Saka 12 Folad

Ano eca piˈimer kita to sasowalen no niyah, o papaira to sakadokaˈ alatek. Tinakoen, ano maˈaraw iso ko mikitiniay makecengay ko tayal a kilac a salikaka, oha lalicayen iso cangra to pakayniay mitosilay a demak han? Mihaen ko demak iso, maedeng ngaˈayay ko harateng. Maolah kita to salikaka, ciharatengay to samaanay ko kaˈorip nangra, ho ngaˈay matatodong ko pipatado cangraanan a mitolon. Kawra oha katomerepan ita no hatini. Ano pacieci han ita cangra mifanaˈ to mahimeday a demak, o awaay ko olah, cowa pisikol toya mitokelay cangranan mihimed to demak a salikaka. Cowa ko caciharateng kita mitongal to ˈinorong no salikaka. Roma i, itiniay i makecengay a kilac a salikaka, cowa ko papasowal to samaanay ko mitosilay ato roma a demak. w20.03 21 fiedac 11-​12 fatac

Misangaˈ ko Kawas to tamdaw i, cowa ko mamapatay ko tamdaw. Kawra, saka tahadaˈocaw maˈorip ci Atam aci Ifa, oha mamidofdof to sapafeli ni Yihofa cangranan a limoˈot, sanay ci Yihofa: ‘O heci no mihapinang to ngaˈayay ato tatiihay a kilang, cowa ka ngaˈay kaenen, samanen ano kaenen iso, toya romiˈad wa mapatay kiso.’ (Satapangan 2:​16, 17) Kawra pakaynian ni Satan i cecay ˈoner pasowal ci Ifa: ‘Cowa ko mamapatay kamo.’ Ka adayayan i, pasoˈlinay ci Ifa toniya mangah, komaen to losay, komaenay ko faˈinay ningra. (Satapangan 3:​6) O misaˈosian nangra mikayatay to sakaciraraw no polong a tamdaw, saikor mapatayay. (Loma 5:​12) O teloc ni Atam aci Ifa malecaday o nano sowal no Kawas, saikor mapatayay, padotocayho ci Satan misakaniw, misangaˈayho cingra to roma mangah, ano mapatay ko tamdaw, o tireng aca ko mapatayay, lalomaˈ no tireng iraayho ko maˈoripay a saloˈafang sanay. O hatiniay a mangah malipalaway ko ˈalomanay a tamdaw.​—1 Timoti 4:1. w19.04 14-​15 fiedac 3-4 fatac

O sapisimsim ato pafafidaˈay a inaneng no wawa cowaho ka matenes, cowa ka fanaˈ miliyas to katalawan. Mihaenay madoloay malipalaw no mariˈangay a tamdaw. Mafanaˈay ko miˈodangay pasowal to misaˈfitay a mangah a milipalaw to wawa. Tinakoen, pasowal sa cangra: Ano kaˈodangen sahto o raraw no wawa, aka a pasowal to cimacima, ano pasowal kiso i, awaay ko pakasoˈlinay, sanay a mangah. Hanaca pasowalho to wawa: Madadiˈi ko kaemangay ato matoˈasay a tamdaw cowa ko mararaway, o paihkalay to olah a waywayan sanay. O hatiniay a mangah halafinay ko pidokaˈ to wawa. Oya mikaˈodangan no tao a wawa, soˈlin matoˈasto hato cikaditay ko tireng i hakelong no kaˈorip sanay a minengneng to niyah, awaayto ko cimacima mamaolah ato mamihinom takowanan sanay. Tangongolay ko pifiyor no pikaˈodang to wawa.Soˈlinay itini salikoray romiˈad a maˈorip kita, ˈalomanay ko “caay ka siniˈada” a tamdaw, hanaca ‘o tatiihay tamdaw ato misamangahayˈ tatiihtatiihay.​—2 Timoti 3:​1-5, 13. w19.05 15 fiedac 7-8 fatac

Samanay ci Yis pasifanaˈ to tamdaw hani? Salakat, pakaynian ningra i sasowalen a pasifanaˈ to tamdaw. Ciˈicelay ko sowal ningra, samanen somowalay to soˈlinay Kimad no Kawas ato araaw no tamdaw a maˈorip, somowalayho to edengan o Hongti Kitakit no Kawas ko mamisaysay to pasangaray no tamdaw. (Luka 24:19) Roma i, patirengay to ngaˈayay taˈarawan ci Yis, mahapinang no nisawawaan to sasamaan ko waywayan a maˈorip. (Yohani 13:15) Ihacowaay ci Yis pasifanaˈ to tamdaw hani? Mitosil cingra i fafekang no sera a pasifanaˈ to tamdaw. (Matay 4:​23) Ikor no patikol cingra maˈorip pasifanaˈay to nisawawaan. Kinacecayay itini ˈaˈayaw no 500 a nisawawaan, palimoˈot cangranan padama to tamdaw ‘malo nisawawaan ningra.ˈ (Matay 28:19, 20; 1 Korinto 15:6) O ˈaˈideman no kasakopang ci Yis, patikol i kakarayan padadotocay a pasifanaˈ to nisawawaan. O cecay tinakoan i, maedeng saka 96 miheca, mikayatan ni Yis ko tarokos ci Yohani, papipakalalok ato palimoˈot to manilnilay no fangcalay saocor a Krisciyang.​—Kolosay 1:​18; Paˈarawan 1:1. w19.05 3 fiedac 4-5 fatac

Anini mietan to sakaˈorip cowa ko madoloay. ˈAlomanay salikaka koˈdaway ko toki a micokang, ngaˈ maparoay ko saali no paro no lomaˈ. O roma i, maraayay ko katayalan adihayay ko mapalakay a toki. O roma toha sapipaririˈaw to paro no lomaˈ, o milotayay to tireng ko demak. Misaromiˈad a matayal ikor, tada malotayayto, awaayto ko saloˈingan a micekiw to cudad. Soˈliˈlin hatira, oha mamilimasmas kita to toki a micekiw, hanaca calepen a micekiw ko Fangcalay Cudad ato mitepangan no likakawa a cudad. O kalalaˈed ita aci Yihofa ato mamalayap ko midaˈocay ˈorip hokira, milingatay tora noka picekiw ita. (1 Timoti 4:​15) O roma tamdaw maolahay pacerem a lomowad a micekiw, samanen pahanhanayto to dadaya hato talipaˈelalay ko ponoˈ. O roma tamdaw maolahay to dadaya, awaay ko micaraay a micekiw ato midotim. w19.05 26 fiedac 1-2 fatac

Sapifalicaw to i kemoday a falocoˈ misaaliay to toki, misadakho to taˈangayay ˈicel. Cowa ko fafahal saan a mafalic. O mamisarocod kita, hanaca pina a mihecaan ngaˈ masongilaˈ a mafalic. (2 Pitiro 1:5) Salakat i, mitolon. Mahecad kita to mitiliday to ˈolic a mitolon ci Yihofaan, sanay: ‘Kawasaw, nanay sangaˈen Iso ko makoracay a malo falocoˈ ako, telien i falocoˈ ako ko faelohay harateng, ho tanektek ko falocoˈ ako.’ (ˈOlic 51:10) O mamihai kita misaaliay ko niyah to sapifalicaw to pakayraan a miharateng, halo micangacang to sapadama ni Yihofa. Dotoc i, midotim. Ano miˈosi kita to Fangcalay Cudad i, palaken ko toki midotim to maˈosiay a lalakaw, misimsim to o maanan a harateng ato nafalocoˈan ko fafalicen no niyah. (ˈOlic 119:59; Hipray 4:​12; Yakop 1:​25) O hahapinangen ita, mafiyoray no hekal ko niyah i maanan a pakayraan han, ikor mihai to iraay ko dangoc no niyah, halo misaˈicel a misalof. w19.06 8 fiedac 1 fatac; 10 fiedac 10 fatac; 12 fiedac 11-​12 fatac

Ano mamisaˈosi i, limasmasen to hahacowa a misatapang a dademak, ikor tooren ko toki a misatapang. Aka pitala to matatodongay a toki ngaˈ misatapang, samanen tahadaˈoc cowa ko mamatara koniya romiˈad. (Patnakay 11:4) Aka makalisanga no cowa ko kalimlaan a demak, awato ko ˈicel ato toki a midemak to kalimlaan a demak. (Filipi 1:​10) Ngaˈayay itini i cowa ka makalisanga no tao a toki a midemak, pasowalenho ko tao, oniya tatokian, hamaan mikilim tisowanan. Sapisongilaˈaw a midemak i, ngaˈayay paedeng ko soci anca ikorto minengneng to tikami i tingnaw. Ano saka tahiraaw kiso i kahicelaan, soˈlin mapalakay ko lalan, o fafalicen iso ko lalan a tayra. O misaˈosian iso a demak, mahecaday tora, ano samacayen miharateng ko kalahecian a demak i, soˈlin tahalifa to pasangar ato sapalifet i, cowa ko raranikay a misawad kiso.​—Kalatiya 6:⁠9. w19.11 30 fiedac 17-​18 fatac

Misetek kiso to falocoˈ micada to paputisem, o maanan ko lalangian hani? Misongilaˈ kiso minanam to Fangcalay Cudad, palidlid saan mafanaˈ to capeling ato pinangan ni Yihofa. Oniya sifanaˈ mitemeray to falocoˈ iso, tangongol ko olah ci Yihofaan. Mihaenay, misetek ko falocoˈ iso micada to paputisem sakakaay lalangian i, o kaolah ci Yihofaan. Misetek kiso to falocoˈ micada to paputisem o roma lalangian i, pakasoˈlinay to mananamay a Kimad no Fangcalay Cudad. Palimoˈotan ni Yis ko nisawawaan ningra padama to tao malo Krisciyang. (Matay 28:19, 20) Sowal ni Yis, o tamdaw ‘pakayni i ngangan no Wama, wawa, fangcalay saocorˈ a micada to paputisem. Tatodong ningra i, wa pakasoˈlin cingra to pakayniay ci Yihofaan, ci Yisan ato fangcalay saocor a kimad. Oniya kimad tada ciˈicelay, tangongolay ko pitemer to falocoˈ iso. w20.03 9 fiedac 8-9 fatac

Cowa ko piocor aca ni Yihofa to coyoh a mirikec ci Lotoan, padamaayho cingranan milaliw to Sotom. (Satapangan 19:12-​14, 17) Mahecaday, ano mahapinang ita o papaira to pasangaray ko demak no salikaka, o rarikecen ita cangra, hanaca misarocod a padama cangranan. Soˈlin caka tangsol ko salikaka mitoor to safalod no Fangcalay Cudad a midemak, pairaen ita ko mihadidiay, padadotoc padama cangranan, mahecad o pipadama no coyoh ci Lotoan. (1 Yohani 3:​18) Latekay, o papadamaen ita ko salikaka a mitoor to sapaini a midemak. Mikitini i saka 2 Pitiro wa mahapinang ita, cowa ka pisamacay ci Yihofa to dangoc ni Loto, o moecelay a tamdaw sanay ko pinengneng cingranan. (ˈOlic 130:⁠3) Wa ngaˈay kita mahecad ci Yihofaan a minengneng to tao. Ano samacayen ita ko kangaˈayan no salikaka, wa matongal ko pihadidi cangranan, mihaen o mamakahi cangra micada to sapadama ita. w19.06 21 fiedac 6-7 fatac

O kitiraan iso a kitakit ano mikecengay ko mikowanay to demak ita, wa miharateng kiso alatek malinah tayra i pasalatay midoko ci Yihofaan a kitakit. Ono niyahan a saˈosi konini, cowa ka ngaˈay ko tao patado tisowanan a misaˈosi. ˈAyaw no misaˈosi, ngaˈayay haratengen ita ko nano demak no saka 1 hahekalan a Krisciyang, tiya tahalifa to sapalak. Itiya, o nisawawaan i Yirusalim maliwasakay tayra Yutiya ato Samariya, o roma tamdaw tayraay i Foinikiya, Sayprus ato Antiok. (Matay 10:23; Dmak 8:1; 11:19) Kawra, misaˈosiay ci Pawlo materek i misafelitay to mitosilay tayal a kilac. (Dmak 14:19-​23) Mikitini toniya maˈoningay mananamay ita ko maanan hani? Malinah anca caka linah, o sasinanoten no tawki no lomaˈ a miharateng konini. ˈAyaw no misaˈosi, wa mingitangit a mitolon cingra, miharateng to pakayraan no lomaˈ, miharateng ano malinah o kangaˈayan ato katatiihan pakayni i paro no lomaˈ. Cowa ka ngaˈay kita milikaf to saˈosi no tao. w19.07 10 fiedac 8-9 fatac

Sowal ni Yis: ‘Kalingad kamo, palanisawawaan no mako ko polong no kasafinawlan.’ (Matay 28:19) Cowa ko padama aca to pacekiwan mafanaˈ to limoˈot ni Yis, padamaenho cangra minanam a midofdof toniya limoˈot. Pasangaray alatek ko pacekiwan misaka dademak to safalod no Fangcalay Cudad, mansa wa mihadidi kita a padama cingranan. O roma pacekiwan pina folad ngaˈayay to misalof to harateng ato nanaman no niyah, o roma misaaliay to halafinay toki ngaˈ mafalicay. Ira ko mihadidiay to pacekiwan wa ira ko maanan ngaˈayay minaroˈan hani? Itiniay i Milo a mikiriwiˈay manilnil a mitosilay, iraay ko mahaenay nalifetan, sanay: “O cecay faˈinayan ci Lawer malahciayto ko tosa cudad milengo, adihayayho ko raremoen a pasangaray, tinakoen cowa pakasawad to nanaman a somowal to kaacekan, marariday malacongis to fafahi, cowa pikangodo ko wawa cingranan. Kawra, kamayan micerid mirienang to saˈopo cingra, mansa padadotocen ako padama cingra ato paro no lomaˈ ningra. Ikor no 3 miheca, citatodongayto cingra micada to paputisem.” w19.07 15 fiedac 3 fatac; 18-19 fiedac 15-​17 fatac

Itiniay i masamanay pakayraan ci Pawlo patikami to Filipiay kasakopang hani? Itiya itiniay cingra i Loma, mapalitay i lomaˈ, kawra kamayan misarocod a mitosil to milisoˈay cingranan a tamdaw, patikamiayho to adihayay a kasakopang. Mafanaˈay ci Pawlo wa malecad ko niyah ci Kristoan, hakelong no ˈorip misaˈicel a matayal saki Kawas. Patinakoan ni Pawlo ko kaˈorip no Krisciyang to comikayay a midefolay. (1 Korinto 9:​24-​27) O midefolay a tamdaw samacayen ko harateng to patosokan, caka ngaˈay makalisanga ko falocoˈ. Tinakoen, o roma pidefolan a lalan mitaˈlifay to maci, alatek maˈaraway no comikayay ko masakenaay a patiyamay. Wa tomireng cingra i tanameng a minengneng to o maanan ko dafong no patiyamay han? Ano mihaen to demak i, wa pasokiyaw cingra! Itini saka tahadaˈoc no ˈorip a midefolay, aka ka makalisanga ko falocoˈ ita. Ano samacayen ita ko patosokan i, mitodong ci Pawloan misarocod to ˈicel talaˈayaw a comikay, wa malifok ko sapalifon. w19.08 3 fiedac 4 fatac; 4 fiedac 7 fatac

Na misaˈosi kita to falocoˈ mitoor to palinian no Kawas a maˈorip i, alatek pasangaray ko paro no lomaˈ micada to kafalic no mita. Salakat maˈaraway nangra to cowa kala cafay cangranan a misalisin, cowa pirienang to mirikecay a demak. Maketeray ko paro no lomaˈ kitanan alatek. (Matay 10:35, 36) Kawra aka pisawad kita padama cangranan. Ano misawad kita padama cangranan cipinang to pihakelongan no mita, mahecad to misawkitay cangranan, hato awaay ko tatodong nangra micada to tahadaˈocay a hatokel. Haratengen ita, cowa pafeli ci Yihofa to misawkitay a fadangalan kitaanan, pafelian ci Yis. (Yohani 5:​22) Mihaenay i, ano hadidien ita ko paro no lomaˈ, alatek saikor, cacadaen nangra ko mitenakan no mita a lihaf. Itini pipadama to paro no lomaˈ tahalifa kita to sapalifet alatek, kawra damsayen ko sowal, tanektek ko saaroˈan. (1 Korinto 4:​12) Latekay, misaaliay to toki ngaˈ cipinangay ko paro no lomaˈ to kalimlaan ko pidoko to Kawas. w19.08 17 fiedac 10, 13 fatac; 18 fiedac 14 fatac

“Itiya ano kako aca ko misiˈayaway toya sapalifet, cato ka pakahadidi kako.” Na mihadakay kiso to hatiniay a sowal han? ˈAlomanay salikaka iraay ko mahaenay a harateng alatek. Pakidemay ko adada iso alatek, anca mapatayay ko salawina, tikolen miharateng, mafanaˈay kiso o sakangaˈay iso mihadidi to romiˈamiˈad to pasangaray i, pakayniay sapafeli no Kawas a fangcalay saocor, hato iraay ko ‘mikiriwiˈay a ˈicelˈ iso padadotoc a tanektek. (2 Korinto 4:​7-9) O roma i, misaaliay kita to fangcalay saocor ngaˈ, pakaremo to tatiihay pifiyor noniya ciraraway a hekal, hanaca ira ko ˈicel padadotoc malalefo to ‘tatiihay coyoh.’ (Ifiso 6​:12; 1 Yohani 5:​19) Tano fangcalay saocor padama ci Yihofa kitaanan, paˈicel kitaanan itini pasangaray padadotoc a midemak to ˈinorong. Sowal no tarokos ci Pawlo mitiˈeray cingra to ‘ˈicel ni Kristo,’ hato ngaˈayay i pasangaray padadotoc matayal saki Kawas, milahci to mitosilay a tayal. ​—2 Korinto 12:9. w19.11 8 fiedac 1-3 fatac

Dengan ko Fangcalay Cudad ko papadama tisowanan mafanaˈ to o maanan ko nano demak ni Yis tisowanan. Palahad to olah ci Yisan, wa matongal ko olah ci Yihofaan. Malefotay ko pipaihkal ni Yis to capeling no kakarayan Wama. Mihaenay, matongal ko kafanaˈ iso ci Yisan, wa matongal ko kafanaˈ ci Yihofaan, matongal ko kaolah Cingraanan. Haratengen hena, itini lintad ni Yis, misakahmaway ko tamdaw to manikaway, adadaay anca poeneray ko saaroˈan a tamdaw, kawra siniˈadaay ci Yis cangraanan. Roma i, adihayay ko ciepocay sapaini ni Yis to tamdaw, tooren iso ko sowal ningra a midemak, coko masalofay ko kaˈorip iso han? (Matay 5:​1-​11; 7:​24-​27) Pakayni i kinafalah ni Yis, misododan ni Yihofa ko raraw no mita, misimsim kiso tonini wa matongal ko olah ci Yisan. (Matay 20:28) Mafanaˈ to makahiay ci Yis pakayni tisowanan a kinafalah to ˈorip, mitemeray to falocoˈ iso, sapasasiyoraw a micangacang to sasodod no Kawas. (Dmak 3:​19, 20; 1 Yohani 1:⁠9) Palidlid sa tangongol ko olah iso ci Yihofaan aci Yisan, wa makalimto micawmaˈ to maolahay cangraanan a tamdaw. w20.03 5-6 fiedac 10-​12 fatac

O roma salikaka sanay ko harateng, edeng o niyah ko citatodongay milifok to roma tayal no kasakopang, o roma fafahiyan salikaka sanay ko harateng, o faˈinay ako ikakaay to roma salikaka. Ano o soˈlinay misapoeneray kita i, cowa ko mamihaen ko harateng. Ano milifokay ko tao to roma tayal no kasakopang i, samaanen ko waywayan ita hani? Nengnengen ita ko taˈarawan ni Mosi. Papikayaten ni Yihofa ci Mosi to Israil tamdaw, misaaretengay ci Mosi toniya ˈinorong. Minilnilay ci Yihofa to roma tamdaw a padama ci Mosian, samaanay ko waywayan ni Mosi hani? Cowa ka ˈinap ci Mosi cangranan. (Saˈosi 11:​24-29) O roma, papirienangan ni Mosi ko tao padama to misawkitay a tayal. (Kasadakan 18:13-​24) Ikakaay ko kangaˈay noniya limasmas to isaˈayaway, mihaen ciharatengay ci Mosi to haepoc no finawlan, cowa ko saaroˈan no niyah, patirengay cingra to tada makapahay a taˈarawan no mita! Ano sapitongalaw kita to tayal saki Yihofaan, haharatengen ita o misapoeneray a capeling ikakaay to inaneng. w19.09 5-6 fiedac 13-​14 fatac

Cowa kafanaˈ kita, tatano maanan a lalangian ko sapiˈodis no mikowanay no kalo kitakit to Taˈangayay Papilon, alatek o micongeday ko pihakelongan to saka dipayal no hekal, ato micapiday to mikowanay saan ko lalangian nangra, anca adihayay ko mitalingan no pihakelongan a hafay ato dafong saan ko sowal. (Paˈarawan 18:​3, 7) Ano samaanto ko lalangian, o patosokan no mikowanay, cowa ko mihakelongay tamdaw ko papalaˈafoen, o polong a lekakawa no pihakelongan ko papalaˈafoen. Ano mapalaˈafo koniya lekakawa, mamahapinangto no mihakelongay, cowa kangaˈay tiˈeren ko ˈaˈideman no pihakelongan, orato mamiliyas cangra to mararaway pihakelongan. Palaˈafo to ‘Taˈangayay Papilon’ cowa ko hahalafin koniya toki. (Paˈarawan 18:​10, 21) Mikiˈokay ci Yihofa ‘wa lowanen koya romiˈad,’ mihaen ngaˈ materek ko ‘mipiliˈan Ningra a finawlanˈ ato matatodongay a pihakelongan.​—Marko 13:19, 20. w19.10 15 fiedac 4-5 fatac

O malo winaay a salikaka, ano hinaketeray ko wama wina iso, caka ngaˈay tengilen ko sowal to wawa, miharateng kiso o matatodongay ko hatiniay a pakayraan wa saan. Soˈlin ikorto mafanaˈ kiso to soˈlinay kimad, tano damsayay ato mihadidiay a pasifanaˈ to wawa cowa ko madoloay. Mangalef ano malotay kiso, maliyangho ko wawa, tada mahaenay. (Ifiso 4:​31) Ano mahaen ko pakayraan, tolonen ci Yihofa, mitiˈer to sapadama Ningra. (ˈOlic 37:⁠5) O roma malo winaay misiˈayaway to roma pasangaray, pasangaray paihkal to olah i wawa. Alatek kaemangho cowa pilifok to olah, cowa kangaˈay ko kalalaˈed to wama wina. Ano mahaenay ko pakayraan iso, aka a pitoor to mararaway. O malo winaay ano midoedoay ci Yihofaan, oha maminanam sasamaan paihkal to olah i wawa. Sapisalofaw cowa ko madoloay alatek, kawra o mamadangal iso. Ano makahi kiso a mifalic, o sakaciepoc no niyah ato paro no lomaˈ. w19.09 18-​19 fiedac 19-​20 fatac

O midokoay ci Yihofaan a tamdaw ano adihay ko mapalakay a toki ato ˈicel mietan to payci, ciharateng to saka cihafayaw, wa mahecad o misowalan ni Yis, malo tosaay ko tapang a koli, ecato pisarocod a maolah ci Yihofaan. I saikorto no saka 1 hahekalan, itini Laotikay a kasakopang malikoay ko roma tamdaw a pasowal: ‘O cidafongayto kako, o cihafayayto kako, awaay ko kacangoˈotan ako to maamaan.’ Kawra pinengneng ni Yihofa aci Yis, “o kakasiniˈadaan, o kakaadayayan, o manikaway, o mapohaway, o mawacayay” cangra. Mirikec ci Yis cangranan, cowa ko pakayniay ka cihafay nangra, o pakayniay ka ˈanof nangra to payci, mipalak to kalawidang no niyah ato Kawas. (Paˈarawan 3:​14-​17) Ano mahapinang ita matongalay ko harateng noniyah micangacang to hafay, tangsolen a mifalic ko harateng. (1 Timoti 6:​7, 8) Ano eca i, awato ko pakayraan ita a misarocod maolah ci Yihofaan, cowa ko mamicada Cingra to pidoko no mita, samanen o ‘misaaliay to misarocoday maolah a Kawasˈ Cingra.’​— Limoˈot 4:​24. w19.10 27 fiedac 5-6 fatac

Mihongyakan to ‘micorohˈ Kilisiya a sowal, tatodong i kayaten a tatemik.’ Misaka dademakan ni Luka koniya sowal, o tamina nangra mitooray to fali ‘maˈalol.’ (Dmak 27:15) O cecay mikingkiway to Fangcalay Cudad a tamdaw sanay, o sowal ni Pitiro papiharatengay to tamdaw to lakat no tamina. Tatodong ni Pitiro i, malecad o tamina itini picoroh no fali tahira kahiceraan, o pairasolay ato mitiliday to Fangcalay Cudad a tamdaw itini picoroh no fangcalay saocor milaheci to tayal nangra. Sanayho ko sowal noniya tamdaw, o mitiliday to Fangcalay Cudad malecaday o tamina, ‘micelakay to kopang.ˈ Padamaay ci Yihofa cangranan, pafeli to ‘fali,’ oya fangcalay saocor. Mihadakay to ˈicel ko mitiliday to Fangcalay Cudad, midoedo to pakaynian no Kawas i fangcalay saocor a mikayat cangranan. Soˈlin taˈangayay ko tapelik no riyar, ngaˈayay micaliw ko tamina to ˈicel no fali, rihaday a tangasa i kahiceraan. Malecaday, soˈlin misiˈayaw to masakenaay a pasangaray, wa ngaˈay padama ko fangcalay saocor kitaanan padadotoc a midoko to Kawas, tahira picomodan i faelohay hekal. w19.11 9 fiedac 7-9 fatac

Misiˈayaway ko kahacecay tamdaw to pasangaray, latekay matoleday ko falocoˈ. Kawra cowa ka ngaˈay saromiˈamiˈad saan a macariraw, ano mahaen wa madolo a matawal ko makapahay a sakiˈok ni Yihofa. (Paˈarawan 21:​3, 4) Ano pakidem ko katoled ita, wa malahedaw ko ˈicel, salikor wa sawad saan midoko to Kawas. O cecay fafahiyan salikaka i Padaka midimokosay to aretengay ko adada a faˈinay, hano padadotoc cingra pakasoˈlin to Kawas hani? Sanay ko sowal: “Latekay taˈangayay ko saroero niyam, matoleday, kawra matomesay ko tokel niyam to hanoikor. Koˈiday ci Yihofa pafeli to adihayay mitepangan a cudad, paˈicel to pakasoˈlinay falocoˈ niyam, miliyaw a patalifak tamiyanan. Oniya limoˈot ato sapakalalok o misaalian niyam, padamaay tamiyanan padotoc a tanektek.” O sowal noniya salikaka pahapinangay kitaanan, wa ngaˈay maremo ita ko matoleday a harateng. Haratengen, misaka dademakan ni Satan ko malifaay ita a pasangaray mitapiˈ tisowanan, kawra pakasoˈlinen ci Yihofa o mamisayar tisowanan, sangaˈayen a misaka dademak ko mitepangan no likakawa a cudad patanektek to pakasoˈlinay falocoˈ. w19.11 16 fiedac 9-​10 fatac

Mangalefay o malohemay malitengay o mamisaka dademak toniya safalod no Fangcalay Cudad. Mafanaˈay ko malohemay malitengay cowa ka ngaˈay koniyah ‘pasadak to mahimeday,’ mifanaˈ to fafahi tono tekedan a demak no salikaka, hoeca ka lahedaw ko pakasoˈlin no tao cangraanan, wa mipalakho to ngangan noniyah. O ciˈinorongay i kasakopang a salikaka, cowa ka ngaˈay ‘tosa ko semaˈ anca somowal to misaˈfitay a sowal. (1 Timoti 3:8 ato roma pihongyak.) Mihaenay, mamiˈimer cangra to sasowalen, eca ka piyakayak to sowal. Ano maolahay cingra to fafahi, aka pasowalen to cowa ko hakafanaˈan nangra a demak, mitongal to ˈinorong no fafahi. Eca ka pacieci ko fafahi to faˈinay a misadak to mahimeday a demak, wa maˈading ko ngangan no faˈinay. Mihaen ko demak no fafahi, cowako pidama aca to faˈinay, mikangodoay toya pakasoˈlinay to faˈinay a tamdaw. Sakakaay i, wa pakahemek ci Yihofaan, pakayni pisaˈicel no fafahi wa macowat ko rihaday ato kakelec no kasakopang.​—Loma 14:19. w20.03 22 fiedac 13-​14 fatac

Itini i ˈayaw no kongyen 1512 miheca, itiya i patirengay ko Israil tamdaw to fangcalay kopang i Sinay Lotok. Misikayay ci Mosi to malo saysi a saˈopo, minilnilay ci Aronan ato wawa ningra. (Kasadakan 40:17; Lifi 9:​1-5) Misamaanay ci Yihofa paihkal to pihayda toniya saysi hani? Ya palemed ci Mosi aci Aron to finawlan i, patefadan ni Yihofa ko namal a mitodoh to kihcod a sapatoˈaya. (Lifi 9:​23, 24) Midemak ci Yihofa to kafahkaˈan itini i pinilnil to saysi a saˈopo mitaypiway to maanan hani? Midamaay ci Yihofa to rayray ni Aron malo saysi. Maˈaraway no Israil tamdaw koniya ihkalay a wacay, wa mahapinang nangra to mamidama ko niyah to saysi. Oniya matiliday tada kalimlaan kitaanan, samanen nolitengan a kapot no saysi mitaypiway to ikakaay kasapaan a kapot no saysi, ci Kristo ato 144,000 tatayra i kakarayan padama ci Kristoan a saysi ato Hongti. (Hipray 4:14; 8:3-5; 10:1) Awaay ko hasasa, mikayatay ci Yihofa ato midamaay to likakawa Ningra. w19.11 23 fiedac 13-14 fatac; 24 fiedac 16 fatac

Itini i Korinto ci Pawlo i, malacafayay ci Akuila aci Priskila ‘mikilomaˈ, matayal, samanen o tayal nangra mahecaday o misangaˈay to kopang a tayal.ˈ Kawra ‘matayal to romiˈad ato dadayaˈ ci Pawlo, pahanhanay cingra. Itini i Paselaˈan Romiˈad misawaday cingra misangaˈ to kopang, toniya romiˈad misawacayay to Yutaya a tamdaw, samanen o Yutaya tamdaw pahanhanay i Paselaˈan Romiˈad, cowa ka tayal cangra. (Dmak 13:14-​16, 42-​44; 16:13; 18:​1-4) Misaˈicelay ci Pawlo a matayal to sakaˈorip. Kawra, miceriday cingra ‘dademak to fangcalay a tayal, milasil to ngaˈayay lihaf no Kawas.ˈ (Loma 15:16; 2 Korinto 11:23) Pakalalokan ni Pawlo ko roma Krisciyang micerid a mitosil. Tinokoen ci Akuila aci Priskila malacafayay cangra ci Pawloan ‘matayal saki Yisan.’ (Loma 12:11; 16:3) Palimoˈotan ni Pawlo ko Korintoay a Krisciyang ‘misaadihay to tayal no tapang.’ (1 Korinto 15:58; 2 Korinto 9:8) Itini sakayat no Kawas sanay ko sowal ningra: ‘O cima caka kahi matayal, caka ngaˈay a komaen.’​—2 Tisalonika 3:​10. w19.12 5 fiedac 12-​13 fatac

Pairaan ni Yihofa ko kalim no saka cecay a raramod mahofoc to wawa. O caciwawa hokira ko mararamoday, hacowa a ciwawa, o cima ko mamisaˈosi hani? Itini roma a pala, kakaliki a ciwawa ko faelohay mararamoday a tamdaw sanay. O salawina ato widang miroeroay cangaanan papihaen to demak. O cecay ci Ciyaslo a faˈinayan salikaka itiniay i Asia, sanay ko sowal: “O ciwawaay a salikaka i kasakopang miroeroay to awaay ko wawa a mararamoday kalikien a ciwawa.” O cecay itiniay i Asia a salikaka ci Cifoli, sanay cingra: “Pasowalay ko roma tamdaw to awaay ko wawa a mararamoday, ano maliteng cangra awa ko mamidipot cangranan.” Nikawrira, saka ciwawaaw hokira oya mararamoday ko mamisaˈosi, o cangra ko mamitamorong to ˈinorong. (Kalatiya 6:5 ato roma pihongyak.) O salawina ato widang mitokel ciwawa ko mararamoday ngaˈ lipahak ko kaˈorip saan ko harateng, kawra pakayni misaˈosi to caciwawa hokira, o mararamoday ko mamisaˈosi tonini.​–1 Tisalonika 4:​11 ato roma pihongyak. w19.12 22 fiedac 1-3 fatac

Pasangaran nanay kiso palo Wama to Kawas han? Harateng no roma tamdaw tada ˈakawangay ko Kawas, mimingay ko niyah sanay, mansa pasangar a pakasoˈlin to caciharateng ko Kawas cangraanan. Kawra cowa kaolah ci Yihofa mihaen ko harateng ita, pafeli Cingra to ˈorip kitaanan, makalimay ngaˈay ko kalalaˈed ita Cingraanan. Na pasowalay ci Pawlo to Atin a tamdaw to malecaday a sowal, somowalayho cingra ci Yihofa ‘cowa pilaay to kahacecay a tamdaw.’ (Dmak 17:​24-​29) Makalimay ci Yihofa miingid kita Cingraanan, malecad o piingid no wawa to sidaˈitay a wama. O roma tamdaw pasangaray pala Wama ci Yihofaan, samanen o wama nangra cowa paihkal to olah ato ciharateng cangraanan. Sowal no cecay fafahiyan salikaka: “O wama ako, miceriday mapoˈi takowanan, mansa i satapang minanam kako to Fangcalay Cudad i, pasangaray pala Wama ci Yihofaan. Ikor matongal ko kafanaˈ ci Yihofaan.” Ano mahaenay ko harateng iso i, aka calemcem. Ano misongilaˈ kiso mafanaˈ Cingraanan, mamahapinang to o sangaˈayay a Wama ci Yihofa. w20.02 3 fiedac 4-5 fatac

Pasowalay ci Yis kitaanan, ano matoˈasto citolasay ko ˈicel no niyah saan miharateng, cato ka samaan ko midemakan, misalimlaay ci Yihofa to nano demak ita Cingranan. (ˈOlic 92:12-​15; Luka 21:​2-4) Mihaenay, samacayen ko mamadangar a demak iso, tinakoen, mitosil i tamdaw, patado to salikaka a mitolon, pakalalok to tao padotoc a madimadi. O kapot a matayal sanay ko pinengneng no Kawas kitaanan, cowa ko pakayniay i inaneng ita, ao pakayniay i noka makahi ita a midofdof Cingraanan. (1 Korinto 3:​5-9) Misaaretengay ci Yihofa minengneng to midokoay Cingraanan a tamdaw, midoko to hatiniay a Kawas, tada matemeray ko falocoˈ no mita! Misangaˈ Cingra kitaanan, oha mamidofdof kita to araaw Ningra a maˈorip. Dengan midoko Cingraanan, wa ciepoc ko nokaˈorip no tamdaw. (Paˈarawan 4:​11) Alatek misakahmaway ko kalo a tamdaw kitaanan, kawra ci Yihofa misaaretengay minengneng kitaanan. (Hipray 11:16, 38) Ano tahalifaay kita to adada, pasangar ko kaˈorip anca malitengto kita a matoled ko falocoˈ i, haharatengen, awaay ko maanan mamiconged to olah no Kawas kitaanan.​—Loma 8:​38, 39. w20.01 18 fiedac 16 fatac; 19 fiedac 18-​19 fatac

Saka ecaaw kaˈinap to tao, palahaden ko misapoeneray ato marenecay a harateng. Ano matomes ko falocoˈ ita toniya tosa makapahay harateng, cowato ko lalomahad i falocoˈ ko maˈinapay. Misapoener kita, cowato ko mamisatakaraw, cowa ko caciharateng to aikaka to tao ko mamalifok no niyah. (Kalatiya 6:​3, 4) Marenec kita, cowa ko masasiay to tao, o mamarenecen to iraay no niyah. (1 Timoti 6:​7, 8) Ano maˈaraw ko tao milifok to dafong anca sapalemed i, o misapoeneray a marenec a tamdaw papatado to tao a mahemek. Misaaliay kita to fangcalay saocor no Kawas, ngaˈ maliyas ko maˈinapay a harateng, halo palahad to misapoeneray ato marenecay a falocoˈ. (Kalatiya 5:​16; Filipi 2:​3, 4) Pakaynian ni Yihofa i fangcalay saocor, padama kitaanan mihapinang to i kemoday a falocoˈ ato harateng, tano matatodongay a harateng mikotay to mararaway a harateng.​—ˈOlic 26:2. w20.02 15 fiedac 8-9 fatac

Patafang to tireng o kalimlaan a piketon, tokel ni Yihofa misarocod midofdof to miketonan iso. Ka picerid micawmaˈ to salikaka no kasakopang. O salikaka malecaday o paro no lomaˈ iso, micerid kiso mirienang to saˈopo, wa ngaˈay patanektek to kalalaˈed cangraanan. To romiˈamiˈad micekiw ato midotim to sowal no Fangcalay Cudad. (ˈOlic 1:​1, 2) Palaken ko toki a midotim, mihaen o mamatemer ko falocoˈ iso. Ka ‘padadotoc a mitolon,ˈ o mamatongal ko piingid iso ci Yihofaan. (Matay 26:41) Ka ‘padadotoc i salakat micangacang to Hongti Kitakit,ˈ malo sakakaay ko mitosilay demak i nokaˈorip iso. (Matay 6:​33) Micerid mirienang to mitosilay tayal, tanektekto ko pakasoˈlinay falocoˈ iso. O masiˈayaway iso nohatini masakenaay a pasangaray, o ‘cecayay liyad o kahmaway.’ (2 Korinto 4:​17) Ikor no micada to paputisem, wa matongal ko lipahak iso, noikor wa milifok to ‘soˈlinay a ˈorip.’ Mihaenay, sapidemakaw to miketonan a patafang to tireng, o mihadakan a ˈicel sahtoay o ciepocay!​—1 Timoti 6:​19. w20.03 13 fiedac 19-​21 fatac

Ano aeca:sa ka cakat ko pacekiwan, wa misimsim kiso to papahanhanen cingra a pacekiw. Ngaˈayay haratengen iso ko laenoay salicay: “O pacekiwan ako itini madangaray no niyah a demak palidliday a macakat hokira? Mihadakay cingra to ˈicel ‘midofdof,’ anca misakadademak to mananamay a sifanaˈ no Fangcalay Cudad hokira?” (Matay 28:20) Ka adayayan i, o roma pacekiwan malecaday to lintaday ni Icikil a Israil tamdaw. Pakayni toniya tamdaw, sanay ko sowal ni Yihofa ci Icikilan: “Matiya o midatokay, o romadiway, o palipahakay a pakatawa to finawlan a nengnengen nangra kiso. Lipahak cangra a mitengil to sowal iso. Nikawrira, caay pidoedo cangra.” (Icikil 33:32) Pasowal to pacekiwan to papahanhanen a pacekiw cowa ko madoloay, kawra aka mapawan, ‘cowato ka hakowa ko toki.ˈ Ano papadadotoc a pacekiw to cowa ka cakat a tamdaw, ka pisaˈicel a mikilim to ‘iraay ko matatodongay ko waywayan ngaˈay milifok to tahadaˈocay ˈorip a tamdawˈ ko ngaˈay.​—Dmak 13:48. w20.01 6 fiedac 17 fatac; 7 fiedac 20 fatac

Masowalay no Fangcalay Cudad, o midofdofay to Kawas a tamdaw, wa tahadaˈoc maˈorip i cikiw, kawra adihayay kiyokay cowa pasifanaˈ to tamdaw mafanaˈ toniya soˈlinay kimad. (2 Korinto 4:​3, 4) Kawra pasowalay ko kiyokay, mapatay ko ngaˈayay tamdaw tatayra i kakarayan sanay. Kawra i saikor no 19 hahekalan, oya mitepangay to Mikecolay Micekiway to Fangcalay Cudad a Tamdaw mahapinangay nangra, wa patikolen no Kawas ko Lakoing i cikiw, o midofdofay to Kawas a tamdaw wa itini i fafekang no sera coko i kakarayan a maˈorip. Kawra, o cima koniya tamdaw, ikor cipinangayto cangra. Mikitini i Fangcalay Cudad mahapinangay no Micekiway a Tamdaw, o roma tamdaw ‘miˈacaan i fafekang no sera,’ tatayra i kakarayan malacafay ci Yisan mikowan. (Paˈarawan 14:3) Komoden 144,000 ko ˈaloman, o patafangay to tireng a Krisciyang cangra, fanekfekay a madimadi midoko to Kawas. w19.09 27 fiedac 4-5 fatac