Saka 6 Folad

Pakaynien i tarokos koniya sowal, oniya sakiˈok pakalalokay to falocoˈ! Soˈlin cowa ka cipinang ko tarokos to mamahererek to ko ˈorip no mikayatay cangranan a Yisan, kawra cowa ko cecayay a matoˈol cangra. Makahiay ci Yihofa a pacaˈof to satolon no tarokos, padama cangranan a midemak to mitosilay a ˈinorong. Caka halafin, soˈlinay malifet nangra ko pitengil ni Yihofa to satolon nangra, padama cangraanan. (Dmak 4:29, 31) Anini, mihadidi kita a ciheci, wa mahecad to tarokos a malawidang ni Yis. Cowa ka hatini aca, wa ngaˈay pasoˈlin kita makahiay ci Yihofa pacaˈof to satolon no mita, padama kitaanan miremo to pasangaray i pitosilan. (Filipi 4:13) Tada mahemekay kita tengilen no Kawas ko satolon, hanaca ngaˈay a malawidang ni Yis! Oniya mikitiniay ci Yihofaan a sapatelong paˈicelay kitaanan padotoc a ciheci.​—Yakop 1:17. w18.05 21 fiedac 17-18 fatac

Somowal ci Pawlo toniya sowal caho ka lima miheca, mahapinangay no itiniay i Yirusalim Yutaya a Krisciyang to mangataay ko romiˈad ni Yihofa, maharatengayho ko misowalan ni Yis a tahapinangan, mafanaˈ to mamilaliw tayra potal no niyaroˈ ngaˈ, madipot ko ˈorip. (Dmak 2:19, 20; Luka 21:20-22) Isaka 70 miheca, o romiˈad ni Yihofa pakaynian i sofitay no Loma a misawkit to Yirusalim a mafekad. Anini, iraay ko lalangian ita a pasoˈlin to mangataayto ko katalawan a romiˈad ni Yihofa. (Yoil 2:11) Ya pairasolay ci Cifaniya pasowalay: “Mangataayto koya tadaromiˈad no Tapang, maraodayto!” (Cifaniya 1:14) Oniya sapairasol milingatay kitaanan. Mangataayto ko romiˈad ni Yihofa, mihaenay ‘sasipaˈicel ita a kaciharateng ko ngaˈay to sakasasiolah ato sakangaˈayaw no demak ita.’ (Hipray 10:24) Matongal ko kaciharateng ita to salikaka, ano misaali ko salikaka i, wa mafanaˈto kita sasamaan a pakalalok cangranan. w18.04 20 fiedac 1-2 fatac

Itini ˈayaw no midemak ci Yosuwa, O sapakalalok ni Yihofa maedeng misayaray to falocoˈ ni Yosuwa! Cowa ko tekedan aca a sikawdan ko pakalalokan ni Yihofa, pakalalokay to polong a finawlan. Tinakoen, mafanaˈay ci Yihofa to misaaliay to sahinom ko maholiway tayra i Papilon a finawlan Ningra, paˈayaway mikiˈok cangranan: “Aka ka talaw. Ira Kako a mikapot i tamowanan. O Kawas namo Kako. O maanho ko katalawan namo saw? O papatanekteken Ako kamo a mipadama. O dadipoten Ako kamo a paˈorip.” (Isaya 41:10) Ikorto, pakalalokan ni Yihofa ko salakatay a Krisciyang, ano aniniayto a finawlan no Kawas mahecaday micada to sapakalalok. (2 Korinto 1:3, 4) Pakalalokan ni Yihofa ko wawa Ningra ci Yis. Micada to inoˈ ci Yis i, matengilay ko ngiha nai kakarayan saan: “O kakaolahan Ako a wawa konini. O kakahemekan Ako cingra.” (Matay 3:17) Tiya matayal ci Yis i fafekang no sera, oniya sowal tada paˈicelay i cingranan! w18.04 16 fiedac 3-5 fatac

Anini, halatek miharateng ko ˈalomanay tamdaw, oniya sapalimoˈot ni Yihofa, awaay ko pasalat ni Atam midemak to niharatengan no niyah. Saka mahaen ko harateng nangra, samanen cowa ka ˈaraw nangra, ira ko pasalat a mipiliˈ ato ira ko fadangalan misaˈosi to palinian no ngaˈayay ato tatiihay, o tosaay a demak kora. Iraay ko pasalat ni Atam aci Ifa mipiliˈ to cowa ko mamidofdof to Kawas, kawra edengan ci Yihofa ko cifadangalay misaˈosi to palinian no ngaˈayay ato tatiihay, oya sapisaˈosi to ngaˈayay tatiihay a kilang mitaypiyaway to fadangalan ni Yihofa. (Satapangan 2:9) O ciolahay ci Yihofa, pakaynian Ningra sapalimoˈot pasifanaˈ ci Atam aci Ifa, misamaan kalasaka dademak to iraay a pasalat nangra. Telocto, malipalaway ni Satan ci Ifa. Mihaen ci Atam aci Ifa malifokay ko adihayay pasalat han? Cowa. Misahalaka ci Atam aci Ifa to pasalat misaˈosi to ngaˈayay ato tatiihay, ˈarawhan mihaenay a malahdaw ko soˈlinay a pasalat. w18.04 5-6 fiedac 9-12 fatac

Cowa ko siniˈada aca ni Yihofa to malifaay no finawlan, midemakayho Cingra a padama cangranan. Tinakoen, malakoli ko Israil tamdaw i Icip i, cipinangay ci Yihofa to roray nangra, sapalahdawaw to pades nangra. Pasowalan ni Yihofa ci Mosi: “Maˈaraw Ako ko nika lakoli no finawlan Ako i Icip. Matengilto Ako ko tangic nangra to nano nipisamsam no misimaway i cangraan. Mafanaˈayto Kako to nipisemsem nangra. O sakatayni Ako i, o sapaˈoripaw i cangraan a paliyas nai pisamsam no Icip a tamdaw.” (Kasadakan 3:7, 8) Matomesay ko siniˈadaay ni Yihofa to finawlan Ningra, paliyas cangranan nai kalakolian, milifok to pasalat. Ikor no pina soˈot miheca, maˈodis no ˈada ko Israil tamdaw i Mikiˈokan Pala, samanay ko demak ni Yihofa hani? Sanay ko Fangcalay Cudad, maˈaraw ni Yihofa ko Israil tamdaw, “o nika adayay no [Kawas] i cangraan to nano nipisemsem ato nika samsam nangra.” Siniˈadaay cangranan. Sapadamaaw cangranan, hato minilnilay to kakitaan a milidong cangranan.​—Kakitaan 2:16, 18. w19.03 15 fiedac 4-5 fatac

Salakatay tosa no 10 sarikec misaˈosiay to edengan ci Yihofa ko dadokoen no Israil tamdaw, mirikec cangranan aka midoko to samiyay. (Kasadakan 20:3-6) Milasil ci Yihofa toniya sarikec cowa ko saka ciepoc no Niyah, pakayniay saka ciepoc no finawlan Ningra. Ano midoko cangra to makaniway kawas, tahalifaay to adihayay a roray. Kawra ano madimadi cangra to Kawas, masadafdaf ko picada to tao, wa palemeden no Kawas cangra. (1 Hongti 10:4-9) Ano caka pidofdof ko salikaka to palinian no Kawas a midokaˈ kitaanan, hamaan miroroh ci Yihofaan. Maolahay ci Yihofa kitaanan, mafanaˈay to cowa ka sadafdaf ko macadaay ita. Marocekay ko kafanaˈ ni Yihofa to roray ita, mataˈlifay to kafanaˈ no wina to roray no wawa. Soˈlin cowa ko tatangsol Cingra a midemak, kawra ano maraod ko misaˈosian a toki, wa sawkiten Ningra ko mikariˈangay to tao cowa pasasiyor a tamdaw. w19.02 22-23 fiedac 13-15 fatac

ˈAyaw no pina lipay no Piharatengan a Saˈopo, o kamok no saˈopo oha mamisaˈicel a milengo to taˈarawan ni Yis, ato paihkalay cingra to misapoeneray, kinafalah to ˈorip malo sapatefoc. Wa miocor kitanan mitodong to pisapoener ni Yis, ano misiˈayaw to pasangar i, oha mamakalim a midofdof to araaw ni Yihofa. Patirengay ci Yis to maanan a taˈarawan hani? Iˈayaw no kinafalah cingra to ˈorip a pina romiˈad, mafanaˈayto cingra, wa mapakangodo no ˈada cingra, mipekpek cingranan, salikor mipatay cingranan. (Matay 20:17-19) Nikawrira, kamayan cingra kinafalah to ˈorip. Tiya maraod ko toki, itini i Kismani, pasowalan ni Yis ko madimadiay a tarokos: ‘Ka lomowad, tatato kita. Nengnengen! Iraayto koya pacakayay takowanan.’ (Matay 26:36, 46) Dotoc, mitatoyay to sapilood a lalosidan a tamdamdaw, mirepet cingraan, raod sato cingra, sanay: “Ano kako ko nikiliman namo i, papilaliwen konini a nisawawaan ako.” (Yohani 18:3-8) Tada timoloay ci Yis! Mahecaday, misaˈicelay ko mapasimalay Krisciyang ato roma lopayˈay siri, mitodong ci Yisan a paihkal to timolo. w19.01 27-28 fiedac 7-8 fatac

O madaˈmaˈay mahecaday o makapahay a coka. Hano hatira hani? Ano sapilaheciaw to cecay coka, misaaliay to masakenaay a makapahay kodong. Mamalo madaˈmaˈay a tamdaw kita, papalahad to pina makapahay a capeling, tinakoen o misapoeneray, midoedoay, damsayay, timoloay. Ira ko mahaenay a capeling ita, wa ngaˈay pakahemek ci Yihofaan. Misaaliay ko Kawas to finawlan Ningra damsayen ko waywayan. (Matay 5:5; Kalatiya 5:23) Mitoor kita to saali no Kawas a dademak, tada mangolaway ci Satan. Soˈlin o misapoeneray a tamdaw kita, damsayay a micada tono hekal a tamdaw, kamayanay a ˈinteh kitaanan. (Yohani 15:18, 19) Ano sapilowidaw kita ci Satanan, misaaliayho to timolo. Misatakaraway a tamdaw, cowa ko madaˈmaˈay, cowa pakaˈmet to keter, cowa ka pidoedo ci Yihofaan, marocekay ni Satan koniya pinangan. Pafafidaˈay ko misapoeneray tamdaw to sahalaka ni Satan, cowa ka hatiniay aca, misawacayho cangra to samangah ningra, ano o maananto ko sowal ato midemakan ningra, cowa ko pakaconged to madaˈmaˈay tamdaw a midoko ci Yihofaan. Mansa ˈintehay cingra to madaˈmaˈay a tamdaw!.​—Yopu 2:3-5. w19.02 8-9 fiedac 3-5 fatac

Mafanaˈay ci Yihofa, o lalooden no [makakomoday sofitay no] Mitiya- Pirsiya ko Papilon, mamatalaw ko itiniay i Papilon a tamdaw. Wa saka dademaken ni Yihofa koniya taˈangayay sofitay a milidong to finawlan Ningra, paliyas to pikowan no Papilon. (Isaya 41:2-4) [Tiya mafanaˈto ko Papilon tamdaw ato ilalomaˈay no Papilon a roma finacadan to aairato ko ˈada a milood i, wa masasowasowal: “Katanektek kita,” wa saan pakalalolalok.] Mamisangaˈ cangra to samiyay, nanay midipot ko makaniway kawas cangranan. (Isaya 41:5-7) Kawra, mihinoman ni Yihofa ko maholiway a Yutaya tamdaw saan: ‘Kamo cowa ka hecad to roma tamdaw o mitaˈongay i Takowanan a Israil i . . . Hamaan cariraw, samanen o Kawas iso Kako.’ (Isaya 41:8-10) Sinanoten, sowal ni Yihofa, “o Kawas iso Kako,” mihaen ko sowal Ningra papadama to madimadiay finawlan Ningra pakasoˈlin, cowa ka pawan Ningra cangra, kamayan o finawlan Ningra cangra. Mihinoman ni Yihofa cangra: ‘Oha madipot Ako kamo . . . milidong tamowanan.’ Oniya sowal maedeng paˈicelay to Yutaya tamdaw, misiˈayaw to mamifekad a demak.​—Isaya 46:3, 4. w19.01 4 fiedac 8 fatac

Kina toloay ci Yihofa nai kakarayan a pasowal, Marko 1:9-11 maˈoningay ko sakina cecay ni Yihofa pasowal nai kakarayan, sanay: ‘O Wawa Ako kiso, o kaolahan Ako. O kahemekan Ako kiso.’ Matengil ni Yis ko sowal no Wama paihkal to olah ato pakasoˈlinay cingranan i, maedeng matemeray ko falocoˈ! Pakayni to sowal ni Yihofa mahapinangay ita ko toloay a demak. Saka 1: Ci Yis o Wawa ni Yihofa. Saka 2: Tangongolay ko olah ni Yihofa to Wawa Ningra. Saka 3: Mihaydaay ci Yihofa to Wawa Ningra. O Wawa Ako kiso.’ Pasowal ci Yihofa toniya sowal i, paihkalay to tangongolay ko kalalaˈed aci Yisan. Ya i kakarayanho ci Yis i, o ˈadingoan a tireng ko Wawa no Kawas. Kawra micada ci Yis to inoˈ i, tano fangcalay saocor no Kawas a mipasimal i cingranan, malo o mapasimalay a Wawa Ningra, wa ngaˈay tayra cingra i kakarayan a malo minilnilan no Kawas a Hongti ato sakakaay saysi. (Luka 1:31-33; Hipray 1:8, 9; 2:17) Mansa micada ci Yis to inoˈ i, pasowalay ko Wama to: “O [kaolahan] Ako a Wawa kiso.”​—Luka 3:22. w19.03 8-9 fiedac 3-4 fatac

Caka halafin masangaˈ ko tamdaw, pafeliayto ci Satan to mararaway sapaini i tamdaw. Misatakaraway cingra, pasowal ci Ifaan ato faˈinay ningra, o niyah saan ko misaˈosi to sasamaan ko kaˈorip, ano mihaen wa matongal ko lipahak sanay. (Satapangan 3:1-6) Misatekeday ko harateng ni Satan, nanay midofdof cingraanan ci Atam aci Ifa ato teloteloc nangra, midoko cingraanan a eca ka pidoko ci Yihofaan. Kawra, awaay ko sapafeli ni Satan cangranan, pafelian ni Yihofa cangraanan ko kihcod o ngaˈayay tihi nangra, makapahay a kitiraan, ato malefotay a tireng ngaˈayay a tahadaˈoc maˈorip. Kawraan, cowa pidofdof ci Atam aci Ifa to Kawas, miliyasay to Kawas, ka adayayan ko teloc. Mahecad o mipitinan a hana palidlid sato a mafadiˈ, ci Atam aci Ifa ato teloteloc nangra, micadaay to roray, ikorto mapatayay. (Loma 5:12) Soˈlin mahaen, kamayan eca ka pidofdof ko ˈalomanay to Kawas, toor sanay to harateng no niyah a maˈorip. (Ifiso 2:1-3) Telocto mikitini i pakayraan no tamdaw maˈaraway ita, ‘misaˈada ci Yihofaan, awaay ko taneng’ no tamdaw. w18.12 20 fiedac 3-4 fatac

Citanengay ko tarokos ci Pawlo, adihayay ko sifanaˈ, mafanaˈayho to Krisiya ato Hipray a sowal. (Dmak 5:34; 21:37, 39; 22:2, 3) Kawra, ano sapafafidaˈaw cingra to demak i, wa tano Kimad no Kawas a misaharaterateng, cowa ko mamitoor to taneng no hekal a midemak. (Dmak 17:2; 1 Korinto 2:6,7) Mansa iraay ko ngaˈayay a minaroˈan i pitosilan, mamilifok cingra to tahadaˈocay a ˈorip noikor. (2 Timoti 4:8) Soˈlin o harateng no Kawas mikikakaay to harateng no hekal. Ano tooren ita ko harateng no Kawas a maˈorip, wa milifok to hemek. Kawra, cowa ka pacieci ci Yihofa kitaanan, pahecad to harateng Ningra, o ‘madimadiay citanengay a koli’ ato malohemay malitengay, cowa ko mamiˈmet to harateng no mita. (Matay 24:45; 2 Korinto 1:24) Soˈlinay i, papalahad kita to harateng ni Yihofa. w18.11 20-21 fiedac 12-13 fatac

Pakaynian no Kawas ci Isayaan a paliˈayaw, ano patikol i nalacolan ko finawlan Ningra cowa ko mamisiˈayaw to katalawan a pakayraan, cowa ko cacalemcem to maˈodis no ˈaˈadopen ato mariˈangay a tamdaw, wa rihaday maemin cangra. (Isaya 11:6-9; 35:5-10; 51:⁠3) Masowalayho no sapairasol ni Isaya “o mamatiya o nika kakahad no riyar ko nika tenak no fanaˈ no tamdamdaw to pakayniay i Yihofa itini i polong no hekal,” mihaenay o hatiniay a pakayraan, cowa ko itini aca i Israil tamdaw. Miliyaway ci Isaya pasowal to patikolay i nalacolan a Israil tamdaw, hamaan matalaw to ˈaˈadopen ato mariˈangay a tamdaw. Roma i, samanen kadofahay to nanom, wa kadofah ko mipanayan, mahecaday o Itin. (Satapangan 2:10-14; Yirimiya 31:12) Malaheciayto a malaˈosi ko sapairasol han? Cowaho, samanen cowa ka pidemak ko Kawas to kafahkaˈan a miadah to adada no Israil tamdaw itiya, tinakoen, cowa pakaˈaraw ko mapohaway. Mihaenay, ano ikor wa malaˈosi no Kawas koniya sapairasol ato adahen Ningra ko adada no tamdaw. w18.12 5 fiedac 11-12 fatac

Mitokelay kita padadotoc midofdof to soˈlinay kimad a midemak tahadaˈoc. Samaan kita paˈicel to saˈosi no falocoˈ a midofdof to soˈlinay kimad a midemak hani? Padadotocen ita micekiw a tangongol ko pidotim to soˈlinay kimad no Kawas. Miˈaca to soˈlinay kimad micapiday to micerid a milimasmas to toki, micekiw to Fangcalay Cudad. Mihaen kita wa matongamatongal ko kaolah to soˈlinay kimad, wa misaˈosi cato paˈacaen ko soˈlinay kimad. Cowa ko pilengo aca no Taneng 23:23 to miˈaca to soˈlinay kimad, pasowalayho to mamiˈaca kita to ‘taneng, sapirikec, saka cipinang.’ Cowa ko sifanaˈ aca, misaka dademakho to soˈlinay kimad ngaˈ ngaˈay. Ano iraay ko cipinangay a ˈicel ita, mamahapinang ita to kalaliting no faelohay mananamay a soˈlinay kimad ato ˈayaway mananamay a soˈlinay kimad. O taneng wa padama kitaanan midofdof to mananamay a soˈlinay kimad a midemak. Cowa ka hatini aca, minanam kita to soˈlinay kimad wa mahapinangto iraayho ko maanan a sasalofen no niyah, mamahemek kita micada to nai Fangcalay Cudad a sarikec, samanen o epoc no sarikec mikikakaay to linkim.​—Taneng 8:10. w18.11 9 fiedac 3 fatac; 11 fiedac 13-14 fatac

O maanan ko misalimlaan iso hani? Wa oya madoloay a dafong ko sapifalic iso han? Pakaynien i patafangayto to tireng ci Yihofaan a tamdaw, oniya tosa a salicay cowa ka pasangar a pacaˈofen, samanen o sakakaay misakaretengan ita, o kalalaˈed no niyah aci Yihofa, mansa cowa ko sapilifokaw to maanan a dafongan a mifalah toniya kalimlaan a kalawidang. Misaaretengayho kita to soˈlinay kimad, samanen cipinang to soˈlinay kimad wa ngaˈay patireng to ngaˈayay kalalaˈed to kakarayan a Wama. (Kolosay 1:9, 10)O kasapaan a singsi ci Yihofa, pakayniay i Fangcalay Cudad a pasifanaˈ kitaanan to adihayay a demak. Tinakoen, paihkalay ci Yihofa kitaanan to o maanan ko tatodong no ngangan Ningra, ato makapahay a capeling Ningra. Mifanaˈayho kitaanan, milimasmasay Cingra to sapatefoc, kinafalah to wawa no Niyah ci Yisan, paihkalay konini tada maolahay Cingra kitaanan. O roma, masowalay ni Yihofa i Fangcalay Cudad ko Hongti Kitakit ni Misiya, wa itini i sera a Lakoing tahadaˈoc a maˈorip. Itini Fangcalay Cudad pasifanaˈay ci Yihofa kitaanan, sasamaan ko waywayan a maˈorip. Misalimlaay kita toniya soˈlinay kimad, samanen o soˈlinay kimad papadama kitaanan miingid to misangaˈay a Tatapangan. Ono kaˈorip ita wa ira ko epoc. w18.11 3 fiedac 1-2 fatac

O samangahay ngaˈay milipalaw to tao, kawra cowa ka lipalaw ci Yihofa. Samanen, “mawacay a maemin a maˈaraw no mata Ningra ko nisangaˈan Ningra.” (Hipray 4:13) O cecay mararamoday Krisciyang. ci Ananiyas aci Sapfira sapilipalawaw to tarokos. Pacakayan nangra ko omah, ˈarawhan mimingay ko pakiyahoan nangra a payci, kawra mieminan niyam a pakiyaho, sanay misamangah to tarokos. Mihaen ho masemer ko kasakopang to hinapaladaˈay cangra, sapacakataw to ngangan no niyah i kasakopang. Ihkalay a mahapinang no Kawas koniya tatiihay a waywayan nangra, misawkitan cangra a misayfang. (Dmak 5:1-10) Samaanay ko harateng ni Yihofa to misamangahay hani? Sowal no Fangcalay Cudad ci Satan ato cowa pasasiyor a milipalaway tamdaw wa mafahkol tayra “i miwarakay ko ˈacefel a namanamalan.” (Paˈarawan 20:10; 21:8; ˈOlic 5:6) Sowal no Fangcalay Cudad, o Kawas “caay ka matiya o tamdaw ko Kawas a misamangah a somowal”, hanaca “caay ko misamangahay ko Kawas.” (Saˈosi 23:19; Hipray 6:18) Mihaenayho ko sowal no Fangcalay Cudad: ‘Kaˈintehan ni Yihofa ko . . . misamangahay a sema.’ (Taneng 6:16, 17) Ano makalimay kita malo widang no Kawas, o tatooren ita ko saali Ningra, malo soˈliˈlinay a tamdaw. w18.10 8 fiedac 10-13 fatac

Haratengen ita ko cecay pakayraan, ano misaali ko tawki iso pasadak to payci midama to cecay lisin, oniya demak milingatay to mararaway pihakelongan, wa samaan ko demak iso hani? Hamaan tahinito pifekadan no pasangaray itiya saho misimsim, no hatiniho a misimsim to harateng ni Yihofa. Ano mihaen, mifekad ko mahecaday a demak i, wa ngaˈay kiso ihkal mafanaˈ to sasamaan pasowal, sasamaan ko hademak. Roma i, ano saka madimadiaw kita ci Yihofaan, misiˈayaw to macalohay no paisingay a demak, wa isalakat midotim to harateng ni Yihofa. Manaokaniw cowa ko papacomod kita i tireng to ˈilang. Kawra, o roma sapiadah a demak macapiday ko ˈilang, o tatooren no Kriciyang ko safalod no Fangcalay Cudad a misaˈosi. (Dmak 15:28, 29) Hatiraay, wa hacowa kita a misimsim toniya demak hani? Tahira to kita i pipaisingan a toki han? Mihadidiay kita to adada itiya alatek, itini laeno no saroero caloh wa saan a misaˈosi. Mihaenay, nohatiniho mikilim to lalakaw, mitoor to saˈosi iso a misaday to iraay ko noholic sapaising a minkiw, masasowalho to ising samaanay ko saˈosi no miso. w18.11 24 fiedac 5 fatac; 26 fiedac 15-16 fatac

Mahecaday o siniˈadaay a pakaenay ci Yihofa, miˈafofoan ni Yihofa ko finawlan, mipohpoh cangranan, ato milidong cangranan nai sacoˈay no ˈada. Oniya soˈlinay kimad misayaray kitaanan, samanen mingataayto ko hatolas noniya lekakawa no hekal! Padotocay ci Yihofa miharateng to saali no finawlan, tangasa i ka iraan no taˈangayay a padiˈing. (Paˈarawan 7:9, 10) Mihaenay, itini i taˈangayay a padiˈing, matoˈasay anca kaemangay, masamoˈay, cato ka makokiˈ marawraw a samodikoh sa. Misinanotay cangra to sowal ni Yis: “Kahalamham ko falocoˈ namo. Nawhani o airato ko papaˈorip tamowanan.” (Luka 21:28) O “Kok” o makomoday a kitakit. Soˈlin misiˈayaw to sacoˈay, o finawlan no Kawas wa padotoc a tanektek ko pasoˈlinay falocoˈ. (Icikil 38:2, 14-16) Hano iraho ko pakasoˈlinay falocoˈ no finawlan no Kawas hani? Samanen, mafanaˈay cangra to cowa ka falic ci Yihofa, ciharatengay ato damsayay to finawlan Ningra, halo milidong cangraan.​—Isaya 26:20. w18.09 26-27 fiedac 15-16 fatac

Haratengen hena, matengil no Israil tamdaw koniya sowal hahakowa ko kahemek hani! Pakasoˈlinay kita, cowa ko pisalimla aca ni Yihofa to mihodopay Cingranan a tamdaw, hanaca maolahay cangranan. Sowal no Fangcalay Cudad: “Mikapot i tisowanan ko Tapang a Kawas iso, o tadamaanay a ˈicel Ningra ko saka pakalowid iso. Lipahak ko Tapang i tisowanan,” sanay. (Cifaniya 3:16, 17) Ano samaanayto ko malifaay no finawlan no Kawas a pasangaray, wa padotoc ci Yihofa a midama ato misayar cangranan. Sanay ko sowal no Kawas: ‘Wa mahecad kamo o ˈengaenga a komaen to hacol, ˈafofoen i falohang a mipohpoh, itini cepiˈ a mikalona. Samanay ko wina a misayar to lomahadayto a wawa, wa mihaen Kako a misayar to finawlan Ako.’ (Isaya 66:12, 13) Miˈafofoan no sidaˈitay a wina ko ˈengaenga i falohang, anca mikakowi to ˈengaenga, itini cepiˈ a mikalona. Tada kasemeran koniya sasing! Tano mitemeray to falocoˈ a pakayraan ko pitadtad no Kawas, tangongolay ko kaciharateng ato kaolah Ningra to madimadiay sikawdan Ningra. Pakasoˈlinen, misalimlaay ci Yihofa kitaanan maemin.​—Yirimiya 31:⁠3 w18.09 13-14 fiedac 6-7 fatac

Nolitengan Israil iraay ko adihayay a toki patafang to niyah padama to tao. (Kasadakan 36:2; Nihimiya 11:2) Anini, ngaˈay kita patafang to toki, dafong ato inaneng no niyah a padama to salikaka. Ano makahi kita patafang to niyah, wa taˈakay ko hemek, mamalifok ko adihayay a sapalemed. Makahi kita a mirienang to tayal no likakawa no Kawas, wa adihay ko faelohay a widang. Fafahiyan salikaka ci Maci, 18 miheca cingra mirienang to patirengay to Hongti Kitakit kasaˈopoan a tayal. Toniya pina miheca, ciharatengay cingra to kaemangay a fafahiyan salikaka, pasifanaˈ cangranan to inaneng a dademak. Mahapinangay ni Maci, mirienang to patirengay a demak iraay ko toki a mapakalalolalok to salikaka. (Loma 1:12) Ano tahalifa ci Maci to pasangar i, o widang ningra i katayalan paˈicelay cingranan. Mirienangayto kiso to patirengay a tayal no likakawa han? w18.08 25-26 fiedac 9, 11 fatac

Mitilid ci Pawlo toniya sowal i, maedeng 30 ko mihecaan ni Timoti, kawra pafelianto ni Pawlo cingra to taˈangayay a ˈinorong. Ano o mananto a lalangian ko sapihadak ni Pawlo to limoˈot, wa minanam kita to cecay kalimlaan: Hamaan misakahmaw to kaemangayho a salikaka. Haharatengen ita, ci Yis itini 30 ira ko pina ko mihecaan a malaheci ko ˈinorong i fafekang no sera. Alatek itini i serangawan no mita, cowa ka ngodongen ko kaemangay tamdaw, ano mahaenay, o roma kaemangay salikaka i kasakopang, iraayto ko tatodong malo padamaay sikawdan ato malohemay malitengay, wa cisasa ko harateng no malohemay malitengay a minilnil cangraanan. Haharatengen no malohemay malitengay, cowa ka somowal ko Fangcalay Cudad to hakowa ko mihecaan no salikaka ngaˈ manilnil malo padamaay sikawdan ato malohemay malitengay.​—1 Timoti 3:1-10, 12, 13; Titus 1:5-9. w18.08 11-12 fiedac 15-16 fatac

Saka tatodongaw no misaˈosian, kalimlaan ko matatodongay a lalakaw no mita. Mihaenay, oha mamisinanot kita mipiliˈ to micadaan a lihaf. (Filipi 4:8, 9) Hamaan palaken ita ko toki, minengneng to cowa ka soˈlin a sinpong anca cowaho ka hapinangen a tikami no tingnaw. Kakiriwiˈen ita miliyas kono misafelitay to kimad a wangcan, samanen sahtoay o mararaway ko sowal nangra, mamipalak to pasoˈlinay falocoˈ no finawlan no Kawas. O tatiihay a lihaf wa mararaw ko pisaˈosi no tamdaw. Aka a pisakahmaw to pipalak no mararaway lihaf to harateng ato falocoˈ no mita.Tinakoen, miocoran ni Mosi ko 12 a misolapay papinengneng to Mikiˈokan a Pala, o mamoetepay misolapay o mararaway a lihaf ko misowalan. (Saˈosi 13:25-33) O tatiihay a safanaˈ nangra patoleday to falocoˈ no finawlan ni Yihofa. (Saˈosi 14:1-4, 6-10) Cowa pihapinang ko Israil tamdaw to soˈlinay demak, cowa pitadiˈec ci Yihofaan, pakasoˈlinayho to mararaway lihaf.w18.08 4 fiedac 4-5 fatac

Alomanay cowa ko Krisciyang a tamdaw hato ngaˈayay ko waywayan nangra, cowa ka pidemak to mararaway a demak. Kawrira, wa ngaˈay kiso misawidang to hatiniay a tamdaw han? Haratengen mararid a micawmaˈ to hatiniay a tamdaw wa samaan ko pilingat to kalawidang iso aci Yihofa. Wa padama cingra tisowanan matongal ko ngaˈayay kalalaˈed iso ato Kawas han? O maanan ko misaaretengan nangra hani? O sasowalen nangra sahtoay o nanaman no hekal, payci, tingnaw a dafong, lawla anca pakadafongay a demak hokira? Marariday cangra milikaf to tao anca somowal to kaacekan a sowal han? Mihadakay ci Yis to sarikec: “Ano masamaanay ko falocoˈ noya tamdaw i, hatiraay ko masadakay i ngoyos ningra.” (Matay 12:34) Ano mahapinang iso ko micawmaˈan iso a tamdaw, mamipalak to ngangan iso i ˈaˈayaw ni Yihofa, lowanen ko kacacawmaˈ cangranan a toki, ano ngangaˈay i, hawad han a misawidang cangra.​—Taneng 13:20. w18.07 19 fiedac 11 fatac

80 ko mihecaan ni Mosi i, patorodan ni Yihofa cingra to taˈangayay a ˈinorong, mamilidong to misakolian no Icip a Israil tamdaw. (Kasadakan 3:10) Kinapinaay ci Mosi paihkal to Kawas, awaay ko pakayraan no niyah miremo toniya ˈinorong. Soˈlin hatira, kamayan mihadidi ci Yihofa ci Mosian, pafeliho cingranan to haˈicel midemak to kafahkaˈan. (Kasadakan 4:2-9, 21) Wa ngaˈay Cingra pacieci ci Mosian a midofdof, kawra cowa pihaen ko demak Ningra, sidaˈitay a mihadidi ci Mosian, hato rihadayay ko falocoˈ noniya misapoeneray ko falocoˈ a sikawdan. Damsay ci Yihofa ci Mosian, samanayto ko minaroˈan hani? Malo mikiriwiˈay a ˈaˈideman ci Mosi, minanamay cingra to taˈarawan no Kawas, damsay to tamdaw, patado to tamdaw a miharateng. Samanay kiso hani? Wa sasamaan kiso misaka dademak to kakeridan a fadangalan hani? Mahecaday ci Yihofaan misinanotay to harateng no tao, damsay ato mihadidiay, oniya capeling masakalimlaan konini. (Kolosay 3:19-21; 1 Pitiro 5:1-3) Ano misaˈicel kiso mitodong ci Yihofaan, halo pasayra i ‘kasapaan a Mosi’ ci Yisan a minanam, mamatongal ko damsayay ato siniˈadaay ko pinangan iso a misayar to tamdaw.​—Matay 11:28, 29 w18.09 24-25 fiedac 7-10 fatac

Anini pasinoway kiso to salikaka, micowat to makelecay no kasakopang han? Wa ngaˈay kiso misaˈicel a “misakakahad to falocoˈ”, misawidang to ˈalomanay a salikaka han? (2 Korinto 6:11-13) Misamaan kiso misaˈicel a pataengad to likat no soˈlinay kimad no Fangcalay Cudad i fiyafiyaw hani? Ira ko mangodoay waywayan ato damsay ko sowal, makalim cangra saka cipinangaw to Fangcalay Cudad halatek. Licayen ko niyah: “Minengneng ko fiyaw takowanan, o masamaanay a tamdaw hani? Mikorac kako to taliyok no lomaˈ, ngaˈayay ko pisawacay to fiyafiyaw han? Tala ˈayaway kako a padama to fiyaw han?” Ano masasowal kiso to salikaka i, ngaˈayay licayen cangra, sasamaan tano ngaˈayay waywayan mitemer to falocoˈ no salawina, fiyafiyaw, cafay matayal anca cafay micudad, wa matengil iso ko ngaˈayay milifetan halatek.​—Ifiso 5:9. w18.06 24 fiedac 13-14 fatac

Mahaenay ko harateng noya mipatayay ci Stifanoan. (Dmak 6:8, 12; 7:54-60) O pakinaliay ˈifowa ko falocoˈ to pihakelongan a tamdaw adihayay ko tatiihay a demak, tinakoen mipatayay to tamdaw, pakayniay i Kawas ko pidemak niyam sanay cangra, ˈarawhan o misafelitay to sarikec no Kawas. (Kasadakan 20:13) Mahapinangayto, mararaway ko sakayat no makapahay falocoˈ nangra. Sasamaan ko demak ita ngaˈ eca ka lahedaw ko epoc no makapahay falocoˈ hani? O sarikec ato safalod no Fangcalay Cudad, ‘pasifanaˈay, mirikecay, misalofay, sahetoay o ciepocay.’ (2 Timoti 3:16) Mihaenay, malalok kita micekiw to Fangcalay Cudad, misimsim a midotim to lalakaw no sinael, hanaca saka dademaken i nokaˈorip, mihaen wa ngaˈay pahatatanam to makapahay falocoˈ no niyah, pahecad to harateng no niyah ato harateng no Kawas, mihaen o makapahay falocoˈ wa ngaˈayto malo ciepocay a sakayat. w18.06 16-17 fiedac 3-4 fatac

TPitilidan ni Pawlo to Ifiso cudad a lintad, misaka dademakan no sofitay no Loma a fonos, maedeng 50 kongfen ko koˈedaw, o sapilood to mangangataay a ˈada. Cowa ka padik ko sofitay no Loma i piloodan, samaanen mihatatanamay to romiˈamˈad cangra to inaneng a misaka dademak to fonos. Patinakoan ni Pawlo ko sapafeli ni Yihofa a fonos, to o Kimad no Kawas. Kawra, wa minanam kita to inaneng a misaka dademak to fonos, ngaˈay tano Fangcalay Cudad a midama to pihakelongan ato misalof to harateng no niyah. (2 Korinto 10:4, 5; 2 Timoti 2:15) Cowa ko mamatalaw kita ci Satanan ato tatiihay a coyoh. Soˈlin taˈangayay ko ˈicel nangra, kao citolasay ko ˈicel, hanaca cowa ko tatahadaˈoc a materek. Caka halafin, itini pikowan ni Kristo to comaˈol miheca, ci Satan ato tatiihay coyoh wa paliten, cowato ko tatatemik. Ikor no comaˈol miheca a pikowan, wa malaˈafo cangra maemin. (Paˈarawan 20:1-3, 7-10) Pafeselen ita ko pinengneng to nisahalakaan no ˈada, halo pitadiˈec to sadama ni Yihofa, mihaen wa tanektek a miconged ci Satanan! w18.05 30-31 fiedac 15, 19-21 fatac

Mafanaˈay ci Atam to cowa ka ngaˈay caciyaw ko ˈoner, tiya mafanaˈ ci Atam to pasowalay ko cecay ˈoner ci Ifaan i, pakaynian no coyoh i ˈoner mihaen to demak sanay cingra miharateng. (Satapangan 3:1-6) Cowa ka fanaˈ ci Atam aci Ifa toniya coyoh, kawra kamayan misaˈosi ci Atam midama toniya tatiihay a coyoh, malacafay a mitowakang to sidaˈitay a Wama i kakarayan. (1 Timoti 2:14) Ikor no mitowakang ci Atam aci Ifa, kalikiay ci Yihofa paihkal to pakayniay toniya ˈada a demak, hanaca mikiˈok to papalaˈafoen koniya tatiihay a ˈada. Somowalayho to mamiˈodis koniya tatiihay coyoh to polong maolahay to Kawas a tamdaw. (Satapangan 3:15) Cowa ka pifanaˈ ci Yihofa kitanan to manan ko ngangan noniya mitowakangay a coyoh. Mataˈlif ko 2,500 mihecaan to mifekad ko mitowakangay a demak i Itin, pasifanaˈ sanayho ko Kawas to cima koniya coyoh.​—Yopu 1:6. w18.05 22 fiedac 1-2 fatac

Itini cowa ka olah to soˈlinay kimad a kilac mitosil, ano matoled ko falocoˈ iso, wa ngaˈay haratengen ko milifetan ni Pawlo. Maedeng 30 miheca ci Pawlo mirienang to mitosilay demak, ˈalomanay ko padamaan a tamadaw malo Krisciyang. (Dmak 14:21; 2 Korinto 3:2, 3) Kawra, ˈalomanay Yutaya tamdaw cowa ka malo Krisciyang, manaˈayay ko roma tamdaw, mipalakay cingranan ko roma tamdaw. (Dmak 14:19; 17:1, 4, 5, 13) Samaanay ko harateng ni Pawlo toniya Yutaya tamdaw hani? Mihaiyay cingra: “Soˈlinay ko sowal ako. O ni Kristo kako . . . Tadamararom kako a paˈayaw to finacadan ako . . . Saka, mararid a makesem ko falocoˈ ako.” (Loma 9:1-3) Mihaen ko sowal ni Pawlo samanen misarocoday ko falocoˈ ningra to mitosilay a demak, tada ciharatengay cingra to Yutaya tamdaw, mansa mitosil cangranan. Kawra manaˈayay ko Yutaya tamdaw to sidaˈitay a sadama no Kawas, tada makesemay ko falocoˈ ni Pawlo. Malecad ci Pawloan, mitosil kita to tamdaw a lalangian ita i, o soˈlinay ciharatengan kita cangranan.​—Matay 22:39; 1 Korinto 11:⁠1. w18.05 13 fiedac 4-5 fatac

Mikitini sapatikami ni Pawlo to i Lomaay a Krisciyang mahapinangay ita, ano oya mikeriday pakalalok to salikaka a tamdaw, misaaliay to sapakalalok no tao, sanay ko sowal ni Pawlo: ‘Sakatayraan kako a minengneng i tamowanan, nawhani o sapaladaˈaw ako i tamowanan tono Kawas a rocek to sakaciˈicel namo a tanektek. Ta ano itira kako i tamowanan i, pakayni i nipitiˈer ita i ci Kristoan a masasipaˈicel kita.’ (Loma 1:11, 12) Mafanaˈay ci Pawlo to sasamaan a pakalalok to tamdaw, kawra misaaliay cingra to sapakalalok nolatekay.(Loma 15:30-32.) Paihkalay ko ˈalomanay tamdaw to kinafalahay a harateng, oha papakalaloken ita cangra. O roma Krisciyang misetekay to falocoˈ, “deng o mitooray to Tapang a tamdaw” ko hararamod, tahaniniay a caka ciraramod, oha papakalaloken ita cangra. (1 Korinto 7:39) O roma salikaka tahacada to sapalak anca adada ko tireng, kamayan a mitafo to madimadiay, misaaliay cangra to sapakalalok no mita.​—2 Tisalonika 1:3-5. w18.04 21 fiedac 3-5 fatac