, hato cowa ko malohemay malitengay a nengnengen. Teloc i, oniya padamaay sikawdan pakayni i noka kaemang hato cowa ka nilnilen. Itini roma kilac, iraay ko mahaenay misakakinihay harateng. Mihaenay, o palinian no Fangcalay Cudad ko sapilalat to salikaka, hamaan tano no niyah a harateng ko pisaˈosi o masakalimlaan! Mihaen to demak o midoedoay ci Yisan, aka kao papotal aca ko nengnengen a misawkit to tamdaw.​—Yohani 7:24. w18.08 12 fiedac 16-17 fatac

Haratengay saan pasadak tono tingnaw ato soci a lihaf iraay ko katalawan. Itini roma kilac, o mitosilay a demak ita macongeday. Tohatiniay a kilac, padetengay mipatenak ko misafelitay tamdaw to mararaway a lihaf, saparawrawaw anca maka cisasa ko harateng no salikaka. Tinakoen itini i Suwiay, patenakay ko KGB to sapaoraf a lihaf misafelitay ko mikayatay salikaka to finawlan ni Yihofa sanay ko sowal. ˈAlomanay salikaka pakasoˈlinay toniya mararaway a lihaf, telocto miliyasay to likakawa no Kawas, tada ka adayayanto! Kao ngaˈayay, ikor patikolay ko ˈalomanay salikaka i likakawa, kawrira o roma tamdaw tahanini cowa patikol i likakawa no Kawas, samanen malahdaway ko pakasoˈlin no falocoˈ nangra. (1 Timoti 1:19) Sasamaan kita ho eca ka tahalifa to hatiniay ka adayayan a teloc hani? Aka patenak kita to mararaway anca cowa ko soˈlinay a lihaf, aka patelas a pakasoˈlin to macadaay a lihaf. Hahapinangen ita to o soˈlinay anca makaniway koniya lihaf. w18.08 5 fiedac 8 fatac

Nolitengan a Krisiya sowal mitilidan, awaay ko piyawtinfohaw ilalomaˈ no lalakaw. Mihaenay, o sowal ni Yis, “soˈlinen ako kiso pasowal, anini mamikapot kiso i takowanan i Lakoing” ha, anca “anini soˈlinen ako kiso pasowal, o mamikapot kiso i takowanan i Lakoing” hokira? ˈAyaw no kinafalah ci Yis to ˈorip, na pasowalay to nisawawaan, o Wawa no tamdaw “tolo a romiˈad, tolo a dadaya i lalomaˈ no sera.” (Matay 12:40; 16:21; 17:22, 23; Marko 10:34; Dmak 10:39, 40) Mihaenay, tiya patayen ci Yis atoya mararaway tamdaw a romiˈad, cowa ka tayra i Lakoing. Ci Yis itiniay “i kaitiraan no mapatayay”, to pina romiˈad, ikor patikolen no Kawas a paˈorip cingra. (Dmak 2:31, 32) Cowa ka fanaˈ koya papatayen a mararaway to makakiˈokay ci Yis to madimadiay a tarokos, patayra cangraanan i kakarayan a Hongti Kitakit. (Luka 22:29) Roma i, oya mararaway tamdaw cowa ka picada to paputisem. (Yohani 3:3-6, 12) Mihaenay, o misowalan ni Yis toya mararaway, o itiniay i sera a lakoing, ano ikor o mamalaˈosi. w18.12 6 fiedac 17-18, 20-21 fatac

Misatapangay cangra nohatni a mitaˈong to ekim a kolong! Mafanaˈay ko Israil tamdaw to cowa ko midofdofay mihaen to demak, misakaniway to niyah to midopoay ci Yihofaan konini, mangalef o ‘misalisinay ci Yihofaan’ ko mitaˈongay to ekim a kolong, sanay ko sowal ni Aron. Samaanay ko harateng ni Yihofa to hatiniay a waywayan nangra hani? O misafelitay cangra sanay ko harateng Ningra. Pasowalan ni Yihofa ci Mosi, “kasimelangan ko demak nangra,” “miliyasto cangra to limoˈot [Ningra.]” ‘Mangolaway cangranan’ ci Yihofa, sapalaˈafoaw toniya faelohay a kitakit. (Kasadakan 32:5-10.) Ikorto, cowato ka palaˈafoen ni Yihofa ko Israil tamdaw. (Kasadakan 32:14) Soˈlin misangaˈay ci Aron to ekim a kolong, kawra soˈlinay a pasasiyor cingra a kalacafay to Lifi tamdaw midopo ci Yihofaan. Toya romiˈad pinaay patek a tamdaw pakayni pitaˈong to samiyay ko saka patay. Oya midopoay to Kawas a tamdaw, mikiˈokan no Kawas to papalemeden cangra.​—Kasadakan 32:26-29. w18.07 20 fiedac 13-16 fatac

Misaˈicel kita milifok to pihayda no nima hani? O kalo a tamdaw saheto sapilifokaw to pihayda no ˈakawangay picudadan, misasingdiay, ato lawla a hekal, kawra cowa ka hecad ko Krisciyang. Pakayni tonini, sowal ni Pawlo: “Mafanaˈto kamo to Kawas anini. Ikaka ko nika fanaˈ no Kawas i tamowanan. Nawiro pasayra haca kamo i [malonayay cangoˈotay a mararaway harateng,] awaay ko epoc a lekakawa no lisin saw? Nawiro mangalay kamo a miliyaw a malakoli nangra saw?” (Kalatiya 4:⁠9) Ano ngaˈay malo kafanaˈan no saˈakawangay Tatapangan a tamdaw tada kalikoanto! Makahiyay ci Yihofa malo ngaˈayay widang no mita, o cecay mikingkiway mihayay tonini, sowal ningra wa ngaˈay ko tamdaw ‘milifok to sadipot no Kawas’. Micada kita to sahayda no Kawas, malo widang Ningra, wa ciepocto ko kaˈorip.​—Patnakay 12:13, 14 w18.07 8 fiedac 3-4 fatac

Ano sapilayapaw to sadama no sarikec no Kawas i, wa palahadho kita to maolahay ato mikangodoay to Fangcaly Cudad a falocoˈ. (Amos 5:15) Sasamaan a matoor konini hani? Wa minanam kita tano ni Yihofa a harateng a minengneng to demak. Patinakoen: Marariday cowa ka ngaˈay ko fotiˈ iso paˈaraw to ising, sasalofen no ising ko mikaenan ato pakayraan iso a maˈorip, mararid a miwiˈawiˈ to tireng. Tooren iso ko sapaini no ising a midemak, ikor ngaˈayay ko minaroˈan, coko miakoˈid kiso to ising padama tisowanan ngaˈayto ko kaˈorip han. Mahecaday toni, pafeliay ko misangaˈay Tatapangan to sarikec Ningra, padama kitaanan miliyas to sakararawaw a macada ko roray, halo pisalof to kaˈorip no mita. Doedoen ita ko limoˈot no Fangcalay Cudad, eca ka mangah, eca ka pitakaw, eca ka pisaˈfit a midokaˈ to tamdaw, miliyasho to mariˈangay, miangangay ato malafoay a madadiˈiyay, mihaen o papairato taˈangayay saka ciepoc no mita! (Taneng 6:16-19; Paˈarawan 21:8) Tooren ita ko kahemekan ni Yihofa a pakayraan dademak, malifok ko adihayay sapalemed, wa matongal ko piakoˈid to nika pafeli ni Yihofa to sarikec, wa matongal ko kaolah ci Yihofaan ato sarikec Ningra. w18.06 17 fiedac 5-6 fatac

Mihaen ko pilicay ni Pilato calemcemay cingra to mamisasifod ci Yis to mirikecay, halatek. Sanay ko caˈof ni Yis: ‘Cowa ko noni hekal ko Hongti Kitakit ako.’ (Yohani 18:36) Cowa pikapot ci Yis to mirikecay, samanen o Hongti Kitakit ningra wa patirengen i kakarayan. Pasowal cingra ci Pilatoan, ‘sakatayni ako i hekal, wa misawacay to soˈlinay a kimad,’ sanay. (Yohani 18:37) Ano mahecad kita ci Yisan, cipinang to o maanan ko patorodan ni Yihofa, cowato ko mamikapot to misiikeday a demak no hekal, ano i falocoˈto, cowa ko mamihaen ko harateng. Kawra, sapihaenaw to demak, coko madoloay. O cecay milisoˈay to kasakopang a salikaka, sanay ko sowal: “Itini kilac no mita, o harateng no tamdaw matongalay ko misakakinihay, adihayay ko midamaay to finacadan no niyah, edeng misiiked ngaˈ masalof ko kaˈorip sanay. Kao ngaˈayay, misamacayay ko salikaka milasil to ngaˈayay lihaf no Hongti Kitakit, mansa iraay ko makelecay no Krisciyang. Mitalaay ko salikaka to Kawas misaysay to pasangaray ato cowa ka sadafdaf a demak.” w18.06 4-5 fiedac 6-7 fatac

Itini i Hipray Sowal a Fangcalay Cudad, edeng o saka 1 Rayray, Yopu ato Cikariya tolo a cudad ko milengoay ci Satanan, tatodong noniya ngangan i, “Misaˈadaay.” ˈAyaw no ira ci Misiya, hano caka rarid ko Fangcalay Cudad milengo ci Satanan hani? Cowa ka ciharateng ci Yihofa malo samacayen ci Satan, mihaenay mikitini i Hipray Sowal a Fangcalay Cudad cowa ka adihay ko milengoay ci Satanan ato nano demak ningra. Papitiliden ni Yihofa ko tamdaw to Hipray Sowal a Fangcalay Cudad, ho ngaˈay mahapinang no tamdaw to o cima ci Misiya, halo padama to finawlan no Kawas mikotod ci Misiyaan. (Luka 24:44; Kalatiya 3:24) Irato ci Misiya i, saka dademaken ni Yihofa cingra ato nisawawaan ningra a paihkal to adihayay pakayniay ci Satanan ato mitowakangay a coyoh. Mihaen ko demak ni Yihofa tada matatodongayto, samanen wa paikenen Ningra ci Yis ato mapasimalay a Krisciyang mipalaˈafo ci Satanan ato tatiihay a coyoh. (Loma 16:20; Paˈarawan 17:14; 20:10) Samanen citolasay ko ˈicel ni Akoma. Ci Yihofa, ci Yis ato madimadiay a coyoh wa padama kitaanan. Tiˈeren ita ko sadama nangra, wa ngaˈay miconged to ˈada. w18.05 22-23 fiedac 2-4 fatac

Caciheci kita, mihaen o sikawdan Ako wa saan ci Yihofa a minengneng kitaanan. (Matay 13:23; 21:43) Tokel no mita nanay padama to tamdaw malo Krisciyang, kawra itini sapatinako no Yohani 15:1-5, ora heci no mita cowa ko faelohay nisawawaan ko mitoroˈan. (Matay 28:19) Itini cowa ka olah to soˈlinay kimad a kilac, o roma Krisciyang awaay ko mapadamaay a tamdaw malo Krisciyang, ano o faelohay nisawawaan ko mitoroˈan no heci, oniya madimadiay a Krisciyang mahecaday oya cowa ka ciheci a caˈang. Cowa ka mahaen ko harateng ni Yis! Cowa ko papacieci kita to tamdaw malo Krisciyang, hanaca oya sidaˈitay a Yihofa cowa ka pacieci to sikawdan midemak to cowa ko mamadangar a demak nangra. O saali ni Yihofa kitaanan oyaan mamadangar ita a demak. (Limoˈot 30:11-14) Ano hatiraay i, ora heci ita o masamanay a heci hani? O saali ni Yihofa kitaanan a heci o mamadangar no mita a demak. O maanan a demak ko mamadangar ita hani? O patenakay to ngaˈayay ratoh no Kitakit no Kawas.​—Matay 24:14. w18.05 14 fiedac 8-9 fatac

Toniya hekal anini adihayay ko ˈaˈideman no pihakelongan, panganganan cangra to fokosi, sinpo, ato rapi. Mahecaday cangra to saka cecay hahekalan a ˈaˈideman no pihakelongan ‘mipenecay to soˈlinay kimad’ tano ‘makaniway micelol to soˈlinay Kimad no Kawas’. (Loma 1:18, 25) Tinakoen, miowingay cangra to “kinacecay malidong, tahadaˈoc malidong,” caka patay ko saloˈafang, ato miliyaw hofocen sanay a mararaway a kimad, miowingayho to micadaay ko Kawas to tongsinlien ato raramod nangra, sanay a mararaway harateng. O ˈaˈideman no mirikecay misamangahay a milipalaw to ˈalomanay. Paˈayaway ko Fangcalay Cudad to sasomowal cangra no ikor to “rihaday kita awaay ko katalawan” mahaenay a mangah! Tiya, ‘fahal sanay a laˈafo wa tangsol sa patefo cangraanan.’ Mihaenay, hamaan malipalaw no ˈaˈideman no mirikecay kita, hato maraayayho ko kahererekan noniya lekakawa no hekal sanay. Ihkalay mafanaˈ kita, ‘o kaira no romiˈad ni Yihofa, mahecaday o kaira no mitakaway to lafii.’​—1 Tisalonika 5:1-4 w18.10 7-8 fiedac 6-8 fatac

Pakaynian ni Yis i mapasimalay salikaka ningra, ato i lalomaˈay no lopayˈay siri a ‘ˈalomanay kakeridan,’ mikayat ato pakalalok ko matoleday ko falocoˈ a tamdaw toniya pasangaray a lintad. Mihaenay, o malohemay malitengay cowa ko ‘malo tawki’ a mikowan to pasoˈlinay falocoˈ no salikaka, oha ‘kapot matayal’ pakahemek cangranan. (Isaya 32:1, 2; 2 Korinto 1:⁠24) Patirengay ko tarokos ci Pawlo to ngaˈayay a taˈarawan. Patikamiay cingra to tahacadaay to sapalak a Krisciyang i Tisalonika a kasakopang: “Tona maolah kami i tamowanan saka, caay ka deng o ngaˈayay a ratoh no Kawas a cecay ko sapaini niyam i tamowanan. Halo ˈorip han niyam a kinafalah to saki tamowanan saan ko harateng niyam. Nawhani tada maolah kami i tamowanan.” (1 Tisalonika 2:⁠8.) Tolatekay, O noka pasowal aca a pakalalok to tamdaw caayho ka edeng. Pasowalan ni Pawlo ko malohemay malitengay to aniniay a sinael. w18.04 21-22 fiedac 6-8 fatac

Mihaenay, sapilifokaw to sapafeli ni Yihofa a pasalat ato haepoc, kalimlaan ko ‘pitadiˈec ci Yihofaan’, tatodong nonini wa patirengen ita ko kalawidang ci Yihofaan. (2 Korinto 3:16) Itiyaho itini i kohkoh, awaay ko noˈadingoan a harateng no Israil tamdaw. ˈArawhan maliyas nangra ko kalakoli i Icip, ˈatekakay ko falocoˈ nangra, mapohaway ko harateng nangra, o maharatengay sahtoay sapisaloaw to coos no niyah. (Hipray 3:8-10) O pairaan no fangcalay saocor ni Yihofa a pasalat, mikikakaay ko kangaˈay to piliyas no tamdaw i kalakoli a pasalat. O fangcalay saocor ni Yihofa padamaay to tamdaw miliyas to kalakoli no raraw ato patay, padamaayho to tamdaw miliyas to safakec no mararaway pihakelongan, o hatiniay a pasalat cowa ko no tamdaw a ˈicel ko sakalifok. (Loma 6:23; 8:⁠2) Tada makapahay ko sapafeli no Kawas a pasalat! Soˈlin o koli anca mapalit ko tamdaw, wa ngaˈayho milifok to sapafeli no Kawas a pasalat.​—Satapangan 39:20-23. w18.04 9 fiedac 3-5 fatac