Saka 8 Folad

O mitoroˈan ni Yis oyaan tano pacekay mipacek to kamay ato waˈay ningra a sofitay no Loma, pakayni caka sadafdaf ko macadaay cowa ka maketer ci Yis, ˈintel ko falocoˈ. (1 Pitiro 2:​23) Wa mitodong kita ci Yisan, makahi a misodod to tao. (Kolosay 3:​13) O salawina ita anca roma tamdaw cowa ka cipinang to pihakelongan ato pakayraan ita maˈorip, mansa misafelit kitaanan. Pakidemay ko pidokaˈ nangra kitaanan alatek, pakangodo kitaanan, mipalak to cudad ita, paˈangiho to mamidokaˈ kitaanan. Soˈlin mahaen, cowa ko aˈintel ko falocoˈ ita. Ngaˈayay cangacangen ita ci Yihofa padama cangranan mihapinang to demak, ikor micada to soˈlinay kimad. (Matay 5:​44, 45) Kawra, ano pakidemay ko dokaˈ ita, pasangar a misodod alatek. Kawra ano palamiten ita ko ˈintelay i falocoˈ, o niyah ko mamadokaˈ. (ˈOlic 37:8) Ano misaˈosiay kita misodod to tao, o cowato ko papakayni mataˈlifay a demak padotoc a maketer.​—Ifiso 4:​31, 32. w21.04 8-9 fiedac 3-4 fatac

Iraay ko mafalahay no kasakopang a paro no lomaˈ iso han? Ano iraay, maedeng tada masomaday kiso. Haratengen hena, itini kakarayan a wawa ni Yihofa mitowakang Cingranan i, maedeng tada masomaday Cingra! (Yuta 6) Kanonoˈan Ningra a Israil tamdaw misaliyaliyaw mitowakang Cingranan, tada pakasomaday Cingranan. (ˈOlic 78:41) Wa ngaˈay kiso pakasoˈlin, maˈaraw no sidaˈitay a Wama ita i kakarayan miliyas ko paro no lomaˈ iso Cingranan i, mahecaday a masomad. Cipinangay Cingra hakowaay ko pisemsem iso, patadoay a siniˈada tisowanan, pafeli tisowanan to sapakalalok ato sadama. ˈAlomanay wama wina maˈaraw ko wawa miliyas ci Yihofaan, tocerid cowa ka ngaˈay ko pipasifanaˈ no niyah to wawa saan ko harateng. O cecay faˈinayan salikaka sanay ko sowal: “Miceriday kako miroroh to niyah, tatiihay ko mitiihan.” O cecay fafahiyan salikaka iraho ko mahaenay milifetan, miceriday cingra miharateng: “Tada tatiihay a wina kako hokira? Itini pipasifanaˈ to wawa minanam to soˈlinay kimad, maedeng cowa ka ngaˈay ko demak ako.” w21.09 26 fiedac 1-2, 4 fatac

Harateng no roma tamdaw awaay ko tatodong no Misawacayay Tamdaw ni Yihofa pasifanaˈ to tao to Fangcalay Cudad, samanen cowa picudad cangra to picudadan no kiyokay. Kawra misaaliay ko tamdaw misongilaˈ mikilim to wacay, mihapinang to soˈlinay demak. O mitiliday to Fangcalay Cudad ci Luka mihaenay ko demak, misarocoday cingra ‘misongilaˈ a mihapinang to polong nonini a demak,’ hongaˈ ‘ihkal a mafanaˈ’ ko miasipay o mananamay nangra milingatay ci Yisan a demak ‘sahtoay o soˈlinay.’ (Luka 1:​1-4) Roma i, itiniay Piriyaay a Yutaya tamdaw malecaday ci Lukaan, matengil nangra ko milingatay ci Yisan a ngaˈayay a lihaf ikor, misarocoday micekiw to Hipray sowal a Fangcalay Cudad, mikinsa to matengilay nangra o soˈlinay hokira. (Dmak 17:11) Malecaday, aniniay tamdaw mamihapinangho to soˈlinay demak, palalinien to sinael no Fangcalay Cudad ato mananamay no niyah mikitini Misawacayay Tamdaw ni Yihofa a lalakaw. Wa mikingkiwho cangra to likisi no finawlan no Kawas anini a lintad. Ano songilaˈen no tamdaw ‘mitiyawca ko lalengawan,’ cowato ko mamaapoh no misakinihay ato mararaway sowal no tamdaw. w21.05 3 fiedac 7-8 fatac

Wa ngaˈay kiso mitahidang to cecay salikaka i kasakopang tayni i lomaˈ a micawmaˈ han? Itini cecay tatokian mipalak kita to toki kalacafay to salikaka, wa mikiriwiˈ ko lipahak nangra alatek. Tinakoen pisalisinan a tatokian, roma salikaka pasangaray malacafay to cowa pihakelong a paro no lomaˈ. Itini kapatayan a romiˈad no paro no lomaˈ, roma salikaka mikiriwiˈay a masomad alatek. Makahi kita itini toniya tatokian mipalak to toki a kalacafay cangranan, o ‘soˈliˈlinay a ciharateng’ cangranan. (Filipi 2:​20) Pakayni masasiromaay a lalangian matoˈol kita alatek. Kawra aka mapawan, masongilaˈay ko kacipinang ni Yihofa to harateng ita. O mamidimokos Cingra kitaanan, tocerid pakaynian Ningra i salikaka mihaen ko demak. (Matay 12:48-​50) Roma i, sapaihkalaw to piakoˈid ci Yihofaan, wa misaˈicel kita padama to salikaka. Soˈlin matoˈolay kita nolatekay, kawra iraay ci Yihofa i tatihi, caay ko mamatoˈol kita! w21.06 13 fiedac 18-​20 fatac

Soˈlin o roma tamdaw cowa kaolah to milasilan ni Yis a lihaf, kamayan tawlik ko waywayan ni Yis, padadotoc a mitosil. Misamaanay hani? Samanen mafanaˈay cingra misaaliay ko ˈalomanay tamdaw sakafanaˈaw to soˈlinay kimad, sapadamaaw to ˈalomanay tamdaw micada to lihaf no Hongti Kitakit. O roma i, mafanaˈay cingra salakat cowa kaolah ko roma tamdaw, kawra mafalicay ko waywayan noikor. Nengnengen ko tinakoan no paro no lomaˈ ni Yis. Itini pitosil ni Yis to tolo miheca kali tosa a tatokian, o safa ningra awaay ko cecay pakasoˈlinay cingranan. (Yohani 7:5) Kawra ikor no patikol maˈorip ci Yis, malo Krisciyangayto cangra. (Dmak 1:​14) Cowa kafanaˈ kita tahini saikor o cima ko mamicada to soˈlinay kimad. Roma tamdaw misaaliay to adihayay a toki, ngaˈ matemeray no soˈlinay kimad. Roma tamdaw soˈlin salakat cowa kakahi mitengil, kawra maˈaraw ko ngaˈayay capeling ato tawlikay waywayan ita, saikor ‘panokayay to ˈdil i Kawas.’ w21.05 18 fiedac 17-​18 fatac

Itiniho i fafekang no sera ci Yis pafeliay to nisawawaan to kalimlaan a ˈinorong, oniya ˈinorong tosaay masasiroma. Palimoˈotay cingra to nisawawaan milasil to ngaˈayay lihaf no Hongti Kitakit, pasowalayho cangranan to milingatay a sakayat. (Luka 8:1) Tinakoen, pasowalan ni Yis ko nisawawaan, ano maolah ko tamdaw samaan ko hademak, ano mapiliˈ sasamaan ko hademak. (Luka 9:​2-5) Paˈayawayho ci Yis hakowa ko taˈangay no mitosilay a tayal, somowal to aitini paro no kakarayan a milasil to ngaˈayay lihaf ko nisawawaan, ‘matengil no polong kasafinacadan.’ (Matay 24:14; Dmak 1:8) Roma i, pasowalan ni Yis ko nisawawaan pasifanaˈ to tamdaw midofdof to kihcod a sapalimoˈot ningra. Mitadtaday ci Yis, oniya kalimlaan a tayal wa padadotoc tahini i lintad no mita, “tangasa i paherekan no hekal.” (Matay 28:18-​20) Itini Paˈarawan, ihkalay ko pitadtad ni Yis, polong nisawawaan ningra iraay ko ˈinorong padama to tamdaw mafanaˈ ci Yihofaan.​—Paˈarawan 22:17. w21.07 3 fiedac 3-4 fatac

Anini, maharatengay no ˈalomanay tamdaw edengan malowid ko tao, cowa ka pikihar to sasamaan ko tao. O misasingdiay tamdaw sapipadikaw to tao haratengay sanay ko demak, o miontoay sapilowidaw to tao padeteng sanay midokaˈ to tao, micudaday sakangaˈayaw no misikingan a taykak mitakaway minengneng to lalakaw. Mafanaˈay ko Krisciyang to mararaway ko mahaenay waywayan, o ‘midoedoay to ciraraway a waywayan.’ (Kalatiya 5:​19-​21) Kawra, itini cowa ko kafanaˈan a tatokian mikidatay kita to malalifetay i kasakopang han? O haharatengen koniya demak, samanen o malalifetay a harateng wa mipalak to kakelec no salikaka. Wa minengnengho kita to ngaˈayay taˈarawan i Fangcalay Cudad, oniya madimadiay midoko to Kawas a tamdaw cowa ka lalifet to i tatihiay a tamdaw. w21.07 14 fiedac 1-2 fatac

Ira ko madimadiay a olah ita wa talaˈayaw padama to matoleday masomaday a salikaka. Anini ˈalomanay a salikaka padadotocay padama to matoleday masomaday a tamdaw i kasakopang. Tada maolahay cangra to salikaka, mansa makalimay sapadamaaw cangranan. (Taneng 12:25; 24:10) Mihaen ko demak nangra malecaday to sapalimoˈot no tarokos ci Pawlo, sanay cingra: ‘Mihinom to matoleday a tamdaw, midama to malonayay tamdaw, paira to mihadidiay a falocoˈ i polong a tamdaw.’ (1 Tisalonika 5:​14) Sapadamaaw to matoleday a salikaka, o sangaˈayay a pakayraan i, misongilaˈ a mitengil to nafalocoˈan nangra, ato mifanaˈ cangranan tada maolahay kiso cangranan. Misarocod kiso ciharateng to kalimlaan a siri ni Yihofa, cowa ko mamapawan Cingra. Taneng 19:17 sanay: ‘O paladaˈay a padama to pakosiya a tamdaw i, o pacaliway ci Yihofaan, samaanay cingra micada to tao, mamihaen ko Kawas micada cingranan.’ w21.11 10 fiedac 11-​12 fatac

Nohatini sasamaan kita talaˈayaw misaday to hanoikor hani? Minanamho kita marenec, misaˈicel mitongal to kalawidang ci Yihofaan, hanaca mikitini milifok to sataˈangayay a lipahak. Ano matongal ko kafanaˈ ita to Kawas mamatongal ko pakasoˈlin, ano miˈodis ko Makok a Kok i, o mamidipot ko Kawas kitaanan. Mitadtaday ko aniniay a sinael, hano pakasoˈlin ci Tafiti to mamidama ci Yihofa cingranan. Padotocay ci Tafiti mitadiˈec ci Yihofaan, ci Yihofa saan cowa pakatoled cingranan. Tinakoen, kaemangay a Tafiti milood ci Koliyatan i, pasowalay cingranan: ‘Anini a romiˈad, papafelien ni Yihofa kiso i kamay no mako.’ Telocto, soˈlinay malowid ningra konini a ciˈicelay Filistin a tamdaw. (1 Samuil 17:46) Ikor matayal ci Tafiti saki Sawloan i, kinapinaay sapipatayaw ci Sawlo cingranan, kawra ‘mikapotay ci Yihofa ci Tafitian,’ mansa cowa ka laˈosi ci Sawlo. (1 Samuil 18:12) Onini a nalifetan padamaay ci Tafitian a pakasoˈlin, o papadamaen ni Yihofa cingra miremo to malifaay a sapalifet. w22.01 6 fiedac 14-​15 fatac

Ano o mananto ko demak ni Yihofa sahtoay o mihadidiay, ano hakowato ko mapalakay a toki makahiay Cingra. Mihaen ko demak Ningra pakayniay sapaˈdilaw to ngangan no Niyah, ato saka ciepoc no polong pinaˈorip. Tinakoen, nengnengen samanay ci Yihofa palidlid saan a misaday to hakitiraan no tamdaw a cikiw. Sanay ko sowal no Fangcalay Cudad mifakciwan koniya sera, ira ko katomirengan no hecek, paranaan a fakeloh. (Yopu 38:​5, 6) Paselaˈayho ci Yihofa, mipalakay to toki miharateng to misangaˈan Ningra a maamaan. (Satapangan 1:​10, 12) Ngaˈay haratengen iso maˈaraw no coyoh palidlid saan ko pisangaˈ ni Yihofa to kihcod, samanay ko nafalocoˈan nangra hani? Maedeng masemeray ko harateng nangra. Sowal no Fangcalay Cudad misatapang cangra a ‘mawaho milekal.’ Soˈlin o pisangaˈ ni Yihofa halafinay ko mapalakay a toki, kawra tiya songilaˈen Ningra minengneng to misangaˈan no Niyah i, marenecay ko falocoˈ, saan ko sowal ‘tada ngaˈayayto maemin.’​—Satapangan 1:​31. w21.08 9 fiedac 6-7 fatac

Itini sapatinako ni Yis, ˈayaw no tayra roma kitakit ko cecay tamdaw mitahidangay to koli, mitoor to inaneng no kahacecay koli pafeli cangranan to payci misasingdi, o cecay 5 lofok a linkim, o cecay 2 lofok a linkim, o cecay 1 lofok a linkim. Saˈayaway tatosaay koli malalokay matayal, kawra oya saka tolo koli cowa ka dademak, telocto milaplapan no tawki cingra. O saka cecay koli ato saka tosa koli misongilaˈay minengneng to sapatorod no tawki cingranan a tayal, misaˈicelay mietan to payci, telocto tosaay lofok a linkim ko maetanay ningra. Malalokay cangra matayal, tada idahiyayto. Cowa ko pakahemek aca to tawki, o ngaˈayay pakasoˈlinen cingra sanay, misaˈosi paiken cingranan to adihayay a tayal. w21.08 21 fiedac 7 fatac; 22 fiedac 9-​10 fatac

Itini salikoray romiˈad, paihkalay ci Yihofa to taˈangayay a pihadidi, caay kaolah Cingra malaˈafo ko cecacecay tamdaw. (2 Pitiro 3:9) Soˈlin pairaan ni Yihofa ko toki no kahacecay tamdaw a pasasiyor, kawra citolasay ko pihadidi Ningra. Oya manaˈayay midopo to Hongti Kitakit no Kawas a tamdaw, wa malecad o teloc noya lintaday ni Mosi a Falawan. Pasowalan ni Yihofa ci Falaw: “Ano nilahcian Ako a mipalifong kiso ato finawlan iso i, kona o matekopayto kamo itiya aca. Nikawrira, o sapahapinangaw Ako to ˈicel Ako saka, paˈoripenho Ako kiso. Onini i, o sakalosiyangaw no ngangan Ako i polong no hekal.” (Kasadakan 9:​15, 16) Salikor o mamihai ko kasakitakit, edengan ci Yihofa ko soˈlinay a Kawas. (Icikil 38:23) Aniniay a sinael masowalay konini a kangernger, o polong malecaday ci Falawan manaˈayay mihayi to sapikowan a fadangalan ni Yihofa a tamdaw o tatahadaˈoc mamalaˈafo a maemin. w21.09 18-​19 fiedac 17-​18 fatac

Pakayni mafalahay a paro no lomaˈ iso adadaay ko falocoˈ han? O sowal no salikaka cowa pihinom tisowanan, mitongalay to somad iso, sasamaanto hani? Hamaan mitokel kita sahto saan o matatodongay ko hasowal no tao. (Yakop 3:2) Soˈlin cowa ko malefotay kita, o roma salikaka cowa ka fanaˈ o manan ko hasowal anca cowa ka fanaˈ to midokaˈay kitanan, cowa ko kafahkaˈan konini. Haratengen ko sapalimoˈot no tarokos ci Pawlo, sanay cingra: “Ano iraira ko katatiihan no falocoˈ no nima namo i cimaanan i, kasasihepol, mikifalocoˈ masasisodod.” (Kolosay 3:​13) Ka padadotoc a midama to iraay ko mafalahay paro no lomaˈ a salikaka, mikikakaay ko pisaali nangra nohatini to kaciharateng ato pakalalok ita. (Hipray 10:24, 25) Latekay, miraayay ko kasakopang cangranan sanay ko hatiniay salikaka miharateng, hato malecaday o mafalahay cangra. Caay ka olah kita ira ko mahaenay harateng nangra! Mangalef koya mafalahay ko wama wina a kaemangay tamdaw, kakiriwiˈen ita pakalalok ato pakahemek cangranan. w21.09 29 fiedac 13-​14 fatac; 30 fiedac 16 fatac

Masasowal kiso ato matoˈasay salikaka, wa milifok to sapakalalok a tatosa. (Loma 1:​12) Wa matongal ko pakasoˈlin iso ci Yihofaan mamidimokos to finawlan no Niyah, o mamatinako no matoˈasay tamdaw ko olah iso ato pikangodo. Ano pasowal cingra tisowanan to samanay ci Yihofa palemed cingranan i saˈayaw i, o lalipahak ko falocoˈ ningra. O papotalay a makapah wa palidlid saan a malahdaw, kawra itini pinengneng ni Yihofa, oya madimadiay Cingranan a tamdaw matongalay ko kafangcal. (1 Tisalonika 1:​2, 3) Misamanay? Samanen padadotocay cangra midofdof to sakayat no fangcalay saocor, palahad to adihayay makapahay a capeling. Ano matongal ko kacipinang ita cangranan, mikangodo cangranan, pasayra cangranan minanam, wa matongal ko pihapinang to soˈlinay matekesay a odoˈ cangra! O kaemangay tamdaw wa misalimla to matoˈasay a tamdaw, o matoˈasay a tamdaw wa misaareteng to kaemangay tamdaw, mihaen o pakasoˈlinay falocoˈ no kasakopang wa matongal a tanektek. w21.09 7 fiedac 15-​18 fatac

Ka piliyas kita to pakidemay ko saali a waywayan, misaˈicel a mitodong to ‘matomesay ko siniˈadaay’ a Kawas. (Ifiso 2:4) Ano siniˈada kita to tao, cowa ko siniˈada aca cangranan, o tatalaˈayaw midemak padama cangranan. Misongilaˈ kita mihapinang to o cima ko misaaliay to sadama i lomaˈ, i kasakopang, i kilac, mamakilim ko adihayay a toki paihkal to siniˈada i tamdaw. Iraay ko tamdaw misaaliay to sahinom han? Ngangaˈay kita mihadak to ciepocay a sapadama, tinakoen pafeli cangranan to kakaenen, anca midemak to pina demak padihko cangranan han? Miliyaway cadaen no kasakopang a salikaka misaaliay to sapakalalok no ngaˈayay widang hokira? Ngangaˈay kita pasowal to tao to ngaˈayay lihaf no Fangcalay Cudad, pafeli cangranan to sahinom han? Onini o ngaˈayay a pakayraan paihkal to siniˈadaay i tamdaw. (Yupo 29:12, 13; Loma 10:14, 15; Yakop 1:​27) Misinanot kita to saali no tao, mamakilim ko adihayay a toki, paihkal to siniˈadaay i tamdaw. Misaˈicel kita mihaen to demak, papakahemek to ‘matomesay ko siniˈadaay’ a Wama ita i kakarayan! w21.10 13 fiedac 20-​22 fatac

Itini ˈOlic 23 fedengan, somowalay ci Tafiti samanen iraay ci Yihofa malo pakaenay no niyah adihayay ko malifokay a sapalemed, onini a sapalemed tada ciepocay i nokaˈorip ningra. Tinakoen, mikayatan ni Yihofa cingra ‘romakat to moecelay a lalan,’ ano ngaˈay anca tatiihay ko pakayraan madimadiay a midama cingranan. Mihaiyay ci Tafiti, soˈlin itini ‘kandaway ko rengos a omah’ ni Yihofa a maˈorip cowa ka dipayal. Latekay matoleday cingra, malecaday o ‘romakatay i toˈemanay a fideloan.’ Roma i, ˈintehay ko ˈada cingranan. Kawra o pakaenay ningra ci Yihofa, mansa ‘cowa ka talaw madokaˈ ’cingra. Sowal ni Tafiti ‘cowa ka cangoˈot ko maamaan’ ningra, o maanan ko tatodong? Cowa pisaali cingra to adihayay dafong ngaˈ lipahak, ano hakowato ko sapafeli ni Yihofa cingranan, marenecay cingra. Pakaynien ci Tafitian ko sowal, sakakaay i, milifok to sapalifon ato sadipot ni Yihofa. Mikitini i sowal ni Tafiti mahapinangay ita, ira ko matatodongay pinengneng to pakadafongay tada kalimlaan. w22.01 3-4 fiedac 5-7 fatac

Itini nolitengan, ˈalomanay sikawdan no Kawas itini pitosil misiˈayaway to tatiihay harateng no tao. Tinakoen, maedeng 50 mihecaan, padotocay ci Nowa ‘milasil to moecelay.’ (2 Pitiro 2:5) Manaokaniw makalimay cingra micada ko tao to milasilan ningra a lihaf, kawra cowa ka pasowal ci Yihofa to mamahaen ko minaroˈan. Soˈlinay i, palimoˈot ci Yihofa ci Nowaan misangaˈ to tamina i sanay ko sowal: ‘Keriden iso ko wawa, fafahi, kadafo a micomod to tamina.’ (Satapangan 6:​18) Mikitini ci Yihofaan mafanaˈ ci Nowa to pakeciw no tamina ikor, mahapinangay to citolasay ko kitiraan, maedeng cowa ko ˈaˈaloman ko mitengilay to lihaf ningra. (Satapangan 6:​15) Soˈlinay mahaen ko teloc, itira toya tatiihay a hekal, awaay ko cecacecay to micadaay to lihaf ni Nowa. (Satapangan 7:7) Pasokiyaway ci Nowa sanay ko piharateng ni Yihofa han? Cowa! Madimadiay ci Nowa mitoor to kihcod a limoˈot ni Yihofa a midemak, mansa itini pinengneng no Kawas o malaˈosiay a mitosilay cingra.​—Satapangan 6:​22. w21.10 26 fiedac 10-​11 fatac

Haratengen hena matengil ni Rucu koniya sowal samanay ko harateng. Sapadamaaw ci Naomian, adihayay ko mihadakan ni Rucu. Misaˈicelay mihinom ci Naomian, malacafayay cingranan tomangic, kalacafay cingranan romakat to maraayay a lalan minokay i nalacolan. Kawra sanay ko sowal ni Naomi: ‘Pawakawak han ni Yihofa kako a panokay.’ Itiya tomirengay ci Rucu i tatihi ni Naomi, hato sanay ko sowal ni Naomi, o mihadakan ni Rucu awaay ko epoc. Matengil koniya sowal, maedeng tada masomaday ci Rucu, kawra kamayan cingra cowa ka pisawad ci Naomian. (Rucu 1:​3-​18) Anini, soˈlin misaˈicelay kita padama to matoleday ko harateng a salikaka, somowal cingra to midokaˈay kitanan a sowal alatek. Kawra aka telien i falocoˈ koniya sowal, wa padotoc i tatihi ningra a malacafay, hanaca micangacang ci Yihofaan padama kitanan mahela ko sapihinom cingranan a pakayraan. (Taneng 17:17) O cecay misaaliay to sadama a fafahiyan salikaka salakat minaˈayay to sapadama ita alatek, kawra ira ko madimadiay a olah ita, wa padotoc i tatihi ningra malacafay, makalim to mamakahi cingra micada to sadama, miremo to pasangaray i nokaˈorip.​—Kalatiya 6:2. w21.11 11 fiedac 17-​19 fatac

Itini Fangcalay Cudad o “fangcalay” ato “makoracay” o mitoroˈan i, pakayniay i waywayan ato pihakelongan a kakorac, iraay ko ono Kawas sanay a tatodong. Sakoniya sowal, ano padotoc kita mitoor to ˈakawangay palinian no waywayan, mitoor to mihaydaan ni Yihofa a pakayraan midoko Cingranan, hanaca ira ko tangongolay a kalawidang Cingranan, o makoracayto a tamdaw. Ci Yihofa Kawas o malefotay a makorac, kita saan o cowa ka lefot, kawra kamayan makahi Cingra malawidang kitaanan, tada kasemeranto konini! O soˈliˈlinay makorac ci Yihofa, itiniay taliyok no kamaroˈan Ningra a coyoh salafin na taˈangay ko ngihaˈ milasil: ‘Kakeridan no sofitay i kakarayan ci Yihofa tada makoracay! Tada makoracay! Tada makoracay!’ (Isaya 6:3) Oniya coyoh ngaˈayay ko kalalaˈed to makoracay a Kawas, pakasoˈlinay cangra to makoracay ko niyah. w21.12 3 fiedac 4-5 fatac

O kapah tamdaw makalimay lipahak ko kaˈorip no niyah. Roma i, o picudadan a singsi ato cowa pidoko to Kawas a paro no lomaˈ mitokelay cangranan micangacang to ˈakawangay a picudadan, mihaen ngaˈay mietan to adihayay a payci tonini hekal. Kawra micangacang to ˈakawangay a picudadan mamiˈafas to adihayay a toki. Roma i, o Krisciyang a wama wina ato salikaka i kasakopang pakalalokay to kapah patafang to hakelong no kaˈorip no niyah matayal ci Yihofaan. O maolahay ci Yihofaan a kapah sasamaan ngaˈ inaneng ko mipiliˈan hani? Ngaˈay cingra minengneng to Ifiso 5:​15-​17, hanaca itini pidotim i licayen ko niyah: “O maanan ko araaw ni Yihofa hani? O maanan ko piliˈen ako ngaˈay pakahemek ci Yihofaan hani? Mipiliˈ to maanan a lalan ngaˈay misongilaˈ misaka dademak to toki hani?” Haratengen, aniniay a lintad tada mariˈangay, o mikowanan ni Satan a hekal cato ka halafin mamalaˈafoto. w22.01 27 fiedac 5 fatac

Ihacowaay ci Yakop malo madimadiay a nisawawaan ni Yis hani? Sowal no Fangcalay Cudad, ikor no patikol maˈorip ci Yis ‘paˈaraway ci Yakopan, ikor paˈaraway to polong a tarokos.’ (1 Korinto 15:7) Onini a nalifetan mifalicay to kaˈorip ni Yakop. Tiya itini i tinglohay a lomaˈ i Yirusalim ko tarokos, mitala to sapafeli no Kawas a fangcalay saocor i, iraay ci Yakop itira. (Dmak 1:​13, 14) Ikor, iraay ko tatodong ni Yakop malo malohemay malitengay no saka 1 hahekalan. (Dmak 15:​6, 13-​22; Kalatiya 2:9) ˈAyaw no Kongyen 62 miheca, micadaay to sakayat no Kawas ci Yakop mitilid to cecay tikami pafeli to tatayra i kakarayan a Krisciyang. Anini, o tokel ita ano tatayrato i kakarayan anca itini fafekang no sera midaˈoc ko ˈorip, taˈangayay ko sapadama nonini a tikami kitaanan. (Yakop 1:1) O sowal no mikingkiway to likisi ci Yosifos, ci Yakop o Taˈangayay Saysi ci Ananiyas ko palimoˈotay mipatay. Tahiraay i patay ko madimadi ni Yakop ci Yihofaan. w22.01 8 fiedac 3 fatac; 9 fiedac 5 fatac

Mikitini sinael anini mananamay ita i, aka halamham kita to papalahdawen ni Yihofa ko kihcod a pasangaray ato sacara, hoeca ka mapalifet ko pakasoˈlinay falocoˈ ita. Wa malecad kita ci Yisan, micada to pakidemay a sapalifet alatek, mihaenay o papaˈayaw kita a misaday tahatolas ko madimadi, soˈlin kinafalah to ˈorip cowa ko tatalalikor. (Matay 16:24, 25) Kawra mikiˈokay ko Kawas, cowa ko papataˈlifen Ningra ko mamadangar ita a sapalifet. (1 Korinto 10:13) Mananamayho ita, wa malecad kita ci Yisan tahalifa to cowa ka sadafdaf a demak alatek. (1 Pitiro 2:​19, 20) Misafelit ko roma tamdaw kitaanan, cowa ko mararaway ko demak ita, ao cowa ko noniya hekal kita, hanaca misawacayay to soˈlinay kimad. (Yohani 17:14; 1 Pitiro 4:​15, 16) Mafanaˈay ci Yis hano haien ni Yihofa cingra micada to roray, kawra tahalifa ko madimadiay a Krisciyang to sapalifet, cowa ka cipinang hano mihai ci Yihofa mifekad ko tatiihay demak. (Hapakuk 1:3) Iraay ko mihadidiay no Kawas, matomesay to siniˈada, cipinangay Cingra cowa ko awaay ko pakasoˈlin noniya tamdaw, edengan misaaliay cangra to sahinom, hanaca edengan Cingra ko papafeli to soˈliˈlinay a sahinom cangranan.​—2 Korinto 1:​3, 4. w21.04 11 fiedac 9-​10 fatac

Midofdof kita to araaw no Kawas, tano ciolahay a falocoˈ ato mikangodoay a mihaen to demak, mamicada ci Yihofa to pidoko ita. Mafanaˈay kita to citatodongay Cingra to dadokoen, mansa tada makalimay patafang to sangaˈayay no niyah i Cingranan. O pidoko ita ci Yihofaan a cecay pakayraan i pasayra Cingranan mitolon. Sowal no Fangcalay Cudad o satolon ita mahecaday o patafangan a exiw i pakopangan ato fangcalay sefi, o hatiniay a exiw o misongilaˈan a misangaˈ, palipahakay ci Yihofaan. Malecaday, o mikifalocoˈay a satolon ‘palipahakay to Kawas,’ soˈlin tano kantangay a sowal o ngaˈayayto. (Taneng 15:8; Limoˈot 33:10) Matengil ni Yihofa ko satolon ita pasowal Cingranan to tada maolahay kita Cingranan, tada miakoˈiday Cingranan, maedeng o dadihko ko falocoˈ Ningra. Makalimayho ci Yihofa kitanan o cariraw, kalim ato kihcod a harateng no niyah pasowalen Cingra. Itini ˈayaw no mitolon, salakat ngaˈay kiso misongilaˈ miharateng to o maanan ko hasowal ci Yihofaan, mihaen o ngangaˈayto kiso tano sangaˈayay a ‘exiw’ patafang to kakarayan a Wama. w22.03 20 fiedac 2 fatac; 21 fiedac 7 fatac

Itini Armakiton, cima ko mamalidong, cima ko cowa ko mamalidong, cowa ko kita ko mamisaˈosi. (Matay 25:34, 41, 46) Maraod ko toki papakasoˈlin kita to sasawkit ni Yihofa han? Anca pakayni kita i katoled sawad saan midoko ci Yihofaan han? Aniniho, o papaˈicelento ita ko pakasoˈlin ci Yihofaan, mihaen o mamasongilaˈ ko pakasoˈlin ita Cingranan noikor. Haratengen hena, o sasawkit ni Yihofa itini faelohay hekal papaira to makapahay a minaroˈan! Toniya hekal awaayto ko mararaway pihakelongan, maˈanofay a lekakawa no misasingdiay, ato pairaay to saroero ato pades a sifo. Cowato ko tatahalifa kita to adada, matoˈas ato masomad to kapatay no salawina. Ci Satan ato tatiihay coyoh mamapalit to 1,000 miheca, o pairaan no pitowakang nangra a tatiihay demak o mamasongilaˈ a malahdaw. (Paˈarawan 20:​2, 3) Itiya, o mamahemek kita cowa ka cisasa ko niyah to pakayraan ni Yihofa a dademak. w22.02 6-7 fiedac 16-​17 fatac

Misaˈicelay ci Yis micowat to rihaday, pakalalokho to tao misaysay to lacongis. Pasifanaˈay cingra to tao, ano makalimay cangra cadaen ni Yihofa ko pidoko nangra, o mararihaday to salikaka. (Matay 5:​23, 24) Roma i, saliyaliyaw sanay ko tarokos malacongis to cima ko sataˈangayay, kawra cowa ka ˈisang ci Yis a padama cangranan mararihaday a malacafay. (Luka 9:​46-​48; 22:​24-​27) Sapicowataw to rihaday, cowa ko piliyas aca ita mikidat to lacongis, mifekad ko pasangar i, talaˈayaw malakangaˈay to tao. Roma i, pakalaloken ita ko salikaka mifalah to misakakinihay. (Filipi 4:​2, 3; Yakop 3:​17, 18) Ngaˈay salalicayen ita ko niyah: “Sapitafoaw to rihaday to tao, wa makahi kako kinafalah to manan hani? Ano madokaˈ no salikaka kako i, wa ˈinteh ko falocoˈ ako han? Ano mifekad ko pasangar i, mitalaay kako to tao malakangaˈay takowanan han? Anca, soˈlin o tao ko saˈayaw mararaw, mamakahi kako talaˈayaw a malakangaˈay han?” w22.03 10-11 fiedac 10-​11 fatac

Iti:yaho paˈayawayto ko Fangcalay Cudad, o finawlan no Kawas itini sakayat ni Yis ‘mikifalocoˈ makahi mihadak to niyah,’ matayal saki Yihofaan. (ˈOlic 110:3) Matatodongayto konini a sapairasol anini. O finawlan ni Yihofa to mihecahecaan mihadakay to adihayay toki mitosil pasifanaˈ to tamdaw, mihaen ko demak nangra mikifalocoˈay a makahi, cowa pisaali to sapalifon. Roma i, mahemekay ko ˈalomanay tamdaw matayal saki tao, mahawpay ko padama to salikaka tanektek ko kalalaˈed to Kawas, itini nafalocoˈan midama cangranan, ato mihadak to ciepocay a sapadama. Itini kasakopang, mikeriday a salikaka adihayay ko mapalakay a toki misaday to kamok no saˈopo ato milisoˈ to salikaka. O manan ko pakalalokay to finawlan no Kawas mikifalocoˈ makahi a padama to tamdaw hani? O olah, maolahay cangra ci Yihofaan maolahayho to tao. (Matay 22:37-​39) Ci Yis o saali no tao ko salakatan a miharateng, o ngaˈayay a taˈarawan no mita, o mamisaˈicel kita pasayra cingranan minanam. (Loma 15:​1-3) Mihaen ko demak ita wa adihay ko malifokay. w22.02 20 fiedac 1-2 fatac

Nolitengan a Israil ono maomahay a lekakawa, o lifon no maomahay toya romiˈad misaˈosito. Sowal ni Yihofa: ‘O manikaway cingra, o sakaˈorip ko lifon.’ (Limoˈot 24:14, 15; Matay 20:8) Ano panayaren no tawki ko lifon, o maomahay ato paro no lomaˈ ningra o mamacahiw toya romiˈad. Anini, o lifon no ˈalomanay tamdaw cowa ko pakaromiˈadan a misaˈosi, ao pakafoladan anca cecay folad kinatosa misaˈosi, kawra o safalod no Lifi 19:13 o sasinanoten no mita. O roma tawki misamsamay to maomahay, mimingay ko sapalifon cangranan, samanen awaay ko papiliˈen no maomahay, itira sanay cingranan matayal. O hatiniay a demak malecaday o miˈafasay to lifon no maomahay, caay kangaˈay mihaen ko demak no Krisciyang! w21.12 10 fiedac 9-​10 fatac

Adihayay ko macadaay ni Yis a semsem, maedeng masoˈaway cingra, misaaliay to sadama no tao. Mihadak ci Yis to nafalocoˈan noniyah o malonayay cowa ka saan miharateng, ano kita to aka mahaen ko harateng. Latekay, cowa ka sapifanaˈaw kita to tao to saali noniyah, matalaway maafad ko tao. Kawra ano soˈlinay misaali kita to sadama, aka cisasa, ka talaˈayaw a micangacang to sadama. Tinakoen, ano matoˈasay malonayay ko tireng ita, mamitahidang to widang parakat to paliding miˈorong kitanan micakay to dafong anca paising. Ano tatiih ko harateng anca matoled ko falocoˈ, papasowalen ko malohemay malitengay anca matenesay a salikaka alatek, o mihadakan nangra ‘ngaˈayay sowal’ o papalipahak kitaanan. (Taneng 12:25) Haratengen, maolahay ko salikaka kitaanan, tahalifa kita to pades makalimay sapadamaaw kitaanan. (Taneng 17:17) Kawra cowa ka fanaˈ cangra to harateng ato nafalocoˈan ita, ano caka talaˈayaw kita a somowal, cowa ko mamafanaˈ cangra to o maanan ko misaalian ita. w21.04 12 fiedac 11-​12 fatac

Pakaynien i ˈalomanay tamdaw sakananamaw to kafalic cowa ko madoloay. O romaroma tamdaw halafinay malo mieminay to toki a matayal saki Kawas, mafalicay ko katayalan nohatini. O romaroma tamdaw pakayni katoˈasto, hato misawaday to kaolahan a katayalan. Misiˈayaw to mahaenay a kafalic i, matoled ko falocoˈ o pinangan konini. Ano tano pinengneng ni Yihofa ko pinengneng ita to demak, o mamadoloto mananam to kafalic. Palaˈosiay ci Yihofa nohatini to kasapaan a demak, kita saan i o kapot Ningra matayal, tada taˈangayay a sakaliko konini. (1 Korinto 3:9) O olah ni Yihofa kitaanan tahadaˈocto cowa ko mamafalic. Mihaenay, o pisalof no likakawa to cecay demak ano taˈangayay ko pifiyor tisowanan, aka a padotoc matoled, haharateng sa hano mahaen ko pisalof no likakawa. Ano tatangoˈol sa to ‘saˈayaway a romiˈad,’ ka pitolon micangacang to sapadama no Kawas tisowanan mihapinang to kangaˈayan nonini a kafalic. (Patnakay 7:​10) Mitafo to tawlikay a waywayan. Soˈlin mafalic ko pakayraan, papadotoc kita a lipahak, padotoc madimadi midoko ci Yihofaan. w22.03 17 fiedac 11-​12 fatac

Ci Yihofa wa pasayra cimaanan paihkal to madimadiay a olah? Sowal no Fangcalay Cudad ngaˈay kita maolah to adihayay a dafong, tinakoen “epah” “simal” “pirikec” “sifanaˈ ” ato “taneng.” (2 Rayray 26:10; Taneng 12:1; 21:17; 29:3) Kawra o tamdaw ko paihkalen to madimadiay a olah cowa ko dafong. Kawra, ci Yihofa cowa ko polong a tamdaw ko paihkalan to madimadiay a olah, ao edengan o mikiriwiˈay ko kangaˈay no kalalaˈed Cingranan a tamdaw ko paihkalan to hatiniay a capeling. Madimadiay ci Yihofa to widang Ningra, patadoay cangranan misaday to makapahay a hanoikor, tahadaˈoc cowa ko mamiliyas cangranan. Ci Yihofa paihkalay to olah i polong a tamdaw. Pasowalan ni Yis ci Nikotimus: “Tada maolah ko Kawas to tamdamdaw. Saka, padeteng sa Cingra a pafeli to dengan a Wawa Ningra to sakaecaaw ka tekop no cimacima a pasoˈlinay a mitiˈer i Cingraan. O sakaciˈorip nangra to midaˈocay.”​—Yohani 3:​1, 16; Matay 5:​44, 45. w21.11 2 fiedac 3 fatac; 3 fiedac 6-7 fatac

O kaˈorip anini tada pasangarayto, wa tahalifaho kita to adihayay a sapalifet noikor alatek. (Matay 24:21) Kawra caka halafin, oniya kihcod o mamataˈlifto, tahadaˈoc cowato ko mamifekad, cowato ko mamaharateng no tamdaw. Tada makalimay kita kaliki ira koniya romiˈad! (Isaya 65:16, 17) Hano papadadotoc kita palahad to mihadidiay hani? Samanen sowal ni Yis: ‘Ano mihadidi kamo, o mamadipot ko ˈorip.’ (Luka 21:19) Haratengen ko malecaday kitanan ko pakayraan a tamdaw samanay padadotoc mihadidi, wa ngaˈay padama kitaanan milifok to ˈicel, padadotoc mihadidi. O cima ko saˈakawangay a taˈarawan i mihadidiay hani? O Kawas ci Yihofa. Fahkaay kiso toniya caˈof han? Ano songilaˈen ita miharateng, wa mahapinang to soˈlinay konini a demak. Oniya hekal ci Akoma ko mikowanay, adihayay ko pades. Soˈlin iraay ko ˈicel ni Yihofa tangsol misaysay to kihcod a pasangaray, kawra misaˈosiay Cingra mitala. (Loma 9:​22) Mipiliˈay Cingra padadotoc mihadidi, tahira i kairaan no misaˈosian Ningra a tatokian ko tolas. w21.07 8 fiedac 2-4 fatac