Saka 2 Folad

Itini Fangcalay Cudad, tatodong no “masadafdafay” i, midemak to kahemekan no Kawas a demak, caka pisakakinih a midemak. O waywayan ni Yis paihkalay to moecelay a tamdaw cingra. Itini i sera ci Yis i, ˈintehay ko ˈaˈideman no Yutaya to ˈalafang a tamdaw, misakahmaway to kalo a tamdaw, cowa ka ngodo to fafahiyan. Cowa ka lecad ci Yis, masadafdafay ko pinengneng ningra to tamdaw. Micadaan ni Yis ko pakasoˈlinay cingranan a ˈalafang tamdaw. (Matay 8:​5-​10, 13) Cowa pisakakinih ci Yis to tamdaw, o mitosilan ningra mahawpay ko manikaway ato cihafayay. (Matay 11:5; Luka 19:​2, 9) Cowa pikariˈang to fafahiyan, tano mangodoay a siniˈada cangranan, mahawpay ko misakahmawan no tao a fafahiyan. (Luka 7:​37-​39, 44-​50) Ngaˈayay todongen ita ci Yis, caka pisakakinih to tamdaw, ano samaanto ko saaroˈan anca pihakelongan no tamdaw, ano makahi mitengil o tatosilen ita cangra. O faˈinayan a Krisciyang, wa minanam ci Yisan mikangodo to fafahiyan. w19.05 2 fiedac 1 fatac; 5 fiedac 15-​17 fatac

Anini, o madimadiay a malohemay malitengay mitodongay ci Pawloan, tano damsayay patadoay miharateng a waywayan misaka dademak to sinael a mihinom to papadamaen a tamdaw. Edeng o malohemay malitengay ko ngangaˈay mihinom to mikaˈodangan a tamdaw han? Kahacecay ita o ‘papadotoc masasihinom’. (1 Tisalonika 4:​18) O matenesay fafahiyan salikaka tataˈangay ko sadama to misaaliay to hahinomen. Itini Fangcalay Cudad, patinakoan ni Yihofa ko niyah to mihinomay to wawa a wina. (Isaya 66:13) Masowalay no Fangcalay Cudad ko pina fafahiyan mihinomay to tahapadesay a tamdaw. (Yopu 42:11) Latekay, mitahidang ko malohemay malitengay no kasakopang to matenesay fafahiyan salikaka padama to mikariˈangan a tamdaw. Makahi ko fafahiyan Krisciyang mihinom to masomaday ko falocoˈ a tamdaw, maedeng mamahemek ci Yihofa pakaˈaraw! Ano mihinom kita to salikaka i, ano caka kahi cingra pasowal, hamaan lalicay han no mita.​—1 Tisalonika 4:11. w19.05 16-17 fiedac 10-12 fatac

ˈAyaw no mamisawkit a miiing ko malohemay malitengay, hano misaali to tatosaay a misawacayay tamdaw hani? Oniya saali mitooray to masadafdafay a palinian no Fangcalay Cudad. Ano eca pihai koya miekoan a tamdaw to raraw, misaaliay to tatosa tamdaw misawacay, mihaen ngaˈ misawkit a miiing ko malohemay malitengay. (Limoˈot 19:15; 1 Timoti 5:​19) Tatengilen no malohemay malitengay ko sowal no misawacayay tamdaw. Ano tatosaay ko misawacayay tamdaw, o cecay o mifanaˈay, o roma ngaˈayay misawacay anca mafanaˈay to na midemakay koniya miekoan to malecaday a raraw, papatireng ko malohemay malitengay to misawkitay a iingkay. Soˈlin awa ko saka tosa misawacayay tamdaw, misakaniway koya mifanaˈay tamdaw cowa kasaan. Soˈlin awa ko tatosaay misawacayay tamdaw eca kangaˈay patireng to misawkitay a iingkay, haharatengen no malohemay malitengay, iraay ko pakidemay ko raraw a tamdaw alatek, o tataˈangay ko pidokaˈ to tao. Mihaenay, papadotoc ko malohemay malitengay padama to mikaˈodangan a tamdaw, wa misinanotho to pakayraan no kasakopang, ho madipot ko kasakopang eca ka tahacada to katalawan.​—Dmak 20:28. w19.05 11 fiedac 15-16 fatac

O wama wina pakafanaˈ to wawa misamaan a micekiw, o masaka limlaan a demak, samanen maminanam ko wawa paliˈayaw a misaday to lalakaw no saˈopo. Ano tahalifa cangra to pasangar i picudadan i, maminanam cangra mikilim to milingatay a lalakaw. (Hipray 5:​14) Ano iraay ko nanaman nangra micekiw i kalo romiˈad, mirienang sato to saˈopo ato taykay i, o mamisamacay a mitengil. Manaokaniw, o sasasinanoten no wama wina ko pinangan ato mihecaan no wawa, misaˈosi to hahakowa ko toki misikay to Pakalomaˈay Pidoko. O pacekiwan ita a tamdaw o maminanam to mamisamaan a micekiw. Tiya satapang saho cangra micekiw i, soˈlin pikonis aca nangra to cacekiwen lalakaw ato sapacaˈof i kasaˈopoan i, mahemekayto kita. Nikawrira, o papasifanaˈenho ita cangra misamaan a mikilim to lalakaw, ato misamaan micalep a micekiw. Ano mihaen i, tahalifa sato cangra to pasangar i, o mamikitini i mitepangan no mita a cudad mikilim to ngaˈayay sakadademaken a sapaini. w19.05 26 fiedac 2 fatac; 28 fiedac 10-11 fatac

Ci Satan sapinaholaw to harateng ita. O Kimad no Kawas padamaay kitanan matatodong ko harateng, kawra tano masakenaay a mararaway harateng ko sapiˈodis ni Satan kitanan. Na milicayan ni Satan ci Ifa i Itin: “Soˈlinay pasowal ko Kawas to . . . ?” (Satapangan 3:1) Anini mahecaday ko pakayraan ningra. Marariday matengil ko cisasaay to pihakelongan ita a sowal, tinakoen: ‘Soˈlinay milalang ko Kawas to raramod no tongsinlinay han?’ ‘Soˈlinay milalang ko Kawas tisowanan misalisin to kahofocan ni Yis ato kahofocan iso han?’ ‘Soˈlinay miconged ko Kawas tisowanan pacomod to ˈirang han?’ ‘Ciolahay ko Kawas, soˈlinay milalang tisowanan macacawmaˈ to mafalahay i kasakopang a salawina han?’ O sasaˈosien ita to matatodongay ko pihakelongan no niyah. Ano cisasaay kita i, kawra cowa pikilm to sapacaˈof, wa mifekad ko pakidemay a hinapec. O hatiniay a hinapec o maminahol to harateng ita, mamalahdaw ko pakasoˈlin ita to Kawas. w19.06 12-13 fiedac 15-17 fatac

Tangongolay ko olah ni Yihofa kitaanan. (Yohani 3:​16）Sapitodongaw kita to sidaˈitay a Wama i kakarayan, ‘palecaden ko falocoˈ no tao, ira kono salikaka a olah, siniˈadaay,’ mangalef ko ‘malecaday o paro no lomaˈ’ a salikaka tongalen ko pihaen to demak. (Kalatiya 6:​10) Ano tahalifa cangra to pasangaray i, o mamakahi kita a padama. Sasamaan kita misayar to mapatayay ko ramod a tamdaw hani? Salakat, masasowal cingranan, soˈlin cowa ka fanaˈ kiso to o maanan ko hasowal, haenenho ko demak ngaˈngaˈay. Fahal sanay mapatay ko faˈinay ni Pawla, sanay cingra: “Mafanaˈay kako cowa ka olah ko ˈalomanay somowal to pakayniay kapatay no faˈinay ako a demak, samanen calemcemay cangra mararaw ko sowal. Kawra pakaynien i takowanan, mararaw ko sowal ikakaay to kaeca pasowal ko ngaˈay.” O masomaday ko falocoˈ a tamdaw, cowa pilongoc sapitengilaw to tangongolay a kimad. Sanay ci Pawla: “O kantangay a sowal ‘mahecaday a masomad kako’, taˈangayayto ko sasayar takowanan.” w19.06 20 fiedac 1 fatac; 23 fiedac 14 fatac

Ano makeceng ko midokoay a tayal ita, sasamaan milimasmas to saˈopo hani? Wa milimasmas ko malohemay malitengay to cowa ka hapinang no tamdaw a pakayraan a masaˈopo. Tano cowa ka ˈaloman a kasakapot mirienang to saˈopo, wa mararid mafalic ko toki anca kitiraan a masaˈopo. Sasamaan milimasmas to mitosilay demak, cowa ka lecalecad ko pakayraan. Maolahay kita ci Yihofaan, maolahay paladaˈ to tamdaw to ngaˈayay lihaf no Hongti Kitakit, mihaenay wa milimasmas to hapakayraan a mitosil. (Luka 8:1) O mitosilay a demak no Misawacayay Tamdaw ni Yihofa i lintad no Suwiay, micekiway to likisi ci Amiri Palan sanay: “Mikecengay ko mikowanay to Misawacayay Tamdaw ni Yihofa a mitosil, misaka dademakan nangra ko kasasowal to fiyaw, cafay matayal, widang a patenak to pihakelongan. Mihaenay ko demak no roma salikaka, hato patayraan i pisakolian, kawra kamayanho padadotoc mitosil to roma mapalitay.” Cowa pisawad a mitosil ko salikaka, nanay ira ko malecaday saˈosi no falocoˈ iso! w19.07 11 fiedac 12-13 fatac

Sasamanen ita padama koya awaay ko pihakelongan a tamdaw, maolah to Kawas malo Krisciyang hani? O picada no tamdaw to ngaˈayay lihaf ora kalomahadan ningra ko piˈarawan. Tinakoen, ano malecaday a pakayraan ko sapitosil ita to Iwropa ato Asia a tamdaw, cowa ka lecad ko harateng nangra. Hano mahaen hani? Itini i Iwropa, mafanaˈay cangra to Fangcalay Cudad, ato misangaˈan no Kawas ko kihcod sanay a demak. Kawra itini i Asia, cowa ka fanaˈ ko ˈalomanay to Fangcalay Cudad, cowa pakasoˈlin to iraay ko misangaˈay a Tatapangan. Tawliken ko Pinengneng, to mihecahecaan ˈalomanay ko awaay ko pihakelongan a tamdaw malo Misawacayay Tamdaw ni Yihofa. Ilalomaˈ iraay ko ngaˈayay ko waywayan a tamdaw, maacekay to kaniw no misasingsiay no kiyokay. Roma tamdaw malafoay ko waywayan a maˈorip, kawra minanam to Fangcalay Cudad mafalicayto ko tatiihay nanaman. Mansa ngaˈay pakasoˈlin kita, ira ko sadama ni Yihofa, o mamahela ita ko ‘citatodongay milifok to tahadaˈocay ˈorip a tamdaw.’​—Dmak 13:48; 1 Timoti 2:3, 4. w19.07 20-21 fiedac 3-4 fatac

O hatokel ita o sakikakarayan anca itini fafekang no sera tahadaˈoc maˈorip i Lakoing, o papasayra i patosokan misaˈicel a comikay. Hamaanto tangoˈol to mataˈlifayto a demak, hamaan papicaraen ko kalo demak to katalaˈayaw no mita. (Filipi 3:​16) O mitalaan ita a demak manayaray caho ka laˈosi alatek, tatiitatiihay ko tireng, anca micadaay to halafinay a roray ato sapalifet. Ano o mananto ko masiˈayaway a pasangaray, ‘aka cariraw,’ padadotoc a micangacang, o papafelien no Kawas kita to cowa ka harateng a rihaday. (Filipi 4:​6, 7) Malecad to midefolay a comikay mangata ko patosokan, misarocoday to ˈicel a milaseto, ano kitato mamisarocod to ˈicel, milahci to saka tahadaˈoc no ˈorip a cacikayen. Nanay tooren ita ko ˈicel no niyah, pasayra i makapahay hatokel i kaˈayaw a comikay. w19.08 7 fiedac 16-17 fatac

Alatek cowa ka fanaˈ kita, o maanan ko hasowal misayar to mapatayay ko salawina a tamdaw. Latekay, palecad kita cangranan a tomangic ikakaay to mihadakan ita a sowal. Tiya mapatay ko widang ni Yis ci Lacarus i, tomangicay ci Mariya, Marta ato romaroma tamdaw. Ikor no sepat romiˈad mahicera ci Yis, soˈlin papatikolen ningra paˈorip ci Lacarus, kamayanho a ‘marowis ko losaˈ ni Yis.’ (Yohani 11:17, 33-​35) Mihaen ko demak ni Yis paihkalay to nafalocoˈan no kakarayan Wama, mahapinangay no ˈalomanay to maolahay cingra to paro no lomaˈ ni Lacarus, cilosaˈ cingra maedeng masayaray ci Marta aci Mariya. Anini, ano macada no salikaka ko olah ato kaciharateng ita, cowato ko mamatoˈol cangra, wa matinako ko kaciharateng ato pidama no widang cangranan. Latekay, wa misongilaˈ kita mitengil to nafalocoˈan nangra a sowal. Ano “macaloh a caciyaw” cangra hamaan tatiih ko harateng. (Yopu 6:​2, 3) Miroero ko cowa pihakelong a paro no lomaˈ ningra, matongalay ko cariraw no falocoˈ ningra. Mihaenay, ngaˈayay kalacafayen cingra a mitolon, micangacang to ‘mitengilay to satolon a Tatapangan’ pafeli cingranan to haˈicel ato pafafidaˈay a inaneng.​—ˈOlic 65:2. w19.04 18-​19 fiedac 18-​19 fatac

Ano itinito kita i kilac anca i Pitil a matayal, mamaolah to itiraay a tamdaw atora pala. Ano mapacieci kita a miliyas, maedeng masomaday. Wa maˈilol kita to itiraay a salikaka, patado cangranan a calemcem, mangalef ano pakayniay sapalak ko sapiliyas i, tada mahaenay. (Matay 10:23; 2 Korinto 11:28,29) Roma i, mafalic ko faelohay katayalan anca minokay i nalacolan, iraay ko cowa ko kananaman a demak. O roma salikaka mafalic ko katayalan i, fahal sanay malifa ko pasangar no sakaˈorip. Misiˈayaw to hatiniay pakayraan, wa cariraw a matoled cangra alatek. Itiya, sasamaan cangra miremo to pasangaray hani? Wa miingid cangra ci Yihofaan. (Yakop 4:8) Papakasoˈlinen ita ci Yihofa ‘o mitengilay to satolon a Tatapangan.’ (ˈOlic 65:2) O mamalaˈosi ni Yihofa i, “ikakaay no nilongocan ato niharatengan ita a maamaan a demak.” (Ifiso 3:20) Cowa ko pafeli aca Ningra to misaalian ita, wa tano cowa ko maharatengay ita a pakayraan padama kitaanan, misaysay to pasangaray alatek. w19.08 21 fiedac 5-6 fatac

Harateng no ˈalomanay, o “Armakiton” milingatay to lalood ato pades no hekal sanay. Soˈlinay i, o ngaˈayay a lihaf ko Armakiton sanay ko Fangcalay Cudad! (Paˈarawan 1:3) O Armakiton cowa ko papalaˈafo to tamdaw, oha sakalidong no mita! Misamanay hani? Sowal no Fangcalay Cudad o Armakiton o papalasawad to pikowan no kalo kitakit, palaˈafo to mariˈangay tamdaw, milidong to moecelay tamdaw, cato ko mamapalak ko cikiw. (Paˈarawan 11:18) O “Armakiton” kinacecayay masadak i Fangcalay Cudad, o Hipray a sowal koni, tatodong i ‘Mikito Lotok.’ (Paˈarawan 16:16 ato roma pihongyak) O mikito o niyaroˈ nolitengan a Israil. (Yosuwa 17:11) Kawra o “Armakiton” cowa ko soˈlinay a pala. O “Armakiton” hananay, o masaˈopoay ko ‘kalo a hongti’ mitowakangay ci Yihofaan a pakayraan ko mitoroˈan.​—Paˈarawan 16:14. w19.09 8 fiedac 1-3 fatac

Tada misaaliay koniya fafahiyan to sapadama, 12 miheca ko halafin, adihayay ko miˈarawan ningra a ising, makalimay sakaadahaw no adada no niyah, kawra awaay ko kangaˈayan. Pakaynien i Rikec ni Mosi, o cikaditay cingra. (Lifi 15:25) Ikor, matengilay ningra ngaˈayay ci Yis miadah to adadaay a tamdaw, orato mikilimay ci Yisan, o pikama aca ningra to lawac no rikoˈ ni Yis, tangsolay maadah. Cowa ko adada aca ningra ko miadahan ni Yis, miadahayho to madokaˈay a falocoˈ ningra, matinakoay ningra ko olah ato pikangodo ni Yis. Tinakoen, pasowal ci Yis Cingranan i, madaˈmaˈay a mikangodo. Pangangan cingranan to ‘fafahiyan wawa,’ maedeng masayaray a mapakalalok cingra. (Luka 8:​44-​48) Sasinanoten i, mihadakay to ˈicel koniya fafahiyan tayra ci Yisan. Anini, wa malecad kita cingranan talaˈayaw ko demak. Soˈlin cowato pidemak ci Yis to kafahkaan a miadah to tamdaw, kawra sanay cingra mikiˈok: ‘Ka tayni takowanan, wa sayaren ako kamo.’​—Matay 11:28. w19.09 20 fiedac 2-3 fatac

Malecaday o sapairasol ni Cikariya konini, sanay cingra: “Toya romiˈad i, o tatayra ko moetepay a roma a finacadan a tamdaw i cecay a tamdaw no Yuta, sowal saan cangra: ‘Haydaen kami a mikapot i nika tadamaan namo, nawhani matengil niyam ko nika mikapot ko Kawas i tamowanan.” (Cikariya 8:​23) Mahapinangay no Misawacayay Tamdaw ni Yihofa, ano mamisaˈopo to cowa kalecad ko sowal a tamdaw, wa tano cowa kalecad a sowal ko pilasil to ngaˈayay lihaf. Anini, pinaayto a soˈot ko kasasiroma no mitepangan a cudad no mita, macowatay ko mihongyakay a tayal. O taˈangayay ˈopo tamdaw miktiniay i cowacowa pala a masaˈopo, tada o kasapaan a demak ni Yihofa konini. Samanen adihayay ko sasowalen no mitepangan a cudad, soˈlin mikitiniay i cowacowa pala ira cangra, kamayan a makelec malacecay midoko ci Yihofaan. Mahapinangay no ˈalomanay tamdaw fanekfekay cangra a mitosil, tangongolay ko olah i kalalaˈed. Oniya kihecod tada kasemeranto!​—Matay 24:14; Yohani 13:35. w19.09 30-31 fiedac 16-17 fatac

Itini taˈangayay padiing, papakidem ko kaˈangi no tamdaw, samanen maˈaraway ko kapelal no mitadiˈecan nangra a demak. Wa ‘pakidem ko pisemsem’ nangra, calemcem to mamapatay ko niyah toniya satoˈmanay a tatokian. (Cifaniya 1:​14, 15) Itiya, o papasangar ko kaˈorip, ano finawlanto ni Yihofa o mamalecad ko malifaay. Samanen o tatanektek a miliyas toniya hekal a tahalifa to roray, o cacangoˈot to sakaˈorip alatek. Sapadamaaw kitaanan a madimadi, milakowit to taˈangayay padiing, ‘madimadiay citanengay a kuli’ adihayay ko mihadakan a ˈicel. (Matay 24:45) Cecay tinakoan i, mikitini 2016 miheca tangasa 2018 miheca a kamok no kasapala tayakay. Oniya kamok patalipaˈelalay kitaanan, mangataayto ko romiˈad ni Yihofa, mihaenay o papadadotoc kita palahad to pina a capeling. w19.10 14 fiedac 2 fatac; 16 fiedac 10 fatac; 17 fiedac 12 fatac

Ano micomod i ngoyos ko kakaenen i, wa tangsol a maselip no tireng. O cihaleday a kakaenen ciepocay ko tireng, o hadec a kakaenen wa mipalak to tireng, soˈlin cowa ka tangsol sa adada, kawra mamahadak noikor. Mahecaday, wa ngaˈay kita mipiliˈ to halawla, kawra ano maˈaraw matengil i, o kamok no lawla mamifiyor to harateng ato falocoˈ no mita. O ciepocay a lawla mikowaday kitaanan, tatiihay a lawla minaholay kitaanan. (Yakop 1:​14, 15) Soˈlin caka tangsol mahapinang ita, kawra o tatiihay a pifiyor no lawla, wa masadak i waywayan ita noikor. Mansa mihaen ko sowal no Fangcalay Cudad: ‘O maanan ko palomaan no tamdaw, oriraan ko milidongan. Midoedoay to coos no tireng a mikosam, mikitini i coos no tireng milidong to sakapatay.’ (Kalatiya 6:​7, 8) Ano sakapahen no lawla ko kaˈintehan ni Yihofa a demak, oha laliyasen ita, tada kalimlaan ko pihaen to demak!​—ˈOlic 97:10. w19.10 30 fiedac 12-14 fatac

Mafanaˈay kita to maolahay ci Yihofa kitanan, pakayni sapilidongaw kitanan patafangan Ningra ko ˈorip no wawa. (Yohani 3:​16) Wa samaan kita mitodong to olah ni Yihofa hani? O cecay pakayraan, salimlaen ko salikaka. Roma i, ano patatikol i likakawa no Kawas ko “masidayay a siri” i, patadoen cingra a mahemek soˈlin ko falocoˈ a micada cingranan. (ˈOlic 119:176; Luka 15:​7, 10) Sasamaanho kita paihkal to olah i salikaka hani? Kinafalah to niyah, ano misaali cangra tangsol a padama. (1 Yohani 3:​17) Palimoˈotay ci Yis to mihakelongay cingranan a tamdaw pairaen ko kinafalahay to niyah a olah. (Yohani 13:34, 35) O faelohay a limoˈot misaaliay to olah, o hatiniay a olah cowa ko misaˈosian no Rikec ni Mosi. Tatodong ni Yis wa malecad kita cingranan a maolah to salikaka. Mansa misaaliay kita to kinafalahay to niyah a olah, maolah to salikaka ikaka to kaolah to niyah. O kaolah ita to salikaka wa makahi a kinafalah to ˈorip, malecad o kinafalah ni Yis to ˈorip. w19.05 4 fiedac 11-13 fatac

Sapilifokaw to fangcalay saocor, oha padadotoc a mitolon kita. (Luka 11:13) O sapatinako ni Yis itini Luka 11:​5-9 wa padama kitaanan mihapinang, hano pafeli ci Yihofa kitaanan to fangcalay saocor. Itini sapatinako, itiniay i lafii a milisoˈ ko lafang, soˈlin awaay ko maanan a kakaenen no cilomaˈay, kawra kamayan sapahololaw to lafang. Sowal ni Yis, samanen oniya cilomaˈay timoloay a micangacang, mansa pafeli hananay no fiyaw to pina a epang. O maanan ko tatodong ni Yis hani? O cowa kalefot a tamdaw pakayni ka padadotoc no tao a micangacang makahiay a padama, oraho sidaˈitay a Wama hokira? Mihaenay i, ano padadotoc kita micangacang ci Yihofaan, o papacaˈof Cingra kitaanan, halo pafeli to fangcalay saocor kitaanan, soˈlin mihalaka ci Satan sapipadikaw kitanan, cowa ko mamalaˈosi.​—ˈOlic 10:17; 66:19. w19.11 13 fiedac 17-​19 fatac

Mafanaˈay ci Yis, o niyah ato tarokos misaaliay to pipahanhan, ano itiyato anca anini, o harateng no ˈalomanay malecaday o patinakoan ni Yis a cihafayay tamdaw, sowal nora tamdaw: “Akato ka roray ko harateng. Kakomaen. Kaacangto kiso, saan.” (Luka 12:19; 2 Timoti 3:4) O maharatengay noya cihafayay o sapahanhanaw aca ato lawla, ci Yis ato tarokos, cowa ka paisalakaten nangra minengneng ko lawla i kaˈorip. Wa misaˈicel kita a mitodong ci Yisan, ano caka tayal, cowa ko pisongilaˈ aca pahanhan, misawacayho to tamdaw ato mirienang to saˈopo. Kalimlaan ko mitosilay ato masaˈopo, mansa wa misaˈicel kita mirienang. (Hipray 10:24, 25) Ano miliwko kita i, kakamayan a mitoor to nanaman mirienang to saˈopo tora pala, wa mikilim to toki malalengo to Fangcalay Cudad i malitemohay a tamdaw.​—2 Timoti 4:2. w19.12 7 fiedac 16-​17 fatac

Mihaiyan ni Yihofa kita tano niyah a mipiliˈan a pakayraan a maˈorip, pasifanaˈayho Cingra kitaanan sasamaan misaˈosi to citanengay a saˈosi, o saˈosi ita ano pakahemek Cingranan i, papadamaho Cingra kitaanan milaheci to hademak ita. (ˈOlic 119:173) Ano ceriden ita misaka dademak ko taneng no Fangcalay Cudad i, wa ngaˈay madoloto a misaˈosi to citanengay a saˈosi. (Hipray 5:​14) Nolatekay, ngaˈayay ko misaˈosian ita, kawra milaheci to misaˈosian cowa ko madoloay. Haratengen ko laenoay tinakoan: O cecay kapah salikaka misaˈosiay miemin a miˈosi to Fangcalay Cudad, satapang no pina lipay ngaˈayay ko demak ningra, ikorto cowa to padadotoc a miˈosi. O cecay fafahiyan salikaka misaˈosiay malo misakafahay, ˈarawhan halafinayto ko toki cowaho pisatapang. O cecay kasakopang kasacefang no malohemay malitengay, misaˈosiay cangra mararid milisoˈ to salikaka, kawra ikor no pina folad, caho ka pisatapang milisoˈ to salikaka. Oniya demak iraay ko mahecaday a pakayraan, cowa pilaheci to i salakatay a misaˈosian. w19.11 26 fiedac 1-2 fatac

Sowal ni Yis, o lintad ita mahecaday o ‘lintad ni Nowa.’ O ‘pasangaray siˈayawen a ˈawaled’ nohatini, mansa o roma mararamoday misaˈosiay cangra akaho ka ciwawa, mihaen wa adihay ko toki matayal saki Yihofaan. (Matay 24:37; 2 Timoti 3:⁠1) Pakayni sakaciwawaaw hokira, o citanengay a raramod wa ‘mihalaka a miˈosi to payci.’ (Luka 14:28, 29) Mafanaˈay ko malo wamaay winaay, palahad to wawa adihayay ko mapalakay a payci, toki ato ˈicel. Mihaenay, sakaciwawaaw a mararamoday wa misongilaˈ a miharateng toniya laenoay salicay: “Sapisaloaw to saali no paro no lomaˈ, wa micokang a tatosa han? O maanan ko kalimlaan a saali, malecaday ko pinengneng niyam han? Ano matayal a tatosa, o cima ko mamihimaw to wawa hani? O harateng ato waywayan no wawa mamafiyor no nima hani?” Ano malalengo toniya salicay i, haratengen ko safalod no aniniay a sinael. w19.12 23-24 fiedac 6-7 fatac

Tahalifaay ci Pawlo to adihayay katalawan a pakayraan. (2 Korinto 11:23-​28) Sowal ningra ‘mapacekay no ceka ko tireng’ no niyah sanay, o adada no tireng ko mitoroˈan alatek. (2 Korinto 12:7) Roma i, ya kalacafayay ci Pawloan matayal a Timas ‘samanen maolahay toniya lekakawa’ mifalahay cingraanan, tada pakatoleday ci Pawloan konini. (2 Timoti 4:​10) O mipiliˈan no Kawas ci Pawlo to tatayra i kakarayan a Krisciyang, timoloay ato makahiay a padama to tao cingra, kawra matoledayho ko falocoˈ nolatekay. (Loma 9:​1, 2) Mikicowaay ci Pawlo milifok to sahinom ato sadama hani? Maedeng pafelian ni Yihofa cingra to fangcalay saocor, padama cingraanan a miremo to pasangaray. (2 Korinto 4:7; Filipi 4:​13) Pakaynianho ni Yihofa i roma Krisciyang a mihinom ci Pawloan, tinakoen ci Aristarkus, Tikikus aci Marko, sowal ni Pawlo oniya cafacafay pafeliay cingraanan to ‘taˈangayay a sahinom.’​— Kolosay 4:11. w20.01 8 fiedac 2-3 fatac

Mitoroˈay ci Yis, cowa ka piliˈen no Kawas a tamdaw, cowa ko cacipinang to samanay ko ‘miliyaw hofocen’ anca ‘hofocen no fangcalay saocor.’ (Yohani 3:​3-8 ato roma pihongyak) Ano nilnilen no fangcalay saocor no Kawas ko Krisciyang i, o harateng nangra iraay ko maanan kafalic hani? ˈAyaw no manilnil cangra i, tada misalimlaay cangra to tahadaˈoc maˈorip i fafekang no sera a hatokel. Hinatalaay cangra maˈaraw ko pipalaˈafo ni Yihofa to tatiihay tamdaw ato demak, patatikol a malo Lakoing ko cikiw. Miharatengay cangra militemoh to patikolay maˈorip a salawina ato widang i Lakoing. Kawra, ikor no manilnil cangra i, mafalicay ko harateng. Samanen cowa ka ngaˈay ko hatokel midaˈoc maˈorip i fafekang no sera sanay han? Samanen adihayay ko macadaay nangra a roray, cowa ka sapadadotocaw maˈorip i fafekang no sera han? Anca awaay ko lipahak midaˈoc maˈorip i fafekang no sera sanay cangra han? Cowa! O sakafalic no harateng nangra, samanen pakaynian ni Yihofa i fangcalay saocor a mifalic to hatokel nangra. w20.01 22 fiedac 9-​11 fatac

Tooren ko Rikec ni Mosi, o manilnilay a faˈinayan cowa ko pisaysay aca to kalalaˈed no ˈalomanay ato Kawas, wa misaysayho to kalacongis no tamdaw ato mararaway a demak. Kawra, o rikec ni Kristo, o pipadama aca to kalalaˈed no salikaka ato Kawas ko hademak no malohemay malitengay. (Kalatiya 6:2) Samanen, mafanaˈay cangra pafelian no Kawas ko mirikecay no hekal to ˈinorong misaysay tono hekalan a demak, mahawpay ko patefocen ato mipalitay a demak. (Loma 13:​2-4) Ano ira ko pakidemay a raraw i kasakopang, sasamaan ko pisaysay no malohemay malitengay hani? O tatooren nangra ko safalod no Fangcalay Cudad a mihapinang ato misawkit, wa misinanot, o olah ko taˈeneran no rikec ni Kristo. Maolahay ko malohemay malitengay to makariˈangay a salikaka, wa miharateng to sasamaan a padama cangranan. Pakayni i mararaway a Krisciyang, sasinanoten no malohemay malitengay: “Pasasiyoray cingra han? Sasamaanen padama cingranan patikol a malakangaˈay ci Yihofaan hani?” w19.05 7 fiedac 23-​24 fatac

Mihaen ko sowal ni Yis, paihkalay to mihaiyay cingra o kakarayan Wama ko pafeliyay to ˈorip cingranan, ngaˈayayho padotoc a maˈorip. Misarocoday ko falocoˈ ni Yis mitadiˈec to Wama, ano ci Yihofato midimokosay to sakaˈorip ni Yis. Kalimlaan i, padamaanho ni Yihofa ci Yis mitafo to madimadiay. (Matay 4:4) Padamaay ci Yihofa kitaanan mitafo to madimadiay. Pakayni i Fangcalay Cudad, pasifanaˈ kitaanan i Cingraanan ato araaw Ningra, pacipinangho kitaanan to tatodong maˈorip ato hatokel no ikor. Ciharatengay Cingra kitaanan, mansa pakaynian Ningra i wama wina ato roma salikaka, padama kitaanan minanam to soˈlinay kimad ato mafanaˈ Cingraanan. O sidaˈitay a malohemay malitengay ato matenesay a salikaka padamaay kitaanan padadotoc a macakat. Roma i, malacafayay kita to salikaka itini kasaˈopoan micada to sapasifanaˈ ni Yihofa. Tano hatiniay a pakayraan, pacipinangay ci Yihofa kitaanan to sano Wamaay a olah Ningra.​—ˈOlic 32:8. w20.02 3 fiedac 8 fatac; 5 fiedac 13 fatac

Ano maˈaˈinap ko salikaka, awato ko pakayraan a rihaday. Mihaenay, nai falocoˈen ita mifaˈnot ko maˈinapay a harateng, aka pikosam to maˈinapay a sapaloma i falocoˈ no tao. Mihaenay, sasamaan kita a miliyas to sakaˈinapaw no tao, paira to rihadayay a harateng hani? O waywayan ato sasowalen ita taˈangayay ko pilingat to tao. O pahiyoay to dafong a waywayan o pinangan noniya hekal. (1 Yohani 2:​16) O hatiniay a waywayan mifekaday ko sakaˈinap. Mihaenay, aka sasowal saan kita to dafong anca ˈaˈacaen a dafong. Roma i, ano ira ko fadangalan ita i likakawa a matayal, pairaen ko misapoeneray a falocoˈ. Ano mararid kita milengo to tayal no niyah, wa palahad to maˈinapay a falocoˈ no tao. Ano soˈliˈlin kita a ciharateng to tao, masemer to nano demak nangra, mihaen o paparenec cangraanan, wa ngaˈay micowat to kakelec a rihaday ko kasakopang. w20.02 18 fiedac 15-​16 fatac

Pakayni i misangaˈan ni Yihofa a maamaan mafanaˈ Cingraanan. (Paˈarawan 4:​11) Nengnengen ko misangaˈan ni Yihofa a pinaˈorip ato pinaloma, cipinang to kasapaan a tireng no tamdaw, wa mahapinang iso tada citanengay ko Kawas. (ˈOlic 139:14) Ngaˈayho miharateng, o misangaˈan ni Yihofa a cidal hakowaay ko ˈicel, o cidal o masalalomaˈay aca no pinaay walwalan a foˈifoˈis. (Isaya 40:26) Misimsim toniya demak, wa matongal ko pikangodo iso ci Yihofaan. Kawra, o kafanaˈ aca to iraay ko taneng ato ˈicel ni Yihofa cangoˈotayho, saka tanektekaw no kalalaˈed iso aci Yihofa, sapitongalaw to olah Cingraanan, pakalingaden ko kacipinang Cingraanan. O papakasoˈlinen iso, tada maolahay ci Yihofa kisowanan. Haratengen, ‘kilimen iso Cingra, wa mahela iso Cingra.’ (1 Rayray 28:⁠9) Mankora, ci Yihofa ko misolotay tisowanan tayra i tatihi Ningra. (Yirimiya 31:3) Ano matongal ko kacipinang iso to nano demak ni Yihofa tisowanan, wa matongal ko kaolah Cingraanan. w20.03 4 fiedac 6-7 fatac

Tarokos ci Pawlo misaaretengay to mitosilay i kaˈorip, o taˈarawan no mita. Sakinatosa miliwko ci Pawlo mitosil tayra i Korinto i, cowato ka hakowa ko maˈosaway payci, mansa mipalakay cingra to toki matayal to misakopangay. Dademak cingra tonini oha sakaˈorip aca, mihaen ngaˈ, ‘eca ka pilipayci a patenak’ to Korintoay tamdaw. (2 Korinto 11:7) Misaaretengay ci Pawlo to mitosilay, itini Paselaˈan a Romiˈad milasil to ngaˈayay lihaf. Tiya misawadto ci Pawlo a mawmah i, misamacayay to mitosilay a tayal. Ci Pawlo ‘misarocoday milasil to fangcalay kimad, misawacay to Yutaya tamdaw to, ci Kristo ci Yis.’ (Dmak 18:​3-5; 2 Korinto 11:9) Ikor, tosaay miheca mapalit ci Pawlo i Loma, misawacayan ningra ko milisoˈay cingranan a tamdaw, patikamiyayho to salikaka pakalalok cangranan. (Dmak 28:16, 30, 31) Misetekay to falocoˈ cingra caka kalisanga no kalo a demak ko falocoˈ. w19.04 4 fiedac 9 fatac