Saka 7 Folad

O sakasasowal ita a inaneng o mikitiniay i kakarayan Wama a sapakaolah. Kawra, o sakasasowal a inaneng kahnayay makasimaan no tamdaw misaka dademak. Milipalawan ni Akoma Satan ci Ifa, o mangah ningra mikayatay to sakararaw no tamdaw, malo cowato ko malefotay. (Satapangan 3:1-4) Ikor mararaw ci Atam mirorohay ci Ifaan, mangalef paconohay to ˈinorong ci Yihofaan. (Satapangan 3:12) Ikor no patayen ni Kain ko safa ci Apil i, misamangahay ci Yihofaan. (Satapangan 4:9) Anini ano itinito i picudadan ato katayalan, o kaemangay ato matoˈasay a tamdaw marariday tahatengil to cikaditay a sowal no tao. Roma i, pasangaray mahela ko cowa ka cikadit ko sowal a ika. Ano eca ka pinaˈon i, o mamananamto kita to cikaditay a sasowalen, telocto mamisatapangto ko niyah a somowal. Malo Krisciyang, makalimay kita sapakahemekaw ci Yihofaan, tatodong nonini cowa ko piliyas aca ita somowal to cikaditay a sowal, sakadademakenho ko sakasasowal a inaneng pakahemek Cingranan. w22.04 4 fiedac 1-3 fatac

Ci Yis pakayni dafong iraay ko matatodongay a pinengneng. Maˈorip cingra itini fafekang no sera i, na komaenay to ˈaredetay kakaenen ato epah. (Luka 19:2, 6, 7) O midemakan ningra sakacecay kafahkaan o palasangaˈayay epah to nanom. (Yohani 2:10, 11) Tiya mapatay cingra a romiˈad o matekesay ko misarikoˈan ningra. (Yohani 19:23, 24) Kawra cowa ka paisalakaten ni Yis ko dafong i nokaˈorip ningra, somowalayho ci Yis, ano salakaten ita micangacang ko Hongti Kitakit no Kawas, o dadimokosen ni Yihofa ko sakaˈorip no mita. (Matay 6:31-33) ˈAlomanay salikaka mitooray to sapalimoˈot ni Yihofa, minanam matatodong ko pinengneng to payci, telocto adihayay ko malifokay a epoc. Cecey cowa ka ciramod faˈinayan salikaka ci Tannie, sanay cingra: “Moetep ira ko pina ko mihecaan ako i, misaˈosiay paisalakat i nokaˈorip to pidoko ci Yihofaan.” Padotocay kantang ko kaˈorip ni Tannie, mansa ngaˈay misaka dademak to toki ato inaneng no niyah, adihay ko tayal saki likakawa no Kawas. Sanay cingra: “Ano hakowato ko maetanay a payci, cowa ko papakalini to sapafeli ni Yihofa takowanan a sapalemed.” w22.05 21-22 fiedac 6-7 fatac

Ano maolahay kita to soˈlinay kimad, o mamicerid micekiw to Fangcalay Cudad ato mitepangan a cudad. Soˈlin halafinayto mafanaˈ to soˈlinay kimad, adihayayho ko nananamen ita a demak. Mamihadak to ˈicel a micekiw, kawra mihaen o ciepocay. Cowa ka sahto sa maolah ko tamdaw miasip ato minanam, kawra pakalalokay ci Yihofa kitaanan ka ‘padotoc mikilim’ ‘padotoc misolap,’ ho matongal ko kacipinang to soˈlinay kimad. (Taneng 2:4-6) Mihadak kita to ˈicel mihaen to demak, oha mamilifok to epoc. Nengnengen samaanay ko demak no faˈinayan salikaka ci Keli. Ano miasip cingra to Fangcalay Cudad i, cecayay aca ko sinael micalepan a micekiw, sanay cingra: “Micekiwan ako ko kahacecay sapatongal a lalakaw ato roma taˈarawan a sinael, mikilimayho to adihayay lalakaw. . . . Tano mahaenay pakayraan minengneng to Fangcalay Cudad adihayay ko malifokay ako a minaroˈan.” Ano mahaenay ko pakayraan anca o roma pakayraan, mihadak kita to toki ato ˈicel micekiw to Fangcalay Cudad, paihkalay to maolahay ko niyah to soˈlinay kimad.—ˈOlic 1:1-3. w22.08 17 fiedac 13 fatac; 18-19 fiedac 15-16 fatac

Taynito ci Yis i fafekang no sera i, tano nisangaˈan a maamaan pasifanaˈ to nisawawaan mafanaˈ to kakarayan a Wama. Dotoc mamaˈaraw ita ko pipasifanaˈ ningra to nisawawaan a pina tinakoan. Maolahay ci Yihofa to polong a tamdaw. Itini Sapasifanaˈ i Lotok, somowalay ci Yis to misangaˈay ci Yihofa to cidal ato ˈorad. Soˈliˈlin awaay ko maanan sanay ko ˈalomanay to cidal ato ˈorad, kawra o sakaˈorip no tamdaw konini. Soˈlinay haw i, ngangaˈay ci Yihofa eca ka pafeli to cidal ato ˈorad i caay ka pidoko Cingranan a tamdaw, kawra cowa ka pihaen Cingra. Iraay ko olah Ningra, pafeli tonini tosa kalimlaan a sapatelong to polong a tamdaw. (Matay 5:43-45) Misadak ci Yis tonini tosa tinakoan, oha sapasowalaw to nisawawaan, halamhamay ci Yihofa kitaanan paihkal to olah i polong a tamdaw. Ano maˈaraw ita ko kasapaan a picerem no cidal anca maˈaraw ko picepaˈ no ˈorad to sera i, ngaˈayay haratengen ko caay pisateked a olah ni Yihofa. O taˈarawan Ningra mamikowad kitaanan mitosil to polong a tamdaw, paihkal to mahaenay ni Yihofa a olah. w23.03 17 fiedac 9-10 fatac

Maˈaraway no tarokos ci Yohani ko maanan, tada macekid hani? Iraay ko cecay fafahiyan mikalicay i fafekang no kahngangay ˈaˈadopen. Sowal no Paˈarawan cimira o ‘tasalamaan a fafahiyan,’ o ngangan o ‘Taˈangayay Papilon,’ ‘maˈaˈodangay to kalo a hongti cimira.’ (Paˈarawan 17:1-5) O cima ko ‘Taˈangayay Papilon?’ Onini a fafahiyan cowa pitaypiyaw to lekakawa no mirikecay, samanen sanay ko sowal no Paˈarawan, maˈaˈodangay cimira to kalo a hongti no hekal. (Paˈarawan 18:9) Soˈlinay i, sapiˈimeraw cimira to ˈaˈideman no mirikecay, malecaday o mikalicay i fafekang nangra. O roma i, cowa ka pitaypiyaw cimira to maˈanofay a lekakawa no misasingdiay i hekal ni Satan. O lekakawa no misasingdiay o ‘misasingdiay tamdaw no hekal’ ko mitaypiyaway. (Paˈarawan 18:11, 15, 16) Nolitengan a Papilon o satenokan no mararaway pidoko, mihaenay o ‘Taˈangayay Papilon’ mitaypiyaway to polong mararaway a pihakelongan no hekal.—Paˈarawan 17:5, 18. w22.05 11 fiedac 14-16 fatac

Latekay, miharatengay ko malo winaay: “O wawa ako wa malecad ci Timotian mipiliˈ a midoko ci Yihofaan han?” Mihaen cangra calemcem, samanen mafanaˈay itiniay i hekal ni Satan ko wawa misiˈayaway to taˈangayay a saroero. Roma i, ˈalomanay fafahiyan salikaka o awaay ko faˈinay a wina, anca cowa ka pidoko ci Yihofaan ko faˈinay nangra, mihaenay sapasifanaˈaw to wawa maolah ci Yihofaan o taˈangayay a sapalifet. Kawra soˈlinto o midokoay ci Yihofaan ko mararamoday, sapitemeraw to falocoˈ no wawa, padama cangranan madimadi midoko to Kawas, latekay cowa ko madoloay. Ano masamaanto, aka pakidem ko cariraw, o papadamaen ni Yihofa kiso. Ngaˈayay licayen iso ko iraay ko nalifetan a wama wina, samaanay cangra itini pakalomaˈay a pidoko misaka dademak to mihadakan no likakawa a lalosidan. (Taneng 11:14) Roma i, ngaˈay kiso pasayra ci Yihofaan mitolon, micangacang Cingranan padama tisowanan ngaˈay ko kasasowal to wawa, misaka dademak to matatodongay a salicay cipinang to soˈlinay a harateng ato nafalocoˈan no wawa.—Taneng 20:5. w22.04 17 fiedac 4, 7 fatac; 18 fiedac 9 fatac

Matongal ko kafanaˈ ita ci Yisan, mamatongal ko olah ci Yihofaan, samanen malefotay ci Yis paihkal to capeling no Wama ningra. (Hipray 1:3) Mafanaˈ ci Yisan sangaˈayay a pakayraan i, micekiw to Sepat Ratoh a Cudad. Ano cowaho ka palahad kiso to romiˈamiˈad miasip to Fangcalay Cudad a ngaˈayay nanaman, ngaˈay nohatini misatapang mihaen to demak han? Ano miasip kiso to pakayniay ci Yisan a maˈoningay i, kiriwiˈen a misinanot ko capeling ningra. Madoloay ingiden ci Yis, damsayay a miˈafofo to wawa. (Marko 10:13-16) Parihadayay cingra to nisawawaan, mansa o nisawawaan itini ˈaˈayaw ningra haratengay sanay mihadak to sowal. (Matay 16:22) Soˈlinay i, mihaen ko demak ni Yis o mitodongay to kakarayan a Wama. Tada madoloay a ingiden no tamdaw ci Yihofa, ngaˈay kita micerid mitolon Cingranan, mifanaˈ Cingranan to nafalocoˈan a demak. Wa ngaˈay rihaday ko falocoˈ ita, cowa ko mamalikaf Cingra kitaanan. Maolahay Cingra kitaanan, ciharatengayho kitaanan.—1 Pitiro 5:7. w22.08 3 fiedac 4-5 fatac

Misangaˈan ni Yihofa kita, ihkalay ko kafanaˈ to kihcod no mita. Haratengen hena, ihkalay ko kafanaˈ Ningra to kahacecay a demak no tamdaw, tada kafahkaˈanto ita konini a demak! (ˈOlic 139:15-17) Ihkalay Cingra mafanaˈ, mikitini i wama wina mirocokan ita ko maanan cowa ka lefot a pinangan. Mafanaˈayho Cingra to salakatay a malifaay ita samaanay mifiyor kitaanan, hato o mahaenay a tamdaw kita nohatini. Tada masongilaˈay ko kacipinang ni Yihofa kitaanan, mansa tada siniˈadaay Cingra kitaanan, makahi a sidaˈit micada kitaanan. (ˈOlic 78:39; 103:13, 14) Ci Yihofa pakaynian i midemakan a paihkal, makalimay Cingra misodod kitaanan. Mafanaˈay Cingra, samanen o sakacecay a tamdaw ci Atam mitowakangay, hato cirarawayto kita o kahacecay tamdaw, salikor o mamapatay maemin. (Loma 5:12) Awaay ko pakayraan ita paliyas to pasangaray a demak no niyah ato romaroma tamdaw. (ˈOlic 49:7-9) Kawra, o sidaˈitay a Kawas ita matomesay to siniˈadaay, milimasmasay Cingra, padama kitaanan milifok to pasalat. Yohani 3:16 sanay, miocoran ni Yihofa ko foseniˈan a wawa Ningra pakayni kitaanan kinafalah to ˈorip.—Matay 20:28; Loma 5:19. w22.06 3 fiedac 5-6 fatac

Misodod to tao, o mamilifok ko niyah to sasodod. Papidemak ni Yihofa ci Yopuan a demak ihkalay a mitadtad tonini. Ci Ilifac, Piltat aci Cofar oniya tatoloay tamdaw somowalay to adihayay a mariˈangay a sowal, tangongolay ko pidokaˈ to madimadiay a Yopuan, kawra palimoˈotan ni Yihofa ci Yopu patado cangranan mitolon. Mihaen ko demak ni Yopu ikor, milifokay to sapalemed ni Yihofa. (Yopu 42:8-10) ˈInteh ko falocoˈ midokaˈay to niyah. O ˈintehay o karetengay a ˈinorong, makalimay ci Yihofa kitaanan mihepol tonini a ˈinorong. (Ifiso 4:31, 32) Palimoˈotay Cingra kitaanan ‘palasawaden ko keter, falahen ko mangolaway.’ (ˈOlic 37:8) Tada citanengay konini a sapatalipaˈelal, samanen ano caka fasaw ko keter o mamipalak to tireng ato no haratengan no mita. (Taneng 14:30) Ano padadotoc kita a maketer, o mamidokaˈ to niyah, cowa ko mamifiyor to midokaˈay kitaanan a tamdaw, malecaday o komaenay to warak o niyah aca ko madokaˈay. Masafelitay, ano misodod kita to tao malecaday o pafeliay to sapatelong to niyah. Mamilifok kita to rihadayay falocoˈ, wa ngaˈay padadotoc misarocod matayal saki Yihofaan. w22.06 10 fiedac 9-10 fatac

Mitafo kita tonini a hatokel, malecaday o misakafongay to kafong, wa ngaˈayto madipot ko harateng no niyah. Mihaenay, cowato ko mamalafo ko kaˈorip ita, mipalak to kalalaˈed no niyah aci Yihofaan. (1 Korinto 15:33, 34) O hatokel ngaˈayay midipot kitanan miliyas to mararaway a harateng, miharateng to niyah ano tahadaˈocto cowa ko papakahemek ci Yihofaan. O makaniway a widang ni Yopu ci Ilifa na pasowalay to malecaday a sowal ci Yopuan. Sanay ci Ilifa: ‘O maan ko tamdaw, hano ngaˈay makorac ko falocoˈ hani?’ Sanayho cingra: ‘Halo coyoh no Niyah caay pakasoˈlin ko Kawas. O caay ka korac a nengnengen Ningra cangra a maemin.’ (Yopu 15:14, 15) Tada o misamangahay konini! Haratengen, onini a mangah sahtoay mikitiniay ci Satanan. Mafanaˈay cingra ano padotocay kiso ira ko mararaway a harateng, cowa to papadotoc mitafo to hatokel no niyah. Mihaenay, aka pakasoˈlin to mangah ningra. Makalimay ci Yihofa tahadaˈoc maˈorip kiso, papadama Cingra tisowanan malaˈosi konini a patosokan. Aka a cisasa Cingranan!—1 Timoti 2:3, 4. w22.10 25-26 fiedac 8-10 fatac

Sapiorataw ci Satan ci Yopuan, micada cingra to hatiniay a roray samanen cowa pihayda ci Yihofa cingranan sanay. Tinakoen, malacafay ko moetepay wawa ningra mitahka i, tano ciˈicelay a fali ci Satan mipeleng to lomaˈ, mipaekel a mipatay cangranan. (Yopu 1:18, 19) Mitefadanho ni Satan ko namal nai kakarayan, mipatay to siri ato pakaenay to siri ni Yopu a sikawdan. (Yopu 1:16) Fahal sanay ira a fali ato namal cowa ko kalo a demak konini, mansa miharateng ci Yopu onini a pades maedeng ci Yihofa ko midemakay saan. Telocto, miharateng ci Yopu maedeng o pakararaway ko niyah ci Yihofaan saan. Soˈlin mahaen, cowa ka pilokes ci Yopu to kakarayan Wama. Harateng ni Yopu halafinay a mihecaan adihayay ko malifokay no niyah a sapalemed ni Yihofa, o mamakahi a micada to pades saan. Sanay cingra: ‘Nanay mapadotoc a mapakahemek ko ngangan ni Yihofa.’—Yopu 1:20, 21. w22.06 21 fiedac 7 fatac

Itini Yohani 17:14, na pafelian ni Yis ko nisawawaan ningra to malecaday a sapatalipaˈelal. Ihkalay mahapinang ita onini a sapairasol matatodongayto a malaˈosi, mangalef mataˈlifto ko 100 a miheca a tatokian, o katatodong no sapairasol ihkalay a mahapinang. Hano haenen ko sowal hani? Malo Misiya Hongti ci Yis i 1914 miheca ikor caka halafin, malaplapayto ci Satan nai kakarayan. Itiniayto cingra i ngata no cikiw nohatini, mitala to papatayen. (Paˈarawan 12:9, 12) Kawra kamayanho cingra misafilofilo caka kahi mapatay, tada mangolaway cingra, pasayra i finawlan no Kawas mihadak to keter ningra. (Paˈarawan 12:13, 17) Mihaenay tonini, o mikowanan ni Satan a hekal mangalefay ko ˈinteh to finawlan no Kawas. Kawra, cowa ko mamatalaw kita ci Satanan ato sikawdan ningra, ao mamalecad to tarokos ci Pawloan tanektek ko pakasoˈlin a somowal: ‘Ano midamaan no Kawas kita, o cima ko ngangaˈay misafelit kitanan hani?’ (Loma 8:31) Wa ngaˈay matomes ko pakasoˈlin ita ci Yihofaan. w22.07 18 fiedac 14-15 fatac

Cowa ka calemcem ci Yis i salikoray ˈawaled cangoˈot ko tamdaw mirienang to mitosilay a tayal. Mafanaˈay cingra mamatatodong ko sapairasol no ˈOlic, sanay ko sinael: ‘Itini piloodan no sofitay iso a romiˈad, o finawlan Iso o mamakahi a patafang to niyah.’ (ˈOlic 110:3) Ano mirienangay kiso to mitosilay a tayal, o midamaay kiso ci Yisan ato madimadiay a koli, hanaca mihadak to ˈicel patatodong to sapairasol. Onini a demak talaˈayaway ko pidemak nohatini, kawra cowa ka sarihaday saan ko pidemak. O mamalifa ita cecay a sacara mitosil i, o pisafelit no tao. Mitowakangay to kimad a tamdaw, ˈaˈideman no pihakelongan ato mirikecay a tamdaw papaoraf kitaanan alatek, miorat to pinengneng no tao to tayal ita. O salawina ita, kananaman a tamdaw ato cafay matayal ano maorat nonini mararaway a lihaf, o papaira to saroero kitaanan alatek, ho ecato pidoko kita ci Yihofaan, misawad mitosil. Itini roma kitakit, macadaay ita pisafelit mahawpay ko piroero, paˈangi, milepel, anca mipalit. w22.07 8 fiedac 1 fatac; 9 fiedac 5-6 fatac

Makalimay ci Yihofa kitanan milimasmas to toki micerid miasip to Fangcalay Cudad, hanaca midotim to maasipay a lalakaw. Itini kaˈorip ita sakadademaken ko safalod no Fangcalay Cudad, mamatongal ko ˈicel no pakasoˈlin, o kalalaˈed to kakarayan a Wama mamatongal ko piingid, ano mihaen wa ngaˈayto kita padadotoc mihadidi to sapalifet. Roma i, mitadiˈec kita to Sowal ni Yihofa, mamilifok to sapafeli Ningra a fangcalay saocor, wa irato ko ‘mikiriwiˈay a ˈicel’ mihadidi to masakenakenaay a sapalifet. (2 Korinto 4:7-10) Itini i pidama ni Yihofa, o ‘madimadiay citanengay a koli’ adihayay ko mitepangan a lalakaw, ika ato radiw, padama kitanan patanektek to pakasoˈlin, padadotoc a talipaˈelal. (Matay 24:45) Pasifanaˈan ni Yihofa ko finawlan Ningra masasiolah, itini pasangaray a pakayraan masasihinom. (2 Korinto 1:3, 4; 1 Tisalonika 4:9) Ano tahalifa kita to pasangaray i, makalimay ko salikaka padama kitanan mitafo to madimadiay. w22.08 12-13 fiedac 12-14 fatac

Wa ngaˈay kita malecad ci Pawloan mararid somowal to kangaˈayan no salikaka, mihaen ko demak cowa ko pitongal aca to kalawidang, wa ngaˈayho padama to kasakopang matomes ko olah. Latekay, ano matenesayto a Krisciyang masasongtolay ko pinengneng, mala congicongisayto. Ci Pawlo ato ngaˈayay widang ningra ci Parnapas na mifekaday ko mahaenay a pasangaray. Pakayni to aˈorongen ci Marko malacafay cangranan miliwko a mitosil hokira, cowa ka lecad ko harateng nangra tatosa, ‘pakidemay ko kalacongis,’ telocto malalicinowasay cangra. (Dmak 15:37-39) Kawra ci Pawlo, ci Parnapas aci Marko ikor masalofay ko kalalaˈed nangra. Ikor i tikami ni Pawlo masowalay ci Parnapas aci Marko, mikitira tora sowal ningra mahapinangay ita ngaˈayayto ko kalalaˈed nangra. (1 Korinto 9:6; Kolosay 4:10) O kalalaˈed ita ato salikaka ano ira ko masasongtolay, saˈicelen misaysay ko pasangaray, hanaca padadotoc misinanot to kangaˈayan nangra. Mihaen, wa ngaˈayto micowat to rihaday, padadotoc a makakedec. w22.08 23 fiedac 10-11 fatac

O mamisaˈicel kita mitoor to moecelay a palinian ni Yihofa maˈorip, kawra aka a sao moecelay ko niyah saan miharateng, patelas sa malikaf to tao. O haharatengen ita, edengan ci Yihofa ko ‘Misawkitay to hekal a Tatapangan.’ (Satapangan 18:25) Cowa ka pafeli Cingra kitaanan to fadangalan a misawkit. Haratengen ko tinakoan ni Yosif. O moecelay a tamdaw cingra, soˈlin makariˈang no tao, kawra cowa ka pisawkit to tao. O kakakaka ningra mihalakaay mikariˈang cingranan, pacakay cingranan malo koli, milipalawho to wama pasowal to mapatayay cingra. Ikor no pi:na mihecaan, malalitemoh ci Yosif to paro no lomaˈ. Itiya taˈangayay ko fadangalan ningra, na ngangaˈay miˈodis to kakakaka, pakidem ko pisawkit cangranan. Soˈlinto mikifalocoˈayto cangra pasasiyor, kawra matalawayho mihaen ko demak ni Yosif. Mihinoman ni Yosif a pasowal cangra: ‘Aka matalaw. Mana ngaˈay kako mikotay to Kawas hani?’ (Satapangan 37:18-20, 27, 28, 31-35; 50:15-21) Tada misapoeneray ko falocoˈ ni Yosif, mafanaˈay cingra edengan ci Yihofa iraay ko fadangalan misawkit to kakakaka ningra. w22.08 30 fiedac 18-19 fatac

Mafanaˈay kiso sakadademakan ni Yihofa kiso pacaˈof to satolon no tao han? Ano hakowaayto ko mihecaan iso, o faˈinayan anca fafahiyan salikaka, ano malohemay malitengay kiso, dama sikawdan anca miceriday misakafahay, ngaˈayay pakaynien ni Yihofa tisowanan mihaen to demak. O cecay maolahay ci Yihofaan a tamdaw pasayra Cingranan micangacang i, marariday ci Yihofa misaka dademak to malohemay malitengay ato roma madimadiay a sikawdan, pafeli tora tamdaw to ‘sahinom.’ (Kolosay 4:11) Tano mahaenay a pakayraan matayal ci Yihofaan ato salikaka, tada kalikoan no mita. Ano mifekad ko lifong i, anca tahalifa ko salikaka to pades anca sapalak i, ngaˈayay kita mihaen to demak. O paro no lomaˈ ano macalohay misaali to sadimokos no mita, soˈlin sapipadamaaw kita to tao, alatek cangoˈotay ko ˈicel. Soˈlin mahaen, ciharatengayho kita sapadamaaw to salikaka. Haratengen, ano misaˈicelay kita mihaen, o mamahemek ci Yihofa.—Taneng 19:17. w22.12 22 fiedac 1-2 fatac

Ciolahay falocoˈ o taˈeneran no pakasoˈlin. Sowal ni Yis, maolah ci Yihofaan ato maolah to tao, o sakakaay kalimlaan a tosa limoˈot konini. (Matay 22:37-39) Maolah kita ci Yihofaan, o mamakalim mitodong to taˈarawan Ningra, malo ngaˈayay pakasoˈlinen a tamdaw. Maolah kita to salikaka, wa makalim patado cangranan mitafo to mahimeday a demak, cowa ko papatalahkal to notekedan a demak nangra, midokaˈ anca pakangodo cangranan. Ano misapoener ko falocoˈ ita, wa madolo milifok to pakasoˈlin no tao. Misapoeneray ko falocoˈ a Krisciyang cowa ko papiharateng to tao idahiyay cingra, mikiˈayaw patalahkal to maanan a lihaf. (Filipi 2:3) Cowa ko papasowal cingra to tamdaw to mafanaˈay ko niyah to maanan mahimeday a demak, mihaen a paˈakawang to saaroˈan no niyah. O Fangcalay Cudad ato cudad no likakawa ano cowa pilengo to maanan a demak i, o misapoeneray ko falocoˈ a tamdaw cowa ko mamiyakayak to kafanaˈan no niyah tonini a demak. w22.09 12 fiedac 12-13 fatac

Pasowalan no coyoh ci Taniil, o mamatongal ko kacipinang no finawlan no Kawas to mitilidan ni Taniil a sapairasol, kawra ‘o tatiihay tamdaw cowa ko cacipinang tonini a sowal.’ (Taniil 12:10) Nohatiniho tano waywayan paihkal to cowa ko tatiihay a tamdaw kita. (Malaki 3:16-18) Misaˈopoan ni Yihofa nohatini ko kaolahan Ningra a tamdaw, padama cangranan malo ‘kalimlaan a hafay.’ Maedeng makalimay kita masalalomaˈ nonini a tamdaw. Anini, itiniay kita i mikiriwiˈay a lintad maˈorip, kawra itini kaˈayaw iraayho ko hahalamhamen a taˈangayay demak mamifekad. Kalikito mamaˈarawto ita masongilaˈ malaˈafo ko tatiihay tamdaw. Ikor mamaˈaraw ita palaˈosi ci Yihofa to mikiˈokan Ningra ci Taniilan, sanay ko sowal Ningra ci Taniilan: ‘Mahererek koya romiˈad i, o lalomowad kiso, milifok to sapalemed iso.’ (Taniil 12:13) Halamhamay kiso maˈaraw ci Taniil ato mapatayay salawina ‘lomowad,’ miliyaw milifok to ˈorip han? Ano mahaenay i, nohatiniho misarocod a madimadi ci Yihofaan, mihaen o papakasoˈlin kiso o mamaterek ko ngangan iso itini sakaˈorip a cudad ni Yihofa. w22.09 24 fiedac 17 fatac; 25 fiedac 19-20 fatac

O sowal ni Yihofa maedeng pakalalokay ci Icikilan, misamaanay hani? Maharatengay ningra alatek, na somowalay ci Yihofa to malecaday a sowal tiya minilnil ci Mosian aci Isayaan malo pairasolay. (Kasadakan 3:10; Isaya 6:8) Mafanaˈayho ci Icikil to samaanan ni Yihofa padama koniya tatosaay pairasolay a miremo to masakenakenaay pasangaray. Mansa, tiya kinatosa ci Yihofa pasowal ci Icikilan ‘ocoren Ako kiso’ saan i, maedeng pakasoˈlinay ci Icikil to mamidama ci Yihofa cingranan. Roma i, itini Icikil a cudad, marariday maˈosi ita ‘iraay ko sowal ni Yihofa takowanan’ sanay. (Icikil 3:16) Kinapinaay ci Icikil pasowal ‘iraay aca ko sowal ni Yihofa takowanan.’ (Icikil 11:14) Mahapinangay, mafanaˈay ci Icikil to minilnilan ni Yihofa ko niyah. Cowa konini aca, o wama ni Icikil o saysi, marariday pasowal ci Icikilan alatek, tocerid pakalalokan ni Yihofa ko pairasolay no Niyah, mikiˈok to papadama cangranan. Tinakoen, na pasowalan ni Yihofa ci Isak, ci Yakop aci Yirimiya: ‘Kalacafay Kako tisowanan.’—Satapangan 26:24; 28:15; Yirimiya 1:8. w22.11 2 fiedac 3 fatac

Soˈlin mararaway ci Atam aci Ifa, parocokay to patay i polong a teloc, kawra cowa ka falic ko araaw ni Yihofa. (Isaya 55:11) Kamayan makalim Cingra to madimadiay a tamdaw ngaˈay tahadaˈoc maˈorip. Nengnengen ita pakayni sapalaˈosiaw ci Yihofa to araaw no Niyah na somowalay ato na midemakay to maanan. Mikiˈokay ci Yihofa papatikol paˈorip to mapatayay a tamdaw, ho ira ko toki nangra milifok to midaˈocay a ˈorip. (Dmak 24:15; Titus 1:1, 2) Madimadiay a Yopu pakasoˈlinay, makalimay ci Yihofa patikol paˈorip to mapatayay a tamdaw. (Yopu 14:14, 15) Pairasolay a Taniil mafanaˈay, iraay ko tokel no tamdaw patikol maˈorip hanaca tahadaˈoc maˈorip. (ˈOlic 37:29; Taniil 12:2, 13) Itiniay i lintad ni Yis Yutaya a tamdaw mafanaˈay, wa ngaˈay ci Yihofa pafeli to midaˈocay a ˈorip i madimadiay midoko Cingranan a tamdaw. (Luka 10:25; 18:18) Roma i, kinapinaay ci Yis mihadak tonini a sakiˈok ni Yihofa, ano ci Yisto patikolan no Kawas paˈorip cingra.—Matay 19:29; 22:31, 32; Luka 18:30; Yohani 11:25. w22.12 5 fiedac 8-9 fatac

Pakalalokay ci Yihofa kitaanan miingid Cingranan. (Yakop 4:8) Mahemekay Cingra malo Kawas no mita, Wama ato Widang. Wa pacaˈofen Ningra ko satolon no mita, padamaho kitaanan misiˈayaw to pasangaray. Pakaynienho Ningra i likakawa Ningra pasifanaˈ ato midipot kitaanan. Mitolon kita, micekiw to Fangcalay Cudad, hanaca midotim to Kimad no Kawas, wa ngaˈayto miingid ci Yihofaan. Mihaen kita to demak wa matongal ko kaolah Cingranan, matomes ko piakoˈid Cingranan, hanaca makalim midofdof ato pakahemek Cingranan, samanen citatodongay Cingra milifok tonini. (Paˈarawan 4:11) Matongal ko kafanaˈ ita ci Yihofaan, wa matongal ko pitadiˈec Cingranan ato misaka dademakan Ningra a likakawa padama kitaanan. Kawra, wa palidlid sa mifasaw to pakasoˈlin no falocoˈ ita ci Yihofaan ato likakawa Ningra. Kawra wa ngaˈay malaˈosi ko picoˈay ita cingranan. Ira ko tanektekay a pakasoˈlin no falocoˈ ita ci Yihofaan, caay ka ngiyangi, ano tahadaˈocto cowa ko mamiliyas ci Yihofaan ato likakawa Ningra.—ˈOlic 31:13, 14. w22.11 14 fiedac 1-3 fatac

ˈAlomanay soˈliˈlinay a Krisciyang tangongolay ko olah ci Yihofaan, o Saˈakawangay Mikowanay saan ko pinengneng Cingranan, mansa hayi saan cangra kinafalah to pasalat ato ˈorip no niyah, misetekho to falocoˈ tanektek mitafo to madimadi, malecad nolitengan tatoloay Hipray a kapah. Oya tatoloay kapah misetekay to falocoˈ madimadi to Satadamaanay ko Saaroˈan a Yihofa, telocto milidongan ni Yihofa pasadak cangranan mikitini i marengrengay ko namal a palod. Ci Tafiti itini ˈOlic no niyah milengoay tada kalimlaan ko tanektekay mitafo to madimadi ci Yihofaan, sanay cingra: ‘Wa pasayra ci Yihofa i kasafinacadan milasil to sasawkit. Yihofaaw, nanay tooren Iso ko moecelay waywayan ako, tooren ko madimadiay waywayan ako misawkit takowanan.’ (ˈOlic 7:8) Somowalayho ci Tafiti: ‘Nanay dipoten no madimadiay ato moecelay kako.’ (ˈOlic 25:21) Madimadi ci Yihofaan o sangaˈayay a pakayraan maˈorip, aka a misafelit kita ci Yihofaan. Mihaen, o mamatinako ita to matatodongay ko sowal no mitiliday to ˈOlic, sanay cingra: ‘Tanektekay mitafo to madimadi, mitooray to rikec ni Yihofa maˈorip a tamdaw tada lipahakay.’—ˈOlic 119:1 ato roma pihongyak. w22.10 17 fiedac 18-19 fatac

Itini i hakelong no ˈorip ni Yopu maedeng ˈalomanay ko sakasasowal ningra a tamdaw, kawra o satangongolay a maharatengay ningra i, o kasasowal ningra to Kawas ci Yihofaan. Itini toniya kasasowal, mikiriwiˈay a somowal ci Yihofa to pinapina nisangaˈan a maamaan, padama ci Yopuan pakasoˈlin cowa ko kaira aca no taneng ni Yihofa, iraayho ko ˈicel midimokos to sikawdan no Niyah. Tinakoen patalipaˈelalan Ningra ci Yopu, ano madimokosay Ningra ko pinaˈorip, o ngangaˈay madimokos Ningra ci Yopu. (Yopu 38:39-41; 39:1, 5, 13-16) Misimsim toniya nisangaˈan a maamaan ikor, iraayto ko tangongolay a kacipinang ni Yopu to capeling ni Yihofa. Ano songilaˈen ita misolap a minengneng ko nisangaˈan no Kawas a maamaan i, mamatongal ko kafanaˈ Cingranan, kawra mihaen to demak cowa ko madoloay alatek. Ano itiniay i maci ko kitiraan ita, pasangaray manengneng ko serayan. Soˈlinto ano itiniay i inaka ko kitiraan, awaay ko toki ita misolap a minengneng to serayan alatek. Kawra, palaken ko toki ato misaˈicel misolap mihapinang to serayan o ciepocay. w23.03 15 fiedac 1-2 fatac

Pairasolay ci Yis ˈayaw no ira ko salikoray romiˈad, wa ira ko ‘taˈangayay ˈatoray’ ato romaroma pades mifekad. (Luka 21:11) Paˈayawayho ci Yis mamatongal ko ‘mararaway a demak.’ Anini, o raraw, mariˈangay ato katalawan piˈodis soˈlinay a matongal. (Matay 24:12) ˈAlomanay madimadiay midoko ci Yihofaan a tamdaw na tahalifaay to pades. Cowa ka pasowal ci Yis, tahalifa kita to pades i, samanen cowa ka ciharateng ci Yihofa kitaanan. (Isaya 57:1; 2 Korinto 11:25) Awaay ko pinang to tatano kafahkaˈan a pakayraan ci Yihofa midipot kitaanan, paliyas to pades kitaanan, kawra papafeli Cingra to kihcod a saali no mita, padama kitaanan eca ka marawraw, milifok to rihaday. Ano talaˈayaw kita mihalaka to sapisiˈayaw to kacalohan a pakayraan, ano mifekad sato ko pades i, wa madolo to rihaday ko falocoˈ. Kawra talaˈayaw misaday mitaypiyaway to cangoˈotay ko pakasoˈlin ita ci Yihofaan hokira? Cowa ka hatira. Soˈlinay i, talaˈayaw pakayni i pades a misaday, paihkalay koni to pakasoˈlinay kita to mamidimokos ci Yihofa kitaanan. Misamaanay hani? Patalipaˈelalay ko Fangcalay Cudad kitaanan ka talaˈayaw misaday to mamifekad a pades. w22.12 18 fiedac 9-10 fatac

Itini ci Yosif i kapalitan i, tosaay ko papitiihan ni Yihofa ci Falawan. Mafanaˈ cingra iraay ko inaneng ni Yosif mitadtad to mitiihan ikor, mitahidangay ci Yosifan. Itini pipadama ni Yihofa, cowa ko pitadtad aca ni Yosif to tatodong no mitiihan, mihadakayho to citanengay a sapaini ci Falawan. Mahapinangay ni Falaw kalacafayay ci Yihofa ci Yosifan, orato minilnilay ci Yosifan misimaw to polong a kakaenen no Icip. (Satapangan 41:38, 41-44) Ikor mifekaday ko pakidemay a kedal, cowa ko Icip aca ko mafiyoray, mafiyorayho ko Kanan, o kitiraan no paro no lomaˈ ni Yosif a pala. Nohatini, iraayto ko ˈicel ni Yosif milidong to paro no lomaˈ no niyah, tatodong nonini madipotayto ko ˈorip no lalitengan ni Misiya. Mahapinangay, o ci Yihofa, o Cingra ko padamaay ci Yosifan ‘malaˈosi ko kihcod a demak.’ Soˈlin mariˈang ko kakakaka ni Yosif cingranan, kawra salikorto misalofan ni Yihofa ko demak, pakayni ko pipalaˈosi to araaw no Niyah. w23.01 17 fiedac 11-12 fatac

‘Ka pinaˈon kamo.’ Onini a sowal itini sapatongal a mihongyakan i, ‘ka pisinanot kamo to niyah’ sanay. Ano misinanot ko tamdaw to niyah, pakayni mamipalak to kalawidang ningra aci Yihofaan a demak, o papadotoc a talipaˈelal, hanaca misaˈicel miliyas to mahaenay a demak. Ano mihaen, o ngangaˈayto materek cingra i olah no Kawas. (Taneng 22:3; Yuta 20, 21) Tarokos ci Pawlo palimoˈotay to Krisciyang papisinanot to niyah. Tinakoen, sanay pasowal to Ifisoay a Krisciyang: ‘Ka pisinanot kamo to niyah sasamaan ko waywayan a midemak, aka a matiya o mafolaay a tamdaw, ka matiya o citanengay a tamdaw.’ (Ifiso 5:15, 16) Ci Satan cowa ka tomerep a mipalak to kalawidang ita aci Yihofa, mansa patalipaˈelalay ko Fangcalay Cudad kitaanan ‘padadotoc a mihapinang to maanan ko araaw ni Yihofa.’ Mihaen i, ano samaanto ci Satan miˈodis kitaanan, cowa ko mamapalak ko kalawidang ita aci Yihofa. (Ifiso 5:17) Sakatatodongaw ko pisaˈosi, o hahapinangen ita ko ‘araaw ni Yihofa.’ Sasamaan ko pidemak hani? Mamicerid kita micekiw to Kimad no Kawas, misongilaˈ a midotim. Ano iraay kono ‘ni Kristo a harateng’ ita, mamatongal ko kacipinang to araaw ni Yihofa, wa madoloto ‘malo citanengay a tamdaw kita.’ Soˈliˈlin awa ko patodicekay a saˈosi, wa ngaˈay citaneng ko pisaˈosi ita.—1 Korinto 2:14-16. w23.02 16-17 fiedac 7-9 fatac

Hakowaay ko kararid iso miasik to lomaˈ no niyah hani? Alatek itini kalinahan iso a tatokian misongilaˈay a miasik, kawra ikor cato ka piliyaw miasik kiso i, sasamaanto hani? Mafanaˈay kita, madoloay a mataling ko alafoh no lomaˈ. Pakayni sapadotocaw makapah makorac ko lomaˈ no niyah, o mamararid kiso a miasik. Malecaday, o papadadotoc kita mihadak to ˈicel, misafaeloh to harateng no niyah, misalof to capeling no niyah. Manaokaniw, pakayni ‘sapikoracaw to niyah, mifalah to masakenakenaay pakaditay to tireng ato nafalocoˈan a demak,’ itini ˈayaw no micada to paputisem kita maharekayto misaˈicel a mifalic. (2 Korinto 7:1) Kawra nohatini oha mamidofdofho kita to sapalimoˈot ni Pawlo, sanay cingra: ‘Ka padadotoc kamo misafaeloh to pakayraan a miharateng.’ (Ifiso 4:23) O tatiihay a pinangan nonini a hekal mahecaday o alafoh, madoloay pakadit kitaanan malo cowato ko makoracay i pinengneng ni Yihofa. Sapiliyasaw to mahaenay a teloc, ato sapadotocaw milifok to pihayda ni Yihofa, o mamicerid kita mikinsa to harateng ato capeling no niyah, hapinangenho iraay ko mararaway harateng no niyah hokira. w23.01 8 fiedac 1-2 fatac

Haratengen hena, ano itiraay kiso itatihi ni Yis, mamatengil iso samaanay cingra pasifanaˈ to tamdaw hani? Marariday cingra misaka dademak to Fangcalay Cudad, sahto o maharatengay i ponoˈ ko misowalan ningra! Mipaputisem ci Yis ato tahacada to sapanilnil no fangcalay saocor i, itiyaay cingra pakaharateng to nano demak ningra i kakarayan. O maˈoningay i Ratoh a Cudad, maharek ci Yis a mipaputisem, ˈayaw no patay ningra, sakadademakay cingra to sowal no Fangcalay Cudad. (Limoˈot 8:3; ˈOlic 31:5; Luka 4:4; 23:46) Itini ilalomaˈ no tolo ira ko kalitosa miheca, marariday ci Yis i kaˈayaw no ˈalomanay miasip anca misaka dademak to Fangcalay Cudad, halo mitadtad to tatodong no sinael. (Matay 5:17, 18, 21, 22, 27, 28; Luka 4:16-20) Itini ˈayaw no misatapang ci Yis mitosil i, halafinayto cingra mararid miˈosi ato mitengil to Kimad no Kawas. Maedeng marariday matengil ningra ko pisaka dademak ni Mariya aci Yosif to sowal no Fangcalay Cudad. (Limoˈot 6:6, 7) O roma i, itini kahacecay Paselaˈan a Romiˈad malacafayay ci Yis to paro no lomaˈ tayra i kasaˈopoan. (Luka 4:16) Itini kasaˈopoan i, ano miˈosi ko tamdaw to Fangcalay Cudad misamacayay cingra mitengil. w23.02 8 fiedac 1-2 fatac

Adihayay ko lalangian ita a maolah ci Yihofaan. Tinakoen, mafanaˈayto kiso o ‘pipowaran no ˈorip’ Cingra, mafanaˈayho ‘maamaan ngaˈayay a sapatelong, maamaan malefotay a sapalifon’ sahtoay ono Ningra a sapafeli to tamdaw. (ˈOlic 36:9; Yakop 1:17) Itini kaˈorip iso maamaan ngaˈayay a demak, sahtoay o naitiniay i hinapaladaˈay iraay ko olah a Kawas ci Yihofaan. O sapatefoc i, o sapafeli ni Yihofa kitaanan a masakalimlaan a sapatelong. Misamaanay hano saan ko sowal hani? Haratengen hena, o olah ni Yihofa ato Wawa Ningra hakowaay ko katangongol. Sowal ni Yis ‘maolahay ko Wama takowanan,’ sanayho cingra ‘maolahay kako to Wamaan.’ (Yohani 10:17; 14:31) Itini i masawalwalay a mihecaan, o olah Nangra tatosa maedeng padadotocay matongal ko katangongol. (Taneng 8:22, 23, 30) Manengneng ni Yihofa ko kanonoˈan a Wawa misemsem a tahapatay i, maedeng tada adadaay ko falocoˈ Ningra. Tona tangongolay ko olah ni Yihofa to tamdamdaw—mahawpay kiso, hayi sanay Cingra mikinafalah to kanonoˈan a Wawa, hato iraayto ko sakatahadaˈocaw iso maˈorip ato romaroma tamdaw. (Yohani 3:16; Kalatiya 2:20) Mafanaˈ to hatiniay ko kaolah ni Yihofa kitaanan, wa soˈlinto a maolah kita Cingranan! w23.03 4-5 fiedac 11-13 fatac

O mamifalah kita to sasowalen no mitowakangay a tamdaw. Mirikecan ni Yis ko roma a tamdaw no Pirkamumay a kasakopang, samanen mipacakatay cangra to cowa ka lecad a sasowalen, itini ilalomaˈ no kasakopang mikidatay to sakaliwasak. (Paˈarawan 2:14-16) O roma tamdaw i Tiyatira a kasakopang micadaay to sapakahemek ni Yis, samanen cowa ka sakacipinangaw cangra to ‘talolongay a demak ni Satan.’ Pakalalokay ci Yis cangranan ‘kelecen a miˈimer’ ko soˈlinay kimad. (Paˈarawan 2:24-26) Ilalomaˈ nonini tosa a kasakopang o malonayay ko pakasoˈlin a Krisciyang mitengilay to mararaway a sasowalen, o papasasiyor cangra. Ano aniniayto o mamisamaan hani? O mamifalah kita to kihcod misafelitay to harateng ni Yihofa a sasowalen. O mitowakangay tamdaw ‘o papotal hato mangodoay’ nengnengen, kawra soˈlinay i, ‘cowa patalahkal to ˈicel no mangodoay.’ (2 Timoti 3:5) Ano misongilaˈ kita micekiw to kimad no Kawas, o mamadoloto mihapinang halo miliyas to mararaway a sasowalen. (2 Timoti 3:14-17; Yuta 3, 4) O papakasoˈlin kita to pidoko no niyah ci Yihofaan o mihaydaan Ningra. O midemakan ita a roma a demak ano cowa ko mamahayda ko pidoko no niyah, o tatangsolen a misalof.—Paˈarawan 2:5, 16; 3:3, 16. w22.05 4 fiedac 9 fatac; 5 fiedac 11 fatac