Saka 1 Folad

Ci Timoti hano ngaˈay malo idahiyay a sikawdan ni Yihofa hani? Samanen adihayay ko makapahay a capeling ningra. (Filipi 2:19-22) Mikitini pitadtad ni Pawlo ngaˈay mahapinang ita, misapoeneray madimadiay ci Timoti, tada malalokay, ngaˈayay pakasoˈlinen, mikifalocoˈay ciharateng to salikaka. Mihaenay, tada maolahay ci Pawlo ci Timotian, rihadayayho pafeli to pasangaray a ˈinorong cingranan. Malecaday, ano palahad kita to kaolahan ni Yihofa a capeling, o mamaolah ci Yihofa kitaanan, wa misaka dademak kitaanan matongal ko tayal i kasakopang. (ˈOlic 25:9; 138:6) Ka pitolon ato miharateng to capeling no niyah iraay ko maanan sasalofen, dotoc mipiliˈ to cecay mikiriwiˈay papalahaden iso a capeling. Tinakoen ngaˈay kiso miharateng: “Mamitongal kako to siniˈadaay a falocoˈ i tamdaw han? Itini picowat to rihadayay ato misodod to tao a pakayraan, misaaliay kako macakat han?” Roma i, ngaˈayho kiso mitahidang to cecay pakasoˈlinan iso a widang pasowal tisowanan, itini maanan a pakayraan ngaˈay ko niyah macakat.—Taneng 27:6. w22.04 23 fiedac 4-5 fatac

Mafanaˈay kita, makalimay ci Yihofa lipahak kita, samanen o lipahak o minaroˈan no fangcalay saocor a capeling. (Kalatiya 5:22) Sowal no Fangcalay Cudad: ‘O paladaˈay ikakaay ko hemek to milayapay.’ Mihaenay, misaˈicel kita mirienang to mitosilay a tayal, hanaca tano masakenakenaay a pakayraan padama to salikaka i, tada mamahemek kita mihaen to demak. (Dmak 20:35) O tarokos ci Pawlo itini aniniay a sinael somowalay to tosa papadama kitaanan padadotoc lipahak a lalangian. Saka cecay, o patosokan ita patafangen ko sangaˈayay no niyah ci Yihofaan. Ano patafangen ita ko sangaˈayay no niyah Cingranan i, iraayto ko lalangian ita a mahemek. (Matay 22:36-38) Saka tosa, aka palalinien ko niyah to tao. Tanektekay ko tireng ita alatek, micadaay to pina sapahatatanam anca iraay ko mikiriwiˈay a inaneng, mansa ngaˈay midemak to maanan a demak. Ano mahaenay i, o papakayni kita tonini a miakoˈid ci Yihofaan. Roma pakayraan, ano ikakaay ko ngaˈay no midemakan no tao to mita i, o papatado kita cangranan a mahemek, samanen misaka dademakan nangra ko inaneng no niyah pakahemek ci Yihofaan. w22.04 10 fiedac 1-2 fatac

Fahal saan malaˈafo ko mararaway pihakelongan, papacekid to hekal tamdaw. (Paˈarawan 18:8-10) Mifekad konini mingerngeray to kakarayan ato sera a demak ikor, wa ira ko pasangaray a laliyadan alatek. Kawra o finawlan no Kawas iraay ko tosa lalangian a lipahak: (1) Onini a halafinay misaˈadaay to Kawas a ‘Taˈangayay Papilon’ tatahadaˈoc a malahdaw. (2) Wa kalikito kita malidong, miliyas tonini ciraraway a hekal! Paˈayaway ci Taniil ‘o soˈliˈlinay a sifanaˈ ’ ‘wa kadofah,’ soˈlinay mahaen ko demak! Anini, padamaan no Kawas kita cipinang to adihayay milingatay to lintad ita a sapairasol. (Taniil 12:4, 9, 10) Matatodongay konini a sapairasol, patongalay to pikangodo ita ci Yihofaan, matongalay ko pikangodo to Fangcalay Cudad. (Isaya 46:10; 55:11) Mihaenay ka pisamacay micekiw to Fangcalay Cudad, padamaho to tamdaw miingid ci Yihofaan, milifok to pihayda Ningra, mihaen o ngangaˈayto kiso padadotoc patanektek to pakasoˈlin no niyah. O dadipoten ni Yihofa ko mitadiˈecay Cingranan a tamdaw, pafeli cangranan to ‘midaˈocay a rihaday.’—Isaya 26:3. w22.07 6-7 fiedac 16-17 fatac

Paihkalay ko Paˈarawan, o Hongti Kitakit no Kawas tomirengayto i kakarayan, malaplapayto ci Satan nai kakarayan. (Paˈarawan 12:1-9) O tatodong nonini i kakarayan patikolayto a dipayal ato rihaday, kita saan i, o tatahalifa to adihayay a sapalifet. Misamaanay hani? Samanen tada mangolaway ci Satan, ciharatengay sapiˈodisaw to itiniay i fafekangay no sera madimadiay midoko ci Yihofaan a tamdaw. (Paˈarawan 12:12, 15, 17) Ano misiˈayaw to saˈodis ni Satan i, o maanan ko papadama kitaanan padadotoc a madimadi hani? (Paˈarawan 13:10) Mafanaˈ to mamifekad a demak noikor, tataˈangay ko sapadama kitaanan. Tinakoen, mitadtaday ko tarokos ci Yohani itini i Paˈarawan noikor o mamalifok ita a pina sapalemed, o cecay i, o mamasongilaˈ mapalaˈafo ko ˈada no Kawas. Satapangan no Paˈarawan saka cecay sinael pasowalayto kitaanan, o lihaf nonini a cudad ‘pakaynian i tahapinangan’ patangasa i tarokos ci Yohanian, o adihayay a lalakaw nonini a cudad tano tahapinangan a pakayraan a mitadtad.—Paˈarawan 1:1. w22.05 8 fiedac 1-3 fatac

Samanen cowa pihayi ko midokoay ci Yihofaan a tamdaw, o misaˈadaay ci Yihofaan a tamdaw tada mangolaway. O makomoday a kalo kitakit wa matomay a miˈodis to itiniay i fafekang no sera a finawlan no Kawas. O roma a sapairasol no Fangcalay Cudad mitadtaday tonini a demak ci Makok a Kok mikidatay to saˈodis. (Icikil 38:14, 15.) Mihaen ko demak no ˈada, samaanay ko harateng ni Yihofa hani? Sanay Cingra: ‘O mamangolaw Kako.’ (Icikil 38:18, 21-23) Itini saka 19 fedengan no Paˈarawan mitadtaday to midotocay mifekad a demak. Wa ocoren ni Yihofa ko wawa Ningra ci Yis milidong to finawlan Ningra, hanaca mihadefek to ˈada maemin. O madimadiay coyoh ato 144,000 a tamdaw makakapot malo ‘kakarayan a sofitay’ malacafay ci Yisan milood. (Paˈarawan 17:14; 19:11-15) O salikoray a teloc nonini a kalalood: Polong misafelitay ci Yihofaan a tamdaw ato lekakawa mamasongilaˈ a mapalaˈafo!—Paˈarawan 19:19-21. w22.05 17 fiedac 9-10 fatac

Mararaw ci Atam aci Ifa ikor i, somowalay to ci Yihofa to saka cecay kalimlaan a sapairasol, ho ira ko hatokel no teloteloc nangra. Onini a sapairasol matiliday itini Satapangan 3:15. Sowal no sinael: ‘Wa pasasiˈadaen Ako kiso atoya fafahiyan, o mamasasiˈada ko teloc ningra ato teloc iso. O sasetiˈen ningra a mipesiˈ ko fongoh iso, o kakalaten iso a midokaˈ ko satenok no waˈay ningra. Onini a sapairasol maˈoningay i Fangcalay Cudad saka cecay a cudad, o romaroma maloloday a cudad no Fangcalay Cudad sahtoay milingatay tonini a sapairasol. Mahecad o tatelecan no cudad palaliting to cecacecay fiedac malo cecayayto a cudad, o sapairasol no Satapangan 3:15 mihaenay a misolsol to lalakaw, patenak to malacecayay macacaˈof a lihaf, tatodong i: Wa corcoren no Kawas ko cecay mamilidong a Tapang palaˈafo ci Akomaan ato mikotoday ci Akomaan a mariˈangay a ciˈicelay. O papairato to sakarihaday no maolahay ci Yihofaan a tamdaw tada makapahay a hatokel! Miˈosi to Fangcalay Cudad papadama kitaanan mahapinang, oniya sapairasol samaanay a matatodong hanaca mamilifok kita to maanan a haepoc.w22.07 14 fiedac 1-3 fatac

Ka picangacang ci Yihofaan pafeli to taneng i tisowanan, padama tisowanan pasifanaˈ to wawa maolah Cingranan. (Yakop 1:5) O citatodongay Cingra pafeli to sapaini tisowanan. Adihayay ko lalangian, nengnengen ko ilalomaˈay a tosa. Saka 1, itini pasifanaˈ to wawa iraay ko nalifetan ni Yihofa. (ˈOlic 36:9) Saka 2, o sapafeli Ningra tisowanan a sapaini ngaˈayay sakadademaken, sahtoay o sakaciepoc no miso. (Isaya 48:17) Ci Yihofa cowa ko pakayni aca i Fangcalay Cudad pafeli tisowanan to sakayat, pakayniayho i likakawa Ningra mihadak to adihayay mikitiniay i Fangcalay Cudad mitilidan a lalakaw, padama tisowanan pasifanaˈ to wawa maolah Cingranan. (Matay 24:45) Tinakoen, ngaˈay kiso mikitini “Nokaˈorip no Paro no Lomaˈ ” a madadoedoay lalakaw mahela ko ciepocay a sapaini. Isaˈayaw onini a lalakaw itiniay i Katalipaˈelal! a casi masadak, nohatini padadotocay i jw.org wangcan masadak. Roma i, itini i wangcan adihayay ko milicayay ato amotoˈay a ika, onini a ika papadama to wama wina mikitini i safalod ni Yihofa pasifanaˈ to wawa.—Taneng 2:4, 5. w22.05 27 fiedac 4-5 fatac

Itini pisodod to tamdaw a demakan o saˈakawangay a taˈarawan ci Yihofa. Saka 1, makahiay Cingra misodod to tamdaw. Saka 2, masongilaˈay ko kacipinang Ningra kitaanan. Tada ihkalay ko kafanaˈ Ningra to pinangan no mita, iraay ko tatodong misawkit to soˈlinay kita pasasiyor hokira. Saka 3, ano misodod ci Yihofa kitaanan, o papalahdawento ko polong a raraw ita, malecaday to na cowa ka raraw kita. Mihaenay, wa ngaˈayto ira ko makoracay makapahay a falocoˈ ita, milifok to pihayda Ningra. Manaokaniw, samanen cowa ko malefotay kita padadotocay mararaw, kawra ngaˈay kita mikitini i cecay sowal no Sapicalep Mafanaˈ to Fangcalay Cudad, Saka 1, saka 614 fiedac milifok to sahinom. Sanay konini a sowal: “Kawra, o madimadiay sikawdan no Kawas cowa ko papakayni masakenaay a dangoc no niyah saromiˈad sa makesem, samanen sidaˈitay ci Yihofa, mafanaˈay to nano sera cangra. (ˈOlic 103:8-14; 130:3) Ano misarocodayto kita midofdof to palinian no Kawas, o ngangaˈayto a lipahak ko falocoˈ.”—Filipi 4:4-6; 1 Yohani 3:19-22. w22.06 7 fiedac 18-19 fatac

Cowa ko pipaˈangi aca kitanan to pisafelit no sifo, misaka dademakayho ci Satan to roma pakayraan. Palalinien to makariˈang ko tireng, o katalawan no roma tamdaw i, o paro no lomaˈ pakayni i soˈlinay kimad iraay ko tatiihay a harateng. Maolahay cangra to paro no lomaˈ, makalimay to paro no lomaˈ mafanaˈ ato maolah ci Yihofaan. Ano somowal ko paro no lomaˈ to tatiihay tengilen a sowal mitongangan to Kawas ato salikaka, maedeng masomaday cangra. O kahemekan i, o roma a paro no lomaˈ ikor mafalicayto, micadaayto to soˈlinay kimad. Kawra o paro no lomaˈ ita ano pakayniay mipiliˈan ita a pihakelongan miketon to kalalaˈed kitanan, sasamaanto hani? O sowal no ˈOlic 27:10 tada mitemeray to tamdaw, pafeliay kitaanan to taˈangayay a sahinom. Ano misiˈayaw to pisafelit no paro no lomaˈ i, haratengen ita tada maolahay ci Yihofa kitaanan, wa rihadayto ko falocoˈ. Pakasoˈlinay kita, wa pakaynien ni Yihofa i noka padadotoc ita mihadidi palifon kitaanan. Wa itini ci Yihofa i tireng, nofalocoˈan ato noˈadingoan pafeli to sangaˈayay a pidimokos kitaanan, awaay ko tamdaw pakafiloay Cingranan! w22.06 16-17 fiedac 11-13 fatac

Itiniho i fafekang no sera mitosil ci Yis i, sowal no tao pakayni cingranan o halikaenay haliepahay, mikapotay ci Akomaan, cowa pidofdof to Paselaˈan Romiˈad, mangalef o pakaditay to Kawas cingra sanay ko sowal. Kawra, cowa ka tano mariˈangay ko pipacaˈof ni Yis. (Matay 11:19; 26:65; Luka 11:15; Yohani 9:16) Papasayra kita ci Yisan a minanam, soˈlin caka ngodo ko sowal no tao, cowa ka ngaˈay kita tano mariˈangay ko sapacaˈof. (1 Pitiro 2:22, 23) Manaokaniw, sapiˈimeraw to niyah cowa ko madoloay. (Yakop 3:2) Samaan ko demak ngaˈ madangar konini hani? Ano caka ngodo ko cilomaˈay i, hamaan pakidem ko harateng to tatiihay a sasowalen no cilomaˈay. Sowal no salikaka ci Samo: “Sasongilaˈen ako miharateng to misaaliay ko cilomaˈay pakatengil to soˈlinay kimad, miharatengho to ngangaˈay mafalic cangra.” Ano latekay maketeray ko cilomaˈay, samanen o pilisoˈan ita a toki cowa ka tatodong. Ngaˈay kita misaamotoˈ a mitolon, micangacang to sapadama ni Yihofa rihaday ko falocoˈ ita, eca ka somowal to tatiihay tengilen a sowal. w22.04 6 fiedac 8-9 fatac

O cecay kalimlaan a pakayraan padama ko wama wina to wawa miingid ci Yihofaan i, pasifanaˈen cangra to Fangcalay Cudad. (2 Timoti 3:14-17) Nikawrira masowalay no Fangcalay Cudad ko roma pakayraan. Itini Taneng maˈoningay ko pipalimoˈot no cecay wama to wawa, patalipaˈelalan ningra ko wawa, aka pisakahmaw to patalahkalan no nisangaˈan a maamaan a makapahay capeling ni Yihofa. (Taneng 3:19-21) O wama wina i, maolahay kamo kalacafay to wawa tayra i papotal a misalama alatek, kalasaka dademaken konini a toki padama to wawa mihapinang, o ‘nisangaˈan a maamaan’ ni Yihofa atora kasapaan a capeling Ningra iraay ko maanan a kalaliting. (Loma 1:20) Sinanoten samaanay ci Yis tano nisangaˈan a maamaan pasifanaˈ to nisawawaan. Kinacecayay, papiharatengan ningra ko nisawawaan to tinakoan no palang ato hana. (Luka 12:24, 27-30) Padamaay cingra to nisawawaan mihapinang to hinapaladaˈay sidaˈitay ko kakarayan Wama. Ano midimokosan ni Yihofa ko palang ato hana i, maedeng o mamidimokos to madimadiay a sikawdan no Niyah, pafeli cangranan to kakaenen ato cacaˈedongen a rikoˈ. w23.03 20-21 fiedac 1-4 fatac

Miakoˈid kita ci Yihofaan, samanen padamaay Cingra kitaanan ngaˈay pakayni i ngangan ni Yis mitolon Cingranan. Ano mihaen kita to demak i, cowa ko pitengil aca ni Yihofa, pacaˈofayho to satolon. Wa pakaynien Ningra ci Yisan pacaˈof ko saali ita. Samanen patafangan ni Yis ko sapatefoc, o raraw ita ngaˈayay milifok to sasodod ni Yihofa. (Loma 5:1) Sowal no Fangcalay Cudad ci Yis o ‘taˈangayay saysi no mita, itiniayto cingra i kakarayan, maroˈay i kawanan no Tadamaanay kamaroˈan no Kawas.’ (Hipray 8:1) Sanayho ko sowal no Fangcalay Cudad, ‘itini i kakarayan Wama iraay ko padamaay kitaanan,’ o ci Yis Kristo. (1 Yohani 2:1) O milimasmasan ni Yihofa a Taˈangayay Saysi i ngaˈayay patado miharateng to kalonay no mita, ‘patadoay kitaanan a micangacang,’ tada miakoˈiday kita ci Yihofaan! (Loma 8:34; Hipray 4:15) Ano awa ko sapatefoc ni Yis, awaay ko pakayraan ita pakayni satolon a miingid ci Yihofaan. O kaolahan ni Yihofa a wawa makahiay pafeli kitaanan, ano samaanto ko adihay no sowal ita, awaay ko pakayraan paihkal to piakoˈid ita Cingranan. w22.07 23 fiedac 10-12 fatac

O cecay ngaˈayay pakasoˈlinen a tamdaw midofdofay to mikiˈokan, hanaca soˈliˈlinay ko sowal. Mafanaˈay ko tao to ngaˈayay tiˈeren cingra. (ˈOlic 15:4) Makalimay kita itini pinengneng no salikaka o mahaenay a tamdaw kita. Cowa ka ngaˈay kita pacieci to tao pakasoˈlin kitaanan, samanen o pakasoˈlin mamihadak to ˈicel ngaˈ malifokay. Sowal no tamdaw o pakasoˈlin mahecaday o payci, pasangaray malifok, kawra madoloay malahdaw. Ci Yihofa milifokay to masongilaˈay a pakasoˈlin no mita, samanen ‘kihcod a demak Ningra sahtoay ngaˈayay tiˈeren.’ (ˈOlic 33:4) Makalimay Cingra mitodong kita Cingranan. (Ifiso 5:1) Tona ciolahay ko salikaka, ngaˈayay pakasoˈlinen, tada miakoˈiday kita ci Yihofaan misolot kitaanan miteko tonini taˈangayay lomaˈ no Krisciyang. Kita polong a tamdaw iraay ko ˈinorong milifok to pakasoˈlin no salikaka. O kahacecay tamdaw ano misaˈicel palahad to ciolahay falocoˈ, misapoeneray falocoˈ, sapihapinang a inaneng, soˈliˈlinay falocoˈ ato miˈimeray a capeling, wa ngaˈay paˈicel to masasipakasoˈlinay harateng no kasakopang. Nanay padadotoc kita mitodong to Kawas ci Yihofaan, malo ngaˈayay pakasoˈlinen a tamdaw. w22.09 8 fiedac 1-2 fatac; 13 fiedac 17 fatac

Soˈlin itiniay kita i taˈangayay a paro no lomaˈ no Krisciyang, kawra matoˈolayho nolatekay. Padadotoc kita milowid to masofaway a nafalocoˈan alatek, hanaca o hatiniay a roray edengan o niyah sa ko mihadidi. Kawra cowa ka olah ci Yihofa ira ko mahaenay a nafalocoˈan no mita, tano cowa ka lecad a pakayraan ci Yihofa padama ci Iliyaan. Pakalalokan Ningra ci Iliya somowal to i falocoˈay a sowal, kinatosaay Cingra milicay: ‘Iliya, mimaanay kiso itini hani?’ (1 Hongti 19:9, 13) Ano somowal ci Iliya to naifalocoˈay harateng i, mihadidiay ci Yihofa a mitengil. Pasowalan Ningra ci Iliya, iraayho ko ˈalomanay madimadiay a tamdaw i Israil. (1 Hongti 19:11, 12, 18) Mifowahan ni Iliya ko naifalocoˈay, hanaca matengil ko caˈof ni Yihofa ikor, maedeng mahepolay ko karetengay a ˈinorong. Ikor, pafelianho ni Yihofa ci Iliya to pina kalimlaan a ˈinorong, mahawpay maminilnil cingra ci Hacail malo hongti no Siriya, malo hongti no Israil ci Yihu, minilnilho ci Ilisaan malo pairasolay. (1 Hongti 19:15, 16) Onini a ˈinorong pafelian ni Yihofa ci Iliya, sapipadamaaw cingranan misamacay to tawlikay a demak. Roma i, pafelianho ni Yihofa ci Iliya to cecay ngaˈayay a widang, ci Ilisa kora. w22.08 8 fiedac 3 fatac; 9 fiedac 5 fatac

O kasakopang iso iraay ko mipatirengay anca mitomadaway to Hongti Kitakit Kasaˈopoan han? Ano iraay, maedeng maharatengayho iso tiya mahererek ko tayal sakinacecay tayra i Kasaˈopoan masaˈopo a pakayraan. Itiya, matomesay ko miakoˈiday a falocoˈ iso ci Yihofaan. Satapang romadiw i, tada matemeray ko falocoˈ iso alatek, mansa sakatomangicaw saan awa ko ngihaˈ mahadak a romadiw. Misamacay kita mipatireng to Kasaˈopoan wa ngaˈay pakahemek ci Yihofaan, kawra ano mirienang kita to roma mipatirengay a tayal i, ngangaˈay pairato taˈangayay a sapakahemek ci Yihofaan. O hatiniay mipatirengay a tayal ikakaay ko epoc to masakenakenaay a tayal, mitoroˈan nonini papakalalok kita to tayniay i Kasaˈopoan midoko ci Yihofaan a salikaka, padama cangranan patireng to tanektekay a pakasoˈlinay falocoˈ. Tarokos ci Pawlo mitilid to lalangian a sinael nonini a lalakaw, makalimay mirienang ko Krisciyang to hatiniay a ‘mipatirengay a tayal,’ samanen mihongyakan toniya sinael o ‘pakalalok’ a Krisiya sowal, iraay ko ‘mipatireng’ a tatodong. Ngaˈay kita pasayra ci Pawloan a minanam pakalalok to salikaka.—1 Korinto 11:1. w22.08 20 fiedac 1-2 fatac

O Krisciyang ano makalimay malo moecelay a tamdaw i pinengneng no Kawas i, itini misasingdiay a demak wa soˈliˈlin ko falocoˈ. O moecelay a tamdaw maolahayho to masadafdafay, cowa ka hemek maˈaraw ko tao masakakinih. Roma i, sapahemekaw ci Yihofaan i kihcod a demak, o moecelay a tamdaw wa isalakatho miharateng to pinengneng ni Yihofa, ikorto ngaˈ misaˈosi. Sowal no Fangcalay Cudad, o ‘Pipowaran no moecelay’ ci Yihofa. (Yirimiya 50:7) Tona o Misangaˈay a Tatapangan, citatodongay ci Yihofa patireng to ngaˈayay ato tatiihay a palinian. Ihkalay mafanaˈ to maanan ko matatodongay, maanan ko mararaway, o ngaˈayay ato tatiihay a palinian Ningra o soˈliˈlinay a matatodong. (Taneng 14:12; Isaya 55:8, 9) Kawra, paringian kita to Kawas a sangaˈen, mansa ngaˈay mitoor to moecelay a palinian Ningra a maˈorip. (Satapangan 1:27) Maolahay kita to kakarayan Wama, makahiay misarocod mitodong Cingranan, malo moecelay a tamdaw.—Ifiso 5:1. w22.08 27 fiedac 5-6 fatac

Ano maˈisang ko falocoˈ anca matoled kita i, sapidemakaw to pina a demak mifalic to harateng alatek, ho eca ka haharateng sa to pasangaray no niyah. Kawra o maminaˈon kita miliyas to sakayhid, eca ka pidemak to kaˈintehan ni Yihofa a demak. (Ifiso 5:10-12, 15, 16) Itini Filipi a cudad, palimoˈotay ko tarokos ci Pawlo to Krisciyang padadotoc misimsim to “moecelay” “makoracay” “mikidat to ciolahay falocoˈ ” “mitinako a paihkal to makapahay capeling” a demak. (Filipi 4:8) Soˈlin cowa ka ihkal ko pisowal ni Pawlo to lawla a demak, kawra wa mikitini kita mihadakan ningra a safalod mipiliˈ to lawla. Itini i sinael a “demak” falicen ita malo “radiw” “ika” “cudad” “tasalamaan no tingnaw” sanay a tilid, wa ngaˈay mahapinang o masamaanay a lawla o mihaydaan ato micadaan no Kawas, o maanan ko tatiihay. Makalimay kita o pakayraan no niyah maˈorip mitooray to ˈakawangay palinian ni Yihofa.— ˈOlic 119:1-3. w22.10 9 fiedac 11-12 fatac

O romaroma ‘cowa ka moecel a tamdaw’ maˈoripho nidemakay to pakidemay tatiihay a demak, mihaenay misaaliay cangra to papasifanaˈen mitoor to moecelay palinian ni Yihofa a maˈorip. Sapadamaaw tonini a tamdaw, o Hongti Kitakit no Kawas o mamidemak to sataˈangayay i likisi no tamdaw pasifanaˈay a tayal. O cima ko papasifanaˈ to ‘cowa ka moecel a tamdaw’ hani? Oya taˈangayay ˈopo a tamdaw ato patikolay maˈorip a ‘moecelay a tamdaw.’ O ‘cowa ka moecel a tamdaw’ ano makalimay matilid ko ngangan no niyah i sakaˈorip a cudad, o papalahad to kalawidang ci Yihofaan, hanaca patafang to tireng Cingranan. Ci Yis Kristo ato kalacafayay cingranan mala Hongti a tamdaw wa misongilaˈ a misinanot to kacakat nonini a tamdaw. (Paˈarawan 20:4) O cecay tamdaw ano eca ka kahi mitoor to mananamay a midemak, soˈlin simoˈotto ko mihecaan, o papalaˈafoen. (Isaya 65:20) Ci Yihofa aci Yis Kristo pafeselay ko pinengneng to falocoˈ no tamdaw, o mamisinanot Cangra itini faelohay a hekal wa awa ko tamdaw patelas saan a midemak to tatiihay demak.—Isaya 11:9; 60:18; 65:25. w22.09 17 fiedac 11-12 fatac

O ‘i fafekangay cifadangalay a tamdaw’ o mikowanay no hekal ko mitoroˈan, iraay ko fadangalan nangra mikowan to finawlan, o mamidofdof ko Krisciyang cangranan. Midamaay cangra to sakangaˈay no demak no ˈalomanay, midemak to rikec, latekay paˈadingay to sakangaˈay no finawlan no Kawas. (Paˈarawan 12:16) Mihaenay, palimoˈotay ko Fangcalay Cudad kitaanan mitoor to saali no mikowanay a pasata, mikangodoho cangranan. (Loma 13:7) Kawra, ira ko fadangalan no sifo no hekal misaali kitaanan, samanen mihayian ni Yihofa cangra ira ko mahaenay a fadangalan. Tiya sawkiten no tapang no Loma ci Pontius Pilato ci Yis i, ihkalay mitadtad tonini. Itiya, sowal ni Pilato iraay ko fadangalan no niyah paˈorip ci Yisan, iraayho ko fadangalan mipatay cingranan. Sanay ko caˈof ni Yis: ‘Ano cowa pihayi ko fafekangay, awaay ko fadangalan iso misawkit takowanan.’ (Yohani 19:11) Malecad ci Pilatoan, polong mikowanay no hekal anini ato fadangalan no mikowanay sahtoay iraay ko tolas. w22.10 13-14 fiedac 6 fatac

Itini sakayat no Kawas mitilidan no Hongti ci Tafiti a ˈOlic paihkalay, ano mikowan ko madimadiay citanengay a hongti i, samaanay ko kaˈorip no finawlan. (ˈOlic 37:10, 11, 29) Ano masowal ko Lakoing i, marariday kita paˈaraw to tamdaw to ˈOlic 37:11. Misaka dademak toniya sinael o matatodongay, samanen itini Sapasifanaˈ i Lotok misaka dademakan ni Yis koniya sinael, paihkalay o mamalaˈosi konini a sinael noikor. (Matay 5:5) Kawra o sowal ni Tafiti paliˈayaway to pikowan ni Solomon. Itini pikowan ni Solomon to Israil i, o finawlan no Kawas itiniay i ‘cihacolay ciˈodalay a kitiraan,’ dipayalay ato rihadayay, kadofahay ko kaˈorip. Na mikiˈokay ko Kawas: ‘Ano midofdof kamo to sarikec Ako . . . , wa padipayalen Ako ko kitakit. Mafotiˈ kamo, cowa ko mamacekid matalaw.’ (Lifi 20:24; 26:3, 6) Onini a sakiˈok itini pikowan ni Solomon a laliyadan malaˈosiay maemin. (1 Rayray 22:9; 29:26-28) O sowal no ˈOlic 37:10, 11, 29 cowa ka itini aca i nolitengan a malaˈosi, hanaca wa miliyaw malaˈosi noikor. w22.12 10 fiedac 8 fatac

O soˈlinay Krisciyang ka pidofdof to sakayat. Pasowalay ko Fangcalay Cudad kitaanan to cecay ciepocay a safalod: ‘Malingad milood, pitengil to citanengay a sakayat; ano ˈalomanay ko pitengilan, o papakalowid.’ (Taneng 24:6 ato roma pihongyak.) Sakadademaken ita konini a safalod, o ngangaˈayto ko pidemak to mitosilay ato pasifanaˈay a tayal. Cowa ko mamitoor kita to pakayraan no niyah midemak to mitosilay a tayal, ao mamitoor to sakayat no likakawa a midemak. Itini kasaˈopoan mamisinanot kita to matengilay a sakayat, minanam to ngaˈayay a pakayraan no tao pasifanaˈ. Roma i, adihayay ko mitepangan no likakawa no Kawas a cudad ato ika, oniya ciepocay sapasifanaˈ a lalosidan wa ngaˈay padama to tamdaw cipinang to kimad no Fangcalay Cudad. Tada miakoˈiday kita pakaynien ni Yihofa i sowal Ningra pafeli kitaanan to ngaˈayay a sapatalipaˈelal! Ano awaay ko sapatalipaˈelal Ningra, caay ka fanaˈ kita sasamaan ko kaˈorip no niyah. Nanay misetek kita to falocoˈ, tocerid mitoor to taneng ni Yihofa a maˈorip.—Taneng 3:13-17. w22.10 23 fiedac 18-19 fatac

Komaen kita to kakaenen hanaca misongilaˈ miˈicay, o mamapahaled ko tireng. Malecaday, minanam kita to Kimad no Kawas hanaca misongilaˈ midotim, o mamapahaled ko pakasoˈlin. Makalimay ci Yihofa kitaanan songilaˈen miˈicay ato miselip to Sowal Ningra. Sakalaˈosiaw noniya patosokan, mamidemak kita to tolo a demak. Salakat, mitolon kita, maharek misaday to falocoˈ no niyah, ngaˈay miselip to harateng no Kawas. Ikor, misongilaˈ micekiw to pina sinael. Dotoc, tomerepho, misongilaˈ miharateng to maˈosiay no niyah a lalakaw. Mihaen to demak iraay ko maanan a epoc hani? Adihay ko misimsiman ita, wa madolo miselip to Kimad no Kawas, paˈicel to pakasoˈlin no niyah. Micekiw to Fangcalay Cudad ato misongilaˈ a midotim hano kalimlaan hani? Samanen mihaen to demak cowa ko pipadama aca kitaanan anini ira ko ˈicel milasil to lihaf no Hongti Kitakit no Kawas, wa ngaˈayho padama kitaanan misaday to hanoikor, samanen cato ka halafin, o mamilasil kita i tamdaw to pakidemay sapisawkit a lihaf alatek. Roma i, miharateng kita to makapahay capeling ni Yihofa, o mamatongal ko kalawidang Cingranan. w22.11 6-7 fiedac 16-17 fatac

O sowal ni Yis paihkalay, ano ira ko cowa pisateked a olah no kalalaˈed no nisawawaan i, cowa ko cangra aca, ano o papotalay no kasakopang a tamdaw papakahapinang to o soˈlinay mikotoday ci Kristoan a tamdaw cangra. O olah no salikaka i kalalaˈed tada mikiriwiˈay. Kawra, cowa ko malefotay ko Misawacayay Tamdaw ni Yihofa. (1 Yohani 1:8) Mansa ano matongal ko kafanaˈ ita to salikaka, alatek madoloayto maˈaraw ko dangoc nangra. (Loma 3:23) Kaadayayan i, o roma tamdaw pakinaliay miharateng to dangoc no tao, sawad sanayto midoko ci Yihofaan. Samaanay ci Yis tano olah micada to tarokos hani? Sasamaan mitodong to taˈarawan ni Yis hani? Soˈlinay i, ngangaˈay kita miharateng tonini a salicay, samanen o papadama konini kitaanan misongilaˈ paihkal to olah, mangalef ano maˈaraw ko dangoc no tao i, ngaˈay padadotoc tano olah micada cangranan.—Ifiso 5:2. w23.03 26-27 fiedac 2-4 fatac

Mangata mangataayto ko salikoray romiˈad, itini kita i kasakopang tahalifaay to pina pasangaray a demak, palifetay konini to ka madimadi ita ci Yihofaan. Mihaenay, o papadadotoc kita talipaˈelal. Ano midokaˈay ko salikaka tisowanan saan ko harateng iso, aka ˈinteh ko falocoˈ. Ano micada kiso to sapirikec, aka pakidem ciharateng to papisingan no niyah, ao mamicada to sapalimoˈot, midemak to kafalic. O pisalof no likakawa ni Yihofa ano mifiyoray tisowanan, ka mikitini falocoˈ micada ato midofdof to sakayat. Padadotoc mitadiˈec ci Yihofaan ato likakawa Ningra. Mamitafo to rihadayay, ira ko ihkalay sapisimsim a inaneng, hanaca tano pinengneng ni Yihofa ko pinengneng to demak. Ka pasayra ci Yihofaan mitolon, micangacang to sapadama Ningra, aka a piliyas to kasakopang. Mihaen, ano o mananto a demakan ko mifekaday, caay ko ngangaˈay ci Satan paliyas tisowanan ci Yihofaan ato likakawa Ningra.—Yakop 4:7. w22.11 24-25 fiedac 14-16 fatac

Malohemay malitengay maemin, papadama to salikaka iˈayaw no mifekad ko pades maherekto a misaday. Saˈosien ko kasakopangay kahacecay tamdaw mafanaˈay to samaan midemak to sakarihaked, ato sasamaan malalinnak to malohemay malitengay. O malohemay malitengay ngaˈayay midemak to maanan? Itini i cowa ka raay no lomaˈ iso a kitiraan ano iraay ko pades mifekad, ngaˈayay licayen iso ko malohemay malitengay sasamaan kiso misadak to ˈicel. Ngaˈay kiso pakilomaˈ to awaay ko lomaˈ a salikaka anca mirienang to padamaay to tahapadesay matayal a tamdaw mihadak to cecay liyad a hapikilomaˈan, anca pafeli to kakaenen ato roma dafong i misaaliay a salikaka. Ano miraayay to lomaˈ iso ko mapadesay a kitiraan, wa ngaˈay kiso mihadak to sapadama. Samaan ko demak hani? Ngaˈayay kiso patado to tahapadesay a tamdaw mitolon. (2 Korinto 1:8-11) Ngaˈayay kiso pakiyaho midama to tayal i paro no cikiw, padama to tahapadesay a tayal mihadak to payci midama. (2 Korinto 8:2-5) Ano ngangaˈay kiso tayra i tahapadesay a kitiraan, ngaˈayay licayen ko malohemay malitengay sasamaan mirienang to padamaay to tahapadesay a tayal. Ano macada iso ko satahidang midama to tahapadesay, wa macada ko pina sapahatatanam alatek, mihaen wa ngaˈayto kiso itini iraay ko saali a kitiraan, ato itini misaaliay a tatokian misadak to sapadama. w22.12 24 fiedac 8 fatac; 25 fiedac 11-12 fatac

O sowal ni Pawlo to i Korintoay a salikaka konini, ilalomaˈay nangra o romaroma tamdaw na midemakay to maˈodangay, hinalasangay ato tongsinlien a waywayan. (1 Korinto 6:9-11) Mipaputisemto cangra ikor cowato ko mamilood to hatiniay mararaway sanay kiso miharateng han? Cowa ka hatira. Soˈlin micadaayto to sapanilnil no fangcalay saocor a Krisciyang cangra, kamayan cowa ko malefotay a tamdaw, marariday cangra micoˈay tonini a mararaway harateng. Mafanaˈ tonini tada mahinomay kita, misamaanay hani? Samanen paihkalay konini, o micoˈayan iso mararaway harateng nohatini sahtoay o na micoˈayanto no tao. Aka marawraw, ‘tatanektekto ko pakasoˈlin no miso, samanen mafanaˈay kamo, itiniay i paro no kakarayan a polong kasacefang a salikaka, tahalifaay to malecaday a sapalifet.—1 Pitiro 5:9. w23.01 12 fiedac 15 fatac

Mingitangitay ci Yis ci Yihofaan midimokos to nisawawaan ningra. (Yohani 17:11) Mafanaˈ toninian i, misamaanay hano patimolo kitaanan hani? Samanen ikakaay ko ˈicel ni Yihofa to cimacima a ˈada ita. (1 Yohani 4:4) O roma sa i, mafanaˈay ci Yihofa to kihcod. Pakasoˈlinay kita, ano tiˈeren ci Yihofa, o papakaremo to kokiˈ, mamatongal ko timolo. Mangodoay kiso mafanaˈ ko tao to Misawacayay Tamdaw ni Yihofa kiso han? Matalaway kiso to pinengneng no tao tisowanan, cato ka kahi mitosil anoca mipaputisem han? Aka a pakayni to nika talaw caka pidemak to matatodongay a demak. Sarocoden a mingitangit ci Yihofa i satolon, pafeli to timolo i tisowanan, padama tisowanan midofdof to araaw Ningra. Ano maˈaraw iso ko pipacaˈof ni Yihofa to satolon iso i, o tatanoktokto, mangalef ko ka timolo.—Isaya 41:10, 13. w23.01 29 fiedac 12 fatac; 30 fiedac 14 fatac

Milicayay ci Yis to Farisay tamdaw: ‘Caho ka maˈosi namo saw?’ Onini a salicay patalahkalay to mararaway falocoˈ nangra. (Matay 12:1-7) Itiya i, mirikecay ko Farisay tamdaw to misafelitay ko nisawawaan ni Yis to Paselaˈan a Romiˈad a rikec. Tiya pacaˈof ci Yis to sapakokot nangra i, misadakay to tosa tinakoan itini Fangcalay Cudad ato cecay sinael i Hosia a mitadtad, o Farisay tamdaw cowa cipinang to tatodong no Paselaˈan a Romiˈad a rikec, caay ka siniˈada to tamdaw. Miˈosi cangra to Kimad no Kawas hano caka mapahatatanam hani? Samanen malitaˈangay cangra, maolahay mikimkim to raraw no tao, mansa caay ka cipinang to tatodong no Kimad no Kawas. (Matay 23:23; Yohani 5:39, 40) Nengnengen ko Matay 19:4-6. Licayan ni Yis ko Farisay tamdaw to malecaday a salicay: ‘Caho ka maˈosi namo saw?’ Soˈliˈlin maˈosiayto nangra ko Satapangan no Fangcalay Cudad, kawra misakahmawan nangra ko pinengneng no Kawas to pakayniay i raramod. Mikitini i sowal ni Yis mananamay ita, ano miˈosi to Fangcalay Cudad i, ira ko matatodongay a waywayan. Aka a hatira o Farisay tamdaw, pairaen ita ko misapoeneray, makahiyay mapasifanaˈ a falocoˈ. w23.02 12 fiedac 12-13 fatac

Sapafeli ni Yihofa to Israil a Rikec iraay ko cecay pakayniay sakarihadayaw a sakayat, onini sakayat papadama cangranan itini lomaˈ ato katayalan miliyas to talifahal sanay a katalawan. (Kasadakan 21:28, 29; Limoˈot 22:8) O saˈosi no Rikec i, ano caayto ko mipadetengay a mipatay to tamdaw mamitamorong to karetengay a teloc. (Limoˈot 19:4, 5) Iraay ko saˈosi no Rikec, ano makariˈang ko i poyapoyay a wawa i, ano cowato ko mipadetengan o papatefoc cingra. (Kasadakan 21:22, 23) Ihkalay ko sowal no Fangcalay Cudad, makalimay ci Yihofa kitaanan misinanot to sakarihadayaw. Ano misalimlaay kita to sapafeli no Kawas a ˈorip, itini i lomaˈ ato katayalan mamidemak to sakarihadayaw a pakayraan. O sapaiyo, o citafaay a dafong ato ciwarakay a cemel aka telien i mamaala no wawa a kitiraan, ano mamifalah tonini a dafong i, tano rihadayay a pakayraan milosimet. Ano misaka dademakay kita tono tingki a lalosidan, mifadisaw anca milikat to namal, mamikiriwiˈ a minaˈon, toniya tatokian aka saolatekay sa miliyas kita. Ano pakayni kakomaen to sapaiyo, komaen to epah anca cangoˈot ko fafotiˈen a mahalileng ko fongoh, akato parakat to paliding. Roma i, ano parakat to paliding aka nanengneng sa to soci. w23.02 21-22 fiedac 7-9 fatac

O sidaˈitay ci Yihofa, iraay ko mihadidiay patadoay to tamdaw miharateng a Singsi, o kangaˈayan no sito ko mikiliman Ningra. (ˈOlic 130:3) Caay ka pakidem ko saali Ningra kitaanan. Haratengen, ora kafahkaˈan a ponoˈ iso o Cingra ko misafacoay. (ˈOlic 139:14) Makalimay ko Misangaˈay a Tatapangan tahadaˈoc kita minanam, hanaca mikitini milifok to lipahak. Mihaenay, aniniho ‘palahad to makalimay a falocoˈ ’ to soˈlinay kimad no Fangcalay Cudad. (1 Pitiro 2:2) Patirengen ko ciepocay a patosokan micekiw, hanaca tooren ko milimasmasan a toki miˈosi ato minanam to Fangcalay Cudad. (Yosuwa 1:8) Ira ko sapalemed ni Yihofa, maedeng mamatongal ko olah iso miˈosi ato minanam to milingatay Cingranan a demak. O kaira aca no sifanaˈ cangoˈotayho. Sakakaay a epoc no sifanaˈ o pipadama tisowanan micalep a mafanaˈ ci Yihofaan, hanaca palahad to pina makapahay a capeling, tinakoen o olah ato pakasoˈlin ci Yihofaan. (1 Korinto 8:1-3) Itini pipadadotoc iso minanam to soˈlinay kimad i, cangacangen ci Yihofa padama tisowanan palahad to tanektekay a pakasoˈlin. (Luka 17:5) O mamahemek Cingra pacaˈof to mahaenay a satolon. w23.03 10 fiedac 11, 13 fatac

O nisawawaan ni Yis cowa ka tatala sa to pihererekan a romiˈad, eca ka pimaan. Pafelian ni Yis cangra to tayal, palimoˈot cangranan itini i ‘Yirusalim, polong no Yutiya, Samariya, tangasa i sara:ayay a pala’ milasil to ngaˈayay lihaf. (Dmak 1:6-8) Tada o karetengay a ˈinorong konini! Misaˈicelay cangra milasil to ngaˈayay lihaf, soˈlinay a ciepoc ko pisaka dademak to toki no niyah. Sapisinanotaw kita to niyah, oha mamisongilaˈ miharateng to sasamaan ciepoc a misaka dademak to toki. Kita o kahacecay tamdaw o tatahalifa to ‘cowa ka harateng a pakayraan’ alatek. (Patnakay 9:11) O tatalifahal sa a mapatay kita alatek. Ano sapisaˈicelaw ciepoc a misaka dademak kita to toki i, dadoedoen ko araaw ni Yihofa a dademak, halo mitongal to kalawidang Cingranan. (Yohani 14:21) Kita i, ‘fanekfeken aka mangiyangi, adihayen ko pidemak to tayal no Tapang.’ (1 Korinto 15:58) Mihaenay, ano tahatolasto ko ˈorip ita, anca ano mahererekto konini a lekakawa i, aawa ko kiyam no falocoˈ ita.—Matay 24:13; Loma 14:8. w23.02 18 fiedac 12-14 fatac