Saka 3 Folad

O salawina ano miowing kitanan mirienang to misafelitay to Fangcalay Cudad a pisiki to mapatayay ato nanaman, ano maolahay kita to Kawas ato Kimad Ningra wa misetek to falocoˈ a midofdof ci Yihofaan. Latekay, ano eca pirienang kita, o cowa ka olah ato cowa ka ngodo to mapatayay sanay, mihaen ko demak no salawina o papakangodo kitanan. Mihaenho ko sowal, ano caka pirienang kita to nanaman wa palafo to roma tamdaw madokaˈ no mapatayay. Misiˈayaw to hatiniay pakayraan itini taliyok no Kalepi Riyar a kitakit, ˈalomanay tamdaw pakasoˈlinay, mapatay ko tamdaw itiniay taliyok mirarakat, hanaca wa miˈodis to mariˈangay cingranan a tamdaw. O cecay lalakaw sanay, “o saloˈafang no mapatayay wa midokaˈ to niyaroˈay a tamdaw.” Itini roma pala no Afrika, mitahpoan ko dadingoan i lomaˈ no mapatayay, pasayraan i cafeng ko sasing no mapatayay a miliyoc, hamaan paˈarawen koya mapatayay to niyah sanay. O sikawdan no Kawas cowa ko mamapaysin anca mirienang to miowingay to mangah ni Satan a nanaman!​—1 Korinto 10:21, 22. w19.04 16 fiedac 11-​12 fatac

Pasowalan ni Yis ko nisawawaan to pina safalod, padama cangranan masadafdaf ko picada to tao, cecay tinakoan itini Matay 7:12. Tooren koniya safalod, ano makalimay kita masadafdaf ko macadaay, wa masadafdaf ko picada to tao, mihaen to demak, wa masadafdaf ko picada no tao kitaanan alatek. Ano padadotoc eca ka sadafdaf ko macadaay ita samaanto? Sowal ni Yis to nisawawaan, ‘to romiˈad to dadaya ano milongoc ko tamdaw ci Yihofaan, papatado Cingra a misawkit to moecelay.’ (Luka 18:​6, 7) Pasoˈlinen ita koniya sinael: O masiˈayaway ita a kihcod pasangaray toniya salikoray ˈawaled, ihkalay ko kafanaˈ no Kawas, itini misaˈosian Ningra a toki papatado a misawkit to moecelay. (2 Tisalonika 1:6) Tooren ita ko sapasifanaˈ ni Yis a safalod, masadafdaf ko picada to tamdaw. Tahacada kita to cowa ka sadafdaf a demak i hekal ni Satan, kawra mafanaˈay kita wa patado ci Yihofa kitanan a misawkit, hato cowa ko mamalahdaw ko hatokel no mita. w19.05 5 fiedac 18-19 fatac

O micudadayho kiso a kaemangay han? O cafacafay iso alatek pakasoˈlinay to sinkalon, sapisawacayaw kiso to kimad no Fangcalay Cudad, kawra caay pakadangar kako wa saan kiso. Ano hatiraay i, o mamicekiw kiso! Patirengen ko tosa a patosokan: (1) Padamaen iso ko niyah a fanekfek ko nika pakasoˈlin to o Kawas ko misangaˈay to maamaan. (2) Pacakaten ko ineneng iso a misawacay to soˈlinay kimad. (Loma 1:​20) Paisalakaten a miharateng: “Hano pakasoˈlin ko cafacafay to sinkalon hani?” Ikor songilaˈen a minengneng ko mitepangan a cudad no mita, mamahapinang iso mipaˈading to pihakelongan ita cowa ka hatira o niharatengan iso a pasangar. O ˈalomanay tamdaw saka pakasoˈlin cangra to sinkalon samanen o sowal no nima mikangodoan nangra a tamdaw, ano paˈarawen iso cangra to pinapina mahelaay iso a lalakaw i, mamapacaˈof ko sasa no falocoˈ nangra alatek.​—Kolosay 4:6. w19.05 29 fiedac 13 fatac

Tiya milaliw ci Iliya i, tada matoleday ko falocoˈ, sakapatayaw sanay. Orato, miocoran ni Yihofa ko taˈangayay ko ˈicel a coyoh mihinom cingranan. O sadama noniya coyoh tada ciepocay, patadoan ningra ci Iliya mirahkad to kakaenen, pakalalok cingranan a komaen. (1 Hongti 19:​5-8) Mitadtaday koniya maˈoningay to cecay kimad: Latekay, patado to tao midemak to kantangay a demak iraay ko sadama. Cecay ko kaen, mimingay sapatelong anca saparatoh a kato, ngaˈayay miadah to masomaday a salikaka. Ano pasangaren kita milengo tono tekedan a demak ato kasomadan a milifetan, wa ngaˈayho patado misadak to ciepocay sadama to tao. Saka dademakan ni Yihofa ko ˈicel Ningra, padama ci Iliyaan romakat to mara:ayay a lalan, tahira i Horip a Lotok, miliyas toya mamidokaˈ cingranan a tamdaw. Mikitini mamananam ita, sapihinomaw to mikaˈodangan a tamdaw, ano masasowal cangranan, piliˈen ko karihadayan nangra a kitiraan, itini lomaˈ nangra anca itini kasaˈopoan. w19.05 16 fiedac 11 fatac; 17 fiedac 13-​14 fatac

Ano miˈosiay kiso to Cikariya saka 12 fedengan pakayniay to kapatay ni Misiya a sapairasol. (Cikariya 12:10) Tangasa saka 12 sinael i, maˈaraway to mararomay a tomangic ko ‘lalomaˈan ni Natanˈ to nika patay ni Misiya. Itiya ngaˈayay miharateng kiso: “Lalomaˈan ni Natan aci Misiya o manan ko kalalaˈed nangra hani?” Ngaˈayay “mitiwca” kiso. Sapaˈaraw a sinael to saka 12 a sinael i, matiliday i 2 Samuil 5:​14, toniya sinael somowalay to o wawa ni Tafiti ci Natan. Saka tosa taˈarawan sinael i, itiniay i Luka 3:​31, somowalay koni sinael wina ni Yis ci Mariya o teloc ni Natan sanay. Mafanaˈayto kiso to sapairasol to naitiniay i rayray no lomaˈ ni Tafiti ci Yis a masadak. (Matay 22:42) Nikawrira mataˈlifay ko 20 a wawa ni Tafiti, ˈarawhan mikiriwiˈay somowal ko Cikariya to nika somad a tomangic no lalomaˈan ni Natan, tada masaka hemekanto kira. w19.05 30 fiedac 17 fatac

Sasamaan ko hademak ita hani? Micerid kita micekiw, o ngangaˈayto misaˈosi to soˈlinay ko kimad no Fangcalay Cudad, pakasoˈlin to moecelay ko palinian ni Yihofa. Mihaen kita o ngangaˈay ‘tanektek ko pakasoˈlinay falocoˈ’, mahecad o taˈangayay kilang tangongol ko palamit i sera. (Kolasay 2:​6, 7) Haratengen, edengan o niyah ko ngangaˈay patanektek to pakasoˈlinay falocoˈ no niyah. Mihaenay padadotoc kita a misaˈicel mifalic to i kemoday a falocoˈ no niyah, micerid a mitolon, milongoc ci Yihofaan pafeli to fangcalay saocor, milomal to harateng ato araaw no falocoˈ no niyah, piliˈen ko ngaˈayay padama kitanan a tamdaw misafaeloh to harateng no mita. Mihaen, wa ngaˈayto kita mifalah to misafelitay to palinian no Kawas a harateng, ecato ka mawarak no harateng no hekal ni Satan.​—2 Korinto 10:⁠5. w19.06 13 fiedac 17-​18 fatac

Malecad ci Rucuan pacafay i tihi ni Naomi, wa padadotoc kita a padama to mapatayay ko ramod a tamdaw. (Rucu 1:​16, 17) Sanay ko sowal ni Pawla: “Tiya mapatay ko faˈinay ako i, ˈalomanay ko padamaay takowanan. Mataˈlif ko cecay liyad, patikolay to salakatay ko kaˈorip no ˈalomanay, kawra taˈangayay ko kafalic no kaˈorip ako. Soˈlinay i, mapatayay ko ramod a tamdaw pinato a folad anca pina miheca, kamayan misaali to sapadama, ano cipinang kita tonini, tataˈangay ko sasayar to mapatayay ko ramod a tamdaw.” Manaokaniw, kahnayay mananam ko roma tamdaw to faelohay no kaˈorip, kawra o roma tamdaw, na kalacafayay to ramod a midemak, mifekaday to kasomadan a harateng. Cowa ka lecalecad ko kahacecay tamdaw, mihaenay haharatengen ita, ciharateng to mapatayay ko ramod a tamdaw o ˈinorong no Krisciyang, o papakahemek ci Yihofaan. w19.06 24 fiedac 16 fatac

Ano makeceng i, tatomerep kita nolatekay. (Patnakay 3:7) Cowa ka ngaˈay kita palasak to ngangan no salikaka, kitiraan masaˈopo, pakayraan mitosil, ato samanay malifok ita ko Fangcalay Cudad ato mitepangan cudad. Cowa ko fafanaˈen ita ko mikowanay tamdaw to hatiniay demak, cowa ko papasowal to salawina ato widang, mihaen ho eca ka ira ko katalawan no salikaka. Aka pakayni mimingay a demak maliwasak. Mafanaˈay ci Satan ano maliwasak o mamapeleng ko masacefangay. (Marko 3:​24, 25) Mansa mihalaka ci Satan mifekad to sakaliwasak i kasakopang, mitokel kitaanan misaˈada to salikaka a mapawan to, o cira ko soˈlinay a ˈada ita. O halafinayto midoko to Kawas a Krisciyang wa malefong toniya talakal alatek. Ano misaˈicel kita misalof to lacongis i kalalaˈed no salikaka, cowato ko mamipalak to kalacecay a makelec.​—Kolosay 3:​13, 14. w19.07 11-​12 fiedac 14-​16 fatac

Ngaˈay ko harateng no mitosilan, cowa ko pakayniay i somowalay kita to maanan, ao pakayniay i pakayraan ita a somowal. Madaˈmaˈ, sidaˈit a patado kita miharateng, soˈliˈlin a ciharateng cangranan, wa maolah cangra masasowal kitaanan. Cowa ko papacieci kita to tao mitengil to kimad ita, mamisaˈicel a cipinang to soˈlinay a harateng nangra, patado cangranan a miharateng. Mitosil ci Pawlo to Yutaya tamdaw i misaka dademakay to Fangcalay Cudad, kawra itini i Ariopakus mitosil to lomaocay no Krisiya i, o tatodong aca no sinael ko mihadakan. (Dmak 17:​2, 3, 22-​31) Mikitini ci Pawloan mananam ita ko maanan hani? Ano cowa pihayda ko mitosilan to Fangcalay Cudad i, hamaan tangsol sa mihadak to sinael. Ano cowa ka olah ko cilomaˈay maˈaraw no tao minengnengay to Fangcalay Cudad, ngaˈayay tano pingpan paˈaraw cingranan to Fangcalay Cudad. w19.07 21 fiedac 5-6 fatac

Mangilosay ci Satan mikayhid to Israil tamdaw mitaˈong to samiyay. Pakayniay i saali no Israil tamdaw to kakaenen. Ikor no micomod to Mikiˈokan Pala, wa mafalic ko pakayraan no Israil tamdaw a mawmah. Itiniho cangra i Icip, o nanom no Nayil ˈAlo ko sapananom to ecan. Kawraan itini Mikiˈokan Pala awaay ko taˈangayay a ˈalo, o ˈorad ato ˈaresing ko sapananom to ecan. (Limoˈot 11:​10-​15; Isaya 18:​4, 5) Mihaenay wa minanam cangra to faelohay pakayraan a misaecan. Milengo ci Yihofa to faelohay pakayraan misaecan i, hano mirikec to Israil tamdaw aka midoko to makaniway kawas hani? Mafanaˈay ci Yihofa wa minanam ko Israil tamdaw to pakayraan no ˈalafang tamdaw a misaeca, kawra katalawan mihaen, samanen itiniay i Kanang a tamdaw midokoay ci Paalan, pakasoˈlinay to mararaway a sasowalen.​—Saˈosi 25:​3, 5; Kakitaan 2:​13; 1 Hongti 18:18. w19.06 3-4 fiedac 4-6 fatac

Tayra ci Pawlo, Silas, Luka aci Timoti i Filipi i, mahapinangay nangra maolahay ko itiraay a tamdaw to ngaˈayay lihaf. Oniya sasepatay salikaka faenkfekay cangra a mitosil, mansa mapatirengay ko Filipi a kasakopang. Iraay ko cecay hinalafangay fafahiyan a salikaka ci Litiya, o faelohay a salikaka itiya, itiraay i lomaˈ ningra misatapang a masaˈopo. (Dmak 16:40) Caka halafin, oniya faelohay a kasakopang, malifaay ko pasangaray a demak. Miowingan ni Satan ko misaˈadaay to kimad a tamdaw misafelit to mitosilay a demak, hato malepelay ci Pawlo aci Silas, mipekpekan mipalitanho cangra. Matedal cangra i, tangsolay masasoˈaraw to salikaka pakalalok cangranan. Ikor, miliyasay ci Pawlo, Silas aci Timoti to Filipi a niyaroˈ, edengan ci Luka aca ko materekay. Oniya faelohay a salikaka wa samaan ko demak nangra hani? Pakayni sapadama ni Yihofa, padadotocay cangra fanekfek a midoko to Kawas. (Filipi 2:​12) Tada malikoay ci Pawlo cangraanan! w19.08 8 fiedac 1-2 fatac

Cakahalafin malinah kiso han? Adihayay ko mapalakay payci a malinah, madoloay a cikiyam ko tamdaw. Sapilowanaw to saroero patikol to kiyam, hamaan pakiyam miˈaca to cowa ko kalimlaan a dafong. (Taneng 22:​3) Sapiadahaw to adadaay a paro no lomaˈ, pasangaray misaˈosi to hahakowa ko cacaliwen a payci. Ano mahaen ko pakayraan, ‘mitolon a micangacangˈ wa ngaˈay padama kitanan inaneng ko misaˈosian, samanen papafeli ci Yihofa to rihaday, midipot to ‘falocoˈ ato ponoˈ’ no mita, padama kitanan ihkal ko piharateng to demak. (Filipi 4:​6, 7; 1 Pitiro 5:7) Sangaˈayen ko kalalaˈed to widang ato paro no lomaˈ. Paladaˈen ko ngaˈayay widang iso to nafalocoˈan ato nalifetan, mangalef ko malecaday tisowanan ko malifaay a tamdaw. O mamisayal kitaanan konini. (Patnakay 4:​9,10) Haratengen, o patirengan a kalawidang i salakat cowa ko lalanikay a mafalic. w19.08 22 fiedac 9-​10 fatac

Hano palalitingen ni Yihofa ko “Armakiton” to kalalood Ningra to mikowanay no hekal hani? O Mikito ato fideloan no Yicriil na mifekaday ko adihayay lalood, na milidongay ci Yihofa to finawlan Ningra itiya. Tinakoen, itini ‘lawac no ˈalo no Mikito,ˈ padamaan ni Yihofa ko kakitaan ci Parak milowid to sofitay ni Sisira. Ikor, ci Parak ato fafahiyan pairasolay ci Tipora romadiway to pakalowiday a radiw miakoˈ id to Kawas, sanay koniya radiw: ‘Nanikakarayan ko fuˈifuˈis a milood ci Sisiraan. Yihofaaw, nanay malaˈafo ko ˈada Iso, nanay malecad o cidal macakat ko maolahay Tisowanan a tamdaw, taˈanagay ko ˈicel.’ (Kakitaan 5:​19-​21, 31) Itini Armakiton, wa palaˈafoen no Kawas ko ˈada, mamalidong ko maolahay to Kawas a tamdaw. Kawra o Armakiton cowa kalecad to lalood no kakitaan ci Parak, o finawlan no Kawas cowa ko mamirienang ato mitatoy to sapilood a lalosidan. Tano rihaday a falocoˈ a mitadiˈec to Kawas wa malidong cangra.​—Isaya 30:15; Paˈarawan 19:11-​15. w19.09 9 fiedac 4-5 fatac

O cecay pakayraan ita tayra ci Yisan i, misaˈicel a cipinang to sasowalen ato waywayan ningra. (Luka 1:​1-4) Dengan o niyah ko mamicekiw to Fangcalay Cudad. O roma pakayraan i, micada to paputisem malo Krisciyang. Iraayho ko roma pakayraan, ano misaali kita to sapadama i, kilimen ko sadama no malohemay malitengay no kasakopang. Misaka dademakan ni Yis ko ‘malo sidaˈitayˈ a tamdaw midimokos to lopayˈay a siri ningra. (Ifiso 4:​7, 8, 11; Yohani 21:16; 1 Pitiro 5:​1-3) Oha tatalaˈayaw kita mikilim to sapadama, cowa ko mamitala to mafanaˈay cangra to harateng ato saali no mita. O cecay ci Corian faˈinayan salikaka sanay: “Mitahidangay kako to malohemay malitengay a milisoˈ takowanan. O pilisoˈ nangra tada o kalimlaan a sapatelong, cowa ko mamapawan kako.” Malecad oya milisoˈay ci Corianan a tatosa malohemay malitengay, o madimadiay a malohemay malitengay wa ngaˈay padama kitaanan cipinang to ‘harateng ni Kristo,’ cipinang a minanam to harateng ato waywayan ni Yis. (1 Korinto 2:​16; 1 Pitiro 2:​21) O hatiniay a sapadama nangra tada o kalimlaan a sapatelong. w19.09 21 fiedac 4-5 fatac

Itini Fangcalay Cudad ˈalomanay madimadiay tamdaw micadaay to sakayat no Kawas, kawra cowa ka masalalomaˈ no 144,000 a tamdaw, tinakoen oya paputisemay a Yohanian aci Tafiti. (Matay 11:11; Dmak 2:​34) Noikor, oniya madimadiay sikawdan ato cowa ka saˈosi ko ˈaloman a tamdaw wa patikol maˈorip i Lakoing. Cangra ato taˈangayay ˈopo a tamdaw iraay ko toki paihkal to makahiay koniyah madimadi ci Yihofaan, midama to saˈakawangay pikowan a fadangalan Ningra. Anini, mikelecan ni Yihofa a palacecay ko pinaay soˈot emang a tamdaw midoko Cingranan, na cowaho pifekad i salakat konini. Ano sakikakarayan anca saki fafekang no sera ko hatokel ita, mamisaˈicel a padama to ˈalomanay tamdaw malo ‘roma lopayˈay siriˈ a taˈangayay ˈopo tamdaw. Cato ka halafin, wa mifekadto ko taˈangayay padiing, o pairaay to adihayay pades a pihakelongan ato mikowanay mamalaˈafo maemin. Mahererek ko taˈangayay padiing, wa tahadaˈocto ko taˈangayay ˈopo tamdaw itini fafekang no sera a midoko ci Yihofaan!​—Paˈarawan 7:​14. w19.09 31 fiedac 18-​19 fatac

Mamahererekto ko lekakawa ni Satan, ano saka madimadiaw kita to Kawas ato Hongti Kitakit Ningra, o tatahalifa to adihayay sapalifet. O lalikafen no hekal kita alatek, samanen mitafoay kita to misatenokay, wa matongal ko pihaen nangra to demak. Mihaenay, nohatiniho misaˈosi kita to falocoˈ madimadi to Kawas, mihaen ngaˈ tahatolas ko madimadi i taˈangayay padiing. Itini taˈangayay padiing, o cima ko mamikayat to finawlan no Kawas hani? Itiya, polong a salikaka ni Kristo, wa saˈopoen i kakarayan, mirienang to Armakiton a lalood. (Matay 24:31; Paˈarawan 2:​26, 27) Mihaenay, wa awato ko Malohemay Malitengay i Congpo itiya. Kawra, o iraay ko tatodong a faˈinayan salikaka i lalomaˈ no taˈangayay ˈopo a tamdaw, mamikotay to tayal nangra, padadotoc a mikayat to salikaka. Itiya, o mamidama kita to mikayatay a salikaka, midofdof to pakaynian no Kawas cangranan a sakayat. Mihaen to demak o madimadiay to Kawas, dengan mihaen ngaˈ milakowit kita to taˈangayay padiing! w19.10 17 fiedac 13-​14 fatac

O madimadiay midoko to Kawas a fafahiyan ci Naomi, ikor mapatayay ko faˈinay ato tatosaay faˈinayan wawa ningra, mifalican ko ngangan ningra malo “Mara”, tatodong i, o “Roray” sanay. (Rucu 1:​3, 5, 20, 21) Tahalifa cingra to roray i, kalacafayan no kadafo ci Rucu. Midipot ci Rucu to kaˈorip ni Naomi halo pasowal to misayaray cingranan a sasowalen. Soˈlin amotoˈay ko sowal ni Rucu, kawra nai falocoˈay ko sowal ningra, paihkal to tangongolay a olah ato sadama. Ano mapatay ko ramod no cecay Krisciyang, misaaliay cingra to sapadama no mita. O mararamoday mahecaday o malacafayay lomahad a kilang, mataˈlif ko pinapina a mihecaan i, mafedfeday ko lamit noya tosa a kilang. Ano faˈenoten ko cecay a kilang i, wa pakidem ko dokaˈ no roma a kilang. Mahecaday, ano mapatay ko ramod i, o pisemsem no cecay ramod wa halafin ngaˈ masayar. w19.06 23 fiedac 12-​13 fatac

Cowa ko pisinanot aca ita o manan ko mipiliˈan ita a lawla, wa misinanotho to hakowaay ko toki a milawla, ano caka pisinanot i, o milawlaay a toki wa mikikaka to katayal saki Yihofaan a toki. Salakat, cipinang to hakowaay ko mapalakay a toki no niyah. Ngaˈayay tiliden iso i cecay lipay, hakowaay ko toki minengneng to tilifi, ato wangcan anca misalama. Ano adihayay ko mipalakan iso a toki i lawla, saˈosien ko halaka, o kalimlaan a demak ko salakaten midemak, ikorto milawla. Cangacangen ci Yihofa padama tisowanan mitoor to toki a midemak, mihaen wa adihayto ko toki iso ato ˈicel micekiw to Fangcalay Cudad, mirienang to pakalomaˈay pidoko, mirienang to saˈopo ato mitosil, mihaen ano milawlato kiso wa lipahak ko falocoˈ. w19.10 30 fiedac 14 , 16 fatac; 31 fiedac 17 fatac

Saka 55 miheca, misaˈosiay ko Korinto salikaka to masaka limlaan a demak. Mafanaˈ cangra to i Yirusalim ato Yutiya a salikaka cangoˈotay ko kakaenen ato rikoˈ nangra, misaˈosiay sapadamaaw, pakiyaho cangranan. (1 Korinto 16:1; 2 Korinto 8:6) Kawra ikor no pina folad, o Korinto a salikaka cowa ka midoedo to misaˈosian i salakat a milaheci to demak, mihaenay i, awaay ko mihopedan a kiyaho, cowato ka kiyamaw pahecad to roma kasakopang patayra i Yirusalim to kiyaho. (2 Korinto 9:​4, 5) Tada ngaˈayay ko pisaˈosi no Korinto a salikaka, o tanektekay ko pakasoˈlinay falocoˈ, o hinapaladaˈay sanay ko pakahemek ni Pawlo cangranan, kawra palimoˈotan ningra ko Korinto a salikaka, o misaˈosian nangra a demak wa lahecien ngaˈ ngaˈay. (2 Korinto 8:​7, 10, 11) Pakayni toniya demak mahapinangay ita, soˈlin o madimadiay a Krisciyang i, pasangaray a milaheci to misaˈosian alatek. Misamaanay hano mahaen hani? Kita maemin cowa ko malefotay a tamdaw, mansa madoloay a minayar to demak. Roma i, ano mafekad ko cowa ka harateng a pakayraan, wa pasangar a mitoor to misaˈosian a milaheci to demak.​— Patnakay 9:​11. w19.11 26-​27 fiedac 3-5 fatac

Malecad o taˈangayay sapatada ngaˈayay midipot to sofitay caka madokaˈ, o pakasoˈlinay falocoˈ wa ngaˈay midipot tisowanan ho eca picada to tatiihay pifiyor no hekal, tinakoen o maˈodangay, mariˈangay, ato romaroma misafelitay to palinian no Kawas a demak. Malo Krisciyangay, malalooday kita to tatiihay coyoh. (Ifiso 6:​10-​12) Hano mafanaˈ kiso to papakaremo ko pakasoˈlinay falocoˈ no niyah to sapalifet hani? Salakat, mitolon micangacang to sapadama no Kawas. Dotoc, micekiw to Fangcalay Cudad ato mikinsa to niyah. (Hipray 4:​12) Sanay ko sowal no Fangcalay Cudad: ‘Sarocoden iso mitadiˈec ci Yihofa, aka mitiˈer to taneng no niyah.’ (Taneng 3:​5, 6) Haratengen ko misaˈosian iso a demak. Taˈangayay ko saroero no sakaˈorip iso han? Ano mahaenay, maharatengay iso ko sakiˈok ni Yihofa i Hipray 13:5 han? Sowal Ningra: ‘Cowa ko fafalahen Ako kiso, cowa ko mamiliyas tisowanan.’ Oniya sakiˈok pakasoˈlinay kiso to papadama ci Yihofa kisowanan han? Ano mahaenay ko harateng iso, o tanektekayto ko taˈangayay sapatada no miso. w19.11 14 fiedac 1, 4 fatac

O wawa misaaliay to ka ciharateng no wama wina, mihaenay i, wa palaken ko toki ato ˈicel a midimokos to wawa. Ano cowa ka taˈangay ko kasasiroma no mihecaan no wawa i, wa matongal ko pasangar a ciharateng to kahacecay a wawa. O roma wama wina midipotay to ˈalomanay kaemangayho a wawa, tada marotayayto cangra. O wina a tamdaw ano marotayay, wa samaan misongilaˈ a mikingkiw, mitolon ato mitosil hani? Alatek wa pasangar cingra misamacay to harateng a masaˈopo. Mihaenay i, ano i kasakopang anca i lomaˈ, o ciolahay a faˈinay wa padama to fafahi mararid a midipot to wawa, ato mararid a misolimet to lomaˈ. O faˈinay wa mararid a mikayat to paro no lomaˈ i pakalomaˈay a pidoko to Kawas, paira to haepoc no paro no lomaˈ. Wa miceridho a miˈorong to paro no lomaˈ mitosil. w19.12 24 fiedac 8 fatac

Pakayni Kalipahakan a Mihecaan wa milifok to maanan a epoc ko Israil tamdaw hani? O cecay cikiyamay a Israil tamdaw, ano sapatikolaw cingra to kiyam i, wa paliwalen ko sera no niyah. Tahini Kalipahakan a Mihecaan i, oya sera wa patikolen cingra. Mihaenay, wa ‘malifokto ko hafay no niyah,ˈ o teloteloc ningra wa ngaˈay micada to hafay no lalomaˈan. O roma tamdaw paliwalen ko niyah anca wawa no niyah malo koli. Tahini Kalipahakan a Mihecaan i, wa ‘minokay i lalomaˈan no niyah.’ (Lifi 25:10) Mihaenay awaayto ko tahadaˈocay malo koli a tamdaw. Roma i, sanay ci Yihofa: ‘I lalomaˈ namo cowa ka ngaˈay ira ko manikaway a tamdaw, samanen itini pafelian ni Yihofa tisowanan malo hafay a pala, wa parahekeren ni Yihofa kiso.’ (Limoˈot 15:4) Kawra, o pakayraan no hekal anini, cihafayay a tamdaw mangalefay ko hafay, o manikaway tamdaw mangalefay ko kanikaw! w19.12 8-9 fiedac 3-4 fatac

Misiˈayaw to sapalifet i, ‘cilosaˈay a miowawˈ ci Yis a mitolon. (Hipray 5:7) Mikifalocoˈay cingra a mitolon ci Yihofaan, paihkal to madimadiay to kakarayan a Wama, o mahaenay a satolon padamaay cingranan misaˈosi to falocoˈ tahatolas a midofdof. Pakayni ci Yihofaan, o satolon ni Yis mahecaday o fangsisay a exiw. Mitafoay ci Yis to madimadi, misawacay to matatodongay ko pikowan no kakarayan Wama, pakahemekay ci Yihofaan konini. Wa ngaˈay todongen ita ci Yis, misarocod i kaˈorip midofdof ato madimadi ci Yihofaan. Ano misiˈayaw to sapalifet i, makalimay kita sapakahemekaw ci Yihofaan, mansa micangacang to sapadama Ningra. Mihaen ko demak ita, paihkalay to midamaay ko niyah to sapikowan a fadangalan ni Yihofa. Ano midemakay kita to kaˈintehan ni Yihofa a demak, cowato ko mamitengil Cingra to satolon no mita. Kawra ano tooren ita ko palinian Ningra a maˈorip, ngaˈayto pakasoˈlin to mahecaday o fangsisay a exiw ko satolon ita a pakahemek ci Yihofaan. Ano madimadi kita ci Yihofaan, misarocod a midofdof Cingranan, oha mamahemek Cingra. w19.11 21-​22 fiedac 7-8 fatac

Iitini i 1919 miheca, minilnilan ni Yis ko mimingay ˈopo a Krisciyang malo ‘madimadiay citanengay a koli.’ Oniya manilnilay a salikaka mikeriday a milimasmas to mitosilay a tayal, itini i ‘matatodongay a tatokianˈ pafeliay to Krisciyang to ‘kakaenen’. Mahapinangay ita to pihayda no Kawas to ‘madimadiay citanengay a koliˈ han? Misaka dademakay ci Satan ato hekal ningra miafaday to madimadiay citanengay a koli, ano awaay ko sapadama ni Yihofa, cowa ko mamalaheci ko tayal nangra. Soˈlin, mafekad ko tosaay a taˈangayay lalood no hekal, padotocay a sapalak, sasifod no kicay, ato cowa ka sadafdaf a demak, kawra ‘madimadiay citanengay a koliˈ kamayanay a pafeli to Krisciyang to sapahaled to pakasoˈlinay falocoˈ a ‘kakaenen’. Haratengen hena, o mitepangan no likakawa no Kawas a lalakaw tada kadofahayto, maedeng 900 ko kasasiroma no sowal a lalakaw, cowa papaycien ko kihcod! Oniya demak sahetoay o wacay to midamaan ni Yihofa ko ‘madimadiay citanengay a koli.’ O roma a wacay i, o minaroˈan no mitosilay, o ngaˈayay lihaf soˈlinay a mapatenak i ‘polong no hekal.’​—Matay 24:14. w19.11 24 fiedac 15-​16 fatac

Itini pihepolan to raraw a romiˈad, ˈayaw no papatoˈaya ko sakakaay saysi wa mitodoh to exiw, mihaen ko demak ningra ho cipinang to ˈayaw no patoˈaya milifokayto pihayda no Kawas. Mahecaday onini, itini fafekang no sera ˈayaw no papatafangen ni Yis ko ˈorip malo sapatefoc i, i salakatay midemak to kalimlaan a demak, oniya demak mikikakaay ko kalimlaan to pilidong to tamdaw. O maanan a demakan hani? Hakelong no ˈorip ningra wa madimadi a midofdof ci Yihofaan, mihaen ngaˈ cadaen ni Yihofa ko patafangan ningra a sapatefoc. Mihaen ko demak ni Yis, ngaˈay misawacay to sangaˈayay a pakayraan maˈorip ko pidofdof ci Yihofaan, ngaˈayho misawacay o matatodongay ko sapikowan a fadangalan ni Yihofa.Itini ci Yis i fafekang no sera masongilaˈay ko pidofdof to moecelay a palinian ni Yihofa. Soˈlin tahalifaay ci Yis to sakayhid, sapalifet misemsem ko kapatay, kawra o sapiˈadingaw to pikowan no kakarayan Wama a falocoˈ cowa ka mangiyangi.​—Filipi 2:8. w19.11 21 fiedac 6-7 fatac

Mitosil ci Yis adihayay ko malifaay a sapalifet, kawra iraay ko madimadiay a tarokos i tihi ningra, mahecaday o masowalay i Taneng 18:​24: ‘O roma widang ikakaay ko ngaˈay to malikakaay.’ Misalimlaay ci Yis to hatiniay widang. Misamanay hani? Itiniho ci Yis i sera, cowa pihakelong ko safa ningra. (Yohani 7:​3-5) O masingkiay ci Yis sanay ko salawina ningra. (Marko 3:​21) Cowa ka hecad ko madimadiay tarokos toya cowa pasoˈlin a salawina, mansa itini ˈayaw no kinafalah ci Yis to ˈorip a dadaya, somowalay to aniniay sinael. Soˈlin latekay patoleday ko tarokos ci Yisan, kawra misinanotan ni Yis ko pakasoˈlinay falocoˈ nangra, cowa ko raraw nangra. (Matay 26:40; Marko 10:13, 14; Yohani 6:​66-​69) Itini ˈayaw no papatayen ci Yis a dadaya pasowalay to madimadiay a tarokos: ‘Kala widanganto ako kamo, nawhani o matengilay ako nai Wamaan mapakafanaˈto ako kamo maemin.’ (Yohani 15:15) Oniya widang ni Yis taˈangayay ko sapakalalok cingranan. w19.04 11 fiedac 11-​12 fatac

Cecay tamdaw samaan mafanaˈ to manilnilay no fangcalay saocor no Kawas ko niyah hani? Patikamian ni Pawlo ko Loma a Krisciyang, pasowal toya ‘micadaay to satahidang a fangcalay sikawdanˈ sanay cingra: ‘Milifok kamo to fangcalay saocor, cowa ko mamalo koli, cowa papatalaw tamowanan, ya milifokan namo a fangcalay saocor, pala wawaayto no Kawas tamowanan. O fangcalay saocor papiowaw kitaanan to: “Amaaw, Wamaaw!” (Loma 1:7; 8:​15) Mansa pakaynian no Kawas i fangcalay saocor padama koya micadaay to satahidang a Krisciyang pakasoˈlin, iraay ko hatokel nangra tayra i kakarayan. (1 Tisalonika 2:​12) Oya manilnilay ni Yihofa a tamdaw cowa ka cisasa to hatokel no niyah. (1 Yohani 2:​20, 27) Oniya tamdaw malecaday to roma tamdaw, wa micada to sapasifanaˈ i kasakopang, kawra cowa ko mamisaali cangra to pihayda no tao to minilnilan no Kawas cangra. O mihadakan ni Yihofa a fangcalay saocor o sataˈangayay a ˈicel i dohaw, oniya ˈicel padamaay toniya Krisciyang a pakasoˈlin, o mipiliˈan no Kawas a tamdaw ko niyah. w20.01 22 fiedac 7-8 fatac

O Rikec ni Kristo itiniay i olah a mapatireng, o sangaˈayay a taˈeneran konini. (Kalatiya 6:2) O midemakan ni Yis sahto mikitiniay i olah. Ano iraay ko olah no tamdaw wa siniˈada to tao. Iraay ko siniˈadaay a falocoˈ ni Yis, mansa pasifanaˈ cingra to tamdaw, miadah to adadaay, pafecol to macahiway, patikol paˈorip to mapatayay. (Matay 14:14; 15:32-​38; Marko 6:​34; Luka 7:​11-​15) Midemak ci Yis toniya demak malowanay ko toki ato ˈicel ningra, kawra makalimay cingra isalakat miharateng to saali no tao. O sakakaay ciolahay a demak ni Yis, o kinafalah to ˈorip saki tamdamdaw. Ngaˈayay todongen ita ci Yis, ikaka ko pisaareteng to saali no tao to niyah, palahaden ko siniˈada to mitosilan a tamdaw. Ano siniˈada kita a pasifanaˈ to mitosilan a tamdaw, o midofdofay to Rikec ni Kristo. w19.05 4 fiedac 8-​10 fatac

Tosaay ko pakayraan ni Yis padama to tamdaw milifok to pasalat. Saka 1, padamaan ni Yis ko tamdaw cato ka malipalaw no ˈaˈideman no pihakelongan. Itiya ˈalomanay Yutaya tamdaw malo koliay nolitengan a nanaman ato mararaway a kimad, tada marorayay ko kaˈorip. (Matay 5:​31-​37; 15:​1-​11) Nao papasifanaˈ ko ˈaˈideman no pihakelongan to tamdaw mafanaˈ to Kawas, kawra hato mapohaway a tamdaw cangra cowa pakahapinang ci Yisan to ci Misiya cingra, cowa ka picada to sapasifanaˈ ni Yis, telocto i, awaay ko pinang nangra a mafanaˈ to Kawas, o raraw nangra cowato ko mamasodod. (Yohani 9:​1, 14-​16, 35-​41) Kawra pakayni pasifanaˈ to tamdaw to soˈlinay kimad ato patireng to ngaˈayay a taˈarawan, ci Yis padamaay to misapoeneray ko falocoˈ a tamdaw matedal to kalakoli i mararaway kimad. (Marko 1:​22; 2:⁠23–​3:5) Saka 2, padamaan ni Yis ko tamdaw matedal i kala koli no raraw. Pakayni patafangan ni Yis a sapatefoc, makahiay ko Kawas misodod to pakasoˈlinay to sapatefoc a tamdaw.​—Hipray 10:12-​18. w19.12 10 fiedac 8 fatac; 11 fiedac 10-​11 fatac

Tano fangcalay saocor ko sapadama ni Yihofa to Krisciyang pakasoˈlin to mipiliˈan no Kawas ko niyah. Mihaenay o fangcalay saocor o ‘wacayˈ ato ‘tahapinangan,’ padama cangraanan pakasoˈlin to tatahadaˈoc cangra i kakarayan eca ka itini fafekang no sera a maˈorip. (2 Korinto 1:​21, 22) O Krisciyang ikor no manilnil no fangcalay saocor no Kawas i, wa pakalifok to i kakarayan a sapalifon han? Awaay ko pinang. Soˈlin pakasoˈlin cingra to manilnilay ko niyah, kawra haratengenho ningra ko sapatalipaˈelal no Fangcalay Cudad: ‘Salikakaaw, tongalen ko pisaˈicel, ngaˈ caka malahdaw ko kalikoan a matahidang. Ano padadotoc kamo palahad toniya capeling, cowato ko papasokiyaw.’ (2 Pitiro 1:​10) Mihaenay, soˈlin manilnil ko cecay Krisciyang, oha padadotoc cingra a madimadi ngaˈ malifok ko sapalifon.​—Filipi 3:12-​14; Hipray 3:1; Paˈarawan 2:​10. w20.01 21-​22 fiedac 5-6 fatac

Oya tatoloay a widang ni Yopu cowa ka siniˈada cingranan, samanen manengnengay nangra i, o potalay aca a demak, mansa tangsol sa mipoˈi ci Yopuan. Wa samaan ko demak ita ngaˈ caka mahecad ko raraw hani? Haharatengen, cowa ko mamahecad kita ci Yihofaan a cipinang to kihcod a demak. Mansa songilaˈen ita mitengil ko sowal no tahapadesay a tamdaw, patado a miharateng ngaˈ, soˈliˈlin siniˈada to salikaka. Ano iraay ko patadoay miharateng a falocoˈ i, manengneng ita ko tahalifaay to pasangaray a tamdaw, cowa ko pakasowal to sanaysanay a sowal. O sanaysanay a sowal, cowa ko mamicowat to kakelec no kasakopang, wa paliwasak to kasakopang. (Taneng 20:19; Loma 14:19) Mihaen ko demak ningra patongalay to adada no dokaˈ no tao. (Ifiso 4:​31, 32) Mansa, songilaˈen ita mikilim to kangaˈayan no tao, haratengen sasamaan padama cingranan miremo to sapalifet. w19.06 21-​22 fiedac 8-9 fatac