Saka 4 Folad

Ngaˈayay licayen ita ko niyah: “Ano macada ita ko saparikec i, wa samaan ko harateng ako hani? Wa tangsol kako mihayi to raraw, anca paˈading to niyah hokira? Wa tangsol kako miroroh to tao han?” Ano maˈaraw iso ko taˈarawan no madimadiay tamdaw i Fangcalay Cudad i, ngaˈayay haratengen: “Samaanay cangra misiˈayaw to mahaenay a demak hani?” Minengneng kiso to nalifetan no kahacecay tamdaw i, ngaˈayay miharateng: “Wa ngaˈay kako samaan mitodong cingranan hani?” Itini tatihiay ita ˈalomanay a salikaka, ano kaemangayto anca matoˈasay, adihayay ko nananamen no mita. Haratengen itini kasakopang iso, o cima faˈinayan salikaka anca fafahiyan salikaka mihadidiay to sapalifet, misaˈicelay mitawmec to madimadi hani? Misiˈayaway cingra to saroero no cafacafay, pisafelit no paro no lomaˈ anca tatiihay ko tireng alatek. Itini i cingranan maˈaraway iso ko ngaˈayay a capeling, o mahaenay a capeling nao miharatengay kiso a palahad han? Misongilaˈ kiso miharateng to taˈarawan ningra, o mamananam ko ngaˈayay a pakayraan miremo to sapalifet iso alatek. Itini tatihi ita ira ko hatiniay a taˈarawan no pakasoˈlin, tada mamiakoˈid kita ci Yihofaan!—Hipray 13:7. w22.04 13 fiedac 13-14 fatac

Ano tahalifa kita to pasangaray i, maedeng tada miakoˈiday to sidaˈitay a malohemay malitengay i kasakopang mipalak to toki mitengil to sowal ita ato mihinom kitanan. Ano misikay kita to pacekiwan misaali to sapadama i, o cecay kadofahay ko nalifetan a misakafahay mirienang to pipacekiw, pafeli kitanan to pina sapaini, maedeng tada lipahakay kita. Tada mahemekay konini salikaka itini misaali kita to sapadama i, padama kitanan. Ano misaˈicel kita patafang to niyah matayal saki salikaka, mamitinako to hatiniay a lipahak. Ano makalimay kiso sapitongalaw to tayal saki Yihofaan ato salikaka, sasamaan palaˈosi to patosokan hani? O patirengan ita a patosokan aka maapoh. Tinakoen, o patirengan iso a patosokan ano edengan o “sapitongalaw kako to tayal saki kasakopang” ano saan i, papasangar kiso mafanaˈ to sasamaan palaˈosi toniya patosokan, papasangar mihapinang to malaˈosiay ko patosokan hokira. Mihaenay, ihkalen ko patosokan. Ngaˈay tiliden iso ko patosokan ato sasamaan kiso a midemak. w22.04 25 fiedac 12-13 fatac

Anini, misaˈopoay ci Yihofa to ‘taˈangayay ˈopo a tamdaw,’ hanaca pahatatanam cangranan, ho ngaˈay cangra malo finawlan no Hongti Kitakit Ningra. (Paˈarawan 7:9, 10) Soˈlin maˈoripay cangra i matomesay ko kaciˈangian ato malalooday a hekal, kawra misaˈicelay cangra palahdaw to kihcod a ˈinteh, caay ka lecad to romaroma tamdaw pakayni i kitakit, kasafinacadan ato tekedan a ˈinteh a maliwasak cangra. Itini i sapatinako a tatodong pala kangkanganto nangra ko fonos. (Mika 4:3) O lalood no hekal ˈalomanay ko mapatayay a tamdaw, kawra onini taˈangayay ˈopo a tamdaw cowa pirienang tonini a lalood, misaˈicelayho padama to tamdaw mafanaˈ to Kawas ato araaw Ningra, paira to toki no tamdaw milifok to ‘soˈliˈlinay a ˈorip.’ (1 Timoti 6:19) Pakayni sapidopoaw to Hongti Kitakit no Kawas, alatek tahasiˈayaway cangra to pisafelit no paro no lomaˈ anca malahdaway ko sakaˈorip, kawra midimokosan ni Yihofa cangra, awaay ko kacangoˈotan nangra. (Matay 6:25, 30-33; Luka 18:29, 30) Onini a demak pakasoˈlinen ita, o Hongti Kitakit no Kawas o soˈlinay, hanaca wa padadotocen no Kawas pakayni tonini Hongti Kitakit palaˈosi to araaw Ningra. w22.12 6 fiedac 13 fatac

Mahererek ko 1,000 miheca pikowan i, polong a tamdaw i fafekang no sera patikolayto a malefot, cowato ko mamafiyor no mirocokan ci Ataman a raraw. (Loma 5:12) Itiya masongilaˈayto a mapalahdaw ko raraw, polong a tamdaw patikolayto malefot, itini tonini a tatodong, ‘maˈoripayto’ cangra maemin. (Paˈarawan 20:5) Mafanaˈay kita, soˈlin micadaay ci Yis to masakenaay a sapalifet ni Satan, kamayan mitafo to madimadiay. Kawra, o kahacecay malefotay a tamdaw wa makahi mihaen to demak han? Itini mahererek ko pikowan to 1,000 miheca i, o papasadaken ci Satan itini awaay ko paraˈ a ofang. Itiya, polong i fafekangay no sera a tamdaw o tatahalifa to salikoray a sapalifet, o kahacecay a tamdaw o papaihkal to makahiyay ko niyah madimadi to Kawas hokira. (Paˈarawan 20:7) Oya madimadiay a tamdaw mamilifok to midaˈocay a ˈorip ato soˈliˈlinay a pasalat, kawra o mitowakangay a tamdaw mamasongilaˈ a mapalaˈafo.—Loma 8:21; Paˈarawan 20:8-10. w22.05 19 fiedac 18-19 fatac

Pakalalokay ci Satan to Yutaya tamdaw ato Loma a tamdaw mipatay to Wawa no Kawas, onini a sapairasol mamatatodongto. (Luka 23:13, 20-24) Malecad madokaˈ ko satenok no waˈay no cecay tamdaw i, caayto ka ngaˈay romakat to cecay a liyad, o patay ni Yis malecaday palahdaway to cecay a liyad awa ko ˈicel a dademak, hanaca itini i patademan maedeng toloay a romiˈad. (Matay 16:21) Mamatatodong ko sapairasol no Satapangan 3:15, cowa ko tatahadaˈoc ci Yis materek i patademan. Misamaanay hani? Mikitini tonini sapairasol, o teloteloc no fafahiyan mamipesiˈ to fongoh no ˈoner, tatodong nonini o dokaˈ nonini a teloteloc wa kaliki a maadah. Soˈlinayto a mahaen, mapatay ci Yis saka tolo a romiˈad, mapatikolayto cingra maˈorip, malo caay to kapatay ˈadingo a tireng. Maraod ko misaˈosian no Kawas a tatokian, wa songilaˈen ni Yis palaˈafo ci Satan. (Hipray 2:14) Ora 144,000 tamdaw wa mikalacafay ci Yisan palaˈafo to teloteloc no ˈoner, oya kihcod a ˈada no Kawas, ho caayto ka ngaˈay cangra mipades to tamdaw.—Paˈarawan 17:14; 20:4, 10. w22.07 16 fiedac 11-12 fatac

O wama wina padamaen ko wawa micawmaˈ to ngaˈayay a widang. Ihkalay ko sowal no Fangcalay Cudad, o widang iraay ko ngaˈayay anca tatiihay a pifiyor kitaanan. Mafanaˈay kiso to widang no wawa han? Ngaˈay kiso midemak to maanan padama to wawa micawmaˈ to maolahay ci Yihofaan a tamdaw malo widang han? (1 Korinto 15:33) O cecay pakayraan i, tahidangen ko maolahay ci Yihofaan a salikaka mirienang to pakalomaˈay a demak namo. (ˈOlic 119:63) O cecay salikaka ci Toni sanay: “Adihayay mihecaan, kako ato fafahi marariday mitahidang to cowa ka lecad ko mihecaan ato lalengawan a salikaka tayni i lomaˈ a komaen, anca mirienang to pakalomaˈay a pidoko niyam. Mihaen ngaˈay kami micalep mafanaˈ to ˈalomanay maolahay ci Yihofaan, lipahakay midoko Cingranan a salikaka. O nalifetan nangra, paihkalay to fanekfekay a falocoˈ ato kinafalahay harateng tangongolay ko pifiyor to wawa no niyam, padama to wawa matongal ko piingid ci Yihofaan.” w22.05 29-30 fiedac 14-15 fatac

Ano masasiˈayaw ko malohemay malitengay a masasowal to mararaway a tamdaw i, o patosokan nangra o sapahecadaw to i kakarayan ko misaˈosian. O malohemay malitengay misongilaˈ midemak toniya ˈinorong, wa samaan palemed to kasakopang hani? O kasakopang wa ngaˈay milifok to sadipot, samanen caay kakahi pasasiyor a tamdaw cowa kangaˈay materek i kasakopang mipalak to kalimlaan a siri ni Yihofa. (1 Korinto 5:6, 7, 11-13; Titus 3:10, 11) O malohemay malitengay mihaen ko demak wa ngaˈay padama to mararaway a tamdaw pasasiyor, milifok to sasodod ni Yihofa. (Luka 5:32) Patado ko malohemay malitengay to mararaway tamdaw a mitolon, micangacang ci Yihofaan padama cingranan ‘patikol a tanektek.’ (Yakop 5:15) Ano masasiˈayaw a masasowal ko malohemay malitengay to mararaway tamdaw i, mahapinang to cowa pasasiyor konini a tamdaw, o fafalahen cingra. Kawra, ikorto ano talipaˈelalay konini a tamdaw, soˈliˈlin a pasasiyor hanaca patatikol, o mamakahi ci Yihofa a misodod cingranan. (Luka 15:17-24) Soˈlin pakidemay ko raraw ningra, o sasidaˈit ko Kawas cingranan.—2 Rayray 33:9, 12, 13; 1 Timoti 1:15. w22.06 9 fiedac 5-6 fatac

Itini i sapadama ni Yihofa, paro no kakarayan a salikaka maremoayto ko masakenakenaay a pasangar, malaˈosiay ko picoˈay ci Akomaan. (1 Pitiro 5:9) Wa madangar iso! Caka halafin, wa ocoren ni Yihofa ci Yis ato cafay ni Yis mala hongti a tamdaw ‘palahdaw to kihcod a midemakan ni Satan.’ (1 Yohani 3:8) Ikor itiniay i fafekang no sera a finawlan no Kawas ‘cowato ko caciˈangi, cowa ko mamacekid.’ (Isaya 54:14; Mika 4:4) Kawra itini i ˈayaw norira, o kakamayan kita misaˈicel milowid to kaciˈangi. O papadadotoc kita paˈicel to pakasoˈlinay falocoˈ, pakasoˈlin to maolahay ci Yihofa kitanan, o mamidipot kitaanan. Mamicerid kita midotim ato milengo to samaanay ci Yihofa midipot to iti:yaayho madimadiay sikawdan Ningra, mihaen o pakasoˈlinay falocoˈ ita wa matongal matongal ko katanektek. Haharatengen ita na samaanay ci Yihofa padama kitanan misiˈayaw to masakenakenaay a pasangar. Tadiˈecen ko sapadama ni Yihofa, o ngangaˈay malowid ita ko kaciˈangi!—ˈOlic 34:4. w22.06 19 fiedac 19-20 fatac

‘O tano maradan ato ditaˈan sangaˈen a ooˈ no taˈangayay faco’ mitaypiyaway to ciˈicelay kitakit masadakayto konini. Itini Saka Cecay Lalood no Hekal, makakadep ko Ikok ato Padaka i, masadakayto konini a ciˈicelay kitakit. O matiihay ni Nipukatnicar taˈangayay faco patalahkalay to tosa a demak, padama kitaanan mafanaˈ onini a ciˈicelay kitakit cowa ka lecad to salakatay. Salakat, cowa ka lecad to romaroma no taˈangayay faco, mitaypiyaway to Ikok ato Padaka Ciˈicelay Mikowanay no Hekal a ooˈ cowa ko tano ekiman ato linkim a sangaˈen, ao tano maradan ato ditaˈ palamlaman a misangaˈ. O ditaˈ mitaypiyaway to ‘teloteloc no tamdaw,’ o kalo a tamdaw. (Taniil 2:43 ato roma pihongyak.) Anini ihkalay mahapinang ita, pakayniay i pisingkiw no tamdaw, fadangalan no tamdaw, mitowakangay a demak ato kasakapot no maomahay taˈangayay ko pifiyor, soˈlinay milowan to ˈicel nonini ciˈicelay mikowanay no hekal, hato pasangaray konini a ciˈicelay mikowanay a midemak to mihalakaan no niyah. w22.07 4-5 fiedac 9-10 fatac

Ano samisimisiay ko harateng iso to mamicada to paputisem hokira, sasongilaˈen iso a miharateng: “O mananho ko mitalaan ako hani?” (Dmak 8:36) O pidemak ni Yis to araaw no kakarayan Wama patinakoan to kakaenen. Misamaanay hani? Samanen ciepocay kitaanan ko kakaenen. Mafanaˈay ci Yis, ano o mananto ko saali ni Yihofa kitaanan, sahtoay ciepocay kitaanan. O mamidokaˈ kitaanan a demak, cowa pisaali ci Yihofa papidemak kitaanan. O araaw ni Yihofa tisowanan mahawpay ko mamicada kiso to paputisem, ngaˈayay pakasoˈlinen iso, mitengil tonini a sapalimoˈot o sakaciepoc tisowanan. (Dmak 2:38) Ano ira ko mipakaenay tisowanan to saˈaredetay a kakaenen i, cowa ko sasamisimisi kiso. Nohatini, sapicadaaw to paputisem a toki itiniayto i kaˈayaw iso, o mananho ko sasamisimisien iso hani? O mananho ko tatalaen iso hani? “Cowaho ka herek kako misaday.” Wa saan ko sowal no ˈalomanay tamdaw alatek. Soˈlinayto, patafang ci Yihofaan to hakelong no ˈorip a micada to paputisem, tada o masakalimlaan a saˈosi i nokaˈorip iso. Mankora mamisongilaˈ kiso a misimsim, mipalak to toki ato ˈicel misaday to sapicadaaw to paputisem. w23.03 7 fiedac 18-20 fatac

Tano fangcalay saocor ko Kawas minilnil ci Yisan ikor, ci Yis malo sakakaayto a teloteloc no fafahiyan. Miliyaw ci Yis patikol maˈorip ikor, ‘pafelianho no Kawas cingra to ˈdil ato sakatadamaanay a tamohong,’ mapafeliay to cingra to ‘i kakarayan i seraay a fadangalan,’ sakaira no ˈicel ningra ‘palaˈafo to kihcod midemakan ni Akoma.’ (Hipray 2:7; Matay 28:18; 1 Yohani 3:8) O teloteloc no fafahiyan iraayho ko romaroma a tamdaw, mikitini i nisowalan no tarokos ci Pawlo ngaˈay mahapinang ita konini a tamdaw o cima. O nisowalan ni Pawlo oya micadaay to fangcalay saocor manilnilay a Krisciyang, ilalomaˈ nangra iraay ko Yutaya tamdaw, iraay ko ˈAlafang a tamdaw. Sowal ningra: ‘Ano ni Kristo to kamo i, o telocto ni Apraham, o miketonan to mamicada to hafay a tamdaw.’ (Kalatiya 3:28, 29) Tano fangcalay saocor a minilnil ci Yihofa to cecay Krisciyang, onini a Krisciyang malo telotelocayto no fafahiyan a tamdaw. Mihaenay, o teloteloc no fafahiyan mahawpay ci Yis Kristo ato kalacafayay cingranan mala hongti a 144,000 a tamdaw. (Paˈarawan 14:1) Cangra itini i noharatengan ato waywayan a pakayraan tada malecaday to i kakarayan a Wama nangra ci Yihofaan. w22.07 16 fiedac 8-9 fatac

Itini salikoray a romiˈad, o mamalifa ita ko masakenakenaay a sapalifet. (2 Timoti 3:1) Toniya tatokian i, maedeng macariraway kita. Ano tatootoor sa mifekad ko pasangaray, anca mamiremo kita to pina a sapalifet i kahecadan a toki, cato ka tomeseng kita alatek. Kawra haratengen, padadotocay ci Yihofa midimokos kitaanan, mitiˈer to sapadama Ningra, wa ira ko pakasoˈlinay falocoˈ ita milowid to masakenakenaay a sapalifet. Nengnengen samaanay padama ci Yihofa to madimadiay a Yopuan. I apotoˈay a tatokian, tatootoor sanay ko malifaay ni Yopu a sapalifet. Ilalomaˈ no cecay romiˈad, maˈafasay ko ˈaˈadopen, mipatayan ko koli, ano kanonoˈanto a wawa ningra mipatayan maemin. (Yopu 1:13-19) Caho ka fasaw ko somad ningra, madengaay haca no katalawan a adada. Miedefayto ko dokaˈ i tireng ningra, tada pakidemay ko pisemsem. (Yopu 2:7) Padadotocay ci Yihofa midimokos ci Yopuan. Samanen tada maolahay ci Yihofa ci Yopuan, mansa pafeliay to kihcod a misaalian ningra, padama cingranan malaˈosi ko pihadidi to sapalifet. w22.08 11 fiedac 8-10 fatac

Micada to sapirikec pasemsemay kitaanan alatek, cowa ka sadafdaf wa saan miharateng, anca pakidemay ko pakayraan nonini pirikec saan miharateng. Telocto, wa misakahmaw to cecay kalimlaan a demak, onini i pakayniay ci Yihofa i kaolah kitaanan mansa mirikec kitaanan. (Hipray 12:5, 11) Micada to sapirikec, hanaca midemak to kalimlaan a kafalic. Ci Yis cowa ka kinacecay aca itini ˈaˈayaw no romaroma tarokos misalof ci Pitiroan, maedeng pakangodoay ci Pitiroan konini. (Marko 8:33; Luka 22:31-34) Kawra, padotocay ci Pitiro madimadi ci Yisan. Micadaan ningra ko sapirikec, mikitini kararawan minanam to sapasifanaˈ. Mihaenay palifonan ni Yihofa cingra, patorod to karetengay ˈinorong cingranan. (Yohani 21:15-17; Dmak 10:24-33; 1 Pitiro 1:1) Ikor no micada to sapirikec i, eca ka pakidem ko piharateng ita to papisingan no niyah, ao micada to sasalof, hanaca midemak to kalimlaan a kafalic, o ngangaˈay paira to epoc no niyah ato tao. Ano mihaen, maedeng o mamacakat kita, matongal ko pidemak ci Yihofaan ato salikaka. w22.11 21-22 fiedac 6-7 fatac

Mafanaˈay ci Apraham ci Yihofa cowa ko mamidemak to mariˈangay anca cowa ka moecel a demak. Roma i, na mikiˈokay ci Yihofa, ci Isak mamalo lalitengan no cecay finacadan, kawra tiya papatafang ci Apraham ci Isakan a tatokian i, awaayho ko teloteloc ni Isak. Mikitini to nisowalan no tarokos ci Pawlo, o harateng ni Apraham itiya, soˈlinto mapatay ci Isak, papatikolen ni Yihofa cingra paˈorip sanay. (Hipray 11:17-19) Tada maolahay ci Apraham ci Yihofaan, tanektekay ko pakasoˈlin to moecelay ko demak no kakarayan Wama, mihaenay soˈlinto pasangaray konini a ˈinorong, kamayan ci Apraham pakasoˈlin a midofdof ci Yihofaan. (Satapangan 22:1-12) Sasamaan kita pasayra ci Aprahaman minanam hani? Mamalecad kita cingranan padadotoc mitongal to kafanaˈ ci Yihofaan. Mihaen, wa matongal ko piingid ita ci Yihofaan, matongal ko kaolah Cingranan. (ˈOlic 73:28) Wa mapahatatanamho ita ko makapahay falocoˈ no niyah, midemak to malecaday to pinengneng ni Yihofa a saˈosi. (Hipray 5:14) Mihaenay i, ano ira ko tamdaw mikayhid kitanan midemak to mararaway a demak, wa tangsol kita minaˈay. Cowa ka ciharateng kita sapidemakaw to pakasomaday to kakarayanay a Wama a demak, mipalak to kalalaˈed ita Cingranan. w22.08 28-29 fiedac 11-12 fatac

Tiya minokay ci Pawlo aci Parnapas i Listra, Ikonium ato Antiok i, ‘itiniay i kasakopakopang minilnil to malohemay malitengay.’ (Dmak 14:21-23) Onini manilnilay a tamdaw maedeng taˈangayay ko sahinom to salikaka i kasakopang, aniniay a malohemay malitengay malecaday. Malohemay malitengay, itini tatihi namo iraay ko romaroma salikaka to misaaliay ‘pakatengil to ngaˈayay sowal.’ Ka pisinanot to saali nangra, micerid a pakalalok cangranan. Papisinanotan ni Pawlo ko salikaka, iraay ko ‘taˈangayay a ˈopo malecaday o toˈem a misawacayay tamdaw,’ pakayni pitiˈer to ˈicel no Kawas malaˈosiay a mihadidi to masakenakenaay a pasangaray. (Hipray 12:1) Mafanaˈay ci Pawlo o nalifetan nonini madimadiay sikawdan wa padama to salikaka ira ko timolo, padadotoc misamacay to harateng ‘i niyaroˈ no soˈlinay Kawas.’ (Hipray 12:22) Malecaday anini, maasip ita to samaanay ci Yihofa padama ci Kitiyonan, ci Parak, ci Tafiti, ci Samuil ato romaroma madimadiay sikawdan i, macadaay ko taˈangayay a sapakalalok.—Hipray 11:32-35. w22.08 21-22 fiedac 5-6 fatac

O patikolay maˈorip a tamdaw wa mikitini i masamaanay a ‘waywayan’ micada to sasawkit hani? Oya iˈayawayho no mapatay a waywayan han? Cowa. Haratengen, iˈayawayho no mapatay a raraw nangra masododayto maemin. Hanaca, o misowalan itini a ‘waywayan’ cowa ko iˈayawayho no mapatay a midemakan nangra ko mitoroˈan, ao itiniayto i faelohay hekal micadaan nangra a sapasifanaˈ ikor midemakan nangra a demak ko mitoroˈan. Ano oyato madimadiay a Nowaan, Samuil, Tafiti aci Taniil oha mamafanaˈ cangra ci Yis Kristoan, hanaca pakayni i mipatafangan ningra a sapatefoc papaihkal to pakasoˈlin, onini a ‘cowa ka moecel a tamdaw’ mikikakaay ko saali mihaen to demak. O minaˈayay tonini kalimlaan a toki wa ira ko masamaanay a teloc hani? O sowal itini i Paˈarawan 20:15: ‘O cima cowa ka tilid ko ngangan i sakaˈorip a cudad, o mamafahkol i marengrengay ko namal a fanaw.’ O mahaenay a tamdaw wa masongilaˈ, tahadaˈoc a malaˈafo. Hanaca, o mamisarocod kita, matilid ko ngangan no niyah i sakaˈorip a cudad, hanaca padadotoc a materek ilalomaˈ. w22.09 19 fiedac 17-19 fatac

Pakayni i sakatanoktok no tireng ato sapaising a demakan, o kahacecay tamdaw mamitoor to mapahatatanamayto no Fangcalay Cudad a makapahay falocoˈ no niyah a misaˈosi to demak. (1 Timoti 3:9) Ano mamisaˈosi ato malalengo kita to tao pakayni tonini a demak i, haratengen ko safalod no Filipi 4:5: ‘Pahapinangen ko tao to mafanaˈay kiso patatodong a pacaˈi.’ Ano mafanaˈ kita pacaˈi i, cowato ko papakinali ciharateng to tireng no niyah. Soˈlinto caay ka lecad ko pisaˈosi no salikaka tono mita, kakamayan maolah mikangodo kita cangranan. (Loma 14:10-12) Songilaˈen ita midipot ko ˈorip, misarocod dademak saki Yihofaan, o paihkalay to miakoˈiday kita to pafeliay to ˈorip a Yihofaan. (Paˈarawan 4:11) Nohatini misiˈayawayho kita to adada ato pades, kawra cowa ko araaw no Misangaˈay Tatapangan a mahaen ko kaˈorip ita. Cato ka halafin, papafelien Ningra kita to midaˈocay a ˈorip, caayto ko mamaroray ato mamapatay kita. (Paˈarawan 21:4) ˈAyaw no hakairaan nora romiˈad, maˈoripho kita nohatini matayal saki sidaˈitay a Wama ci Yihofaan, tada kalipahakanto! w23.02 25 fiedac 17-18 fatac

Paihkalay ci Yihofa to iraay ko saˈakawangay a fadangalan no Niyah, mataˈlifay ko polong ‘i fafekangay cifadangalay a tamdaw.’ (Loma 13:1) Nengnengen ko tolo tinakoan. Ci Falaw no Icip palakoliay to finawlan ni Yihofa, caay kakahi mitedal cangranan. Kawra milidongan ni Yihofa cangra, hanaca mipatay ci Falawan i Kahngangay a Riyar. (Kasadakan 14:26-28; ˈOlic 136:15) Hongti no Papilon ci Pilsacar ‘misatakaraway, pakararaw to kakarayan a Tapang.’ Patangidafay cingra, ‘pakahemek to tano linkiman ato fodawan marad, kilang fakeloh misangaˈan a kawas,’ cowa pakahemek ci Yihofaan. (Taniil 5:22, 23) Mitefocan ni Yihofa konini a misatakaraway a tamdaw. ‘Toya dadaya,’ mipatayan ci Pilsacar, o kitakit ningra maˈafasay no Mitiya ato Pirsiya a tamdaw. (Taniil 5:30, 31) Mikowanay to Palestan ci Hiroti Akripa ikor no mipatay to tarokos ci Yakopan, milepelayho to tarokos ci Pitiroan, hanaca sapipatayaw ci Pitiroan, kawra cowa ka palaˈosien ni Yihofa ci Hiroti. Ikor, misetiˈan no coyoh ni Yihofa cingra, mapatayayto cingra.—Dmak 12:1-5, 21-23. w22.10 15 fiedac 12 fatac

Maˈosi ita to samaanay ci Yihofa midimokos to nolitengan madimadiay a sikawdan Ningra, wa matongal ko pakasoˈlin to mamalaˈosi ko hatokel no niyah. Sowal no Fangcalay Cudad ‘sahtoay o sapasifanaˈ kitanan a tiliden, ho ngaˈay kita pakayni pihadidi, ato sahinom no Fangcalay Cudad, ngaˈay ira ko hatokel.’ (Loma 15:4) Mamidotim kita to na samaanay ci Yihofa palaˈosi to sakiˈok no Niyah. Haratengen ko nano demak ni Yihofa ci Aprahaman aci Saraan. Tada matoˈasayto cangra, cowato ka ngaˈay ciwawa, kawra mikiˈokay ko Kawas cangranan to mamahofoc to cecay faˈinayan wawa. (Satapangan 18:10) Samaanay ko harateng ni Apraham? Sanay ko Fangcalay Cudad, ‘pakasoˈlinay cingra to mala wama no ˈalomanay kitakit ko niyah.’ (Loma 4:18) Soˈlin itini pinengneng no tamdaw cowa ko mamalaˈosi koniya demak, kawra pakasoˈlinay ci Apraham to papalaˈosien ni Yihofa ko sakiˈok no Niyah. Soˈlinay cowa ka lakisaw ko tokel no madimadiay a Apraham. (Loma 4:19-21) Midotim toniya maˈoningay padama kitanan pakasoˈlin, mamitoor ci Yihofa to misowalan a midemak. w22.10 27 fiedac 13-14 fatac

Miliyaw milifok to pasalat ko Israil tamdaw ikor, malaˈosiayto konini a sapairasol ni Isaya. Soˈlinay o Tadamaanay a Singsi no Israil tamdaw ci Yihofa, itini sakayat Ningra, malaˈosiay cangra miliyaw patireng to matatodongay pidoko. Anini, o Tadamaanay a Singsi ita ci Yihofa, tada rahekerayto kita. Palalinian ni Isaya kita to sito, tosaay ko pakayraan ni Yihofa pasifanaˈ kitaanan. Saka 1, sanay ci Isaya: ‘Wa maˈaraw namo ko Tadamaanay a Singsi namo.’ Haratengen konini sapatinako, tomirengay ko singsi i kaˈayaw no sito a pasifanaˈ. Samaanay ci Yihofa itini kaˈayaw ita pasifanaˈ kitaanan hani? Pakaynian Ningra i likakawa Ningra mihadak to sakayat. Pakaynian no likakawa no Kawas i saˈopo, mitepangan cudad, JW tilifi ato roma pakayraan, pafeli kitaanan to ihkalay a sakayat, padama kitaanan itini sapalifet ngaˈay ira ko lipahak padadotoc mihadidi. Pakayni tonini tada miakoˈiday kita ci Yihofaan! w22.11 10 fiedac 8-9 fatac

Pakayni lekakawa no Yutaya ato kaˈoripan ita a lekakawa nohatini hahacowa a hererek, sanay ci Yis: ‘Oya romiˈad, oya tatokian, awaay ko mafanaˈay, cowa ka fanaˈ ko coyoh, cowa ka fanaˈ ko Wawa, edengan o Wama ako ko mafanaˈay.’ Dotoc, patalipaˈelalan ningra ko nisawawaan ‘ka picerid mapalal,’ ‘ka padotoc mitapal.’ (Marko 13:32-37) Saka 1 hahekalan a Yutaya Krisciyang papadadotoc a mitapal wangaˈ, samanen milingatay konini to ˈorip nangra. Pasowalan ni Yis ko nisawawaan: ‘Maˈaraw namo ko piˈalikot no sofitay to niyaroˈ no Yirusalim i, mafanaˈto to mamalaˈafo koniya niyaroˈ.’ Mifekad konini a demak i, o mamitengil ko nisawawaan to sapatalipaˈelal ni Yis, ‘milaliw tayra i lotok.’ (Luka 21:20, 21) Tiya palaˈafoen no sofitay no Loma ko Yirusalim i, polong mitengilay tonini sapatalipaˈelal a tamdaw madipotay ko ˈorip nangra. Anini, itiniayto kita i salikoray a ˈawaled nonini mariˈangay a lekakawa a maˈorip, mankora o papadadotoc kita talipaˈelal a mitapal. w23.02 14 fiedac 1-3 fatac

Pasifanaˈan ni Yihofa ko sikawdan Ningra misasoˈlin ko waywayan, moecel ko pidemak. Mansa mamilifok cangra to rihaday no falocoˈ, maseneng ko kaˈorip. (Taneng 13:5, 6) Itini pinanaman iso to Fangcalay Cudad i, coko matinakoayto iso ko sapadama ni Yihofa han? Mananamayto iso, o pakayraan ni Yihofa a dademak o saki polong a tamdaw ato kisowanan, sahto o sangaˈayay. (ˈOlic 77:13) Mihaenay i, sapidopoawto kiso to moecelay palinian ni Yihofa. (Matay 6:33) Sapiˈadingawho kiso to soˈlinay kimad, misawacay to polong paorafay ci Yihofaan a sowal, sahtoay o patelasay a sowal. Sasamaan ko pidemak iso hani? Ngaˈayay kiso pakayni i mipiliˈan iso a nokaˈorip, paihkal i polong a tamdaw to midopoay kiso to soˈlinay kimad, cowa pitengil to mangah ni Satan, ciharatengay kiso sapicadaaw to pikowan ni Yihofa, midemak to matatodongay hananay Ningra a demak. Sasamaan midemak hani? Itini i satolon pasowal ci Yihofaan, papatafangen iso ko hakelong no ˈorip i Cingranan, ikor micada to paputisem, itini kaˈayaw no ˈalomanay paihkal to patafangayto kiso to tireng ci Yihofaan. O olah to soˈlinay kimad ato moecelay, o taˈangayay a ˈicel micoroh to tamdaw micada to paputisem. w23.03 3 fiedac 4-5 fatac

Iraay ko cecay rihaday cowa ka fanaˈ ko ˈalomanay tamdaw, o sapafeli no Kawas a rihaday. Onini i kemoday no falocoˈ a rihaday, o tangongolay ko kalawidang to Kawas a tamdaw ko ngaˈayay milifok. Ano ira ko sapafeli no Kawas a rihaday kitaanan, wa ira ko rihakeday a harateng. (Filipi 4:6, 7) Wa malo ngaˈayay a widang ita ko maolahay to Kawas a tamdaw, wa ngaˈayho matongal ko piingid to ‘pafeliay to rihaday a Kawas.’ (1 Tisalonika 5:23) Ano mafanaˈ kita, mitadiˈec ato midofdof to kakarayan Wama, soˈlin tahalifa to tatiihay a pakayraan, o sapafeli Ningra a rihaday kitaanan wa parihaday to falocoˈ ita, ecato ka cariraw. Ano misiˈayaw kita to lifong, pades, lalood anca sapalak, onini katalawan a pakayraan, wa soˈlin kita milifok to sapafeli no Kawas a rihaday han? Itini mahaenay a pakayraan, madoloay kita a matalaw. ˈAlomanay salikaka midofdofay to mihadakan ni Yis i sinael anini a sapaini, soˈlin tahalifa to pakidemay a sapalifet, kawra mitadiˈec to sapadama ni Yihofa, milifokay cangra to dipayalay ato rihadayay falocoˈ. Tada mikowaday konini kitaanan! w22.12 16 fiedac 1-2 fatac

Adihayay a demak i kaˈorip awaay ko pakayraan ita miˈimer, mankora aka tano tayal iso a milalat to epoc no niyah, anca palalini to tao. (Kalatiya 6:4) Kalimlaan i, mikilim kita to toki mitongal to tayal saki Yihofaan ato padama to tao. Kantangen ko kaˈorip iso, hamaan cikiyam, mamadoloto matongal ko tayal saki Yihofaan. Roma i, ngaˈay kiso patireng to apotoˈay a patosokan, palalan to koˈedaway a patosokan. O patosokan iso ano o malo miceriday misakafahay, nohatiniho mitanam padadotoc malo padamaay a misakafahay. O patosokan iso ano o malo dama sikawdan, nohatiniho tongalen ko toki mitosil. O matongalay a nalifetan iso nohatini, o papairato to adihayay a noka tayal iso. Ano o mananto a tayal ko sapafeli no kasakopang tisowanan, mamisetek ko falocoˈ iso misaˈicel ngaˈay ko pidemak. w22.04 26 fiedac 16-17 fatac

Wa ngaˈay padama ci Yihofa kitaanan miremo to masakenakenaay pasangar no kaˈorip, hanaca itini pirienang to midokoay a demak milifok to lipahak. Pasowalen ita ci Yihofa to ka calemceman no niyah a demak, sasamaan Cingra pacaˈof hani? O sasalakat Cingra pafeli kitaanan to ˈicel misiˈayaw to pasangaray alatek. O pasangaray ita ano cowa ka lecad to halamhaman ita kaliki a masaysay, papadadotoc kita micangacang ci Yihofaan pafeli to ˈicel, padama kitaanan padadotoc mihadidi. Mikitini sowal ni Isaya mahapinang ita pakalalokay ci Yihofa kitaanan mihaen to demak. Sanay ci Isaya: ‘Padadotocen patengil Cingra to ngihaˈ namo.’ (Isaya 62:7) Roma pihongyak toniya sowal ‘aka papipaselaˈen Cingra.’ Padamaay koni kitaanan cipinang, o papadadotoc kita mitolon ci Yihofaan, malecad to eca papipaselaˈ Cingranan. O sowal ni Isaya papiharatengay kitaanan to na misowalan ni Yis a sapatinako. Itini Luka 11:8-10, 13 pakalalokay ci Yis kitaanan ka ‘padadotoc micangacang’ to Kawas pafeli to fangcalay saocor. Roma i, wa ngaˈayho kita micangacang to sakayat ni Yihofa kitaanan, padama kitaanan citaneng ko pisaˈosi. w22.11 8 fiedac 1 fatac; 9 fiedac 6-7 fatac

Kiso ato paro no lomaˈ aniniho ngaˈayto misaday misiˈayaw to sapalak. Aka hacecay han miharateng ko mamalifa no niyah katalawan a demak, ao mamisaˈicel mitongal to kalawidang ci Yihofaan, hanaca padama to wawa mihaen to demak. Ano calemcemay kiso, fowahen pasowal to nafalocoˈan i Kawas. (ˈOlic 62:7, 8) Paro no lomaˈ ngaˈay malacafay malalengo hano ngangaˈay kamo mitadiˈec ci Yihofaan. Malecad o talaˈayaw misaday to pades, talaˈayaw kiso misaday to sapalak nohatini, wa ngaˈay padama to wawa milifok to epoc. Pasifanaˈen iso cangra mitadiˈec ci Yihofaan, ano ira sato ko sapalak i, o rarihaday cangra caka marawraw, eca ka ciˈangi. O sapafeli no Kawas a rihaday pairaay to rihaked no mita. (Filipi 4:6, 7) Soˈlin tahalifa to lifong, pades ato sapalak, onini a rihaday ngaˈayay midipot to falocoˈ ita. Pakaynian ni Yihofa i malalokay matayal a malohemay malitengay pakaen kitaanan, paira to toki ita masasipadama. Malifokay ita rihaday nohatini wa ngaˈay padama kitaanan talaˈayaw misaday to taˈangayay sapalifet noikor, mangalef itini ‘taˈangayay padiing’ mamihaen to demak.—Matay 24:21. w22.12 27 fiedac 17-18 fatac

Ano pakayniay kita i pakidemay a raraw isalakat, padotoc a caniis ko falocoˈ a makesemen, saˈicelen micoˈay ko hatiniay a harateng. Manaokaniw, cowa ko mamisalalangi kita to sapatefoc, ‘padeteng sa mararid mararaw.’ (Hipray 10:26-31) Ano maharekayto kita pasasiyor, micangacang to sapadama ni Yihofa, mifalic to waywayan no niyah i, o ngangaˈay pakasoˈlin kita milifokayto to sasodod ni Yihofa. (Isaya 55:7; Dmak 3:19) Tada taˈangayay ko epoc no sapatefoc ni Yis, o mamatahepo maemin ko raraw no mita. O kaˈorip i Lakoing cowa ko mamaˈisang, wa adihay ko kafanaˈan ita faelohay a widang, wa adihayho ko ciepocay a tayal. Sangaˈayay i, to romiˈamiˈad wa ngaˈay kita mitongal to kafanaˈ to i kakarayanay a Wama, milayap to sapafeli Ningra kitaanan a kihcod. Pakayni ci Yihofaan ato misangaˈan Ningra a maamaan, adihayayho ko nananamen ita, ano tahadaˈocto cowa ko mamaemin minanam. w22.12 13 fiedac 17, 19 fatac

O fafahiyan cowa ko ci Ifa cingra. Haratengen hena, o misowalan no sapairasol a teloteloc no fafahiyan wa ‘mipesiˈ ’ to fongoh no ˈoner. O mitoroˈan to ˈoner i ci Satan. O ˈadingo a tireng cingra, o cowa ka lefot a misofocan ni Ifa a tamdaw awaay ko ˈicel papalaˈafo cingranan. Mihaenay, cima kora fafahiyan hani? O salikoray a maloloday no Fangcalay Cudad papadama kitanan pahapinang to misowalan no Satapangan 3:15 a fafahiyan o cima. (Paˈarawan 12:1, 2, 5, 10) Onini a fafahiyan tada mikiriwiˈay, ripaˈen ningra ko folad, citamohong to 12 a foˈis, mahofoc to cecay a mikiriwiˈay a wawa, oya Hongti Kitakit no Kawas. Onini a Hongti Kitakit itiniay i kakarayan, mansa maedeng itiniay i kakarayan a fafahiyan. Mitaypiyawan ningra i oya i kakarayan a likakawa ni Yihofa, o madimadiay a coyoh ko palaˈosiay. (Kalatiya 4:26) Padamaay ko Fangcalay Cudad kitaanan pahapinang to sakakaay a teloteloc no fafahiyan o cima. Mikitini sapairasol no Fangcalay Cudad, onini a teloteloc mikitini i lalomaˈan ni Apraham a masadak.—Satapangan 22:15-18. w22.07 15-16 fiedac 6-8 fatac

Pafeliay ci Yihofa kitaanan to Fangcalay Cudad. O Fangcalay Cudad mahawpay ko taneng no Kawas, ciepocay ko pifiyor to tamdaw, mifalicay to kaˈorip no tamdaw. Satapang a pina cudad no Fangcalay Cudad o ci Mosi ko mitiliday, pasowalay cingra to finawlan no Kawas: ‘Pakayni tamowanan, onini a sowal cowa ko mamalahorac, o sakaˈorip namo.’ (Limoˈot 32:47) Itiyaho, midofdofay to Kimad no Kawas a tamdaw malaˈosiay a raheker ko kaˈorip nangra. (ˈOlic 1:2, 3) Tahanini, kamayanay mifalic to kaˈorip no tamdaw ko Fangcalay Cudad, o ˈicel nira cowa ka malowan. O safalod no Fangcalay Cudad cowa ka taˈlif, malifokay no kahacecay lintad a tamdaw ko adihayay a epoc. Cowa konini aca, ano micekiw kita to Fangcalay Cudad halo midotim to mananamay a lalakaw i, oya Papitiliday to Fangcalay Cudad a Kawas sakadademakay to fangcalay saocor Ningra, padama kitaanan mihapinang to sasamaan kita itini nokaˈorip midofdof to Kimad Ningra. (ˈOlic 119:27; Malaki 3:16; Hipray 4:12) O midaˈocay a maˈorip ko Papitiliday to Fangcalay Cudad, tada ciharatengay Cingra to sapipadamaaw tisowanan. Mafanaˈ tonini coko papaˈicel tisowanan, sapiceridaw micekiw to Kimad Ningra hokira? w23.02 3 fiedac 5-6 fatac

Itini Paˈarawan 13 fedengan pakayni tonini a saka pito a fongoh no ˈaˈadopen, o Ikok ato Padaka ciˈicelay a mikowanay palinian to roma a ˈaˈadopen, sanay ‘tosaay ko waˈa nira, malecaday o waˈa no lopayˈay a siri, somowal sa malecaday o kangic.’ Onini a ˈaˈadopen ‘midemakay to kafahkaˈan a demak, itini kaˈayaw no tamdaw patefaday to namal nai kakarayan tayni i fafekang no sera.’ (Paˈarawan 13:11-15) Itini Paˈarawan saka 16 ato 19 fedengan panganganan to ‘makaniway pairasolay.’ (Paˈarawan 16:13; 19:20) Paˈayaway ci Taniil o Ikok ato Padaka ciˈicelay mikowanay ‘papaira to katalawan a sakalaˈafo.’ (Taniil 8:19, 23, 24, ato roma pihongyak.) Onini a demak soˈlinay mifekad i saka tosa lalood no hekal, o sakahererek nonini a lalood o tosaay fakotang o kakakosiya no Ikok ato Padaka ko misangaˈay. O Ikok ato Padaka ciˈicelay mikowanay soˈlinay ‘mikitini kakarayan patefad to namal tayni i fafekang no sera.’ w22.05 10 fiedac 9 fatac