Saka 7 Folad

O mafalahay o mikitiniay i olah ni Yihofa a pirikec, oniya limasmas wa ngaˈay padama to mararaway tamdaw pasasiyor, o sakangaˈay no romaroma tamdaw. O roma tamdaw malikafay to saˈosi no malohemay malitengay, kawra aka mapawan, o mahaenay tamdaw cowa ka pihadak to o maanan ko mararaway noya mafalahay a tamdaw. Ano cowa ka fanaˈ kita to polong a demak, o papakasoˈlin to misawkitay a malohemay malitengay, samanen misawkit cangra “pakayniay ci Yihofaan,” hanaca misarocoday a mitoor to safalod no Fangcalay Cudad a midemak. (2 Rayray 19:6) Midama kiso to saˈosi no malohemay malitengay, o ngangaˈay padama to mafalahay a paro no lomaˈ patikol i tatihi ni Yihofa. Sanay ci Ilisapay: “Hawad saan micawmaˈ to mafalahay a wawa tada pasangarayto, kawra patikolto ko wawa i tatihi ni Yihofa i, mihaiay to matatodongay mafalah ko niyah, ikor somowalay cingra adihayay ko mananamay a sapasifanaˈ.” w21.09 28-​29 fiedac 11-​12 fatac

Haratengen ko nafalocoˈan noniya maponengay. Maedeng makalimay cingra adihay ko sapakiyaho, kawra mieminanto ningra a miparo, hanaca o sangaˈayay ko sapafeli ningra ci Yihofaan. Mafanaˈay ci Yis, o sapatafang ningra kalimlaan sanay ko pinengneng no kakarayan Wama. Mananamay ita ko maanan kalimlaan a kimad hani? Ano misarocod ko falocoˈ ato harateng ita midoko ci Yihofaan, o patafangay to sangaˈayay Cingranan, o mamahemek Cingra. (Matay 22:37; Kolosay 3:​23) Maˈaraw ni Yihofa ko pisarocod ita, o mamahemek. Ano hakowato ko mihadakan ita a toki ato ˈicel a mirienang to saˈopo ato mitosil ato roma midokoay a demak, ano misarocodayto, o mamasemer ci Yihofa. Sasamaan kiso misakadademak toniya pakayniay manikaway maponengay a maˈoningay a pakalalok to tao hani? Haratengen, o cima ko papakalaloken iso a salikaka, pasowal cingranan to masemeray ci Yihofa to pisaˈicel ningra hani? Alatek iraay ko cecay matoˈasay fafahiyan a salikaka, samanen o tireng ningra cowato kalecad to saˈayaway, itini mitosilay tayal cowato kalecad o saˈayaway adihay, makesemay ko falocoˈ, awaay ko kapo no niyah saan miharateng. w21.04 6-7 fiedac 17, 19-​20 fatac

Mafanaˈay ci Yihofa to sangaˈayay toki palaˈafo toniya ciraraway a hekal. Padadotoc Cingra a mihadidi, mansa masaˈopo ko pinaay soˈot emang a taˈangayay ˈopo tamdaw, malacafay midoko a pakahemek Cingranan. Miakoˈiday koniya tamdaw ira ko mihadidiay ni Yihofa, mansa ira ko toki nangra hofocen, mafanaˈ Cingranan, palahad to olah Cingranan, hanaca patafang to hakelong no ˈorip Cingranan. Noikor ano tahatolas ko pihadidi noniya taˈangayay ˈopo a tamdaw, saikor malidong i, wa mahapinang no tamdamdaw, misaˈosi ci Yihofa a mihadidi tada citanengayto! Soˈlin adihayay ko pairaan ni Satan a pasangaray ato roray, ci Yihofa kamayan o ‘lipahakay a Kawas.’ (1 Timoti 1:​11) Malecaday, wa ngaˈay kita padadotoc a lipahak, mihadidi mitala ci Yihofaan patalahkal to fangcalay ngangan Ningra, misawacay to matatodongay ko saˈakawangay sapikowan a fadangalan Ningra, palaˈafo to kihcod a tatiihay tamdaw tatiihay demak, misaysay to polong a pasangaray ita. Mafanaˈ to padadotocay mihadidi ko kakarayan Wama ita, pafeliay kitanan to taˈangayay a sahinom, wa misetek kita to falocoˈ padotoc a mihadidi. w21.07 13 fiedac 18-​19 fatac

Itini saka 1 hahekalan ˈalomanay tamdaw cowa pakasoˈlin ci Yisan. Itini pinengneng nangra, edeng o wawa no manikaway a sayho ci Yis, hanaca mikitiniay i mimingay niyaroˈ i Nacali a masadak. Ano oyato ikor malo nisawawaan ni Yis a Natanail sanay ko sowal: “Ira ko maan to ngaˈayay a demak i Nacali a niyaroˈ saw?” Alatek maharatengay ni Natanail ko sapairasol i Mika 5:2, wa itini Piclihim a sofocen ci Misiya, cowa ko Nacali saan. Paˈayaway ko pairasolay ci Isaya, cowa ko ‘caciharateng to rayray no kasofocan ni Misiyaˈ ko ˈada ni Yis sanay. (Isaya 53:8) Ano makahi cangra mihapinang to demak, o mamafanaˈto aitini i Piclihim a sofocen ci Yis, hanaca o teloteloc no Hongti ci Tafiti. (Luka 2:​4-7) Mihaenay, o kasofocan ni Yis a kitiraan malecaday to sapairasol no Mika 5:2. Ano mahaenay, o maanan kora pasangaray hani? Lalangian i, cowa kafanaˈ ko tamdaw to kihcod a demak, caloh sanay mitolas to sowal, mansa cowato pakasoˈlin ci Yisan. w21.05 2-3 fiedac 4-6 fatac

Adihayay ko taˈarawan i Fangcalay Cudad, makahiay cangra mitengil to sapalimoˈot, mansa milifok to sapalemed no Kawas. Nengnengen ita ko tinakoan ni Yopu. Tangongolay ko olah ningra to Kawas, makalimay pakahemek to Kawas, kawra o cowa ka lefot a tamdaw cingra. Itini taˈangayay saroero somowalay cingra to mararaway a sowal, telocto patodicek hananay ni Iliho aci Yihofa palimoˈot cingra. Samaanay ko harateng ni Yopu hani? Misapoeneray cingra micada to sapalimoˈot, sanay: ‘Adihayay ko sowal ako, kawra awaay ko kafanaˈan ako. . . . Patikolen ako ko sowal no niyah, itini i sera ato i ˈafoˈafoan a makesem ko falocoˈ.’ (Yopu 42:​3-6, 12-​17) Tada misapoeneray ci Yopu, soˈlin mikikakaay ko kaemang ni Iliho cingranan, kawra kamayan cingra a micada to sapalimoˈot ni Iliho. (Yopu 32:​6, 7) Nolatekay, mihadakay to sapalimoˈot a tamdaw masafaay no mita ko mihecaan, anca awaay ko maanan pasangaray no niyah saan kita miharateng. Toniya tatokian, o misapoeneray o papadama kitaanan makahi micada to sapalimoˈot. Soˈlin kita o kahacecay tamdaw o papadotoc palahad to minaroˈan no fangcalay saocor, hanaca itini i pitosil pasifanaˈ to tamdaw macakat ko inaneng, o mamicada kita to sapatalipaˈelal no tao. w22.02 11 fiedac 8 fatac; 12 fiedac 12 fatac

Kita o kahacecay tamdaw iraay ko ˈinorong micowat to makelecay masasiolahay no kasakopang, matinako no salikaka ko dihkoay, mihaen wa awato ko matoˈolay a tamdaw. O sowal ita, midemakan a demak wa ngaˈay pakalalok to tamdaw! Ano cowaho picada to soˈlinay kimad ko paro no lomaˈ no salikaka, wa ngaˈay kita samaan ko demak, padama to salikaka mitinako to sano lomaˈay a dihko no kasakopang hani? Layapen ko kamay no widang. Sakinacecay tayni i kasakopang ita ko pacekiwan ato salikaka i, ngaˈay kita mikifalocoˈ lipahak a militemoh cangranan. (Loma 15:7) Kawra cowa ko pihamham aca, wa makalim kita malawidang cangranan, mihaen mikifalocoˈ a ciharateng cangranan. Roma i wa mikangodo kita to mahimeday a demak nangra, roma i cipinang to o manan ko masiˈayaway nangra a pasangaray. Ano pasangaray cangra pasowal to nafalocoˈan no niyah, aka pacieci cangranan. Damsayen mihadak to salicay, ato mihadidi mitengil to sowal nangra. Tinakoen, ngaˈayay licayen iso cangra samanay misatapang minanam to Fangcalay Cudad. w21.06 11 fiedac 13-​14 fatac

Ngaˈay kita ‘mala cecay ˈopo, cecay ko pakaenay,’ makelec a midoko ci Yihofaan, tada o kalikoanto konini! Malikakawa Midofdof to Araaw ni Yihofa saka 165-166 fiedac sanay, ano masalalomaˈay no taˈangayay paro no lomaˈ ni Yihofa kiso, ‘iraay ko ˈinorong iso micowat to kakelec,’ mihaenay wa ‘minanam tano pinengneng ni Yihofa a minengneng to salikaka.’ Minengneng ci Yihofa, kita o ‘sasafaay a tamdaw’ o kalimlaan a maemin. Mahaenay ko pinengneng iso to salikaka han? O nano demak iso cangranan, maˈaraway ni Yihofa, masemeray a minengneng. (Matay 10:42) Maolahay kita to salikaka, mansa ‘misetek to falocoˈ kita, eca ka piteli to sapihafikod a fakeloh ato sacara i ˈaˈayaw no salikaka.’ (Loma 14:13) Minengneng kita to salikaka, mikikakaay ko ngaˈay to niyah, makahiho mikitini falocoˈ a misodod cangranan. Aka pakayni i tao a mapolin, ka ‘pisaˈicel micowat to rihaday, masasipakalalok.’​—Loma 14:19. w21.06 24 fiedac 16-​17 fatac

Ano misongilaˈ kita micekiw, hanaca mitoor to sapasifanaˈ no Fangcalay Cudad ato likakawa no Kawas dademak, wa palidlid sato palahad to malecaday ni Kristo a capeling, wa matongal matongal ko kafanaˈ to Kawas. Tano tinakoan ni Yis a mitadtad, o sapaloma no lihaf no Hongti Kitakit samanay palidlid saan i falocoˈ no matatodongay ko waywayan a tamdaw cilamit a cicengoˈ. Sanay ci Yis: ‘Cicengoˈ a lomahad koya sapaloma, hano mahaen cowa ka fanaˈ cingra [mikosamay a tamdaw]. I fafekang no sera mahadak ko minaroˈan, palidlid sanay a lomahad, salakat o sapal, dotoc cipapah, saikor matomes to heci.’ (Marko 4:​27, 28) Sapitadtadaw ci Yis, malecad o pinaloma palidlid saan lomahad, o micadaay to lihaf no Hongti Kitakit a tamdaw mahaenay palidlid sanay a macakat. Tinakoen, o pacekiwan ano matongal ko piingid ci Yihofaan ikor, mahapinangayto ita taˈangayay ko kafalic ningra. (Ifiso 4:​22-​24) Kawra o haharatengen ita, ci Yihofa ko palahaday toniya sapaloma. w21.08 8-9 fiedac 4-5 fatac

Aniniay a sinael pasowalay kitaanan o maanan ko papaira to lipahak ita. O tamdaw ano ‘marenec to iraay nohatini,’ wa misalimla to iraay no niyah a kihcod, mahawpay ko pakayraan nohatini. Masafelitay, o tamdaw ano ‘tangoˈol to awaay ko patolasan a ˈanof,’ wa haharateng saan to cowa ko mamalifok no niyah a dafong. Mananamay ita ko maanan hani? Sapakahelaaw to lipahak, samacayen ita minengneng ko iraay a dafong no niyah ato mamalaˈosi a patosokan. Maolahay kita maemin mitanam to faelohay a demak, o pinangan no tamdaw konini. Ano mahaenay i, wa soˈlin kita ngaˈay ‘marenec to iraay nohatini’ han? Wa ngaˈayto. Wa ngaˈay kita marenec, cowa ko pacieciay to niyah. Sasamaan ko hademak hani? Somowalay ci Yis itini Matay 25:14-​30 to cecay linkim a sapatinako, wa ngaˈay kita mikitini mikilim to caˈof, minanam to sasamaan mahela ko lipahak anini, hanaca matongal matongal ko lipahak. w21.08 21 fiedac 5-6 fatac

Tada ciharatengay ci Yihofa to ‘mararomay ko falocoˈ ato matoleday ko falocoˈ a tamdaw.’ Pakalalok to kaolahan a salikaka cowa ko ˈinorong aca no malohemay malitengay, kita o kahacecay tamdaw ngaˈay mihadak to ˈicel. Ngaˈay kita mikifalocoˈ ciharateng cangranan. Makalimay ci Yihofa pakayni kitaanan, matinako noniya kalimlaan a siri ko olah Ningra. (Taneng 19:17) Roma i, misamiming kita, wa ngaˈay pakalalok to salikaka. Caay ka ciharateng kita samacayen no tao ko niyah, ho eca pikidat to sakaˈinap no tao. Masafelitay, mamisaka dademak kita to sifanaˈ ato ˈicel pakalalok to tao. (1 Pitiro 4:​10, 11) Nengnengen ita samanay ci Yis micada to nisawawaan, wa mananam to samaan micada to tamdaw. Ci Yis o kasapaan a tamdaw, kawra “o damsayay, o poeneray ko falocoˈ ” ningra. (Matay 11:28-​30) O sowal ningra, ihkalay ko sapatinako, mitemeray to falocoˈ no kalo a tamdaw.​—Luka 10:21. w21.07 23 fiedac 11-​12 fatac

O tatalaˈayaw kita masasowal to matoˈasay a salikaka. Maapohayto ko mata nangra alatek, matayoayto ko kawing, marihawayto ko takolaw, kawra iraay ko kaemangay falocoˈ nangra, hanaca mikitini ci Yihofaan malifokay ko ‘makapahay ngangan.’ (Patnakay 7:1) Haratengen ko lalangian ni Yihofa a misalimla cangranan, padotoc a mikangodo cangranan. Wa ngaˈay kita pasayra ci Ilisaan a minanam, tahira saikoray romiˈad kamayan materek i tihi ni Iliya, kinatolo a pasowal ci Iliyaan: ‘Caay ko mamiliyas kako tisowanan.’ (2 Hongti 2:​2, 4, 6) Wa mikifalocoˈ kita a ciharateng to matoˈasay a salikaka, tano mikangodoay a waywayan a milicay cangranan. (Taneng 1:5; 20:5) Tinakoen, ngaˈay kita milicay: “Itini kaemang kiso hano pakasoˈlin to mahelaay no niyah ko soˈlinay kimad hani?” “O manan a nalifetan patongalay to ngaˈayay kalalaˈed iso aci Yihofaan hani?” “Padadotoc kiso mahemek a matayal saki Yihofaan, o manan ko pakayraan hani?” (1 Timoti 6:​6-8) Dotoc misongilaˈ mitengil to pihadak nangra to nalifetan no niyah. w21.09 5 fiedac 14 fatac; 7 fiedac 15 fatac

Misarocod kiso midofdof to limoˈot mitosil ato padama to tao malo Krisciyang, paihkalay konini to tada maolahay ko niyah to Kawas. (1 Yohani 5:3) Haratengen hena, pakayni kaolah ci Yihofaan pakalalokay tisowanan timolo a pakalomaˈ mitosil. Mihaen to demak madoloay han? Cowa ka madolo alatek. Sakinacecay kiso tayra i lomaˈ no tao mikongkong to fawahan marawraway han? Hatiraayto! Kawra mafanaˈay kiso o saali ni Yis tisowanan a tatayalen konini, mansa midemak kiso. Mataˈlifto ko toki, miharateng kiso madoloayto koniya tayal alatek. Mihaenay i, samanay ko pisikay to pacekiway hani? Maharateng to mamihaen ko demak, marawraway kiso han? Mahaenay alatek. Kawra, ano cangacangen iso ci Yihofa padama tisowanan miremo to marawraway a harateng, timolo mitahidang to tamdaw minanam to Fangcalay Cudad, wa paˈicelen ni Yihofa ko kalim iso, ciharateng to sapadamaaw to tamdaw malo Krisciyang. w21.07 3 fiedac 7 fatac

Nolitengan a koli iraay ko tahapinangan i tireng, paihkal to ono nima ko niyah. Malecaday, o tamdaw no hekal anini mitokelay tano waywayan ato harateng paihkal to midamaay ko niyah to sifo, malecad o iraay ko tahapinangan i kamay ato katotong no fongoh. Wa micada kita toniya ‘tahapinangan,’ midama to sifo no hekal hokira? O minaˈayay micada to tahapinangan a tamdaw wa tahalifa to roray ato katalawan, sanay ko sinael no Paˈarawan: ‘O cima awaay ko tahapinangan, cowa ko ngangaˈay micakay ato pacakay.’ (Paˈarawan 13:17) Mafanaˈay ko finawlan no Kawas, sasamaan ko picada no Kawas toya micadaay toniya tahapinangan a tamdaw. (Paˈarawan 14:​9, 10) Mihaenay, tanektekay cangra eca kakahi micada toniya tahapinangan, itini kamay nangra malecaday o matiliday ko ‘oni Yihofa kako.’ (Isaya 44:5) Nohatiniho misetek to falocoˈ, tahatolas a madimadi ci Yihofaan. Mihaen, o mamahemek ci Yihofa, pangangan to ono Ningra a tamdaw kita. w21.09 18 fiedac 15-​16 fatac

Sapilaheciaw to ˈinorong no mita, ngaˈay kita pakayni i sapadama no roma mitosilay milifok to epoc. Pasowalan no tarokos ci Pawlo ci Timoti to pakayraan no niyah a pasifanaˈ, pakalalokayho ci Timotian paladaˈ to roma salikaka toniya pakayraan. (1 Korinto 4:​17) Malecad ci Timotian, wa ngaˈayho kita minanam to iraay ko nalifetan a salikaka i kasakopang. Papasayra kita ci Yihofaan mitolon a micangacang. Ano malingad mitosil cangacangen ci Yihofa mikayat tisowanan. Ano awaay ko sadama no fangcalay saocor, cowa ko mamalaˈosi ko tayal no mita. (ˈOlic 127:1; Luka 11:13) Pasayra ci Yihofaan mitolon i, ihkalen ko sowal. Tinakoen, ngaˈay kiso micangacang Cingranan mikayat tisowanan makilim ko makahiay mafanaˈ Cingranan ato makahiay mitengil to ngaˈayay lihaf a tamdaw. Roma i, wa palaken ita ko toki misongilaˈ micekiw. Sowal no Fangcalay Cudad, ‘ta maedeng kamo a mafanaˈ to o manan ko araaw no Kawas. O araaw Ningra o ngaˈayay, o malefotay, o karahekeran.’ (Loma 12:2) Ano pakasoˈlinay kita to mananamay no niyah o soˈlinay a kimad, ano mitosil i wa matongal ko pakasoˈlinay. w21.05 18 fiedac 14-​16 fatac

Misaˈicelay kita padama to pacekiwan alatek, patadoho cangranan a mitolon, kawra caay ka macakat cingra, telocto paselaˈ hananayto ita a pacekiw. Anca, na cowaho ka mapadama ita ko cecay pacekiwan malaˈosi ko patosokan patafang to tireng micada to paputisem. Ano mahaenay i, o pasokiyaway kita hokira, anca cowa ka palemeden ni Yihofa kita han? Samanay ko pinengneng ni Yihofa to malaˈosiay ko mitosilay ita a tayal hokira? Misaaretengay ci Yihofa minengneng to mihadakan ita a ˈicel ato paihkalan a mihadidiay. Makahi ko tao anca cowa ka kahi mitengil, ano paihkal kita to olah misaˈicel a milasil to ngaˈayay lihaf, o mitosilay a tayal ita itini pinengneng ni Yihofa o malaˈosiay. Sowal ni Pawlo: ‘O moecelay ko Kawas, cowa ka mapawan Cingra to midemakan namo ato paihkalan namo a olah pakayni ngangan Ningra, o pipatado namo matayal saki fangcalay sikawdan i saˈayaw, nohatini padadotocay matayal saki cangranan.’ (Hipray 6:​10) Soˈlin awaay ko mapadamaay ita a pacekiwan malaˈosi ko patosokan micada to paputisem, mamaharateng ni Yihofa ko tayal ita ato olah. Mansa, o nano roray iso cowa ka milifok to mitokelan iso a minaroˈan, o ngangaˈay kiso mikitini sinael anini misowalan ni Pawlo a milifok to sapakalalok. w21.10 25 fiedac 4-6 fatac

Mikitini pakayraan ni Yis micada to nisawawaan, ngaˈayay mahapinang to sidaˈitay ciolahay cingra. Mafanaˈay cingra cowa ka lecalecad ko ˈicel ato pakayraan no nisawawaan, mansa o mamadangar nangra a tayal ato minaroˈan cowa ka lecad. Kawra ano misarocod ko kahacecay tamdaw a midemak, masemeray cingra. Mikitini misowalan ni Yis linkim a sapatinako, wa ngaˈay mahapinang ita konini. O tawki i sapatinako ‘mitooray to ˈicel no kahacecay koli’ pafeli to tayal cangranan. Tatosaay a koli tada malalokay, adihayay ko maetanay payci. Soˈlin ikakaay ko maetanay no cecay, kawra malecaday ko sapakahemek no tawki cangranan. Sanay: ‘O ngaˈayay madimadiay a koli, tada ngaˈayay ko demak iso!’ (Matay 25:14-​23) Tada sidaˈitay ci Yis kitaanan, mafanaˈay cingra to cowa ka lecad ko ˈicel ato pakayraan ita. Ano misarocod kita a midemak, mahemekayto cingra. Mihaenay, o mamahaen ci Yisan ko picada ita to salikaka. w21.07 23 fiedac 12-​14 fatac

Nolatekay, ci Tafiti cowa paihkal to siniˈadaay a falocoˈ i tamdaw. Tinakoen, mariˈangay a Napal kasimaan sanay ko sowal, manaˈayay pafeli ci Tafitian ato sikawdan ningra to kakaenen, tada maketeray ci Tafiti, misaˈosiay to sapipatayaw ci Napalan ato polong faˈinayan no paro no lomaˈ ningra. O fafahi ni Napal ci Apikail o ngaˈayay iraay ko mihadidiay a tamdaw, tangsolay cingra talaˈayaw midemak, hato cowato ka citadah ci Tafiti tono ˈirang a tadah. (1 Samuil 25:​9-​22, 32-​35) Itiya, ci Tafiti tada maketeray, mansa misaˈosiay cingra mipatay ci Napalan ato paro no lomaˈ ningra a faˈinayan. Kinacecayay, mitengil ci Tafiti to tawcikel ni Natan ikor, sowal sa oniya cihafayay a tamdaw o papatayen. Tocerid o sidaˈitay ci Tafiti, hano midemak to awaay ko olah a pisawkit hani? Haratengen ko pakayraan ni Tafiti itiya, misemsemay ko makapahay a falocoˈ ningra. Mikitini mahapinang ita, o cecay tamdaw ano pakidemay ko pisawkit to tao, paihkalay konini to mapalakay ko kalalaˈed ningra aci Yihofaan. w21.10 12 fiedac 17-​18 fatac; 13 fiedac 20 fatac

Mikitini anini a sinael mahapinang ita, ngangaˈay kita mitodong to makoracay a saˈakawangay a taˈarawan no Kawas ci Yihofaan, papadotoc makorac i polong no demak. Kawra cowa ko malefotay kita, o sasoˈlin a madangar konini han? Soˈlin na mararaway ci Pitiro to pina raraw, kawra o tinakoan ningra mitadtaday o cowa ka lefot a tamdaw ngangaˈay malo makoracay a tamdaw. Masowal ko makoracay a tamdaw, o maharatengay no ˈalomanay tamdaw o micaˈedongay to mikiriwiˈay a rikoˈ no pidoyongan, cowa ka tawa ko pising a tamdaw, kawra o makoracay a tamdaw cowa ka mahaen. Sowal no Fangcalay Cudad o “lipahakay a Kawas” ci Yihofa, somowalayho o lipahakay ko midokoay Cingranan a tamdaw. (1 Timoti 1:​11; ˈOlic 144:15 ato roma pihongyak.) Itini saka 1 hahekalan, o roma tamdaw maolahay micaˈedong to mikiriwiˈay a rikoˈ, ‘sapisolotaw to harateng no tao itini kaˈayaw no ˈalomanay tamdaw midemak to moecelay a demak.’ Na pakidemay ko pirikec ni Yis to mahaenay a tamdaw. (Matay 6:1; Marko 12:38) Malo soˈlinay a nisawawaan ni Yis, wa misalalangian kita to pitadtad no Fangcalay Cudad cipinang to o maanan ko makoracay. Pakasoˈlinay kita, o makoracay ato matomesay to olah a Kawas caay ko mamiocor kitanan midemak to cowa ka dangar ita a demak. w21.12 2 fiedac 1, 3 fatac

Adihayay ko sapafeli ni Yihofa kitaanan kasapaan a inaneng, o sakakaay kalimlaan i ngaˈay kita midoko Cingranan. ‘Midofdof to limoˈot no Kawas, o maolahay Cingranan.’ (1 Yohani 5:3) Palimoˈotay ci Yis kitaanan malingad padama to tamdaw micada to paputisem malo Krisciyang, ato masasiolah, o misaalian ni Yihofa kitaanan a dadofdofen a limoˈot konini. (Matay 28:19; Yohani 13:35) O makahiay midofdof a tamdaw papacomoden ni Yihofa i paro no lomaˈ Ningra. (ˈOlic 15:​1, 2) Ka maolah to tao. O olah o sakakaay kalimlaan a capeling ni Yihofa. (1 Yohani 4:8) Itini ˈayaw no mafanaˈ kita ci Yihofaan, maolahayto Cingra kitaanan. (1 Yohani 4:​9, 10) Ano sapitodongaw kita Cingranan, o mamaolah to tao. (Ifiso 5:1) O cecay pakayraan ita mihaen, itini ˈayaw no saikoray romiˈad padama to tao mafanaˈ ci Yihofaan. (Matay 9:​36-​38) Mihaen ko demak ita, pairaay to toki no tao micomod i paro no lomaˈ no Kawas. w21.08 5-6 fiedac 13-​14 fatac

Tangongolay ko olah ni Yis ci Yihofaan, kawra cowa ko kakarayan aca a Wama ko paihkalan ningra to cowa pisateked a olah, paihkalayho kitaanan to mahaenay a olah. (Yohani 14:31) Mikitini kaˈorip ni Yis i fafekang no sera wa ngaˈay mahapinang ita tangongolay ko olah ningra to tamdaw. Soˈlin micada to pisafelit, kamayan ci Yis to romiˈamiˈad paihkal to olah ato siniˈadaay a falocoˈ i tamdaw. O kalimlaan a pakayraan ningra a paihkal to olah i tamdaw i, pasifanaˈ cangranan mafanaˈ to Hongti Kitakit no Kawas. (Luka 4:​43, 44) Roma i, hayi sanay ci Yis i kamay no mararaway a tamdaw misemsem a mapatay, paira to hatoki no polong a tamdaw milifok to midaˈocay a ˈorip paihkalay konini to cowa pisateked a olah ningra to Kawas ato tamdaw. Patafang to tireng micada to paputisem kita samanen o tangongolay ko olah ci Yihofaan. Mahecad ci Yisan, maolah kita ci Yihofaan i, o mamisaˈicel maolah to tao. Saan ko tarokos ci Yohani: ‘O cima ko cowa ka olah to maˈaraway a salikaka, cowa ko mamaolah to cowa kaˈaraw a Kawas.’​—1 Yohani 4:​20. w22.03 10 fiedac 8-9 fatac

Soˈlin maolahay kita mipalak to toki kalacafay ci Yihofaan, kawra cowa ko madoloay mihaen to demak. O kaˈorip ita tada ˈifowaayto, mansa mamisaˈicel ngaˈ ngaˈay milimasmas to toki mirienang to midokoay to Kawas a tayal. Katayalan, ˈinorong no paro no lomaˈ ato roma adihayay a dademaken a tayal maˈafasay ko adihayay a toki ita, telocto pasangaray to kita mihadak to toki mitolon, miekiw ato midotim. Roma i, o roma demak hato cowa ko mararaway, kawra ano eca ka pinaˈon kita, mamiˈafas to toki ita, onini a toki na sakadademaken a miingid ci Yihofaan. Tinakoen, marariday kita mifalic to pakayraan a maˈorip, mirienang to pina ngaˈayay a lawla, ngaˈay pasinoway to tireng ato falocoˈ ita. Kawra ano adihay ko toki ita a milawla, wa cangoˈot ko toki miingid to Kawas. Haratengen, o lawla cowa ko sakakaay kalimlaan ita i nokaˈorip.​—Taneng 25:27; 1 Timoti 4:8. w22.01 26 fiedac 2-3 fatac

Palimoˈotan ni Yihofa ko Israil tamdaw kaolah to tao malecad o kaolah to niyah, cowa ko finawlan aca ko kakaolahen nangra. Soˈlinay i, o mamaolah ko Israil tamdaw to ˈalafang a tamdaw, Lifi 19:33, 34 ihkalay mitadtad konini. Sanay ko sinael, o kakangaˈayen nangra micada ko ˈalafang a tamdaw, o picada to ˈalafang a tamdaw malecad o picada to finawlan, maolah cangranan malecad o kaolah to niyah. Tinakoen, saˈosi no rikec o mamihayi ko Israil tamdaw to manikaway a tamdaw ato ˈalafang a tamdaw mipodpod to maˈosaway a pinaloma. (Lifi 19:​9, 10) Anini, o mamisaka dademak ko Krisciyang to malecaday a safalod. (Luka 10:30-​37) Itini icowacowa pala adihayay ko pacarcaray a tamdaw, itini kilac ita ˈalomanay alatek. Ano o mananto ko tireng ato mihecaan nangra, o kakangodoen ita cangra. w21.12 12 fiedac 16 fatac

Ano mararid kita pasayra ci Yihofaan milongoc to sakayat nohatini, mamatongal ko pakasoˈlin ano misiˈayaw to sapalifet noikor i, iraay ko ˈicel ningra padama kitaanan. Tinakoen, sapirienangaw kita to taykay, anca adihay ko pitosil ato mirienang to polong saˈopo, misaali to tawki misalof to katayalan ita a toki, toniya tatokian misaaliay kita to tanektekay a pakasoˈlin, hanaca makahi a mitadiˈec ci Yihofaan. Ano eca pihayi ko tawki, pasawad kitaanan a matayal, papakasoˈlin kita ci Yihofaan, cowa ko mamifalah kitaanan, miliyas kitaanan, pakasoˈlin Cingranan o mamidimokos to sakaˈorip no mita han? (Hipray 13:5) ˈAlomanay mieminay to toki matayal a salikaka tahatinakoay, itini pisaalian nangra a tatokian samaanay padama ci Yihofa. O madimadiay a Kawas ci Yihofa, cowa ko papakatoled Cingra kitaanan. Ini itihi ci Yihofa, ano o maananto a demak ko mifekaday noikor, cowa ko mamatalaw kita. Edeng padadotoc kita isalakat micangacang to Hongti Kitakit, cowa ko mamiliyas ci Yihofa kitaanan. w22.01 7 fiedac 16-​17 fatac

Itini masamanay a pakayraan, o pakasoˈlin ita to malohemay malitengay o mamicada to sapalifet alatek? O mafalahay tamdaw ano o paro no lomaˈ anca ngaˈayay widang ita, cacisasa kita miharateng alatek: “Misongilaˈay ko malohemay malitengay miharateng to kihcod a lalangian han? O saˈosi nangra soˈlinay o harateng ni Yihofa han?” Samaan ngaˈ ira ko matatodongay a pinengneng to misaˈosian no kasacefang no malohemay malitengay hani? Haratengen ita o mifalahay o limasmas ni Yihofa, ngaˈayay midipot to kasakopang, ciepocayho to mararaway a tamdaw. O cowa kakahi pasasiyor a tamdaw ano padotoc materek i kasakopang, wa ira ko tatiihay pifiyor to romaroma tamdaw. (Kalatiya 5:9) Harateng no mararaway tamdaw cowa ka pakidem ko raraw no niyah saan, mihaenay awaay ko ˈicel mifalic to harateng ato waywayan no niyah, telocto eca ka ngaˈay miliyaw milifok to pihayda ni Yihofa. (Patnakay 8:​11) Ngaˈay kita pakasoˈlin, cowa ko papatelas ko malohemay malitengay a mifalah to cecay tamdaw. w22.02 5-6 fiedac 13-​14 fatac

Maharek ko malohemay malitengay mihadak to sapalimoˈot i, ano eca ka tangsol micada anca mitoor a midemak ko tao, mikiriwiˈay misaali ko malohemay malitengay to mihadidiay, iraho ko sidaˈitay. Mamiˈimer cingra to harateng no niyah, aka maketer. Roma i, o malohemay malitengay mitolon ko niyah i, ngaˈayay micangacang ci Yihofaan padama to tao cipinang, hano mamitengil to sapalimoˈot a midemak. Misaaliay ko salikaka to toki ngaˈ cipinangay to lalakaw no sapalimoˈot. O waywayan no malohemay malitengay ano damsayay iraay ko mihadidiay, o maharatengay no tao cowato ko kapiliˈan ningra a pakayraan no malohemay malitengay a somowal, ao mamisinanot to lalakaw no sapalimoˈot. Manaokaniw, o mihadakan no malohemay malitengay a sapalimoˈot o mamikitini i Fangcalay Cudad. Makalimay kita cowa ko sakaciepoc aca no tao ko sapalimoˈot no niyah, o ngangaˈayho ‘palipahak to falocoˈ ’ no tao.​—Taneng 27:9. w22.02 18 fiedac 17 fatac; 19 fiedac 19 fatac

Wa micangacang kita ci Yihofaan pafeli to ˈicel miremo to sapalifet, anca miremo to cecay dangoc, kawra latekay manayaray ko pipacaˈof Ningra. Hano eca ka tangsol ci Yihofa pacaˈof to polong a satolon ita hani? Mafanaˈay Cingra to mikifalocoˈay a picangacang ita Cingranan, o pakayniay pakasoˈlinay falocoˈ Cingranan. (Hipray 11:6) Kawra, ano micangacang kita ci Yihofaan padama kitaanan midemak to kaolahan Ningra a demak i, makalimay Cingra minengneng to hakowaay ko pisetek no falocoˈ ita. (1 Yohani 3:​22) Mihaenay, ano micangacang kita to Kawas padama kitanan misawad to tatiihay nanaman anca miremo to cecay dangoc, misaaliay to mihadidiay, hanaca misaˈicel a mifalic. Paihkalay ci Yis, o roma a satolon ita cowa ko tatangsol milifok to caˈof no Kawas alatek. Sanay cingra: ‘Ka padadotoc a mingitangit, ta mapafeli kamo; ka padotoc a mikilim, ta pakatama kamo; ka padotoc mikongkong, ta fawahen ko fawahan. O mingitangitay a tamdaw, o mamapafeli; o mikilimay a tamdaw, o papakatama; o mikongkongay tamdaw, mamafawah ko fawahan.’​—Matay 7:​7, 8. w21.08 8 fiedac 1 fatac; 10 fiedac 9-​10 fatac

O papadotoc a micekiw to kimad no Kawas, padotoc a mitongal to pakasoˈlin to Misangaˈay a Tatapangan. (Yosuwa 1:8) Kiriwiˈen a misinanot o sapairasol no Fangcalay Cudad matatodongay a malaˈosi, o lalakaw no Fangcalay Cudad awaay ko mararaway. Mihaenay, wa ngaˈay kiso pakasoˈlin iraay ko ciolahay citanengay a Misangaˈay a Tatapangan misangaˈ kitaanan, o Fangcalay Cudad Cingra ko mikayatay to tamdaw a mitilid. (2 Timoti 3:​14; 2 Pitiro 1:​21) Micekiw to Fangcalay Cudad i, ka kiriwiˈen misinanot ko ilalomaˈay a sapaini tada ciepocay. Tinakoen, iti:yaho palimoˈotayto ko Fangcalay Cudad, maˈanofay to payci tatiihay i tamdaw, pairaay to ‘adihayay roray.’ (1 Timoti 6:​9, 10; Taneng 28:20; Matay 6:​24) Patalipaˈelal ko Fangcalay Cudad aka maˈanof to payci tada citanengay! Maharatengay iso ko roma safalod no Fangcalay Cudad ngaˈayay padama tisowanan han? Misongilaˈ kita misimsim to sapaini no Fangcalay Cudad tada ciepocay, wa matongal ko pakasoˈlin to Misangaˈay a Tatapangan, pakasoˈlin to taneng Ningra o papakaremo to sapalifet no halafinay a toki. (Yakop 1:5) Misaka dademak kita to sapaini no Fangcalay Cudad, o mamatongal ko lipahak no kaˈorip.​—Isaya 48:17, 18. w21.08 17-​18 fiedac 12-​13 fatac

Ano matoˈasayto kiso, aka calemcem, maharatengay ni Yihofa ko kihcod nano demak iso. Padadotocay fanekfek kiso mirienang to mitosilay a tayal, na misiˈayaway kiso to maamaan a sapalifet, iraay ko misemsemay a nalifetan, kawra padadotocay kiso mihadidi. Midofdofay kiso ato paˈading to moecelay palinian no Fangcalay Cudad, madimadiay milahci to kalimlaan a tayal i likakawa no Kawas, pahatatanamayho to tao. Adihayay ko kafalic no likakawa ni Yihofa, misaˈicelay kiso minanam. O roma salikaka micangacangay to mieminay to toki misakafah, kamayan kiso midama ato pakalalok cangranan. Mihaen kiso a madimadi, tada maolahay ci Yihofa tisowanan! Mikiˈokay Cingra ‘cowa ko mamiliyas to madimadiay a finawlan Ningra,’ mikiˈokayho saan ko sowal: “Tangasa i nika toˈas ato nika ˈofad namo, o dadipoten Ako kamo.” (ˈOlic 37:28; Isaya 46:4) Aka a o matoˈasayto kako, pakayni i likakawa ni Yihofa awaay ko epoc saan a miharateng. Tada kalimlaan kiso! w21.09 3 fiedac 4 fatac

O taneng ni Yihofa awaay ko pakaliniay, mansa paihkal to siniˈadaay i tamdaw. Sowal no Fangcalay Cudad: ‘Nai fafekangay a taneng . . . o matomesay to siniˈada, kadofahay ko ngaˈayay a minaroˈan.’ (Yakop 3:​17) O sidaˈitay a Wama ci Yihofa, mafanaˈay Cingra paihkal to siniˈadaay i wawa ngangaˈay paira to epoc cangranan. (Isaya 49:15) Samanen siniˈadaay ci Yihofa to finawlan Ningra, mansa ira ko ˈodingaray a hanonoˈ nangra. Matomesay to taneng ci Yihofa, mihaenay ano ira ko lalangian, makahiay Cingra paihkal to siniˈadaay i tamdaw, kawra mafanaˈay Cingra hacowa tatokian caay pihaen to demak. O siniˈadaay Ningra cowa ko pakiyadi saan to mararaway. O cecay midokoay ci Yihofaan a tamdaw ano padeteng mararaw, sasamaan ko demak ita hani? Itini sakayat no Kawas ci Pawlo sanay: ‘Hamaan macacawmaˈ cingranan.’ (1 Korinto 5:​11) Mararaway tamdaw eca ka pasasiyor, o kasakopang mamifalah cingranan, mihaen ngaˈay midipot to madimadiay a salikaka, wa ngaˈayho misawacay to o makoracay a Kawas ci Yihofa. w21.10 9-​10 fiedac 7-8 fatac

Pakiyaho kita midama to tayal no Hongti Kitakit o midokoay ci Yihofaan. Ano misalisin ko Israil tamdaw cowa kangaˈay wakawak saan tayra i ˈaˈayaw ni Yihofa. (Limoˈot 16:16) O mamitoor cangra to ˈicel no niyah patafang to dafong, pakayni ko pipaihkal to tada miakoˈiday cangra to kihcod a nano demak ni Yihofa cangranan. Ngaˈay kita samaan paihkal to maolahay kita ci Yihofaan, miakoˈid to kihcod a nano demak Ningra kitaanan hani? O cecay a pakayraan i, mitoor to ˈicel no niyah pakiyaho midama to kasakopang ato polong no hekal a tayal. Sowal ni Pawlo: ‘Salakat ira ko makahiay a falocoˈ no tamdaw, o sapatafang ningra wa mikiriwiˈ a palipahak to Kawas, hanaca o sapatafang ningra o kinaira ningra, cowa ko mipaciecian.’ (2 Korinto 8:​4, 12) Ano adihayay anca mimingay ko sapakiyaho ita, ano mikitiniay i makahiay a falocoˈ, o mamasemer ci Yihofa.​—Marko 12:42-​44. w22.03 24 fiedac 13 fatac

Awaay ko pakayraan no malohemay malitengay misaysay to kihcod pasangaray no finawlan ni Yihofa. Soˈlin mahaen, makalimay ci Yihofa misarocod a midemak ko malohemay malitengay, pakalalok ato midipot to siri Ningra. Mihaenay, sasamaan ko malohemay malitengay itini ka ˈifowa no kaˈorip, mihadak to toki padama to salikaka hani? Minanam to taˈarawan ni Pawlo. Marariday ci Pawlo mikilim to toki pakahemek to salikaka, ho mapakalalok cangra. Damsayayho cingra micada to salikaka, patirengay to ngaˈayay taˈarawan no malohemay malitengay. (1 Tisalonika 2:7) Pasowalan ni Pawlo ko salikaka, tada maolahay cingra cangranan, ano ci Yihofato maolahay cangranan. (2 Korinto 2:4; Ifiso 2:​4, 5) Kalawidangan ni Pawlo ko salikaka, mipalak to toki kalacafay cangranan, pakasoˈlinayho cangranan, makahiay mikifalocoˈ mihadak to cariraw ato dangoc no niyah. (2 Korinto 7:5; 1 Timoti 1:​15) Kawra, mihaen ko demak ni Pawlo, cowa ko paihkalay to hakowaay ko pasangar no niyah, ao makalimay sapadamaaw to salikaka. w22.03 28 fiedac 9-​10 fatac