Saka 11 Folad

Anini, misao citanengay noni hekal a tamdaw matawaay to noka pinengneng no Fangcalay Cudad, ano ikakaay ko tao to niyahan ano han i, mamasamsam no tao sanay. Kawriraan, misatekeday a waywayan noni hekal ni Satan pairaay to manan a telocan hani? Ano nengnengen iso, o misatekeday a tamdaw soˈlinay lipahak cangra han? Iraay ko rahekeray a paro no lomaˈ, iraay ko soˈlinay widang han? Iraay ko makedecay no kalalaˈed nangra ato Kawas han? Samaanay ko harateng no miso, mitiˈer to taneng no hekal anca taneng no Fangcalay Cudad, icowaay ko soˈlinay milifok to epoc hani? (1 Korinto 3:​19) Oya mihakelongay to misao citanengay tamdaw noni hekal, malecaday o mafokilay to lalan a tamdaw milicayayto mafokilay to lalan a tamdaw to pakacowa a romakat. Sanay somowal ci Yis toya misao citanengay i lintad ningra, sowal sa: “O mapohaway a mikeriday cangra. Ano keriden no mapohaway ko mapohaway i, o mamatefad i refong a tatosa.” (Matay 15:14) O taneng no hekal tada o mafolaay sanay ko pinengneng no Kawas. w19.05 24-​25 fiedac 14-16 fatac

Ingata, matongalay ko ˈaloman no komaenay to epang ato epah itini Piharatengan a Saˈopo. Oha cacalemcem kita toniya demak han? Cowa. Mafanaˈay ci Yihofa to tamdaw Ningra. (2 Timoti 2:​19) Mafanaˈay ci Yihofa o cimacima ko tatayra i kakarayan, kawra itini Piharatengan a Saˈopo o miˈosiay to komaenay to epang ato epah a salikaka cowa kafanaˈ cangra. O roma tamdaw na komaenay cangra to epang ato epah, kawra ikorto cowato ka komaen cangra. O roma tamdaw i, o masasifoday ko harateng ato falocoˈ alatek, o tatayra kako i kakarayan malacafay ci Kristoan a mikowan sanay. Mihaenay i, o kaˈaloman no komaenay to epang ato epah a tamdaw mahawpay ko hatiniay a tamdaw. Mihaenay cowa ka fanaˈ kita hakowaay ko maˈosaway to manilnilay no fangcalay saocor no Kawas a tamdaw to maˈoripayho i hekal. Ano ira ci Yis i taˈangayay padiing a romiˈad i, itini hekal wa iraho ko minilnilan no fangcalay saocor no Kawas a tamdaw. O sowal no Fangcalay Cudad, itini salikoray a romiˈad, itini hekal wa iraho ko manilnilay a tamdaw. (Paˈarawan 12:17) Cowa ka somowal ko Fangcalay Cudad, satapang ko taˈangayay padiing i, wa hakowa ko maˈosaway no mahaenay a tamdaw. w20.01 29-​30 fiedac 11-​13 fatac

Na patinakoay ci Yis to malafelay a wawa mitadtad to o sidaˈitay a Wama ci Yihofa. (Luka 15:​11-​32) Itini sapatinako, halamham sanay koya wama minokay ko wawa. Ikor minokayay koya wawa, matomesay ko damsay noya wama a mihamham cingraanan. Ano na mararaway ko demak ita i, pasasiyorayto nohatini, wa ngaˈay rihaday ko falocoˈ ita, o sidaˈitay a Wama i kakarayan o mamahemek a micada kitaanan. Saikor o papalahedawen no kakarayan Wama ko pairaan ni Atam a kihcod a dokaˈ no mita. Ikor no mitowakang ci Atam, misaˈosiayto ci Yihofa to mamalacafay ko 144,000 tamdaw ci Yisan mala hongti ato saysi i kakarayan. Itini faelohay hekal, ci Yis ato 144,000 tamdaw wa padama to midofdofay a tamdaw patikol a malefot. Dotoc, o patikolay malefot a tamdaw wa tahalifa to saikoray a sapalifet, ano madimadi cangra to Kawas, papafelien no Kawas cangra to tahadaˈocay a ˈorip. Itiya, o maˈaraway no kakarayan Wama i fafekang no sera a tamdaw sahtoay o malefotay a wawa Ningra, maedeng o lalipahak. Tada fangcalayto konini! w20.02 6-7 fiedac 17-19 fatac

Lalicayen ko niyah: “Pakayni i sakala Krisciyangaw, na misaˈicelay kiso mifalic to maanan? O papotal aca ko mafalicay han? Anoca, halo i kemoday no falocoˈ iso ko mafalicay?” Taˈangayay ko kasasiroma nonini. Itini i Matay 12:43-​45 pasowalay ci Yis kitanan to cecay kalimlaan a kimad: O pifalah aca to mararaway harateng cangoˈotayho, o tatomesen ita i ponoˈ ko mihaydaan no Kawas a harateng. Wa soˈlin ngaˈay kita mifalic to i kemoday a falocoˈ ato pakayraan miharateng han? Sowal no Fangcalay Cudad: ‘Safaelohen ko falocoˈ namo. Caˈedongen ko faelohay a capeling, oya mihecaday to capeling no Kawas a masangaˈay. Mapahapinang ko moecel ato madimadiay.’ (Ifiso 4:​24) O ngangaˈay mafalic ko i kemoday a falocoˈ, kawra cowa ko madoloay. Cowa ko piˈimer aca to mararaway a coos, misawad to mararaway a waywayan, oha sasafaelohenho ita ko i “kemoday a falocoˈ, o pakayraan ita a miharateng. Sapifalicaw to kalim no i kemoday a falocoˈ”, harateng ato araaw no falocoˈ, o papadadotoc a misaˈicel ngaˈ ngaˈay. w19.06 9-10 fiedac 6-7 fatac

Siniˈadaay ci Yihofa ci Lotoan, miocor to coyoh milidong cingranan ato paro no lomaˈ. Nikawrira, ci Loto ‘minayaray caka romakat.’ Orato tengteng hananay no coyoh ko kamay nangra, mikerid cangranan miliyas toya niyaroˈ, palimoˈot cangranan milaliw tayra i lotok. (Satapangan 19:15, 16) Kawra cowa ka sakatayraaw ci Loto, milongocay ci Yihofaan milaliw tayra i ngataay a niyaroˈ. (Satapangan 19:17-​20) Mihadidiay ci Yihofa a mitengil to pilongoc ni Loto, mihai to saali ningra a midemak. Ikor matalaway ci Loto, malinahay tayra i misaˈosian ni Yihofa i salakat a lotok. (Satapangan 19:30) Tada mihadidiay ci Yihofa ci Lotoan! Alatek iraay ko salikaka mahecaday ci Lotoan, mararaw ko misaˈosian ira ko tatiihay a teloc. Ano mifekad ko hatiniay a demak, wa samaan ko demak ita hani? Sakahatini no demak, o cingra ko mifekaday wasa ko harateng ita alatek. (Kalatiya 6:7) Soˈlinay i, wa nanamen ita ko pakayraan ni Yihofa a padama ci Lotoan. w19.06 20 fiedac 3 fatac; 21 fiedac 4-5 fatac

Mikeceng ko ˈada to midokoay a demak ita, o sapatalawaw kitaanan, ho eca to pidoko ci Yihofaan. Cowa ko pihadak aca to sakeceng, payakayakayho cangra to tatiihay sowal no mita, miocor to dimeng a misolap to lomaˈ ita, pakokot kitaanan tayra i hoing, halo pipalit to salikaka i kapalitan. Harateng nangra maˈaraw ita mapalit ko roma salikaka, wa ciˈangi a talalikor sanay, ano matalaw kita, wa soˈlinto miconged to niyah a midoko to Kawas. Cowa ka olah kita malecad o milengoan no Lifi 26:36, 37 a tamdaw. Cowa ko mamihai kita pakayni i kakokiˈ a miˈesal, anca paselaˈ to midokoay to Kawas a demak, ao mamisarocod a mitadiˈec ci Yihofaan, cowa ko mamarawraw ko falocoˈ. (Isaya 28:16) Wa pasayra kita ci Yihofaan a mitolon, micangacang to sakayat Ningra. Ira ko sapadama ni Yhofa, ano samaanto taˈangay ko ˈicel no mikowanay, cowa ko papakaconged kitaanan a midoko to Kawas ita. O pisafelit cowa ko patalalikol kitaanan, wa mitongal to pisetek to falocoˈ a matayal saki Yihofaan. w19.07 9-​10 fiedac 6-7 fatac

Soˈlin awaay mahapinang ko ngaˈayay minaroˈan a mitosil, o papadadotoc kita mikilim to mamalo Krisciyang a tamdaw. Patinakoan ni Yis ko palo nisawawaay a tayal to mifotingay. Adihay ko mapalakay a toki no mifotingay ngaˈ iraay ko malepelay a foting, alatek misalafiiay anca pacelemay cangra a matayal, latekay tayraay i raay a mifoting. (Luka 5:5) Malecaday, sakangaˈayaw mitosil to ˈalomanay tamdaw, o roma Krisciyang itiniay cowa ka lecad a kilac anca toki mihadidi a “mifoting”. Samanen adihayay ko mihadakan a ˈicel, adihayay ko mahelaay no salikaka makalimay minanam to Fangcalay Cudad a tamdaw. Sapikilimaw to ˈalomanay tamdaw, sapitanamaw kiso itini cowa ka lecad a toki ato kitiraan a mitosil han? Pasifanaˈ to pacekiwan to Fangcalay Cudad hano misaali to mihadidiay hani? Samanen cowa ko padama aca ita to pacekiwan cipinang ato maolah to kimad no Fangcalay Cudad, papadamaenho cangra mafanaˈ ato maolah to pipowalan no Fangcalay Cudad a Yihofaan. w19.07 18-19 fiedac 14-15 fatac

Alatek pakayniay kita i salakatay a raraw, hato cikiyamay ko falocoˈ, sapiremoaw to hatiniay a harateng, wa ngaˈay kita micekiw to pakayniay sapatefoc a lalakaw pakalalok to niyah. Pakayni i picekiw, midotim ato mitolon, palidlid wasa kita miremo to makesemay a harateng, pakasoˈlin to misododay ci Yihofa kitaanan ecato ka kesem. ‘Mitawal to salakatay demakˈ mahawpay ko maanan hani? Sapitongalaw to tayal saki Yihofaan misawadan ita ko ˈakawangay ko lifon a tayal alatek. Ano mahaenay i, hamaanto a tangoˈol to misawadanto a dafong. (Saˈosi 11:​4-6; Patnakay 7:​10) Roma i, o ‘tatawalen a demakˈ mahawpay ko nano demak i likakawa no Kawas ato miememan a roray. Milomal kita to sapalemed ato sadama ni Yihofa wa padama kitaanan miingid to kakarayan a Wama, hamaan malitaˈang, maedengayto ko demak noniyah saki Kawas, aka haenen ko harateng.​—1 Korinto 15:58. w19.08 3 fiedac 5-6 fatac

Wa ngaˈay kita tano mangodoay a waywayan, micerid a mitolon to Kawas. Ci Yihofa cowa ko aawa ko toki mitengil to satolon no mita, ano hacowato midohingaay Cingra mitengil to sowal ita. Ano mahapinang ita mitengilan ni Yihofa ko satolon ita i, wa matongal a maolah Cingraanan. O mitiliday to ˈOlic sanay: ‘Maolahay kako ci Yihofaan, samanen mitengilay Cingra to ngiha no mako.ˈ (ˈOlic 116:1) Ci Yihofa cowa ko pitengil aca to satolon ita, pacaˈofayho kitaanan. Mikiˈokay ci Yohani kitaanan: ‘Ano tooren ita ko araaw no Kawas micangacang to maanan, oha tatengilen Ningra kita.’ (1 Yohani 5:​14, 15) Manaokaniw, o pakayraan ni Yihofa a pacaˈof, cowa kalecad o milongocan ita alatek. Mafanaˈay Cingra o maanan ko sangaˈayay no mita, mansa cowa pihai to saali no mita to latekay, anca papitala kitaanan to cecay liyad. (2 Korinto 12:​7-9) Mirenecay ci Yihofa to masakenaay a saali no mita. Sowal ni Yihofa o dadimokosen no wama ko wawa, patirengay Cingra to taˈarawan. (1 Timoti 5:8) Pafeliay Cingra to sakaˈorip ita, cowa ka ciharateng pakayni i kakaenen, rikoˈ ato kitiraan a cariraw kita. (Matay 6:​32, 33; 7:​11) O sidaˈitay a Wama ci Yihofa, oha papadadotoc Cingra a midimokos kitaanan no ikor. w20.02 5 fiedac 10-​12 fatac

Iraay ko tokel tayra i kakarayan a tamdaw cowa ka sahtosa o ‘madimadiay citanengay a koli. (Matay 24:45-​47) Saka 1 hahekalan, ci Yihofa aci Yis mimingay ko misaka dademakan a tamdaw pasifanaˈ to ˈalomanay tamdaw, papinaay aca ko micadaay to sakayat no Kawas a mitiliday to Kirisiya Fangcalay Cudad. Malecaday ko pakayraan anini, o minilnilan no fangcalay saocor no Kawas a salikaka cowa ka papina ko ciˈinorongay itini ‘matatodongay a toki,’ palilam to sapahaled to pakasoˈlinay falocoˈ a kakaenen i polong a finawlan no Kawas. Saˈosi ni Yihofa aitini fafekang no sera ko ˈalomanay finawlan tahadaˈoc a maˈorip, cowa ka ˈaloman ko mipiliˈan tayra i kakarayan malacafay ci Yisan a mikowan. Ano o ‘Yutaya tamdawˈ anca ‘moetepay tamdaw,’ milifokay maemin to sapalifon ni Yihofa. Oniya tosa ˈopo tamdaw wa midofdof to malecaday a palinian, oha tatahatolas a madimadi. (Cikariya 8:​23) Wa mitafo cangra to misapoeneray falocoˈ, micowat to rihadayay, makelec a malacecay. Mangataayto ko salikoray romiˈad, nanay ‘malo cecayay ˈopoˈ kita mihakelong ci Kristoan, malaˈafang a mihodop to Kawas.” w20.01 31 fiedac 15-​16 fatac

Soˈlin cowa kangaˈay paciecien ita ko paro no lomaˈ micada to ngaˈayay lihaf, kawra ngaˈayay padamaen ita cangra mifohat to falocoˈ mitengil to lihaf no Fangcalay Cudad. (2 Timoti 3:​14, 15) Ngaˈayay a waywayan mikikakaay to adihayay sasowalen. Palinien to sowal ita, o midemakan ita ikakaay ko pifiyor to paro no lomaˈ. Padadotocen a padama. Patirengay ci Yihofa to ngaˈayay taˈarawan ita, misaliyaliyaw pafeli to hatoki no tamdaw, mitengil to kimad Ningra a malidong ko ˈorip. (Yirimiya 44:4) Pasowalan ni Pawlo ci Timoti padadotocen a padama ko tamdaw. Misamaanay hani? Samanen mihaen to demak wa malidong ko niyah ato mitengilay a tamdaw. (1 Timoti 4:​16) Maolahay kita to paro no lomaˈ, mansa makalim saka fanaˈaw cangra to kimad no Kawas. w19.08 14 fiedac 2 fatac; 16-​17 fiedac 8-9 fatac

Haharateng no mita ano patalipaˈelal ko tao kitaanan, o manan ko sasalofen i, o pasangaray ita ikakaay to maharatengay no niyah alatek. Itiya cowa ka pitengil kita alatek, cowa ka olah to palimoˈotay a tamdaw, malikafayho to painiay a tamdaw. Kawra, ano misapoener ko falocoˈ ita i, mamisaˈicel kita misalof to harateng no niyah. Oya misapoeneray ko falocoˈ a tamdaw, wa naifalocoˈ a miakoˈid to limoˈot no tao. Tinakoen, ano itini i kasaˈopoan kiso a macacawmaˈ to salikaka, ikor pasowal ko cecay salikaka tisowanan, citingalay ko wadis iso. Tada mangodoay kiso, kawra wa miakoˈid kiso cingranan, hano caka kahenay a pasowal sanay ko harateng no miso. Mahecaday, itini i matatodongay a toki, ano timoloay ko salikaka palimoˈot tisowanan, sapoeneren ita a micada ngaˈngaˈay, halo miakoˈid to nano demak nangra. O widang no mita cangra, cowa ko ˈada.​— Taneng 27:5,​6; Kalatiya 4:​16. w19.09 5 fiedac 11-​12 fatac

Pafelian ni Yihofa ko malo winaay to kalimlaan a ˈinorong i paro no lomaˈ, ira ko fadangalan ningra pasifanaˈ to wawa. Soˈlinay i, tangongolay ko pifiyor no wina to hakelong no kaˈorip no wawa. (Taneng 22:6) O malo winaay a salikaka mikitini wina ni Yis ci Mariyaan, wa mananam ko maanan hani? Mananamay ci Mariya to sinael, tangongolay ko pikangodo ningra ci Yihofaan, tangongolay ko kalawidang Cingranan. Midoedo ci Mariya to Kawas oha mamafalic ko kaˈorip no niyah, kamayan cingra maolah a mihaen to demak. (Luka 1:​35-​38, 46-​55) O malo winaay a salikaka, itini maanan a pakayraan minanam to taˈarawan ni Mariya hani? Salakat, ngaˈay kiso pakayni picekiw to Fangcalay Cudad ato satolon patanektek to kalawidang ci Yihofaan. Dotoc, ngaˈay kiso malecad ci Mariyaan, maolah a mifalic to kaˈorip, pakahemek ci Yihofaan. w19.09 18 fiedac 17-​19 fatac

Paˈarawan no Kawas ko tarokos ci Yohani to mikowaday to falocoˈ a mapolosi. Maˈaraway ningra ko cecay coyoh palimoˈotay to sasepat a coyoh mimetmet to sapalaˈafo a fali no taˈangayay padiing, tahira kalahecian a malinaˈ ko koli no Kawas. (Paˈarawan 7:​1-3) Oniya malinaˈay a Krisciyang komoden 144,000 ko ˈaloman, wa tayra cangra i kakarayan malacafay ci Yisan a mikowan. (Luka 12:32; Paˈarawan 7:4) Dotoc, maˈaraway ni Yohani ko ˈalomanay ˈopo a tamdaw, sanay cingra: ‘Nengneng sa kako, maˈaraw ko taˈangayay ˈopo a tamdaw, awaay ko pakaˈosiay, mikitiniay kalo kitakit, ngasaw, finacadan, sasowalen aira, tomireng i kaˈayaw no tadamaanay kamaroˈan ato tofor a siri.’ (Paˈarawan 7:​9-​14) Mafanaˈ ci Yohani wa ira ko taˈangayay ˈopo a tamdaw midoko ci Yihofaan noikor maedeng taˈangayay ko lipahak! Maˈaraw ni Yohani ko mapolosi maedeng matongalay ko pakasoˈlinay a falocoˈ. Mangalefay kita anini, samanen itiniay kita i kalaˈosian no mapolosi a maˈorip. Nohatini pinaayto a soˈot emang ko misaˈopoan a tamdaw, iraay ko tokel nangra milakowit to taˈangayay padiing, tahadaˈoc maˈorip i cikiw. w19.09 26 fiedac 2-3 fatac

Haratengen hena, mifekadayto ko pairasolan no Fangcalay Cudad a demak, milasilayto ko kalo kitakit to ‘dipayalaytoˈ sanay a lihaf, sowal nangra, malaodayto ko sarihadayay a lintad. Tokel nangra, nanay pakasoˈlin ko polong a tamdaw, o pakayraan no hekal maontingay no kamay nangra sanay. Kawraan, awaay ko pakayraan nangra mionting to mamifekad a demak. O ‘Taˈangayay Papilonˈ wa masongilaˈ a malaˈafo! (Paˈarawan 17:​5, 15-​18) ‘Miparoan no Kawas ko harateng no Niyah i falocoˈ no pohong, a papidemak to pohong.ˈ O maanan a harateng hani? Oha papalaˈafoen ko kihcod mararaway pihakelongan no hekal, mahawpay ko makaniway a Kristokiyo. Sanay ko sowal no Paˈarawan, o hatiniay a harateng wa paroen no Kawas i falocoˈ no “moetepay pohong” no “kahngangay a ˈaˈadopen.” O “ˈaˈadopen” mitaypiyaway to Makomoday Kitakit, “moetepay pohong” mitaypiyaway to kihcod midamaay to Makomoday Kitakit a mikowanay. (Paˈarawan 17:​3, 11-​13; 18:8) Ano misatapang ko mikowanay miˈodis to mararaway pihakelongan i, misatapangto ko taˈangayay padiing. Oniya fahal sanay a padiing wa milingat to polong a tamdaw. w19.10 14 fiedac 1, 3 fatac

Saka 1 hahekalan o cecay ci Tiyotrifis (Titefi) a tamdaw maˈinapay to kakeridan no kasakopang. Sapilifokaw cingra to ‘ˈakawangay a saaroˈan,’ mitongangan, miˈodis to tarokos ci Yohanian ato roma cifadangalay a salikaka. (3 Yohani 10) Cowa ko hahatila kita ci Tiyotrifisan malitaˈang, kawra, ano malifokay no tao ko kakaliman ita a tayal, alatek mamaˈinap kita. Mangalef o mamadangal no niyah, ikaka ko ngaˈay no demak sanay ko harateng, mamangalef ko kaˈinap no falocoˈ. O maˈinapay malecaday o semot, ano cilamit i falocoˈ ita, pasangar a faˈnoten. Ano ira ko misatakaraway, misatekeday anca roma a dangoc ita, wa madolo a lomahad i falocoˈ ita ko maˈinapay. Ano cilamit ko maˈinapay, o mamicara kitaanan a palahad to ciolahay falocoˈ, siniˈadaay falocoˈ, sidaˈitay a makapahay capeling. Mihaenay, ano mahapinang ita misatapangay ko niyah a maˈinap to tao, tangsolen a mifaˈnot ko hatiniay harateng! w20.02 15 fiedac 6-7 fatac

Sowal ni Pawlo ‘mapacekay no ceka ko tirengˈ ningra sanay, o maanan ko tatodong nonini hani? Ano mapacek no cecay ceka ko tireng iso, maedeng wa adada kiso. O tatodong ni Pawlo i, misiˈayaway cingra to sasemsemen a sapalifet. Sowal ningra oniya sapalifet malecaday o ‘coyoh ni Satan,’ padotocay a mitepiˈ to laway ningra, anca padadotocay a ‘mipekpekˈ cingranan (o roma pihongyak.) Oniya malecaday o ceka a pasangaray, cowa ko ci Satan anca tatiihay a coyoh ko mifekaday, kawra mahapinang nangra koniya ‘ceka,’ misaˈicelan a patolem koniya ‘ceka,’ mitongal to pisemsem ni Pawlo. Samanayto ko demak ni Pawlo hani? Salakat sapiwanikaw ci Pawlo toniya ‘ceka,’ sanay ko sowal ningra: ‘Kinatoloay kako micangacang ci Yihofaan, mitokel paliyas toniya ceka takowanan.’ Kawra, kamayan mipacek i tireng ningra koya ‘ceka.’ Cowa ka pacaˈofen ni Yihofa ko satolon ningra han? Cowa ka hatira. Soˈlin cowa ka saysayen ni Yihofa ko pasangaray ni Pawlo, kawra pafeliay to ˈicel cingranan padadotoc a mihadidi. Sanay ko sowal ni Yihofa: ‘O ˈicel Ako itini kalonayan no tamdaw mahapinangay ko kalefot.’ (2 Korinto 12:​8, 9) Itini sapadama no Kawas, ngaˈayay ci Pawlo mitafo to lipahakay a falocoˈ ato rihaday.​—Filipi 4:​4-7. w19.11 9 fiedac 4-5 fatac

Ci Yihofa misangaˈay kitaanan, pafeli to ˈorip, mansa o mamisarocod kita maolah Cingraanan. (Paˈarawan 4:​11) Kawra, soˈlin maolahay kita ci Yihofaan, o roma demak misaaretengan ita nokaˈorip alatek, cowato pisarocod a maolah ci Yihofaan. O misowalan no Fangcalay Cudad ‘misarocod a maolah,ˈ tatodong i tangongolay ko olah ita ci Yihofaan, dengan Cingra ko dadokoen. Cowa ko mamihai kita to polong a tamdaw anca demak a mikotay to saaroˈan ni Yihofa i falocoˈ no mita. (Kasadakan 34:14) Kawraan, o olah ita ci Yihofaan cowa ko patelasay. Samanen mafanaˈay kita Cingraanan, cipinangay to masakenaay a makapahay capeling Ningra, mihaydaayho to ngaˈayay ato tatiihay a palinian Ningra. Mafanaˈay kita to araaw ni Yihofa to tamdaw, makahi a mitoor to araaw Ningra a maˈorip. Ngaˈay malo widang no Kawas kita tada o kalikoan a demak. (ˈOlic 25:14) Ano matongal ko kafanaˈ ita to Misangaˈay a Tatapangan, wa matongal ko sapiingidaw Cingraanan.​—Yakop 4:8. w19.10 26 fiedac 1-3 fatac

Anini, misiˈayaway ko salikaka to masakenaay a pasangaray. O roma salikaka tahapadesay a misemsem, wa ngaˈay cadaen ita cangra tayni i lomaˈ, ngaˈayay padama to sakaˈorip nangra, ngaˈayayho micangacang ci Yihofaan padama to salikaka. Latekay, roma salikaka cowa ka rihaday ko falocoˈ, mafokilay kita to o maanan ko hasowal, o maanan ko hademak, kawra adihayay ko pakayraan a padama. Tinakoen, palaken ita ko toki kalacafay cangranan, misongilaˈ mitengil to sowal nangra, patado cangranan a miharateng, paladaˈenho to kaolahan ita a sinael. (Isaya 50:⁠4) Kalimlaan i, ano misaali ko widang to papakalaloken i, itini i tihi nangra a kalacafay kita. Aniniho palahad kita to soˈlinay kalawidang, patanektek to kalalaˈed i salikaka. Cowa ko madadama aca kita, milakowit to kahererekan noniya lekakawa, wa tahadaˈoc a malo ngaˈayay widang! w19.11 7 fiedac 18-​19 fatac

Pacakat ko Israil tamdaw to sakarihaday a toˈaya o mikitiniay kaolah ci Yihofaan. O pacakatay to Sakarihaday Sapatoˈaya a tamdaw malacafayay to paro no lomaˈ ato saysi komaen to heci no toˈaya, kawra o roma a dafong no toˈaya edengan oha ni Yihofa, cowa ka ngaˈay kaenen. O maamaan hani? O pinengneng ni Yihofa to simal o sangaˈayay a dafong, o roma a dafong no ˈaˈadopen dengan oha ni Yihofa aca, tinakoen o podo. (Lifi 3:​6, 12, 14-​16) Ano makahi ko Israil tamdaw pacakat ci Yihofaan to podo ato ˈatay no ˈaˈadopen ato simal i, tada mahemekay Cingra, samanen mihaen cangra to demak paihkalay to o sangaˈayay ko pacakatan nangra i Kawas. Tangongolay ko olah ni Yis ci Yihofaan, misarocoday to falocoˈ midoko Cingranan, makahi patafang to sangaˈayay no niyah Cingranan. (Yohani 14:31) Mahemekay ci Yis a midofdof to araaw no Kawas. (ˈOlic 40:8) Maˈaraw ni Yihofa makahi ci Yis matayal saki Cingranan, maedeng taˈangayay ko lipahak. w19.11 22-​23 fiedac 9-​10 fatac

Pakayni maˈoniay i Fangcalay Cudad, mataˈelif ko enem pisangaˈan romiˈad i, sawad sanayho to cecay liyad ci Yihofa misangaˈ to maamaan i cikiw. (Satapangan 2:2) Kawra, maolahay ci Yihofa a matayal, mikitini roma pakayraan kamayan Cingra ‘padadotoc a matayal.’ (Yohani 5:​17) Ikor no matayal ci Yihofa to enem romiˈad, itini ‘saka pito romiˈadˈ a pahanhan, malecaday, palimoˈotan Ningra ko Israil tamdaw ikor no matayal to enem romiˈad, wa itini saka pito romiˈad midoedo to Paselaˈan Romiˈad. O kataterekan no Kawas ato Israil tamdaw ko Paselaˈan Romiˈad. (Kasadakan 31:12-​14) Mihaenay, o polong a tamdaw anca o wawa, koli, pakaenan a pinaˈorip, cowa ka ngaˈay matayal toya romiˈad. (Kasadakan 20:10) Oniya limasmas padamaay to Israil tamdaw misamacay to midokoay to Kawas a demak. Itini romiˈad ni Yis, pakinaliay ko saˈosi no ˈaˈideman no pihakelongan pakayni Paselaˈan Romiˈad. Tinakoen, ano mipitpit to emi anca miadah to adadaay tamdaw, o misafelitay to rikec no Paselaˈan Romiˈad sanay. (Marko 2:​23-​27; 3:​2-5) Kawraan, paihkalan ni Yis ko ˈalomanay, cowa kahaen ko pinengneng ni Yihofa. w19.12 3-4 fiedac 8-9 fatac

Ano matongal ko kacipinang ita to kalimlaan a capeling Ningra, wa matongal ko kangaˈay a mitodong Cingraanan. Tangongolay ko kafanaˈ ni Tafiti to kakarayan a Wama, mansa mitodong ci Yihofaan a micada to tao. Ngaˈayay ko kalalaˈed ni Tafiti ato Kawas, mansa kaolahen no Israil tamdaw, minengneng ci Yihofa ci Tafitian o ngaˈayay taˈarawan no roma hongti cingra. (1 Hongti 15:11; 2 Hongti 14:​1-3) Mananamay ita ko maanan? Oha ‘mamitodong to Kawasˈ kita. Ano songilaˈen ita mitodong ko capeling no Kawas, wa misawacay to o wawa Ningra kita. (Ifiso 4:​24) Wa padadotoc kita mitongal to kafanaˈ to Kawas. (Patnakay 3:​11) Kawra, o masaka limlaan i, cowa ko hakowaay ko sifanaˈ ita, ao mamisaka dademakan kita toniya sifanaˈ. Ano songilaˈen ita misaka dademak halo mitodong to kakarayan a Wama, wa padadotoc Cingra miingid kitaanan. (Yakop 4:8) Pakaynian no Kawas i Fangcalay Cudad a mikiˈok kita, cowa ko mamifalah Cingra to misaˈicelay mafanaˈ Cingraanan a tamdaw. w19.12 20 fiedac 20 fatac; 21 fiedac 21, 23 fatac

Maolahay ci Yakop to kahacecay a wawa, kawra tangongolay ko olah ci Yosifan. Pakayniay ko sakaˈinap no kaka ni Yosif, ˈintehay cingraanan. 17 ko mihecaan ni Yosif, cowa ka raraw ko demak, pacakay hananay no kaka a malo koli, misamangahayho to wama, makaenay no ˈaˈadopen ci Yosif sanay. O maˈinapay a falocoˈ no kaka, mipalakay to rihaday no paro no lomaˈ, midokaˈayho to falocoˈ no wama. (Satapangan 37:​3, 4, 27-​34) Itini Fangcalay Cudad, o maˈinapay masalalomaˈay no ‘midoedoay to raraw a waywayan,’ o cowa ko mamicada to Hongti Kitakit no Kawas. (Kalatiya 5:​19-​21) O maˈinapay mikidatay to malaˈadaay, malacongisay, mariˈangay a tatiihay waywayan. O nalifetan ni Yosif mahapinangay ita, o maˈinapay mipalakay to kalalaˈed no tamdaw ato rihaday no paro no lomaˈ. Manaokaniw, cowa ko mamahaen kita cangraanan awa ko olah. Kawra sahtoay cowa ka lefot kita, iraay ko misaˈfitay a falocoˈ, mansa latekay maˈinapay kita to tao. w20.02 14 fiedac 1-3 fatac

Kinacecayay, pafelian ni Yihofa ko tomirengay i taliyok no pakopangan a malohemay malitengay to matefaday i tireng ni Mosi a fangcalay saocor. Ikor, iraay ko pasowalay ci Mosian, o tatosaay malohemay malitengay cowa ka tayra i pakopangan, kawra milifokay to fangcalay saocor, malecaday o pairasolay ko waywayan. Papicongedan ni Yosuwa ci Mosi toniya tatosaay malohemay malitengay. Samanay ko harateng ni Mosi hani? Tada misapoeneray cingra, cowa ka maˈinap, patadoayho cangraanan a mahemek a saka dademaken ni Yihofa cangra. (Saˈosi 11:24-​29) Mikitini ci Mosian mananamay ita ko maanan hani? Ano o malohemay malitengay kiso i, mao:lahay kiso midemak to tayal no kasakopang, ano misaaliay ko tao tisowanan pahatatanamen ko roma tamdaw mikotay to tayal iso, wa samaan ko harateng iso hani? Ano mahecad kiso ci Mosian a misapoener i, cowa ko aira ko misakahemawan no tao ko niyah sanay a harateng, wa makahi kiso a pahatatanam tora salikaka. w20.02 15 fiedac 9 fatac; 17 fiedac 10-​11 fatac

O adada patoleday kitaanan alatek. Ano mafanaˈ ko tao to adadaay kita i, anca sapadamaaw ko tao i, mangodoay kita. Alatek cowa kafanaˈ ko tao to adadaay kita, awaay ko ˈicel ita midemak to isaˈayaway a demak a matoled ko falocoˈ. Kawra papaˈicelen ni Yihofa kita miliyaw a talifak, sasamaan Cingra paˈicel kitaanan hani? Pakayni i Fangcalay Cudad adihayay ko mitemeray to falocoˈ a sowal, mahapinangay ita soˈlin aretengay ko adada i, o masakalimlaan a tamdaw kita sanay ko pinengneng ni Yihofa. (ˈOlic 31:19; 41:3) Pakaynian ni Yihofa i Fangcalay Cudad a padama kitanan pakaremo to matoleday a harateng. Ngaˈay rihadayen ko falocoˈ, cipinangay ci Yihofa to roray iso. Cangacangen Cingra padama tisowanan matatodong ko pinengneng to pakayraan no niyah, itini Fangcalay Cudad mikilim to sahinom ni Yihofa a sowal. O roma sinael paihkalay to misaaretengay ci Yihofa minengneng to finawlan Ningra, kiriwiˈen a misinanot koniya sinael. Mihaenay, wa mahapinang iso ngaˈayay ko picada ni Yihofa to polong madimadiay midoko Cingraanan a tamdaw.​—ˈOlic 84:11. w20.01 15-​16 fiedac 9-​10 fatac; 17 fiedac 12 fatac

Cihafayay ci Isak, maˈinapay ko Filistin tamdaw cingraanan. (Satapangan 26:12-​14) Miselenan nangra ko tefon ni Isak, awaayto ko nananomen no siri ni Isak. (Satapangan 26:15, 16, 27) Anini, o roma tamdaw malecaday to Filistin a tamdaw, maˈinapay to ikakaay ko hafay to niyah a tamdaw. Cowa ko sakairaaw aca to malecaday a dafong no tao, ciharatengayho malahdaw ko dafong no tao. Maˈinapay ko ˈaˈideman no pihakelongan no Yutaya ci Yisan, samanen kasemeran no tamdaw ci Yis. (Matay 7:​28, 29) O miocoran no Kawas ci Yis, pasifanaˈ to tamdaw to soˈlinay kimad. Paorafay ko ˈaˈideman no pihakelongan cingraanan, sapipalakaw to ngangan ningra. (Marko 15:10; Yohani 11:47, 48; 12:12, 13, 19) Mikitini toniya demak mananamay ita ko maanan hani? O roma salikaka ngaˈayay ko capeling, mansa maolahay ko ˈalomanay cangraanan, kita i aka maˈinap cangraanan, ao papasayra cangraanan a minanam.​—1 Korinto 11:1. w20.02 15 fiedac 4-5 fatac

Haratengen hena, itiniay kiso i ˈayaw no 2500 miheca maˈorip i Pirsiya. Iraay ko cecay demak fafanaˈen ko hongti, kawra caka pilifok to pihayda no hongti, matalaway kiso miˈaraw cingraanan. Ano patelas saan kiso miˈaraw cingraanan, o sakapatay alatek. Taˈangayay ko kasasiroma ni Yihofa to hongti no Pirsiya, mihamhamay kitaanan miingid Cingraanan, tada o aakoˈiden ita Cingra! Tokel ni Yihofa rihaday ko falocoˈ ita a masasowal Cingraanan. Soˈlin o kasapaan a misangaˈay a Tapang, malefotay ko ˈicel, saˈakawangay a mikowanay Cingra, kawra makalimay cingra tano damsayay a pangangan Cingraanan to ‘Wama.’ (Matay 6:⁠9) Makalimay ci Yihofa ira ko ngaˈayay kalalaˈed ita Cingraanan, tada mitemeray to falocoˈ ita! Pala ‘Wamaˈ ci Yihofaan, o matatodongayto, samanen o pipowalan no ˈorip Cingra. (ˈOlic 36:⁠9) O Wama ita Cingra, iraay ko ˈinorong ita midofdof Cingraanan. Ano midofdof kita Cingraanan i, wa milifok to makapahay a raheker i noikoran, tinakoen itini i kakarayan anca i fafekang no sera milifok to tahadaˈocay a ˈorip.​—Hipray 12:⁠9. w20.02 2 fiedac 1-3 fatac

O patosokan ita i, padama to pacekiwan macakat. (Ifiso 4:​13) Salakat makalim ko tamdaw minanam to Fangcalay Cudad, alatek sapilifokaw cingra to sapadama no Fangcalay Cudad, kawra matongalto ko olah ningra ci Yihofaan i, alatek sapadamaaw cingra to tao, mahawpay ko kasakopang a salikaka. (Matay 22:37-​39) Itini matatodongay a tatokian, ngaˈayay pasowalen ko pacekiwan, wa ngaˈay cingra pakayni i pipakiyaho a midama to tayal no Hongti Kitakit. Padama to pacekiwan minanam a misaysay to pasangaray. O pacekiwan iso, ano macakat malo cowaho picada to paputisem a mitosilay, cecay romiˈad pasowal cingra tisowanan, iraay ko pakararaway cingraanan a salikaka. Aka misawkit kiso to o cima ko matatodongay ato mararaway, pasowalen cingra to safalod no Fangcalay Cudad, ato sododen ko tao, ano pasangaray cingra a misodod, kilimen koya pakararaway cingraanan a salikaka masasowal, misaˈicel a ‘milifokˈ toya salikaka. Kalacafayen ko pacekiwan minanam to sasamaan a somowal (Nengnengen ko Matay 18:15 ato roma pihongyak.) w20.01 5-6 fiedac 14-​15 fatac

Mitolon kita to Kawas, micada to sapirikec Ningra, misaˈicelho a miliyas to sapiliyawaw a mararaw, mihaen o paihkalay to miakoˈiday to pisodod ni Yihofa kitaanan. Mihaen ko demak wa patikol a rihaday ko falocoˈ ita. Sowal i ˈOlic 34:18: ‘Miingiday ci Yihofa to mararomay ko falocoˈ a tamdaw, milidongay to madokaˈay ko falocoˈ a tamdaw.ˈ Mafanaˈ tonini coko taˈangayay ko pihinom kitaanan han? Mangataayto ko kahererekan no salikoray romiˈad, o kacarirawan a demak wa matongal ko adihay alatek. Ano macariraw kiso i, kalikien a micangacang to sapadama ni Yihofa. Misarocod a micekiw to Fangcalay Cudad, minanam to taˈarawan ni Hana, ni Pawlo, aci Tafiti, cangacangenho ko kakarayan Wama padama tisowanan mikilim to lalangian no cariraw iso. (ˈOlic 139:23) Hepolen ko karetengay ˈinorong pafeli ci Yihofaan, mangalef ano cangoˈot ko ˈicel iso. Mihaen ko demak iso wa malecad to harateng no mitiliday to ˈOlic, sanay ko sowal ningra ci Yihofaan: ‘Ano mapaekel no cariraw kako i, mihinomay Kiso takowanan, parihaday to falocoˈ ako.’​—ˈOlic 94:19 ato roma pihongyak. w20.02 24 fiedac 17 fatac; 25 fiedac 20-​21 fatac

Mihongyakan to ‘mikayatan no Kawasˈ a Krisiya sowal, o tatodong i ‘miˈiyofay ko Kawas.ˈ Saka dademakan no Kawas ko fangcalay saocor Ningra, malecaday o miˈiyofay to fali, miparo to harateng no Niyah i ponoˈ no mitiliday to Fangcalay Cudad a tamdaw. Ano miˈosi kita ato midotim to lalakaw no Fangcalay Cudad i, o sapasifanaˈ no Kawas micalepay i ponoˈ ato falocoˈ no mita, padama kitaanan a misalof, palecad to saali no Kawas. (Hipray 4:​12) Mihaenay, ano sapilifokaw to matomesay a fangcalay saocor, mamicerid kita micekiw to Fangcalay Cudad, misongilaˈho miharateng to maˈosiay a lalakaw. Mihaen, o mamifiyor ko Kimad no Kawas to sasowalen ato waywayan ita. Malacafay to salikaka midoko to Kawas. (ˈOlic 22:22) Ano masaˈopo i, mahadakay ko ˈicel no fangcalay saocor ni Yihofa. (Paˈarawan 2:​29) Itini kasaˈopoan a toki, micangacangay kita to Kawas pafeli to fangcalay saocor, romadiwayho to mikitiniay Fangcalay Cudad a radiw no Hongti Kitakit. Misikayay a salikaka o minilnilan no fangcalay saocor no Kawas, o sapasifanaˈ nangra mikitiniay i Fangcalay Cudad. Manaokaniw, o mamisaday kita to saˈopo, hanaca tawlik a pacaˈof. Mihaen o mamalifok ita ko matomesay a fangacalay saocor. w19.11 11 fiedac 13-​14 fatac