Saka 9 Folad

Padadotocay ci Yihofa aci Yis a matayal, tatodong nonini wa padadotoc kita a matayal, caka ngaˈay a pahanhan han? Cowa ka hatira. Cowa ka maroray ci Yihofa, mansa cowa pisaali to papahanhan, kawra sanay ko sowal no Fangcalay Cudad, maharek Cingra misangaˈ to kakarayan ato sera i, ‘paselaˈay a matayal.’ (Kasadakan 31:17) Tatodong no sinael i, sawad sanay ci Yihofa to cecay liyad a matayal, mikitini minaroˈan no tayal milifok to taˈangayay karenec. Itini fafekang no sera ci Yis malalokay a matayal, kawra mikilimay cingra to toki a pahanhan, malacafay to widang a komaen. (Matay 14:13; Luka 7:​34) Pakalalokay ko Fangcalay Cudad to finawlan no Kawas malalok a matayal, aka matoka. (Taneng 15:19) Alatek mawmahay kiso paririˈ to paro no lomaˈ, roma i, iraay ko ˈinorong no Krisciyang milasil to ngaˈayay lihaf, kawra misaaliay kita to matatodongay a pipahanhan. w19.12 2 fiedac 2 fatac; 3 fiedac 4-5 fatac

Hamaan milengo kita to misakawasay a demak. Toniya demak wa ngaˈay minanam kita to taˈarawan ni Yis. ˈAyaw no tayni ci Yis i sera itiniay i kakarayan maˈorip, mansa adihayay ko kafanaˈan to pakayniay ci Satanan ato tatiihay coyoh a demak. Kawra cowa pilomal ci Yis to pakayniay tatiihay coyoh a tawcikel, samanen makalimay ci Yis malo Misawacayay Tamdaw ni Yihofa, eca ka patado ci Satanan a milasil. Wa ngaˈay minanam kita to taˈarawan ni Yis, aka mararid a milengo to pakayniay tatiihay coyoh a demak. Safeliten, pahapinangen ko tamdaw to ‘matomesay i falocoˈ’ ita ko soˈlinay kimad. (ˈOlic 45:⁠1) Cowa ko mamatalaw kita to tatiihay coyoh. Toniya hekal, tahalifaay kita to tatiihay a demak. O adada ato kafahalan a demak cowa ko kafanaˈan a mifekad i tireng no mita, alatek fahal saan mapatay kita. Sahtoay o tatiihay coyoh ko pairaay, cowa ka saan. Sowal no Fangcalay Cudad: ‘Samanen o malifaay no tamdaw, o toki ato cowa ko kafanaˈan a demak ko piˈarawan.’ (Patnakay 9:​11) Mafanaˈay kita, ikakaay ko ˈicel ni Yihofa to tatiihay coyoh. w19.04 23-​24 fiedac 13-14 fatac

Ano ira ko mifanaˈay to miˈodangay to kaemangay a demak, o mamidofdof ko malohemay malitengay to milingatay a holic no hekal han? Hai. Ano ira ko hatiniay a holic, o dadofdofen no malohemay malitengay. O hatiniay a holic cowa pisafelit to palinian no Kawas. (Dmak 5:​28,29) Mihaenay, ano ira ko mifanaˈay to miˈodangay to kaemangay a demak, tatangsol cangra milicay to Fenpo cipinang to sasamaan mitoor to holic a mifanaˈ to dimeng. O fafanaˈen no malohemay malitengay ko mikaˈodangan, ato wama wina ningra anca o mafanaˈay toni demak a tamdaw, wa ngaˈay cangra mipadimeng. Ano o salikaka kora mararaway, mamafanaˈto ko ˈalomanay tamdaw, wa samaanto hani? Wa calemcem ko Krisciyang to mamipalak to ngangan ni Yihofa a eca ka padimeng han? Cowa ko cacalemcem cangra, samanen o mipalakay to ngangan no Kawas oyaan mararaway a tamdaw. w19.05 10 fiedac 13-14 fatac

O faˈinay ato fafahi makakangodo, mitoor to miketonan sowal to raramod. Mamisetek to falocoˈ ko mararamoday tahadaˈoc malacafay, matiya Satapangan 2:24: “Liyasen no tamdaw ko wama ato wina ningra, malacecay ato fafahi ningra, malacecayto ko tireng nonini a tatosaay.” ˈArawhan, oya micadaay to taneng no hekal a tamdaw cowa ka hatira, o faˈinay ato fafahi o mamisamacay to saali no niyah sanay cangra. O cecay milengoay to malalikongay a cudad sanay ko sowal: “Iti:yaho miketon to sowal ko mararamoday ‘hakelong no ˈoripˈ cowa ko mamalacinowas kita sanay. ˈArawhan nohatini ‘ano makakaolahho kitaˈ, cowa ko mamalacinowas kita sanayto ko sowal.” O misakahmaway to raramod mipalakay to paro no lomaˈ, madokaˈ ko falocoˈ. Mahapinangay, o kapinengneng no hekal pakayni raramod tada mafolaay. w19.05 23 fiedac 12 fatac

Calemcemay ci Pawlo, samanen manaholay no harateng no hekal ni Satan ko roma Krisciyang. (Ifiso 4:17-19) Ano aninito mamafiyor kita alatek. Ci Satan ko mikowanay toniya lekakawa, tano masakenaay a pakayraan cingra minahol kitanan, miowing kitanan mitowakang ci Yihofaan. Ano ira ko misatakaraway falocoˈ ato saka cinganganaw a harateng ita i, mamadolo a makayhid ni Satan. Saka dademakan ningra ko serangawan, milifetan maˈorip ato mananamay i picudadan, mikayhid kitanan midoedo to harateng ningra a midemak. Wa ngaˈay kita mifalah to cilamitay i “kemod no falocoˈ” a harateng no niyah han? (2 Korinto 10:4) Sinanoten ko sowal ni Pawlo: ‘Palasawaden ita ko masakenaay a mararaway kimad, ato masakenaay pacoliay to sifanaˈ no Kawas a misatakaraway a sasowalen, hanaca paliten ko kihcod a harateng papitoor ci Kristoan.’ (2 Korinto 10:5) Ira ko sapadama ni Yihofa, o ngangaˈay kita a mifalah to masakenaay mararaway a harateng. w19.06 8 fiedac 1-3 fatac

Ci Hana, Tafiti ato mitiliday to ˈOlic misiˈayaw to taˈangayay saroero mitadiˈecay ci Yihofaan, faedetay ko harateng a mitolon, mifanaˈ ci Yihofaan to kacarirawan no niyah, awaay ko maˈosaway nangra a mifanaˈ to Kawas to hano taˈangay ko saroero no niyah, padadotocayho tayra i pidokoan ci Yihofaan a kitiraan midoko Cingranan. (1 Samuil 1:​9, 10; ˈOlic 55:22; 73:17; 122:1) Siniˈadaay ci Yihofa toniya madimadiay sikawdan, mihacecayay a pacaˈof to satolon nangra. Parihadayan Ningra ko falocoˈ ni Hana. (1 Samuil 1:​18) Sowal ni Tafiti: ‘Adihayay ko pades no moecelay tamdaw, kawra milidongan ni Yihofa cingra paliyas toniya kihcod.’ (ˈOlic 34:19) Oya mitiliday to ˈOlic ikorto, malecaday mikitingay to kawanan a kamay ningra ci Yihofa, sanay a miharateng, tano sidaˈitay a limoˈot a mikayat cingranan. (ˈOlic 73:23, 24) Mikitini toniya maˈoningay, mananamay ita ko maanan? Latekay pakayni i pasangaray taˈangayay ko saroero ita, kawra ano dotimen ita samanay ci Yihofa padama to sikawdan Ningra, hanaca pasayra Cingranan mitolon ato padadotoc a mitoor to limoˈot Ningra a midemak, wa malaˈosi ko piremo to saroero.​—ˈOlic 143:​1, 4-8. w19.06 17 fiedac 14-15 fatac

Hamaan pakayni i sowal ato midemakan no tao, ecato ka timolo mihai to Misawacayay Tamdaw ni Yihofa ko niyah. (Mika 4:⁠5) Ikor no mapatay ci Yis, timoloay ko tarokos i Yirusalim a mitosil, mikitini i taˈarawan nangra wa ngaˈay pakalalok kitaanan. Itiya, soˈlin kaˈintehen no ˈaˈideman no Yutaya ko tarokos, kamayan fanekfek tayra i fangcalay sefi a mitosil, caka talaw to tao a mafanaˈ to nisawawaan ni Yis cangra. (Dmak 5:​17, 18, 27, 28, 42) Cowa ka pakayni kaciˈangi a misawad mitosil. Malecaday, micerid kita mitosil, caka talaw mafanaˈ ko cafay matayal, cafay micudad, fiyafiyaw to Misawacayay Tamdaw ni Yihofa kita, mihaen mamaremo ko matalaway to tamdaw a falocoˈ. (Dmak 4:​29; Loma 1:​16) Mafanaˈay ko tarokos, pakayniay i pidofdof to araaw ni Yihofa a kaˈintehen no tao, mansa malikoen cangra, pakayni ko sakahemek. (Luka 6:​23; Dmak 5:​41; 1 Pitiro 2:​19-​21) Ano mafanaˈ kita pakayniay i matatodongay a demak a kaˈintehen no tao, cowato ko papakayni katalaw a sawadsa mihodop ci Yihofaan. w19.07 7 fiedac 19-20 fatac

Ci Yis ato Yutaya a nisawawaan midofdofay to saˈosi no Paselaˈan Romiˈad, samanen o mamidofdofho cangra to Rikec ni Mosi. Kawra, mikitini sowal ato waywayan ni Yis mahapinangay ita, itini pidofdof to Paselaˈan Romiˈad matatodongay ko harateng ningra. (Matay 12:​9-​11) Harateng ni Yis sidaˈit a padama to tao cowa pisafelit to saˈosi no Paselaˈan Romiˈad. O araaw no Kawas patireng to Paselaˈan Romiˈad, o tamdaw wa itini Paselaˈan Romiˈad misawad to tayal, ngaˈ misamacay midoko to Kawas ato kahemekan no Kawas a demak, mansa o midemakan ni Yis matatodongay to araaw no Kawas. Itini i Nacali ci Yis a mitosil i, ‘mitooray to nanaman micomod i sefi, tomireng a miˈosi to Fangcalay Cudad,’ itini kalomahadan ningra, cingra ato paro no lomaˈ misaka dademakay to Paselaˈan Romiˈad a miingid to Kawas.(Luka 4:​15-​19) Misaaretengay ko nisawawaan ni Yis to saˈosi no Paselaˈan Romiˈad, mansa mitelianho nangra koya mapatayayto a tireng ni Yis, mahererek to ko Paselaˈan Romiˈad ngaˈ padadotocay a milosimet.​—Luka 23:55, 56. w19.12 4 fiedac 10 fatac

Sapikilimaw to makahiay mikotod ci Kristoan a tamdaw, o kahacecay Krisciyang mihadakay to ˈicel. Oniya tayal malecaday to mikilimay to mahidayay a wawa. Hano haenen ko sowal hani? Nengnengen ko cecay soˈlinay nalifetan, o cecay 3 ko mihecaan a faˈinayan wawa mahidayay, 500 ko mikilimay a tamdaw. Ikor no mahiday cingra to 20 tatokian i, mahelaay no cecay mikilimay a tamdaw i omah no ˈariray cingra. Kawra, o niyah a ˈicel ko sakahela cowa pihaen ko harateng noya pakahelaay, sanay ko sowal “O ˈicel no ˈalomanay ko sakahela noniya wawa.” Anini, malecaday oniya mahidayay a wawa ko ˈalomanay tamdaw cowa ka fanaˈ to papasicowa ko rakat. Matoleday cangra, misaaliay to papadamaen. Polong no hekal 800 emang a Misawacayay Tamdaw ni Yihofa misaˈicelay mikilim to hatiniay a tamdaw. Cowa ka hela iso ko makahiay minanam to Fangcalay Cudad a tamdaw alatek, kawra mahelaay no roma salikaka i malecaday a kilac. Ano mahela no salikaka ko hatiniay tamdaw a padama cingranan malo Krisciyang i, o polong a Krisciyang mihadakay to ˈicel, wa malecad a lipahak. w19.07 16-17 fiedac 9-10 fatac

Patalipaˈelalan ni Pawlo ko Filipiay a Krisciyang padadotoc a mihadidi, milahci to saka tahadaˈoc no ˈorip a cacikayen. Samanen ka tomirengho noniya faelohay kasakopang misiˈayawayto pakidemay a sapalak. Itini saka 50 miheca, malifokay ni Pawlo ko mapolosi, o tatayra i Makitoniya, malacafayay cingra ci Silasan a tayra i Filipi. (Dmak 16:9) Mitosil ci Pawlo i, malitemohay ningra ko cecay fafahiyan ci Litiya, ‘mifohatan ni Yihofa ko falocoˈ ningra,ˈ orato micadaay ci Litiya to ngaˈayay lihaf. (Dmak 16:14) Tangsolay cingra ato paro no lomaˈ micada to paputisem. Itiya, misatapangay ci Satan miconged to mitosilay tayal. Milepelan no itiraay tamdaw ci Pawlo aci Silas patayra i mikowanay, pakokot cangranan mifodifoday to demak. Telocto, mipekpekan ci Pawlo aci Silas, dotoc mipalitan. Ikor mitedalan no mikowanay macaloh a papiliyas cangranan. (Dmak 16:16-​40) Sawad sanayto ci Pawlo aci Silas han? Cowa! Samanay ko salikaka no kasakopang i Filipi hani? Soˈlin cowaho ka halafin micada to paputisem, micada to pisafelit cowa pisawad. O taˈarawan ni Pawlo aci Silas taˈangayay ko pakalalok cangranan. w19.08 2 fiedac 1-2 fatac

Ciheci to ‘minaroˈan no moecelayˈ mahawpay ko kaolah ita ci Yihofaan ato finawlan Ningra, pasowal to tao, pakasoˈlinay ko niyah ci Yisan ato hatokel noikoran. Roma i, misarocod kita mirienang to mitosilay demak, padama to tamdaw malo nisawawaan ni Kristo, o ciheciay to ‘minaroˈan no moecelay.’ (Matay 28:19-20) Ano samaanto ko pakayraan no mita, ngaˈayay pataengad to likat ita. Latekay, o saconged o ngaˈayay a toki ita mitosil. Tinakoen, o tarokos ci Pawlo, patikami cingra to Filipi a kasakopang i, alatek mapalitay cingra i Loma, soˈlin mapakading, kamayanay cingra patenak to ngaˈayay lihaf to milisoˈay cingranan a lafang ato milaocay. Itiniay i pasangaray a pakayraan, padadotocay ci Pawlo fanekfek ko falocoˈ mikowad to salikaka, padadotoc ‘timolo a patenak to Kimad no Kawas.’​—Filipi 1:​12-​14; 4:​22. w19.08 12 fiedac 15-16 fatac

Palahad to misapoeneray falocoˈ hano masakalimlaan hani? Kalimlaan a lalangian i, ci Yihofa maolahay to misapoeneray ko falocoˈ a tamdaw. Mahaenay ko sowal no tarokos ci Pitiro. Itini “Katayni Mikotod Takowanan” a cudad (no Kowaping) itini saka 3 fedengan 23 fatac milengo toniya sinael i, sanay: ‘Ano misaˈakawang ko tamdaw mahecaday to mawarakay no ˈetok, awaay ko kangaˈayay no teloc. Ano samaamaan ko inaneng no misaidahiyay a tamdaw i, awaay ko kapo sanay ko harateng no Kawas. Soˈlin awa ko inaneng no misapoeneray a tamdaw, wa ngaˈayho saka dademaken ni Yihofa. Misapoener kita dademak i, wa mahemek a palifon ko Kawas kitaanan.’ Paihkal to misapoeneray a waywayan, ngaˈay pakahemek ci Yihofaan, awaay ko mikikakaay tonini a ciepoc! (Taneng 23:15) Palahad to misapoeneray a capeling, ngaˈay pahemek ci Yihofaan, cowa konini aca, wa milifokho to adihayay haepoc. Malo misapoeneray a tamdaw, mamaolah ko tao micawmaˈ kitaanan. Misamaanay hani? Haratengen hena, maolahay kiso a micawmaˈ to samaanay a tamdaw hani?​—Matay 7:​12. w19.09 4 fiedac 8-9 fatac

Malalok ko malohemay malitengay matayal saki salikaka. Soˈlin ira ko fadangalan, cowa ka misatakaraw. Ao damsayay a madaˈmaˈ to salikaka. (1 Tisalonika 2:​7, 8) Maolahay cangra to salikaka, ira ko misapoeneray falocoˈ, mansa mikangodoay ko sowal. O cecay adihayay ko milifetan a malohemay malitengay ci Antero, sanay: “Ano soˈlin a ciharateng ko malohemay malitengay to salikaka, wa mitemer ko falocoˈ nangra, maolah a kalacafay to malohemay malitengay a matayal.” Roma halafinayto a malohemay malitengay sanay: “Misaˈicelay kako misaka dademak to limoˈot i Filipi 2:​3, minengneng to tao mikikakaay to niyah, mihaen ecato ka malecad o mikowanay, pacieci to tao mitoor to harateng ako a midemak.” O misapoeneray a Kawas ci Yihofa, mihaenay o mamisapoener ko malohemay malitengay. O saˈakawangay a Tatapangan ci Yihofa, makahiayho a ‘miroho misapoenerˈ ato ‘mikitini i alafoh a pacakat to tadancaay a tamdaw.’ (ˈOlic 18:35; 113:​6, 7) Pakayni i misatakaraway tamdaw, tada maacekay ci Yihofa. w19.09 16-17 fiedac 11-12 fatac

Sapitamorongaw kita to taloˈodan ni Yis, milifok to sinowayay, pairaen ko matatodongay harateng. Midemakay kita to tayal ni Yihofa, mansa tooren ko pakayraan ni Yihofa a matayal, samanen o Tawki ci Yihofa, o matayalay kita. (Luka 17:10) Ano tooren ita ko pakayraan no niyah midemak to tayal no Kawas, mamarorayto kita. Ano maolahay kita midofdof to sakayat ni Yihofa, wa pakaremo to pasangar, milaheci to tadamaanay a demak, samanen o mamalaˈosi ko araaw no Kawas. (Loma 8:​31; 1 Yohani 4:4) O mamisaˈicel kita a pakahemek to sidaˈitay a wama ci Yihofaan. Itini saka 1 hahekalan, o roma tamdaw na mikotoday ci Yisan, kawra iraay ko ˈanof misatekeday a harateng macangalay ko falocoˈ, cowato ka pikotod ci Yisan. (Yohani 6:​25-​27, 51, 60, 66; Filipi 3:​18, 19) Kawra, oya maolahay to Kawas ato tao a tamdaw, padadotocay a mahemek mitamorong to taloˈodan ni Yis, mansa ira ko tokel malacafay ci Yisan i kakarayan a matayal. Ano malecad kita cangranan ira ko moecelay araaw no falocoˈ, wa ngaˈay padadotoc a lipahak. w19.09 20 fiedac 1 fatac; 24-25 fiedac 19-20 fatac

Haratengen ko mamalifok iso a masakenaay sapalemed i ikor no matedal i mararaway kimad. Ngaˈay malifok ko mahaenay a pasalat coko lipahakay kiso han? Noikor, wa milifokho kiso to taˈangayay a pasalat. Cato ka halafin, wa palahdawento ni Yis ko mararaway pihakelongan ato manaholay a mikowanay no hekal. Wa dipoten no Kawas ko midokoay Cingranan a ‘taˈangayay ˈopo a tamdaw,’ mitongal to sakalipahak nangra i fafekang no sera a Lakoing. (Paˈarawan 7:​9, 14) Noikor wa patikol maˈorip ko ˈalomanay tamdaw, ira ko toki milifok to pasalat, masongilaˈ ko piliyas to kalakoli no raraw. (Dmak 24:15) Itini Pikowan ni Kristo to Comaˈol Miheca, cingra ato salikaka ningra wa padama to tamdaw patikol a tanoktok ko tireng, ira ko sangaˈayay a kalalaˈed to Kawas. O malecad o Kalipahakan a Mihecaan no Israil tamdaw, ngaˈay milifok to pasalat. Mahererek ko Comaˈol Pikowan i, o madimadiay matayal saki Yihofaan a tamdaw wa patikol a malefot, awato ko raraw. w19.12 12-13 fiedac 14-16 fatac

Saka 1 hahekalan, ci Yosifo (Parnapas) o hinapaladaˈay a tamdaw makalimay cingra sakadademaken ni Yihofa. (Dmak 4:​36,37) Ikor no malo tarokos ci Sawlo i, matalaway mingata ko salikaka cingranan, samanen na mipalakay cingra to kasakopang. Kawra talaˈayaway ci Parnapas padama ci Pawloan. (Dmak 9:​21, 26-​28) Ikor i, Yirusalimay a malohemay malitengay sapiocoran to tamdaw tayra i Antiok pakalalok to salikaka, o cima ko miocoran nangra hani? Ci Parnapas. Tada ngaˈayay ko mipiˈliˈan nangra, sowal no Fangcalay Cudad, ci Parnapas ‘pakalalokay to salikaka tanoktok ko falocoˈ, mitadiˈec to Tapang.’ (Dmak 11:22-​24) Anini, ci Yihofa papadama kitaanan malo “o mihinomay” a tamdaw, pakalalok to salikaka. Tinakoen sakadademak Cingra kitaanan misayar to mapatayay ko salawina a tamdaw. Latekay miocoran Ningra kita milisoˈ ato patingwa to adadaay ato matoleday a salikaka, somowal to pakalalokay a sowal mikowad cangraanan. Maolahay kiso sakadademaken no Kawsa, mahecad o pisakadademak Ningra ci Parnapasan han?​—1 Tisalonika 5:​14. w19.10 22 fiedac 8 fatac

Malacafay to widang matayal, latekay cowa ko ngaˈayay aca ko maˈaraway, maˈarawayho ko dangoc ningra. Ano mahaen o sasamaan ko hademak ita hani? Haratengen ita, malecaday kitanan ko salikaka cowa ko malefotay. Malawidangto kita cangranan i, wa misaˈicel mitafo to kalawidang. Ano mararaw ko widang, ngaˈayay salalangien ita ko Fangcalay Cudad mihadak to sidaˈitay a limoˈot. (ˈOlic 141:5) Ano midokaˈ to falocoˈ ita ko widang, sododen ita cingra, akato liyawen mihadak koniya demak. Itini pasangaray siˈayawen a lintad, o ngaˈayay no salikaka ko nengnengen, mitafo to dangoc nangra, mihaen ko patanektek to kalawidang. Nohatiniho mihaento kita a midemak, samanen itini taˈangayay padiing, tada misaaliay kita to sadama no widang. w19.11 6 fiedac 13, 16 fatac

Ano misikay kita to pacekiway to Fangcalay Cudad i, o papasifanaˈ to tamdaw midofdof to kihcod a limoˈot ni Yis, misaˈicel a padama to tamdaw malo Krisciyang. Padamaen ita ko pacekiwan cipinang, mipiliˈ midoko ci Yihofaan ato midama to Hongti Kitakit Ningra o masaka limlaan. Sasamaan ko hademak ita hani? Patemeren ko falocoˈ no pacekiwan, saka dademaken ko mananamay nangra, patafang to niyah ci Yihofaan ato micada to Paputisem, mihaen ngaˈ milakowit cangra to romiˈad ni Yihofa. (1 Pitiro 3:​21) Mangataayto ita ko kahererekan noniya lekakawa, mihaenay ano caka kahi ko pacekiwan malo Krisciyang, cowato ko papadadotoc kita malalengo cingranan to Fangcalay Cudad. (1 Korinto 9:​26) ˈAlomanayho ko cowa pakatengil to lihaf no Hongti Kitakit, itini ˈayaw no ira ko taˈangayay padiing, mameten ita ko toki a mitosil! w19.10 11-12 fiedac 14-15 fatac

Nolitengan a Israil, polong a finawlan masaˈopoay i Pihepolan to Raraw a Romiˈad to mihecahecaan, pacakat to sapatoˈaya i Kawas. Oniya limasmas patalipaˈelalay to Israil tamdaw, o ciraraway cangra, misaaliay pakayni pacakat to toˈaya a mihepol to raraw. Mikitini pitodoh to exiw i Pihepolan to Raraw a Romiˈad mamananam ita ko maanan hani? Sowal no Fangcalay Cudad, o satolon no madimadiay midoko ci Yihofaan a tamdaw mahecaday to exiw. (ˈOlic 141:2; Paˈarawan 5:8) Mikangodoay ko waywayan no sakakaay saysi, miˈorong to exiw tayra i kaˈayaw ni Yihofa. Anini, ano mitolon kita ci Yihofaan i, pairaen ko mangodoay a waywayan. Tada miakoˈiday kita to misangaˈay a Tatapangan papiingid kitanan i Cingranan, mahecad o piingid no wawa to wama. (Yakop 4:8) Miakoˈidayho kita Cingranan makahi malo widang no mita Cingra. (ˈOlic 25:14) Mihaenay cowa ko mamidemak kita to patoleday Cingranan a demak. w19.11 20-21 fiedac 3-5 fatac

Itini niyaroˈ iso, samanay ko pinengneng no tamdaw to tayal hani? Itini adihayay kitakit, koˈdaway ko katayalan a toki no tamdaw, marotayay a matayal. Samanen ˈifowaay, mansa awaay ko toki no tamdaw pahanhan, kalacafay to paro no lomaˈ, awaay ko toki a mafanaˈ to Kawas. (Patnakay 2:​23) O roma tamdaw cowa kaolah matayal, mikilimay to lalangian caka kahi matayal. (Taneng 26:13, 14) Pakinaliay ko pinengneng no hekal tamdaw to tayal, samanay ko pinengneng ni Yihofa aci Yis hani? Mikitini pitadtad ni Yis mahapinang ita maolahay ci Yihofa matayal, o sowal ni Yis: ‘Padadotocay ko Wama ako a matayal tahanini, ano kakoto padadotocay a matayal.’ (Yohani 5:​17) Misangaˈan ni Yihofa ko masawalwalay a coyoh, kakahaday a dohaw, misangaˈayho to kasapaan a maamaan i cikiw. w19.12 2 fiedac 1-2 fatac

Ci Tafiti hano ngaˈay ko kalalaˈed aci Yihofaan hani? Mihapinangay ci Tafiti to misangaˈan no Kawas a maamaan. Kaemangho ci Tafiti i, miceriday cingra i papotal midimokos to siri no wama, mikitiya mahapinangay ningra ko kihcod misangaˈan ni Yihofa. Tinakoen, micaˈengaw ci Tafiti minengneng to kakarayan i, manengnengay ningra ko foˈifoˈis, mahapinangayho ko makapahay capeling no Kawas. (ˈOlic 19:​1, 2) Cipinangay ci Tafiti to kasapaan ko tireng no tamdaw, mahapinangay ko tadamaanay a taneng ni Yihofa. (ˈOlic 139:14) Mihapinang ci Tafiti to misangaˈan no Kawas a maamaan i, hato mimingayto ko niyah saan ko harateng ningra. Mananamay ita ko maanan? To romiˈamiˈad wa ngaˈay kiso minanam to masakenaay a pinaloma, pinaˈorip ato tamdaw, hapinangen wa ngaˈay kiso mikitini minanam to maanan a capeling ni Yihofa. Mihaen, wa matongal to romiˈamiˈad ko kafanaˈ iso to kakarayan a Wama, hanaca matongal ko kaolah Cingraanan.​—Loma 1:20. w19.12 19-20 fiedac 15-17 fatac

Mipiliˈay ci Mosi midoko to Kawas. Maedeng 40 ko mihecaan ni Mosi, cowato ka ciharateng “mala wawa no fafahiyan a wawa no hongti no Icip,” hai sanay misawad to saaroˈan, mipiliˈ to finawlan no Kawas a micawmaˈ. Tada kasemeran ko pakasoˈlinay falocoˈ ningra! Samanen mitadiˈecay ci Mosi ci Yihofaan, hakelong no kaˈorip ningra ngaˈayay mala widang ci Yihofaan. (Taneng 3:⁠5) Mananamay ita ko maanan? Mahecad ci Mosian, kita maemin o mamisaˈosi to cecay sasaˈosien: Wa mipiliˈ kita midoko to Kawas ato macacawmaˈ to midokoay Cingraanan a tamdaw han? Pakayni pidoko to Kawas, alatek misaaliay kita to kakinafalah, anca oya cowa kafanaˈ ci Yihofaan a tamdaw mamisafelit kitaanan alatek. Kawra ano tadiˈecen ita ko kakarayan a Wama, wa padama Cingra kitaanan! w19.12 17 fiedac 5-6 fatac

Soˈlin tano seraan kita a sangaˈen, kawra itini pinengneng ni Yihofa o kalimlaan kita. Adihayay ko wacay sapitadtad tonini. Misangaˈ ko Kawas to tamdaw i, ngaˈayay minanam to capeling Ningra. (Satapangan 1:​27) Misangaˈ Cingra to tamdaw o sainanengay i cikiw a pinaˈorip, miocor cangraanan mikowan to sera ato ˈaˈadopen. (ˈOlic 8:​4-8) Ikor no mararaw ci Atam, padadotocay ci Yihofa maolah to tamdaw. Misaaretengay Cingra minengneng kitaanan, mansa ocoren Ningra ko kaolahan a wawa ci Yis kinafalah to ˈorip, misodod to raraw ita. (1 Yohani 4:​9, 10) Samanen iraayto ko sapatefoc, wa patikolen ni Yihofa paˈorip ko pakayniay i raraw mapatay a tamdaw, mahawpay ko ‘moecelay ato cowa ka moecel a tamdaw.ˈ (Dmak 24:15) Sowal no Fangcalay Cudad soˈlin adada, manikaw ato maliteng kita, kamayan misalimla ko Kawas kitaanan.​—Dmak 10:34, 35. w20.01 15 fiedac 5-6 fatac

Manilnilay no fangcalay saocor oniya hatokel cowa kangaˈay pafelien ko tao, dengan o Kawas ko ngangaˈay pafeli. (1 Tisalonika 2:​12) Mihaenay cowa ka ngaˈay kita milicay to pakasomaday cingranan a salicay. Tinakoen, ano o faˈinay ko tatayra i kakarayan i, hamaan licayen ko fafahi ningra to: “Ano caka ngaˈay kiso ato faˈinay malacafay tayra i Lakoing, wa masomad kiso han?” Wa ngaˈay pakasoˈlin kita, itini i faelohay hekal, wa pasaloen ni Yihofa ko ‘kalim no polong a tamdaw.’ (Olic 145:16) Eca ka pakakaen ita ko iraay ko tokel tayra i kakarayan a tamdaw, wa ngaˈay midipot to kalalaˈed no niyah aci Yihofaan. Misamaanay hani? Sanay ko Fangcalay Cudad, soˈlin nilnilen no fangcalay saocor no Kawas ko cecay tamdaw, cowa ko tatahatolas a madimadi alatek. (Matay 25:10-​12; 2 Pitiro 2:​20, 21) Mihaenay, soˈlin ira ko hatokel no Krisciyang tayra i kakarayan, anca o kafanaˈan no tamdaw, anca halafinayto midoko to Kawas, cowa ko ngangaˈay ‘pakidem ko pakahemekˈ cingraanan, caka ngaˈay pakakaen cingra, mihaen cato ko tamdaw ko hakelongen ita. (Yuta 16) Ano cato ka madimadi anca miliyas to likakawa koniya tamdaw, cowa ko mamalahdaw ko pakasoˈlinay falocoˈ ita anca misawad a midoko ci Yihofaan. w20.01 29 fiedac 9-10 fatac

O ‘kaolahan a wawaˈ kita, ka pisaˈicel a mitodong to kakarayan a Wama. Ciolahay ko falocoˈ ita a micada to tao, makahiayho misodod to tao. Maˈaraw no cowa ka fanaˈ to Kawas a tamdaw ko ngaˈayay waywayan ita, matemer ko falocoˈ ciharateng to sakafanaˈaw to Kawas alatek. (1 Pitiro 2:​12) Roma i, micada ko wama wina to wawa i, misaˈicel a mitodong to ngaˈayay taˈarawan ni Yihofa, wa madolo a mahapinang no wawa o sidaˈitay a Wama ci Yihofa, makalim sapiingidaw Cingraanan. Ano kitato malikoay to kakarayan a Wama ci Yihofaan, makalimay mafanaˈ ko tao Cingraanan. Malecaday ko harateng ita ci Tafitian, sanay cingra: ‘Malikoay kako ci Yihofaan.’ (ˈOlic 34:2) Kawra ano matalaw kita mihaen to demak, samaanto hani? Sasamaan a timolo hani? Ngaˈayay haratengen ita, mihaen to demak o papakahemek ci Yihofaan, ngaˈayho miharateng ano mafanaˈ ko tao ci Yihofaan wa milifok to maanan a haepoc. Na padamaan ni Yihofa ko saka 1 hahekalan a Krisciyang ira ko timolo, ano aninito wa pafeli to timolo kitaanan.​—1 Tisalonika 2:2. w20.02 11 fiedac 12-13 fatac

Padadotocay macakat ko ˈalomanay pacekiwan to Fangcalay Cudad, salikor micadaay to paputisem, kawra o roma a tamdaw maolahay malacafay kitaanan a minanam, kawra cowa ka makahi malo Krisciyang. Ano misikayay kiso to cecay pacekiwan to Fangcalay Cudad, makalimay sapadamaaw to pacekiwan mitoor to mananamay a midemak, malo nisawawaan ni Yis. Tokel ni Yihofa pakayniay kaolah ita Cingraanan ko noka pidoko. Mihaenay o pacekiway a singsi papadamaen ko pacekiwan to pinengneng ci Yihofaan ‘o Wama no pakoyoc, o midipotay to maponengay,’ cipinang to tangongolay ko olah ni Yihofa cangraanan, tada ciharatengay cangraanan. (ˈOlic 68:5) Ano matinako no pacekiwan ko olah no Kawas, wa matemer ko falocoˈ, tano olah a patikol to olah. Papadamaen ita ko pacekiwan a mihapinang, oya matomesay to olah a Kawas mitokelay cangraanan tahadaˈoc a maˈorip, makahiyay padama cangraanan malaˈosi koniya patosokan. w20.01 3 fiedac 7-8 fatac

Misapoeneray ko falocoˈ ni Pawlo, mansa micangacang to sadama no widang. Soˈlin o malonayay saan ko pinengneng no tamdaw, cowa ka ngodo cingra a mafanaˈ ko tao to misaaliay ko niyah to sahinom. (Kolosay 4:​7-​11) Misapoener kita a mihai to misaaliay ko niyah to sahinom, wa makahi ko salikaka a padama kitaanan. Mafanaˈay ci Pawlo o mamihinom ko kimad no Kawas cingraanan, pairaayho to taneng ningra, ngaˈay misiˈayaw to masakenaay a pasangaray. (Loma 15:4; 2 Timoti 3:​15,16) Tiya sakina tosa mapalit ci Pawlo i Loma i, mangataayto ko kapatayan a romiˈad no niyah sanay cingra a miharateng, orato mitahidangay ci Timotian kaliki a miˈaraw cingraanan, halo piˈorong to maloloday a cudad. (2 Timoti 4:​6, 7, 9, 13) Ono Hipray a cudad konini alatek, makalimay ci Pawlo sapisongilaˈaw a micekiw. Anini, ano o maananto ko masiˈayaway ita a pasangaray, ano todongen ko taˈarawan ni Pawlo, micerid a micekiw to Kimad no Kawas, wa pakaynien ni Yihofa i kimad Ningra a parihaday ko falocoˈ no mita. w20.02 23-24 fiedac 14-15 fatac

Ci Ilifac, Piltat aci Cofar o katomerep nangra cowa ko misimsimay to sasamaan a padama ci Yopuan, samanen ikorto mikitini pilikaf nangra ci Yopuan a mahapinang, o miharatengan nangra o sasamaan misawacay to mararaway ko demak ni Yopu. Matatodongay ko miming a sowal nangra, kawra pakayni ci Yihofaan aci Yopuan, adihayay ko cowa ka tatodong ato cowa ka sidaˈit a sowal nangra. (Yopu 32:​1-3) Samanay ko harateng ni Yihofa tora sowal nangra hani? Maketeray Cingra, mafolaay cangra sanay, papitahidang ci Yopuan a patado cangraanan a mitolon. (Yopu 42:​7-9) Mikitini kita ci Ilifa, Piltat aci Cofaran mamananam ko maanan sapasifanaˈ hani? Saka 1, cowa kangaˈay kita patelas milikaf to salikaka. (Matay 7:​2-5) ˈAyaw no papalimoˈot kita to salikaka i, o mamisongilaˈ a mitengil to sowal nangra, mihaen ngaˈ cipinang to pakayraan nangra. (1 Pitiro 3:8) Saka 2, pairaen ko sidaˈitay a sowal ita, paihkal to soˈlinay a pakayraan. (Ifiso 4:​25) Saka 3, ciharatengay ci Yihofa to o maanan ko sowal ita to tao. w20.03 22-23 fiedac 15-16 fatac

Ano padama kita to tao cipinang ci Yihofaan, tocerid matongalay ko kafanaˈ no niyah ci Yihofaan. Tinakoen, ano kayaten ni Yihofa kita makilim ko ‘matatodongay ko waywayanˈ a tamdaw i, ihkalay mahapinang ita tada siniˈadaay ci Yihofa to tamdaw. (Yohani 6:​44; Dmak 13:48) Ano maˈaraw ita ko pacekiwan misawad to tatiihay nanaman a micaˈedong to ‘faelohay capelingˈ i, mahapinangay ita tada ciˈicelay ko Kimad no Kawas. (Kolosay 3:​9, 10) Roma i, pakayni sapilidongaw to tamdaw, pafeliay ko Kawas to adihayay toki nangra a mafanaˈ Cingraanan, mahapinangay ita to iraay ko mihadidiay no Kawas. (Loma 10:13-​15) Ano hakowato ko halafin ita a midoko to Kawas, cowa ka ngaˈay misakahemaw to kalalaˈed no niyah i Cingraanan. Ano misaareteng kita to kalawidang i Kawas, wa micerid a mitolon Cingraanan. O tanektekay a kalawidang kalimlaan ko ngaˈayay kasasowal, mihaenay sapiingidaw to Kawas, wa micerid kita a mitolon, mifowah to nafalocoˈan i Cingraanan. w19.12 19 fiedac 11, 13-14 fatac

Pakayni kitanan o taˈangayay sahinom konini! Roma i, o hongti no Hongti Kitakit no Kawas ci Yis, papalahdawen ningra ko pifiyor ni Satan ato ciraraway a hekal. (Isaya 65:17; 1 Yohani 3:8; Paˈarawan 21:​3, 4) Tada makapahay a hatokel konini! Soˈlin patorod ci Yis kitanan to pasangaray ˈinorong, kawra o mamikapot cingra kitanan, hanaca midama kitanan tahira ka hererekan noniya lekakawa. (Matay 28:19, 20) Oniya sakiˈok pafeliay kitanan to taˈangayay a timolo! Sahinom, tokel, ato timolo mahecad o tanoktokay a kora, paˈicel to falocoˈ ita, padama kitanan rihaday ko falocoˈ. Itini pakidemay sapalifet, samaan kita ngaˈ padotoc a rihaday ko falocoˈ hani? Nanamen ita ko taˈarawan ni Yis: Saka 1, padotoc a mitolon. Saka 2, dofdofen ci Yihofa fanekfek a mitosil, soˈlin pasangar ko pakayraan kamayanho mihaen to demak. Saka 3, milongoc to sadama no widang. Mihaen, o sapafeli no Kawas a rihaday wa midipot to harateng ato falocoˈ no mita. (Filipi 4:​6, 7) Wa mahecad kita ci Yisan pakalowid to kihcod a sapalifet.​— Yohani 16:33. w19.04 13 fiedac 16-17 fatac