Saka 5 Folad

Maˈaraw ko i kakarayanay 144,000 tamdaw ikor, maˈarawayho ni Yohani ko ‘taˈangayay ˈopo a tamdaw.’ Cowa ka lecad to 144,000 a tamdaw, onini taˈangayay ˈopo a tamdaw cowa ka saˈosi ko ˈaloman. Pakayni cangranan, mafanaˈayho kita to maanan hani? Sanay ko Paˈarawan: ‘Oniya tamdaw mikitiniay taˈangayay padiing a masadak. Tano remesan no tofor a siri cangra mikorac to rikoˈ no niyah.’ (Paˈarawan 7:14) Milakowit to taˈangayay padiing ko ‘taˈangayay ˈopo tamdaw’ ikor wa itini fafekang no sera maˈorip, milayap to kasapaan a sapalemed. (ˈOlic 37:9-11, 27-29; Taneng 2:21, 22; Paˈarawan 7:16, 17) Ano mipiliˈan kita tayra i kakarayan, anca wa itini i fafekang no sera maˈorip hokira, o pitadtad no Paˈarawan saka 7 fedengan milingatay kitaanan. Ano mifekad konini a demak i, o madimadiay midoko to Kawas a tosa ˈopo a tamdaw maedeng o mamahemek. Itiya wa mahemek kita mipiliˈ ko niyah midama to pikowan ni Yihofa. w22.05 16 fiedac 6-7 fatac

Na midemakay kiso to maanan kalimlaan a sasaˈosien han? Itiya maedeng pasayraay kiso ci Yihofaan micangacang to taneng, samanen mafanaˈay kiso misaaliay ko niyah to sakayat Ningra. (Yakop 1:5) Sowal no Hongti ci Solomon: ‘Sakakaay kalimlaan ko taneng, mihaenay cangacangen ko saka citaneng.’ (Taneng 4:7) Manaokaniw, o misowalan ni Solomon cowa ko taneng no tamdaw, ao mikitiniay ci Yihofaan a taneng. Kawra o sapafeli no Kawas a taneng wa ngaˈay padama kitaanan miremo to malifaay anini a pasangaray han? Hayi, iraay ko tatosa tamdaw samanen tada citanengay hato mikangodoan no tamdaw. Misarocod kita minanam ato misaka dademak to sapalimoˈot nangra, o mamilifok to soˈlinay a taneng. Salakat nengnengen ita ci Solomon. Sowal no Fangcalay Cudad: ‘Pafelian no Kawas ci Solomon to tadamaanay a taneng, ato sapihapinang a ˈicel.’ (1 Hongti 4:29) Dotoc minengnengho kita ci Yisan, i likisi o sacitanengay a tamdaw cingra. (Matay 12:42) Iraay ko cecay pakayniay ci Yisan a sapairasol sanay: ‘O fangcalay saocor ni Yihofa padotocay i tireng ningra, paira to taneng ato saka cipinang a inaneng ningra.’—Isaya 11:2. w22.05 20 fiedac 1-2 fatac

Ano hakowaayto ko katoˈas ita, ngaˈay patireng ato misaˈicel palaˈosi to patosokan. Nengnengen ko tinakoan no fafahiyan salikaka ci Pifoli. 75 ko mihecaan ningra, iraay ko pakidemay a adada, cowa ka ngaˈay romakat. Kawra makalimay cingra mirienang to mikiriwiˈay a mitosil a tayal, mitahidangay to tamdaw mirienang to Piharatengan to Kinafalah ni Yis a Saˈopo, mansa patirengay cingra to ihkalay a patosokan. Salikaka ci Pifoli malaˈosi ko patosokan i, tada lipahakay, o ngaˈayay a taˈarawan ningra pakalalokay to roma salikaka misaˈicel mirienang to mitosilay a tayal. Soˈlin matoˈasay a salikaka adihayay ko pasangaray no kaˈorip, cowa ka adihay ko midemakan, kawra ci Yihofa kamayan misalimla to mihadakan nangra a ˈicel. (ˈOlic 71:17) Patirengen iso ko ngaˈayay malaˈosi a patosokan, palahaden ko kaolahan ni Yihofa a capeling, ka pinanam to pina a inaneng, mitongal to tayal saki Kawas ato likakawa Ningra, mikilimho to toki matayal saki salikaka. Mihaen mamalecad kiso ci Timotian milifok to sapalemed ni Yihofa, ‘ta mahapinang no ˈalomanay ko nika cakat no tayal iso.’—1 Timoti 4:15. w22.04 27 fiedac 18-19 fatac

Ano misaˈicelay kiso pasifanaˈ to wawa, o wawa eca ka ciharateng midoko ci Yihofaan, sasamaan kiso misiˈayaw toniya demak hani? O pasokiyaway ko niyah aka ka saan miharateng. Pafeliay ci Yihofa to kahacecay a tamdaw to pasalat, ngaˈay kita pasalat mipiliˈ to mamidoko Cingranan hokira, mahawpay ko wawa iso. Aka pisawad to hatokel, pasoˈlinen to iraayho ko toki ningra patatikol. Haharatengen ko malafelay wawa a sapatinako. (Luka 15:11-19, 22-24) Oya malafelay a wawa i sapatinako midemakay to adihayay tatiihay a demak ikor, patatikolayto. O malo wama winaay, iraay ko cecay taˈangayay a kalikoan namo, o pipadama to wawa malo midokoay ci Yihofaan a tamdaw. (ˈOlic 78:4-6) O tada pasangaray a ˈinorong konini. Padadotoc kamo misaˈicel a pasifanaˈ to wawa maolah ci Yihofaan, mitoor to araaw ni Yihofa mirikec ato palimoˈot cangranan, midipot ato palahad cangranan, tada ngaˈayayto ko midemakan namo! Wa ngaˈay pakasoˈlin kamo, o sidaˈitay a Wama ita i kakarayan wa taˈangay ko lipahak.—Ifiso 6:4. w22.05 30-31 fiedac 16-18 fatac

Kita o kahacecay a tamdaw o mamitoor to pakayraan no niyah misarocod matayal saki Yihofaan. Mihaen mamatongal ko rihaday no kasakopang, matongal ko kakelec a malacecay. Haratengen ko saka 1 hahekalan a Krisciyang, iraay ko inaneng ato saaroˈan no kahececay nangra. (1 Korinto 12:4, 7-11) Onini cowa ko lalangian nangra a malalifet, mikidat to sakaliwasak. Palimoˈotan ni Pawlo cangra o kahacecay tamdaw misarocod ‘patanektek to tireng ni Kristo.’ Sanay cingra: ‘Kahacecacecay a caˈang no tireng i, pakayni i nika sasiolaolah ita ko sakalomahad no tireng a tanektek.’ (Ifiso 4:1-3, 11, 12) O midofdofay tonini a sapalimoˈot a tamdaw wa ngaˈay micowat to rihaday ato kakelec a malacecay ko kasakopang. Anini, mahecaday ko pakayraan no kasakopang no Krisciyang. Seteken ko falocoˈ aka palalini to tao, misaˈicel mitodong ci Yisan, minanam to makapahay a capeling ningra. Ngaˈay rihaday ko falocoˈ iso, ‘o moecelay ko Kawas, cowa ko mamapawan to nano demak namo.’ (Hipray 6:10) Haratengen iso tada masemeray ci Yihofa misarocod kiso matayal saki Cingranan. w22.04 14 fiedac 15-16 fatac

O sasododen no Kawas ko cecay tamdaw hokira cowa ko kita ko mamisaˈosi, mafanaˈ tonini tada parihadayay kitaanan. Kawra, iraay ko cecay sasaˈosien o kita ko mamidemak. O maanan a saˈosi hani? Latekay pakararaway ko tao kitaanan, taˈangayay ko pidokaˈ kitaanan. Miliˈay cingra kitaanan alatek, misaali to sasodod ita, anca cowa pihaen ko demak ningra alatek, ano samaanto ko pakayraan, o ngangaˈay mipiliˈ kita misodod cingranan, tatodong i, misaˈosi kita ecato ka ˈinteh ko falocoˈ, ecato ka keter cingranan. Manaokaniw, sapisawadaw a ˈinteh misaaliay to toki ato pisaˈicel, ano taˈangayay ko macadaay a pidokaˈ kitaanan, mangalefay mahaen. Mikecolay 1994 miheca 9 folad 15 romiˈad sanay: “Misodod to mararaway tamdaw cowa ko pakiyadiay to raraw. Pakaynien i Krisciyang, tatodong no misododay o papatoroden ko demak i kamay ni Yihofa misarocod a mitadiˈec Cingranan. Ci Yihofa o moecelay a Misawkitay toniya dohaw, wa itini Cingra i matatodongay a tatokian midemak to masadafdafay.” w22.06 9 fiedac 6-7 fatac

Mikiˈokay ci Yihofa, itini i lintad ita mamikitini Cingra i kasafinacadan, kasangasaw, kasasiroma no sowal misaˈopo to tamdaw, mikelec a palacecay cangranan midoko Cingranan. Anini onini a ‘taˈangayay ˈopo a tamdaw’ soˈlinayto ira! (Paˈarawan 7:9, 10) Soˈlin itini lalomaˈ nangra iraay ko faˈinayan fafahiyan, matoˈasay kaemangay, kasafinacadan, kasasiroma no sowal ato cowa ka lecad a lalengawan, kawra ngaˈayay cangra makelec a malacecay masasiolah, malecad o paro no lomaˈ. (ˈOlic 133:1; Yohani 10:16) Onini taˈangayay ˈopo a tamdaw fanekfekay milasil to ngaˈayay lihaf, misongilaˈ misaday pasowal to faelohay a hekal a makapahay hatokel i makahiay mitengil a tamdaw. (Matay 28:19, 20; Paˈarawan 14:6, 7; 22:17) Ano masalalomaˈay no taˈangayay ˈopo a tamdaw kiso, maedeng misalimlaay kiso to makapahay hatokel noikor. Misamacayay ci Satan sapiˈafasaw to tokel iso, papiharateng tisowanan to cowa ko mamidemak ci Yihofa to mikiˈokan. Ano pakasoˈlin kita i, o mamalahdaw ko timolo ita, hawad sato a midoko ci Yihofaan. w22.06 20-21 fiedac 2-3 fatac

Matomesay ko hatokel ita i falocoˈ, wa ngaˈay itini sano faliyosay a sapalifet padadotoc a mihadidi, samanen pakasoˈlinay kita i kaˈayaw wa awato ko faliyos. Haratengen, patalipaˈelalay ci Yis sanay, mamicada kita to sapalak. (Yohani 15:20) Mansa, midotim to mikiˈokan ni Yihofa sapafeli kitanan a sapalemed noikor ngaˈay padama kitanan tanektek caka ngiyangi, padadotoc madimadi midoko Cingranan. Haratengen hena, soˈlin mafanaˈay ci Yis to niyah mamicada to pisemsem a mapatay, kawra samanen ira ko hatokel ningra, mansa ngaˈay tanektek caka ngiyangi, padadotoc madimadi to Kawas. Itini Kongyen saka 33 miheca Kocinsic, o tarokos ci Pitiro sakadademakay to sapairasol no ˈOlic, onini a sapairasol somowalay itini misiˈayaw ci Yis to patay i tanektekay a pakasoˈlin ko falocoˈ: ‘O rarihaday kako maroˈ, matomes ko hatokel, nawhani caay ko fafalahen Iso kako i kaitiraan no mapatayay, caay ko mamihayda Kiso to nika patay no madimadiay sikawdan. . . . Palipahak Kiso takowanan i kaˈayaw Iso.’ (Dmak 2:25-28; ˈOlic 16:8-11) Pakasoˈlinay ci Yis wa patikolen no Kawas paˈorip cingra, cingra saan papatikol tayra i kakarayan malacafay to Wama.—Hipray 12:2, 3. w22.10 25 fiedac 4-5 fatac

Kinacecayay, tarokos ci Yakop aci Yohani mitahidangay to wina midemak to cecay a demak, tayra ci Yisan micangacang papikamaroˈen cangra i tadamaanay a saaroˈan i Hongti Kitakit. (Matay 20:20, 21) Mihaen cangra to demak patalahkalay to malitaˈangay a waywayan, sapikikakaaw to roma a tamdaw. (Taneng 16:18) Cowa aca ci Yakop aci Yohani ko patalahkalay to mararaway a waywayan, romaroma a tarokos iraay ko mahaenay a kadangocan. Sowal no sinael: ‘Matengil no romaroma mamoetep a tamdaw konini a demak i, maketeray tora tatosaay malikakaay.’ (Matay 20:24) Ano haratengen i, ci Yakop, ci Yohani ato romaroma tarokos maedeng malapoˈiay somowal to tatiihay a sowal. Samaanay ci Yis misaysay tonini a demak hani? Cowa ka keter cingra, cowa ka pasowal to mamifalic cangranan, mikilim to romaroma misapoeneray ko falocoˈ marariday patalahkal to olah a tamdaw mikotay cangranan. Mafanaˈay ci Yis makahiay ko tarokos midemak to matatodongay a demak, mansa mihadidiay a pasifanaˈ cangranan. (Matay 20:25-28) Kamayan tano olah ci Yis micada cangranan. w23.03 28-30 fiedac 10-13 fatac

Malahciayto iso midemak ko maanan a demak. Malalok kiso micekiw to Fangcalay Cudad, pinaayto miheca alatek. Pakayni pinanam, pakasoˈlinay kiso o sowal no Kawas ko Fangcalay Cudad. Kalimlaan i, mafanaˈayto kiso mikitiniay ci Yihofaan ko Fangcalay Cudad, hanaca palahaday to olah Cingranan. Matongalay ko kaolah iso ci Yihofaan, mansa misetek to falocoˈ patafang to tireng micada to paputisem, malo sikawdan Ningra. Tada ngaˈayay ko demak iso! ˈAyaw no micada to paputisem, o pakasoˈlin iso itini roma pakayraan maedeng na micadaay to sapalifet, kawra pakayni palidlid saan matenes, o tatahalifaho kiso to faelohay a sapalifet. Wa mihalaka ci Satan milowan to olah iso ci Yihofaan, ho ecato pidoko kiso ci Yihofaan. (Ifiso 4:14) Aka a pakihater han ci Satan! Sasamaan kiso ngaˈ padadotoc madimadi ci Yihofaan, midofdof to miketonan no niyah patafang to tireng hani? O papadadotoc kiso macakat, ‘pasayra i matenesay a macakat.’—Hipray 6:1. w22.08 2 fiedac 1-2 fatac

O kahacecay no paro no lomaˈ a tamdaw iraay ko ˈinorong mitafo to mahimeday demak no paro no lomaˈ. Tinakoen, miharateng ko faˈinay to cecay nanaman no fafahi masakatawaan saan, cowa ko ngangaˈay pasowal to tao tonini a demak, mipakangodo to fafahi, samanen maolahay cingra to fafahi, cowa ko mamidemak to midokaˈay to fafahi a demak. (Ifiso 5:33) Haratengen no malo wama winaay, o kapah a tamdaw makalimay kangodoen no tao, mihaenay o wama ato wina aka itini ˈaˈayaw no tamdaw milengo to raraw no wawa, pakangodo cangranan. (Kolosay 3:21) O wawa o maminanam mihapinang to demak, aka pasowal to potalay tamdaw to notekedan a demak no paro no lomaˈ, ho eca ka pakangodo to paro no lomaˈ. O kahacecay no paro no lomaˈ a tamdaw misaˈicel mitafo to mahimeday a demak no paro no lomaˈ, o kalalaˈed no paro no lomaˈ o mamatongal a tanektek. w22.09 10 fiedac 9 fatac

Pasowalan ni Yihofa ci Yopu, somowal cingranan to adihayay kasemeran a pinaˈorip. Patalipaˈelalay konini ci Yopuan, malo Misangaˈay a Tatapangan ci Yihofa awaay ko tolas no taneng, hanaca tada ciharatengay to kihcod a misangaˈan no Niyah. (Yopu 38:1, 2; 39:9, 13, 19, 27; 40:15; 41:1, 2) Roma i, sakadademakan ni Yihofa ko madimadiay a Ilihu pakalalok ato mihinom ci Yopuan. Onini kapah a tamdaw padamaay ci Yopuan mihapinang, o papalifonen ni Yihofa ko tahatolasay mihadidi a sikawdan. Kawra, pakaynian ni Yihofa ci Ilihuan tano sidaˈitay a pakayraan pafeli ci Yopuan to pina sapalimoˈot. Patalipaˈelalan ni Ilihu ci Yopu, palalinien to Misangaˈay to dohaw a Tatapangan ci Yihofa, tada kaemingay ko tamdamdaw. Padamaay konini ci Yopuan marocek ko pinengneng to demak, ecato ko niyah aca ko miharatengan. Pafelianho ni Yihofa ci Yopu to cecay ˈinorong, patado toya tatoloay mararaway widang ningra mitolon. (Yopu 42:8-10) Anini, malifa ita ko pakidemay a sapalifet i, sasamaan ci Yihofa padama kitanan hani? Cowato ko mamihaen ci Yihofa ci Yopuan a patodicek a pasowal kitanan, kawra o papakaynien Ningra i Fangcalay Cudad a pasowal kitanan.—Loma 15:4. w22.08 11 fiedac 10-11 fatac

Itini saka 1 hahekalan kasakopang no Loma iraay ko Yutaya ato ˈAlafang a Krisciyang, itiya palasawadanto ko Rikec ni Mosi, mihaenay o midokoay ci Yihofaan a tamdaw cowato ko mamidofdof to pakayniay kakaenen a saˈosi no Rikec. (Marko 7:19) O romaroma Yutaya a Krisciyang ano maananto a kakaenen ngaˈayay kaenen sanay, kawra o romaroma Yutaya Krisciyang cowa ka picada to mahaenay a demak, mihaenay maliwasakay ko kasakopang. Orato, mitadtaday ci Pawlo kalimlaan ko mitafoay to rihaday. Padamaan ni Pawlo ko salikaka mihapinang, o hatiniay a lacongis pakayni tekedan a tamdaw anca polong no kasakopang taˈangayay ko pipalak. (Loma 14:19, 20) Roma i, pakayni saka ecaaw pakapolin to tao, makahiay ci Pawlo mifalic to harateng no niyah. (1 Korinto 9:19-22) Malecaday, itini kita kaolahan no tekedan a demak eca ka pisaareteng to harateng no niyah, wa ngaˈayto mararihaday to salikaka a malacafay, ho micada cangra to sapakalalok. w22.08 22 fiedac 7 fatac

Ano micangacang kita to roma patosokan o papadadotoc a misaˈicel kita, micangacang to moecelay o mahaenay. Wa mihadidi ci Yihofa padama kitanan padadotoc macakat itini toniya pakayraan. (ˈOlic 84:5, 7) Pakayniay i ciolahay falocoˈ ci Yihofa patalipaˈelal kitanan, midemak to moecelay a demak cowa ko karetengay a ˈinorong. (1 Yohani 5:3) ˈArawhan i, mihaen to demak mamidipot kitanan to romiˈamiˈad. Haratengen ko nisowalan no tarokos ci Pawlo a sapafeli no Kawas sapilood a rikoˈ. (Ifiso 6:14-18) Onini a sapatada to falohang a sapilood a rikoˈ mitaypiyaway to maanan hani? O moecelay a palinian ni Yihofa. Mahecad o sapatada to falohang mamidipot to falocoˈ no sofitay, o moecelay palinian ni Yihofa mamidipot to falocoˈ ita, mahawpay ko kalim no falocoˈ, nafalocoˈan ato harateng ita. Mihaenay, ano micaˈedong to sapafeli no Kawas a sapilood a rikoˈ i, aka a mapawan micaˈedong to moecelay malo sapatada to falohang!—Taneng 4:23. w22.08 29 fiedac 13-14 fatac

Mikitini nolitengan tahanini, o madimadiay midoko to Kawas a tamdaw mikitiniay i Kimad no Kawas milifok to ciepocay a sakayat. Tada kasemeranto konini! Palimoˈotan ni Yihofa ko tamdaw mitodong a miliyaw mitilid to Fangcalay Cudad. Soˈlin o mitodongay a miliyaw mitilid a tamdaw cowa ko malefotay, kawra minaˈonay a misinanot cangra. Tinakoen o Hipray Sowal Fangcalay Cudad, o cecay mikakingkiway sanay ko sowal: “Awaay ko romaroma nolitengan a cudad malecaday to Fangcalay Cudad, saliyaliyaw hananay mitodong a mitilid, kawra cowa ka falic ko lalomaˈay a lalakaw.” Ngaˈayay pakasoˈlinen ita, o maasipay ita anini i Fangcalay Cudad, oyananto a lalasilen ni Yihofa a lihaf. ‘Masakenakenaay a fangcalay a sapakaolah, masakenakenaay a malefotay a sapalifon’ sahtoay o sapafeli ni Yihofa kitaanan. (Yakop 1:17) O masakalimlaan a sapakaolah ni Yihofa kitaanan ko Fangcalay Cudad. O sapatelong hananay i, pakafanaˈay kitaanan to hakowaay ko kacipinang nora patelongay i kitaanan ato saali no mita. Hatiraayto, pasifanaˈay ko Fangcalay Cudad kitaanan to adihayay pakayni ci Yihofaan a demak, mamahapinang to hakowaay ko kacipinang Ningra kitaanan ato saali no mita. w23.02 2-3 fiedac 3-4 fatac

Itini Pikowan ni Kristo to Comaˈol Miheca, misatapang patikol maˈorip ko mapatayay tamdaw i fafekang no sera i, wa hakowa ko kahemek no mita! O polong na malahdaway ko salawina a tamdaw makalimay sapiliyawaw maˈaraw koniya salawina, mahaenay ko harateng ni Yihofa. (Yopu 14:15) Haratengen hena, oya itiniay icowacowa pala no hekal, miliyaw malalitemoh ko tamdaw to patikolay maˈorip a tamdaw hakowa ko kalipahak! Itini fafekangay lalakaw mananamay ita, o ngangan no ‘moecelay tamdaw’ matilidayto i sakaˈorip a cudad, ‘patikol maˈorip milifok to ˈorip’ cangra. (Dmak 24:15; Yohani 5:29) O adihayay salawina ita o sasalakat patikol maˈorip i fafekang no sera alatek. Roma i, o roma tamdaw ˈayaw no mapatay awaay ko toki mafanaˈ ci Yihofaan anca cowa pidoko Cingranan, oniya ‘cowa ka moecel a tamdaw’ wa ‘patikol maˈorip micada to sasawkit’. Polong patikolay maˈorip a tamdaw o mamicada to sapasifanaˈ. (Isaya 26:9; 61:11) Mihaenay, itini paro no kakarayan wa ira ko sataˈangayay pasifanaˈay a limasmas i likisi no tamdaw.—Isaya 11:9, 10. w22.09 20 fiedac 1-2 fatac

Na pakayniay i midemakan paihkal ci Yihofa, soˈlin makomod ko polong mikowanay, caay pakafilo Cingraanan. Na patadoay Cingra to Israil tamdaw milood. Itini sapadama Ningra, malowid no Israil tamdaw ko adihayay mikiˈokan a pala. (Yosuwa 11:4-6, 20; 12:1, 7, 24) Misawacayay ko demak, edengan ci Yihofa iraay ko Saˈakawangay a Fadangalan. Hongti no Papilon ci Nipukatnicar cowa pisapoener ko falocoˈ mihayi to edengan ci Yihofa ko citodongay pakahemeken, malikoay a somowal: ‘Onini a Taˈangayay Papilon mitiˈeran ako ko taˈangayay inaneng ato ˈicel no niyah a mapatireng, tada kasemeran! Kasapaan!’ Telocto misetiˈan ni Yihofa cingra, mipasingki cingranan. Patatikolto ko inaneng ni Nipukatnicar ikor ‘pakahemekay to Satadamaanay a Kawas,’ mihayi o sapikowan a fadangalan ni Yihofa o ‘midaˈocay a sapikowan a fadangalan,’ somowalayho ano cimato cowa ko papakaconged ci Yihofaan mitoor to araaw no Niyah a midemak. (Taniil 4:30, 33-35) Sowal no mitiliday to ˈOlic: ‘Ira ci Yihofa malo Kawas, o mahaenay a kitakit tada lipahakay! O mipiliˈan no Kawas malo hafay, mahaenay a finacadan tada lipahakay!’ (ˈOlic 33:12 ato roma pihongyak.) Mihaenay, iraay ko lalangian ita tanektek mitafo to madimadi ci Yihofaan. w22.10 15-16 fiedac 13-15 fatac

Maˈaraw ko adihayay sapairasol no Fangcalay Cudad malaˈosiayto, mamatongal ko pakasoˈlin ita to mikiˈokan no Kawas to hanoikor mamalaˈosi maemin. Malecaday ko harateng ita to cecay mitiliday to ˈOlic, sanay cingra pasowal ci Yihofaan: ‘Makalimay kako milifok to salidong Iso, o sowal Iso o hatokel no mako.’ (ˈOlic 119:81) Itini Fangcalay Cudad mikiˈokay ci Yihofa kitaanan, o papairaen Ningra ko ‘hatokel’ no mita. (Yirimiya 29:11) Ira ko tokel ita, coko pakayniay pakasoˈlin to pitadiˈec no tamdaw to ˈicel no niyah misangaˈ to makapahay a hanoikor, ao pakayniay i pakasoˈlin ita to sakiˈok ni Yihofa. Nanay padadotoc kita misongilaˈ minanam to sapairasol no Fangcalay Cudad, mikitini a paˈicel to pakasoˈlin ita to Kimad no Kawas. O roma lalangian pakasoˈlin kita to Fangcalay Cudad i, ˈalomanay tamdaw midoedoay to sapasifanaˈ no Fangcalay Cudad a midemak ikor milifokay to adihayay a epoc. (ˈOlic 119:66, 138) Tinakoen, o romaroma mararamoday na mamalacinowasto, kawra misaka dademakay cangra to safalod no Fangcalay Cudad, nohatini patatikolayto a mala kangaˈay, rahekerayto ko kaˈorip. O wawa nangra itiniay i matomesay to olah a lalomaˈan no Krisciyang a lomahad, tada dihkoay, rihaday ko falocoˈ.—Ifiso 5:22-29. w23.01 5 fiedac 12-13 fatac

Itini Fangcalay Cudad adihayay ko sakiˈok ni Yihofa kitanan, haratengen ko niyah samaanay kiso mitinako toniya mapalaˈosiayto Ningra a sakiˈok. Haratengen hena, mikiˈokay ci Yis to mamidimokos ko kakarayan Wama to saali no kaˈorip iso. (Matay 6:32, 33) Mikiˈokayho ci Yis, micangacang kiso ci Yihofaan, papafelien ni Yihofa to fangcalay saocor kiso. (Luka 11:13) Oniya sakiˈok maharekayto ni Yihofa midemak. Maharatengayho iso to roma pakayniay tisowanan a sakiˈok mapalaˈosiayto ni Yihofa alatek, tinakoen mikiˈokay Cingra mamisodod tisowanan, mihinom tisowanan ato mirenec to nofalocoˈan a saali iso. (Matay 6:14; 24:45; 2 Korinto 1:3) Miharateng kiso to na midemakan ni Yihofa to pakayniay tisowanan a demak, mamatongal ko pakasoˈlin to papalaˈosien Ningra ko hatokel iso noikor. Pakasoˈlinay kita papalaˈosien ni Yihofa ko sakiˈok Ningra, malecad ko sowal no mitiliday to ˈOlic a tamdaw sanay: ‘O cima . . . halamhamay to Kawas ningra ci Yihofaan i, o lipahakay! O Kawas . . . o soˈliˈlinay ngaˈayay tadiˈecen.’—ˈOlic 146:5, 6 ato roma pihongyak. w22.10 27 fiedac 15 fatac; 28 fiedac 17 fatac

Pakayni miliyaw tomireng ko matatodongay pidoko a sapairasol, malaˈosiay anini han? Hayi. Samaanay malaˈosi hani? Mikitini 1919 miheca misatapang, masacaˈolay masaemangay a tamdaw miliyasay to mararaway pihakelongan, mihepol to safakec no Taˈangayay Papilon, micomod i lakoing no midokoay a pakayraan. Onini a sera ikakaay ko kangaˈay to Mikiˈokan ni Yihofa pafeli to Israil tamdaw a Sera. (Isaya 51:3; 66:8) Mikitini 1919 miheca misatapang, manilnilay no fangcalay saocor a Krisciyang padotocay itini lakoing no midokoay a pakayraan maˈorip. Ikor, ‘roma lopayˈay siri,’ oya iraay ko tokel itini fafekang no sera tahadaˈoc maˈorip a tamdaw, micomoday tonini a lakoing, hanaca milifokay to kadofahay a sapalemed ni Yihofa. (Yohani 10:16; Isaya 25:6; 65:13) Midokoay ci Yihofaan a tamdaw miedefay i paro no kakarayan, mihaenay icowacowa pala no hekal iraay ko lakoing no midokoay a pakayraan. Ano icowaayto ko kitiraan iso toniya hekal, ano tawlikay kiso mirienang to matatodongay pidoko, o masalalomaˈayto nonini a lakoing. w22.11 11-12 fiedac 12-15 fatac

Ci Yihofa o ‘midaˈocay a Kawas,’ pasangaran nanay kiso cipinang to mahaenay a harateng han? (Isaya 40:28) Soˈlinay i, mahaenay ko piharateng no roma tamdaw. Sanay ci Iliho: ‘O tadamaanay ko Kawas, caay ko mamafanaˈ kita. Caay ko mamafilo ita a misaˈosi ko mihecaan Ningra.’ (Yopu 36:26) Kawra ano cowa ka cipinang kita to maanan a demak i, o mararawayto konini demak cowa ka saan. Tinakoen, alatek cowa ka cipinang to rakat no tedi a pakayraan, kawra paihkalay koni o cowa ka terek ko tedi han? Cowa! Malecaday, kita o tamdaw pakayni ci Yihofaan to materekay nai ti:yaho, tangasa i daˈoc sanay a harateng alatek cowa ka songilaˈ cipinang kita, kawra cowa ka ngaˈay kita eca pakasoˈlin to o tahadaˈocay ko Kawas. Ano cipinangay anca cowa ka cipinang kita, pakayni i demak no Misangaˈay a Tatapangan cowa ko mamafalic. (Loma 11:33-36) Iˈayaw no masadak ko cidal, ato romaroma tedi ato polong no dohaw i, materekayto ko Kawas, iˈayaw no ‘micelak to kakarayan’ materekayto ci Yihofa.—Yirimiya 51:15. w22.12 2-3 fiedac 3-4 fatac

Latekay patadoay kita to tao a mitolon. Tinakoen, cecay fafahiyan salikaka mirienang to pacekiway i, misikayay a fafahiyan salikaka mitahidang cingranan a mitolon alatek. Ano cowa ka tada mafanaˈ cingra tonini a pacekiwan, ngaˈay cingra mipiliˈ itini kahererek no picekiw a mitolon, mihaen o pitolon ningra mamatatodong to saali no pacekiwan a tamdaw. O cecay faˈinayan salikaka manilnilay itini ˈayaw no mitosilay a saˈopo anca itini saˈopo no kasakopang a mitolon, toniya tatokian, haratengen no faˈinayan salikaka o araaw no saˈopo, miharatengho o satolon cowa ko sapisalofaw to salikaka anca milasil to demak. Itini adihayay saˈopo no kasakopang, romadiw ato mitolon 5 aca efon. Mihaenay, citatodongay mitolon a faˈinayan salikaka cowa ka ngaˈay adihay ko sowal. Mangalef itini satapang no saˈopo, o mamisinanot ko faˈinayan salikaka tonini.—Matay 6:7. w22.07 24 fiedac 17-18 fatac

Paˈayaway ci Yis itini salikoray romiˈad, ‘icowacowa’ wa ira ko lifong. (Luka 21:11) Mafanaˈ tonini a sapairasol wa padama kitaanan milifok to rihaday, misamaanay? Mifekad ko lifong i, cowa ko mamarawraw kita, samanen mafanaˈay to mamahecad to misowalan ni Yis ko kalingad no demak. Mihaenay, mamitengil kita to limoˈot ni Yis to itiniay salikoray romiˈad maˈorip a tamdaw, sanay cingra: ‘Aka a marawraw.’ Maedeng misasifoday ko lifong to nokaˈorip iso, kawra aka a papicaraen ko lifong tisowanan misongilaˈ micekiw ato mirienang to saˈopo. Itini cudad ita ato ika adihayay ko nalifetan no tamdaw, padamaay konini kitaanan miharateng, soˈlin misiˈayaw ko ˈalomanay salikaka to malecaday a pasangaray, kawra kamayan padadotoc madimadi ci Yihofaan. w22.12 17 fiedac 4, 6 fatac

Ci Yakop tada mikiriwiˈay ko kaolah ci Yosifan, hato maˈinapay ko kakakaka ci Yosifan. (Satapangan 37:3, 4) Oranto i, miˈametay cangra to cecay tatokian, pacakayan ci Yosif to misasingdiay no Mitiyan tamdaw. Mialaan noya misasingdiay ci Yosif patayra i Icip, pinaay soˈot a kongli ko karaay, ikor pacakayan haca ci Potifaran, o tapang no misimaway ci Falawan cingra. Tada taˈangayay ko kafalic no kaˈorip ni Yosif, talifahal sa nao kaolahan no wama a wawa malo koliayto no Icip a tamdaw. (Satapangan 39:1) O kahacecay tamdaw tatahalifa to tatiihay a demak alatek. Nolatekay, o malifaay ita a pasangar ‘nao malifaay no romaroma tamdaw,’ tatodong i, o mahaenay a pasangar o mamalifa no kahacecay a tamdaw alatek. (1 Korinto 10:13) Kawra nolatekay mapasemsem kita, samanen o Krisciyang kita, tinakoen pakayni i pihakelongan tahacadaay kita to salikaf, safelit anca makariˈang. (2 Timoti 3:12) Ano o mananto ko malifaay iso a sapalifet, wa ngaˈay ci Yihofa palaˈosi tisowanan. w23.01 14-15 fiedac 3-4 fatac

Ano mapakararaw no salikaka kita, latek kakilimen ita cingra masasowal. Kawra o sangaˈayay i, licayenho ko niyah: “Cipinangay kako to emin a demak han?” (Taneng 18:13) “Latek cowa ko mipadetengan nora salikaka han?” (Patnakay 7:20) “Itiyaho kako iraay ko mahecaday a raraw han?” (Patnakay 7:21, 22) “Ano tayra kako mikilim cingranan i, mamangalef a tatiih kora demak han?” Ano songilaˈen ita miharateng konini salicay, latek mamahapinang to mamitawmec kita to olah a misodod tora salikaka. Sasamaan kita paihkal to soˈlinay a Krisciyang ko niyah hani? Ano mapakararaw no nima salikaka anca patalahkal to maanan a dangoc ko salikaka i, wa kamayan kita mitawmec to caay ka pisateked a olah micada cangranan. Mihaen to demak ngangaˈay padama to tao pakahapinang to matatodongay ko pihakelongan no mita, padama cangranan kalacafay kitaanan midoko to matomesay ko olah a Kawas ci Yihofa. Nanay misetek to falocoˈ kita padadotoc patalahkal to soˈlinay ciolahay a falocoˈ, paihkal to soˈlinay a Krisciyang ko niyah. w23.03 31 fiedac 18-19 fatac

Ihkalay pahapinang ko Fangcalay Cudad, o sakakaay a capeling ni Yihofa o olah. Tada maolahay ci Yihofa kitaanan, mansa cowa ka haemin han a mitilid ko maamaan i Fangcalay Cudad, ano mahaen i, cato ka tomesengen kita. (Yohani 21:25) Haratengen hena, itini Fangcalay Cudad cowa ka pafeli ci Yihofa kitaanan to adihayay a saˈosi, miˈimer to cecacecay a demak ita, ao mitiliday to adihayay nalifetan no tamdaw, sapairasol ato ciepocay a sapaini, ho ngaˈay kita o niyah sa misimsim a misaˈosi. Mihaenay i, mitemeray to falocoˈ no mita ko Kimad no Kawas, wa mikifalocoˈto kita maolah ato midofdof Cingranan. Tano mikangodoay a pakayraan ci Yihofa a masasowal kitaanan, patalahkalay konini to maolahay Cingra kitaanan. Patalahkalay ko Fangcalay Cudad to tada ciharatengay ci Yihofa kitaanan. Hano haenen ko sowal hani? Itini Fangcalay Cudad adihayay ko maˈoningay a nalifetan no ˈalomanay tamdaw. O ‘malecaday to pinangan ita’ cangra, mansa ngangaˈay malecad ko harateng ita cangranan. (Yakop 5:17) Kalimlaan i, maˈaraw to samaanay ci Yihofa micada cangranan, mamatongal ko kacipinang ita, ‘ci Yihofa matomesay to damsayay, hanaca siniˈadaay to tamdaw.’—Yakop 5:11. w23.02 5-6 fiedac 13-15 fatac

O salikoray a cudad no Fangcalay Cudad mitekaay a pasowal: ‘O sapafeli no Kawas ci Yis Kristoan a sapaˈaraw konini, o mamifekad noikor a demak, pasayra i koli no niyah a mitadtad.’ (Paˈarawan 1:1) Mihaenay i, o caciharateng kita to kalingad no demak no hekal, to sakafanaˈaw to samaanay malaˈosi ko sapairasol no Fangcalay Cudad. Alatek makalimay kita to sapilengoaw to tao pakayni tonini a demak. Nikawrira, ano milengo to sapairasol no Fangcalay Cudad to tamdaw i, aka saolatekay sa pasowal. Misamaanay hani? Samanen cowa ka olah kita mikidat ko sowal ita to sakaliwasakaw no kasakopang. Tinakoen, alatek matengil ita ko ˈaˈideman no mirikecay somowal to ngangaˈay cangra misaysay to kasasongtol no kitakit, paira to dipayal rihaday no tamdaw ano saan. Itiya i, cowa ka ngaˈay kita saolatekay sa miharateng, to malaˈosiayto ko sapairasol no 1 Tisalonika 5:3, ao mamisinanot to safaelohay a mitepangan no likakawa no Kawas. Ano malalengo kita to salikaka pakayni tonini sapairasol i, salalangien ko safaelohay a lalakaw, ho ngaˈay malacecayto ko pinengneng no mita, micowat to kakedec no kasakopang.—1 Korinto 1:10; 4:6. w23.02 16 fiedac 4-5 fatac

Hano maolah kiso ci Yis Kristoan hani? Fanekfekay ko olah ni Yis to soˈlinay kimad, misapoeneray ko waywayan, midemakay to moecelay. Kiso ano maolahay to soˈlinay kimad ato moecelay i, o mamaolah i cingranan. Maedeng maharatengayho iso, na timoloay ci Yis a miˈading to soˈlinay kimad ato moecelay. (Yohani 18:37) Samaanay ci Yis pasifanaˈ kitaanan minanam to misapoeneray hani? Patirengay ci Yis to taˈarawan, pakacipinang kitaanan o maanan ko tatodong no misapoeneray. Tinakoen, kihcod a ˈdil panokayan ningra i kakarayan a Wama, ao cowa ko niyah. (Marko 10:17, 18; Yohani 5:19) Maˈaraw ko pisapoener ni Yis, samaanay ko harateng iso hani? Coko maolahay kiso cingranan, sapikotodaw cingranan han? Maedeng hatiraayto. Misamaanay hano misapoener ci Yis hani? Samanen maolahay cingra to kakarayan Wama, mitodong to ngaˈayay taˈarawan Ningra a misapoener. (ˈOlic 18:35; Hipray 1:3) Malefotay ci Yis a mitodong to masakenakenaay makapahay a capeling ni Yihofa, coko tangongolay a masolot ningra kiso han? w23.03 3-4 fiedac 6-7 fatac

Masowalay no Fangcalay Cudad, ira ko tosa ˈopo a tamdaw wa patikol maˈorip i fafekang no sera, hanaca ira ko tokel tahadaˈoc maˈorip. Cangra i, o ‘moecelay a tamdaw’ ato ‘cowa ka moecel a tamdaw.’ ‘Moecelay a tamdaw’ oya ˈayawho no mapatay madimadiayto midoko ci Yihofaan a tamdaw. ‘Cowa ka moecel a tamdaw’ cowa ka pihaen. Oniya tosa ˈopo a tamdaw ano papatikol maˈorip, o mamatilidto ko ngangan nangra i sakaˈorip a cudad hokira? Itini ˈayaw no mapatay, matilidayto ko ngangan no ‘moecelay a tamdaw’ i sakaˈorip a cudad. Mihaenay, tiya mapatay cangra i, wa mafalah ko ngangan han? Cowa, samanen padotocay cangra maˈorip itini piharateng ni Yihofa. Ci Yihofa ‘cowa ko Kawas no mapatayay a tamdaw, ao Kawas no maˈoripay a tamdaw, samanen itini pinengneng Ningra, sahtoay o maˈoripay cangra.’ (Luka 20:38) Tatodong nonini, ano patikol maˈorip ko moecelay tamdaw i fafekang no sera i, wa kamayan ira ko ngangan nangra i sakaˈorip a cudad, edeng kamayan o tano impican a mitilid.—Luka 14:14. w22.09 16 fiedac 9-10 fatac

Nisangaˈ ci Yihofa to saka cecay tamdaw ci Ataman i, halamhamay cingranan misongilaˈ a minengneng to nisangaˈan a maamaan. Paitinian ni Yihofa cingra i makapahay a palosayan misolap a minengneng, halo palimoˈot cingranan pamatang to palosayan, ikor misakakahad tonini a palosayan. (Satapangan 2:8, 9) Maedeng maˈaraw ni Atam ko kamolecis no sapaloma, mafociyar ko hana i, tada lipahakay a mahemek cingra! Midimokos to makapahay a Itin a palosayan, tada o taˈangayay a sapalemed cingranan. Papipanganganan ni Yihofa ci Atam to masakenakenaay a pinaˈorip. (Satapangan 2:19, 20) Soˈlinay i, ngaˈayay ci Yihofa midemak tonini a tayal, ˈarawhan pafelian Ningra ci Atam a papidemak. ˈAyaw no papangangan to pinaˈorip i, mamisongilaˈ ci Atam minengneng to kahacecay a pinaˈorip, mafanaˈ to pinangan namira. Maedeng palipahakay ci Ataman konini, iraho ko toki ningra matongal ko kafanaˈ to kakarayan Wama, matongal ko kasemer to taneng no Wama misangaˈ to makapahay ato kafahkaˈan a kihcod. w23.03 15 fiedac 3 fatac

Ooˈ noya taˈangayay faco mitaypiyaway to Ikok ato Padaka Ciˈicelay Mikowanay no Hekal, o salikorayto a pairasolan no Fangcalay Cudad a ciˈicelay kitakit. (Taniil 2:31-33) Ikor awaayto ko roma ciˈicelay mikowanay no hekal. Tiya palaˈafoen no Hongti Kitakit no Kawas i Armakiton ko kihcod a sifo no hekal i, o mamalahdaw ko Ikok ato Padaka Ciˈicelay Mikowanay no Hekal. (Paˈarawan 16:13, 14, 16; 19:19, 20) Onini a sapairasol pakayni kitaanan iraay ko maanan a epoc? O sapairasol ni Taniil padamaay kitaanan pakasoˈlin, itiniayto kita i salikoray ˈawaled maˈorip nohatini. Itini ˈayaw no 2,500 miheca paˈayaway ci Taniil, itini ikor no Papilon wa iraho ko sepat ciˈicelay mikowanay no hekal taˈangayay ko pifiyor to finawlan no Kawas. Roma i, patalahkalayho cingra o salikorayto ko Ikok ato Padaka Ciˈicelay Mikowanay no Hekal. Pairaay to sahinom ato hatokel ita konini, samanen wa kalikito o papalaˈafoen no Hongti Kitakit no Kawas ko polong a sifo no hekal, hanaca misatapang a mikowan to polong no cikiw. w22.07 4 fiedac 9 fatac; 5 fiedac 11-12 fatac