Saka 6 Folad

Tangongolay ko kalawidang ni Yopu ci Yihofaan, rihadayay a malacafay ko paro no lomaˈ ningra. Roma i, tada cihafayay cingra. (Yopu 1:1-5) Kawra lalomaˈ no cecay romiˈad, malahdaway ko kihcod ningra. Salakat, malahdaway ko hafay ningra. (Yopu 1:13-17) Ikor, mapatayay ko polong a wawa ningra. Haratengen hena, toya romiˈad mafanaˈ ci Yopu ato fafahi oya moetepay wawa mapatayay maemin, hakowaay ko kacekid, kasomad ato katoled nangra! Mansa cicih han ni Yopu ko rikoˈ, mipitoros i sera. (Yopu 1:18-20) Dotoc, paadadaan ni Satan ci Yopu to katalawan a adada, pakangodo cingranan. (Yopu 2:6-8) Isalakat misakaretengan no tamdaw ci Yopu, pasayraay cingranan ko ˈalomanay tamdaw micangacang to sakayat. (Yopu 29:7, 8, 21) Kawra nohatini miliyasay ko ˈalomanay cingranan, cowa ko salikaka aca ato widang ningra, halo koli ningra mapiliˈayto cingranan.—Yopu 19:13, 14, 16. w22.06 21 fiedac 5-6 fatac

Ikor no micada to paputisem, kita o kahacecay tamdaw mamidofdof to sapalimoˈot no tarokos ci Pawlo to itiniay Ifiso a Krisciyang. Sowal ningra o Krisciyang o ‘papadadotoc a lomahad,’ sakoniya sowal wa padadotoc a macakat. (Ifiso 4:13) Na maolahayto kiso ci Yihofaan, kawra o papadadotocho kiso mitongal to olah Cingranan. O tarokos ci Pawlo itini Filipi 1:9 mihadakay to cecay pakayraan. Patadoay ci Pawlo to Filipiay a Krisciyang mitolon, halamham cangranan ‘matongal matongal ko ciolahay falocoˈ.’ Mihaenay, o olah ci Yihofaan ngaˈayay tongalen, o hapakayraan i, ‘ira ko matatodongay a sifanaˈ, masongilaˈ ko kacipinang to demak.’ Matongal ko kafanaˈ ita ci Yihofaan, mamatongal ko olah Cingranan, matongal ko kasemer to capeling Ningra ato pinangan a dademak. Mihaen, mamatongal ko kalim ita pakahemek ci Yihofaan, cowa ko caciharateng midemak to patoleday Cingranan a demak. O mamisaˈicel kita mihapinang to o manan ko araaw ni Yihofa, ato sasamaan mitoor to harateng Ningra a midemak. w22.08 3 fiedac 3-4 fatac

O Paˈarawan cowa ko pakayniay i kalo a tamdaw a tiliden, ao pakayniay i kitaanan o midokoay to Kawas a tamdaw a tiliden. O finawlan no Kawas kita, mihaenay ano malaˈosi ko sapairasol no Paˈarawan i, oha mamirienang kita i lalomaˈ, cowa ko fafahkaˈ kita tonini. Tarokos ci Yohani masowalay konini a sapairasol to aicowa a lintad malaˈosi, sowal ningra: ‘O fangcalay saocor paitiniay i takowanan i romiˈad no Tapang.’ (Paˈarawan 1:10) O malitengayto a Yohanian mitilid tonini a sowal i, maedeng itiniay i Kongyen 96 miheca, itiya o ‘romiˈad no Tapang’ mara:ayayho. (Matay 25:14, 19; Luka 19:12) Mikitini sapairasol no Fangcalay Cudad, 1914 miheca mala hongtito ci Yis itini i kakarayan i, o ‘romiˈad no Tapang’ satapang sanayho. Mikitiya tora mihecaan misatapang, ilalomaˈay no Paˈarawan to pakayniay i finawlan no Kawas a sapairasol padadotocayto a malaˈosi. Kita nohatini itiniayto i ‘romiˈad no Tapang’ a maˈorip!—Paˈarawan 1:3. w22.05 2 fiedac 2-3 fatac

O ˈaˈadopen ato makaniway pairasolay itini kaˈoripho fafahkolen i marengrengay ko namal a fanaw.’ Mihaenay, onini a misaˈadaay to Kawas a sifo itini pikowan nangra a tatokian, o sasongilaˈen no Kawas a palaˈafo cangra. Onini a demak pakayni kitaanan iraay ko maanan a tatodong? O Krisciyang kita, o mamadimadi to Kawas ato Hongti Kitakit Ningra. (Yohani 18:36) Itini mirikecay a demak o papadadotoc kita to misatenokay a saaroˈan. Kawra mihaen to demak cowa ko madoloay, samanen o sifo no hekal misaaliay to finawlan itini sasowalen waywayan midama cangranan. Itini i saroero ano mapadik ko cecay tamdaw, midama to sifo ecato ka madimadi to Kawas, malecaday o micadaay to tahapinangan no ˈaˈadopen. (Paˈarawan 13:16, 17) O cima ano micada to tahapinangan no ˈaˈadopen, wa malahdawto ko pihayda ni Yihofa, cato pilifok to midaˈocay a ˈorip. (Paˈarawan 14:9, 10; 20:4) Mihaenay, ano hakowato ko taˈangay no saroero, kita o kahacecay tamdaw itini i mirikecay a demak o mamitafo to misatenokay a saaroˈan. w22.05 10-11 fiedac 12-13 fatac

Ngaˈayay patirengen iso a patosokan i, minanam to ciepocay a inaneng. Ano palahad kita ato misalof to inaneng no niyah, wa ngaˈayto mitongal to tayal saki Yihofaan. Haratengen hena, ano misangaˈ a patireng to Pitil, pitaykayan ato Hongti Kitakit a Kasaˈopoan i, misaaliay to ˈalomanay tamdaw. ˈAlomanay mirienangay toniya tayal a tamdaw malacafay to iraay ko nalifetan a salikaka, milifok to adihayay ciepocay a inaneng. Anini, ano faˈinayan salikaka anca fafahiyan salikaka, maminanam to pina inaneng, mitomadaw to Kasaˈopoan ato Pitaykayan. Cowa ko fafekangay aca a tinakoan, itini adihayay a pakayraan o ‘midaˈocay a Hongti’ ci Yihofa a Kawas ato ‘Hongti no hongti’ ci Kristo misaka dademakay to inanengay a matayalay tamdaw, palaˈosi to adihayay kasapaan a demak. (1 Timoti 1:17; 6:15) Soˈlinay makalim kita misaˈicel misaka dademak to inaneng no niyah paˈodingar ci Yihofaan, cowa ko paˈodingar to niyah.—Yohani 8:54. w22.04 24 fiedac 7 fatac; 25 fiedac 11 fatac

Tada cihafayay ci Solomon, tada idahiyay ko kaˈorip. (1 Hongti 10:7, 14, 15) Masafelitay, cowa ka adihay ko dafong ni Yis, awaay ko masaˈosiay a kitiraan. (Matay 8:20) Nikawrira, cangra tatosa matatodongay ko pinengneng to payci, samanen iraay ko mikitiniay i Kawas ci Yihofaan a taneng nangra. Sowal ni Solomon, ira ko payci, ngaˈayto kita milifok to sakaˈorip a dafong, ngaˈayho micakay to kaolahan no niyah a dafong. Kawra cihafayay a Solomon cipinangay, o roma a demak mikikakaay to payci masakalimlaan. Tinakoen, sanay cingra: ‘Mipiliˈ to makapahay ngangan ikakaay to pipiliˈ to hafay.’ (Taneng 22:1 ato roma pihongyak.) Mahapinangay ni Solomon, maˈanofay to payci a tamdaw ano hakowato ko adihay, pasangaray a marenec. (Patnakay 5:10, 12) Patalipaˈelalay cingra to tamdaw aka patoroden i payci ko hatokel, samanen o payci cecay pedek no mata malahdawayto.—Taneng 23:4, 5. w22.05 21 fiedac 4-5 fatac

Misongilaˈ kita miharateng to iraay nohatini a sakaraheker no niyah, o papaˈicel to kalawidang ci Yihofaan; misongilaˈ kita miharateng mamilifokho to maanan sapalemed noikor, mamatongal ko pakasoˈlin ita to sapafeli no Kawas a hatokel, pakasoˈlin to tatahadaˈoc ko niyah itini i faelohay a hekal midoko Cingranan. Midotim toniya demak aniniho wa ngaˈayto kita ira ko lipahak matayal saki Kawas. O ‘mamidemak’ ci Yihofa palaˈafo tonini ciraraway a hekal. Pakasoˈlinay kita ‘o masadafdafay a Kawas ci Yihofa.’ Maharekayto Cingra mitoor to masadafdafay palinian Ningra misaˈosi to sapisawkitaw a toki, cowa ko papanayar to cecay romiˈad materek ko hekal ni Satan. (Isaya 25:9) Mihadidi kita malacafay ci Yihofaan a mitala, tahira kairaan no pilidongan a romiˈad Ningra. Toniya tatokian, misetek kita to falocoˈ padotoc mitolon, micekiw ato misaka dademak to Kimad no Kawas, hanaca misongilaˈ midotim to sapalemed Ningra kitaanan. Mihaen, o papadamaen ni Yihofa kita padadotoc a mihadidi, padadotoc lipahak midoko Cingranan. w22.11 13 fiedac 18-19 fatac

Soˈlin cowa ka somowal ko Fangcalay Cudad to picada ni Timoti to paputisem, kawra cowa ka pasangar haratengen ita, maedeng mahemekay ko wina ningra ci Iunici itiya! (Taneng 23:25) Padadotocay ci Iunici pasifanaˈ to wawa maolah ci Yihofaan aci Yis Kristoan, o nano roray i adihayay mihecaan iraayto ko minaroˈan. Cowa ka hecad ko pihakelongan no wama ato wina ni Timoti. O Krisiya a tamdaw ko wama ni Timoti, o wina ato fofo o Yutaya a tamdaw. (Dmak 16:1) Maedeng itini moetep ira ko pina ko mihecaan ni Timoti i, pakasoˈlinay ci Iunici aci Lois to Kristokiyo, kawra o wama ni Timoti cowa ka malo Krisciyang. Wa mipiliˈ ci Timoti to maanan hani? Anini, malo winaay a Krisciyang mahecaday ci Iunician maolahay to paro no lomaˈ. Misaaretengan nangra i, padama to wawa patireng to kalawidang ci Yihofaan. Tada masemeray ci Yihofa to mihadakan nangra a ˈicel. (Taneng 1:8, 9) Maharekayto Cingra padama to ˈalomanay a wina pasifanaˈ to wawa maolah ato midoko Cingranan. w22.04 16 fiedac 1-3 fatac

Kakaliki, o paparoen ni Yihofa ko ‘harateng no Niyah’ i falocoˈ no kalo kitakit, ‘papidemak’ cangranan. Telocto samaanay hani? Oya ‘moetepay hongti’ mitaypiyaway to kalo kitakit mamifekad to saˈodis, palaˈafo to mararaway pihakelongan. (Paˈarawan 17:1, 2, 12, 16) Hano mafanaˈ kita o ‘Taˈangayay Papilon’ wa kalikito mahererek hani? Itini nolitengan, o niyaroˈ no Papilon iraay ko ˈAlo no Iufratis midipotay. Malecaday, o Taˈangayay Papilon iraay ko ‘ ˈalo’ midipotay, o sadama no masawalwalay a mihakelongay tamdaw. (Paˈarawan 17:15) Kawra somowalay ko Paˈarawan onini a ‘ ˈalo’ o mamakerah, mitaypiyaway o mamalahdaw ko ˈalomanay mihakelongay a tamdaw no mararaway pihakelongan. (Paˈarawan 16:12) Matatodongayto konini a sapairasol anini, miliyasayto ko ˈalomanay tamdaw to mararaway a pihakelongan, pasayraay i roma kitiraan micangacang to sakayat. w22.07 5-6 fiedac 14-15 fatac

Misodod kita to tao paihkalay to miakoˈiday ko niyah ci Yihofaan. Itini ci Yis i cecay sapatinako, patinakoay ci Yihofaan to cecay a tawki. Onini a tawki palasawadan ko adihayay a tadah no cecay a koli, onini a tadah ano tahadaˈocto cowa ko mamapatikol nonini a koli. Kawra onini a koli caay kakahi misodod to roma citadahay cingraanan a koli, soˈlin o tadah nora tamdaw cingraanan cowa ka hakowa, kawra cowa kakahi cingra misodod. (Matay 18:23-35) Mikitini sapatinako ni Yis mananamay ita ko maanan hani? O paihkalan ni Yihofa kitaanan a siniˈada awaay ko pakaliniay, ano soˈlin kita miakoˈid Cingraanan, o mamakahi misodod to tao. (ˈOlic 103:9) O iˈayaway a Mikecolay sanay ko sowal: “Ano kinapinato kita misodod to tao, cowa ko papakalini to nano demak ni Yihofa kitaanan, samanen pakaynian Ningra ci Yis Kristoan taˈangay ko pisodod to raraw ita, paihkal to taˈangayay a siniˈada kitaanan.” Misodod to tao, o mamilifok ko niyah to sasodod. Siniˈadaay ci Yihofa to siniˈadaay to tao a tamdaw. (Matay 5:7) Itini sapasifanaˈ ni Yis to nisawawaan a satolon i, mitadtaday tonini.—Matay 6:14, 15. w22.06 10 fiedac 8-9 fatac

Tayni ci Yis i fafekang no sera i, malefotay patalahkal to capeling no kakarayan a Wama. (Yohani 14:9) Pakayni pinanam to nano demak ni Yis, mafanaˈay to kita ci Yihofaan a Kawas halo palahad to olah Cingranan. O sapasifanaˈ ni Yis ato anini sakayat ningra i kasakopang no Krisciyang adihayay ko malifokay ita a epoc, mafanaˈho kita to sasamaan mitoor to mihaydaan ni Yihofa a pakayraan dademak ato waywayan. O roma i, kapatay ni Yis Kristo palemeday kitanan to polong a tamdaw. Patikol maˈorip ci Yis ikor, cadaan ni Yihofa ko malefotay patafangan ni Yis a sapatoˈaya, onini sapatoˈaya ‘mikoracay to kihcod a raraw no mita.’ (1 Yohani 1:7) Ci Yis nohatini malo kasapaanto ko ˈdil, tahadaˈoc cowa ko mamapatay a Hongti. Cato ka halafin, ci Yis mamipesiˈ to fongoh no ˈoner. (Satapangan 3:15) Itiya i, o madimadiay midoko to Kawas a tamdaw wa hakowa ko kaacang a mahemek! Itini ˈayaw nonini, aka a pisawad. O soˈlinay ngaˈayay tadiˈecen ko Kawas ita, wa pafeli Cingra to awaay ko tolas kadofahay a sapalemed i ‘kalo kitakit i fafekang no sera!’ w22.07 18 fiedac 13 fatac; 19 fiedac 19 fatac

Patireng to patosokan i, mamakahi kita mifalic. Misamaanay hani? Samanen adihayay a demak cowa ka ngaˈay kita miˈimer. Nengnengen ko tinakoan no tarokos ci Pawlo, itini Tisalonika padamaay cingra patireng to cecay faelohay a kasakopang. Kawra, tahalifaay ci Pawlo to pisafelit, mapacieciay miliyas itira. (Dmak 17:1-5, 10) Ano padadotoc ci Pawlo materek itira, o papaira to katalawan no salikaka alatek. Soˈlin mamiliyas cingra, kawra cowa ka pisawad cingra padama to itiraay a salikaka. Tawlikay cingra misiˈayaw to kafalican, ikor miocor ci Timotian padama to faelohay a salikaka i Tisalonika, paˈicel to pakasoˈlinay falocoˈ nangra. (1 Tisalonika 3:1, 2) O Tisalonikaay a Krisciyang maedeng tada lipahakay! Mikitini taˈarawan ni Pawlo mananam ita ko maanan hani? Patirengay kita to patosokan alatek, kawra ikor mifekaday ko cowa ko mamaˈimer a demak, hato cowato ka laˈosi ko patosokan ita. (Patnakay 9:11) Ano mahaenay ko demak i, mamakahi kiso a mifalic, mipiliˈ to roma ngaˈayay malaˈosi iso a patosokan. w22.04 25-26 fiedac 14-15 fatac

Itini i Fangcalay Cudad ihkalay ci Yihofa mitadtad, iraay ko hanoikor ita, iraay ko hatokel, padama kitanan ano tahalifa to sapalifet i, mamalifok ko sahinom. Nengnengen ko pina tinakoan. Mikiˈokay ci Yihofa kitanan, ano o mananto cowa ko mamaketon ko olah Ningra kitanan, soˈlinto pakidem ko sapalifet cowa ko mamaketon. (Loma 8:38, 39) Mikiˈokayho ci Yihofa, polong pakayniay i satolon micangacang Cingranan i, o ‘aingiden Ningra cangra.’ (ˈOlic 145:18) Sowal ni Yihofa, ano tiˈeren ita Cingra, o ngangaˈay mihadidi to masakenakenaay a sapalifet, ano itinito i kapadesan, kakamayan a lipahak. (1 Korinto 10:13; Yakop 1:2) Patalipaˈelalayho ko Fangcalay Cudad kitanan, o sapafeli no Kawas kitanan a sapalifon o midaˈocay, palalinien tonini a sapalifon, o malifaay ita a sapalifet nohatini o cecayay aca liyad o kahmaway. (2 Korinto 4:16-18) Pafeliay ci Yihofa kitanan to tanektekay a hatokel, padama kitanan mafanaˈ noikor o papalahdawen Ningra ko kihcod lalengatan no sapalifet, oya ci Akoma Satan ato mikotoday cingranan tatiihay ko demak a tamdaw. (ˈOlic 37:10) Maharatengay iso ko pina mihinomay a sinael, padama tisowanan ano tahalifa to sapalifet noikor papadotoc a mihadidi han? w22.08 11 fiedac 11 fatac

Maharateng to romiˈamiˈad, to mihecahecaan mitoor to moecelay a palinian ni Yihofa maˈorip, cacalemcemen kiso cowa ko mamadangar no niyah han? Mikiˈokay ci Yihofa, o moecelay ita ‘mamalecad o tapelik no riyar.’ (Isaya 48:18) Haratengen hena, itini kaˈayaw iso o kakahaday a riyar, cecay kiso awa ko adeses a minengneng dadotodotoc sa ko tapelik pasayra i lawac no riyar a talaˈayaw. Toniya tatokian, cacalemcem kiso itini cecay romiˈad fahal sa malahdaw ko tapelik han? Cowa ko mamahaen, samanen mafanaˈay kiso pinaayto caˈol a mihecaan, padotocay ko tapelik pasayra i lawac a mitapesiˈ, mahaenay anini, wa kamayan mahaen no ikor. Sasamaan ko demak iso ho ngaˈay padama to moecelay no niyah malecad o tapelik hani? Ano mamisaˈosi i, salakatenho miharateng makalimay ci Yihofa sasamaan ko demak iso, dotoc tooren a midemak. Ano samaanto ko pasangar a midemak, o ciolahay a Wama i kakarayan papadotoc midama tisowanan, padama tisowanan to romiˈamiˈad mitoor to moecelay palinian Ningra a maˈorip.—Isaya 40:29-31. w22.08 30 fiedac 15-17 fatac

Mahererek ko 1,000 miheca i, papasadaken ci Satan, mamisaˈicel cingra mikayhid to malefotay tamdaw mihakelong cingranan. Toya pipalifetan, polong malefotay tamdaw i fafekang no sera iraay ko toki paihkal to mikangodoay ko niyah to fangcalay ngangan no Kawas, midopo to saˈakawangay fadangalan Ningra mikowan. (Paˈarawan 20:8-10) Toya tatokian o mipiliˈan no kahacecay tamdaw, mamisaˈosi to tatahadaˈoc materek ko ngangan ningra i sakaˈorip a cudad hokira. O cowa ka saˈosi ko ˈaloman a tamdaw mamalecad ci Ataman aci Ifaan manaˈay to pikowan ni Yihofa. Sasamaan ko teloc nangra hani? Itini Paˈarawan 20:15 sanay: ‘O cima cowa ka tilid ko ngangan i sakaˈorip a cudad, o mamafahkol i marengrengay ko namal a fanaw.’ Onini a mitowakangay tamdaw mamasongilaˈ a malaˈafo, kawra ˈalomanay malefotay a tamdaw mamilakowit tonini salikoray a sapalifet, o ngangan nangra tatahadaˈoc materek i sakaˈorip a cudad. w22.09 23-24 fiedac 15-16 fatac

Itini saka 1 hahekalan no kasakopang sowal no roma tamdaw mamicada to kerit ko ˈAlafang a Krisciyang sanay, misaaretengay cangra to mahaenay a sasowalen, sapiliyasaw to pilikaf no papotalay no kasakopang a Yutaya tamdaw sanay ko harateng alatek. (Kalatiya 6:12) Cowa pihayda ci Pawlo to mahaenay a harateng, kawra cowa pacieci cingra to tao micada to harateng ningra, ao misapoeneray ko falocoˈ patorod tonini a demak to itiniay Yirusalim a tarokos ato malohemay malitengay a misaysay. (Dmak 15:2) Mihaen ko demak ningra cowa ko pitafo aca to rihaday no kasakopang, padamaayho to salikaka ngaˈay padadotoc lipahak a matayal saki Yihofaan. (Dmak 15:30, 31) Ano mifekad ko pakidemay lacongis i, ngaˈayay kita pasayra i misaka dademakan ni Yihofa midimokos to kasakopang a tamdaw micangacang to mikitiniay i Fangcalay Cudad a sakayat, o hatiniay a sakayat tocerid ngaˈayay itini mitepangan no likakawa a cudad ato sakayat a mahela. Tooren ita konini a sakayat midemak, eca ka koˈesit to no niyah a harateng, mihaen ngangaˈay patongal to rihaday no kasakopang. w22.08 22 fiedac 8-9 fatac

Latekay misaaliay kita mikilim to ngaˈayay widang mifowah to nafalocoˈan, kawra mihaen to demak cowa ko madoloay alatek. Cowa ka nanam kita pasowal to tao to nafalocoˈan ita a harateng alatek. Ano mahapinang ita konini a widang pasowalan ningra ko tao to nano sowal ita cingranan, wa matongalto ko dokaˈ. Kawra, ano patado ko widang mitafo to mahimeday a demak no mita, o mamiakoˈid kita cingranan. Mitafoay to mahimeday a demak a malohemay malitengay malecaday ‘pikiˈadingan to faliyos, ato pikiˈadingan to ˈorad.’ (Isaya 32:2) Ano o mananto a sowal wa ngaˈay pasowalen ita cangra, samanen pakasoˈlinay kita cangranan cowa ko papasowal to tao. Roma i, cowa ko mamiroero kita cangranan, misaali cangranan pasowal to notekedan a demak no tao. Roma i, o fafahi no malohemay malitengay ngaˈayay pakahemeken, samanen cowa ka pisaali cangra to faˈinay mihadak to cowa ko hakafanaˈan no niyah a demak. O malohemay malitengay eca ka pasowal to fafahi no niyah to notekedan a demak no salikaka, soˈlinay o ciepocay. w22.09 11 fiedac 10-11 fatac

Wa ngaˈay pakasoˈlin kita, itini ‘taˈangayay padiing’ a tatokian, o mamilidong ci Yihofa to madimadiay sikawdan Ningra. (Matay 24:21; Taniil 12:1) O Makok a Kok, oya makomoday a kalo kitakit, itini cowacowa pala no hekal ano mifekad to pakidemay saˈodis to madimadiay sikawdan ni Yihofa i, o mamidipot ci Yihofa to sikawdan Ningra. O masalalomaˈay no Makomoday a Kitakit 193 a kasakitakit soˈlin mirienang tonini a sofitay, cowa ko papakafilo to Satadamaanay ko Saaroˈan ato kakarayanay a sofitay Ningra. Mikiˈokay ci Yihofa kitaanan: ‘O mamapatalahkal Kako i kaˈayaw no kalo kitakit, mapatalahkal to fangcalay, ho mafanaˈ cangra Takowanan, o mamafanaˈto cangra to ci Yihofa Kako.’ (Icikil 38:14-16, 23) O piˈodis no Kok mamikidat to Armakiton a lalood, itiya wa eminen ni Yihofa palaˈafo ko ‘polong a hongti no hekal.’ (Paˈarawan 16:14, 16; 19:19-21) ‘Edengan o moecelay tamdaw ko rarihaday maˈorip i fafekang no sera, o tanektekay mitafo to madimadi a tamdaw ko tatahadaˈoc materek i fafekang no sera.’—Taneng 2:21 ato roma pihongyak. w22.10 16-17 fiedac 16-17 fatac

Cowa ka pafesel ko pinengneng ita to falocoˈ no tamdaw, edengan ci Yihofa ngaˈayay ‘mitiyawca to misahalakaan no kemod no falocoˈ.’ (Taneng 16:2) Maolahay Cingra to masakenakenaay a tamdaw, ano samaanayto ko lalengawan, mananto ko serangawan, mahecadayto. Pakalalokay ci Yihofa kitanan ‘mifohat to falocoˈ.’ (2 Korinto 6:13) Mihaenay, mamisaˈicel kita maolah to polong a salikaka, cowa ko papatelas a misawkit cangranan. Cowa ko ngangaˈay kita misawkit to papotalay no kasakopang a tamdaw. O cecay salawina ano cowa ka lecad ko pihakelongan tono miso, misawkit ko falocoˈ iso “samaamaanen cowa ko mamicada to soˈlinay kimad cingra” wa saan han? Cowa, samanen mihaen ko demak mitaˈlifay to fadangalan, sao moecelay ko niyah saan. Nohatini, kamayan paira ci Yihofa to toki no ‘tamdamdaw’ a pasasiyor. (Dmak 17:30) Aka mapawan, sao moecelay ko niyah sanay a tamdaw i, o cowa ko moecelay cingra. Padadotoc kita mitongal a maolah to moecelay palinian ni Yihofa, mamatongal ko kalipahak. Maˈaraw no tao ko ngaˈayay taˈarawan ita, o mamatongal ko olah kitanan, matongalho ko olah to Kawas. w22.08 31 fiedac 20-22 fatac

Ano mitosil kita i maedeng o tatahalifa to misafelitay, hanaca o mahaenay pisafelit mamalingad ko pakidem. (Taniil 11:44; 2 Timoti 3:12; Paˈarawan 16:21) Kawra ngaˈay pakasoˈlin kita o papadama ci Yihofa kitaanan. Misamaanay hani? Samanen nolitengan tahanini, ano samaanto a pasangar ko ˈinorong no sikawdan ni Yihofa, padamaan Ningra cangra milahci. Nengnengen ita ko nalifetan no cecay pairasolay. Ci Icikil cingra, milasilay cingra to lihaf no Kawas i maholiway i Papilon a Yutaya tamdaw. O mitosilan ni Icikil o masamaanay a tamdaw hani? Sanay ci Yihofa, ‘mitowakangay cangra,’ hanaca ‘ ˈatekakay ko falocoˈ,’ o ‘pacoliay a finacadan.’ Malecaday o ceka cangra midokaˈ to tamdaw, malecaday o rarikah katalawan. Mansa kinapinapina ci Yihofa pasowal ci Icikilan ‘aka matalaw cangranan.’ (Icikil 2:3-6) Ngaˈay ci Icikil milahci to mitosilay a tayal no niyah, samanen (1) minilnilan ni Yihofa cingra, (2) mitiˈeray cingra to fangcalay saocor matomes ko timolo, (3) mapahaleday no kimad no Kawas cingra. w22.11 2 fiedac 1-2 fatac

O misangaˈan ni Yihofa i fafekang no sera a pinaˈorip sahtoay citolasay ko ˈorip, edengan ko tamdaw ko mikiriwiˈay. Pafelian ni Yihofa ko tamdaw to mikiriwiˈay a hatokel, o ngangaˈay tahadaˈoc caka patay. Misangaˈ ci Yihofa kitaanan i, pairaay to ciˈicelay a kalim ita, saka tahadaˈocaw a maˈorip. Sowal no Fangcalay Cudad, ‘mitelian ni Yihofa i falocoˈ no tamdaw ko midaˈocay a kalim.’ (Patnakay 3:11) Mihaenay, o pinengneng ita to patay malecaday o ˈada. (1 Korinto 15:26) Ano ira ko pakidemay a adada no tireng ita, maedeng cowa ko papakihater saan, mitala to kapatay. Tocerid mikilimay kita to ising, komaenayho to cemel miadah to adada. Ano makilim ko matatodongay a pakayraan i, wa misaˈicel kita midipot to ˈorip no niyah. Roma i, ano mapatay ko salawina, ano hakowaayto ko mihecaan nangra, tada masomaday kita, hanaca o hatiniay a somad padotocay to cecay liyad alatek. (Yohani 11:32, 33) Haratengen hena, o ponoˈ ita ngangaˈay tahadaˈoc minanam, hanaca iraay ko kalim no falocoˈ to saka tahadaˈocaw a maˈorip, ano cowa ka ciharateng ko sidaˈitay a Misangaˈay a Tatapangan to saka tahadaˈocaw maˈorip no mita, hano mihaen misafaco ato misangaˈ Cingra to tamdaw hani? w22.12 3 fiedac 5 fatac; 4 fiedac 7 fatac

Itini toniya pasangaray a laliyadan, ˈalomanay salikaka mamisemsem to adada, ciˈangiay anca matoˈolay ko falocoˈ. Ka picerid milinnak to salikaka. Kalifongan a tatokian, soˈlin ngaˈay kiso masasoˈaraw to salikaka, o mamalaliyas ko tireng alatek. Ano mahaenay, malecaday ko harateng iso to tarokos ci Yohanian. Makalimay ci Yohani sapiˈarawaw to ngaˈayay widang no niyah ci Kayusan, masasiˈayaw masasowal cingranan. (3 Yohani 13, 14) Kawra, mafanaˈay ci Yohani cecay liyad cowa ka ngaˈay cingra masasoˈaraw ci Kayusan, orato midemakay cingra to ngaˈayay demaken no niyah a demak, mitilid to tikami pafeli ci Kayusan. Ano caka ngaˈay masasoˈaraw kiso to salikaka i, ngaˈayay tanamen ko roma pakayraan. Ano padadotoc kiso malalinnak to salikaka, cowato ko mamatoˈol, wa rihaday ko falocoˈ. Ano mikiriwiˈay a cariraw kiso, ngaˈayay misaali to sapadama no malohemay malitengay, micada to sapakalalok ato kaciharateng nangra.—Isaya 32:1, 2. w22.12 17-18 fiedac 6-7 fatac

Sowal no Fangcalay Cudad, cecay liyad mapakadangay ko tosa waˈay ni Yosif, ano takolawto mafedfeday no marad. (ˈOlic 105:17, 18) Malingaday ko tatiih no kaˈorip ni Yosif, nao misaaretengan a koli isaˈayaw, malo misakahmawanto no tamdaw a mapalitay. Iraay ko mahaenay a malifaay iso han? Soˈlin mikifalocoˈ kiso micangacang ci Yihofaan, kawra malingaday ko tatiih no kaˈorip. Itini mikowanan ni Satan a hekal, cowa ko papalahdawen ni Yihofa ko macadaay ita a sapalifet. (1 Yohani 5:19) Kawra ngangaˈay pakasoˈlin kiso, o malifaay iso a kihcod, ihkalay ko kafanaˈ ni Yihofa, hanaca tada ciharatengay tisowanan. (Matay 10:29-31; 1 Pitiro 5:6, 7) Roma i, mikiˈokay Cingra: ‘Caay pifalah Kako tisowanan, caay piliyas tisowanan.’ (Hipray 13:5) O kaˈorip iso soˈlin hato awaay ko hatokel nengnengen, ngangaˈay ci Yihofa padama tisowanan padadotoc mihadidi. w23.01 16 fiedac 7-8 fatac

Sowal no Fangcalay Cudad, soˈlinto mararaw kita, cowa ka sawaden ni Yihofa kita, dahemhemay ko falocoˈ. Soˈliˈlin misaliyaliyaw pakararaw ci Yihofaan ko Israil tamdaw, kawra mikifalocoˈay pasasiyor cangra, ikor misododan ni Yihofa cangra. Isaka 1 hahekalan a Krisciyang mahapinangay nangra to iraay ko olah no Kawas to tamdaw. Itini kasakopang na iraay ko padeteng sanay pakidem ko raraw a tamdaw, padadotocay mihaen to cecay liyad, kawra ikor pasasiyorayto cingra. O tarokos ci Pawlo itini sakayat no Kawas pakalalokay to salikaka ‘misodod cingranan, mihinom cingranan.’ (2 Korinto 2:6, 7; 1 Korinto 5:1-5) Ano mararaw ko midokoay ci Yihofaan a tamdaw i, cowa ka tahadaˈoc sa ci Yihofa misawad cangranan, ao maolahay Cingra padama cangranan, misalof cangranan, mitahidangho cangranan a patikol i tatihi Ningra, tada kasemeranto konini! Anini, mamihaen ci Yihofa micada to mikifalocoˈay pasasiyor a mararaway tamdaw. (Yakop 4:8-10) O Fangcalay Cudad pasifanaˈay kitaanan tadamaanay ko taneng ni Yihofa, cowa pisakakinih, matomesay ko olah. Patalahkalayho ko Fangcalay Cudad, makalimay ci Yihofa mafanaˈ kita Cingranan, malo widang Ningra. w23.02 7 fiedac 16-17 fatac

O caciharateng kita to kalingad no demak no hekal, samaanay malaˈosi ko sapairasol no Fangcalay Cudad. Misamaanay hani? Pasowalay ci Yis, ano maˈaraw ita mifekad ko maanan a demak i, o mamafanaˈ mangataayto mahererek ko hekal ni Satan. (Matay 24:3-14) Pakalalokay ko tarokos ci Pitiro kitaanan misinanot to kalaˈosi no sapairasol, samanen o papadama konini kitaanan padadotoc a tanektek a pakasoˈlin. (2 Pitiro 1:20, 21) Pakayni to sasamaan minengneng to sapairasol no Fangcalay Cudad, sowal no tarokos ci Pitiro papadama kitaanan padadotoc matatodong ko pinengneng. Patalipaˈelalay cingra kitaanan ‘halamhamen mitala ko kaira no romiˈad ni Yihofa, pakifalocoˈen to mangataayto ko romiˈad.’ (2 Pitiro 3:11-13) Hano mamihaen kita to demak hani? Cowa ko pakayniay sakafanaˈaw to pifekadan ni Yihofa ‘tora romiˈad, tora tatokian’ no Armakiton, ao pakayniay kaciharateng ita iˈayaw no kaira nora taˈangayay a romiˈad, ‘ira ko makoracay a capeling, mangodoay a waywayan.’ (Matay 24:36; Luka 12:40) Mamitafo kita to moecelay a capeling, halo misaˈicel ko niyah pakayni ci Yihofaan dademak samanen maolahay kita Cingranan. Sapitooraw tonini a patosokan, mamisinanot kita to niyah. w23.02 16 fiedac 4, 6 fatac

O ‘roma lopayˈay siri’ mamidemak to maanan anini, ho ira ko tatodong itini i Lakoing a maˈorip hani? Paihkal to tangongolay ko nafalocoˈan ita i ci Yisan. Tinakoen, ngaˈayay kita midama to salikaka ni Kristo, sanay ci Yis onini o palinian ningra misaˈosi to o cima ko lopayˈay siri. (Matay 25:31-40) O midamaay to salikaka ni Kristo a cecay pakayraan i, fanekfek mirienang to mitosilay tayal, padama to tamdaw malo nisawawaan ni Kristo. (Matay 28:18-20) Halamhamay ci Yihofa to kanonoˈan Ningra a tamdaw itini i Lakoing a maˈorip, cowa ko mamitala kita irato ko Lakoing ngaˈ misaˈicel malo mahaenay a tamdaw. Nohatini, itini sasowalen ato waywayan caay pisamangah kita, maˈimer ko kaˈorip, madimadiho ci Yihofaan, to raramod ato salikaka. Itini toniya tatiihay a hekal, mamisaˈicel kita midoedo to palinian no Kawas, ikor itini i Lakoing mamadoloto mihaen to demak. Roma i, toha sapisadayaw maˈorip i noikoran a Lakoing, nohatiniho palahad kita to adihayay fangcalay capeling ato ciepocay a ˈinaneng. w22.12 11-12 fiedac 14-16 fatac

Maolahay kita to Hongti ita ci Yisan, samanen o sangaˈayay a Mikowanay cingra. Micadaay cingra to sapahatatanam ato sapanilnil ni Yihofa. (Isaya 50:4, 5) Patalahkalay to cowa pisateked a olah i micadaay to pikowan ningra a tamdaw, makahiay kinafalah to ˈorip i cangranan. (Yohani 13:1) O Hongti ci Yis soˈlinay o mamilifok to mikifalocoˈay a olah no mita. Sanay cingra, o soˈlinay maolah cingranan a tamdaw i, o widang ningra, mamidofdof cangra to sapalimoˈot ningra. (Yohani 14:15; 15:14, 15) Ngaˈay a mala widang nonini tadamaanay a Hongti, tada kalikoan ita! Mafanaˈay kiso tada misapoeneray ci Yis, malefotay a mitodong to kakarayan a Wama. Mananamay iso, na pafecolan ningra ko macahiway a tamdaw, mihinom to matoleday ko falocoˈ a tamdaw, ato miadah to adadaay a tamdaw. (Matay 14:14-21) Mahapinangay iso anini samaanay cingra mikayat to kasakopang ningra. (Matay 23:10) Mafanaˈayho kiso, o malo Hongtiay no Hongti Kitakit no Kawas, ano ikor wa adihayho ko hadademaken ningra saki kitaanan. Sasamaan kiso paihkal to maolahay ci Yisan hani? Mamikotod cingranan, mitodong to taˈarawan ningra. Ano sapihaenaw kiso to demak, papatafang to tireng ci Yihofaan, halo micada to paputisem. w23.03 4 fiedac 8, 10 fatac

Itini kakarayan iraay ko tadamaanay a nisangaˈan ni Yihofa, itini i hadhad ato riyar iraay ko kasapaan a nisangaˈan Ningra, onini a kihcod papadama kitaanan mafanaˈ ci Yihofaan. (ˈOlic 104:24, 25) Haratengen hena, o nisangaˈan no Kawas a tamdaw iraay ko maanan a mikiriwiˈay. Hofoc han kita pairaan Ningra ko inaneng ita masemeren to kakapah no serayan, pairaan Ningra ko mata ita minengneng, ko tangila mitengil, mafanaˈ ko kamay misapinang, mihanek ko ngosoˈ, mitinac ko sema, pakayni tonini a lima inaneng ngangaˈay rihaked to kihcod a nisangaˈan. Iraayho ko cecay masakalimlaan a lalangian no mita misolap a minengneng to nisangaˈan a maamaan. Sowal no Fangcalay Cudad, ano mihaen kita to demak ngaˈayto mafanaˈ to capeling ni Yihofa. (Loma 1:20) Tinakoen, i serayan iraay ko kasemeran a misafacoan, paihkalay konini to iraay ko mikiriwiˈay a taneng no Kawas. Ngaˈayay kita masalo a komaen to masakenakenaay ˈaredetay a kakaenen, paihkalay konini tada maolahay ko Kawas kitaanan. Mikitini i nisangaˈan ni Yihofa a kihcod mahapinang ko makapahay a capeling Ningra, mamatongalto ko kafanaˈ Cingranan, masemeren ko falocoˈ sapiingidaw Cingranan. w23.03 16 fiedac 4-5 fatac

O pakayraan noniya hekal malingaday ko tatiih, o pakasoˈlin ita to soˈlinay kimad o mamalingad ko kataˈangay no macadaay a sapalifet. Alatek mikayhiday ko tao kitaanan cisasa o soˈlinay ko kimad no Fangcalay Cudad hokira, anca cisasa to soˈlinay nilnilen ni Yihofa ko madimadiay citanengay a koli mikerid to finawlan Ningra hokira. Kawra ano pakasoˈlin kita to Kimad ni Yihofa o matatodongay i, o papakacoˈay to mahaenay a saˈodis ecato ka ngiyangi. ‘Misetek kita to falocoˈ a midofdof to safalod ni [Yihofa] tahatolas ko pidofdof, tahadaˈoc caka falic.’ (ˈOlic 119:112) Ano milengo kita i tao to Fangcalay Cudad i, ‘cowa ko mamangodoen,’ ao tatimolo a pasowal cangranan to soˈlinay kimad no Fangcalay Cudad, hanaca pakalalok cangranan midoedo to soˈlinay kimad a maˈorip. (ˈOlic 119:46) Soˈlin tahasiˈayaw to sapalak ato pakidemay a sapalifet, o ngangaˈay kita ‘ira ko mihadidiay ato lipahak’ tahatolas a miemem. (Kolosay 1:11; ˈOlic 119:143, 157) Pakayni kafanaˈ ita to soˈlinay kimad iraay ko matatodongay a patosokan ato hatokel no kaˈorip. O soˈlinay kimad padamaay kitaanan matomes ko hatokel noikor, pakasoˈlin to aitini ko niyah i pikowan no Hongti Kitakit no Kawas tahadaˈoc milayap to makapahay a kaˈorip. w23.01 7 fiedac 16-17 fatac

Itini ˈayaw no kinafalah to ˈorip ci Yis a dadaya, adihayay ko mipalakan a toki patado to nisawawaan a mitolon, micangacang to kakarayan Wama ‘midipot cangranan, ho eca ka laˈosi koya mariˈangay.’ (Yohani 17:15) Tada maolahay ci Yis to nisawawaan ningra! Kakalikito cingra misiˈayaw to pakidemay a sapalifet, kawra kamayan ciharateng cingra cangranan. Mitodong kita ci Yisan, cowa ko saali aca no niyah ko miharatengan, ao mamicerid patado to salikaka mitolon. Mihaen ko demak ita, paihkalay to midofdofay ko niyah to limoˈot ni Yis masasiolah, pasowalayho ci Yihofaan, tada maolahay kita to salikaka. Patado to salikaka mitolon cowa ko coriyaˈay to toki, samanen sanay ko sowal no Fangcalay Cudad: ‘O picangacang no moecelay tamdaw taˈangayay ko ˈicel.’ (Yakop 5:16) Misaaliay ko salikaka patado kita cangranan mitolon, samanen adihayay ko masiˈayaway nangra a sapalifet. w22.07 23-24 fiedac 13-15 fatac