Saka 5 Folad

Sapadamaaw kitaanan mafanaˈ ci Yisan, pafeliay ci Yihofa kitaanan to sepat Ratoh a Cudad. Oniya sepat Cudad maˈoningay ko kaˈorip ato mitosilay a tayal ni Yis i fafekang no sera, o sasowalen ato waywayan, ato harateng ningra, oniya lalakaw papadama kitaanan ‘misongilaˈ miharateng to taˈarawan ningra.’ Oniya maˈoningay malecaday o miterekan ni Yis a ‘pasaripaˈan’, misamacay kita a micekiw, wa matongal ko kafanaˈ ci Yisan, mikedec a mikotod to pasaripaˈan ningra. Sapinanamaw to adihayay i Ratoh a Cudad, aka o pinengneng aca, palaken ita ko adihayay toki misongilaˈ a micekiw, misongilaˈ a midotim. (Nengnengen ko Yosuwa 1:8.) Sapaˈoripaw to maˈoningay no Ratoh, sakadademaken iso ko sapiharateng a ˈicel minengneng, mitengil, mitinako to mifekaday a demak itiya. Roma i, ngaˈayay sakadademaken iso ko mihadakan no likakawa sapicekiw a lalosidan micalep a mikingkiw. w21.04 4-5 fiedac 11-​13 fatac

ˈAyaw no tayni ci Yis i fafekang no sera to pina soˈot miheca, maharekayto ci Yihofa pairasol, wa tano 30 linkim pacakayen no tamdaw ci Misiya. (Cikariya 11:12, 13) Somowalayho ko Fangcalay Cudad, o pacakayay ci Yisan oya ngaˈayay widang ningra. (ˈOlic 41:9) Roma i, pairasolay ci Cikariya: ‘ ˈOdisen ko pakaenay tamdaw, pakiyadi han maliwasak ko masafelaway a siri.’ (Cikariya 13:7) Ano maolah ko tamdaw to soˈlinay kimad, maˈaraw ko katatodong noniya sapairasol i tireng ni Yis cowa ko mamahafikod, ao mamatongal ko tanektek. Anini iraay ko malecaday a pasangaray han? Iraay. Anini lintad, o roma na cinganganay i likakawa no Kawas a tamdaw miliyasay to soˈlinay kimad, malo mitowakangay to kimad, mihalakaayho misolot to tao mihakelong cangranan. Oniya tamdaw itiniay sinpon ato wangcan milasil to tatiihay lihaf, o makaniway ato mangah, paolaf to Misawacayay Tamdaw ni Yihofa. Kawra o maolahay to soˈlinay kimad a tamdaw cowa ko mamahafikod, ao mahapinangay ko katatodong no sapairasol no Fangcalay Cudad.​—Matay 24:24; 2 Pitiro 2:​18-​22. w21.05 11 fiedac 12 fatac; 12-​13 fiedac 18-​19 fatac

Sowal no Fangcalay Cudad o finawlan no Kawas misaaliay to toki palidlid saan mitongal to matatodongay a sifanaˈ. (Kolosay 1:​9, 10) Palidlid sanay ci Yihofa padama to tamdaw cipinang to soˈlinay kimad, mihaenay o mamakahi kita mihadidi a mitala to pipatedi no soˈlinay kimad. Kawra, ano mahapinang no Malohemay Malitengay i Congpo ko sasalofen a pinengneng i, tangsolay a midemak. Misalof ko adihayay kiyokay, o sapakaolahaw to ˈalomanay a mihakelongay. Kawra o pisalof no Misawacayay Tamdaw ni Yihofa, pakayniay sapitongalaw miingid to Kawas, pakayniayho sapitooraw to patirengan ni Yis a taadoan midoko to Kawas. (Yakop 4:4) Misalof kita to pinengneng, cowa ko pakayniay kafalic no pinengneng no hekal a tamdaw, ao pakayniay ka ihkal no kacipinang to Fangcalay Cudad. Soˈlinayto a maolah kita to soˈlinay kimad!​—1 Tisalonika 2:​3, 4. w21.10 22 fiedac 12 fatac

Ano matoˈol kiso i, samaan ko hademak? Songilaˈen miharateng padadotocay ci Yihofa padama tisowanan. (ˈOlic 55:22) Mihaen ko demak iso, wa matatodongto ko pinengneng iso to niyah. Songilaˈen miharateng samanay ci Yihofa padama to romaroma salikaka. (1 Pitiro 5:​9, 10) Edengan ci Hawce ko midokoay ci Yihofaan i paro no lomaˈ. Sanay cingra: “Maˈaraw cangra misarocoday a midoko ci Yihofaan, mapakalalokay kami o awaay ko sadama no salawina a tamdaw.” Roma i, tafoen ko ngaˈayay nanaman a midoko. Tolonen ci Yihofa, pasowalen Cingra to nafalocoˈan. Micerid micekiw to Fangcalay Cudad o kalimlaan. O roma maˈoningay ano mikiriwiˈay matinako iso ko olah ni Yihofa, songilaˈen a midotim. O roma tamdaw miharatengay to mihinomay cangranan a sinael, tinakoen i ˈOlic 27:10 ato Isaya 41:10. Roma tamdaw ano misaday to saˈopo anca micekiw to Fangcalay Cudad i, mitengilay to milokoingan a lalakaw, mihaen cowato ka matoˈol ko harateng nangra. w21.06 9-​10 fiedac 5-8 fatac

Pakayni kapatay no salawina ato ngaˈayay widang masomaday kiso han? Songilaˈen micekiw ko pakayniay patikol maˈorip a maˈoningay i Fangcalay Cudad, paˈicel to pakasoˈlin no niyah to patikol maˈorip ko mapatayay. Ano mafalah ko paro no lomaˈ adadaay ko falocoˈ iso han? Songilaˈen micekiw, padama to niyah pakasoˈlin o sapirikec ni Yihofa sahtoay o ngaˈayay. Ano o maananto ko malifaay iso a pasangaray, o ngaˈayay a toki patanektek to pakasoˈlin han ko pinengneng. Ngaˈay kiso itini satolon ihkal ko pihadak to nafalocoˈan no niyah. Aka a misiwatid ko niyah, ka padotoc a micawmaˈ to salikaka. (Taneng 18:1) Soˈlin maharateng iso ko salakatay a demak masomaday a tomangic, padadotocenho midemak ko papadama tisowanan mitafo to mihadidiay a demak. (ˈOlic 126:​5, 6) Ka padotoc mirienang to saˈopo ato mitosil, micekiwho to Fangcalay Cudad, miceridho miharateng to sapafeli ni Yihofa tisowanan a makapahay a noikoran. Ano mahapinang iso padotocay padama ci Yihofa tisowanan, mamatongal ko tanektek no pakasoˈlin. w21.11 23 fiedac 11 fatac; 24 fiedac 17 fatac

Hano saan ko sowal, o nisawawaan ni Yis o ‘sasafaay a tamdaw’ hani? Haratengen, o masamanay tamdaw ko misaaretengan no tamdaw minengneng hani? Oya adihayay ko payci, cinganganay, cifadangalay a tamdaw. Kawra o nisawawaan ni Yis awaay ko saaroˈan, cowa ko kalimlaan, ano nengnengen o ‘sasafaay a tamdaw.’ (1 Korinto 1:​26-​29) Kawra cowa kalecad ko pinengneng ni Yihofa. Hano milengo ci Yis toniya ‘sasafaay a tamdaw’ hani? Samanen milicayay ko nisawawaan ningra to cecay a salicay: ‘Itini kakarayan Hongti Kitakit, o cima ko sakakaay hani?’ (Matay 18:1) Toya lintad, misaaretengan no Yutaya tamdaw minengneng ko saaroˈan. Cecay mikakingkiway tamdaw sanay: “Hakelong no kaˈorip no tamdaw micangacangay to ˈdil, ngangan, ato pihayda pikangodo no tao, makahiay pakayni a mapatay.” Mafanaˈay ci Yis wa misaˈicel ko nisawawaan ngaˈ masawad ko malalifetay a harateng, samanen o mahaenay a harateng cilamitayto i lekakawa no Yutaya. w21.06 20 fiedac 2 fatac; 21 fiedac 6, 8 fatac; 22 fiedac 9 fatac

O tarokos ci Pawlo patirengay to ngaˈayay a taˈarawan no malohemay malitengay. Tiya misaali to sapatalipaˈelal ko Tisalonika a salikaka i, pafeliay ci Pawlo to ngaˈayay a sapalimoˈot i cangranan. Kawra itini i lalomaˈ no mitilidan a tikami i, salakatay pakahemek ci Pawlo cangranan to mikitiniay i pakasoˈlin no falocoˈ a waywayan, mikitiniay olah a roray, ato paihkalan nangra a mihadidiay. Roma i, pasowalayho cingra to salikaka, tada cipinangay cingra to pakayraan nangra, mafanaˈay to pasangaray ko kaˈorip nangra, tahalifaay to sapalak. (1 Tisalonika 1:3; 2 Tisalonika 1:4) Pasowalayho ci Pawlo o ngaˈayay a taˈarawan no romaroma a Krisciyang cangra. (1 Tisalonika 1:​8, 9) Matengil ko mikifalocoˈay a sapakahemek ni Pawlo, madeng tada mahemekay ko salikaka. Awaay ko hasasa, tada maolahay ci Pawlo to salikaka, mansa o sapalimoˈot ningra tangongolay mitemer to falocoˈ nangra.​—1 Tisalonika 4:​1, 3-5, 11; 2 Tisalonika 3:​11, 12. w22.02 15 fiedac 6 fatac

Ci Satan sakadademakay to ˈaˈideman no pihakelongan a paoraf ci Yihofaan, tada mariˈangay Cingra sanay, o pades no tamdaw sahtoay Cingra ko pairaay. O roma ˈaˈideman no pihakelongan sanay, ano mapatay ko wawa o misaaliay ko Kawas to ˈalomanay a coyoh itini kakarayan, mansa miˈorong cangranan paliyas. Tada pakaditay konini to Kawas! Mafanaˈay kita caay ko awaay ko olah no Kawas. Ano aretengay ko adada ita anca mapatay ko salawina, cowa ko mamiroroh kita to Kawas. Pakasoˈlinay Cingranan, pakasoˈlin to mamiadah Cingra to adadaay a tamdaw noikor, papatikol paˈorip to mapatayay a tamdaw. Wa misaˈicel kita misawacay, pasowal to tao tada ciolahay ci Yihofa, mihaen wa ngaˈay ci Yihofa pacaˈof to milikafay Cingranan a Akoma Satan. (Taneng 27:11) Ci Yihofa o matomesay to siniˈada a Kawas. Ano maˈaraw pakayni kita i sapalak, adada anca dangoc no niyah a maroray, tada adadaay ko falocoˈ Ningra. (ˈOlic 22:23, 24) Matinakoay ni Yihofa ko roray ita, makalimay sapadamaaw kitaanan, hanaca o mamihaen to demak.​—Nengnengen ko Kasadakan 3:​7, 8; Isaya 63:9. w21.07 9-​10 fiedac 9-​10 fatac

Cato ka halafin, o polong midofdofay ci Yihofaan a tamdaw wa ngaˈay tahadaˈoc maolah ato midoko ci Yihofaan, o sakakaay kalimlaan a sapalemed konini! O pairaan ni Atam aci Ifa a tatiihay demak i paro no lomaˈ no Kawas, wa saysayen ni Yis a maemin. Papatikolen ni Yihofa paˈorip ko pinaay soˈot emang a mapatayay tamdaw, paira to hatoki nangra itini lakoing milifok to malefotay a kaˈorip. (Luka 23:42, 43) Ano patikol a malefot ko paro no lomaˈ no Kawas i fafekang no sera i, o kahacecay tamdaw papaihkal to malecaday misowalan ni Tafiti ira ko ‘ ˈdil ato ˈodingar.’ O masalalomaˈay no ‘taˈangayay ˈopo a tamdaw’ kiso han? Iraay ko makapahay a hatokel iso! (Paˈarawan 7:9) Tada maolahay ci Yihofa tisowanan, makalimay Cingra malo tamdaw no paro no lomaˈ Ningra kiso. Mihaenay sarocoden a pakahemek ci Yihofa, to romiˈamiˈad misimsim to sakiˈok Ningra. Ira ko tatodong iso midoko to kakarayan Wama, ira ko tokel tahadaˈoc pakahemek Cingranan, songilaˈen misalimla koniya sano odoˈay a sapalemed! w21.08 7 fiedac 18-​19 fatac

Itini pitosil ni Yirimiya to 40 miheca, caay ka olah ko ˈalomanay tamdaw, misafelitayho cingranan. Samanen ‘makapoˈiay ato malikafay no tao cingra’ mansa tada matoleday ko falocoˈ, sapisawadaw sanay a mitosil. (Yirimiya 20:​8, 9) Kawra cowa ka pisawad cingra. O manan ko padamaay cingranan miremo to masofaway a harateng padadotoc lipahak hani? Misamacayay cingra to tosa kalimlaan a demak. Saka 1, palimoˈotan ni Yihofa cingra milasil to lihaf ‘paira to hatokel’ no tamdaw. (Yirimiya 29:11) Saka 2, panganganan ni Yihofa cingra to ilaenoay no ngangan no Niyah a tamdaw. (Yirimiya 15:16) Malecaday kitaanan, itini patoleday to falocoˈ a hekal kita milasilay to pairaay to hatokel a lihaf, hanaca ira ko tatodong malo ilaenoay no ngangan ni Yihofa a tamdaw. Edeng misamacay kita tonini kalimlaan a demak, ano samaanto ko harateng no tao, ngangaˈay kita padadotoc a lipahak. Ano manaˈon ko kacakat no pacekiwan i piharateng iso, aka matoled, aka a pisawad, pairaen ko mihadidiay a falocoˈ.​—Yakop 5:​7, 8. w21.10 27 fiedac 12-​13 fatac

Ano hakowato ko halafin ita midoko ci Yihofaan, wa padadotoc mitongal to pakasoˈlin ci Yihofaan, misamanay? Samanen ano misakahmaw ko falocoˈ ita, wa malonay ko pakasoˈlinay a falocoˈ. Haharatengen, o pakasoˈlinan ita o cowa kaˈaraw a soˈlinay a demak. Samanen cowa kaˈaraw, mansa wa madolo a mapawan. Mansa mihaen ko sowal ni Pawlo, cangoˈotay ko pakasoˈlinay a falocoˈ o ‘mamifedfed kitanan a raraw.’ Mihaenay, sasamaan kita ngaˈ padadotoc tanektek ko pakasoˈlinay a falocoˈ hani? (2 Tisalonika 1:3) Salakat, padadotoc micangacang ci Yihofaan pafeli to fangcalay saocor kitaanan. Misamanay hani? Samanen o pakasoˈlinay falocoˈ o minaroˈan no fangcalay saocor. (Kalatiya 5:​22, 23) Ano awaay ko sadama no fangcalay saocor, ecato ka ngaˈay kita mitongal ato padotoc pakasoˈlin to Misangaˈay a Tatapangan. Ano padadotoc kita micangacang, o papafeli Cingra to fangcalay saocor kitaanan. (Luka 11:13) Itini satolon wa ngaˈay haenen ko sowal ita: ‘Nanay tongalen Iso a paˈicel ko pakasoˈlin no falocoˈ niyam.’ (Luka 17:5) Dotoc, micerid micekiw to Fangcalay Cudad.​—ˈOlic 1:​2, 3. w21.08 18-​19 fiedac 16-​18 fatac

O matoˈasay salikaka adihayay ko sapadama to likakawa ni Yihofa! Soˈlin cowato ka lecad cangra to kapah adihay ko ˈicel, kawra halafinay mihecaan adihayay ko mataringay nangra a nalifetan, o kalimlaan a hafay konini. Soˈlinayto, itini adihayay pakayraan wa ngaˈay ci Yihofa padotoc a misaka dademak cangranan. Itini Fangcalay Cudad, adihayay ngaˈayay a taˈarawan nolitengan a sikawdan itini katoˈasan a tatokian kamayan fanekfek tawlik matayal saki Yihofaan. Tinakoen, itini 80 ko mihecaan ni Mosi, manilnilay ni Yihofa cingra malo pairasolay ato ˈaˈideman no Israil tamdaw. O pairasolay a Taniil tahira i 90 ko mihecaan padadotocay mitaypiyaw ci Yihofaan a somowal. O tarokos ci Yohani micadaay to sakayat no Kawas a mitilid to Paˈarawan, mataˈlifayto ko 90 no mihecaan alatek. Iraho koya ‘moecelay soˈlinay ko falocoˈ ’ a Simiyongan, soˈlin kantangay ko pisowal no Fangcalay Cudad to demak ningra, kawra cipinangay ci Yihofa to nafalocoˈan ningra, ngaˈay maˈaraw ningra koya hofoc hananayho a Yisan, hanaca somowal to milingatay i wawa ato wina ningra a sapairasol.​—Luka 2:​22, 25-​35. w21.09 3-4 fiedac 5-7 fatac

Wa minaˈon ko wama wina, aka palalinien ko wawa no niyah ato wawa no tao, aka pakidem ko saali to wawa. Mihaen o papatoled to falocoˈ no wawa, ira ko ˈinteh no falocoˈ alatek. (Ifiso 6:4) O cecay ci Since fafahiyan salikaka sanay: “Tokel no wina 100 maemin ko tingso no misikingan ako, kawra caay pakadangar kako. Soˈlin halafinayto micodiyap kako, kawra latekay kamayanho maharateng ako, ano hakowato ko pisaˈicel ako cowa ko mamarenec ci Yihofa.” Sowal no Hongti ci Tafiti ‘caay pisalataˈataˈang kako, caayto pidemak to cowa ka dangar a demak.’ Tada misapoeneray cingra, misamimingayho, mansa rihadayay ko falocoˈ ningra. (ˈOlic 131:2) O malo wamaay ato wina wa ngaˈay mikitini sowal ni Tafiti minanam to maanan hani? Ano misamimingay ko wama wina, cowa ko ˈaˈakawang ko pilongoc to niyah, cowa ko papakidem ko saali to wawa. Ngaˈayay padamaen no wama wina ko wawa mihapinang to mamadangar ato caay ko mamadangar no niyah, patireng to matatodongay a patosokan, mihaen wa matongal ko pakasoˈlin no wawa to niyah. w21.07 21-​22 fiedac 5-6 fatac

Haratengen ita, pafeliay ci Yihofa to kahacecay tamdaw to pasalatay a harateng, ngaˈay kita mipiliˈ to mamidofdof Cingranan hokira. O roma kapah tamdaw cowa ka ngaˈay ko kaˈorip no paro no lomaˈ, kawra mipiliˈay cangra midoko ci Yihofaan, hanaca padotocay mitafo to madimadi. O roma wama wina no kapah misarocoday mitoor to safalod no Fangcalay Cudad palahad cangranan, kawra ikorto mipiliˈay cangra miliyas to soˈlinay kimad. Sakoniya sowal, mamidoko ci Yihofaan ono tekedan a saˈosi konini. (Yosuwa 24:15) Mihaenay i, o wama wina, soˈlin miliyas ko wawa to soˈlinay kimad pakasomaday tamowanan, kawra hamaan o kamo ko mararaway saan ko harateng. Latekay, o wama wina ko miliyasay to soˈlinay kimad anca mifalah to paro no lomaˈ. (ˈOlic 27:10) Oya ngaˈayay a taˈarawan ako ko wama wina saan ko pinengneng a wawa, mikiriwiˈay ko taˈangay no pidokaˈ. Kaemangay tamdaw, ano mafalahay ko wama anca wina iso, haratengen tada cipinangay ci Yihofa to hakowaay ko pisemsem iso. Tada maolahay Cingra tisowanan, padadotoc kiso madimadi pakahemekay Cingranan. Haratengenho iso, miliyas ko wama wina to soˈlinay kimad caay ko raraw iso. w21.09 27 fiedac 5-7 fatac

O mafalahay tamdaw malecaday o adadaay a siri, samanen mapalakay ko kalalaˈed ningra aci Yihofaan. (Yakop 5:​14) Malecad o adadaay a tamdaw mamidenga ko adada to tao alatek, mapalakay ko kalalaˈed aci Yihofaan a tamdaw tatatiih ko pifiyor to tao alatek. Mansa, mifalah toniya tamdaw i kasakopang. Hatiniay a pirikec misawacayay to tada maolahay ci Yihofa to madimadiay a salikaka i kasakopang, wa ngaˈayho padama to mararaway tamdaw mafanaˈ to tada pakidemay ko raraw no niyah, miocor cingranan pasasiyor. O cecay tamdaw ikor no mafalah, ngaˈayay mirienang to saˈopo, mihaen wa ngaˈay cingra micada to sapasifanaˈ nai Fangcalay Cudad, miliyaw patireng to pakasoˈlinay falocoˈ i Kawas. Ngaˈayho cingra milifok to mitepangan no likakawa a lalakaw, miˈosi to i lalomaˈay lalakaw, wa ngaˈay minengneng to JW Tilifi a kamok. Ano maˈaraw no malohemay malitengay ko kacakat ningra, papafeli cingranan to roma sapaini ato sakayat, padama cingranan misalof to kalalaˈed aci Yihofaan. Mihaen, wa miliyaw cingra macada no kasakopang alatek, miliyaw malo Misawacayay Tamdaw ni Yihofa. w21.10 10 fiedac 9, 11 fatac

Anini, o taadoan ita midoko itini roma pakayraan malecaday to saka 1 hahekalan a kasakopang no Krisciyang. Tinakoen, itini likakawa a pakayraan, iraay ko malohemay malitengay ita, dama sikawdan ato milisoˈay to kasakopang a kantok. (Filipi 1:1; Titus 1:5) Roma i, malecad o saka 1 hahekalan a Krisciyang, midofdofay kita to pakayniay raramod, madadiˈiay ato no ˈirang a rikec no Kawas, midipotayho to kasakopang ho eca ka mafiyor no padetengay mararaw caay kakahi pasasiyor a tamdaw. (Dmak 15:28, 29; 1 Korinto 5:​11-​13; 6:​9, 10; Hipray 13:4) Ihkalay ko sowal no Fangcalay Cudad, soˈliˈlinay haydaen no Kawas a pihakelongan ‘cecayay aca.’ (Ifiso 4:​4-6) Ngaˈay malo ilaenoay no ngangan ni Yihofa a finawlan, hanaca mafanaˈ to pakayraay Cingranan ato araaw Ningra a soˈlinay kimad, tada malikoay kita! Nanay padadotoc kita tanektek ko pakasoˈlin, kaˈimeren ko soˈlinay kimad. w21.10 23 fiedac 15-​17 fatac

Malifaay ni Yihosafat ko pakidemay sapalifet. O Amon tamdaw, Moap tamdaw ato Miuni a tamdaw makakapotay malo taˈangayay sofitay milood to Yuta kitakit, taˈangayay ko saroero ci Yihosafatan ato paro no lomaˈ ato finawlan. (2 Rayray 20:​1, 2) Samaanay ci Yihosafat a miremo hani? Pasayraay cingra ci Yihofaan micangacang to sapadama, misaali to sapafeli ni Yihofa a ˈicel cingranan. Itini 2 Rayray 20:​5-​12 maˈoningay ko satolon ni Yihosafat, onini a satolon mahapinangay ita tada misapoeneray ci Yihosafat, tada mitadiˈecay to kakarayan sidaˈitay a Wama ci Yihofaan. Pakaynian ni Yihofa ci Yahaciilan a Lifi tamdaw pasowal ci Yihosafatan to aniniay a sinael. Misarocoday ci Yihosafat mitadiˈec ci Yihofaan, mitooray a midemak. Mikerid cingra to finawlan misiˈayaw to ˈada i, o cima ko ikaˈayaway a tomireng hani? Cowa ko mapahatatanamay a sofitay, ao awaay ko lalosidan a romadiway. Cowa patoleden ni Yihofa ci Yihosafat, padamaan Ningra ci Yihosafat milowid to ˈada.​—2 Rayray 20:18-​23. w21.11 15-​16 fiedac 6-7 fatac

Ngangaˈay kita pakasoˈlin ci Yihofaan ano misiˈayaw kita to sapalifet o mamidama kitaanan, wa ngaˈay kita mitafo to madimadiay. (2 Korinto 4:​7-9) O papadotoc ci Yihofa patalahkal to madimadiay a olah kitaanan, malecad o sowal no Fangcalay Cudad: ‘Pasilaenoay ci Yihofa minengneng to mangodoay Cingranan a tamdaw, midimokos to mitalaay to madimadiay a olah Ningra a tamdaw.’ (ˈOlic 33:18-​22) Itini ˈayaw no mafanaˈ kita ci Yihofaan i, o patalahkalan Ningra a olah i polong a tamdaw pairaayto to epoc kitaanan. Ikor no misatapang kita midoko Cingranan, paihkalayho to madimadiay a olah kitaanan. Iraay ko madimadiay a olah ni Yihofa kitaanan, mansa tano midaˈocay a kamay Ningra midipot kitaanan. Papadotoc Cingra kalacafay i tatihi ita, palaˈosiho to kihcod a sakiˈok Ningra kitaanan. Makalimay Cingra tahadaˈoc kita malo widang Ningra! (ˈOlic 46:​1, 2, 7) Mihaenay, ano o mananto ko masiˈayaway ita a sapalifet, papafeli Cingra to ˈicel kitaanan, padama kitaanan mitafo to madimadiay. w21.11 7 fiedac 17-​18 fatac

O roma tamdaw ˈintehay ko falocoˈ to cafay matayal, cafay micudad, salawina anca paro no lomaˈ, mangalef halafinay maketer ko harateng. O moetepay kaka ni Yosif na mihaenay ko demak cingranan, sapipatayawho cingranan. (Satapangan 37:​2-8, 25-​28) Kawra ci Yosif cowa ka tano mariˈangay ko sapatikol to mariˈangay, tiya ira ko ˈicel ningra miˈodis i, makahiay cingra misodod. Cowa ka ˈinteh ko falocoˈ ni Yosif, o pakayraan ningra dademak malecaday to Lifi 19:18. (Satapangan 50:19-21) Cowa ka ˈinteh ci Yosif anca miˈodis to kaka, ao misododay cangranan, patirengay to ngaˈayay taˈarawan no aniniay Krisciyang. Ano makalim kita pakahemek ci Yihofaan, pasayra ci Yosifan minanam. Wa ngaˈayho kita mikitini taˈarawan a satolon ni Yis mihapinang to mamisodod to pakararaway kitaanan a tamdaw. (Matay 6:​9, 12) Palimoˈotay ko tarokos ci Pawlo to Krisciyang sanay: ‘Kanonoˈan a widang, aka o niyah ko miˈodis.’​—Loma 12:19. w21.12 11 fiedac 13-​14 fatac

Kongyen 33 miheca Nisan folad  14 romiˈad a dadaya, tayniay i Kisimani ci Yis, mihadak to nafalocoˈan to kakarayan a Wama. (Luka 22:39-​44) ˈAyaw no mapatay cingra i salikoray a dadaya, itini tonini a pasangaray a tatokian, ‘ongong sa cingra a tomangic, micangacang a mitolon.’ (Hipray 5:7) O maanan ko micangacangan ningra i Kawas hani? Micangacangay cingra ci Yihofaan pafeli to ˈicel cingranan ho mitafo to madimadi, padama cingranan masongilaˈ ko pidoedo to araaw no kakarayan Wama a midemak. Matengilay ni Yihofa ko karoray no wawa a micangacang, orato miocoray to cecay a coyoh paˈicel cingranan. Sapikoracaw to mapakaditay a ngangan no kakarayan Wama tada o karetengay a ˈinorong, taˈangayay ko saroero ci Yisan. Pacaˈofan ni Yihofa ko mikifalocoˈay a pitolon ni Yis, misamaanay hani? Samanen o kaciharatengan ni Yis i, o papadotoc madimadi ci Yihofaan, ato mikorac to mapakaditay a ngangan no Kawas. O kaciharatengan ita i, ano onini a tosa a demak, o papacaˈofen ni Yihofa ko satolon no mita.​—ˈOlic 145:18. w22.01 18 fiedac 15-​17 fatac

Anini ˈalomanay tamdaw pakayni i pisatenok ita i mikowanay a demak, mapiliˈay kitanan. O harateng nangra itini misinkiway wa mitopa kita, kawra mafanaˈay kita itini pinengneng ni Yihofa, ano o tamdaw ko mipiliˈan ita malo mikowanay o mifalahayto Cingranan. (1 Samuil 8:​4-7) Roma i, harateng no roma tamdaw ngaˈay patireng kita to picudadan, paisingan ato roma ngaˈayay a demak. Maˈaraway nangra misarocoday kita to mitosilay a tayal, eca ka pisaysay to pasangaray no hekal, caayto pitengil to lihaf ita. Samaan ko demak ngaˈ eca ka mahafikod? (Matay 7:​21-​23) Wa misarocod kita midemak to sapalimoˈot ni Yis kitaanan a demak. Caay ka ngaˈay makalisanga ko falocoˈ ita pakayni toniya mikowanay ato pasangaray no hekal. Maolahay kita to tao, ciharatengayho to misiˈayawan a pasangaray nangra. Kawra mafanaˈay kita, pasifanaˈ to tao mafanaˈ to Hongti Kitakit no Kawas, padama cangranan patireng to kalawidang ci Yihofaan, ngaˈ ira ko taˈangayay haepoc nangra. w21.05 7 fiedac 19-​20 fatac

Adihayay mikowanay no kitakit soˈlin pasowal to midokoay to Kawas, kawra caay kakahi misawad to fadangalan no niyah. Malecaday cangra to saka 1 hahekalan a mikowanay misafelitay to minilnilan ni Yihofa a ˈaˈideman, miˈodisay to madimadiay a finawlan no Kawas. (Dmak 4:​25-​28) Pakayni tonini samanay ko harateng ni Yihofa hani? Itini ˈOlic 2:​10-​12 sanay: ‘Hongtiaw, ka cipinang kamo to pakayraan nohatini, misawkitay a tapang i fafekang no sera, ka picada kamo to sasalof. Tano mangodoay a falocoˈ mitaˈong ci Yihofaan, ka lipahak, ka ciˈangiho. Ka pasayra i wawa no Kawas a mitaˈong, hoeca ka mangolaw Cingra, talifahal sa kamo a malaˈafo, samanen o mamatiya o namal ko keter Ningra. O pasayraay Cingranan a milongoc to pidipot i, tada malemeday!’ Tada sidaˈitay ci Yihofa, pairaay to toki no tamdaw a mifalic to harateng, micada to Hongti Kitakit Ningra. Kawra cowato ka hakowa ko toki. (Isaya 61:2) O kacalohanto a tatokian nohatini, macalohay ko sakafanaˈaw no tamdaw to demak, ho inaneng ko mipiliˈan. w21.09 15-​16 fiedac 8-9 fatac

O tatodong ni Pawlo i, ano hakowato ko iraay no mita, o mamarenecen. (Filipi 4:​12) Pakaynien kitaanan, sakakaay kalimlaan a hafay o kalawidang ita ci Yihofaan, cowa ko iraay ita a dafong. (Hapakuk 3:​17, 18) Haratengen hena malafel ko Israil i kohkoh to 40 miheca ikor i, pasowalan ni Mosi cangra, sanay cingra: ‘O Kawas iso ci Yihofa itini kihcod nano demak iso maharekayto palemed tisowanan. . . . Tonini a 40 miheca, o Kawas iso ci Yihofa padotocay mikapot tisowanan, awaay ko kacangoˈotan iso.’ (Limoˈot 2:7) Itini 40 miheca, pafelian ni Yihofa ko Israil tamdaw to kakaenen a mana, oya miˈorongan nangra nai Icip a rikoˈ cowa ka macicih. (Limoˈot 8:​3, 4) Ano mafanaˈay a marenec kita, soˈlin caka adihay ko sapafeli no Kawas a dafong, o mamiakoˈid ko falocoˈ ita, minengneng tonini o mikitiraay Cingranan a sapalemed. Mihaen, o lalipahakto ko falocoˈ Ningra. w22.01 5 fiedac 10-​11 fatac

Malo faˈinayay, iraay ko ˈinorong namo midimokos ato midipot to paro no lomaˈ, misaˈicelay mihaen to demak. Tahalifa to pasangaray i, ngaˈay tano niyah a pakayraan miremo saan ko harateng namo, kawra aka mihaen ko harateng. Pasayra ci Yihofaan micangacang to sadama, malacafay to fafahi mikifalocoˈ a mitolon. Roma i, misongilaˈ micekiw to Fangcalay Cudad ato mitepangan no likakawa no Kawas a cudad, pasayra ci Yihofaan micangacang to sakayat, ato mitoor to mananamay a midemak. O roma tamdaw cowa ka pihayda to pakayniay i Fangcalay Cudad a misaˈosian namo alatek, pasowalho tamowanan edengan ira ko payci ato dafong ngaˈ taˈangayay ko sadipot i paro no lomaˈ. Kawra aka mapawan to taˈarawan ni Yihosafat. (2 Rayray 20:​1-​30) Mitadiˈecay cingra ci Yihofaan, pahecadho to demak. Cowa ka piliyas ci Yihofa tonini madimadiay a tamdaw, cowa ko mamiliyas Cingra tisowanan.​—ˈOlic 37:28; Hipray 13:5 w21.11 15 fiedac 6 fatac; 16 fiedac 8 fatac

O mitooran ni Yihofa to tireng no Niyah misangaˈ kitanan, mansa iraay ko moecelay a harateng. (Satapangan 1:​26) Kawra pakayni ka eca kalefot, mafanaˈayto kita to kihcod a demak saan ko niyah miharateng, o pisawkit ita mararawayho alatek. Haratengen ko tinakoan ni Yona, mafanaˈ cingra cowa ko papalaˈafoen ni Yihofa ko Ninifi a tamdaw i, tada maketeray. (Yona 3:10–​4:1) Haratengen, o pisaˈosi ni Yihofa pairaay to maanan ngaˈayay minaroˈan: Itini niyaroˈ no Ninifi 12 emang ko mikifalocoˈay pasasiyor a malidongay a tamdaw! Mahapinangay, mararaway ko pisawkit i ci Yona, cowa ko ci Yihofa. Awaay ko ˈinorong ni Yihofa pasayni i tamdaw mitadtad to hano mahaen ko misaˈosian Ningra. Soˈlinay na pasowalan ni Yihofa ko sikawdan Ningra, maharekayto anca mamisamaan ko saˈosi no Niyah, papipaihkal cangranan to harateng no niyah. (Satapangan 18:25; Yona 4:​2, 3) Latekay, mitadtaday Cingra to lalangian a misaˈosi. (Yona 4:​10, 11) Kawra itini ˈayaw anca ikor no pidemak, awaay ko ˈinorong Ningra milicay to sapaini ita.​—Isaya 40:13, 14; 55:9. w22.02 3-4 fiedac 5-6 fatac

Ano ‘ikakaay no mako ko tao’ saan ko pinengneng ita, micada to tamdaw a dademak wa malecad ‘o sasafaay.’ (Filipi 2:3) Ano misaˈicel kita palahad to mahaenay waywayan, wa maliyas ko sapakapolinaw to tao. Polong a salikaka itini cecay pakayraan mikikakaay kitaanan. Ano o kangaˈayan no tao ko minengnengan ita, o mamahapinang konini. O haharatengen ita ko limoˈot no tarokos ci Pawlo to Korintoay a kasakopang, sanay cingra: ‘O cima ko pasiromaay tisowanan to tao hani? O maanan ko cowa ko micadaan iso hani? Ano o micadaan a maemin, hano maliko hato cowa ko micadaay hani?’ (1 Korinto 4:7) Ka pinaˈon kita, aka soloten ko harateng no tao tayni i tireng no niyah, aka malitaˈang to niyah. Ano mafanaˈay mikimad ko cecay faˈinayan salikaka, anca mafanaˈ ko cecay fafahiyan salikaka patireng to pacekiwan, aka mapawan panokay to ˈdil ci Yihofaan. w21.06 22 fiedac 9-​10 fatac

Pasangar pasangaray mahela ko cilomaˈay sanay ko ˈalomanay mitosilay. Itini roma kilac, adihayay ˈakawangay lomaˈ anca kitiraan maˈedefay ko fawahan, iraay ko mikacaway, ano cowa ko mitahidangan no cilomaˈay pasangaray micomod. Roma kilac, mahapinangay no mitosilay awaay i lomaˈ ko ˈalomanay tamdaw, anca cowa ka ˈaloman ko tamdaw itira. Adihayay ko mapalakay nangra a toki ngaˈ tahira i cecay lomaˈ, ˈarawhan awaay ko ilomaˈay. Ano mahaen ko pitosilan ita a kilac, aka a pisawad. Mitanam i caay kalecad a toki milisoˈ to cilomaˈay. Ano itini kita ka ilomaˈan no tamdaw a toki milisoˈ cangranan, wa adihay ko malitemohay a tamdaw. Samanen, o maminokanokay aca ko tamdaw! Mahapinangay no ˈalomanay salikaka, ano kalahokan anca dadaya a mitosil ˈalomanay ko mahelaay a tamdaw, hanaca o kasinowayan no cilomaˈay a tatokian konini, makahiay masasowal. w21.05 15 fiedac 5, 7 fatac

Anini iraay ko malecaday a demak han? Iraay. Maˈaraw no ˈalomanay tamdaw ko Misawacayay Tamdaw ni Yihofa cowa pihakelong to misafelitay to Fangcalay Cudad a lisin, tinakoen eca ka pisalisin to kahofocan romiˈad anca Korismas, cowa kahemek cangra. Maˈaraw no roma tamdaw eca ka pirienang to lisin no kitakit ko Misawacayay Tamdaw ni Yihofa, anca eca ka pihakelong to misafelitay to Fangcalay Cudad a pisiki to mapatayay, tada maketeray. Pakasoˈlinay cangra mihaydaan no Kawas ko pidokoan nangra sanay. Kawra, ano paikakaen nangra to Fangcalay Cudad ko pinangan no tamdaw, ecato ka pakahemek cangra to Kawas. (Marko 7:​8, 9) Samaan ko demak ngaˈ eca ka mahafikod? O mamisaˈicel kita, ho matongal ko kaolah no niyah to rikec ato safalod ni Yihofa. (ˈOlic 119:97, 113, 163-​165) Maolah kita ci Yihofaan, wa mifalah to kapiliˈan Ningra a pinangan, cowa ko mamihai to roma demak mikotay to saaroˈan ni Yihofa i falocoˈ no mita. w21.05 6 fiedac 15-​16 fatac

Sasamaan kita midofdof to sapaini ni Pawlo hani? Sapadotocaw kita tanektek ko pakasoˈlin, wa micerid micekiw to Fangcalay Cudad, padotoc a mitolon, misarocod midemak to patorodan ni Yihofa kitaanan a demak. (2 Timoti 4:​4) Ano tanektek ko pakasoˈlin ita, soˈlin matengil ko tatiihay a safanaˈ pakayni Misawacayay Tamdaw ni Yihofa, cowa ko mamarawraw a maohot. (Isaya 28:16) Maolah kita ci Yihofaan, maolah to Fangcalay Cudad, maolahho to salikaka, cowato ko papakayra i miliyasay to kimad a tamdaw a mahafikod. Itini saka 1 hahekalan, mifalahay ko ˈalomanay tamdaw ci Yisan, pakayra cingranan a mahafikod. Kawra ˈalomanayho ko pakasoˈlinay mihakelong cingranan, iraay ko cecay itiniay hoing no Yutaya a tamdaw, mahawpayho ko ˈalomanay saysi. (Dmak 6:7; Matay 27:57-​60; Marko 15:43) Anini, pinaay soˈot efan a tamdaw cowa ka pakayni ci Yisan a mahafikod. Misamanay hani? Samanen mafanaˈay ato maolahay cangra to kimad no Fangcalay Cudad. Matatodongay ko sowal no Fangcalay Cudad: ‘O maolahay to sarikec Iso a tamdaw milifokay to rihaday, ano o mananto cowa ko papakahafikod cangranan.’​—ˈOlic 119:165. w21.05 13 fiedac 20-​21 fatac

Cipinangay ko tarokos ci Pawlo, ano o mananto ko demak ningra sahtoay o pakayniay pitadiˈec to ˈicel ni Yihofa, cowa ko pitadiˈec to ˈicel no niyah. Soˈlin misiˈayaway to sapalak, mapalit ato roma pasangaray, kawra pakayni pitadiˈec to sapafeli ni Yihofa a fangcalay saocor, masongilaˈay malaheci ko ˈinorong ningra. Oya kapah a cafay ni Pawlo ci Timoti wa mitadiˈec to ˈicel no Kawas, ngaˈ malaheci ko ˈinorong. Ci Timoti wa kalacafay ci Pawloan tayra i mara:ayay pala mitosil. Cowa konini aca, miocoranho ni Pawlo cingra milisoˈ ato pakalalok to kasakopang. (1 Korinto 4:​17) Cangoˈotay ko ˈicel no niyah sanay ci Timoti miharateng alatek. Pakayni tonini a lalangian, mansa palimoˈot ci Pawlo cingranan: ‘Aka papisakahmawen ko tamdaw minengneng to kakaemang iso.’ (1 Timoti 4:​12) Toniya tatokian, marariday adada ci Timoti, malecaday mapacekay no ceka ko tireng. (1 Timoti 5:​23) Kawra mafanaˈay ci Timoti, pakayni pitadiˈec to sapafeli ni Yihofa a fangcalay saocor, wa ngaˈay cingra padadotoc milasil to ngaˈayay lihaf, matayal saki salikaka.​—2 Timoti 1:7. w21.05 21-22 fiedac 6-7 fatac

O haharatengen ko safalod no Yakop 1:​19: ‘Ka makahi a mitengil, aka macaloh a pasowal, aka macaloh a maketer.’ O cecay malohemay malitengay tada cipinangay ko niyah to pakayraan saan miharateng alatek, kawra soˈlinay a mahaen han? Sowal no Taneng 18:13: ‘Caho ka harek a mitengil pacaˈofto, o apa ningra ato sakangodo ningra konini.’ Sakafanaˈaw to soˈlinay a pakayraan no tao, sangaˈayay i papipasowalen ko tao. O lalahcienho ita mitengil, ikorto ngaˈ pasowal. Salakat o malohemay malitengay ngaˈayay milicay: “Ngaˈayay ko kaˈorip iso han? Ngaˈay kako padama tisowanan to maanan hani?” Ano mipalak ko malohemay malitengay to toki cipinang to pakayraan no salikaka, o ngangaˈay ko pipadama ato pakalalok cangranan. O piˈosi aca to pina a sinael anca mihadak to tosa sapaini cangoˈotayho. Misaaliay ko salikaka mitinako to kaciharateng ita cangranan, cipinang cangranan, makalim padama cangranan. w22.02 17 fiedac 14-​15 fatac