Saka 5 Folad

Lalomaˈ no pina miheca, adihayay ko miliyasay to pades a tamdaw malinahay i roma kitakit. Isalakat ngaˈay kita minanam to ngaˈayho, sanay a sowal nangra. Ano mafanaˈ kita to kamotoˈay a sowal, wa mifekad ko kalim nangra sakafanaˈaw halatek, wa ngaˈayto siwkayen to nangra a sowal a ika ato cudad i jw.org a wangcan.Sidaˈitay ci Yihofa, misaday to Mitosilay ato Nikaˈorip a Saˈopo, padama kitaanan macakat i mitosilay a demak. Itini saˈopo mananamay ita ko adihayay ciepocay sapaini, saka ngaˈay no mita itini pilisoˈ ato pipacekiw a matongal ko pakasoˈlin. Mihaenay, malo wama winaay, pasifanaˈen ko wawa tano niyah a harateng a pacaˈof, ho mapataengad ko likat nangra. Latekay, o kantangay, nai falocoˈay a caˈof no wawa, mitemeray to falocoˈ no tamdaw a micada to soˈlinay kimad.​—1 Korinto 14:25. w18.06 22-23 fiedac 7-9 fatac

Haratengen, kita i salakat sahetoay ‘o potalay tamdaw’, miraayay to Kawas. (Ifiso 2:12) Kawraan, tano ‘olah a sasoˈot’ ni Yihofa ko pisolot kitaanan a miingid Cingranan. (Hosiya 11:4; Yohani 6:44) Micadaan ni Kristo kita, ngaˈay kita malo taˈangayay paro no lomaˈ no Kawas. Soˈlin cowa ko malefotay kita, kawra makahiay ci Yihofa aci Yis micada kitaanan, mihaenay, cowa ko ngangaˈay kita mapiliˈ to tao. Pakayni kangata to noka hererekan noniya ciraraway a hekal, matongalay ko liwasak no siyakay, misakakinihay, misaˈadaay a pakayraan. (Kalatiya 5:19-21; 2 Timoti 3:13) Kawraan, malo sikawdan ni Yihofa, micangacangay kita to ‘nai fafekangay a taneng’, o hatiniay taneng padamaay kitaanan eca ka pisakakinih ko falocoˈ, ngaˈayay micowat to rihadayay. (Yakop 3:17, 18) Misaˈicel kita patireng to kalawidang to roma kitakit a tamdaw, micada to cowa ka hecad a serangawan, minanamho to faelohay a sowal, pairaay to lipahak no mita. Mihaen ko demak ita, ‘samatiya sa o nanom no ˈalo a cowa ka citolas ko rihaday, samatiya sa o tapelik no riyar ko moecelay a demak.’​—Isaya 48:17, 18. w18.06 12 fiedac 18-19 fatac

Malingad ko sofitay no Loma a milood i, salakatayho a cicokap. O hatiniay a cokap mahecaday o santalo, toloay matatingloh ko katol, mansa tanektek, o hatiniay pisafaco halafinay ato ngaˈayay a sacokapen. Ano malalood ko sofitay misaaliay to ngaˈayay cokap, cicokap ko Krisciyang tinakoan a cokap, o sakangaˈay a patenak to rihadayay a ratoh. (Isaya 52:7; Loma 10:15) Kawraan, ano mitosil misaaliayho to timolo. 20 ko mihecaan ci Apu, sanay ko sowal: “Isalakat cowa ka timolo kako, tada mangodoay misawacay to cafay micudad, cowa ka fanaˈ to hano mangodo itiya. Kawra, nohatini mitosil to cafay micudad pairaay to hemek no mako.” Mahapinangay no ˈalomanay kapah, ano ngaˈay ko pisaday a mitosil, misawacay to tamdaw cowa to kangodo. w18.05 29 fiedac 9-11 fatac

ˈAyaw no somowal ci Yis to kilang no fadisosoˈ a sapatinako pasowalay to tarokos: ‘Pafelien ako kamo to dipayal no mako.’ (Yohani 14:27) O sapafeli ni Yis a dipayal samaanay padama kitanan a ciheci hani? Ano mihadidi kita i, mafanaˈ to kahemekan ni Yihofa aci Yis ko niyah, itini falocoˈ wa ira ko dipayalay a harateng. (ˈOlic 149:4; Loma 5:3, 4; Kolosay 3:15) Sowal ni Yis tokel ningra to lipahak no tarokos nanay ‘o awaay ko dangoc,’ halo pitadtad to kalimlaan no kinafalahay a olah. (Yohani 15:11-13) Dotoc sanay ko sowal ni Yis: ‘O widang hanto ako kamo a mitahidang.’ Ngaˈay malo widang ni Yis, tada o kalimlaan a sapatelong! Wa samaan ko tarokos padotoc malawidang ci Yisan hani? Wa ‘padotoc a ciheci’ cangra. (Yohani 15:14-16) Somowal ci Yis toniya sowal ˈayaw no tosa miheca, na miocoray to tarokos: ‘Ka lomakat kamo patenak, mangatato ko Hongti Kitakit no Kawas.’ (Matay 10:7) Mihaenay, ˈayaw no kinafalah ci Yis to ˈorip a dadaya pakalalokay cangranan fanekfek a mitosil.​—Matay 24:13; Marko 3:14. w18.05 20-21 fiedac 15-16 fatac

Kapah a tamdaw paisalakaten i kaˈorip ko pihodop ci Yihofaan, misamacay micangacang to noˈadingoan a patosokan. O roma kapah misaaretengay to halama halatek, wa mitahidang tisowanan malacafay a misalama. Mihaenay, pasifanaˈen cangra, sapilaheciaw kiso mitoor to mipiliˈan no niyah ato misaˈosian a midemak. Hamaan pakayni i saroero no kapot a makalisanga. Iraay ko pakayraan padama tisowanan miconged to saroero no kapot, o cecay pakayraan i, liyasen ko sakararawaw a demak. (Taneng 22:3) Wa ngaˈay haratengen iso, malacafay to tao a mararaw, wa samaan ko teloc. O roma i, mihai to misaaliay ko niyah to sapalimoˈot no roma tamdaw. Paihkal kiso to misapoeneray falocoˈ, wa makahi mitengil to sapaini no wama wina ato matenesay a Krisciyang. (1 Pitiro 5:5, 6) Kiso i, makahi misapoener to falocoˈ micada to sapalimoˈot han? w18.04 28-29 fiedac 14-16 fatac

Mikitini i sowal ni Yis to Aciyaay kasakopang mahapinangay ita, misaareteng cingra to nisawawaan. Tinakoen, somowal cingra to Tiyatira a kasakopang i, sanay: “Mafanaˈ kako to demak iso ato olah, soˈlin no falocoˈ, tayal ato kodait no falocoˈ iso. Mafanaˈ kako to nika ikakaay no iˈayaway a demak iso ko adihay no demak iso anini.” (Paˈarawan 2:19) Masowalay ni Yis matongalay ko midemakan nangra, pakahemekayho to ngaˈayay a demak ato makapahay capeling nangra. Soˈlin o papalimoˈoten ni Yis ko Tiyatira a kasakopang, kawra itini satapangan ato sapihererek a lihaf, pakalalokan ningra cangra. (Paˈarawan 2: 27, 28) Malo ˈaˈideman no kasakopang no Krisciyang ci Yis, ngaˈayay eca piakoˈid cingra to tayal nangra. Kawra, kamayan ci Yis paihkal to kasemer to tamdaw, o mikiriwiˈay a taˈarawan ningra, coko tatodongen no malohemay malitengay han? w19.02 16 fiedac 10 fatac

Isaka cecay hahekalan, mikeriday a faˈinayan salikaka ato romaroma Krisciyang, micadaay to sapakalalok no kasacefang no mikayatay a malohemay malitengay. Miocoranho no kasacefang no mikayatay a malohemay malitengay ci Pitiro aci Yohani, tayra i Samariya tamdaw, patado to faelohay Krisciyang a mitolon, hato milifokay cangra to fangcalay saocor. (Dmak 8:5, 14-17) Ira ko sadama no kasacefang no mikayatay a malohemay malitengay, maedeng taˈangayay ko sapakalalok ci Filian ato faelohay a salikaka! Anini, salikaka i Pitil, mikiriwiˈay misakafah i kilac ato itiniay i cowacowa pala a salikaka, micadaay to sapakalalok no Kasacefang no Mikayatay a Malohemay Malitengay i Congpo. Mahecaday kita to saka cecay hahekalan a Krisciyang, “miasip to sahinom a sowal, salipahak sato ko falocoˈ.” Isaka 2015 miheca, mitepang ko Kasacefang no Mikayatay Malohemay Malitengay to Patikol Tayni Tatihi ni Yihofa, oniya kihepicay cudad pakalalokay to ˈalomanay tamdaw. w18.04 19 fiedac 18-20 fatac

Miharateng ko ˈalomanay tamdaw, ano adihay ko pasalat adihay ko hemek sanay. Manaokaniw, ira ko pasalat pairaay to adihayay a epoc, kawra haratengen hena, ano awa ko tolas no pasalat no tamdaw, o masaka talawanto koni hekal. Nohekal Cudad a Citing (no Padaka) somowalay: “O patirengan a lekakawa no holic noni hekal masasifoday, patosokan nangra, sapikilimaw to karoyaroyan.” Tora cudad “masasifoday” sa kora sowal, tada matatodongay, samanen adihayay ko patirengan no tamdaw a holic ato saˈosi, teloc i, misaaliay to ˈalomanay a pingkosi ato hangkang a mitadtad ato midemak. Mitadtaday ci Yis, ano sapilifokaw to pasalat tosaay ko saali: Saka cecay i, micada to sapasifanaˈ ningra, saka tosa i, mala nisawawaan ningra, mihaen to demak mamalifok ko soˈlinay a pasalat. wa mamalifok ita ko masamaanay a pasalat hani? Padotocay ci Yis a pasowal: ‘O mararawayho a tamdaw, o koli no raraw . . . Ano pasalaten no Wawa kamo i, o soˈlinayto a mapasalat kamo.’​—Yohani 8:34, 36. w18.04 6-7 fiedac 13-14 fatac

Maolohay kita cicafay to ciharatengay kitanan a tamdaw, samanen patadoay cangra kitanan a miharateng, halo cipinang to harateng ato nafalocoˈan no mita. Latekay, ˈayaw no misaali kita to sapadama nangra i, maharekayto cangra a miharateng to saali ita a misadak to sadama. Tada miakoˈiday kita to siniˈadaay kitanan a tamdaw. Kita o malo Krisciyangay, makalimay paihkal to siniˈada ato pahecad ko harateng to tao. Soˈliˈlin i, pasangaray mihaen to demak. O cecay lalangian i, coko malefotay kita. (Loma 3:23) Coˈayen ita ko misatekeday a pinangan. O roma tamdaw a kalomahadan ato nalifetan, mifiyoray cangranan pasangar paihkal to siniˈada. Hanaca, itiniay kita i salikoray romiˈad maˈorip, i taliyokay ˈalomanay tamdaw o ‘misatekeday maolah to niyah’, eca ka ciharateng to tao, o mamafiyor no waywayan nangra kita alatek. (2 Timoti 3:1, 2) Kawra, ngaˈay minanam kita ci Yihofaan aci Yisan, itini i paihkal to siniˈadaay a capeling, padadotoc a macakat. w19.03 14 fiedac 1-3 fatac

Saikor no 10 a sarikec mikecengay to tamdaw maˈanof, mikeceng to maˈanof a maˈinal to cowa ko niyah a dafong. (Limoˈot 5:21; Loma 7:7) Milasil ci Yihofa toniya rikec o papasifanaˈ to finawlan Ningra to kalimlaan a kimad​—dipoten ko falocoˈ ato harateng no niyah. Mafanaˈay ko Kawas, o mararaway harateng ato coos mikayatay to tamdaw midemak to tatiihay. Na mararaway ci Tafiti to hatiniay a raraw. O moecelay a tamdaw cingra, kawra kinacecayay maˈinalay to fafahi no tao, telocto taˈangayay ko raraw. (Yakop 1:14, 15) Mararaway ci Tafiti to maˈodangay, milipalawayho to faˈinay no tao, mihalaka mipatay to ˈorip ningra. (2 Samuil 11:2-4; 12:7-11) Cowa ko waywayan aca, misaaretengan ni Yihofa ko ikemoday falocoˈ ita. (1 Samuil 16:7) Ihkalay ko kafanaˈ ni Yihofa to harateng, falocoˈ ato waywayan no mita. Mikilimay to kangaˈayan ita padama kitaanan matatodong ko demak, mitokelay Cingra mahapinang to icowaay ko mararaway harateng no niyah, misaˈicel miwanik to tatiihay harateng, ho eca ka mararaw ko waywayan.​—2 Rayray 16:9; Matay 5:27-30. w19.02 21 fiedac 9 fatac; 22 fiedac 11 fatac

Sowal no Fangcalay Cudad: “Itini i polong no tamdamdaw i, awaay ko milecaday to [madaˈmaˈay] ni Mosi.” (Saˈosi 12:3) O malonayay ci Mosi, awaay ko pinangan a misaˈosi, misiˈayaw to pisafelit o talalikoray a tamdaw cingra han? Harateng no roma tamdaw, o mahaenay ko madaˈmaˈay tamdaw sanay, kawra cowa ka tatodong konini. Soˈlinay i, o tanektekay ci Mosi, tangsolay misaˈosi, hanaca timoloay a madimadi to Kawas. Padamaay ci Yihofa cingraanan, cowa ka ciˈangi to mikowanay no Icip, mikerid to 300 ˈofad a Israil tamdaw milakowit to tafotafokan, halo padama cangranan pakalowid to ˈada. Soˈlin cowa ka hecad kita ci Mosian, kawra misiˈayaway to pasangaray to romiˈamiˈad, misaaliay kita mitafo to madaˈmaˈay. Hano palahad kita toniya capeling, samanen mikiˈokay ci Yihofa, ‘mamilifok ko madaˈmaˈay tamdaw toniya sera.’ (ˈOlic 37:11) O madaˈmaˈay tamdaw kiso han? Minengneng ko tao, o madaˈmaˈay tamdaw kiso han? w19.02 8 fiedac 1-2 fatac

Misangaˈ ko Kawas to tamdaw, pafeliay to makapahay falocoˈ. Hano mafanaˈ kita hani? Tiya misafelit ca Atam aci Ifa to sarikec ni Yihofa i, milimekay Cingranan, paihekalay koni to cikiyamay ko makapahay falocoˈ nangra. O makapahay falocoˈ no tamdaw ano caka songilaˈen pahatatanam, mahecad o mapalakay ko lasingfang a tamina, awa ko pakayraan matatodong ko pikayat to rakat no tamina. Itini pifiyor no fali ato tapelik, madoloay miliyas ko tamina to matatodongay a lalan, mihaenay ano awako ngaˈayay a lasingfang tada katalawanto. Ano salofen ko lasingfang, ngaˈay saka dademaken wa ngaˈayto ko parakatay to tamina matatodong ko palakat to tamina. O makapahay falocoˈ mahecaday o lasingfang, ngaˈayay pafafidaˈ to ngaˈayay ato tatiihay, padama kitaanan matatodong ko patosokan. Kawraan, misaaliay to sasalofen ko makapahay falocoˈ no mita, mihaen wa mikayat kitaanan midemak to matatodongay a demak. O makapahay falocoˈ ano caka pahatatanamen, caka piconged cingranan mararaw ko demak, awaayto ko kapo. (1 Timoti 4:1, 2) O hatiniay tamdaw wa oraten no makapahay falocoˈ halatek, ‘palo ngaˈayay to tatiihay,’ sanay. w18.06 16-17 fiedac 1-3 fatac

Nolatekay, o harateng no hekal tano cowa ka hapinang a pakayraan a mipalak kitaanan, oha mamisinanot kita ngaˈ ngaˈay. Tinakoen, o roma a sinfon milamlamay tono mirikecay a harateng; o roma safanaˈ no tamdaw miowingay to ˈalomanay, micangacang to palinian no hekal; o roma ika ato cudad milengoay to “sakakaay ko niyah”, anca “sakakaay ko paro no lomaˈ ” sanay a harateng, o matatodongay konini. O hatiniay a sasowalen misakahmaw to pinengneng no Fangcalay Cudad, nikawrira, edeng misarocod a maolah ci Yihofaan ngaˈ, maraheker ko paro no lomaˈ ato niyah. (Matay 22:36-39) Wa ngaˈay kita mirienang to saka ciepoc no tireng a lawla, kawra lalicayen ita ko niyah: “Oniya lawla ano tano cowa ka hapinang a pakayraan a miowing to mararaway a harateng, wa ngaˈay mahapinang ako han? Wa miˈimer kako to niyah ato wawa, aka pakidem a minengneng to milawlaay a kamok anca lalakaw han? Wa padama to wawa ako, tano harateng ni Yihofa a minengneng to demak, ho eca ka mafiyor no harateng no hekal han? w18.11 22 fiedac 18-19 fatac

Tada ciharatengay ci Yihofa kitaanan, damsayay kitaanan, pahapinangay konini kitaanan to mikapotay Cingra kitaanan. Sasinanoten ita, samaanay ci Yihofa paihkal to olah kitaanan, sanay Cingra: “Tada o kakalimlaan, o kahemekan, o kaolahan Ako kamo.” (Isaya 43:4) Toniya dohaw awaay ko maanan a ˈicel to mamiconged ci Yihofaan a maolah to mihodopay Cingraanan a tamdaw, o madimadiay a olah Ningra, cowa ka falic. (Isaya 54:10) Cowa pikiˈok ci Yihofa to papalahdaw to sapalifet i nokaˈorip ita, kawra cowa ko mamihai Cingra paˈemek to sano nanomay a pasangar kitaanan, cowa ko mamihai to sano namalay a sapalifet midaˈoc a midokaˈ kitaanan. Mikiˈokay Cingra to mamikapot kitaanan, padama kitaanan milakowit to masakenaay a pasangaray. Wa samaan ko demak Ningra hani? Wa padama Cingra kitaanan ecato ka talaw, ho ngaˈayto kita mitafo to madimadi i Kawas, soˈlin misiˈayaw to sakapatay, cowa ko tatalalikor. (Isaya 41:13; 43:2) Sowal ni Yihofa: “Wa kapoten Ako kamo.” Mitiˈer kita toniya sakiˈok, timolo a tanektek a misiˈayaw to sapalifet. w19.01 3-4 fiedac 4-6 fatac

Ano o kapah kiso, o singsi ato roma tamdaw painiay kisowanan, micada to ˈakawangay picudadan, ngaˈ ira ko ˈakawangay ko lifon a katayalan. Cowa ka hecad ko pinengneng ni Yihofa, tokel Ningra malalok kiso i picudadan minanam, ira ko inaneng, micudiyapto ira ko sakaˈorip. (Kolosay 3:23) Mafanaˈay ci Yihofa to taˈangayay ko sasaˈosien no kapah tamdaw i hakelong no kaˈorip, mansa pafeli Cingra to safalod a mikayat a padama tisowanan i salikoray romiˈad midofdof to araaw Ningra. (Matay 24:14) Haratengen ita, cipinangay ci Yihofa to kihcod, mafanaˈay to sasamaan ko kafalic no hekal, cipinangayho to hakowaay ko pingata ita to kahererekan. (Isaya 46:10; Matay 24:3, 36) Cipinangay ci Yihofa kitaanan, mafanaˈ to o maanan ko papakahemek kitaanan, o maanan ko papatoled kitaanan. Mihaenay ano samaanto ko kangaˈay no sowal no tao, ano cowa ko misalalangiay to Kimad no Kawas, cowa ko ngaˈayay a sapaini. w18.12 19 fiedac 1-2 fatac

“O poeneray ko falocoˈ a tamdaw i, marihaday ko aroˈ nangra tonini a sera, o rarihaday cangra a malemed ko ˈorip.” Mapatemeray no fangcalay ˈicel ci Tafiti, sanay cingra: “O cacisera ko moecelay a tamdaw, o rarihaday ko kasarayray nangra maroˈ tonini a sera [tahadaˈoc].” (ˈOlic 37:11, 29; 2 Samuil 23:2) Oniya sakiˈok samaanay milingat to midofdofay to araaw no Kawas a tamdaw hani? Pakasoˈlinay cangra to, sahtoay o moecelay a tamdaw ko itiniay i sera noikor, oniya cikiw papatikol mahecad o Itinay a lakoing. Ikor, misafelitay ci Yihofaan ko Israil tamdaw, cowato pidama to matatodongay a pihakelongan. Mansa, pakiyadi sa ko Kawas to Papilon miˈodis ato palaˈafo to finawlan Ningra, miholiw tayra i Papilon. (2 Rayray 36:15-21; Yirimiya 4:22-27) Kawra, paˈayaway ko pairasolay no Kawas, ikor no 70 miheca, o finawlan Ningra wa patikol i nalacolan, oniya sapairasol malaˈosiay maemin. Oniniya sapairasol milingatay to noikoran a lakoing i sera.w18.12 4-5 fiedac 9-10 fatac

O sapaini no hekal cowa kalecad to harateng ni Yihofa, wa soˈlin saka ciepoc no aniniay a tamdaw han? Sowal ni Yis: “Mahapinang i demak no Kawas ko nika citaneng Ningra.” (Matay 11:19) Anini, kalikiay macakat ko kakako, nikawrira cowa pakasaysay to adihayay a pasangaray, tinakoen o lalood, misakakinihay to finacadan, ato raraw. Roma i, madadiˈi to potalay no raramod, cowa ko mararaway sanay ko tamdaw, kawra mihayay ko ˈalomanay, maˈodangay wa mipalak to paro no lomaˈ, adada ato roma pasangaray. Cowa ka hecad ko Krisciyang, samanen iraay ko harateng ni Yihofa no mita, ngaˈayay misalof to kalalaˈed no paro no lomaˈ; pakayni kakorac no waywayan, ho eca ka madenga no adada; ngaˈayayho malacafay to salikaka i polong no hekal, pairaay to lipahak no mita. (Isaya 2:4; Dmak 10:34, 35; 1 Korinto 6:9-11) Soˈlinay, mikikakaay ko harateng ni Yihofa to harateng no hekal. w18.11 20 fiedac 8-10 fatac

Soˈlin, wa misaˈicel kita mitafo to ngaˈayay kalalaˈed to paro no lomaˈ, kalangaˈay cangraanan, kawra, pakayni sapisangaˈayaw to paro no lomaˈ cowa ko mamisawad kita to pihakelongan. Wa misaˈicel kita malakangaˈay cangraanan, kawra edeng o maolahay ci Yihofaan a tamdaw ko hawidang. O polong midoedoay to soˈlinay kimad midemak a tamdaw kalimlaan ko makoracay. (Isaya 35:8; 1 Pitiro 1:14-16) Ikor no minanam kita to soˈlinay kimad, sapitooraw to palinian no Fangcalay Cudad, misalofay to harateng ato waywayan no niyah, o roma tamdaw masongilaˈay ko pifalic to niyah. O kafalic no mita o taˈangayay anca mimingay, aka pisawad to makoracay a kaˈorip, patikor to misafelitay to palinian no Kawas a nokaˈorip. Sasamaan kita ngaˈ eca ka pidemak to malafoay a demak hani? Songilaˈen miharateng ko mihadakan ni Yihofa ˈakawangay a sapiˈaca, pakayni sapikoracaw Ningra kitaanan, patafangay to kalimlaan a ˈilang no wawa ci Yis Kristo. (1 Pitiro 1:18, 19) Ano makalimay kita malo makoracay a tamdaw nengnengen ni Yihofa, wa micerid miharateng to kalimlaan ko sapatefoc ni Yis. w18.11 11 fiedac 10-11 fatac

ˈAlomanay ko mieminay to toki a mitosilay misawacayay cangra, ano mafalic ko pakayraan i, misarocod a mitosil wa padama cangraanan padadotoc mahemak ato tawlikay a harateng. Mahaen o masowalay i fafekang a tinakoan, ano misaˈicel kita a midemak, ira ko pakasoˈlin no falocoˈ mitala ci Yihofaan, wa ngaˈayto kita mitafo to rihadayay falocoˈ. Latekay minanam to kafalic no pakayraan, wa ngaˈay kita milifok to haepoc. Ano mifekad ko kafahalan a kafalic i nokaˈorip i, anca mafalic ko katayalan, anca adadaay ko tireng, matongal ko ˈinorong no paro no lomaˈ, ngaˈayho pakasoˈlin kita to ciharatengayho ci Yihofa kitaanan, itini i matatodongay a toki padama kitaanan. (Hipray 4:16; 1 Pitiro 5:6, 7) Misiˈayaw to hatiniay a kafalic, wa misaˈicel kita a midemak, pakayni i pitolon miingid ci Yihofaan, minanam a mitadiˈec Cingraanan. Ano mihaenay ko demak ita, wa padotoc marihaday ko falocoˈ ano tahalifa to kafalican a toki. w18.10 30 fiedac 17 fatac; 31 fiedac 19, 22 fatac

Adihayay ko maˈoningay i Fangcalay Cudad to patadoay ci Yihofa miharateng to madimadiay sikawdan a tinakoan, itini 1 Samuil 3:1-18. Malocekay ko maharatengay ni Yihofa, padama toya kaemangay a samuil milasil to sasawkit i taˈangayay saysi ci Ilian. O sarikec ni Yihofa, mikangodo to malitengay ko kaemangay a tamdaw, mikiriwiˈay ko kakeridan no finawlan. (Kasadakan 22:28; Lifi 19:32) Wa ngaˈay haratengen iso pacerem ci Samuil mifanaˈto ci Ilian to pakidemay sasawkit no Kawas han? Soˈlinay i, sowal no Fangcalay Cudad, “matalaw ci Samuil a pasowal ci Ilian.” Kawraan, ci Ili ko misaaliay ci Samuilan a mihadak to lihaf no Kawas, palimoˈot ci Samuilan a somowal: “Aka pikilif i takowanan.” Mitengilay ci Samuil to sowal ni Ili, pasowal to kihcod cingranan. (1 Samuil 2:27-36) Mikitini toniya maˈoningay mahapinangay ita, masinanotay ato citanengay ko maharatengay ni Yihofa. w18.09 23 fiedac 2 fatac; 24 fiedac 4-5 fatac

Anini o kalo a tamdaw marariday a misamangah. Itini “Hano Misamangah Kita” a lalakaw, safanaˈ no mitatiliday ci Pitecaci, sanay ko sowal: “O misamangahay a pinangan, palidlid sanay cilamitay i falocoˈ no tamdaw.” O tamdaw sapidipotaw to niyah anca sapacakataw to niyah a misamangah. Mansa, tocerid sapisimedaw to raraw ato tatiihay waywayan ko tamdaw, anca sapilifokaw to hafay ato roma saka ngaˈay a misamangah. Sanay ko lalakaw: “Ano taˈangayay anca mimingay mangah, cawato ka ngodo kita to kafahalan tamdaw, cafay matayal, widang ato kaolahan a tamdaw,” sanay. O teloc no samangahay o maanan hani? Cato ka pakasoˈlin ko tamdaw, o kalalaˈed no tamdaw mapalakayto. Itini ˈOlic mitolonay ci Tafiti ci Yihofaan sanay: “O soˈlinay a falocoˈ ko nilongocan Iso.” (ˈOlic 51:6) Mitadtaday ko sowal ni Tafiti wa mikitini i falocoˈ kita malo soˈliˈlinay a tamdaw. Itini taˈangayay kaemingay a demak no kaˈorip, o soˈlinay Krisciyang wa ‘ka sasisoˈlin ko sowal’.​—Cikariya 8:16 w18.10 7 fiedac 4 fatac; 8 fiedac 9-10 fatac; 10 fiedac 19 fatac

ˈAyaw no kongyan 1,513 miheca, miliyas ko Israil tamdaw nai Icip, maedeng mataˈlifay ko 300 ˈofad no tamdaw, ilalomaˈ ira ko fofo no fofo, mahawpay ko wawa, ato matoˈasay, romaroma malonayay ato adadaay a tamdaw. ˈAlomanay ko Israil tamdaw, cowaho ka maroˈ i roma pala, nikawrira wa miliyas to kananaman a Icip, o ˈaˈideman nangra misaaliay to tada misinanotay to saali no tamdaw ngaˈ ngaˈay, ˈarawhan o damsayay a Kawas ci Yihofa, miocor ci Mosian midipot to Israil tamdaw, misayaray to falocoˈ nangra. (ˈOlic 78:52) Midemakay ci Yihofa to maanan parihaday to finawlan Ningra hani? Milikakawaan Ningra ko Israil tamdaw, ‘misilsil’ cangranan miliyas to Icip. (Kasadakan 13:18) Masieroday koniya limasmas, padama to Israil tamdaw cipinang to maˈimeray no Kawas ko kihcod. O roma, sapahapinangaw to Israil tamdaw to mikapotay ci Yihofa cangranan, “O romiˈad i, pakaynien no Kawas i toˈem ko nipikerid i cangraan, o dadaya i, pakaynien Ningra i likat no namal ko nipikerid i cangraan.” (ˈOlic 78:14) Mahecaday to pasowalan ni Yihofa ko finawlan Ningra: ‘Aka a matalaw! Wa kayaten ako kamo, midipot tamowanan.’ w18.09 26 fiedac 11-12 fatac

Maˈoningay i Fangcalay Cudad, o roma madimadiay sikawdan no Kawas pakayni pasangaray demak, cowato ka sakaˈoripaw. Tinakoen, ci Yopu masomaday a somowal: “Awaayto ko sakaˈoripaw ako, maˈosito kako to ˈorip ako.” (Yopu 7:16) Ci Yona midemakay to sapatorod no Kawas a demak, kawra mafalicay ko pakayraan hato matoleday cingra, mihaenay ko sowal ni Yona: “[Yihofaaw], nanay patayen kako imatini. Nawhani o nika patay ako ko ngaˈay to nika ˈorip ako.” (Yona 4:3) Pairasolay ci Iliya awaayto ko hatokel no niyah sanay, pasowal to Kawas: “[Yihofaaw], caayto pakahadidi kako, o nika patayto ako ko ngaˈay, nanay alaento kako.” (1 Hongti 19:4) Soˈlin mahaen, misalimlaan ni Yihofa koniya madimadiay sikawdan, mitokel to papadotoc cangra a maˈorip. Cowa ka poˈi cangranan, tano olahan a paˈicel cangra, padama cangranan eca pisakahmaw to ˈorip no niyah, padadotoc madimadi a mihodop Cingranan. w18.09 13 fiedac 4 fatac

O kapot no Kawas matayal paihkalay to hinalafangay. Itini Krisiya Sowal Fangcalay Cudad, o ‘hinalafangay’ a tilid, ‘o siniˈada a micada to kafahalan a tamdaw’ ko mitoroˈan. (Hipray 13:2) Mikitini maˈoningay no Fangcalay Cudad ngaˈay kita minanam to sasamaan paihkal to hinalafangay i tamdaw. (Satapangan 18:1-5) Mihaenay i, ano ecato ko salikaka ko cima, saˈicelen ita padama cingra, ceriden mihaen to demak. (Kalatiya 6:10) Wa ngaˈay kiso malacafay to Kawas a matayal, misalafang to tayniay i kasakopang mieminay to toki mitosil a tamdaw han? (3 Yohani 5, 8) Ano mihaen ko demak iso, wa ngaˈay ‘macacawmaˈ ’ ato ‘mapakalalolalok’. (Loma 1:11, 12) O Kimad no Kawas pakalalokay to salikaka micangacang to padamaay sikawdan ato malohemay malitengay a tayal, tanonini pakayraan a malacafay ci Yihofaan a matayal. (1 Timoti 3:1, 8, 9; 1 Pitiro 5:2, 3) O micangacangay to hatayal a salikaka, paihkalay cangra to makalimay padama to roma a Krisciyang, wa makahiho padama to noˈadingoan a demak. (Dmak 6:1-4) Oniya mirienangay to hatiniay tayal a salikaka misawacayay cangra, padama to salikaka tada o kahemekan a tayal sanay. w18.08 24-25 fiedac 6-7, 10 fatac

Soˈlin ikakaay ko adihay no ˈinorong ni Timoti to matoˈasay a faˈinayan salikaka, kamayan o sasidaˈit cingra a mikangodo cangranan. Kawraan, ano padeteng mararaw anca miowing to kapiliˈan no Kawas a demak ko matoˈasay a tamdaw, samaan ko demak ita hani? Ci Yihofa cowa kao potal ko minengnengan a misawkit to tamdaw, cowa ko papakayni katoˈas no cecay tamdaw a pakihater cingranan a mararaw. Sinanoten samanay ko sowal i Isaya 65:20: “Ano caho ka semoˈot ko mihecaan, ano mapatay koya tamdaw i, o nitefocan no Kawas cingra han koya tamdaw.” Mikitini maˈaraway ni Icikil a mapolosi wa ngaˈay mahela ita ko mahecaday a safalod. (Icikil 9:5-7) Mihaenay, o sasinanoten ita o pinengneng ni Yihofa oya ‘tahadaˈocay a materek.’ (Taniil 7:9, 10, 13, 14) Ano mikangodo kita ci Yihofaan, wa ira ko timolo itini matatodongay a toki mirikec to matoˈasay tamdaw.​—Kalatiya 6:1. w18.08 11 fiedac 13-14 fatac

Malo soˈlinay a Krisciyang i, misaaliay to sakafanaˈ pafafidaˈ to matengilay a lihaf, o soˈlinay anca o makaniway, ikor to matatodong ko misaˈosian. (Taneng 3:21-23; 8:4, 5) Ano caka palahad kita to hatiniay a ˈicel, wa madolo malipalaw ni Satan ato hekal ningra. (Ifiso 5:6; Kolosay 2:8) Hapinangenho ita kora demak ngaˈ matatodong ko pisaˈosi. Anini, pakidemay ko kaadihay no lihaf. Itini i wangcan, tilifi, anca o romaroma hatiniay a palihafay a demak, padotocay masadak ko adihayay a lalakaw. O roma i, ˈalomanay a tamdaw macadaay ko nai widang anca kafanaˈan a tamdaw a tano tingnaw ato soci a tikami. O roma tamdaw padeteng sanay mitenak to mararaway makaniway a lalakaw, mansa o sasinanoten ita miharateng ko matengilay a lihaf. w18.08 3 fiedac 1, 3 fatac

Tiya pataynien ni Yihofa ko wawa Ningra i hekal i, mipiliˈay toya misapoeneray a limecedan ci Mariya malo wina no wawa. Itiniay i Nacali ko kitiraan ni Mariya, oniya mimingay niyaroˈ mira:ayay to Yirusalim ato fangcalay sefi. (Luka 1:26-33) O roma i, mikitini i sowal ni Mariya to salawina ci Ilisapican ngaˈay mahapinang, o matenesay i noˈadingoan cingra. (Luka 1:46-55) Halafinayto ci Yihofa mihapinang ci Mariyaan, mafanaˈ to madimadiay a tamdaw cingra, hanaca tano cowa ka harateng a pakayraan a palifon cingranan.Hofocento ci Yis, cowa ka pasayra i ˈaˈideman no Yirusalim ato Piclihim ci Yihofa a milasil toniya demak. Itiya, iraay ko pakaenay to siri a tamdaw itini Piclihim mihimaw to siri, miocoran ni Yihofa ko coyoh paˈaraw koniya sasafaay tamdaw. (Luka 2:8-14) Ikor, oya pakaenay mikilimay toya hofochanho a Yisan. (Luka 2:15-17) Cowa ka harateng ni Yosif aci Mariya, o milasilay to kahofoc ni Yis oyaan pakaenay to siri a tamdaw, maedeng fahkaay a mahemek cangra! w18.07 9-10 fiedac 11-12 fatac

Hano mangolaw ci Yihofa ci Solomonan hani? Sowal no Fangcalay Cudad: ‘Samanen miliyasay ko falocoˈ ningra toya kinatosaay paˈaraw cingranan a Kawas no Israil ci Yihofa. Na palimoˈotan no Kawas cingra aka pikotod to roma kawas, kawra cowa pidoedo cingra to limoˈot ni Yihofa.’ Malahdaway ni Solomon ko hemek ato sadama no Kawas. Telocto, cowato ka ngaˈay ko teloteloc ningra mikowan to polong a Israil kitakit, tahalifaayho to adihayay roray ato pades. (1 Hongti 11:9-13) Mikitini tinakoan ni Solomon o maanan ko mananamay ita? Ano micerid micawmaˈ to cowa ka cipinang ato cowa ka ngodo to palinian ni Yihofa a tamdaw, wa mipalak to noˈadingoan ita. Oniya tatiihay ko pifiyor kitaanan a tamdaw, halatek o micawmaˈay to kasakopang, kawra malonayay i noˈadingoan a tamdaw, anca oya cowa pidoko ci Yihofaan a salawina, fiyaw, cafay matayal, cafay micudad. Ano samanayto, o ngaˈayay a widang ita ano cowa ka pisaareteng to palinian ni Yihofa, o mamipalak to ngaˈayay kalalaˈed no mita ato Kawas alatek. w18.07 19 fiedac 9-10 fatac

Misaka dademakan ni Satan ko ika ato kamok no tilifi, mitenak to harateng ningra. Mafanaˈay cingra, o pacamol to tawcikel a lawla, wa miorat to sapisimsim ato harateng no mita, hanaca mifiyor to waywayan ita. Ci Yis tano tawcikel a pakayraan pasifanaˈ to nisawawaan, tinakoen oya sidaˈitay a Samariya tamdaw ato malafelay wawa a sapatinako. (Matay 13:34; Luka 10:29-37; 15:11-32) Mihaenay, mafanaˈay ko mafiyoray no harateng ni Satan a tamdaw, misaka dademakay to citawcikelay a lawla, oha maminahol kitaanan. Mansa, pairaen ita ko matatodongay a pinengneng to lawla. O roma a ika ato kamok no tilifi, iraay ko sapasifanaˈ, cowa ko maminahol to harateng ita, kawra sasinanoten ita, ano mipiliˈ to lawla i, licayen ko niyah: “Ikor no pinengneng toniya ika anca kamok no tilifi i, ‘doedo han ako ko niharatengan a midemak,’ cowa ko mararaway, wa saan kako han?” (Kalatiya 5:19-21; Ifiso 2:1-3) Ano mahapinang iso, iraay ko harateng ni Satan no kamok, wa samaan ko demak iso hani? O laliyasen ko hatiniay a lawla, mahecad o piliyas to midengaay a adada. w19.01 15-16 fiedac 6-7 fatac

Mahecad o kafong ngaˈayay midipot to fongoh no sofitay, ‘o sakalidong a tokel’ wa ngaˈay midipot to kemoday falocoˈ, ato harateng no mita. (1 Tisalonika 5:8; Taneng 3:21) Samaanay ci Satan mikayhid kitaanan, mihepol to kafong hani? Ano haratengen ita ko nano demak ningra ci Yisan, o mamafanaˈto. Mafanaˈay ci Satan to mamikowan ci Yis to polong a tamdaw noikor. Kawra, wa salakatho ci Yis misemsem ikor mapatay, hanaca mitala to cecay liyad, tahira pisaˈosian ni Yihofa a romiˈad ngaˈ mala hongti cingra. ˈArawhan kayhiden ni Satan ci Yisan, ano taˈongen ni Yis ci Satan, wa tangsol mikowan to kalo a kitakit, mihaen wa kaliki a mala hongti ci Yis. (Luka 4:5-7) Mahecaday, mafanaˈay ci Satan ano irato ko faelohay hekal, wa palipahaken ni Yihofa ko kaˈorip ita, pafeli to adihayay makapahay a demak. Kawra o mamitalaho kita, itini pitalaan a toki, wa tahalifa kita to adihayay karorayan a demak halatek, mihaenay mihadakay ci Satan to adihayay sakayhid, aniniho ngaˈayto lipahak ko kaˈorip sanay. Miowingay kitaanan micangacang to hafay—siemel ko kaˈorip nohatini, itinien i saka tosa ko Hongti Kitakit no Kawas, sanay a mikayhid.​—Matay 6:31-33. w18.05 30-31 fiedac 15-17 fatac

Kapah tamdaw, nanay mahemek ko kaˈorip iso sanay ci Yihofa. Mihaenay ka pisamacay micangacang to noˈadingoan a patosokan, ano mihalaka i, sinanoten ko harateng ni Yihofa. Kaliki kiso mihaen to demak, wa kaliki malifet to samaanay ci Yihofa a mikayat, midipot ato palemed tisowanan. Songilaˈen a misimsim ko ciepocay a limoˈot no Fangcalay Cudad, naˈengen i falocoˈ koniya laenoay sowal: “Yo kapahho kiso i, salimelaen, haratengen ko misangaˈay tisowanan a Tapang.” (Patnakay 12:1) ˈAlomanay kapah i kasakopang misarocoday mihodop ci Yihofaan, citodongay to papakahemeken no mita. Misaˈicel cangra micangacang to noˈadingoan a patosokan, paisalakat to mitosilay demak i nokaˈorip, misaˈosi ko falocoˈ eca ka fiyor noniya hekal. Kapah tamdaw, cowa ko mamalakisaw ko pisaˈicel iso, wa padotoc a ciharateng ato midama ko salikaka tisowanan. Mihaenay, patorod han ci Yihofaan ko polong no nisahalakaan iso a demak, hongaˈ malaˈosi ko demak iso. w18.04 29 fiedac 17, 19 fatac