Saka 2 Folad

O manan ko tatodong no aniniay a sinael hani? Padadotocay ci Yis mitadtad, o hatiniay a olah o kinafalahay to niyah a olah, ira ko mahaenay a olah, makahiay ko Krisciyang pakayni i salikaka kinafalah to ˈorip no niyah. Tada kalimlaan ko olah sanay ko Kimad no Kawas. ˈAlomanay tamdaw maolahay tonini sinael: “O olah ko Kawas.” (1 Yohani 4:8) ‘Matiraen o niyah a maolah to tao.’ (Matay 22:39) ‘O olah mitahepoay to adihayay a raraw.’ (1 Pitiro 4:8) ‘Midaˈocay ko olah.’ (1 Korinto 13:8) Oniya pina sinael ato roma sinael pakafanaˈay kitaanan, palahad ato paihkal to olah hatiniay makapahay a capeling o tada kalimlaan. O soˈlinay olah hananay o naitiniay ci Yihofaan. O cecay masakapotay a tamdaw ira ko fangcalay saocor no Kawas wangaˈ mapalemed ni Yihofa, ngaˈayay patalahkal to hatiniay a olah. (1 Yohani 4:7) Mankora saan ko sowal ni Yis, edengan o soˈlinay mikotod cingranan a tamdaw ko patalahkalay to caay pisateked a olah. Malecad o paliˈayawan ni Yis, maˈaraw no ˈalomanay tamdaw ko paihkalan no salikaka a soˈlinay olah, mahapinangay to o soˈlinay mikotod ci Kristoan a tamdaw cangra. w23.03 27-28 fiedac 5-8 fatac

Pasangaray kako misodod to tao saan kiso miharateng to niyahan saw? Salakat asipen iso ato songilaˈen miharateng ko ngaˈayay ato tatiihay a tinakoan i Fangcalay Cudad. Tinakoen, tada makahiay ci Yis misodod to tamdaw. (Luka 7:47) Cowa ka nanengneng sa cingra to raraw no tao, pakasoˈlinay cingra to ngangaˈay noikor ko demak nangra. Cowa ka hecad ci Yisan, o Farisay a tamdaw ‘misakahmaway to tao.’ (Luka 18:9) Miharateng toniya tinakoan ikor, ngaˈay licayen ko niyah: “Samaanay ko pinengneng ako to tao hani? Minengnengay kako to maanan a capeling no tao han?” Ano pasangaran nanay kiso misodod to cimaanan i, ngaˈayay tanamen mitilid ko kangaˈayan nora tamdaw, adihayen ko mitilidan kangaˈayan ningra. Ikor haratengen: “Samaanay ci Yis minengneng cingranan hani? Mamisodod ci Yis cingranan han?” O hatiniay a pinanam papadama kitaanan misalof to harateng no niyah. Salakat, o mamisaˈicel kita alatek, ngaˈ ngaˈay misodod to pakararaway kitanan a tamdaw. Kawra ano padadotoc kita a misaˈicel, saikor wa makahito a misodod to tao. w22.04 23 fiedac 6 fatac

Maˈosiay ita i Paˈarawan, o ˈada no Kawas tano pina cowa ka lecad a ˈaˈadopen a mitaypiyaw. O cecay i ‘nai riyaray masadak’ a ˈaˈadopen, ‘pitoay ko fongoh, i fongoh moetepay ko waˈa.’ (Paˈarawan 13:1) O roma i ‘mikitiniay i lalomaˈ no sera a masadak’ a ˈaˈadopen, ano somowal i malecaday o kangic, ngaˈayho ‘patefad to namal nai kakarayan tayni i fafekang no sera.’ (Paˈarawan 13:11-13) Iraayho ko cecay ‘kahngangay a ˈaˈadopen,’ maroˈay ko cecay tasalamaan a fafahiyan i fafekang nira. Onini a tolo ˈaˈadopen mitaypiyaway to misaˈadaay to Kawas ato Hongti Kitakit Ningra a ˈicel. Mihaenay, pafafidaˈen ita cipinang konini a ˈaˈadopen mitaypiyaway to maanan, tada masakalimlaan konini. (Paˈarawan 17:1, 3) Oha cacipinang kita to o maanan ko tatodong nonini a ‘tahapinangan.’ Sangaˈayay a pakayraan i, papitadtaden ko Fangcalay Cudad to Fangcalay Cudad. Soˈlinay haw i, adihayay a ‘tahapinangan’ i Paˈarawan itini i romaroma cudad maharekayto mitadtad. w22.05 8-9 fiedac 3-4 fatac

O roma salikaka samaanen matoˈasayto anca tatiihay ko tireng, cowato ka adihay ko demak no niyah saki Yihofaan saan miharateng, mansa matoled ko falocoˈ. Ano pakayniay kiso i caka adihay ko midemakan no niyah a matoled, ngaˈayay licayen ko niyah: “O manan ko misaalian ni Yihofa hani?” O misaalian Ningra edeng itini i pakayraan iso nohatini, patafang to sangaˈayay no niyah Cingranan. Haratengen hena, cecay fafahiyan salikaka 80 ko mihecaan, o mamadangar ningra i mitosilay cowato ka lecad to 40 ho ko mihecaan ko nika adihay, tada matoleday ko falocoˈ ningra. Soˈlinto misarocoday ko niyah, kawra cowa ko mamarenec ci Yihofa saan cingra miharateng. Soˈlinay mahaen han? Haratengen, onini fafahiyan salikaka itini 40 ko mihecaan i, pafeliayto ci Yihofaan to sangaˈayay, 80 ko mihecaan kamayanho mihaen ko demak, ano mahaenay i, padotocay cingra patafang to sangaˈayay ci Yihofaan. Ano misarocod kita a midemak, o mamahemek ci Yihofa, wa saan ko sowal Ningra: “Ngaˈayay ko midemakan iso!” (Nengnengen ko Matay 25:20-23.) Ano samacayen ita ko mamadangar a demak no niyah eca ko cowa ko mamadangar, mihaen mamatongal ko lipahak kita. w22.04 10 fiedac 2 fatac; 11 fiedac 4-6 fatac

Palinian no Paˈarawan 21 fedengan ko 144,000 tamdaw to makapahay a niyaroˈ, panganganan to ‘Faelohay Yirusalim.’ Onini a niyaroˈ ‘iraay ko 12 taˈeneran a fakeloh, i fafekang iraay ko ngangan no 12 tarokos no tofor a siri.’ (Paˈarawan 21:10-14; Ifiso 2:20) Onini tahapinangan a niyaroˈ cecayay aca. O masalipaay cira, o koˈedaw kakahad ˈakawang maroyaroyay. O lalan no niyaroˈ o tada ekim, o 12 fawahan o 12 cinco, o lowil ato taˈeneran sahtoay tano masakenaay a ˈodo milafa. (Paˈarawan 21:15-21) Kawra onini a niyaroˈ hato cangoˈotay to maanan. Sanay ci Yohani: “Awaay a maˈaraw toya niyaroˈ ko fangcalay sefi, nawhani o todongto no fangcalay sefi ko Kawas ci Yihofa ato tofor a siri. Malomaanho ko nipipatedi no cidal ato folad toya niyaroˈ, nawhani o ˈdil no Kawas ko patediay toya niyaroˈ, o tofor a siri ko todong no dawdaw noya niyaroˈ.” (Paˈarawan 21:22, 23) Ora palaˈosiay to ‘Faelohay Yirusalim’ a tamdaw ngaˈayay tayni i ˈaˈayaw ni Yihofa.—Hipray 7:27; Paˈarawan 22:3, 4 w22.05 17-18 fiedac 14-15 fatac

Ci Yihofa o Misangaˈay kitaanan a Tatapangan, Patirengay to Rikec ato Misawkitay, kawra o sidaˈitay a Wama ita Cingra i kakarayan. (ˈOlic 100:3; Isaya 33:22) Pakayni kita i raraw no niyah mikifalocoˈ a pasasiyor i, iraay ko fadangalan Ningra a misodod kitaanan, iraayho ko ciˈicelay a kalim sapihaenaw to demak. (ˈOlic 86:5) Pakaynian Ningra i pairasolay ci Isaya pafeli kitaanan tonini a padihkoay to falocoˈ a sakiˈok: ‘O raraw namo soˈlin matiya o macengelay ko nika kahngan, nikawrira, wa ngaˈayho malecad o soeda a kohcal.’ (Isaya 1:18) O tamdamdaw cowa ko malefotay, mararaway ko sowal, mararaway ko demak, masasipakararaway. (Yakop 3:2) Sakoniya sowal cowa ko ngangaˈay kita ira ko ngaˈayay kalalaˈed to tao cowa ka saan, samanen ngaˈayay kita minanam makahi misodod. (Taneng 17:9; 19:11; Matay 18:21, 22) Itini mimingay demak ano pakararaw ko tao kitaanan, makalimay ci Yihofa kitaanan makahi a misodod cangranan. Iraay ko lalangian ita mihaen ko demak, samanen kita maemin milifokay to ‘taˈangayay a sasodod’ ni Yihofa.—Isaya 55:7. w22.06 8 fiedac 1-2 fatac

Soˈlin cowa ka ngaˈay kita palalini to tao, kawra wa ngaˈay kita pasayra i madimadiay midoko to Kawas a tamdaw a minanam. Tinakoen, ngaˈay kita pasayra ci Yisan minanam. Soˈlin cowa ka lecad kita cingranan o malefotay a tamdaw, wa ngaˈayho mitodong to makapahay capeling ato pakayraan ningra a dademak. (1 Pitiro 2:21) Ano misarocod kita mitodong to taˈarawan ningra, itini i midokoay ci Yihofaan a demak mamatongal ko kangaˈay no demak. Itini Fangcalay Cudad adihayay ko madimadiay mihodop to Kawas a tamdaw, soˈlin cowa ko malefotay cangra, kawra ngaˈayay todongen no mita. O cecay tinakoan o Hongti ci Tafiti. Sowal ni Yihofa cingra i ‘o matatodongay i falocoˈ Ako a tamdaw.’ (Dmak 13:22) Kawra, pakidemay ko raraw ningra, kawra kamayan o ngaˈayay a taˈarawan ita cingra. Misamaanay hani? Soˈlin macadaay ningra ko karetengay a sapirikec, kawra cowa ka paˈading to niyah. Misamimingay to falocoˈ cingra micada to sapirikec ato mikifalocoˈ a pasasiyor, telocto milifokay cingra to sasodod ni Yihofa.—ˈOlic 51:3, 4, 10-12. w22.04 13 fiedac 11-12 fatac

O sowal no Fangcalay Cudad o ˈada no tamdamdaw ko patay. (1 Korinto 15:25, 26) Maharateng ko patay i, alatek cowa ka rihadayen kita, mangalef pakidem ko adada no niyah anca o salawina i, tada matongalay ko cariraw. Hano ciˈangi kita to patay hani? Samanen isalakat misangaˈ ko Kawas kitanan i, pairaan Ningra ko kalim no falocoˈ ita saka koˈedawaw a maˈorip. (Patnakay 3:11) Pakayni to patay ira ko matatodongay a ˈangi papadama kitanan misalimla to ˈorip. Mihaen wa padadotoc kita to ngaˈayay a nanaman i kakaenen ato pionto, ano adada i, tayra pipaisingan micada to pipaadah, caay ko mamisakahemaw to rihaked, mirienang to romaroma katalawan a demak. Mafanaˈay ci Satan misalimlaay kita to ˈorip no niyah. Pakayni sapidipotaw to ˈorip ita kinafalah sanay to kihcod, kinafalah to kalawidang no niyah aci Yihofaan sanay cingra. (Yopu 2:5) Tada mararawayto ci Satan! Nikawrira, wa sakadademaken ni Satan ko kaciˈangi ita to patay miroero kitaanan mitowakang ci Yihofaan, samanen cingra i, ‘iraay ko ˈicel pakapatay to tamdaw a Akoma.’—Hipray 2:14, 15. w22.06 18 fiedac 15-16 fatac

Itini makecengay a pakayraan, cowa ka ˈaloman ko micawmaˈan ita a salikaka alatek. Mihaenay, aniniho madadipayal to polong a salikaka, tada kalimlaan konini. Haratengen, o cacoˈayen ita i, o ci Satan, cowa ko salikaka. Ano iraay ko caka ngaˈay a demak nangra, aka pakidem ko harateng. I kalalaˈed ano iraay ko manan a pasangaray, kalikien a misaysay. (Taneng 19:11) Ka talaˈayaw a padama to tao. (Titus 3:14) Na iraay ko cecay kasakapot a mitosilay malacafayay cangra padama toya misaaliay a fafahiyan salikaka, telocto polong a kapot no mitosilay milifokay to taˈangayay a epoc. Matongalay ko kalangaˈay nangra, malecaday o cecay paro no lomaˈ. (ˈOlic 133:1) O masacaˈol masaemangay a salikaka soˈlin itini makecengay no sifo ko mitosilay a tayal a kilac maˈorip, kamayan tanektek midoko ci Yihofaan, ilalomaˈay nangra a roma tamdaw pakayni pihakelongan a mapalit i kapalitan. Ngaˈayay kita patado cangranan ato paro no lomaˈ nangra mitolon. O roma salikaka misiˈayaway to sakalahdaw no pasalat a katalawan mipakalalok toniya mapalitay a tamdaw, pafeli to dafong cangranan, tayra i hoing patado cangranan paˈading. Ngaˈayay kita patado toniya timoloay a salikaka mitolon. (Kolosay 4:3, 18) Aka pisakahmaw to sapadama no satolon iso.—2 Tisalonika 3:1, 2; 1 Timoti 2:1, 2. w22.12 26-27 fiedac 15-16 fatac

O wawa miceriday mitodong to wama wina. Manaokaniw, awaay ko malefotay a wama wina. (Loma 3:23) Soˈlin hatira, citanengay a wama wina kamayan misarocod patireng to ngaˈayay a taˈarawan no wawa. O cecay wama sanay: “O wawa malecaday o takomod, miselipay to maamaan. O waywayan ita ano cowa ka lecad to mipasifanaˈan ita cangranan i, o mamahapinang nangra.” Mihaenay, ano makalimay kita maolah ko wawa ci Yihofaan, papahapinangen ita ko wawa to tada tangongolay ko olah ita ci Yihofaan. Adihayay ko hapakayraan no wama wina pasifanaˈ to wawa maolah ci Yihofaan. 17 ko mihecaan a salikaka ci Antelo sanay: “O wama wina ako padadotocay misaˈicel somowal to kalimlaan ko pitolon. To dadayadaya o wama malacafayay takowanan a mitolon, ano maharekayto kako mitolon, kamayan cingra mihaen ko demak. Nohatini pasayra kako ci Yihofaan mitolon i, rihadayay ko falocoˈ, o Wama ako ci Yihofa saan ko harateng, hanaca maolahay Cingra takowanan.” O wama wina, tangongolay ko olah namo ci Yihofaan, o tataˈangay ko pifiyor to wawa, aka a pisakahmaw minengneng to ˈicel no taˈarawan namo. w22.05 28 fiedac 7-8 fatac

Sakalaˈosiaw no patosokan micada to paputisem, oha dademaken iso a cecay demak i, mikifalocoˈ a pasasiyor to raraw iso. (Dmak 2:37, 38) O tatodong no soˈlinay pasasiyor i, mamisongilaˈ a mifalic o sanay. O romaroma a demak o kaˈintehan ni Yihofa, tinakoen mitamakoay, somowal to kaacekan a sowal, malafoay madadiˈiyay a demak. Maherekayto kiso mifalah to mahaenay tatiihay a nanaman han? (1 Korinto 6:9, 10; 2 Korinto 7:1; Ifiso 4:29) Ka padadotoc misaˈicel a mifalic. Ngaˈayay tahidangen iso ko singsi no Fangcalay Cudad ato malohemay malitengay no kasakopang pafeli to sapadama ato sapaini tisowanan. Ano kaemangayho kiso itiniayho i lomaˈ, ka picerid misaali to sapadama no wama wina, padama tisowanan mifalah to mamiconged tisowanan micada to paputisem a tatiihay nanaman. O roma sa i, ka picerid kiso mirienang to midokoay a demak, mahawpay mirienang to saˈopo ato tawlik pakamay a pacaˈof. (Hipray 10:24, 25) Ano matoorayto iso ko tatodong a mitosil i, ka picerid a mirienang tonini a demak. w23.03 11-12 fiedac 14-16 fatac

Satapangan 3:14, 15 a saaroˈan iraay ko ˈoner ato teloteloc no ˈoner. Ano o “ ˈoner” kora pairasolan o soˈlinay a ˈoner, cowa ko cacipinang cimira to misowalan ni Yihofa itini i Itin a sapisawkit. Mansa, o sakasasowal ni Yihofa a tatihi maedeng oya iraay ko citanengay a pinaˈorip. O cima cingra hani? Ihkalay mihadak ko Paˈarawan 12:9 ‘o salakatay a ˈoner’ oya ci Akoma Satan. O roma tamdaw itini i harateng ato waywayan no roma tamdaw tada melecaday, nolatekay i o mahaenay tamdaw patinakoan no Fangcalay Cudad to teloteloc noya tamdaw. Mansa, o teloteloc no ˈoner oya mikihatiyaay ci Satanan mitowakang to Kawas, misaˈada to finawlan no Kawas noˈadingoan a tireng ato tamdaw. O teloteloc no ˈoner mahawpay ko itiniay i lintad ni Nowa a miliyasay to saaroˈan i kakarayan a coyoh, atoya malecaday ci Akomaan a mariˈangay ko waywayan a tamdaw.—Satapangan 6:1, 2; Yohani 8:44; 1 Yohani 5:19; Yuta 6. w22.07 14-15 fiedac 4-5 fatac

Tada maolahay ko tarokos ci Pawlo to salikaka. Adihayay ko malifaay ningra a pasangaray, mansa ano tahalifa to sapalifet ko salikaka i, siniˈadaay cingra cangranan, cipinang to nafalocoˈan nangra. Kinacecayay, awaay ko payci ni Pawlo, mamikilim to tayal midama to sakaˈorip no niyah ato cafay. (Dmak 20:34) O tayal ningra o misangaˈay to kopang, mansa tiya tahira cingra i Korinto i, malacafay ci Priskilaan aci Akuilaan midemak tonini a tayal, kawra ‘maraod ko Paselaˈan a Romiˈad,’ mitosilay cingra to Yutaya a tamdaw ato Krisiya a tamdaw. Ikorto, tayraayto i Korinto ci Silas aci Timoti, ‘tano polong a ˈicel patenak to kimad no Kawas’ ci Pawlo. (Dmak 18:2-5) Cowa ka mapawan ci Pawlo o midokoay ci Yihofaan o masakalimlaan a demak i nokaˈorip ningra. Malalokay a matayal ato fanekfekay a mitosil ci Pawlo, o ngaˈayay a taˈarawan, mihaenay ngaˈay pakalalok to salikaka cingra. Patalipaˈelalay cingra i cangranan, aka pakayni i saroero no kaˈorip ato paririˈ to lomaˈ a ˈinorong misakahmaw to ‘ikakaay ko noka masakalimlaan’ a demak, o masakenakenaay milingatay to pidoko ci Yihofaan a demak. w22.08 20 fiedac 3 fatac

Anini, o araaw no Kawas papatenaken ko ngaˈayay lihaf no Hongti Kitakit i paro no kakarayan. (1 Timoti 2:3, 4) Misaaretengay ci Yihofa tonini a tayal Ningra, mansa pafelian Ningra ko kaolahan a Wawa mikayat tonini a tayal. Ngaˈay pakasoˈlin kita, itini inanengay a sakayat ni Yis, o mitosilay a tayal wa itini ˈayaw no salikoray romiˈad a malahci, tahira karenecan ni Yihofa ko pidemak. (Matay 24:14) Samaan kita a mafanaˈ tonini hani? Itini ˈayaw no patikol ci Yis tayra i kakarayan caka halafin, itini Kalili cecay lotok masasoˈaraway to madimadiay a nisawawaan, hanaca pasowalay cangranan: ‘O fadangalan no kakarayan ato sera mapafeliayto takowanan.’ Sinanoten, sanay ko dotoc a sowal ningra: ‘Mihaenay ka lingad kamo, pala nisawawaan ako ko polong kasafinawlan a tamdaw.’ (Matay 28:18, 19) Mahapinangay, o malifokay ni Yis a fadangalan mahawpay ko pikayat to mitosilay a tayal, o mitosilay a tayal wa itini sakayat ni Yis padadotoc tahini i lintad ita anini. w22.07 8 fiedac 1, 3 fatac; 9 fiedac 4 fatac

O misowalan no Yohani 5:29 ano o waywayan no cecay tamdaw i ˈayaw no mapatay, mihaenay o ‘ngaˈayay ko demak’ oya misowalan no Dmak 24:15 a ‘moecelay a tamdaw.’ O ‘moecelay a tamdaw’ itini ˈayawho no mapatay ngaˈayay ko demak, wa ‘patikol maˈorip milifok to ˈorip’ cangra noikor, samanen o ngangan nangra matilidayto i sakaˈorip a cudad. Soˈlin ano mapatay ko tamdaw o raraw ningra malahdawayto saan ko sowal no Loma 6:7, kawra ano sinanoten i, onini a moecelay tamdaw padadotocay madimadi to Kawas, cowa ko mamapawan ko Kawas, mihaenay o ngangan nangra patikol maˈorip ikor kamayan itini i sakaˈorip a cudad. (Hipray 6:10) Manaokaniw, onini a moecelay tamdaw ano patikol maˈorip misaaliay to padadotocay madimadi, ngaˈ materek ko ngangan itini sakaˈorip a cudad. w22.09 18 fiedac 13, 15 fatac

Itini waywayan malo ngaˈayay tiˈeren, o pairasolay a Taniil patirengay to ngaˈayay taˈarawan. Maholiw no Papilon a tamdaw cingra caka halafin, misawacayay to ngaˈayay tiˈeren ko waywayan no niyah, ngaˈayay pakasoˈlinen. Tiya padamaen ni Yihofa cingra mitadtad to mitiihan no Hongti no Papilon ci Nipukatnicar ikor, matongalay mahapinang no tamdaw konini. (Taniil 4:20-22, 25) Ikor no adihayay miheca, mamisongilaˈ ci Taniil mitadtad to tatodong no masadakay i cafeng no lomaˈ no hongti a lihaf, miliyaway misawacay to ngaˈayay tiˈeren cingra. (Taniil 5:5, 25-29) Ikorto, hongti no Mitiya ci Taliyus ato tapang ningra pakahapinangay ‘iraay ko mikiriwiˈay a taneng ni Taniil,’ hanaca mafanaˈay to ‘ngaˈayay tiˈeren ko waywayan ni Taniil, itini tireng ningra awaay makilim ko mimimiming a patelac ato tatiihay a waywayan.’ (Taniil 6:3, 4) Ngaˈayay licayen ko niyah: “Miharateng ko tao o ngaˈayay pakasoˈlinen a tamdaw han?” Ano ngaˈay tiˈeren ko waywayan ita, o ngangaˈay paira to ˈdil ato sapakahemek ci Yihofaan. w22.09 8-9 fiedac 2-4 fatac

Dofdofen ko ngaˈayay ato tatiihay palinian ni Yihofa pakayni kitaanan iraay ko epoc. Misamanay? Haratengen hena, ano kahacecay a kingko mitooray to palinian no niyah misaˈosi to epoc no payci, anca kahacecay patirengay to lomaˈ a kosi mitooray to palinian no niyah mifakeciw misangaˈ to lomaˈ, awaay ko ngaˈayay hateloc. Ano o ising ato kangkofo caay pitoor to palinian no sarikec midimokos to adadaay a tamdaw, mamapatay ko roma adadaay a tamdaw alatek. Mahapinangay, itini kaˈorip a pakayraan, o ngaˈayay tiˈeren a palinian ngaˈay midipot kitaanan. Malecaday, itini mihapinang to matatodongay mararaway a pakayraan, o palinian ni Yihofa wa ngaˈay midipot kitaanan. Palemeday ci Yihofa to mitooray to palinian Ningra maˈorip a tamdaw. Mikiˈokay Cingra: ‘O moecelay ko falocoˈ a tamdaw mamilayap tonini a sera, rihaday ko ˈorip a tahadaˈoc.’ (ˈOlic 37:29) Tora romiˈad, o tamdamdaw mamitoor to palinian ni Yihofa a maˈorip. Mamaharateng iso, o itiyaayto a tamdamdaw hahakowa ko kakelec a rihaday, raheker a lipahak han? Makalimay ci Yihofa tisowanan marenec to hatiniay a kaˈorip. Soˈlinayto, kita kahacecay tamdaw iraay ko adihayay a lalangian maolah to moecelay. w22.08 27-28 fiedac 6-8 fatac

Itini pasangaray pakayraan, o madimadi ita ci Yihofaan ato likakawa Ningra mamicada to sapalifet alatek. Sasamaan kita misiˈayaw hani? O papadadotoc kita talipaˈelal, micerid talipaˈelal, tanektek i pihakelongan. Sakatalipaˈelalaw kita i, o mamitafo to rihaday, ira ko ihkalay a sapisimsim a inaneng, misaˈicel tano pinengneng ni Yihofa minengneng to demak. Mihaen, cowato ko mamapaekel no kaolahan ko sapiharateng a taneng. Madokaˈay no salikaka saan ko harateng, ora tamdaw iraay ko ˈinorong i kasakopang faˈinayan salikaka. Cowa ko padetengay midokaˈ tisowanan alatek, kawra o midemakan ningra kamayan pakasomad tisowanan. (Loma 3:23; Yakop 3:2) Saan kiso miharateng: “O cecay salikaka hano midemak to mahaenay a demak, soˈlinay o likakawa no Kawas konini han?” Ano mihaen ko harateng iso marefongayto i talakal ni Satan. (2 Korinto 2:11) Ira ko mahaenay masofaway harateng ita, mamisatapang to miliyas ci Yihofaan ato likakawa Ningra alatek. Aka a ˈintehen ko falocoˈ. w22.11 20 fiedac 1, 3 fatac; 21 fiedac 4 fatac

Pairaan ni Yihofa ko hatokel ita tahadaˈoc maˈorip, onini a hatokel tada makapahay! O roma tamdaw iraay ko hatokel tatayra i kakarayan malo cowa ka patay a ˈadingo. (1 Korinto 15:50, 53) Kawra o hatokel ita ˈalomanay tamdaw wa itini fafekang no sera tahadaˈoc tanektek ko tireng lipahak a maˈorip. (Paˈarawan 21:3, 4) O hatokel ita ano tatayra i kakarayan anca itini fafekang no sera maˈorip, o hatokel ita sahtoay o kalimlaan. O mamalaˈosi ko hatokel ita noikor, samanen oniya hatokel o sapafeli ni Yihofa. (Loma 15:13) Mafanaˈay kita na mikiˈokay ci Yihofa to maanan, mafanaˈayho tatooren Ningra ko mihadakan a sowal a midemak. Pakasoˈlinay kita, makalimay ci Yihofa hanaca iraay ko ˈicel palaˈosi to kihcod mikiˈokan no Niyah. (Saˈosi 23:19) Tada maolahay ko kakarayan Wama kitanan, makalimayho kitanan mitadiˈec Cingranan. Ano ira ko tanektekay a pakasoˈlin no falocoˈ ita ci Yihofaan, pakasoˈlin to sapafeli Ningra kitanan a hatokel mamalaˈosi, wa ngaˈayto miemem to sapalifet, ngaˈayho ira ko lipahak ato timolo misiˈayaw to hanoikor. w22.10 24 fiedac 1-3 fatac

Samanen cowa pihakelong ko Israil tamdaw to sowal ni Yihofa, paˈayaway ci Isaya papakihateren ni Yihofa tahapades cangra. (Isaya 30:5, 17; Yirimiya 25:8-11) Soˈlinay mahaen ko demak, ikor maholiway no Papilon tamdaw cangra. Kawra, ilalomaˈ no Israil tamdaw iraay ko madimadiay to Kawas a tamdaw, aira ko cecay romiˈad laliyawen ni Yihofa palemed cangra sanay ci Isaya. (Isaya 30:18, 19) Cowa ko tatangsol mifekad konini a demak. ‘Mihadidiay ci Yihofa mitala, sasidaˈiten kamo,’ tatodong noniya sowal, wa mataˈlif ko cecay liyad a toki, miliyaw a milifok to pasalat ko madimadiay Israil tamdaw. Ikor i, soˈlinay milidongan ni Yihofa cangra. Maholiw ko Israil tamdaw i Papilon to 70 miheca ikor, o ˈosaw a fadoc tamdaw patikolayto i Yirusalim. (Isaya 10:21; Yirimiya 29:10) Matedalto cangra mikitini Papilon, patikol i nalacolan i, o losaˈ no kahemek mikotayayto to losaˈ no misemsemay. w22.11 9 fiedac 4 fatac

Itini romaroma kitiraan anini, misiˈayaway ko salikaka to na masiˈayaway no tarokos a demak. Isaka 1 hahekalan, o tarokos pakayni pilasil to milingatay ci Yisan a demak tahacadaay to sapalak. Saˈakawangay a hoing no Yutaya saliyaliyaw sanay mirikec cangranan, ‘caay pihai cangranan pakayni i ngangan ni Yis milasil to maanan ato pasifanaˈ to maanan.’ (Dmak 4:18-20; 5:27, 28, 40) Kawra mafanaˈay cangra, iraay ko cecay mikikakaay ko taˈangay no fadangalan palimoˈotay cangranan pasayra i ˈalomanay a mitosil, misongilaˈ misawacay ci Kristoan. (Dmak 10:42) Mihaenay, ci Pitiro aci Yohani mitaypiyaway to tarokos timolo a pasowal, o Kawas ko dadofdofen nangra, cowa ko i hoingay a tamdaw, hanaca saan pasowal caay ko mamisawad cangra milasil to milingatay ci Yisan a demak. (Dmak 5:29) O tarokos samanen tanektekay mitafo to madimadi hato mapekpekay. Miliyas cangra to hoing i, ‘samanen pakayniay i ngangan no tapang mapakangodo ko niyah hato lipahakay ko falocoˈ.’ Ikor, padotocay cangra fanekfek a mitosil.—Dmak 5:41, 42. w22.10 12-13 fiedac 2-4 fatac

Sakafanaˈaw ci Yihofaan mamikitini to taˈeneran a sifanaˈ a misatapang minanam. Itini Hipray a cudad, o ‘taˈeneran a kimad’ hananay no tarokos ci Pawlo ko hatiniay a sifanaˈ. Manaokaniw, cowa ko kalimlaan konini ‘salakatay a sapasifanaˈ ’ caay ka saan, ao malecaday o nananomen no ˈengaenga a hacol konini salakatay a sapasifanaˈ. (Hipray 5:12; 6:1) Palimoˈotay cingra to polong a Krisciyang, aka aitini sa pinanam to taˈeneran a kimad, ao mamacakat cipinang to tangongolay a Kimad no Fangcalay Cudad. Pakayni tonini tangongolay a kimad palahaday kiso to makalimay a falocoˈ han? Mamakahi kiso padadotoc macakat, padadotoc mitongal to kafanaˈ ci Yihofaan ato araaw Ningra han? Pakayni to ˈalomanay a tamdaw, cowa ko madoloay ko minanamay a demak. Kiso i? Itini picudadan, maolahay kiso miˈosi ato minanam han? Maolahay kiso minanam, hanaca adihayayto ko mananamay han? Anoca, tadancaay kiso micudad han? ˈArawhan i, ˈalomanay a tamdaw malecaday a pasangaran nanay. Aka calemcem, papadama ci Yihofa tisowanan. Malefotay Cingra, o sangaˈayay a Singsi Cingra. w23.03 9-10 fiedac 8-10 fatac

Ano damsay kita i, mamakahi papifalicen ko Kimad no Kawas i kitaanan. Edeng ano falahen ita ko malitaˈangay ato hinalikafay a waywayan i, wa mapahatatanamto no Kimad no Kawas, palahad to olah, siniˈadaay ato sidaˈitay a falocoˈ. Itini i picada ita to tao, patalahkalay to makahiyay kita mapahatatanam no Kimad no Kawas hokira. O Farisay tamdaw cowa ka matemer no Kimad no Kawas ko falocoˈ nangra, telocto i, ‘pasetekan nangra to raraw i awaay ko raraw a tamdaw.’ (Matay 12:7) Ano hatira kita to Farisay tamdaw a minengneng to tao i, patalahkalay to cowa ka mapahatatanam no Kimad no Kawas kita. Saharateratengen ita: “Marariday kako somowal to kangaˈayan no tao, anca mikimkimay to dangoc no tao han? Siniˈadaay kako to tao, makahi misodod, anca maolahay milikaf to tao, hinaˈintehay ko falocoˈ han?” O mahaenay noka pisinanot to niyahan, mamahapinang ita, papipahatatanaman ita ko Kimad no Kawas to harateng, falocoˈ ato waywayan no niyah hokira.—1 Timoti 4:12, 15; Hipray 4:12. w23.02 12 fiedac 13-14 fatac

Nengnengen ci Yosif no Arimatiya, o masalalomaˈay no Lomaocay (o saˈakawangay a hoing no Yutaya) cingra, o cinganganay tamdaw itini Yutaya. Kawra, itiniho ci Yis i fafekang no sera mitosil i, cowa paihkal ci Yosif to timoloay. Sowal no Fangcalay Cudad: ‘O nisawawaan ni Yis ci Yosif, kawra matalaway cingra to Yutaya a tamdaw, mansa lonok sa mala nisawawaan.’ (Yohani 19:38) Soˈlin ciharatengay ci Yosif to lihaf no Hongti Kitakit, kawra cowa ka sakafanaˈaw ko tao to pakasoˈlinay ci Yisan cingra. Maedeng matalaway cingra malahdaw ko tadamaanay a saaroˈan no niyah. Kawra o sowal no Fangcalay Cudad, ci Yosif ta mapatayto ci Yis i, ‘timoloay a tayra ci Pilatoan, misaali to tireng ni Yis.’ (Marko 15:42, 43) Nohatini, mafanaˈayto ko tamdaw maemin to midamaay ci Yosif ci Yisan. Matiraay kiso ci Yosifan matalaw to tamdaw han? w23.01 30 fiedac 13-14 fatac

Matengilay no fafahiyan hongti no Sipa itini pikowan ni Solomon, lipahakay ko kaˈorip no Israil, mikitini maraayay tayni i Yirusalim, makalimay sapinengnengaw to soˈlinay a pakayraan. (1 Hongti 10:1) Maˈaraw ikor, mihadakay cingra to aniniay sinael a sowal. Nikawrira, o dipayalay pikowan ni Solomon o taˈarawan aca noikoran konini. O pakaynian ni Yihofa i wawa ci Yisan pikowan to tamdaw i, o papaira to adihayay a sapalemed. Ci Yis itini i masakenakenaay a demak ikakaay ci Solomonan ko kangaˈay. Ci Solomon cowa ko malefotay a tamdaw, na midemakay cingra to tada tatiihay a saˈosi, telocto pairaay to pades no finawlan no Kawas. Cowa ka lecad ci Solomonan, ci Yis o malefotay a Mikowanay, cowa ko mamararaw cingra. (Luka 1:32; Hipray 4:14, 15) Misawacayay cingra to o sangaˈayay a Hongti ko niyah, cowa ko mamararaw cingra, cowa ko mamidemak to maamaan mikariˈangay to finawlan a demak. Ano cingra ko mikowanay, tada mamalemed kita! w22.12 11 fiedac 9-10 fatac

Ano matenakay ko lifong i kaitiraan ita i, sasamaan ko demak hani? Dofdofen ita ko macalohay a sapalimoˈot no sifo, tinakoen mararid a minanaw to kamay, citangoyosan, pairaen ko kalalaˈed ato tao, tooren ko mipalaliyasay a saˈosi. Ano songilaˈen ita midemak konini a demak i, paihkalay to misalimlaay kita to sapafeli no Kawas a ˈorip. Ano mafekad ko demak i kacalohan a toki i, alatek mamikitini i widang, fiyaw anca sinfon matengil ko pina cowa ko soˈlinay a lihaf. Aka sahto sa pakasoˈlinen ko sowal, ao mamisinanot to safanaˈ no sifo ato lekakawa no pipaisingan to ngaˈayay tiˈeren a lihaf. (Taneng 14:15) ˈAyaw no sapisadakaw to sakayat to pakayniay saˈopo no kasakopang ato mitosilay tayal i, o Malohemay Malitengay i Congpo ato Iing no Fenpo mamisaˈicel milifok to matatodongay a lihaf. Ano dofdofen ita ko sakayat, cowa ko kadipot aca no niyah ato tao, mamaˈadingho ko makapahay a ngangan no kasakopang.—1 Pitiro 2:12. w23.02 23 fiedac 11-12 fatac

Micomodto ko Israil tamdaw to Mikiˈokan no Kawas a Pala i, maliwasakay cangra icowacowa a kitiraan. Halafinto i, o maroˈay itini cecay kitiraan a Israil tamdaw alatek caayto ka pikihar to itiraay i roma pala a finawlan. Nikawrira, milimasmasay ci Yihofa, palisopsop to Israil tamdaw, mitengil to piasip ato pitadtad no tamdaw to Kimad Ningra. (Limoˈot 31:10-12; Nihimiya 8:2, 8, 18) Haratengen hena, ano tayni i Yirusalim ko cecay madimadiay midoko to Kawas a Israil tamdaw, maˈaraw ko ˈalomanay finawlan naitini icowacowa pala no kitakit malisopsop tayra i, maedeng masemeray ko falocoˈ! Pakaynian to mahaenay a limasmas, palacecayan ni Yihofa ko finawlan Ningra a makakedec. Mapatirengto ko kasakopang no Krisciyang i, o masakenakenaay a tamdaw ko palaˈosiay to finawlan no Kawas. Masasiromaay ko sasowalen nangra, masasiromaay ko serangawan nangra, iraay ko cihafayay iraay ko manikaway nangra, kawra makakedecay cangra malacecay midoko to Kawas. O roma sa i, o faelohay a mihakelongay ano sapilayapaw to sapadama no salikaka, makakedec cangranan, wangaˈ cipinang to Kimad no Kawas.—Dmak 2:42; 8:30, 31. w23.02 3 fiedac 7 fatac

Mikiˈokay ci Yihofa, o midofdofay Cingranan a tamdaw mamilifok to ‘tahadaˈocay a ˈorip.’ (Loma 6:23) Saharateratengen ita konini a sakiˈok ni Yihofa, wa mangalef tangongol ko olah i Cingranan. Haratengen hena, tangongolay ko olah no kakarayan Wama kitaanan, mansa pafeli kitaanan to midaˈocay a ˈorip, tahadaˈoc caka piliyas kita i Cingranan. Onini coko mitemerayto falocoˈ iso han? Mikiˈokay ko Kawas pafeli kitaanan to tahadaˈocay a ˈorip, paˈicelay konini kitaanan itini sapalifet padadotoc mihadidi. Soˈlin sapipatayaw ko ˈada kitaanan, cowa ko tatalalikor kita. Misamaanay hani? O cecay lalangian kafanaˈan ita, ano tahira i patay a madimadi kita, o papatikolen ni Yihofa paˈorip kita, ira ko tokel ita tahadaˈoc caka patay. (Yohani 5:28, 29; 1 Korinto 15:55-58; Hipray 2:15) Mafanaˈay kita tatahadaˈocen ni Yihofa paˈorip kita, samanen Pipowaran no ˈorip Cingra, o midaˈocay maˈorip a Kawas. (ˈOlic 36:9) Sowal no Fangcalay Cudad nai ti:yaho materekayto ci Yihofa, tatahadaˈoc materek.—ˈOlic 90:2; 102:12, 24, 27. w22.12 2 fiedac 1-3 fatac

O malo finawlan ni Yihofa, mafanaˈay kita o tatahalifa to sapalifet, samanen o sowal no Fangcalay Cudad: ‘ ˈAyaw no hamamicomod kita to Hongti Kitakit no Kawas i, o tatahalifa to adihayay a pades.’ (Dmak 14:22) Mafanaˈayho kita, o roma a pasangar irato ko faelohay hekal ngaˈ masongilaˈto a masaysay, samanen itiya ‘caayto ka patay, caayto ka somad, tomangic, adada.’ (Paˈarawan 21:4) Soˈlin cowa ko papalasawaden ni Yihofa ko macadaay ita a sapalifet, kawra o papadama Cingra kitaanan padadotoc mihadidi. Sinanoten ko nano sowal no tarokos ci Pawlo to i Lomaay a Krisciyang. Salakat masowalay ningra ko masiˈayaway no niyah ato romaroma salikaka a sapalifet, dotoc sanay ko sowal ningra: ‘Mitadiˈec kita toya maolahay kitaanan, pakalowidayto nohatini.’ (Loma 8:36-37) Tatodong nonini, soˈlin kamayanho kiso tahalifa to sapalifet, padamaay ci Yihofa tisowanan malaˈosi ko demak. w23.01 14 fiedac 1-2 fatac