Saka 3 Folad

Tarokos ci Pitiro palimoˈotay to salikaka, sakadademaken ko inaneng no niyah pakalalok to romaroma a salikaka. Sanay ci Pitiro: ‘O Kawas tano masakenakenaay a pakayraan patalahkal to mikiriwiˈay a sidaˈit Ningra. Malo mihimaway to mikiriwiˈay a sidaˈit, o kahacecay tamdaw mamitoor to malifokay no niyah a inaneng, misarocod matayal saki ˈalomanay.’ (1 Pitiro 4:10) Mihaenay o mamisarocod kita misaka dademak to inaneng, aka calemcem to mamatoled ko salikaka ato kaˈinap kitanan, sawad sato a midemak. Kawra aka malitaˈang. (1 Korinto 4:6) Haharatengen ita, o polong a inaneng no niyah sahtoay o sapafeli ni Yihofa kitaanan. O sasakadademaken ita konini a inaneng pakalalok to salikaka, cowa ko papatakaraw to niyah. (Filipi 2:3) Ano sakadademaken ita ko ˈicel ato inaneng no niyah midemak to kaolahan no Kawas a demak, wa ira ko lalangian a lipahak. Mahemek kita cowa ko pakayniay kaidahi no niyah to tao, ikaka ko ngaˈay no midemakan to tao, ao pakayniay kita i pisaka dademak to inaneng no niyah paˈodingar ci Yihofaan. w22.04 11-12 fiedac 7-9 fatac

Maolahay ci Yis to Kimad no Kawas, o sapairasol i ˈOlic 40:8 mihadakay to nafalocoˈan ningra. Sanay ko sinael: ‘Kawas ako, tada maolah kako a midoedo to araaw Iso, o rikec Iso itiniay i kemod no falocoˈ ako.’ Tada maolahay ci Yis miˈosi to Fangcalay Cudad, mansa ano midoko cingra ci Yihofaan i, tada lipahakay, malaˈosiay ko kihcod a demak ningra. Ano misongilaˈ kita micekiw to Fangcalay Cudad, papitemeren ko Kimad no Kawas to falocoˈ ita i, mamalaˈosi ato lipahak ko kaˈorip ita. (ˈOlic 1:1-3) O mamisinanot kita to sowal ni Yis, mitodong to ngaˈayay taˈarawan ningra, padadotoc pacakat to inaneng no niyah micekiw to Fangcalay Cudad. Ano sapitongalaw kita to kacipinang to sinael, kapitolon, tayoen a miˈosi, licayen ko niyah to pina a salicay, halo amotoˈen a mitilid ko kalimlaan. Sakadademaken ita ko inaneng a pafafidaˈ, calepen mifolfol ko maˈosiay a lalakaw, halo minengneng to mitepangan a cudad. Pairaen ita ko matatodongay a waywayan micekiw to Fangcalay Cudad, ho ngaˈayto mapahatatanam no Kimad no Kawas kita. Itini tonini a pakayraan ano padadotoc kita misaˈicel, ngangaˈayto mikitini i picekiw milifok to adihayay a epoc, ngaˈayho matongal ko piingid ci Yihofaan.—ˈOlic 119:17; Yakop 4:8. w23.02 13 fiedac 15-16 fatac

Mipiliˈ to ihkalay a patosokan, ikor demaken. Ihkalen ko sowal, wa ngaˈay kiso samaan ko pidemak hani? Ano makalimay kiso misalof to pasifanaˈay a inaneng, songilaˈen micekiw to Sarocoden Miasip ato Pasifanaˈ a cudad. Ano manilnilay kiso itini i mitosilay ato nika ˈorip a saˈopo misikay to cecay kamok, kilimen ko cecay iraay ko nalifetan a salikaka, patengilen cingra to misadayanto iso a lalakaw, ikor papisowalen cingra to sapaini tisowanan, padama tisowanan macakat ko inaneng. Talaˈayaw kiso misongilaˈ misaday to kamok no niyah, mamahapinang no tao to malalokay ngaˈayay tiˈeren a tamdaw kiso. (2 Korinto 8:22) O nananamen iso a inaneng ano pasangaray nanamen saan kiso miharateng, sasamaan aki? Aka pisawad. Soˈlin cowa ka pasowal ko Fangcalay Cudad to o matanengay a mikimaday ato singsi ci Timoti hokira, kawra ci Timoti maedeng mitooray to sapalimoˈot ni Pawlo cingranan, mansa ngaˈay itini romaroma katayalan padadotoc a macakat.—2 Timoti 3:10. w22.04 24-25 fiedac 8-11 fatac

O pitoay ko fongoh a ˈaˈadopen mitaypiyaway to maanan? Onini a ˈaˈadopen malecaday o lokedaw, kawra o waˈay nira malecaday to waˈay no tomay, o ngoyos malecaday to ngoyos no layong, i fongoh iraay ko moetep a waˈa. Masowalay i Taniil saka 7 fedengan a sepat taˈangayay a ˈaˈadopen iraay ko mahaenay a tahapinangan. Kawra itini Paˈarawan, onini a tahapinangan masaˈopoay i tireng no cecay ˈaˈadopen, ao cowa ka licinowas i tireng no sepat a ˈaˈadopen. Mahapinangay, o mitaypiyawan nonini pitoay ko fongoh a ˈaˈadopen cowa ko cecay sifo anca ciˈicelay mikowan to hekal. Cimira i ‘mikowanay to kasangasaw, kasafinacadan, sasowalen, ato kasakitakit a tamdaw,’ mihaenay o ˈicel nimira madeng ikakaay ko taˈangay to polong no sifo no kasakitakit. (Paˈarawan 13:7) Mihaenay, o mitaypiyawan nonini a ˈaˈadopen o halafinay to mikowan to tamdaw a ˈicel no polong a mirikecay. (Patnakay 8:9) Itini i Fangcalay Cudad, o ‘moetep’ mitaypiway to polong anca o marocekay. w22.05 9 fiedac 6 fatac

Cima ko mamilifok tonini kasemeran a sapalemed hani? Salakat i, o maˈoripay milakowit to Armakiton a taˈangayay ˈopo a tamdaw, ato misofocan nangra a wawa itini i faelohay a hekal. Roma i, Paˈarawan 20 fedengan mikiˈokay, wa patikol maˈorip ko mapatayay a tamdaw. (Paˈarawan 20:11-13) Oya maˈoripho madimadiay ci Yihofaan a ‘moecelay a tamdaw,’ atoya maˈoripho awaay ko toki mafanaˈ ci Yihofaan ‘cowa ka moecel a tamdaw,’ wa patikol maˈorip itini i fafekang no sera. (Dmak 24:15; Yohani 5:28, 29) Sakoniya sowal i, polong mapatayay a tamdaw wa itini i 1,000 miheca pikowan a tatokian patikol maˈorip hokira? Cowa, o romaroma tamdaw maˈoripho iraayto ko toki mafanaˈ ci Yihofaan, kawra kamayan cangra padotoc midemak to tatiihay demak, manaˈay midoko Cingranan, o sowal ato waywayan nangra paihkalay to awaay ko hatatodong nangra i lakoing maˈorip. O hatiniay a tamdaw caayto ko papatikol maˈorip.—Matay 25:46; 2 Tisalonika 1:9; Paˈarawan 17:8; 20:15. w22.05 18 fiedac 16-17 fatac

Sapicowataw to matatodongay a pidoko, pakaynian ni Yis i ‘madimadiay citanengay a koli’ itini fafekang no sera patireng ko tadamaanay a likakawa. (Matay 24:45) Samaanay ko pinengneng iso tonini a likakawa hani? Alatek malecaday ko harateng iso to tarokos ci Pitiroan, na pasowalan ningra ci Yis to aniniay a sinael. Haratengen hena, ano eca kafanaˈ kita to likakawa ni Yihofa, wa samaan ko kaˈorip ita nohatini hani? Pakayni tonini a likakawa, mikiˈokay ci Kristo mamalifok ita ko kihcod a sakaˈorip, ngaˈay padotoc madimadi to Kawas, pahatatanamayho kitaanan, ngaˈay ciepoc ko mitosilay a tayal. Roma i, padamaayho cingra kitaanan micaˈedong to ‘faelohay capeling,’ padama kitaanan milifok to pihayda ni Yihofa. (Ifiso 4:24) Ci Yis itini ka pasangaran no kaˈorip ita a tatokian mihadakay to ciepocay a sakayat. 2019 miheca kalifongan a tatokian, mikitira mihadakan ningra a sakayat malifokay ita ko adihayay a epoc. ˈAlomanay tamdaw no hekal cowaho ka fanaˈ sasamaan i, maharekayto ci Yis mihadak to ihkalay a sakayat midipot kitaanan. w22.07 12 fiedac 13-14 fatac

Palimoˈotay ci Yihofa to nolitengan a Israil micerid a pasifanaˈ to wawa, padama cangranan mafanaˈ Cingranan. (Limoˈot 6:6, 7) Itini nolitengan a Israil, to romiˈamiˈad adihayay ko toki no wama wina masasowal to wawa, padama cangranan palahad to olah ci Yihofaan. Tinakoen, o cecay Israil a kapah padama to wama paloma ato mipanay, o fafahiyan salikaka ningra padamaay to wina mitenoˈay, mitaˈis anca roma demak. To romiˈamiˈad adihayay ko mipalakan no wama wina a toki malacafay to wawa, toniya tatokian ngaˈayay masasowal cangra to adihayay a kalimlaan a demak. Tinakoen, malalengo cangra to tada ngaˈayay ci Yihofa, ato samanay ci Yihofa padama to paro no lomaˈ nangra anini. Anini itini adihayay a pala, o wama wina mimingay ko toki malacafay to wawa. Matayalay ko wama wina, micudaday ko wawa. Mihaenay, o wama wina papadeteng mikilim to toki ngaˈ ngaˈay masasowal to wawa.—Ifiso 5:15, 16. w22.05 28 fiedac 10-11 fatac

O roma waywayan pakidemay ko pisafelit to rikec no Kawas, o pakidemay a raraw. O cecay Krisciyang ano midemak to mahaenay a raraw, o papasayra ci Yihofaan a mitolon, micangacang to sasodod Ningra, o papasowalenho ko malohemay malitengay tonini a demak. (ˈOlic 32:5; Yakop 5:14) Mamidemak ko malohemay malitengay to maanan hani? Soˈlin edengan ci Yihofa ko iraay ko fadangalan pakayni sapatefoc ni Yis Kristo a misongilaˈ misodod to raraw no cecay tamdaw, kawra pafelian ni Yihofa ko malohemay malitengay to cecay ˈinorong, misaali cangranan mikitini safalod no Fangcalay Cudad a misawkit to mararaway tamdaw ngangaˈay materek i kasakopang hokira. (1 Korinto 5:12) Sapisawkitaw, adihayay ko hademak no malohemay malitengay, tinakoen o mamisongilaˈ cangra misimsim to laenoay salicay: Onini a tamdaw o padetengay a mararaw han? Mihalakaay cingra mihaen to demak han? Marariday cingra a mararaw, hanaca padotocay to cecay liyad han? Sakakaay i, iraay ko wacay to paihkalay to mikifalocoˈay cingra a pasasiyor? Iraay ko tahapinangan to maharekayto ci Yihofa a misodod cingranan han?—Dmak 3:19. w22.06 9 fiedac 4 fatac

Palimoˈotay ci Yis to nisawawaan ningra micangacang to moecelay. (Matay 5:6) O cecay tamdaw ano maolahay to soˈlinay kimad ato moecelay, wa ira ko ciˈicelay a kalim, sapidemakaw to matatodongay i pinengneng ni Yihofa, makapahay halo makoracay a demak. Maolahay kiso to soˈlinay kimad ato moecelay han? Maedeng hatiraayto. Maedeng ˈintehay kiso to misamangahay ato kihcod mararaway tatiihay a demak. (ˈOlic 119:128, 163) O misamangahay patalahkalay to mariˈangay a waywayan ni Satan onini mikowanay to hekal. (Yohani 8:44; 12:31) O cecay a patosokan ningra i, paorafay to fangcalay a ngangan no Kawas ci Yihofa. Mikitini i misafelitay a demak i Itin, ci Satan padadotocay a mitenak to mangah a sowal, mitongangan to Kawas ci Yihofaan. Sanay ko sowal ningra, ci Yihofa misatekeday cowa ka pisasoˈlin a Mikowanay, maˈidiay pafeli to ngaˈayay i tamdaw sanay. (Satapangan 3:1, 4, 5) Pakayniay ci Yihofaan a mangah ni Satan padadotocay a miwarak to falocoˈ ato ponoˈ no tamdaw. Ano caay ka olah ko tamdaw to soˈlinay kimad, o mamakayhid ni Satan cangra midemak to masakenakenaay cowa ka moecel ato tatiihay a demak.—Loma 1:25-31. w23.03 2 fiedac 3 fatac

Itini pisaˈicel iso miremo to tatiihay nanaman i, latekay miliyaway a mararaw ko demak. Anca, tona eca pakatoor kiso to patosokan, matoleday ko falocoˈ, sapisawadaw saan. Maanan ko papadama tisowanan padadotoc a mihadidi hani? O olah ci Yihofaan. O olah iso ci Yihofaan tada o masakalimlaan, o sangaˈayay a makapahay a capeling no miso. (Taneng 3:3-6) Ano tangongolay ko olah iso ci Yihofaan, o mamalaˈosi misiˈayaw to kihcod a sapalifet i nokaˈorip. Marariday somowal ko Fangcalay Cudad to madimadiay a olah ni Yihofa to sikawdan Ningra, tatodong i, tangongolay ko olah Ningra cangranan, cowa ko mamiliyas a misawad cangranan. Tona o miringiay kiso to Kawas a sangaˈen, ngangaˈay kiso samaan matira Cingranan patalahkal to hatiniay a olah hani? (Satapangan 1:26) Ngangaˈay kiso mikitini pipalahad to miakoˈiday falocoˈ a misatapang. (1 Tisalonika 5:18) To romiˈamiˈad ngaˈayay licayen ko niyah: “Samaanay ci Yihofa patalahkal to olah takowanan hani?” Dotoc itini satolon hadaken ko nano demak Ningra tisowanan, hanaca miakoˈid Cingranan, mihapinang to pakayniay ci Yihofa to kaolah tisowanan, mansa patado tisowanan mihaen ko pidemak. w23.03 12 fiedac 17-19 fatac

Mitawmecay ci Yis to olah, tano sidaˈitay a pakayraan mikayat toya 12 a tarokos. O maan ko mamananam ita hani? Aka nanengneng sa to midemakan no tao, pakayni to raraw ato dangoc no tao, sasinanoten ko niyah to samaanay ko piharateng no miso. Ano macangalan nanay kiso to demak no salikaka i, ngaˈayay licayen ko niyah: “Hano maketer kako tora midemakan ningra hani? Patalahkalay konini to iraay ko maanan a dangoc ako to raremoen ako han? Iraay ko maanan a kacarirawan ningra han? Soˈlinto ano iraay ko lalangian a maketer, ngangaˈay kako misodod cingranan, patalahkal to cowa pisateked a olah cingranan han?” Ano tawmecen ita ko olah micada to salikaka i, misawacayay konini to o soˈlinay a Krisciyang ko niyah. Ngangaˈay kita mikitini i taˈarawan ni Yis a minanam, mamisaˈicel kita cipinang to salikaka. (Taneng 20:5) Manaokaniw, cowa ko mamahaen kita ci Yisan mitaˈesel a minengneng to falocoˈ no tamdaw, kawra ngangaˈay kita misaˈicel patado to salikaka a miharateng, sododen ko dangoc nangra. (Ifiso 4:1, 2; 1 Pitiro 3:8) Ano cipinangay kita to lalengawan no salikaka i, mamadoloto mihaen to demak. w23.03 30 fiedac 14-16 fatac

Ano malifa ita ko kacalohan a sapaising a pakayraan i, sakadademakan ni Satan konini miroero kitaanan misafelit to sarikec no Kawas. O ising anca cowa pihakelong a paro no lomaˈ wa miroero kitaanan alatek, papicada kitaanan pacomod to remes, o roma tamdaw papicadaay kitanan micada to roma a misafelitay to safalod no Fangcalay Cudad a sapiadah a pakayraan. Cowa ka sakapatayaw kita, kawra mafanaˈay kita, soˈlinto mamalaˈeto ko ˈorip i, o olah ni Yihofa kitaanan cowa ko mamitolas. (Loma 8:37-39) Wa maharateng ni Yihofa ko mapatayayto a widang Ningra, itini pinengneng Ningra malecaday o maˈoripayho cangra. (Luka 20:37) Makalimay Cingra miliyaw patikol paˈorip cangranan. (Yopu 14:15) Soˈlinay haw i, pakayni ‘sapilifokaw ita to midaˈocay a ˈorip,’ maherekayto ci Yihofa mihadak to matekesay a sapiˈaca. (Yohani 3:16) Mafanaˈay kita, tangongolay ko olah ni Yihofa kitanan, ciharatengay kitanan. Mansa, ano pakidemay ko adada anca mamapatay i, cowa ko mamiliyas kita ci Yihofaan, ao papasayra Cingranan micangacang to sahinom, taneng ato ˈicel.—ˈOlic 41:3. w22.06 18 fiedac 16-17 fatac

Sowal no Fangcalay Cudad: ‘O mangodoay ci Yihofaan i, o satapangan no taneng, mafanaˈ to Safangcalay a Kawas iraay ko taneng.’ (Taneng 9:10) Mihaenay, o mamisaˈicel kita ‘mafanaˈ to Safangcalay a Kawas,’ cipinang to harateng ni Yihofa, hanaca mitoor to harateng Ningra a misaˈosi. Sapidangaraw tonini, o mamicekiw kita to Fangcalay Cudad ato mitepangan a cudad. Mihaen, wa irato ko soˈliˈlinay a taneng ita. (Taneng 2:5-7) Edengan ci Yihofa ko ngangaˈay pafeli kitaanan to soˈliˈlinay a taneng. (Loma 16:27) O Pipowaran no taneng Cingra, misamanay hani? Saka 1, o Misangaˈay a Tatapangan Cingra, ihkalay ko kafanaˈ Ningra to misangaˈan Ningra a maamaan. (ˈOlic 104:24) Saka 2, o kihcod a demak ni Yihofa patalahkalay to taneng. (Loma 11:33) Saka 3, o limoˈot ni Yihofa matomesay to taneng, pairaay to haepoc no mitengilay a tamdaw. (Taneng 2:10-12) Ano sapilifokaw kita to soˈliˈlinay a taneng, o mamicada tonini a taˈeneran a kimad, hanaca papikayat to soˈlinay kimad to pisaˈosi ato pidemak no mita. w22.10 19 fiedac 3-4 fatac

Mikitini Paˈarawan saka 12 fedengan, mapadikay ci Satan, cingra ato tatiihay coyoh mafahkolay tayni fafekang no sera. Mangolaway cingra, misadak to keter i tamdaw, mihaenay hato matomesay to pades konini a hekal. (Paˈarawan 12:9-12) Onini a sapairasol pakayni kitaanan iraay ko maanan a epoc? Maˈaraw ko mifekaday demak no hekal ato kalingad no tatiihay waywayan no tamdaw, mafanaˈayto kita mala Hongtiayto ci Yis. Mihaenay, maˈaraw ita ko tao misateked, awa ko olah, aka maketer kita. Haratengen, o waywayan nangra matatodongay to sapairasol no Fangcalay Cudad. Tomirengayto ko Hongti Kitakit! (ˈOlic 37:1) Mafanaˈay kita, pakayni kangatato no Armakiton, o pakayraan no hekal o mamalingad ko tatiih. (Marko 13:8; 2 Timoti 3:13) O sidaˈitay a Wama i kakarayan ci Yihofa padamaay kitaanan cipinang hano sasifod saan konini a hekal, coko miakoˈiday kiso Cingranan han? w22.07 3-4 fiedac 7-8 fatac

Ngaˈayay cangacangen ita ci Yihofa padama to salikaka mihadidi to adada, pades, lalood, sapalak ato romaroma pasangaray. O roma salikaka patafangay to niyah, mirienang to padamaay to tahapadesay a tayal, wa ngaˈay kita patado cangranan a mitolon. O kafanaˈan ita a salikaka tahasiˈayaway to mahaenay a pasangaray alatek, itini no tekedan pitolon ita ngaˈayay hadaken ko ngangan nangra. Cangacangen ita ci Yihofa padama cangranan itini pasangaray pakayraan padotoc a mihadidi, mihaen o paihkalay to soˈliˈlinay a olah to salikaka. O mikeriday i kasakopang faˈinayan a salikaka miakoˈiday to tao patado cangranan a mitolon, mikitini tonini a satolon milifok to taˈangayay a sapadama, mahaenay ko tarokos ci Pawlo. Pasowalan ni Pawlo ko salikaka: ‘Patadoen kako a micangacang, ho matatodong ko mihadakan ako a sowal, timolo milasil to ngaˈayay a lihaf.’ (Ifiso 6:19) Anini, itini kasakopang adihayay a mikeriday faˈinayan salikaka malalokay a patado to salikaka a matayal. Micangacang kita ci Yihofaan palemed cangranan, o paihkalay to maolahay kita cangranan. w22.07 23-24 fiedac 14-16 fatac

Cikafong ko sofitay sapidipotaw to fongoh caka madokaˈ no ˈada. Malalood ci Satanan i, mamidipot kita to ponoˈ no niyah, samanen ci Satan wa tano masakenakenaay a sakayhid ato mararaway a sasowalen miwarak to harateng no mita. Malecaday o kafong ngaˈayay midipot to fongoh no sofitay, o hatokel ita wa ngaˈay midipot to ponoˈ, mihaen wa ngaˈayto kita padadotoc madimadi ci Yihofaan. Ano ecato pisaareteng kita minengneng to sapafeli no Kawas a hatokel, patomesenho ko misatekeday a coos i ponoˈ no niyah, cowato ko mamisamacay micangacang to midaˈocay a ˈorip a sapalifon. Haratengen ko roma pakayraan nolitengan no Korinto a Krisciyang, soˈlin mikiˈokay ko Kawas to mapatayay a tamdaw iraay ko hatokel patikol maˈorip, kawra cowa to pakasoˈlin cangra tonini kalimlaan a sakiˈok no Kawas. (1 Korinto 15:12) Sanay ci Pawlo, awaay ko hatokel a tamdaw o aniniay aca a lipahak ko micangacangan. (1 Korinto 15:32) Anini, ˈalomanay tamdaw cowa to pakasoˈlin to sakiˈok no Kawas, samacay sanay to lawla anini. Kawra pakasoˈlinay kita, papafeli ci Yihofa kitanan to ˈodingaray a hatokel.w22.10 25-26 fiedac 8-9 fatac

Pakalalokay ci Yihofa tisowanan pasayra Cingraanan a mitolon. Mafanaˈay Cingra misiˈayaway kiso to maanan pasangaray, mikiˈokayho tisowanan, ano hacowato i, wa mitengil Cingra to sowal iso. Mahemekay Cingra mitengil to satolon no sikawdan Ningra. (Taneng 15:8) Ano matoˈolen kiso i, sasamaan mitolon hani? Mahecad ci Iliyaan, pasayra ci Yihofaan mifowah to nafalocoˈan. (ˈOlic 62:8) O kacalemceman iso a demak, ato nafalocoˈan iso eminen a pasowal ci Yihofa, hanaca micangacang Cingranan padama tisowanan miremo to masofaway a nafalocoˈan. Ngaˈayay cangacangen ci Yihofa pafeli tisowanan to timolo, ho ngaˈayto kiso pasowal. Ngaˈayho kiso micangacang Cingranan pafeli tisowanan to taneng, padama tisowanan damsay ato mikangodo a mitadtad to pihakelongan no niyah. (Luka 21:14, 15) Ano macariraw no masofaway a nafalocoˈan kiso i, ngaˈayay cangacangen ci Yihofa padama tisowanan mikilim to matenesay a Krisciyang masasowal, ngaˈayay cangacangen ci Yihofa padama tora mitengilay to sowal iso a tamdaw cipinang to nafalocoˈan iso. Nengnengen sasamaan Cingra pacaˈof to satolon iso, hanaca micadaho to sapadama no tao. Mihaen i, caayto ko mamatoˈol kiso. w22.08 10 fiedac 6 fatac

Caho ka halafin a tomireng ko kasakopang no Tisalonika i, o itiraay a salikaka micadaay to pakidemay a sapalak. O mariˈangay tamdaw ‘kidkid han nangra ko salikaka patayra i kakitaan no niyaroˈ.’ (Dmak 17:6) Haratengen hena, oniya faelohay malo Krisciyang a salikaka maedeng matalaway. Cowato ko fafanekfek cangra midoko ci Yihofaan alatek. Kawra cowa ka ciharateng ci Pawlo to mamafekad ko mahaenay a demak, pakasoˈlinay cingra onini a faelohay tomireng a kasakopang papadadotoc milifok to ngaˈayay a pidimokos. Pasowalan ni Pawlo ko Tisalonika a Krisciyang: ‘Saˈayawen niyam miocor ci Timoti tayra tamowanan. O salikaka niyam cingra . . . , ocoren niyam cingra tayra, o papatanektek to pakasoˈlin namo, mihinom tamowanan, patanektek tamowanan, ho eca pakayni tonini a pades ira ko malonayay a tamdaw.’ (1 Tisalonika 3:2, 3) Maˈaraway ni Timoti ci Pawlo to samaanay pakalalok to salikaka i Listra, samaanay ci Yihofa midama tonini a salikaka, mankora ngaˈayay ci Timoti pakalalok to faelohay Krisciyang i Tisalonika, padama cangranan pakasoˈlin salikoray no demak i, wa ira ko ngaˈayay a minaroˈan.—Dmak 14:8, 19-22; Hipray 12:2. w22.08 21 fiedac 4 fatac

1870 miheca, ci Loso ato romaroma tamdaw misatapangay micalep micekiw to Fangcalay Cudad. Sakafanaˈaw cangra o pikinafalah ni Yis to ˈorip iraay ko maanan a epoc, ato sasamaan miharateng to kapatay ni Yis. Samanen onini a Krisciyang itini ˈayaw no adihayay miheca misongilaˈay micekiw to Fangcalay Cudad, ato ira ko sapalemed ni Yihofa, hato cipinangay kita nohatini to milingatay to sapatefoc a soˈlinay kimad, mafanaˈ to pikinafalah ni Yis iraay ko maanan a tatodong i polong no tamdaw. (1 Yohani 2:1, 2) Mananamayho ita, sowal no Fangcalay Cudad o mihaydaan no Kawas a tamdaw iraay ko cowa ka lecad a hatokel—o romaroma tamdaw tatayra i kakarayan milifok to cowa ko mamapatay a ˈorip, masawalwalay a tamdaw wa itini fafekang no sera milayap to midaˈocay a ˈorip. Haratengen hakowaay ko kaolah ni Yihofa kitaanan, ato mikitini sapatefoc ni Yis mamilifok kita to hakowaay a epoc, mihaen mamatongal ko sapiingidaw ita ci Yihofaan. (1 Pitiro 3:18) Mihaenay makalimay kita malecad to isalakatay madimadiay a salikaka, mitahidang to romaroma tamdaw malacafay kitaanan midoedo to paihkalan ni Yis a pakayraan miharateng cingranan. w23.01 21 fiedac 6-7 fatac

Midemak ci Yis to mitosilay i fafekang no sera i, pasowalay to tamdaw to papaira ko Hongti Kitakit no Kawas to maanan a sapalemed. Onini milingatay to Hongti Kitakit a soˈlinay kimad, pakayni kitaanan tada masakalimlaan. Roma i, samanen patafangan ni Yis ko sapatefoc, hato ngaˈayay kita nohatini mala widang cingranan aci Yihofaan. Cowa ka hatini aca, o mihakelongay cingranan a tamdaw iraayho ko tokel tahadaˈoc maˈorip, hanaca pakaˈaraw to mapatayay a salawina patikol maˈorip. (Yohani 5:28, 29; Loma 6:23) Milifok kita to hatiniay a sapalemed, cowa ko nano ˈicel no niyah. O nano demak ni Yihofa aci Yis kitaanan, awaay ko sapatiko ita Cangranan. (Loma 5:8, 20, 21) Kawra wa ngaˈay kita pasayra Cangranan paihkal to piakoˈid no niyah. Sasamaan ko pidemak hani? Sakadademaken ita ko toki, ˈicel ato dafong no niyah midama to Hongti Kitakit no Kawas, tinakoen mirienang to patirengay no likakawa, ato midama to mitomadaway a tayal. w23.01 26 fiedac 3 fatac; 28 fiedac 5 fatac

O Hongti no Hongti Kitakit no Kawas mamikowan to polong a cikiw, midimokos to tamdaw i paro no kakarayan. Pafelian ni Yihofa ko 144,000 a tamdaw to ˈinorong! Malecad ci Yisan, o 144,000 a tamdaw mamala hongti ato saysi. (Paˈarawan 5:10) Itini Rikec ni Mosi, o saysi ciˈinorongay padama to tamdaw padadotoc tanektek ko tireng, ato padama cangranan ngaˈay ko kalalaˈed ato Kawas. Sowal no Fangcalay Cudad, o Rikec ni Mosi ‘o ˈadingo no makapahay limasmas noikor,’ mansa tatodong i, malacafayay ci Yisan mikowan a tamdaw mamitamorong tonini mikiriwiˈay a ˈinorong, o papadama to finawlan no Kawas mirenec to notirengan ato nofalocoˈan a saali. (Hipray 10:1) Nohatini cowa ka fanaˈ kita, onini a hongti ato saysi sasamaan masasowal to i fafekangay no sera a tamdaw. Kawra ngaˈayay kita pakasoˈlin, ano masamaanayto ko midemakan ni Yihofa a limasmas, itiniay i Lakoing a tamdaw mamilifok to sakayat.—Paˈarawan 21:3, 4. w22.12 11 fiedac 11-13 fatac

O cecay lalangian ita mitahidang to tamdaw mirienang to Piharatengan a Saˈopo i, makalimay kita toya sakinacecay mirienang a tamdaw ngaˈay mikitini i saˈopo minanam, ci Yihofa aci Yis pakayni kitaanan to polong a tamdaw misadakay to maanan. (Yohani 3:16) Makalimay kita cangranan pakayni manengnengay matengilay i Piharatengan a Saˈopo tangongol ko pitemer to falocoˈ, telocto sakacipinangaw to adihayay, salikor malo midokoayto ci Yihofaan a tamdaw. Mitahidangayho kita to pahanhanay to midokoay a demak a salikaka mirienang to Piharatengan a Saˈopo, samanen makalimay kita cangranan miharateng to kamayanay maolah ci Yihofa cangranan. Maˈaraw ita micada cangra to satahidang mirienang to Piharatengan a Saˈopo, tada mahemekay kita! Mirienang to Piharatengan a Saˈopo wa padama cangranan miharateng, midoko ci Yihofaan isalakat hakowaay ko kalipahak itiya. (ˈOlic 103:1-4) Ano micada anca manaˈay ko tamdaw, misarocoday kita palilam to satahidang, samanen mafanaˈay kita ciharatengay ci Yihofa to mirienangay a kahacecay tamdaw.—Luka 15:7; 1 Timoti 2:3, 4. w23.01 20 fiedac 1 fatac; 22-23 fiedac 9-11 fatac

ˈAyaw no mapatay toya dadaya, mikiriwiˈay ci Yis micangacang to kakarayan a Wama midipot to nisawawaan ningra. (Yohani 17:15, 20) Manaokaniw, midimokosay ci Yihofa to finawlan no Niyah, padotocay midimokos ato midipot cangraanan. Kawra, mafanaˈay ci Yis to nisawawaan ningra tatahacada to pakidemay sapalak ni Satan, mansa misaaliay cangra to sapadama ni Yihofa, ngaˈ macoˈay ko mariˈangay a saˈodis ni Satan. Anini, o hekal ni Satan taˈangayay ko saroero to soˈlinay Krisciyang. Mamalifa ita ko masakenakenaay a pasangar, patoleday to falocoˈ alatek, hanaca pasangar kita madimadi ci Yihofaan saan ko harateng. Kawra, awaay ko manan hakatalawan ita. Wa dimokosen ni Yihofa kita, mafanaˈay Cingra to masiˈayaway ita a kihcod pasangar, padadotocay padama kitanan. Ci Yihofa ‘minengnengay to mangodoay Cingranan a tamdaw . . . milidong to ˈorip nangra.’—ˈOlic 33:18-20. w22.08 8 fiedac 1-2 fatac

Mahemekay kita midofdof to sapalimoˈot ni Yis, samanen tada maolahay kita cingraanan. To mihecahecaan itini Piharatengan a Saˈopo ˈayaw ato ikor a pina lipay, sapaihkalaw to piakoˈid ci Yisan, mipalakay kita to toki misongilaˈ a mitolon, hanaca midotim to pikinafalah ningra to ˈorip pakayni kitanan o maanan ko tatodong. Sapisaadihayaw kita to mitosilay a tayal, mitahidang to ˈalomanay tamdaw malacafay kitanan mirienang tonini mikiriwiˈay a saˈopo. Roma i, misetekay kita to falocoˈ caka macona no maamaan a demak ko pirienang ita to Piharatengan a Saˈopo. Itini Piharatengan a Saˈopo matengilay ita ko cecay misalalangiay to Fangcalay Cudad a kimad, o mamisongilaˈ a mitadtad to adihayay salicay konini a kimad. Tinakoen, hano misaali ko tamdaw to sapatefoc? O pikinafalah no cecay tamdaw to ˈorip hano ngangaˈay masodod ko raraw no ˈalomanay tamdaw? O maanan ko mitaypiyawan no epang ato epah? Itini tonini a saˈopo o cima ko kakomaen to epang ato epah? (Luka 22:19, 20) Onini a kimad papadama kitaanan misongilaˈ a miharateng, itini i lakoing a nokaˈorip tada fangcalayto. (Isaya 35:5, 6; 65:17, 21-23) Mafanaˈ tonini a kimad tada o kalimlaan a sapalemed. w23.01 20 fiedac 2 fatac; 21 fiedac 4 fatac

Pakayni sakangaˈay ita milifok to tahadaˈocay a ˈorip, hai sanay ko Kawas patafang to ˈorip no kanonoˈan a wawa Ningra malo sapatefoc, patado kitaanan palasawad to raraw. (Matay 20:28) Onini o kalimlaan a demak to sapalaˈosiaw no Kawas to araaw Ningra. Sanay ko tarokos ci Pawlo mitadtad: ‘O patay pakayniay i cecay tamdaw ko sakaira, patikol maˈorip ko mapatayay papakayni i cecay tamdaw ko sakaira. Pakayni ci Ataman, mamapatay ko polong a tamdaw anini, pakayni ci Kristoan, papatikol maˈorip ko polong a tamdaw noikor.’ (1 Korinto 15:21, 22) Pasifanaˈan ni Yis ko nisawawaan micangacang to Hongti Kitakit no Kawas tayni ato palaˈosi to araaw no Kawas i fafekang no sera. (Matay 6:9, 10) O araaw no Kawas mahawpay o tamdaw aitini i fafekang no sera milayap to tahadaˈocay ˈorip. Sapalaˈosiaw tonini araaw, minilnilan ni Yihofa ci Yis malo Misiya Hongti no Hongti Kitakit, mipiliˈho i fafekang no sera to 144,000 a tamdaw tayra i kakarayan malacafay ci Yisan a matayal.—Paˈarawan 5:9, 10. w22.12 5 fiedac 11-12 fatac

Ano mapatay ko cecay kaolahan ita a tamdaw, maedeng o mamaˈilol kita cingranan. Satapang aca, maharateng ita ko ˈayawho no mapatay cingra a tatokian, tada masomaday kita alatek. ˈAyaw no mapatay cingra ano micadaayho to adihayay a roray, mamangalef ko adada no falocoˈ ita. Kawra ikorto, maharateng ko pipasifanaˈ ningra kitaanan a pina demak, anca maharateng ko pipakalalok ningra kitaanan, sapalipahakaw kitaanan a sowal, ato midemakan a pina a demak, wa palidlid sato kita a lipahak. Malecaday, maˈosiay ita ko Fangcalay Cudad ˈayaw no mamapatay ci Yis tada misemsemay cingra, pakayni toninian tada masomaday ko falocoˈ ita. ˈAyaw ato ikor no Piharatengan a Saˈopo, limasmasen ita ko toki miharateng hano mihaen a mikinafalah ci Yis. (1 Korinto 11:24, 25) Nikawrira, midotim to nano sowal ato nidemakan ningra a demak i, lipahakay ko falocoˈ ita. Maharateng to mimaanay cingra nohatini, ato dadademaken ningra pakayni kitaanan ano ikor i, makowaday ko falocoˈ ita. w23.01 26 fiedac 1-2 fatac

Mapatayto ci Yis i, tada masomaday ko nisawawaan ningra. Malahdawayto ko kanonoˈan a widang nangra, malahdawayho ko hatokel nangra. Ano ilalomaˈay nangra kiso itiya i, wa samaan ko falocoˈ iso hani? (Luka 24:17-21) Kawra patalahkalay ci Yis to tireng i kaˈayaw nangra, mipalak to toki padama cangranan cipinang to samaanay malaˈosi ko sapairasol no Fangcalay Cudad. Hanaca, pafelian ningra cangra to cecay masakalimlaan a tayal. (Luka 24:26, 27, 45-48) Ikor no 40 romiˈad, patikolayto ci Yis tayra i kakarayan. Itiya caayto ka masomad ko nisawawaan, ao lipahakayto ko falocoˈ nangra, samanen mafanaˈay to maˈoripayho ko Tapang nangra, papadama cangranan milahci to faelohay a ˈinorong. Tona mahemekay cangra, mansa padadotoc pakahemek ci Yihofaan. (Luka 24:52, 53; Dmak 5:42) Mitodong kita to nisawawaan ni Yis, o papaisalakaten i kaˈorip ko Hongti Kitakit no Kawas. Soˈliˈlin mamihadidi kita ngaˈ, ngaˈay padadotoc midoko ci Yihofaan, kawra mikiˈokay ci Yihofa, ano paisalakaten ita i kaˈorip ko Hongti Kitakit Ningra i, o papafelien Ningra kita to kadofahay a halifon.—Taneng 10:22. w23.01 30-31 fiedac 15-16 fatac

Cowa ka ciharateng kita mararaw to mahaenay ni Atam aci Ifaan a raraw. Ano padotoc kita mitongal to kafanaˈ ci Yihofaan, mamatongal ko kasemer to capeling Ningra, hanaca misaˈicel cipinang to harateng Ningra, mamatongal ko olah i Cingranan. Mihaen, cowato ko mamitoor kita to pasaripaˈan ni Atam aci Ifa. Haratengen ko tinakoan ni Apraham. Soˈliˈlinay cingra maolah ci Yihofaan, ano pasangaran nanay cingra cipinang to saˈosi ni Yihofa i, cowa ka pitowakang cingra, misaˈicelay mitongal to kafanaˈ ci Yihofaan. Tinakoen, mafanaˈ cingra to papalaˈafoen ni Yihofa ko Sotom ato Komora i, calemcemay to papatayen ni Yihofa ko moecelay a tamdaw ato tatiihay a tamdaw. Kawra o ‘Misawkitay to polong no hekal a Tatapangan’ cowa ko mamihaen to demak saan ko harateng ningra, orato mikangodoay a milicay ci Yihofaan to pina salicay. Mihadidiay ci Yihofa pacaˈof cingranan. Telocto, mahapinangay ni Apraham mikinsaay ci Yihofa to falocoˈ no kahacecay tamdaw, caay ka palecad sa mipatay to awaay ko raraw ato mararaway a tamdaw.—Satapangan 18:20-32. w22.08 28 fiedac 9-10 fatac

ˈAyaw no Kongyen 455 miheca, ikor no miliyaw patireng to lowil no Yirusalim ko ˈAˈideman ci Nihimiya, mamikilim to ngaˈayay tiˈeren a tamdaw mikowan to Yirusalim a niyaroˈ. O cecay mipiliˈan ni Nihimiya i, o ˈAˈideman ci Hananiya. Sowal no Fangcalay Cudad cingra ‘o ngaˈayay tiˈeren, mikikakaay to ˈalomanay tamdaw a mikangodo to Kawas.’ (Nihimiya 7:2) Misongilaˈay ci Hananiya a midemak to ˈinorong, samanen maolahay cingra ci Yihofaan, matalaway eca ka hemek ci Yihofa. Itini katayal ita ci Yihofaan i, ano ira ko mahaenay a waywayan, o mamalo ngaˈayay tiˈeren a tamdaw. Ci Tikikus o ngaˈayay a taˈarawan, o pakasoˈlinan no tarokos ci Pawlo a ngaˈayay cafay cingra. Mitadiˈecay ci Pawlo to sapadama ni Tikikus, somowalayho ci Tikikusan ‘o madimadiay a sikawdan no tapang.’ (Ifiso 6:21, 22) Cowa ko patorod aca ni Pawlo ci Tikikusan pafeli to tikami to Ifisoay ato Kolosayay a salikaka, miocorayho cingranan pakalalok ato mihinom cangranan. Anini iraay ko ˈalomanay faˈinayan salikaka citatodongay midimokos to saali ita i nofalocoˈan, mahecaday cangra ci Tikikusan madimadiay ngaˈayay tiˈeren.—Kolosay 4:7-9. w22.09 9-10 fiedac 5-6 fatac

Ci Yosif malifaay ko madadotocay pakidemay sapalifet i lalomaˈ no 13 miheca. Itini mahaenay pakayraan, na mamadolo ci Yosif misatapang cisasa to soˈlinay maolah ci Yihofa cingranan hokira, anca itini pisaalian ningra a tatokian mifalahan ni Yihofa cingra saan miharateng. Kawra cowa ka ˈinteh ko falocoˈ ni Yosif, rihadayay cingra, padotocay talipaˈelal. Ikor iraay ko toki ningra miˈodis to kakakaka, kawra cowa pihaen ko demak, ao tano ciolahay falocoˈ micada cangranan, misododay cangranan. (Satapangan 45:4, 5) Ngaˈay ci Yosif mihaen to demak samanen ihkalay ko sapisimsim ningra a inaneng. Cowa ka haharateng saan to pasangaray no niyah, o kalimlaan ko minengnengan ningra, o araaw ni Yihofa. (Satapangan 50:19-21) Mananamay ita ko maanan hani? Ano ira ko salikaka midokaˈay tisowanan, aka ˈinteh ci Yihofaan, aka piharateng to mifalahanto Ningra kiso. Songilaˈen miharateng samanay ci Yihofa padotoc a padama tisowanan mihadidi to sapalifet, pairaenho ko olah misodod to tao. w22.11 21 fiedac 4 fatac

O maˈaraway no pairasolay ci Taniil a mapolosi patalahkalay, iraay ko saˈakawangay a fadangalan ni Yihofa. Salakat maˈaraway ni Taniil ko sepat taˈangayay a ˈaˈadopen, mitaypiyaway camira to pina ciˈicelay mikowanay no hekal, o Papilon, Mitiya-Pirsiya, Kirisiya, ato Loma ato mikitiniay i Loma masadak a Ikok ato Padaka Ciˈicelay Mikowanay to Hekal. (Taniil 7:1-3, 17) Ikor, maˈaraway ni Taniil maroˈay ci Yihofa itini kakarayan a misawkit. (Taniil 7:9, 10) Tikolen no Kawas a miala ko sapikowan a fadangalan no polong a sifo, ikor pafelien ko roma citatodongay, ikakaay ko ˈicel a tamdaw. O cima ko pafelian ni Yihofa to sapikowan a fadangalan hani? Salakat i, o ‘cecay malecaday o wawa no tamdaw,’ o ci Yis Kristo. Dotoc i, o ‘fangcalay finawlan no Satadamaanay ko Saaroˈan,’ oyaan 144,000 tamdaw, wa tahadaˈoc cangra mala hongti, ‘tahadaˈoc cowa ko mamafalic.’ (Taniil 7:13, 14, 18) Mahapinangay o ‘Satadamaanay ko Saaroˈan’ ni Yihofa. O maˈaraway ni Taniil i mapolosi a demak misawacayay to nano sowal ningra i salakat. Sanay cingra ‘i kakarayanay a Kawas’ ngaˈayay ‘palasawad to hongti patireng to hongti.’—Taniil 2:19-21. w22.10 14-15 fiedac 9-11 fatac