Saka 4 Folad

Makahiay ci Yis pakayni kitaanan kinafalah to ˈorip, paihkalay konini tada maolahay cingra kitaanan. (Yohani 15:13) Tada adihayay ko mihadakan Nangra saki kitaanan, awaay ko pakayraan ita pacoˈay, kawra wa ngaˈay kita pakayni sasowalen ato waywayan to romiˈamiˈad patahkal to miakoˈiday a falocoˈ. (Kolosay 3:​15) O manilnilay no fangcalay saocor a Krisciyang misalimlaay minengneng to sapatefoc, samanen ira ko sapatefoc, ngaˈ iraay ko tokel nangra tayra i kakarayan micada to midaˈocay a ˈorip. (Matay 20:28) Pakasoˈlinay cangra to sapatefoc ni Kristo, mansa o moecelay a tamdaw sanay ko pinengneng ni Yihofa cangranan, micada cangranan malo wawa no Niyah. (Loma 5:1; 8:​15-​17, 23) O roma lopayˈay siri misalimlaay minengneng to sapatefoc. Pakasoˈlinay cangra to malakisay a ˈirang ni Kristo, mansa ira ko awaay ko dangoc a makapahay falocoˈ nangra a midoko to Kawas, ira ko hatokel milakowit to ‘taˈangayay padiing.’ (Paˈarawan 7:​13-​15) Ano manilnilay no fangcalay saocor a Krisciyang, anca roma lopayˈay siri, mirienang kita to Piharatengan a Saˈopo to mihecahecaan, o paihkalay to misaaretengay a minengneng ko niyah to sapatefoc.​—w22.01 23 fiedac 14-​15 fatac

Pakaynien ci Yisan, o katatiihan i cowa ko samanay ko pipatay cingranan, ao tano maanan a raraw ko sapipatay cingranan. Pakokotay ko tamdaw to ciraraway cingra to pakaditay a raraw, misakahmaway to Kawas ato fangcalay ngangan no Kawas sanay. (Matay 26:64-​66) I ˈayaw, maharateng ni Yis paketingen to mahaenay raraw ko niyah, adadaay ko falocoˈ, tokel ningra to kakarayan Wama aka micada cingra to mahaenay a pipakangodo. (Matay 26:38, 39, 42) Papacaˈiten ci Yis i pisemseman a hecek, ngaˈ ngaˈay malidong ko Yutaya tamdaw miliyas to saˈkak no Rikec. (Kalatiya 3:​10) Mikiˈokay ko Yutaya tamdaw mamidofdof to Rikec no Kawas, kawra cowa pakatoor. Mihaenay, cowa ko pakayni aca i raraw ni Ataman, maˈkakayho no Rikec. (Loma 5:​12) Misaˈosiay ko Rikec ni Mosi, ano ciraraw ko tamdaw to sakapatay a raraw, o papatayen, ikor papacaˈiten ko tireng i hecek, sanayho ko rikec, o mapacaˈitay i hecek a tamdaw o miˈkakan no Kawas. (Limoˈot 21:22, 23; 27:26) Mihaenay, itiniay i hecek patayen ci Yis, o patadoay to Yutaya tamdaw micada toniya ˈkak, hato iraay ko toki noniya mifalahay cingranan a finacadan mikitini kinafalah ningra milifok to epoc. w21.04 16 fiedac 5-6 fatac

Haratengen hena, ˈayaw no mapatay ci Yis a romiˈad tahalifaay to maanan. Mihaiay cingra lepelen no sofitay no Loma cingra, mariˈang a misetiˈ cingranan. (Matay 26:52-​54; Yohani 18:3; 19:1) Mipekpekan no sofitay cingra powarsa a masadak ko ˈirang i macinasay heci, dotoc patamorongan to karetengay a hecek i madokaˈay a kolol ningra. Pacieci han ni Yis mitamorong koya hecek tahira pipatayan a kitiraan, kawra caka halafin cato ka pakafilo ko tireng. Orato, pacieciyan no sofitay ko roma tamdaw a mitamorong to pisemseman hecek. (Matay 27:32) Tahira pipatayan a kitiraan, mipacekan no sofitay ko kamay ato waˈay ni Yis i pisemseman hecek. O kareteng no tireng ni Yis madeng micinasay to dokaˈ no kamay ato waˈay ningra, cato pakaemem to adada. Masomaday ko widang ningra, tomangicay ko wina ningra, kawra padotocay malikaf ko ˈaˈideman no pihakelongan. (Luka 23:32-​38; Yohani 19:25) Toniya tatokian, matongalay ko adada. Ikor no pina toki, palidlid sanayto malonay ko falocoˈ ato falaˈ ni Yis, pasangarayto a saselaˈ. ˈAyaw no maketon ko selaˈ, mafanaˈay ci Yis malahciayto ko ˈinorong no niyah, orato mitolonay ci Yihofaan, dotoc ˈicekoy sanayto ko fongoh, maketon ko selaˈ. (Marko 15:37; Luka 23:46; Yohani 10:18; 19:30) O kapatay ni Yis tada halafinay ko pisemsem, tada marorayayto, taˈangayay ko pipakangodo! w21.04 16 fiedac 4 fatac

Somowalay ci Yis to tosa sakiˈok i 11 madimadiay a tarokos, oya faelohay a sakiˈok ato Hongti Kitakit a sakiˈok. (Luka 22:19, 20, 28-​30) Onini tosa a sakiˈok pairaay to hatoki no 11 madimadiay a tarokos ato mimingay ˈopo a Krisciyang tayra i kakarayan malo hongti ato malo saysi. (Paˈarawan 5:​10; 14:1) O manilnilay no fangcalay saocor hanaca maˈoripayho toniya hekal a Krisciyang o masalalomaˈay nonini tosa a sakiˈok a tamdaw, mansa edengan cangra ko ngangaˈay komaen to epang minanom to epah itini Piharatengan a Saˈopo. Kasapaan ko sapafeli ni Yihofa cangranan a hatokel, wa itini cangra i kakarayan milifok to caka patay caka horac a ˈorip, malacafay ci Yis Kristoan ato romaroma patikolay maˈorip tayra i kakarayan a Krisciyang mikowan. Masakalimlaan i, o mamaˈaraw nangra ko Kawas ci Yihofa! (1 Korinto 15:51-​53; 1 Yohani 3:2) Manilnilay no fangcalay saocor a Krisciyang mafanaˈay to matahidangay ko niyah tayra i kakarayan, kawra o tatahira i patay a madimadi cangra. (2 Timoti 4:​7, 8) Miharateng to hatokel noikor palipahakay tonini a Krisciyang.​—Titus 2:​13.w22.01 21 fiedac 4-5 fatac

Iraay ko tatosaay mararaway tamdaw malacafayay ci Yisan mapacek i pisemseman hecek. (Luka 23:40, 41) O cecay a mararaway, micangacangay ci Yisan saan ko sowal: ‘Micada kiso to fadangalan no Hongti i, nanay haratengen kako.’ (Luka 23:42) Mafanaˈay ci Yis matomesay to siniˈada ko kakarayan Wama, mansa ngaˈay mikiˈok cingra, itini ˈayaw no mapatay koniya mararaway paira to hatokel. (ˈOlic 103:8) Malefotay ko paihkal ni Yis to capeling no kakarayan Wama. (Hipray 1:3) Matomesay to siniˈadaay ci Yihofa, makalimay misodod kitaanan. Ano soˈliˈlin kita pasasiyor, pakasoˈlin to mamikorac ko ˈirang ni Yis to raraw ita, o sasododen no Kawas kita. (1 Yohani 1:7) Harateng no roma tamdaw, cato pilifok ko niyah to sasodod ni Yihofa sanay. Ano mahaenay ko harateng iso, haratengen: O cecay citatodongay patayan a mararaway paihkal sanayho to pakasoˈlin ci Yisan, milifokayto to siniˈada ni Yis, mihaenay, oyaho padotocay madimadi midoko ci Yihofaan a tamdaw, coko aikaka ko pilifok to siniˈada ni Yihofa han? ​—ˈOlic 51:1; 1 Yohani 2:​1, 2. w21.04 9 fiedac 5-6 fatac

Maketonayto ko selaˈ ni Yis, malaheciayto ko patorodan ni Yihofa cingranan a kihcod ˈinorong. Samanen tahiraay i patay a madimadi, malaˈosiayto ni Yis ko pina demak. Saka 1, misawacayay ci Yis o mangah ko sowal ni Satan. Hakelong no kaˈorip ni Yis paihkalay, ano samaanto ko demak ni Satan, o malefotay tamdaw wa ngaˈay madimadi to Kawas. Saka 2, kinafalah ci Yis to ˈorip malo sapatefoc, pairaay to toki no cowa kalefot a tamdaw miingid to Kawas, ira ko tokel midaˈoc a maˈorip. Saka 3, misawacayay ci Yis o matatodongay ko saˈakawangay sapikowan a fadangalan ni Yihofa, hanaca mikoracay to mapakaditay a fangcalay ngangan no Kawas. Nanay minengneng kita to kahacecay romiˈad o salikorayto a toki mitafo to madimadiay! Mihaen, soˈlin misiˈayaw to patay, wa ngaˈayho somowal kita: ‘Yihofaaw, misarocodayto kako mitafo to madimadi, misawacay to misamangahay ci Satan, patalahkal to fangcalay ngangan Iso, midama to saˈakawangay fadangalan Iso. O dademaken, malaheciayto ako midemak!’ w21.04 12 fiedac 13-​14 fatac

Mapakokotay no tamdaw ato masawkitay ci Yis, micadaay to salikaf ato pisemsem, ikor mipacekan i pisemseman hecek. Pafeseray ko pacek i kamay ato waˈay ningra, kinacecay saselaˈ cingra, somowal to cecay tilid, tahiraay falocoˈ ko adada. Kawra mihadidiayho cingra to adada a pasowal, samanen masakalimlaan konini a sowal. Mikitini kita i sowal ni Yis i ˈayaw no mapatay, mananamay ko kalimlaan a kimad! Mananamay ita, makahi misodod to tao, pakasoˈlinho to mamisodod ci Yihofa kitaanan. Masalalomaˈay no damsayay a taˈangayay lomaˈ no Krisciyang kita, ˈalomanay salikaka makahiay mihadak to sapadama, tada rahekerayto kita. Kawra, ano ira ko saali ita i, talaˈayaw a micangacang to sadama. Mafanaˈay kita, ano samaanto ko sapalifet noikor, wa ngaˈay padama ci Yihofa kitanan mihadidi. Mamisetek kita to falocoˈ, minengneng to kahacecay romiˈad o salikoray a toki mitafo to madimadiay, hanaca rihaday a patorod to ˈorip no niyah i kamay ni Yihofa. w21.04 8 fiedac 1 fatac; 13 fiedac 17-​18 fatac

Mikotod to pasaripaˈan ni Yis wa ngaˈay kita milifok to midaˈocay a ˈorip. O cecay cihafayay a kapah sakafanaˈaw sasamaan ngaˈ milifok to midaˈocay a ˈorip, pasowalan ni Yis cingra: ‘Ka pikotod takowanan.’ (Matay 19:16-​21) Na pasowalan ni Yis koya cowa pakasoˈlin to ci Kristo cingra a Yutaya tamdaw: ‘O lopayˈay siri ako . . . mikotoday takowanan. Pafelien ako cangra to midaˈocay a ˈorip.’ (Yohani 10:24-​29) Pakasoˈlin a mihakelong kita ci Yisan, o mamitoor to sapasifanaˈ ningra a midemak, minanamho to ngaˈayay taˈarawan ningra. Mihaen, wa ngaˈay kita materek i saka tayra midaˈocay ˈorip a lalan. (Matay 7:​14) Sapikedecaw mikotod to pasaripaˈan ni Yis, wa salakatho a mafanaˈ cingranan. “Mafanaˈ ” ci Yisan o padadotocay a demak, mamicalep kita a cipinang to capeling, harateng ato palinian ningra. Ano hakowaayto ko halafin ita malo Krisciyang, o papadotoc a misaˈicel mafanaˈ ci Yihofaan ato Wawa Ningra. w21.04 4 fiedac 9-​10 fatac

Latekay, maharatengay ni Pawlo ko demak no niyah i salakat, madeng makesemay ko falocoˈ, mansa somowal cingra ‘i lalomaˈay no mararaway a tamdaw’ ko niyah saan. (1 Timoti 1:​15) ˈAyaw no malo Krisciyang ci Pawlo, na milalepelay to Krisciyang, mipalit to roma tamdaw, mihaiho mipatay to roma tamdaw. (Dmak 26:10, 11) Ano ira ko cecay romiˈad, malitemoh ni Pawlo ko kaemangay Krisciyang, mafanaˈ to pakayniyay i niyah ko sakapatay no wama wina ningra, wa ngaˈay haratengen iso samanay ko nafalocoˈan ni Pawlo han? Madeng o mamakesem ci Pawlo to nano demak no niyah i salakat, kawra mafanaˈay cingra cowa ko ngangaˈay mifalic to mataˈlifayto a demak. Pakasoˈlinay ci Pawlo pakayniay ci Kristo cingranan a kinafalah to ˈorip, mansa pakasoˈlin a somowal: ‘Pakayni mikiriwiˈay a sidaˈit no Kawas, hato iraay kako nohatini.’ (1 Korinto 15:​3, 10) Mananamay iso ko maanan? Pakasoˈlinen pakayniay kisowanan ci Kristo mapatay, paira to toki iso malawidang ci Yihofaan. (Dmak 3:​19) Pakaynien i Kawas, kalimlaan i samaan ko demak ita anini ato noikor, cowa ko raraw i salakat.​—Isaya 1:​18. w21.04 23 fiedac 11 fatac

Soˈlin cowa kafanaˈ ko ˈalomanay Yutaya tamdaw to mamapatay ci Misiya, kawra paˈayawayto ko Fangcalay Cudad, ci Misiya ‘wa kinafalah to ˈorip, tahira i patay, masalalomaˈ no ciraraway. Patado to ˈalomanay tamdaw mitamorong to raraw, patado to tamdaw micangacang to sakahepol no raraw.’ (Isaya 53:12) Mihaenay, awaay ko lalangian no Yutaya tamdaw pakayni pisaˈosi to raraw ato kapatay ni Yis, ecato pakasoˈlin cingranan. Anini, ngaˈay kita pakayni i pihapinang to soˈlinay a demak ecato mahafikod. Itini Kimad ni Yis i Lotok patalipaˈelalay to nisawawaan, wa ‘tano masakenaay tatiihay a sowal mapaolaf’ cangra. (Matay 5:​11) Oniya mariˈangay a mangah sahtoay mikitiniay ci Satanan. Misaka dademakan ningra ko misafelitay miyakayak to mangah, midokaˈ to maolahay to soˈlinay kimad a tamdaw. (Paˈarawan 12:​9, 10) Aka pakasoˈlin to mahaenay a mangah, aka matalaw anca mangiyangi ko pakasoˈlin no falocoˈ. w21.05 11 fiedac 14 fatac; 12 fiedac 16 fatac

Padama to pacekiwan mafanaˈ a mitadiˈec ci Yihofaan. Pasowalan ni Yis ko nisawawaan, tada maolahay ci Yihofa cangranan, o papadama cangranan. (Matay 10:19, 20, 29, 30) Pacipinangen ita ko pacekiwan, wa mihaen a midama ci Yihofa cingranan. Malacafay kiso cingranan mitolon i sowalen ko patosokan ningra, wa ngaˈay padama cingranan minanam a mitadiˈec ci Yihofaan. Itiniay i Polan ci Folangcisike sanay: “O singsi ako marariday i satolon somowal to patosokan ako. Tiya maˈaraw ako pipacaˈof ni Yihofa to satolon no singsi, misatapangay kako pasayra i Kawas mitolon. Mifalic kako to faelohay katayalan caka halafin, wa mihifang matayal mirienang to saˈopo ato taykay, toya tatokian, soˈlinay matinako ako ko sapadama ni Yihofa takowanan.” Tada ciharatengay ci Yihofa to pacekiwan ita. Mafanaˈay Cingra hakowaay ko mihadakan no singsi a ˈicel padama to tamdaw miingid Cingranan, mansa tada maolahay cingra cangranan. (Isaya 52:7) Soˈlin awaay ko pacekiwan iso nohatini, ngaˈayayho mirienang to pipacekiw no tao, padama to pacekiwan nangra padadotoc a macakat, malaˈosi ko patosokan micada to paputisem. w21.06 7 fiedac 17-​18 fatac

Ano misalimlaay kita to Fangcalay Cudad, o mamicerid a micekiw. O papadeteng kita milimasmas to toki, cowa ko mamitala to kairaan no toki ngaˈ mihaen to demak. Palahad kita to nanaman micekiw to Fangcalay Cudad a tahatolas, o ngangaˈay padadotoc tanektek ko pakasoˈlinay falocoˈ. Cowa kalecad to ‘citanengay, iraay ko sifanaˈ a tamdaw’ no hekal, tanektekay ko pakasoˈlin ita to Misangaˈay a Tatapangan, hanaca o pakasoˈlin ita misalalangiay to Fangcalay Cudad. (Matay 11:25, 26) Pakayni picekiw to Fangcalay Cudad, mafanaˈay kita to hano malingad ko tatiih no pakayraan noniya hekal, mafanaˈayho sasamaan ko demak ni Yihofa. Mihaenay, nanay misetek kita to falocoˈ, padadotoc mitongal to pakasoˈlin no niyah, misarocodho a padama to ˈalomanay tamdaw pakasoˈlin to Kawas ci Yihofaan. (1 Timoti 2:​3, 4) Nanay padadotoc kita fanekfek mitala to faelohay hekal, maraod ko toki polong no hekal a tamdaw wa taˈangay ko ngiha a pakahemek ci Yihofaan a pasowal: ‘Yihofa Kawas niyam, citatodongay kiso paˈdilen, . . . samanen Kiso ko misangaˈay to kihcod.’​—Paˈarawan 4:​11. w21.08 19 fiedac 18-​20 fatac

O malohemay malitengay o pakaenay no kasakopang, itini pisaali no salikaka iraay ko ˈinorong mihadak to sapalimoˈot. Mamisaˈicel cangra pakayni mihadakan no niyah a sapalimoˈot ngaˈay soˈliˈlin padama to tao, ‘palipahak to falocoˈ.’ (Taneng 27:9) Tada maolahay ko malohemay malitengay to salikaka, mansa ano maˈaraw ko tamdaw mamararaw ko mirakatan a lalan, o mamihadak to sapalimoˈot. (Kalatiya 6:1) Kawra, ˈayaw no palimoˈot to tamdaw ko malohemay malitengay, isalakatho misimsim to sowal ni Pawlo, miharateng to ano iraay ko olah no cecay tamdaw mamisamaan ko demak. Sowal ni Pawlo: ‘O olah, mihadidiay, sidaˈitay. . . . O olah, padadotoc a masasodod, padadotoc a pakasoˈlin, padadotoc a mitokel, padadotoc a mihadidi.’ (1 Korinto 13:​4, 7) Midotim ko malohemay malitengay toniya sinael i, ngaˈay miharateng o maanan ko araaw no niyah mihadak to sapalimoˈot. Mihaen, o ngangaˈayto cingra mikitini ciolahay a falocoˈ palimoˈot to tao. Ano matinako no salikaka ko kaciharateng no malohemay malitengay, o mamadoloto a micada to sapalimoˈot. w22.02 14 fiedac 3 fatac; 15 fiedac 5 fatac

O misangaˈan ni Yihofa a tamdaw ato coyoh na sahtoay o malefotay, kawra ikor iraay ko cecay coyoh mitowakangay, malo Satangay (tatodong i “Misaˈadaay,”) mikayhidayho cingra ci Ataman aci Ifaan mitowakang ci Yihofaan. Ikor, roma a coyoh ato tamdaw mirienangay to kapot ni Satan. Iraay ko lalangian ni Yihofa maketer ato masomad, kawra itini ˈayaw no palaˈafo Cingra to polong mitowakangay i, kamayan Cingra padadotoc mihadidi. Maraod ko toki, ci Yihofa ato polong madimadiay Cingranan a tamdaw wa mahepol ko karetengay ˈinorong, caayto ko mamihadidi to tatiihay a tamdaw tatiihay a demak noniya hekal! Sanay ci Satan, madimadiay a Yopuan edengan pakayniay misatekeday a araaw ko pidoko ci Yihofaan, somowalayho cingra o polong midokoay ci Yihofaan a tamdaw mahaenay a maemin. (Yopu 1:​8-​11; 2:​3-5) Tahanini, kamayan ci Akoma pakokot to finawlan no Kawas. (Paˈarawan 12:10) Ano padadotoc kita mihadidi itini sapalifet, pakayni ka olah ci Yihofaan padadotoc madimadi Cingranan, wa misawacay to sahtoay o mangah ko sowal ni Satan. w21.07 9 fiedac 7-8 fatac

Misaka dademakan no tarokos ci Pawlo ko cecay ciˈicelay a sapatinako mitadtad to mamifalic kita to pakayraan no niyah a maˈorip, sanay cingra o ‘papaceken i hecek’ ko katelangan a capeling ita. (Loma 6:6) Pakayni sapakahemekaw ci Yihofaan, hayi sanay ci Yis kinafalah to ˈorip, paceken no tamdaw i pisemseman a hecek. Malecaday, sapakahemekaw ci Yihofaan, o mamakahi kita tanektek ko pidemak. Mikilamit a mifalah to kaˈintehan ni Yihofa a waywayan ato demak, edengan mihaen ko demak, ngaˈ ira ko makoracay makapahay falocoˈ ato midaˈocay ˈorip a hatokel. (Yohani 17:3; 1 Pitiro 3:​21) Ci Yihofa cowa ko papalecad kitaanan a mifalic to palinian no Niyah. O kita ko mamifalic, hanaca misaˈicel palecad to palinian Ningra. (Isaya 1:​17, 18; 55:9) Soˈlin micadaayto kiso to paputisem, o papadadotoc micoˈay to mararaway a coos. Mitolon micangacang to sapadama ni Yihofa, mitadiˈec to fangcalay saocor Ningra, eca ko ˈicel no niyah. (Kalatiya 5:​22; Filipi 4:6) Sapihelongaw kita to katelangan a capeling, eca ka piliyaw a mararaw, oha mamisetek to falocoˈ. w22.03 6 fiedac 15-​17 fatac

Mikiˈokay ci Yihofa, ano salakaten ita micangacang ko Hongti Kitakit, mitoor to moecelay palinian Ningra maˈorip, o mamidimokos Cingra to sakaˈorip ita. (Matay 6:​33) Maharateng konini, cowato ko caciharateng kita papaira to sadipot ato lipahak ko hafay nonini a hekal. Mafanaˈay kita, dengan mitoor to araaw ni Yihofa a midemak, ngaˈ ira ko soˈlinay rihadayay a falocoˈ. (Filipi 4:​6, 7) Soˈlin iraay ko ˈicel ita micakay to adihayay dafong, o mamisimsim kita wa ira ko toki anca ˈicel ita misaka dademak ato mitomadaw toniya dafong hokira. Wa pakidem ko pitiˈer ita to iraay a dafong no niyah, caay ka ngaˈay awa han? Aka mapawan, itini kita i paro no lomaˈ ni Yihofa adihayay ko hatayal, mihaenay aka makalisanga ko falocoˈ. Itini saka 1 hahekalan, cecay cihafayay a kapah caay kakahi mifalah to hafay no niyah, telocto malahdaway ko toki matayal saki Yihofaan ato malo wawa no Kawas. Cowa ko mamitodong kita to pasaripaˈan ningra!​—Marko 10:17-​22. w21.08 6 fiedac 17 fatac

Ano micekiw to Fangcalay Cudad i, wa mafanaˈ kiso to masakenaay a makapahay capeling ni Yihofa, oniya capeling malecaday o mahapinangay iso i misangaˈan a maamaan. Mafanaˈ to capeling ni Yihofa wa padama tisowanan pakasoˈlin to iraay materek Cingra, mafanaˈ to cowa ko miharatengan aca no tamdaw Cingra. (Kasadakan 34:​6, 7; ˈOlic 145:​8, 9) Matongal ko kafanaˈ iso ci Yihofaan, wa matongal ko pitadiˈec ato kaolah Cingranan, wa tanektek ko kalawidang Cingranan. Pasowalen iso ko tao hano pakasoˈlin kiso to iraay ko Kawas. Ano cisasa ko tao to iraay ko Kawas, kawra cowa ka fanaˈ kiso sasamaan pacaˈof to salicay ningra, sasamaan ko hademak hani? Wa ngaˈay kiso itini mitepangan mikilim to caˈof no Fangcalay Cudad, ikor pasowalen kora tamdaw. Wa ngaˈay kiso mitahidang to iraay ko nalifetan a salikaka padama tisowanan. Misarocod kiso micekiw to lalakaw, soˈlin eca picada ko tao, wa matongal ko tanektek no pakasoˈlin no niyah. w21.08 18 fiedac 14-​15 fatac

Cowa ko mamifalah kita to kihcod kaolahan a dafong ngaˈ milifok to pihayda ni Yihofa. (Patnakay 5:​19, 20) Kawra, ano pakayniay kanaˈay ita a kinafalah eca kakahi mitongal to tayal saki Cingranan, malecaday o patinakoan ni Yis a cihafayay mararaw ko demak. Oniya cihafayay o sinowayay aca a kaˈorip ko miharatengan, cowa piharateng to Kawas. (Luka 12:16-​21) Ano tahalifa kita to pasangaray i, ka pasayra i Kawas a mitolon, hanaca misarocod a mikilim to hapakayraan misaysay. (Taneng 3:​21) Pafeliay ci Yihofa kitanan to adihayay a sapalemed. Misarocod kita paˈodingar Cingranan, o paihkalay to tada miakoˈiday kita Cingranan. (Hipray 13:15) Wa ngaˈay kita mitanam to faelohay a pakayraan matayal saki Yihofaan, ho ngaˈay ko niyah milifok to adihayay sapalemed. Nanay kita to romiˈamiˈad mikilim to kasasiroma a pakayraan ‘milifet’ a mihapinang to kangaˈay ni Yihofa. (ˈOlic 34:8) Mihaen, kita wa malecad ko harateng ci Yisan, sanay cingra: ‘O kakaenen ako o pidemak to araaw noya miocoray takowanan, milahci to tayal Ningra.’​—Yohani 4:​34. w21.08 30-​31 fiedac 16-​19 fatac

Mitokelay ci Satan lomahad i falocoˈ ita ko misatakaraway a waywayan. Mafanaˈay cingra, ano malo malitaˈangay a tamdaw kita, o mamalecadto cingranan, hanaca mamalahdaw ko tahadaˈocay a ˈorip. Mansa saan mirikec ko tarokos ci Pawlo, o cecay tamdaw ‘misatakaraw a malitaˈang, papasangar miliyas to macadaay ni Akoma a sasawkit.’ (1 Timoti 3:​6, 7) Ano faelohay micada to paputisem kita, anca halafinayto midoko ci Yihofaan, o mahaenay a demak o mamifekad i tireng ita alatek. O misatakaraway a tamdaw oniyah aca ko maharatengay. Makalimay ci Satan misateked ko harateng ita, mangalef ano tahalifa to pasangaray o niyah aca ko dimokosen, eca ka pisikor to samanay ci Yihofa a miharateng. Tinakoen, na mapaorafay kiso anca tahalifaay to cowa ka sadafdaf a pakayraan han? Makalimay ci Satan maˈaraw kiso miroroh ci Yihofaan ato salikaka. Kalim ningra kisowanan awaay ko kapo mihakelong to sakayat ni Yihofa saan ko harateng, edeng tano niyah a pakayraan a misaysay to pasangaray.​—Patnakay 7:​16, 20. w21.06 15 fiedac 4-5 fatac

Pafelian ni Yihofa ci Hakay to cecay kalimlaan a ˈinorong. ˈAyaw no Kongyen 537 miheca, o Yutaya tamdaw mikitini Papilon minokay tayra i Yirusalim, masalalomaˈay ci Hakay alatek. Tahira cangra caka halafin oniya madimadiay midoko ci Yihofaan a tamdaw, patirengay to taˈeneran no fangcalay sefi. (Icra 3:​8, 10) Ka adayayan i, ikor pakayni pisafelit no ˈada matoleday cangra, hawad sanay to patireng to fangcalay sefi a tayal. (Icra 4:4; Hakay 1:​1, 2) Orato itini ˈayaw no Kongyen 520 miheca, miocoran ni Yihofa ci Hakay pakalalok to Yutaya tamdaw a talifak, milahci to patirengay to fangcalay sefi a tayal. (Icra 6:​14, 15) O milasilan ni Hakay a lihaf paˈicelay to pakasoˈlinay falocoˈ no Yutaya tamdaw ci Yihofaan. “Kakeridan no sofitay i kakarayan ci Yihofa” oniya ngangan mitadtaday, iraay ko cecay taˈangayay a ˈopo a coyoh ni Yihofa, maedeng tataˈangay ko pakalalok to Yutaya tamdaw. Sakalaˈosiyaw cangra, mamitiˈer ci Yihofaan ngangaˈay. w21.09 15 fiedac 4-5 fatac

Anini Misawacayay Tamdaw ni Yihofa malecaday o paro no lomaˈ, makelecay masasiolahay, awaay ko roma lekakawa malecad kitaanan pakaremo to kasasiroma no kitakit, finacadan ato saaroˈan. O saˈopo ita ato taykay matomesay to soˈlinay a olah no salikaka. Onini patongalay to pakasoˈlin ita, o pakayraan ita a midoko o mihaydaan ni Yihofa. (Yohani 13:34) Palimoˈotay ko Fangcalay Cudad kitaanan ‘ka fanekfek a masasiolah.’ (1 Pitiro 4:8) O cecay pakayraan i makahi a misodod to tao, mihepol to dangoc no tao. Mamisaˈicel kita mikilim to toki, paihkal to hinapaladaˈay hinalafangay a harateng i polong a salikaka, mahawpay koya pakararaway kitaanan a tamdaw. (Kolosay 3:​12-​14) O mahaenay a olah soˈlinayto o sakakaay a capeling no soˈlinay a Krisciyang. w21.10 22 fiedac 13-​14 fatac

O cecay tamdaw ano mararaw eca ka kahi pasasiyor, mifalah cingranan o sasoˈlin ngaˈay padama cingranan pasasiyor a misafaeloh han? Hai. ˈAlomanay pakidemay ko raraw a salikaka sanay, o mifalahay a limasmas padamaay cangranan patalipaˈelal, pasasiyor a misafaeloh, patikol tayni i tatihi ni Yihofa. (Hipray 12:​5, 6) Nengnengen ita ko cecay sapatinako. Adadaay ko cecay siri, mafanaˈay ko pakaenay tamdaw miadah to hatiniay adada, paliyasen cira ato roma siri. Kawra o siri o masafelaway a pinaˈorip, ano paliyasen wa cariraw ko harateng. Mihaen ko demak no pakaenay tamdaw awaay ko olah hokira? Cowa! Mafanaˈay cingra ano adadaay siri paterek i lalomaˈ no siri, o roma siri mamadenga, edengan paliyasen ko adadaay a siri ngangaˈay midipot to roma siri. w21.10 10 fiedac 9-​10 fatac

Ngaˈay masalalomaˈ no ciolahay a paro no lomaˈ i paro no kakarayan, tada kalikoanto! Mitokelay kita ira ko ˈalomanay tamdaw micomod toniya taˈangayay a paro no lomaˈ, malacafay kitanan midoko ci Yihofaan. Mihaenay, caay kakahi kita midemak to mipalakay to ngangan no Kawas a demak, caay kakahi ira ko tatiihay a pinengneng no tao to finawlan no Kawas. Misaˈicel kita mitafo to ngaˈayay a waywayan, misolot to tao mafanaˈ ato midoko ci Yihofaan. Latekay, pakayni pidofdof ita to kakarayan Wama tahalifaay to pilikaf ato sapalak. Ano matalaw ko harateng ita, caka timolo milengo to pihakelongan no niyah i tao, sasamaanto hani? Ngaˈayay pakasoˈlin kita, ci Yihofaan ato wawa Ningra o papadama kitaanan. Mikiˈokan ni Yis ko nisawawaan, aka calemcem cangra to o maanan ko hasowal ato sasamaan somowal, misamanay hani? Mitadtaday ci Yis: ‘Maraod ko toki, o mamafanaˈ kamo o maanan ko hasowal, samanen o somowalay cowa ko kamo, o fangcalay saocor no Wama namo pakayniay tamowanan a somowal.’​—Matay 10:19, 20. w21.09 24 fiedac 17-​18 fatac

Ci Mosi na patinakoay ci Yihofaan to pilimekan. (ˈOlic 90:1 ato roma pihongyak.) ˈAyaw no mapatay cingra i somowalay to mitemeray to falocoˈ a sowal: ‘Mikitini nolitengan o pilimekanto ko Kawas, midaˈocay a kamay Ningra midamaay tisowanan.’ (Limoˈot 33:27) Samaanay ci Yihofa misaka dademak to midaˈocay a kamay Ningra midama kitaanan hani? Ira ci Yihofa malo pilimekan, rihakeday ko harateng no mita. Kawra latekay matoleday ko falocoˈ ita, malecaday o mapolinay pasangarto a lomowad. Toniya tatokian sasamaan ci Yihofa padama kitaanan hani? (ˈOlic 136:23) Tatano kamay Cingra damsay a palowad kitaanan, ngaˈay kita miliyaw tanektek tomireng. (ˈOlic 28:9; 94:18) Ci Yihofa o tahadaˈocay a pitiˈeran no mita, mansa ira ko tosa sapalemed: (1) Ano icowato kita iraay ko rihakeday a pilimekan. (2) Milifok to tangongolay ka ciharateng no kakarayan Wama. w21.11 6 fiedac 15-​16 fatac

Mafanaˈay ci Yis, micada ko nisawawaan to cowa ka sadafdaf a demak o papalifet to pakasoˈlin nangra, mansa somowal cingra to maˈoningay i Luka a sapatinako. O cecay maponengay fafahiyan padotocay micangacang to cowa ka moecel a misawkitay patado cingranan masadafdaf ko pisawkit, pakasoˈlinay cingra ano padadotoc eca pisawad ko niyah, o papadama koya misawkitay cingranan. Salikor, mihaiyay koya misawkitay to saali ningra. Mananam ita ko maanan hani? O masadafdafay ci Yihofa, mansa somowal ci Yis: ‘Oya mipiliˈan Ningra a tamdaw saromiˈamiˈad saan micangacang Cingranan, coko papatado Cingra cangranan masadafdaf ko pisawkit han?’ (Luka 18:​1-8) Sanayho ko sowal ni Yis: ‘Ano ira ko wawa no tamdaw i, itini fafekang no sera mamahela ko mahaenay a pakasoˈlin han?’ Ano tahalifa kita to cowa ka sadafdaf i, pahecaden toya maponengay ira ko tanektekay a pakasoˈlin, padadotoc mihadidi, tanektek eca pisawad. Ira ko mahaenay pakasoˈlin ita, ngaˈayto pakasoˈlin to papatado ci Yihofa kitaanan masadafdaf ko pisawkit. Pakasoˈlinho kita to ˈicel no satolon. w21.11 23 fiedac 12 fatac; 24 fiedac 14 fatac

Kaemangay tamdaw, latekay pakidemay ko palinian ni Yihofa sanay kiso miharateng han? Makalimay ci Satan mahaen ko harateng iso. Oya romakatay i “kakahaday” a lalan a tamdaw hato lipahakay nengnengen, makalimay ci Satan micerid kiso ciharateng to o maanan ko demak nangra. Papiharateng cingra tisowanan o cafay iso micudad ato maˈaraway iso i wangcan a tamdaw ikakaay ko ngaˈay no kaˈorip tisowanan, kawra o palinian ni Yihofa micaraay tisowanan lipahak ko kaˈorip. Haratengen, cowa ka olah ci Satan mafanaˈ ko tamdaw to tatalacowa ko tolas no “kakahaday” a lalan. (Matay 7:​13, 14) Kawra maharekayto ci Yihofa ihkal pasowal tisowanan, ano materek kiso i “kaemingay” a lalan, o aira ko ˈodingaray a hanoikor.​—ˈOlic 37:29; Isaya 35:​5, 6; 65:​21-​23. w21.12 23 fiedac 6-7 fatac

Mafanaˈay kita misodod to tao o matatodongay, o hahaenen ko demak. Kawra madoloay a sowalen, pasangaray demaken. Iraay ko mahaenay harateng no tarokos ci Pitiro. (Matay 18:21, 22) Samaan ko demak ita, wa madoloto a misodod to tao hani? Salakat, haratengen kinapinaay ci Yihofa a misodod kitaanan. (Matay 18:32, 33) Soˈlin awaay ko tatodong ita milifok to sasodod ni Yihofa, kawra kamayan Cingra mikifalocoˈ a misodod kitaanan. (ˈOlic 103:​8-​10) Ano mahaenay, ‘o mamasasiolah kita,’ sakoniya sowal, iraay ko ˈinorong ita a misodod to salikaka, o mamihaen ko hademak. (1 Yohani 4:​11) Dotoc, haratengen ko ngaˈayay minaroˈan no misododay. Mikifalocoˈ kita a misodod, o sakangaˈay noya pakararaway kitaanan a tamdaw, wa ngaˈayho micowat to kakelec no kasakopang, midama to kalawidang ita ci Yihofaan, ato mihepol to karetengay ˈinorong no falocoˈ. (2 Korinto 2:7; Kolosay 3:​14) Saikor, tolonen ko Kawas micangacang to sapadama, samanen o Kawas ko misaaliay kitaanan misodod to tao. Aka pairaen ko hatoki ni Satan, mipalak to rihaday ita i kalalaˈed to salikaka. (Ifiso 4:​26, 27) Misaaliay kita to sadama ni Yihofa, ho eca ka makefeng i talakal ni Satan. w21.06 22 fiedac 11 fatac; 23 fiedac 14 fatac

Milaliway ci Tafiti, samanen o hongti no Israil ci Sawlo sapipatayaw cingranan. Itini pilaliw awaay ko kakaenen ni Tafiti, orato micomoday i niyaroˈ no Nop micangacang to saysi pafeli to lima a epang cingranan. (1 Samuil 21:​1, 3) Ikor, ci Tafiti ato sikawdan milimekay i cecay ofang no lotok. (1 Samuil 22:1) Hano sahatini sato ko pakayraan ni Tafiti hani? Maolahay ko finawlan ci Tafitian, marariday pakalowid milood, pakayniay ko kaˈinap ni Sawlo ci Tafitian. Mafanaˈayho ci Sawlo mipiliˈayto ci Yihofa ci Tafitian mikotay cingranan malo hongti no Israil. (1 Samuil 23:16, 17) Kawra, o hongtiho no Israil ci Sawlo itiya, iraay ko ciˈicelay a sofitay ningra, ˈalomanayho ko midamaay cingranan, mansa milaliw ci Tafiti. Harateng ni Sawlo wa ngaˈay ko niyah misafelit to araaw ni Yihofa, eca pala hongti ci Tafitian han? (Isaya 55:11) Cowa ka somowal ko Fangcalay Cudad, kawra ngaˈayay pakasoˈlinen, mihaen ko demak ni Sawlo mikidatay to sakatekop no niyah, samanen o mitowakangayho ci Yihofaan a tamdaw, saikor o papasokiyaw maemin. w22.01 2 fiedac 1-2 fatac

Misaˈicelay ci Yis a mitosil. Maolahay ci Yis to tao, mansa mimetmetay to kahacecay a toki pasifanaˈ cangranan. (Luka 19:47, 48) Hano misaˈicel cingra hani? Samanen siniˈadaay cingra to tamdaw. Nolatekay, ˈalomanay ko tamdaw mitengil to sowal ningra, telocto ‘awaay ko toki ni Yis ato nisawawaan a komaen.’ (Marko 3:​20) Kinacecayay, iraay ko tamdaw itini i dadaya mikilim cingranan, makahiay cingra micada tonini a tamdaw. Soˈlinay i, ˈalomanay mitengilay to pitosil ni Yis a tamdaw cowa pikotod cingranan, kawra misongilaˈan ni Yis misawacay ko kahacecay a tamdaw. Anini, makalimay kita patengil to ngaˈayay lihaf i tamdamdaw. (Dmak 10:42) Aka o kangaˈayan aca no niyah a tatokian ko piliˈen ita a mitosil, ao mamakahi a misalof, mipiliˈ to madoloay malitemoh ko tamdaw a tatokian a mitosil. Ano mihaen ko demak ita, tada papakahemek ci Yihofaan. w22.01 17 fiedac 13-​14 fatac

Anini ˈalomanay tamdaw pasangaray pakasoˈlin to cifadangalay a tamdaw, maˈaraway nangra o sifo ato holic misakakinihay midama to cifadangalay a tamdaw, kawra cowa ka ciharateng to sakangaˈay no manikaway a tamdaw. Maˈarawayho no tamdaw ko malafoay a waywayan no ˈaˈideman no pihakelongan, telocto malahdaway ko pakasoˈlin to Kawas. Mihaenay, pasangaran nanay kita a padama to sito no Fangcalay Cudad mafanaˈ a mitadiˈec ci Yihofaan ato mikeriday i likakawa Ningra a tamdaw. Manaokaniw cowa ko sito aca no Fangcalay Cudad ko maminanam mitadiˈec ci Yihofaan ato likakawa Ningra, soˈlin halafinayto midoko ci Yihofaan a tamdaw, o papadadotoc pakasoˈlin ci Yihofaan, pakasoˈlin sahtoay o sangaˈayay ko pakayraan Ningra a dademak. Itini roma a pakayraan, o pakasoˈlin ita Cingranan mamicada to sapalifet alatek. w22.02 2 fiedac 1-2 fatac