Saka 4 Folad

Iraay kono Kawas anca hekal a harateng ita hokira? O waywayan ita mahecaday to palinian no Kawas alatek, kawraan o falocoˈ ita samaanay? Misaˈicelay kita pahecad to harateng no niyah ato harateng ni Yihofa han? Sapidemakaw kita tonini, wa misaˈicel ngaˈ ngaˈay. Nikawrira, itini taliyok ita matomesay ko pinangan no hekal, mansa madoloay a mafiyor kita. (Ifiso 2:2) Roma i, salimlaen ko niyah sanay a sasowalen, maoratay ko harateng ita. Mihaenay, sapipalahadaw ko tamdaw to harateng ni Yihofa, cowa ko madoloay, kawra madoloay a madenga no hekal. Ano papifiyoren ita koniya hekal to harateng no niyah, wa madoloto malo misatekeday, o niyah saan ko misaˈosi to ngaˈayay, tatiihay. (Marko 7:21, 22) Mihaenay, kalimlaan i, papalahaden ko “harateng no Kawas”, cowa kono “tamdaw a harateng”. w18.11 18 fiedac 1 fatac; 19 fiedac 3-4 fatac

Itiniho i hekal ci Yis i, cowa ka ciharateng to sapihaydaaw no ˈaˈideman no pihakelongan ato tapang no mirikecay. Kawra, mahemekay ci Yis milifok to pihayda ni Yihofa, sowal no Fangcalay Cudad, kina toloay ci Yihofa nai kakarayan a pasowal to mihaydaay ci Yisan. Sakina cecay itiniay picada ni Yis to inoˈ i Yorotan ˈAlo, sowalay ci Yihofa to fafkangay a sowal. Coko ci Yis aca, pakatengilay ko painoˈay a Yohani toniya sowal. Sakina tosa itiniay iˈayaw no kinafalah ci Yis to ˈorip to cecay miheca, tatoloay tarokos pakatengilay to sowal ni Yihofa: “O kakaolahan Ako a wawa konini. O kakahemekan Ako cingra.” (Matay 17:5) Sakina tolo itiniay iˈayaw no kinafalah ci Yis to ˈorip pina romiˈad, miliyaway ci Yihofa nai kakarayan pasayra ci Yisan a somowal. (Yohani 12:28) Mafanaˈay ci Yis to mamapaoraf no tamdaw cingra to pakaditay to Kawas sanay a demak, mapakangodo misemsem a mapatay, kawra kamayanayho cingra mitolon micangacang to mamalaˈosi ko araaw ni Yihofa. (Matay 26:39, 42) Sowal no Fangcalay Cudad, ci Yis ‘sakahemaw to pisamsam, hadidi han ningra ko nika pacek ningra i hecek,’ o pihayda no kakarayan Wama ko micangacangan ningra, cowa ko pihayda no hekal.​—Hipray 12:2 w18.07 10-11 fiedac 15-16 fatac

Ikor no patireng ci Yis to Lafi no Tapang i, paihkalay to tadamaanay a timolo. Soˈlin mafanaˈ wa mitamorong to pakaditay to ngangan no Kawas a raraw ko sakapatay no niyah. Makalimayho ci Yis midofdof to araaw no Wama. (Matay 26:65, 66) Tahiraay i patay ko madimadi ni Yis, mihaen ko demak ningra cowa ko paˈdil aca to ngangan ni Yihofa, paihkal to midopoay to saˈakawangay sapikowan a fadangalan no Kawas, pairaayho to toki no pasasiyoray tamdaw, milifok to tahadaˈocay ˈorip. Padamaan ni Yis ko nisawawaan a misaday, misiˈayaw to sapalifet i ˈaˈayaw. O roma tinakoan to paihkalay ci Yis to timolo i, cowa ka pakidem a calemcem cingra to sasiˈayawen a demak, ao saali no nisawawaan ko kaciharatengan ningra. Papiliyasento ni Yis ci Yuta ikor, patirengay to Lafi no Tapang, oniya limasmas o sapatalipaˈelalaw to mapasimalay Krisciyang to nika ciepoc nangra nai remes ni Yis, tano remesan ni Yis a patireng to faelohay a katatelekan i cangranan.​—1 Korinto 10:16, 17. w19.01 22 fiedac 7-8 fatac

Wama ni Yis naitiniay i kakarayan pacaˈof to pitolon ni Yis: ‘Maherekto Kako a paˈdil to ngangan Ako. O mamiliyaw Kako a paˈdil!’ Masomaday ci Yis pakayni i roma demak, mafanaˈay cingra to aretengay ko ˈinorong ningra, o tatahatolas a madimadi ci Yihofaan ngaˈ ngaˈay, ato mamicada to pakidemay a misemsem tahapatay. (Matay 26:38) Ciharatengay ci Yis to papaˈdil to ngangan no Wama, kawra maekoay no tao to pakaditay sanay a raraw; calemcemay cingra to kapatay no niyah, wa pakangodo to Kawas. Mansa, o nai kakarayan a sowal ni Yihofa paˈicelay to pakasoˈlinay falocoˈ ni Yis. Mahecaday kita ci Yisan, cowa sapakaditaw to ngangan no Kawas. Alatek mahecaday kita ci Yisan micadaay to cowa ka sadafdaf a demak, anca macadaay ko sapakotkot no misafelitay a sowal a macariraw. Nolatekay oniya sapaoraf a lihaf pakaditay to ngangan ni Yihofa ato likakawa Ningra, kawra o sowal ni Yihofa mamisayar kitanan. Papaˈdilen ni Yihofa ko ngangan Ningra.​—ˈOlic 94:22, 23; Isaya 65:⁠17. w19.03 11-12 fiedac 14-16 fatac

Tokel no nisawawaan wa miliyaw ci Yis patireng to Israil kitakit, ˈarawhan caka halafin wa micada to roray ato patayen, sanay ci Yis, pasangaray a micada ko nisawawaan. Pasowalay ko tarokos ci Pitiro ci Yisan: “Tapangaw, [salimlaen iso ko niyah.] Caay ko aira ko matiniay a demak i tisowanan.” Pacaˈof sa ci Yis cingranan: “Satanaw, piliyas i takowanan. O mitenaˈay kiso takowanan. Caay kono Kawas ko niharatengan iso. Ono tamdawan ko niharatengan iso.” (Matay 16:21-23; Dmak 1:6) Paihkalay ko sowal ni Yis, o harateng no Kawas cowa ka hecad to harateng no hekal ni Satan. (1 Yohani 5:19) Misaaliay ci Pitiro ci Yisan, salimlaen ko niyah, paihkalay to iraay kono hekal a harateng ningra. Kawra mafanaˈay ci Yis, o tokel no Wama cingraanan, misiˈayaw to roray ato patay. Mikitini i sowal ningra ci Pitiroan, mahapinang ita to micadaay ci Yis to harateng ni Yihofa, eca ka fiyor no hekal ko niyah. w18.11 18 fiedac 1-2 fatac

To mihecahecaan, ˈalomanay ko mirienangay to Lafi no Tapang. Cowa ko ˈalomanay aca ko maˈaraway ni Yihofa, misinanotay Cingra to kaha cecacecay a tamdaw. O roma ilalomaˈ nangra, iraay ko madimadiay a tamdaw, mirienang to mihecahecaan a Piharatengan a Saˈopo, o roma, iraay ko misiˈayaway to pakidemay sapalak. Maˈarawayho Ningra ko cowa piceriday a mirienang to saˈopo a tamdaw, samanen mafanaˈay cangra to kalimlaan a saˈopo koni. Roma i, maˈaraway ni Yihofa to iraay ko sakina cecay, tayni mirienang toniya saˈopo a tamdaw, alatek mafahalay ko falocoˈ hato mirienangay cangra. Mahemekay ci Yihofa maˈaraway ko ˈalomanay mirienang to Piharatengan a Saˈopo. (Luka 22:19) Kawra, ka ciharatengan ni Yihofa, cowa ko hakowaay ko mirienangay tamdaw, ao lalangian no tamdaw hano mirienang, onini ko kalimlaan ni Yihofa. Makalimay kita micada to sakayat ni Yihofa ato likakawa Ningra. Cowa han?​—Isaya 30:20; Yohani 6:45. w19.01 26 fiedac 1-3 fatac

Patirengay ci Yis to taˈarawan ita, pasifanaˈ kitaanan samaan paihkal to kinafalahay a olah. Tocerid cingra miharatengay to saali no nisawawaan, hanaca makahi a kinafalah to ˈorip no niyah. Tinakoen, soˈlin malotayay anca masomaday ko falocoˈ ni Yis, makahiayho a malacafay to nisawawaan. (Luka 22:39-46) O kaciharatengan ningra o ngangaˈay patado to tao a midemak to maanan, cowa ko mamilifok i taowanan to maanan. (Matay 20:28) Kita maemin, o paro no lomaˈ no soˈlinay Krisciyang, makahiay kita marariday a mitahidang to tamdaw mirienang to saˈopo. Kawra, o kakiriwiˈen ita miharateng ko tomerepayto mitosil ato saˈopo a Krisciyang, samanen mahecaday cangra, o paro no lomaˈ ita. (Kalatiya 6:10) Maolahay kita cangranan, mansa pakalalok cangranan mirienang to saˈopo, mangalef ko Piharatengan a Saˈopo. Maˈaraw koniya salikaka patikol i tatihi no sidaˈitay a Wama ci Yihofa, wa mahecad kita ci Yihofaan aci Yisan a mahemak. (Matay 18:⁠14) Misaaliay kita a mirienang to polong a saˈopo, palahad to misapoeneray, timoloay ato ciolahay falocoˈ.—Matay 18:14. w19.01 29 fiedac 12, 14 fatac; 30 fiedac 15-16 fatac

Malacafay ci Yis to 11 madimadiay a tarokos i, patirengay to sapiharateng to kapatay ningra a limasmas. Tano mikaenan i Pitaˈlifan a Lisin a kakaenen, malo dafong no Piharatengan a Saˈopo. Ci Yis tano awaay ko tamod a epang ato fadisosoˈ a epah, mitaypiyaway to malefotay a tireng ato kalimlaan a remes no niyah, samanen cato ka halafin wa patafangto cingra to tireng ato remes no niyah. Pakayni toniya kantangay ato faelohay a limasmas, cowa ko fafahkaˈ ko tarokos, misamaanay hani? Tahiniayto i ˈayaw no pina folad kinafalah to ˈorip cingra, milisoˈay cingra to ngaˈayay widang ci Lacarus, Marta aci Mariyaan. Tora kahemekan a toki, pasifanaˈan ni Yis cangra to pina demak. Cowa pisamacay ci Marta a mitengil, samanen misadayay cingra to kadofahay kakaenen. Mahapinangay ni Yis, mansa sidaˈitay a palimoˈot ci Martaan, padama cingraanan mihapinang, cowa ko kalimlaan ko pisaday to adihayay kakaenen. (Luka 10:40-42) Ikor, ˈayaw no pina tatokian a kinafalah ci Yis to ˈorip i, misaka dademakan ningra koya sapalimoˈot ci Martaan a sowal, mipatireng to kantangay a Piharatengan a limasmas. w19.01 20-21 fiedac 3-4 fatac

Cowa ka harateng ni Yis a pakayraan ko pihayda ni Yihofa cingranan. Patikolan ni Yihofa ci Yis a paˈorip, pacakat cingranan ‘pala saˈakawangay a saaroˈan’, halo pafeli cingranan to cowa ko mamapatay a ˈorip, onini a sakaliko cowaho kalifok no romaroma masangaˈay a pinaˈorip. (Filipi 2:9; 1 Timoti 6:16) Madimadiay ci Yis to kakarayan Wama, o hatiniay a sapalifon pakayni ci Yisan tada o taˈangayay a pihayda! Sasamaan a miliyas to sapicangacangaw to pihayda no hekal hani? Haratengen ita oha mamasemer ato papalifon ci Yihofa to madimadiay a sikawdan Ningra, hanaca tatano kafahkaˈan ita a pakayraan a palifon kitaanan. Noikor, wa ira ko cowa ka harateng ita a sapalemed. Anini, soˈlin wa mihadidi kita to masakenaay a roray ato sapalifet, hamaan mapawan o pihayda no hekal ato nini a ciraraway hekal wa malahdaw maemin. (1 Yohani 2:17) O kakarayan Wama ci Yihofa o moecelay, cowa ko mamapawan to nano demak ita ato paihkalan a olah pakayni i ngangan Ningra. (Hipray 6:10) Wa pakayni ko pihayda ni Yihofa kitaanan​—ora sapalemed mamataˈlif to maharatengay no mita! w18.07 11 fiedac 17-18 fatac

Tiya malacafay ci Yis to tarokos a komaen to saikoray a lafi i, ciharatengayto wa ngaˈay cangra mitafo to makelecay hakiya. Malacafayay ci Yis cangranan a mitolon, sowal sa nanay malacecay ko nisawawaan, matiya o nika lacecay ningra ato Wama. (Yohani 17:20, 21) Makelec a malacecay ko nisawawaan wa ngaˈay misawacay, o na miocoran ni Yihofa ci Yis tayni i hekal. O tahapinangan no soˈlinay Krisciyang ko olah, ano ira ko matiniay capeling no nisawawaan, wa ngaˈay matafo ko makelecay. (Yohani 13:34, 35) Pasowalay ci Yis to kalimelaan ko makelecay. Mahapinangay ni Yis i kalalaˈed no tarokos, cangoˈotay ko makelecay a harateng. Tinakoen tiya saikoray a lafi i, miliyaway ko tarokos malacongis to “o cima no mita ko mamalasatadamaanay.” (Luka 22:24-27; Marko 9:33, 34) O roma, ci Yakop aci Yohani micangacangay ci Yisan, pafeli cangranan to kalimelaan a saaroˈan i Hongti Kitakit.​—Marko 10:35-40. w18.06 8 fiedac 1-2 fatac

Misaaliay ci Yihofa tangongolen ko olah no raramod, tangasa i kapatay ko olah. (Matay 19:3-6) O maˈaˈodangay a waywayan awaay ko olah, mansa itini moetep a salimoˈot sakapito mikecengay to tamdaw maˈaˈodang. (Limoˈot 5:18) Maˈaˈodangay tamdaw cowa ko ‘pakararaw aca to Kawas’, pakidemay midokaˈ to ramod. (Satapangan 39:7-9) O makoracay a ramod pinapina poloˈ miheca, kamayanho adada ko falocoˈ pakayni pisafelit no ramod. Pakayni Rikec ni Mosi mahapinangay ita, ciharatengay ci Yihofa to lipahak ato dipayal no wawa. Palimoˈotay ci Yihofa to wama wina midimokos to saali no wawa, padama cangranan malo widang no Kawas. Padama cangranan cipinang ato misaareteng to sarikec ni Yihofa, maolah ci Yihofaan. (Limoˈot 6:6-9; 7:13) Caka ngaˈay hawaden mirikec anca mikariˈang to wawa, o mikitiniay ci Yihofaan a kalimlaan a hafay han ko pinengneng to wawa, ka olahen cangra.​—ˈOlic 127:⁠3. w19.02 21 fiedac 5, 7 fatac

Maharatengay ni Yopu to papalifonen no Kawas cingra, padamaay koni cingraanan padotoc a madimadi. Mafanaˈay cingra, misinanotay ko Kawas cingraanan madimadiay hokira. Soˈlin tahalifaay to sapalifet, pakasoˈlinay ci Yopu wa palifonen ni Yihofa noikor. Hato fanekfekay cingra mitafo to madimadiay. Maˈaraway ni Yihofa tada mahemekayto, mansa pafelian Ningra ko cowaho ka lefot a Yopu to kadofahay a sapalifon! (Yopu 42:12-17; Yakop 5:11) Noikor, wa malifokho ni Yopu ko adihayay a raheker. Sowal no Fangcalay Cudad, cowa ka falic ci Yihofa. (Malaki 3:⁠6) Haratengen ita, papalifonen ni Yihofa koya madimadiay a tamdaw, wa misaˈicel kita mitafo to madimadi, ato milifok to fangcalay a noikoran. (1 Tisalonika 5:8, 9) Nolatekay, edengan ko niyah aca ko misaˈicelay a mitafo to madimadiay wa saan ko harateng iso. Kawra, aka matawal, iraay ko pina soˈot a ˈofad a tamdaw, mahecaday tisowanan a madimadi to Kawas. Ano mihaen i, o mitodongay to madimadiay a sikawdan nolitengan, pakasoˈlinay cangra to Kawas, soˈlin misiˈayaw to saroero no patay, kamayan mitafo to madimadiay ato cowa pisafelit to palinian ni Yihofa.​—Hipray 11:36-38; 12:⁠1. w19.02 7 fiedac 15-16 fatac

Mangataayto ko piharatengan to kapatay ni Yis a romiˈad, ngaˈay licayen ko niyah: “Pakayni pitodong to paihkalan ni Yis a ciolahay a capeling, ngaˈayay ko kacakat ako han? Ciharatengay kako to saali no salikaka anca o niyah aca han? Pakidemay ko saali ako to salikaka, anca siniˈadaay to citolasay ko ˈicel nangra han?” Nanay padotocen ita mitodong ci Yis ‘siniˈada to tao.’ O limasmas no Piharatengan to Kapatay ni Yis a Saˈopo, cowato ko hahalafin. Ano ‘tayni’ ci Yis i taˈangayay padiing a romiˈad i, “ta pasaˈopoen nangra ko naicowacowaay a nipiliˈan ningra a finawlan,” tayra i kakarayan, itiya o Piharatengan to Kapatay ni Yis wa mahererekto. (1 Korinto 11:26; Matay 24:⁠31) Soˈlin cowato ko mamiharateng to kapatay ni Yis, mikitini i Lafi no Tapang mananamay no finawlan ni Yihofa, ci Yis itini misapoeneray, timoloay ato ciolahay falocoˈ patirengay to mikiriwiˈay a taˈarawan. w19.01 25 fiedac 17-19 fatac

Sapitadtadaw to kalimlaan ko kemoday a harateng, ngaˈayay saka dademaken ita ko pakayraan no tireng. Sapitafoaw to tanoktokay a tireng, wa matatodong ko kakaenen no mita, micerid a mionto. Mahecaday, sapitafoaw kita to noˈadingoan a tanoktok, wa komaen to noˈadingoan a kakaenen, micerid a mitiˈer to Kawas, mahawpay ko misaka dademak to minanaman i nokaˈorip ita ato mitosil. (Loma 10:8-10; Yakop 2:26) Latekay, tanoktokayho ko tireng no niyah, sanay ko harateng, ˈarawhan, iraayto ko dangoc no tireng. Mahecaday, miceriday kita mirienang to noˈadingoan a tayal, hato tanoktokay ko pakasoˈlin no niyah, ˈarawhan lomahadayto ko mararaway a harateng i kemod no falocoˈ. (1 Korinto 10:12; Yakop 1:14, 15) Sasinanoten ita, sapinaholaw ci Satan to falocoˈ ita. w19.01 15 fiedac 4-5 fatac

Ngaˈayay licayen ita ko niyah: “Mitodongay kako toya sidaˈitay a Samariya tamdaw han? (Luka 10:30-35) Talaˈayaway ko demak ako, paihkal to adayayay i tahapadesay tamdaw hokira? Wa ngaˈay kako midemak to maanan a padama to matoˈasay anca malahdaway ko ramod a salikaka han? O roma kaemangay cowa ko Misawacayay Tamdaw ni Yihofa ko wama wina, wa ngaˈay kako ciharateng cangranan han? Wa ngaˈay kako ‘mipaˈicel to matoleday a tamdaw’ han?”(1 Tisalonika 5:14; Yakop 1:27) Ano paihkal kita to adayayay i tao, wa malifa ko lipahak no paladaˈay, hanaca mafanaˈay kita mihaen ko demak, wa pakahemek ci Yihofaan. (Dmak 20:35; Hipray 13:16) Masowalay ni Tafiti ko paihkalay to adayayay a tamdaw, sanay ko sowal: ‘Dipoten ni Yihofa cangra a parihaday to ˈorip nangra, palemeden Ningra cangra tonini a sera.’ (ˈOlic 41:1, 2) Paihkal kita to adayayay ato siniˈadaay i tamdaw, wa milifok ko niyah to adayay no Kawas, milifok to tahadaˈocay a lipahak.​—Yakop 2:13. w18.09 19 fiedac 11-12 fatac

O cecay madimadiay fafahiyan salikaka ci Yosiko, pasowalay ko ising cingraanan, edengan pinato a folad ko kaˈorip ningra sanay. Samaanay ko harateng ningra hani? Maharatengay ningra ko cecay a sinael, o aniniay a sinael. Rihadayay ci Yosiko pasowal to ising, cowa ka talaw cingra, samanen mimetmetay ko kamay ni Yihofa cingraanan. Oniya sinael parihadayay to salikaka ci Yosikoan, padama cingraanan misarocod a mitiˈer ci Yihofaan. Ano misiˈayaw kita to pakidemay a sapalifet, oniya sinael ngaˈay padama kitaanan parihaday to falocoˈ. Papitiliden ni Yihofa ci Isaya toniya lihaf, o mamihinom toya mamaholiw tayra i Papilon a Yutaya tamdaw. Nikawrira, tiliden ni Yihofa koniya lihaf, cowa ko pakayniay aca i maholiway a Yutaya tamdaw, pakayniay i polong a finawlan no Kawas anini. (Isaya 40:8; Loma 15:4) Anini, maˈoripay kita i ‘pasangaray siˈayawen a ˈawaled’, mikikakaay ko saali to mihinomay a lihaf no Isaya a cudad.​—2 Timoti 3:1. w19.01 2 fiedac 1-2 fatac

Ano malalicinowas ko Krisciyang to raramod i, o kalalaˈed nangra kamayan o raramod cangra. Kawra, wa tahalifa to sapalifet cangra, mahecaday malengoay i saˈayaw. Masowalay ni Pawlo ko roma lalangian to papadotoc a mitafo to raramod, sanay cingra: “Nawhani pakayni i nika raramod nangra a mapalemed no Kawas koya caay pipasoˈlin ci Kristoan a faˈinay. Ano caay ka hatira i, matiya o mafokilay to Kawas ko wawa namo. Nikawrira, mapalemedto no Kawas imatini ko wawa namo.” (1 Korinto 7:14) ˈAlomanay madimadiay a Krisciyang, soˈlin tahalifaay to pasangaray, kamayan cangra padotoc mitafo to kalalaˈed no raramod. Ano mala Misawacayay Tamdaw ni Yihofa ko raramod, maedeng wa mahemek to na misaˈicelay ato kinafalahay ko niyah, malifokay ko sapalemed nohatini. (1 Korinto 7:16; 1 Pitiro 3:1, 2) Anini, itini i kasakopang no Krisciyang icowacowa pala, adihayay ko lipahakay ko raramod, itini kasakopang iso iraay ko hatiniay tinakoan alatek. Oniya lipahakay raramod, maolahay ko madimadiay faˈinay to fafahi, tangongolay ko pikangodo no fafahi to faˈinay, mikangodoay cangra to raramod.​—Hipray 13:4. w18.12 14 fiedac 18-19 fatac

O tatodong no “Itin”, o “Mahemekay” sanay. O makapahay a kitiraan ato iraay ko kadofahay a kakaenen, ngaˈayho misalama ko tamdaw to ˈaˈadopen, tada kahemekanto koniya pala. (Satapangan 1:29-31) No Hipray sowal a “koing”, mihongyak ko Krisiya, o “Paratisos” (pa·raʹdei·sos). Itini cecay kakako cudad, mitadtad to tatodong no “paratisos”: “Pakayni miliwkoay no Krisiya, miharateng cangra o kakahaday a koing konini, i lalomaˈ no koing cowa ko aira ko midokaˈay. Adihayay ko ˈakawangay a kilang, o roma kilang paloma i lawac no tingalaway a ˈalo, adihayay ko heci no kilang. I lawac no ˈalo, masaˈopoay ko ngafol ato lopayˈay siri.” (Nengnengen ko Satapangan 2:15, 16) Paˈoripen no Kawas ci Atam aci Ifa i Lakoing, kawra cowa pidoedo cangra to Kawas, telocto milaplapan cangra nai Lakoing. Ikor, ci Atam aci Ifa ato teloteloc nangra malahdawayto ko Lakoing. (Satapangan 3:23, 24) Soˈliˈlin, awato ko tamdaw i Itin, kawra tangasa i romiˈad ni Nowa a Lenlen, itiyaayto a malahdaw ko Itin. w18.12 3-4 fiedac 3-5 fatac

Misaˈicel ko wama wina pasifanaˈ to wawa to matatodongay a harateng. Ano tooren no wawa ko sapafeli no wama wina a harateng a maˈorip, cowa ko mamidemak to kasomadan a saˈosi, cowa ko papaira to adihayay a kacarirawan. Ci Yihofa, mahecaday o maolahay to wawa a wama, tokel Ningra nanay ciepoc ko kaˈorip no mita. (Isaya 48:18) Mihaenay, pafeliay Cingra kitaanan to palinian no waywayan ato safalod, mitokelayho kitaanan palahad to harateng Ningra, ato midoedo to safalod Ningra a maˈorip. Mihaen ko demak Ningra, cowa ko mipalitay kitaanan, wa pacakat to sapiharateng a ˈicel no mita. (ˈOlic 92:5; Taneng 2:1-5; Isaya 55:9) Mahecad ko harateng ita ci Yihofaan i, wa kamayan ira ko kaolahan no niyah, wa ngaˈayho matatodong ko misaˈosian, palipahak to niyah. (ˈOlic 1:2, 3) Ira ko harateng ni Yihofa no mita, tada o saka ciepoc! w18.11 19-20 fiedac 7-8 fatac

Sapadotocaw kita midoedo to soˈlinay kimad a midemak, oha mamisaˈicel eca ka padik no saroero. Misatapang kita midoedo to soˈlinay kimad a maˈorip i, mafalicayto ko kalalaˈed ita to cowa pihakelong a salawina. O roma salawina cowa pisafelit to pihakelongan ita, o roma tada mapiliˈay. Paro no lomaˈ, cafay matayal, cafay micudad, wa mitahidang kitaanan mirienang to misalisinay a demak alatek. Misiˈayaw kita to hatiniay saroero i, samaan ngaˈ eca ka kalacafay cangraanan midofdof to mararaway a nanaman, anca misalisin to misafelitay to palinian no Kawas a lisin hani? Sasinanoten ko pinengneng ni Yihofa toniya nanaman ato lisin. Ngaˈayay lomalen ita ko milengoay toniya lisin i mitepangan a cudad. Micerid kita patalipaˈelal to niyah, o lalangian eca ka pirienang toniya lisin, mihaen wa ngaˈay pasoˈlin to midoedoay ko niyah to ‘kahemekan no Tatapangan’ a pakayraan a midemak. (Ifiso 5:10) Mitiˈer kita ci Yihofaan ato kimad Ningra, ecato ‘makokiˈ to tamdaw’.​—Taneng 29:⁠25. w18.11 11 fiedac 10, 12 fatac

Ano fahal sa ko kafalic i nokaˈorip ita i, wa macariraw kita alatek, sahtoay o pasangar no niyah ko maharatengay. O hatiniay a pakayraan mifekaday i tireng ni Yosif alatek, kawra cowa ka toled a masomad cingra, misaˈicelay a midemak, mitala ci Yihofaan pafeli to sapalemed cingraanan. Itini i kapalitan ci Yosif i, misarocoday milaheci to patorodan no tapang no kapalitan a demak cingranan, mahecad o noka pisarocod ningra a dademak ci Potifaan. (Satapangan 39:21,​22)Mahecad ci Yosifan, wa tahasiˈayaw kita to cowa ka remo a pakayraan alatek. Kawraan, ano padotoc kita a mihadidi, misaˈicel a midemak, wa palemeden ni Yihofa kita. (ˈOlic 37:⁠5) Soˈlin nolatekay “awaawa ko pakayraan niyam”, kawra mahecad o sowal ni Pawlo, “caay ka toled kami.” (2 Korinto 4:⁠8) Wa kalacafay ci Yihofa kitaanan, mangalef ano padotoc kita misamacay to mitosilay a demak, wa padamaen Ningra kita. w18.10 29 fiedac 11, 13 fatac

O cecay kafanaˈan ato kangodoan iso a tamdaw, mapawan to ngangan iso, anca cowato ka fanaˈ tisowanan, wa samaan ko harateng iso hani? Maedeng mamasomad kiso, samanen misaali to sakafanaˈ no tao, o nanaman ita koni, hanaca o tokel ita cowa ko kafanaˈ aca no tao to o cima kita, mihaydaho to waywayan ato nano demak no mita. (Saˈosi 11:16; Yopu 31:⁠6) Soˈlin makalimay kita haydaen no tao, kawra o hatiniay harateng pakayni ka eca kalefot wa pakidem a mararaw, satapangay sapaˈdilaw to niyah. Miowingay ko hekal ni Satan to tamdaw micangacang to saka cinganganaw, samacay sanay ko tamdaw milifok to sahayda no tao, mapawanto paˈdil ato midoko to Kawas ci Yihofaan.​—Paˈarawan 4:11 w18.07 7 fiedac 1-2 fatac

Ci Satan ato tatiihay coyoh misakadademakay to cifadangalay a tamdaw, misamangah milipalaw to tamdaw, cowa ka fahkaˈen kita tonini. (1 Timoti 4:1, 2) Taˈangayay ko raraw no milipalaway to tamdaw a ˈaˈideman no pihakelongan, samanen o mangah nangra mipalakay to hatokel no tamdaw. Hano haenen ko sowal hani? Ano pakasoˈlin ko tamdaw to mararaway pihakelongan, midemak to kapiliˈan no Kawas a demak, wa malahdaw ko tahadaˈocay ˈorip a hatokel ningra halatek. (Hosiya 4:9) Mirikecan ni Yis ko ˈaˈideman no pihakelongan itiya, mihaenay cangra a milipalaw to tamdaw. Sanay ko sowal ni Yis cangraanan: “O cacilafo kamo o misamangahay ko demak a pasifanaˈay to Rikec ato Farisay a tamdaw. Nawhani taliyoken namo a mirakat ko riyar ato hekal to sapipacomodaw to cecay a tamdaw i pakayraan namo. Maherek kamo a pacomod cingraan i, sangaˈen namo cingra a [mifalah i Hinnom, midaˈoc malaˈafo.]” (Matay 23:15) Pakideman ni Yis mirikec koniya ˈaˈideman no pihakelongan, samanen mahecaday cangra toya “mipatayay to tamdaw” a Akoma misamangah to tamdaw.​—Yohani 8:44 w18.10 7 fiedac 5-6 fatac

O maanan ko tatodong no sowal ni Yis hani? Padotoc pasowal cingra: ‘Kalipahak, nawhani tadamaan ko sapakaolah i tamowanan i kakarayan. Itiniay ˈayaw namo a pailrasolay, mahaenay a kariˈangen no tamdaw cangra.’ (Matay 5:12) Ikor no masetiˈ ko tarokos i, maparoeroay no tamdaw to aka padotoc a mitosil, ˈarawhan “salipahak” sanay cangra a miliyas to Pilaocan. Cowa ko maolahay cangra a masetiˈ, samanen o “matatodongay a mapakangodo tona mitoor . . . ci [Yisan]” ko lalangian nangra. (Dmak 5:41.) Anini, o finawlan ni Yihofa mahemekay pakayni i ngangan ni Yis mihadidi to sapalak anca sapalifet. (Yakop 1:2-4) Mahecaday to tarokos, cowa ka ciharateng kita to maroero no tao. Kawra ano mapalifet kita kamayan madimadi to Kawas, o papafeli ci Yihofa to timolo ngaˈay kita a mihadidi. O waywayan ita wa ngaˈay pakahemek to “lipahakay a Kawas”, soˈlin misiˈayaw to sapalak, saroero nai paro no lomaˈ, wa ngaˈayho padotoc kita a lipahak.​—1 Timoti 1:11 w18.09 21 fiedac 18-20 fatac

Maˈorip i ‘pasangaray siˈayawen a ˈawaled’, ‘maroray’ ko kaˈorip ita, matomesay ko ‘cariraw’. (2 Timoti 3:1-5) Samanen pakidemay ko roray no ˈalomanay, cowato ka sakaˈoripaw. Saˈosien, cecay miheca 80 ˈofad ko kinasoˈotay tamdaw, 2 ehon toloay ko kinasoˈotay. Ka adayayan i, o roma salikaka samanen taˈangayay ko saroero, laˈeto sanay to ˈorip no niyah. Anini, ˈalomanay salikaka soˈlin awaay ko sakapatayaw a harateng, kawra pakayni sapisaysayaw to masakenaay a saroero, misaaliay to mikitiniay i olah a sapakalalok no tao. O roma tamdaw mihadidiay to sapalak ato salikaf; o roma tamdaw madokaˈay no sanaysanay a sowal no cafay matayal; o roma tamdaw misiˈayaway to saroero no tayal. Cowa ka hatini aca, o pasangaray no paro no lomaˈ mahawpay ko halafinay to pisafelit no cowa pihakelong a raramod, tada marorayayto. Oniya pasangaray ato saroero palotayay to ˈalomanay a Krisciyang. w18.09 13 fiedac 3, 5 fatac

O Krisciyang a wama wina padamaen ko wawa patireng to patosokan i noˈadingoan, mahecaday o malacafayay ci Yihofaan a matayal koni. ˈAlomanay a wama wina mihaenay to demak, minaroˈan i, maolahay ko wawa mirienang to mieminay to toki a mitosil, alatek miliyas cangra to nalacolan, malo milakowitay to riyar a misakafahay, tayra i misaaliay to mitosilay a kilac misakafah, anca matayal i Pitil. Samanen maraayay ko kalinahan no wawa, alatek awaay ko pakayraan no wama wina a minengneng to wawa, kawra makahiay kinafalah a wama wina, mitokelay to wawa materek i tayal no Kawas, samanen mahemekay cangra maˈaraw ko wawa micangacang to Hongti Kitakit. Iti:yaho, sowal ni Hana, o ‘mipacaliwan ci Yihofaan’ ko wawa ako ci Samuil sanay, anini o harateng no ˈalomanay wama wina mahecaday ci Hanaan, ngaˈay malacafay ko niyah aci Yihofaan a matayal, tada o taˈangayay a sakaliko, o matatodongay a saˈosi koni.​—1 Samuil 1:28. w18.08 24 fiedac 4 fatac

Cowa ka pasowal ci Yis to caay ko mamaremo nangra. Sanay ko sowal ni Yis: ‘Manikaway tamdaw mamalemed kamo, samanen ono namo ko Hongti Kitakit no Kawas.’ (Luka 6:20) O manikaway tamdaw wa madipot no Kawas maemin, anca wa mitengil cangra maemin to sapasifanaˈ ni Yis cowa ka saan. Soˈlinay i, ˈalomanay a manikaway tamdaw cowa ka malo nisawawaan ni Yis. O maanan ko mananamay ita hani? Aka o hafay no tamdaw ko sapisawkit ita to kalalaˈed ningra aci Yihofa. Anini, o finawlan no Kawas ano manikawayto cihafayayto, maolahay ci Yihofaan misarocod to falocoˈ mihodop Cingranan. Patalipaˈelalay ko Fangcalay Cudad to cihafayay a Krisciyang, “sakaecaaw ka pasayra no falocoˈ nangra i caay ko tatadiˈecen a dafong,” pasayraen i Kawas ko falocoˈ. (1 Timoti 6:17-19) Loma pakayraan i, mirikecay ko Fangcalay Cudad to polong a finawlan no Kawas, ano samanayto ko hafay, aka a maˈanof to payci. (1 Timoti 6:9, 10) Tano harateng ni Yihofa ko pinengneng ita to salikaka, mihaen cato ko hafay ko sapisawkit to samaanay a tamdaw cangra. w18.08 10-11 fiedac 11-12 fatac

Miakoˈiday kita ci Yihofaan ngaˈay malo finawlan Ningra kita. Cipinangay kita to inanengay a saˈosi ko pipatafang to tireng ci Yihofaan. Misetek ko falocoˈ ita eca ka pidemak to kaˈintehan no Kawas a demak. Wa maolah kita to salikaka, mikangodo cangranan, samanen oni Yihofa cangra. (Loma 12:10) Mikiˈokay ko Fangcalay Cudad kitaanan: ‘Cowa ko mamifalah ci Yihofa to finawlan Ningra.’ (ˈOlic 94:14) Ano o mananto ko masiˈayaway ita a pades, wa tooren ni Yihofa ko sakiˈok Ningra. Ano o patayto cowa ko mamiconged to olah ni Yihofa kitaanan. (Loma 8:38, 39) Sowal i Loma 14:8 sanay: “Ano nika ˈoripto, ano nika patayto ita i, [oni Yihofato] kita.” Hinatalaay kita maraod ko toki sapatikolaw ni Yihofa paˈorip to madimadiay a widang. (Matay 22:32) Ano aninito, milifokay kita to adihayay sapalemed, mahecad o sowal no Fangcalay Cudad: ‘O Kawas niyam ci Yihofa sanay a kitakit tada malemeday! O nipiliˈan no Kawas a finacadan tada malemeday!’​—ˈOlic 33:12. w18.07 26 fiedac 18-19 fatac

Harateng no roma tamdaw o notekedan a papiliˈen koniya demak, ano mihai ko tingalaway falocoˈ, wa ngaˈayto ko niyah a misaˈosi to sasamaan ko demak sanay. Saka ira ko mahaenay harateng nangra, samaanen milengoay ci Pawlo to kakaenen itini kasakopang no Korinto, sanay ko sowal ningra: ‘O pasalat ako hano masawkit no falocoˈ no tao hani?’ (1 Korinto 10:29) Soˈlinay o ngangaˈay kita misaka dademak to pasalat misaˈosi to picudadan ato katayalan. Kawraan, haratengen ita, ora pasalat ita iraay ko tolas, o misaˈosian ita iraay ko pifiyor to tao. Mihaenay, Patalipaˈelalay koniya limoˈot kitaanan, misaka dademak to pasalat i kaˈorip i, o kaolahan no niyah a demak cowa ko sakakaay. w18.04 10 fiedac 10 fatac

Anini, wa mahecad ko Krisciyang ci Kainan halatek, midokoay ko niyah ci Yihofaan saan, kawra midemakay to kaˈintehan ni Yihofa a demak. (Yuta 11) Tinakoen, tawlikay ko cecay Krisciyang mirienang to mitosilay ato micerid masaˈopo, kawra pakiyadi han ningra ko malafoay harateng i falocoˈ, maˈanof, anca ˈinteh to salikaka. (1 Yohani 2:15-17; 3:15) O hatiniay mararaway harateng wa miocor cingranan midemak to tatiihay a demak halatek. O maanan ko miharatengan anca midemakan ita, cowa ka fanaˈ ko tao, kawra mafanaˈay ci Yihofa, ihkalay cipinang Cingra to misarocoday kita a midopo cingranan hokira. (Yirimiya 17:9, 10) Soˈlin mararaw kita, cowa ka ranikay ci Yihofa a misawad kitaanan. Sanay ko sowal ni Yihofa to miliyasay to moecelay lalan a tamdaw: “Pipasasiyor kamo a pasayni i Takowanan”.Ano miremo kita to dangoc no niyah i, mitokelay ci Yihofa kitaanan misetek to falocoˈ aka a pidemak to tatiihay demak. (Isaya 55:⁠7) Mihaen ko demak ita, o dadamaen ni Yihofa kita, itini noˈadingoan, no falocoˈan, no tirengan milifok to haˈicel no mita, ngaˈay ‘pakalowid’ to mararaway a coos.​—Satapangan 4:7. w18.07 18 fiedac 5-6 fatac