Saka 10 Folad

Paihkalay ko adihayay wacay, midipotay ci Yihofa to sikawdan Ningra anini. Haratengen hena: Itiniay i polong no hekal a mitosil ko finawlan no Kawas. (Matay 28:19,20) Hato matihedakay ko tatiihay a demak ni Akoma. Ano iraay ko ˈicel ni Satan miconged to kihcod a tayal ita, wa mihaen cingra to demak, kawra awaay ko pakayraan ningra, mihaenay cowa ko mamatalaw kita ci Satanan ato tatiihay coyoh. Ano madimadi kita ci Yihofaan, awaay ko pakayraan no tatiihay coyoh paira to tahadaˈocay a pidokaˈ kitaanan. Kawra, kalimlaan ko pitadiˈec ita ci Yihofaan ato micoˈay to tatiihay coyoh. Mihaen ko demak ita wa milifok to adihayay sapalemed, ecato ka lipalaw no mangah ni Satan, cowa ko mamatalaw to tatiihay coyoh. Sakakaay i, wa matongal ko kalawidang ita ci Yihofaan. Ngaˈayay pakasoˈlinen ita ko sowal ni Yakop, sanay cingra: ‘Ka Picoˈay kamo ci Akomaan, wa miliyas a milaliw ci Akoma tamowanan. Ka piingid kamo to Kawas, wa ingiden no Kawas kamo.’​—Yakop 4:​7, 8. w19.04 24 fiedac 15 fatac; 25 fiedac 18 fatac

O wawa o ‘sapafeli ni Yihofa a hafayˈ, o kalimlaan a sapatelong no Kawas i wama wina. Mihaenay, iraay ko ˈinorong no wama wina misongilaˈ a midipot to wawa. Sasamaan ko hademak no wama wina hani? Salakat, cacipinang ko wama wina samaan midipot to wawa ho eca ka makaˈodang. O mamafanaˈ cangra masamanay a tamdaw ko mikaˈodanagay to kaemangay, ato o maanan a pakayraan ko sapilipalaw nangra. O mamisinanot ko wama wina to kihcod a katalawan. (Taneng 22:3; 24:3) Haharatengen, ˈalomanay miˈodangay to kaemangay a tamdaw, oya kafanaˈan ato pakasoˈlinan no wawa a tamdaw. Saka tosa, ceriden masasowal to wawa. (Limoˈot 6:​6, 7; Yakop 1:​19) Tocerid, o mikaˈodangan a wawa cowa ka kahi pasowal to malifaay a demak, calemcemay cangra awa ko pakasoˈlinay cangranan, anca paˈangian no miˈodangay a tamdaw cangra, matalawayto a pasowal. Ano mahapinang no wama wina cowa ka lecad ko waywayan no wawa, damsayen a milicay to mifekaday ko maanan a demak, dotoc mihadidi a mitengil to sapacaˈof nangra. Saka tolo, pasifanaˈen ko wawa. Pasifanaˈen ko wawa, ano ira ko patelasay mikama to tireng nangra, sasamaan ko hasowal ato hademak. w19.05 13 fiedac 19-22 fatac

Hano ˈinteh ci Yihofa to misatakalaway a tamdaw hani? Samanen pakinaliay a misakareteng to niyah, misatakalaway a harateng mahecaday ci Satanan. Haratengen hena, pakaynian ni Yihofa ci Yisan misangaˈ ko maamaan i paro no kakarayan, ˈarawhan tataˈongen ni Yis kako saan a miharateng ci Satan! (Matay 4:​8, 9; Kolosay 1:​15, 16) O matiniay misatakalaway a harateng tada mafolaay i noka pinengneng no Kawas! (1 Korinto 3:​19) Padamaay ko Fangcalay Cudad kitaanan ira ko matatodongay noka pinengneng to niyahan. Sowal sa ci Yis: ‘Matiraen o niyah a maolah to tao.’ (Matay 19:19) Ano patatodongen a ciharateng to niyahan, misalo to saali no niyah cowa ko mararaway. Kawra ikakaay ko nika masaka limlaan ako to tao aka ka saan. Sowal no Fangcalay Cudad: “Ano o maamaanto a demak i, aka kao misatekeday, aka kao mipasenengay ko demak namo. Kao misapoeneray ko falocoˈ namo. Ikakaay no mako ko tao han ko pinengneng.”​—Filipi 2:3; Loma 12:3. w19.05 24 fiedac 13-14 fatac

Tikolen miharateng, tiya minanam kiso to Kimad no Fangcalay Cudad misetek to falocoˈ midoko ci Yihofaan, o maanan ko mifalican. Pakaynien i ˈalomanay a tamdaw, o mamisalof to mararaway a waywayan alatek. (1 Korinto 6:​9-​11) Padamaay ci Yihofa kitanan a misalof, tada miakoˈiday kita Cingranan! Soˈlin iraayto ko kafalic ita, aka a malataˈang. Soˈlin cowato ka hecad kita to ˈayaw no micada to paputisen a pakidem ko raraw, oha maminaˈon a miliyas to mamikayhid kitanan, sapiliyawaw a mararaw ko demak. Mihaenay tosaay ko hademak ita: Saka 1, ‘aka a madengaˈ noniya hekal, aka a mafiyor noniya hekal. Saka 2, pakaynien i pisafaeloh to harateng a ‘mifalic to niyah. O hatiniay kafalic cowa ko maˈaraway aca no tao a demak, mahawpay ko pifalic to i kemoday no falocoˈ a waywayan, nafalocoˈan ato kalim. w19.06 9 fiedac 4-6 fatac

Ano matoled kita i, mirienang to saˈopo papadama kitaanan miliyaw a talifak. Mirienang kita to saˈopo, pairaay to toki ni Yihofa padama ato mihinom kitanan. Masaˈopo i, pakaynian ni Yihofa i fangcalay saocor, o Kimad Ningra ato salikaka pakalalok kitanan. O saˈopo pairaayho to toki ita ‘mapakalalolalok.’ (Loma 1:​11, 12) O cecay fafahiyan salikaka ci Sofiya, sanay: “Ci Yihofa ato salikaka padamaay takowanan padadotoc a tanektek, o saˈopo taˈangayay ko sadama takowanan. Ano misaˈicel kako a mitosil, mararid mirienang to cawmaˈ no kasakopang, matongalay ko ˈicel miremo to saroero ato cariraw.” Ano matoled a maˈisang kita i, haratengen ko sakiˈok ni Yihofa, cowato ko mamisiˈayaw kita noikor to pasangaray, nohatini makahiyay Cingra padama kitanan miremo to saroero, pafeliay Cingra to haˈicel ita miremo to somad ato matoleday harateng.​—Filipi 2:​13. w19.06 19 fiedac 17-18 fatac

Patikol maˈorip ci Yis tangsolay misaˈopo to nisawawaan, samanen iraay ko kalimlaan a demak ningra to papasowalen cangra. Masaˈopo ko nisawawaan i Kalili i, palimoˈotan ni Yis cangra midemak to kalimlaan a ˈinorong, o midemakan ita anini a ˈinorong konini. Sanay ko sowal ni Yis: ‘Kalingad kamo, palanisawawaan no mako ko polong no kasafinawlan, . . . o kihcod a limoˈot ako tamowanan, pasifanaˈen cangra a midofdof.’ (Matay 28:19, 20) O limoˈot ni Yis cowa ko 11 aca a tarokos ko pasowalan, tokel ningra polong a mikotoday cingraanan a tamdaw o mamalingad a mitosil. Hano mafanaˈ kita hani? Tiya palimoˈoten ni Yis i Kalili a lotok ko nisawawaan malingad a mitosil i, cowa ko tarokos aca ko itiraay, samanen tiya patikolan ni Yis a maˈorip a romiˈad, pasowalan no coyoh ko papina fafahiyan: “Itini [Kalili] wa maˈaraw namo cingra.” Oniya papina fafahiyan maedeng mitooray to limoˈot a tayra i Kalili. w20.01 2-3 fiedac 2-4 fatac

Mitadtaday ci Yis hano safeliten no tamdaw ko nisawawaan, lalangian i, cowa ko noniya hekal kita, mansa ˈinteh ko hekal tamdaw kitaanan. Tahacada kita to sapalak, cowa ko mapiliˈay ko Kawas kitaanan, ao pakayniay pidemak ita to matatodongay a demak! Cowa ko papakaconged ko tamdaw kitaanan, midoko to taˈangayay ko ˈicel a Kawas ci Yihofaan, mihaenay ko demak a tamdaw saikor pasokiyaway. Tinakoen, itini Saka Tosa Lalood no Hekal, adihayay mikowanay pakidemay ko pipalak to finawlan no Kawas. O demak ita cowa ka itini aca i Towic, makeceng no Naci, ano itinito i Australia, Kanata ato roma kitakit makecengay. Samanayto ko teloc hani? Tiya mifekad ko Saka Tosa Lalood no Hekal i 1939 miheca, 72,475 ko mitosilay. Kawra, tahinito 1945 miheca mahererek ko lalood i, polong no hekal 156,299 ko mitosilay, tosaayto a tingloh ko ˈaloman no mitosilay! Soˈlinayto a palemeden ni Yihofa ko finawlan Ningra! w19.07 9 fiedac 4-5 fatac

Soˈlin awaay ko pacekiwan iso a tamdaw, wa ngaˈay mihadak to ˈicel padama to tamdaw malo Krisciyang. Tinakoen, ano ira ko faelohay tamdaw mirienang to saˈopo i, wa ngaˈay kiso mihamham a padama cingranan. Ciharateng kiso cingranan, wa mahapinang ningra iraay ko olah ita, o soˈlinay a Krisciyang. Roma i, pacaˈof kiso masaˈopo, soˈlin kantangay ko caˈof, o mamafanaˈ ko satapang sanayho mirienang to saˈopo a tamdaw, sasamaan mikitini falocoˈ ato mikangodoay a waywayan paihkal to pakasoˈlinan no niyah. Wa ngaˈayho kiso malacafay to misatapangay mitosil a tamdaw, padama cingranan misaka dademak to Fangcalay Cudad a masasowal to tao. Mihaen ko demak iso, o padamaay cingranan mitodong to taˈarawan ni Yis. (Luka 10:​25-28) Sapidimokosaw to kalimlaan a ˈinorong, ˈifowaay ko ˈalomanay Krisciyang, kawra kamayan ngaˈay mihadak to toki a misikay to pacekiway, hanaca mikitini milifok to taˈangayay a lipahak. w19.07 17 fiedac 11, 13 fatac

Ci Pawlo cowa ka pakayni saaroˈan ato raraw isalakat a makalisanga ko falocoˈ, mafanaˈay cingra ‘tatawalen ko salakatay demak,ˈ ngaˈ ‘misaˈicel a talaˈayaw,’ milahci to saka tahadaˈoc no ˈorip a cacikayen. Alatek o maanan a lalangian ko mamikalisanga to falocoˈ ni Pawlo hani? Saka 1, na ngaˈayay ko saaroˈan ni Pawlo i Yutaya tamdaw, kawra malo Krisciyang cingra i, malecaday o ‘hadecˈ sanay ko pinengneng ningra tonini. (Filipi 3:​3-8) Saka 2, na mikariˈangay ci Pawlo to Krisciyang, kawra cowa ka pakidem ko kakesem ningra a misawad midoko to Kawas. Saka 3, adihayayto ko tayal no niyah i Kawas, hamaanto padadotoc misaˈicel, cowa ka saan ko harateng ni Pawlo. Adihayay ko minaroˈan ningra a mitosil, na mapalitay, mipekpekan no tao ato tekolan to fakeloh, tahapadesay ko tamina, cangoˈotay ko rikoˈ ato kakaenen. (2 Korinto 11:23-​27) Nikawrira, ano hakowaayto ko malahciay a tayal ni Pawlo, miemem to adihayay roray, o papasayra i patosokan a comikay, wa mihaen ko hademak ita. w19.08 3 fiedac 5 fatac

ˈAlomanay salikaka soˈlin makeceng ko mitosilay i kitiraan nangra, caka ngaˈay pakalomalomaˈ anca pakapapotal a milasil to ngaˈayay lihaf, kawra kamayan cangra tano roma pakayraan a mitosil. (Matay 10:17-​20) Itini makecengay a kitakit, painiay ko kasakilac kantok to mitosilay, kalakilacen ko salawina, fiyaw, cafay micudad, cafay matayal ato kafanaˈan a tamdaw misongilaˈ a mitosil. Telocto lalomaˈ no tosa miheca, matongalay ko kasakopang i kasakilac. Cowa ko makecengay ko kilac ita, wa ngaˈay kita mahecad toniya salikaka, mikilim to pakayraan misongilaˈ a mitosil, o papafelien ni Yihofa kita to ˈicel, padama kitanan miremo to kihcod a saconged. (Filipi 2:⁠13) Macalohay ko toki nohatini, saˈosien ita ko falocoˈ mihapinang to masakalimlaan a demak, makorac awa ko kadit, aka pakapolin to tao, ciheci to minaroˈan no moecelay. Mihaen ngaˈ mamatomes ko olah i falocoˈ no mita, paˈdil to ciolahay a Wama ci Yihofaan. w19.08 13 fiedac 17-18 fatac

Cowa koya mapiliˈay mitengil to sowal no tao a tamdaw. Oya ‘patadoay miharateng to tao, iraay ko no salikaka a olah, siniˈadaay ko falocoˈ misapoeneray ko falocoˈ’ a tamdaw ko kaolahan no mita. Samanen malacafay cangranan wa lipahak ko falocoˈ ita. (1 Pitiro 3:8) Ano misaˈicel kita palahad to misapoeneray a capeling, o mamaolah ko tao micawmaˈ kitanan. Ano iraay ko misapoeneray a capeling ita i, wa madolo a misaysay to pasangaray. Itini kaˈorip ita, adihayay ko cowa ka sadafdaf a demak, nolatekay malitemohay ita ko hatiniay a demak. Soˈlinay i, iraay ko inaneng a tamdaw cowa ka itini i matatodongay a saaroˈan alatek, kawra oya awaay ko inaneng a tamdaw i, micadaay to adihayay a sapahemek. Somowalayho ci Solomon, citanengay a pakayraan i, wa micada anca misiˈayaw to cowa ka masadafdaf a demak, cowa ko mamararid a ngaliwngiw a miharateng. (Patnakay 6:9) Ano malo misapoeneray a tamdaw kita, soˈlin o kaˈorip ita adihayay ko pasangaray, cowa ko tatatiih ko falocoˈ. w19.09 4-5 fiedac 9-10 fatac

Iraay ko fadangalan no malo wamaay, iraay ko toki nangra misaka dademak to fadangalan palemed to tao. Ci Yihofa pala tawkian no lomaˈ ko malo wamaay, mitokel cangranan misongilaˈ pasifanaˈ to wawa. (1 Korinto 11:3) Kawra, citolasay ko fadangalan no malo wamaay. O likakawa no lomaˈ ci Yihofa ko patirengay, mihaenay wa tano kaolahan ni Yihofa a pakayraan micada to paro no lomaˈ cangra. (Ifiso 3:​14, 15) Ano midoedo ko malo wamaay ci Yihofaan, wa misongilaˈ misaka dademak to fadangalan, pakahemek ci Yihofaan. Hamaan patelas misaka dademak to sapafeli ni Yihofa tisowanan a fadangalan, ano mararaw ko demak makahi a mihai, micadaho to mikitiniay i Fangcalay Cudad a salimoˈot no tao. Ano mihaen ko demak iso, pakayni misapoeneray a taˈarawan iso, wa mikangodo ko paro no lomaˈ tisowanan. Ano mikayat kiso to paro no lomaˈ a mitolon i, hadaken ko nai falocoˈay a harateng pasowal ci Yihofaan, mihaen mikitini satolon iso, wa mahapinang no paro no lomaˈ, makalimay kiso milifok to sapadama ni Yihofa. Sakakaay i, misaareteng kiso i nokaˈorip to pidoko to Kawas. (Limoˈot 6:​6-9) Misaˈicel kiso midoedo to Kawas, patireng to ngaˈayay taˈarawan, o saka ciepoc no paro no lomaˈ. w19.09 15 fiedac 8 fatac; 17 fiedac 14 fatac; 18 fiedac 16 fatac

Makahiyay ci Marko matayal saki taoan. marariday cingra kalacafay ci Pawloan aci Pitiroan a dademak, patado cangraanan a milimasmas to kakaenen ato kitiraan. (Dmak 13:​2-5; 1 Pitiro 5:​13) Sowal ni Pawlo, ci Marko, o ‘mikapotay takowanan a matayal, pakayni i Hongti Kitakit no Kawas a misaˈicel,ˈ hanaca ‘patanektekayˈ cingraanan. (Kolosay 4:​11 ato roma pihongyak.) Maedeng itini saka 65 miheca, sakina tosa ni Pawlo a marofo i Loma i, patikamiay ci Timotian to saka tosa a tikami, palimoˈot cingraanan mitaaw ci Markoan tayra i Loma. (2 Timoti 4:​11) Tada masemeray ci Pawlo to kamadimadi ni Marko a dademak, mansa toya karorayan a tatokian, mitokelay ci Pawlo pacafay ci Marko i tihi ningra. Pacafayay ci Marko ci Pawloan, misaday to kakaenen anca sapitilid to tikami a lalosidan. Tada o ngaˈayay a widang ni Pawlo ci Marko, itini sadama ato pakalalok ningra, ngaˈayay ci Pawlo tahatolas a miemem, tahira i kapatayan ningra. w20.01 11 fiedac 12-13 fatac

Malo Krisciyang, kalimlaan ita ko malalokay ato kinafalahay a harateng. Roma i, na somowalay ci Yis wa palaken no tamdaw kita. Kawra wa ngaˈay pakasoˈlin kita, papafeli ci Yihofa kitaanan to ˈicel, ho ngaˈay kita miemem to pasangaray. Padadotoc kita a miemem, wa matongal ko katanektek. (Yakop 1:​2-4) Wa ngaˈayho pakasoˈlin kita, papafeli ci Yihofa kitaanan to kihcod a saali no mita, papakaenen ni Yis kita, papakalaloken no salikaka kita. (Matay 6:​31-​33; Yohani 10:14; 1 Tisalonika 5:​11) Oya miadahan ni Yis a fafahiyan, maedeng taˈangayay ko hemek toya romiˈad. (Luka 8:​43-​48) Kawra oha mamadimadi cingra a mihakelong ci Yisan ngaˈ, milifok to tahadaˈocay a sasayar. Ano maolah cingra mitamorong to taloˈodan ni Yis, wa ira ko toki tayra kakarayan malacafay ci Yisan matayal, ano mihaen, soˈlin kinafalah cingra, iraay ko epoc. O tokel ita ano tatayrato i kakarayan anca itini fafekang no sera tahadaˈoc ko ˈorip, micada kita to satahidang ni Yis tayra cingranan, tada o lalipahak noikor! w19.09 25 fiedac 21-22 fatac

Misaaliay to sapadama ko sikawdan ni Tafiti, papihadakan nangra ci Napal to kakaenen. Mihadak cangra toniya saali, samanen midipotay cangra to siri ni Napal. Cihafayay ci Napal, ˈarawhan cowa pisikol ci Napal, tangsol sa minaˈay tada o maˈidiay a tamdaw cingra. Mangolaway ci Tafiti sapipatayaw ci Napalan ato polong no paro no lomaˈ ningra a faˈinayan. (1 Samuil 25:​3-​13, 22) O fafahi ni Napal ci Apikail, makapahay cingra, citanengay a tamdaw cingra. Timoloay cingra mikilim ci Tafitian a mipitoros i ˈaˈayaw ningra, mingitangit aka mariˈang mipatay to tamdaw. Madaˈmaˈan ni Apikail pasowal ci Tafiti a pakasoˈlin to papadama ci Yihofa cingranan. O misapoeneray a sowal ato waywayan ningra mitemeray to falocoˈ ni Tafiti, mahapinangto, o Kawas ko miocoray cingranan tayni mirikec takowanan. (1 Samuil 25:23-​28, 32-​34) Ci Apikail palahadan ningra ko makapahay a capeling, mansa misakadademakan no Kawas cingra. Mihaenay i, ano citanengay ko waywayan no fafahiyan salikaka, madaˈmaˈ ko sasowalen, wa sakadademaken ni Yihofa pakalalok to paro no lomaˈ ato kasakopangay a tamdaw.​—Titus 2:​3-5. w19.10 23 fiedac 10 fatac

Misaaliay ci Yihofa to midokoay Cingranan a tamdaw miliyas to ‘Taˈangayay Papilon.’ ˈAyaw no minanam to soˈlinay kimad ko pacekiwan itiniay i roma a pihakelongan, mirienangay cingra to pisalisin ato demak no kiyokay, pakiyahoay to kiyokay alatek. Ano sakairaaw no tatodong ningra micada to paputisem, oha mamiliyas to mararaway a pihakelongan. Wa patikami anca roma pakayraan paihkal cowato ka masalalomaˈ no kiyokay ato milingatay to ‘Taˈangayay Papilon’ a lekakawa ko niyah. O soˈlinay Krisciyang cowa ko ngangaˈay matayal to milingatay to ‘Taˈangayay Papilon’ a tayal, tinakoen, malo mawmahay no kiyokay. (2 Korinto 6:​14-​17) Hano pairaen ita ko tanektekay a saaroˈan hani? Samanen pinengneng no Kawas to ‘Taˈangayay Papilon’ o cikaditay, cowa ko mamiladaˈ kita to raraw ningra.​—Isaya 52:11. w19.10 12 fiedac 16-17 fatac

Cowa ko Yirimiya aca a cudad, mitilidayho ci Yirimiya to saka 1 Hongti ato saka 2 Hongti alatek. Oniya tayal maedeng mahapinangay ningra to siniˈadaay ci Yihofa to cowa kalefot a tamdaw. Tinakoen, soˈlin adihayay ko midemakan ni Ahap a mariˈangay a demak, kawra pasasiyoray cingra, cowa ka paˈarawen ni Yihofa cingra to kalaˈafo no polong a finacadan. (1 Hongti 21:​27-​29) Roma i, cowa pidofdof ci Manasi ci Yihofaan, midemakay to ikakaay ci Ahapan ko tatiih a demak, kawra pakayni ka soˈlin ningra a pasasiyor, misododan ni Yihofa cingra. (2 Hongti 21:​16, 17; 2 Rayray 33:​10-​13) Mihaenay, malecaday ci Yihofaan a mihadidi ci Yirimiya, makahi a misodod to tamdaw. Iraay ko cecay liyad, cowa paisalakaten ni Paruk ko tayal no Kawas, samanan ni Yirimiya padama cingra hani? Awaayto ko kapo ni Paruk cowa kahaen ko piharateng ni Yirimiya, palihafan ningra koniya widang to sidaˈitay ihkalay a limoˈot no Kawas.​—Yirimiya 45:​1-5. w19.11 6 fiedac 14-15 fatac

Mikitini i Lifi mananamay ita, pacakat to Sakarihaday Sapatoˈaya ko Israil i ‘pakayniay piakoˈid.ˈ (Lifi 7:​11-​13, 16-​18) O hatiniay sapatoˈaya cowa ko mikitiniay ˈinorong, o naitiniay miakoˈiday. Matayal kita ci Yihofaan malecaday o parihadayay a sapatoˈaya, o sangaˈayay ko patoˈayaan ci Yihofaan, samanen misarocoday kita a maolah Cingranan. Maˈaraw ni Yihofa ko pinaay soˈot efan a tamdaw pakayni kaolah Cingranan ato palinian Ningra a midoko Cingranan, maedeng lipahakay. Misaaretengay ci Yihofa to tayal ita, kawra ikakaay misaaretng to araaw ita a midoko Cingranan. Ano o matoˈasay a Krisciyang kiso, latekay cangˈotay ko ˈicel saan miharateng, ngaˈayay rihaday kiso, cipinangay ci Yihofa to tolas no ˈicel iso. Miharateng kiso cowa ka hakowa ko midemakan, mafanaˈay ci Yihofa to tangongolay ko olah iso Cingranan hanaca misaˈicelay a midemak, o mamahemek Cingra pacakat kiso to sangaˈayay Cingranan. w19.11 22 fiedac 9 fatac; 23 fiedac 11-12 fatac

Patatodongen ita ko tayal, ato pipahanhan. Sanay ko sowal ni Solomon: ‘Ano o maananto a demakan, iraay ko masaˈosiay a toki.’ Dotoc somowalay to paloma, patireng, tomangic, matawa, makeroay a demak. (Patnakay 3:​1-8) Mahapinangay ita, itini kaˈorip no mita, masaka limlaan ko tayal ato pipahanhan. Matatodongay ko pinengneng ni Yis to tayal ato pipahanhan. sowal sa ci Yis ‘tata, tayra kita i awaay ko adeses a kitiraan pahanhan.ˈ (Marko 6:​30-​34) Soˈlin cowa ka songilaˈ ko pipahanhan ni Yis ato tarokos, kawra mafanaˈay ci Yis mikilim to toki a pahanhan o masaka limlaan. Latekay, misaaliay kita to sapahanhanaw anca mifalic to pakayraan a maˈorip. Mikitini nolitengan Israil tamdaw midofdof to Paselaˈan Romiˈad, mahapinangay ita o masaka limlaan ko pahanhanay. Soˈlin cowato ko mamidofdof kita to Rikec ni Mosi, wa ngaˈay mikitini saˈosi no Paselaˈan Romiˈad a minanam. w19.12 3 fiedac 6-7 fatac

Mikiˈokay ci Yihofa to mamidipot to madimadiay a sikawdan Ningra, mansa iraay ko ˈinorong no Niyah a mitoor to sakiˈok saan miharateng. (ˈOlic 31:​1-3) Roma i, o paro no lomaˈ ni Yihofa kita, mafanaˈay Cingra ano eca ka pidipot Cingra kitaanan, wa matoled kita. Ano mikiˈokay Cingra to papafeli to sakaˈorip ita, padama kitaanan tahatolas ko madimadi, o mamatoor Ningra a midemak. (Matay 6:​30-​33; 24:45) Ano haratengen ita to hano mitoor ci Yihofa to sakiˈok, wa pakasoˈlin to papadama Cingra kitaanan miremo to pasangar no kaˈorip. Haratengen ko saka 1 hahekalan a Krisciyang, pakidemay ko macadaay a sapalak no Yirusalimay a kasakopang, denganto ko tarokos, maliwasakay ko polong a tamdaw tayra i roma pala. (Dmak 8:1) Awaay ko sakaˈorip nangra, ato lomaˈ, pasangaray ko kaˈorip. Kawra cowa ka liyasen ni Yihofa cangra, cowa pakidem ko katoled nangra. (Dmak 8:4; Hipray 13:​5, 6; Yakop 1:​2, 3) Na midipotan ni Yihofa koniya madimadiay Krisciyang, oha mamidipot kitaanan.​—ˈOlic 37:18, 19. w20.01 17-18 fiedac 14-15 fatac

Sapidipotaw ci Tafiti to siri no wama, na mipatayay to layong ato tomay. Mafanaˈay cingra padamaay ci Yihofa, mansa ngaˈay mipatay to mariˈangay ˈaˈadopen. Tiya mapadik ni Tafiti ci Koliyat i, pakasoˈlinay to kalacafayan ni Yihofa cingra. (1 Samuil 17:37) Ikor no milaliw ci Tafiti to pipatay ni Sawlo i, miakoˈiday cingra to pidipot no Kawas cingraanan. (ˈOlic 18 fedengan a lalangian) O misatakalaway a tamdaw o papanokay to kasapaan i niyah alatek, kawra tada misapoeneray ko falocoˈ ni Tafiti, mahapinangay ningra to padadotocay ci Yihofa a padama cingraanan. Mananamay ita ko maanan? Tatodongen ita ci Tafiti, cowa ko pitolon aca micangacang to sadama ni Yihofa, wa misaˈicelho mihapinang to hacowaay ato tano maanan a pakayraan Cingra a padama kitaanan. Ano misapoener ko falocoˈ ita a mihai to citolasay ko ˈicel no niyah, wa ihkalto a mahapinang ko pipadama ni Yihofa to kacangoˈotan no mita, wa matongal ko kakelec no kalalaˈed ita Cingraanan. w19.12 20 fiedac 18-19 fatac

Adihayayho ko mamisawacay to misaaretengay ci Yihofa minengneng kitaanan. Mahapinangay Ningra to maolahay kita to ngaˈayay a lihaf, mansa misolot kitaanan tayni i tatihi Ningra. (Yohani 6:​44) Ingiden ita Cingra, wa ingiden Ningra kita. (Yakop 4:8) Cipinangay Cingra to waywayan ita, mafanaˈay to hakowaay ko ˈicel ita, mansa adihay ko mihadakan a toki ato ˈicel a pasifanaˈ kitaanan. Maolahay Cingra kitaanan, mansa mirikec kitaanan. Soˈlinay misaareteng ci Yihofa minengneng kitaanan! Na misakahmawan no tao a minengneng ci Tafiti, kawra mafanaˈay cingra to maolahay, midamaay ci Yihofa cingraanan, hato matatodongay ko pinengneng ningra to malifaay no niyah. (2 Samuil 16:​5-7) Ano matoled ko falocoˈ anca tahapades kita i, wa ngaˈay ci Yihofa padama kitaanan malo tawlikay, ira ko ˈicel a miremo to masakenaay a pasangaray. (ˈOlic 18:​27-​29) Ira ko sadama ni Yihofa, oha ngangaˈay lipahak kita a midoko Cingraanan.​—Loma 8:​31. w20.01 15 fiedac 7-8 fatac

ˈAyaw no malalengo mitolonho. Ano miceridayto minanam ko pacekiwan, sangaˈayay kahenay mitolon i pisatapangan anca i kahererekan a micekiw. Padamaen ita ko pacekiwan mihapinang dengan o sadama no fangcalay saocor ngaˈ cipinang cingra to Kimad no Kawas. O roma singsi miˈosiay to Yakop 1:5 a sinael sanay: ‘O cima namo cangoˈotay to taneng, ka padadotoc a micangacang to Kawas.’ Ikor licayen ko pacekiwan: “Ano sakairaaw no taneng ita i, wa samaan ko hademak ita hani?” Mihayay ko pacekiwan to kalimlaan ko mitolonay. Pasifanaˈen ko pacekiwan samaanen mitolon. Pasowalen ko pacekiwan, ci Yihofa makalimay mitengil to nai falocoˈay a sowal ningra, itini tekedan a pitolon i, ngaˈayay mifowah to falocoˈ a pasowal ci Yihofaan. Cowa kakahi cingra a pasowal to tao alatek, kawra ngaˈayay itini satolon pasowal ci Yihofaan, samanen cipinangay ci Yihofa to ikemoday no falocoˈ ita a harateng.​—ˈOlic 139:​2-4. w20.01 2 fiedac 3 fatac; 5 fiedac 11-12 fatac

Iraay ko fadangalan ni Yihofa misaˈosi to hacowa tano fangcalay saocor minilnil to tamdaw. (Loma 8:​28-​30) Patikol maˈorip ci Yis i, misatapangayto ci Yihofa mihaen to demak, itini saka 1 hahekalan a Krisciyang sahtoay o minilnilan no Kawas tano fangcalay saocor. Ikorto halafinay tatokian, ˈalomanay misa o Krisciyangay kako sanay a tamdaw cowa pihakelong ci Yisan, kawra toniya liyad minilnilayho ci Yihofa to soˈlinay a Krisciyang, oniya Krisciyang mahecaday o misowalan ni Yis, malacafayay to fadoc a romahad a panay. (Matay 13:24-​30) Itini salikoray a lintad, wa padadotoc ci Yihofa a minilnil to tamdaw, masa lalomaˈ no 144,000 a tamdaw. Mansa ano misaˈosiay ci Yihofa i ˈayaw no salikoray romiˈad a minilnil to cecay tamdaw i, cowa ko cacisasa kita to misaˈosian Ningra. (Loma 9:​11) Sasinanoten ita, aka mahecad i tinakoan ni Yis a mawmahay tamdaw, ngaliwngiw to tawki mikangaˈay toya cecay aca ko toki matayal a tamdaw.​—Matay 20:​8-15. w20.01 30 fiedac 14 fatac

Mitokelay ci Yihofa lipahak ko wawa Ningra. Soˈlin tahalifa to pasangaray, adihayay ko lalangian ita a lipahak. Tinakoen, pakasoˈlinay kita to tangongolay ko olah no kakarayan Wama kitaanan. Cipinangayho kita to soˈlinay kimad no Fangcalay Cudad. (Yirimiya 15:16) Masalalomaˈay no taˈangayay paro no lomaˈ kita, o salikaka sahtoay o maolahay ci Yihofaan ato ˈakawangay a palinian Ningra, masasiolahay a maemin. (ˈOlic 106:​4, 5) O roma sakalipahak ita a lalangian i, iraay ko hatokel makapah ko kaˈorip no ikor. Cato ka halafin, papalahdawento ni Yihofa ko kihcod tatiihay tamdaw ato demak. Itini pikowan no Hongti Kitakit, malo Lakoing koniya cikiw. Iraayho ko tokel ita malalitemoh to mapatayay salawina, samanen o papatikolen ni Yihofa paˈorip cangra. (Yohani 5:​28, 29) O tataˈangay ko lipahak ita itiya! Sakakaay sakahemek ita i, polong a coyoh ato tamdaw wa midoko to sidaˈitay a Wama i kakarayan, panokay to pikangodo ato pakahemek Cingraanan! w20.02 13 fiedac 15-16 fatac

Ano pakidemay ko raraw iso, aka a mihimed, tolonen ci Yihofa, mihai to raraw Cingraanan, mihaen o rarihadayto ko falocoˈ iso. Kawra, sapisalofaw to kalawidang ci Yihofaan, wa midemakho kiso to roma a hademak. Micada to sapirikec. Tiya ocoren ni Yihofa ci Natan patasekal to raraw ni Tafiti i, cowa pikilim ci Tafiti to sapaˈading to niyah, cowa ka ciharateng to mamangay ko raraw no niyah. Tangsolay cingra a mihai to pakararaway ko niyah to faˈinay ni Patsipa, mangalef pakararaway ci Yihofaan. Micadaay ci Tafiti to sapirikec ni Yihofa, mansa sododen ni Yihofa cingra. (2 Samuil 12:10-​14) Ano pakidem ko raraw ita, cangacangen ko sadama no minilnilan ni Yihofa a malohemay malitengay. (Yakop 5:​14, 15) Aka pikilim to lalangian a miˈading to raraw no niyah. Kalikien ita micada ko sapirikec misaˈicel a misalof, mihaen ngaˈ patikol a rihaday lipahak ko falocoˈ. w20.02 24-​25 fiedac 17-18 fatac

Oya ‘moetepay tamdawˈ itiniay fafekang no sera tahadaˈoc maˈorip a tamdaw, mahapinangay nangra palemedan ni Yihofa koya manilnilay a tamdaw, o masowalay no sinael a Yutaya tamdaw, ngaˈay malacafay cangraanan a midoko to Kawas o kalikoan a demak. Anini, itiniay i fafekang no sera ko tokel a tamdaw, soˈlin cowa ka fanaˈ to polong a minilnilan no fangcalay saocor no Kawas a tamdaw, kamayanho mikotod cangraanan ‘malacafay malingad.’ O maanan ko tatodong nonini hani? Masowalay no sinael ko ‘cecay Yutaya tamdaw,’ dotoc somowalay to ‘kamo,’ paihkalay konini o ‘Yutaya Tamdawˈ mitaypiyaway to cecay ˈopo, oya polong manilnilay a tamdaw ko mitoroˈan. Itiniay fafekang no sera ko tokel a tamdaw malacafayay to manilnilay a tamdaw midoko ci Yihofaan, kawra cowa ko ˈaˈideman saan ko pinengneng nangra toniya tamdaw, samanen mafanaˈay cangra dengan ci Yis ko ˈaˈideman.​—Matay 23:10. w20.01 26 fiedac 1-2 fatac

Sowal ni Yis, ano ira ko malecaday o ningra a ciolahay falocoˈ no nisawawaan ningra, wa mahapinang no tao to soˈlinay a Krisciyang cangra. Malecaday o saka 1 hahekalan anini. Mihaenay, soˈlin tahasiˈayaw kita to pasangaray, wa padadotoc a masasiolah, kalimlaan mihaen to demak! Haratengen, “O masowalay no lalakaw a salikaka soˈlin misiˈayaw to pasangaray, padadotocayho a maolah to tao, wa samaan kita a minanam cangraanan hani?” Cowa kalefot ko kahacecay tamdaw, fanekfek a msasiolah cowa ko madoloay no latekay, kawra o mamisaˈicel kita malecad ci Yisan a paihkal to olah. Sowal ni Yis, ano iraira ko katatiihan no salikaka kitaanan, talaˈayaw kita a micowat to rihaday tada kalimlaan. (Matay 5:​23, 24) O misowalan ningra i, ano sapakahemekaw kita to Kawas, o rarihaday to tao. Ano maˈaraw ko pisaˈicel ita mararihaday to salikaka, wa mahemek ci Yihofa. Kawra ano padadotoc a maketer kita, caka malakangaˈay to salikaka, cowa ko mamicada ci Yihofa to pidoko no mita.​—1 Yohani 4:​20. w20.03 24 fiedac 1-4 fatac

Mikitini lintad ni Atam aci Ifa tahanini, ‘o wama no misamangahayˈ ci Satan padadotocay milipalaw to tamdaw. (Yohani 8:​44) O mangah ningra mahawpay ko milingatay to patay a mararaway kimad. O kafanaˈan no ˈalomanay tamdaw a nanaman ato paysin mikitiniay a masadak. Hano ˈaloman ko malipalaway a tamdaw hani? Misangaˈ ko Kawas to tamdaw i, pairaay to kalim no tamdaw tahadaˈoc a maˈorip. (Patnakay 3:​11) Awaay ko sakapatayaw a tamdaw. O patay malecaday o ˈada no tamdaw. (1 Korinto 15:26) Mafanaˈay ci Satan to pinengneng no tamdaw to patay, mansa saka dademaken ningra konini misangaˈ to adihayay a mangah. Soˈlin padadotoc ci Satan misamangah, o tatodong no patay cowa ka mahimed. Palalinien to salakatay, mafanaˈayto ko ˈalomanay tamdaw to tatodong no patay, mitooran nangra ko Fangcalay Cudad pasowal to tamdaw samanay ko patay ato hatokel no mapatayay tamdaw. (Patnakay 9:​5, 10; Dmak 24:15）O soˈlinay kimad no Fangcalay Cudad ngaˈayay mihinom to tamdaw, ecato ka matalaw ato macariraw kita to patay. w19.04 14 fiedac 1 fatac; 15 fiedac 5-6 fatac

Tangongolay ko olah ni Yihofa to finawlan Ningra, wa tahadaˈoc a maolah cangranan. Maolahayho Cingra to masadafdafay. (ˈOlic 33:5) Mihaenay i, pakasoˈlinay kita to: (1) Maˈaraw ni Yihofa ko malifaay no sikawdan Ningra to cowa ka sadafdaf a demak i, adadaay ko falocoˈ. (2) Ci Yihofa wa misaysay to cowa ka sadafdaf a demak. O pafelian no Kawas to Israil a sarikec, tano olah ko taˈeneran, misaˈicelay ko Rikec tano masadafdafay a micada to tao, mikiriwiˈay toya awaay ko ˈicel midipot to niyah a tamdaw. (Limoˈot 10:18) Paihkalayho ko Rikec ni Mosi, ci Yihofa ciharatengay toya midokoay Cingranan a tamdaw. Tomireng ko kasakopang no Krisciyang i saka 33 miheca i, cowato ko mamidofdof ko Krisciyang to ciolahay ato masadafdafay a Rikec ni Mosi, ano hatiraay wa awato ko sadipot hokira? Cowa ka mahaen, samanen iraayto ko faelohay a rikec no Krisciyang. O mamidofdof ko Krisciyang to Rikec ni Kristo. Soˈlin cowa tiliden ni Yis ko rikec to dadofdofen no nisawawaan, kawra pakaynian ningra i limoˈot ato safalod a mikayat ko nisawawaan. O Rikec ni Kristo mahawpay ko kihcod a sapasifanaˈ ni Yis a kimad. w19.05 2-3 fiedac 1-3 fatac

Ano o cimato misaaliay to sahinom, ngaˈayayho mihinom to tao. Tinakoen, o cecay mihalamaay a wawa, mapolinay madokaˈay ko toros ningra, alatek tangsolsa cingra mikilim to wama wina misaali to sasayaren. Soˈlin caka tangsolsa maadah ko dokaˈ ningra, kawra ngaˈay sayaren no wama wina ko wawa. Alatek licayen kora wawa mamaanay aki, anca patado misisit to losaˈ, madaˈmaˈ a midadimaw cingranan a misayar, anca mitafo tora dokaˈ. Ikor cowato ka tomangic, miliyaw aca mihalama. Palidlid sato maadah koya dokaˈ. Nolatekay, macadaay no wawa ko pakidemay a sakasomad, mangalefay ko mikaˈodangan a wawa. Cowa kina cecay aca, ao halafinay cangra a makariˈang. Ano hakowato ko mataˈlifay a toki, o dokaˈ nangra pasangaray a maadah. Soˈlin malepelto ko mariˈangay tamdaw, micada to sasayfang, kawra cowa ka sayfang ko roma tamdaw. Nikawrira, soˈlin mapalit ko mariˈangay tamdaw, o dokaˈ i falocoˈ no mikaˈodangan a wawa, matoˈasto kamayanay a adada ko falocoˈ nangra. w19.05 14 fiedac 1-2 fatac