Saka 8 Folad

O sasowalen no cecay tamdaw ano paihkalay cingra to ‘mikangodoay ci Yihofaan, miharatengay to ngangan Ningra a tamdaw,’ o tatiliden ni Yihofa ko ngangan nora tamdaw i ‘piharatengan a cudad.’ Miharateng kiso hano mihaen ko demak ni Yihofa hani? Sanay ci Yis: ‘Ano masamaanay ko falocoˈ noya tamdaw i, hatiraay ko masadakay i ngoyos ningra.’ (Matay 12:34) Makalimay ci Yihofa to maolahay Cingranan a tamdaw tahadaˈoc maˈorip i faelohay a hekal. Sasinanoten ita ko sasowalen no niyah, mihaen ngaˈ cadaen ni Yihofa ko pidoko ita. (Yakop 1:26) O roma cowa ka fanaˈ to Kawas a tamdaw misatakaraway cowa ka ngodo ko sasowalen, misamsamay to tamdaw. (2 Timoti 3:1-5) Caay ka ciharateng kita malecad cangranan. Makalimay kita maemin maolah ci Yihofa to sasowalen ita, itini saˈopo anca mitosil i, sidaˈitay ko sasowalen ita, kawra itini i lomaˈ mariˈang ko sowal to paro no lomaˈ, wa maolah ci Yihofa kitaanan han?—1 Pitiro 3:7. w22.04 5 fiedac 4-5 fatac

Samanen miparoan no Kawas ko harateng no Niyah i falocoˈ no moetepay a waˈa, misaali to moetepay waˈa midemak to mahecaday harateng nangra palaˈafo to Taˈangayay Papilon. Wa cikelohen ni Yihofa ko kalo a kitakit mitoor to harateng Ningra a midemak, wa sakadademaken no kalo a kitakit koya kahngangay a ˈaˈadopen, o Makomoday Kitakit, palaˈafo to polong a mararaway pihakelongan. (Paˈarawan 18:21-24) Onini a demak pakayni kitaanan iraay ko manan a tatodong? O mamisaˈosi kita o pidoko no niyah itini pinengneng no Kawas ‘o makoracay awaay ko kadit.’ (Yakop 1:27) O mararaway a kimad no ‘Taˈangayay Papilon,’ o nanaman no lisin, misakawasay a waywayan ato malafoay a palinian no waywayan taˈangayay ko pifiyor to tamdaw, oha laliyasen no mita. Roma i, papadotoc kita mihadak to sapirikec i tamdaw, pasowal cangranan ‘kasadak ilalomaˈ nimira,’ mihaen ngaˈ eca ka piladaˈ to raraw nimira.—Paˈarawan 18:4. w22.05 11 fiedac 17-18 fatac

O wama wina, sangaˈen ko hatoki pasifanaˈ to wawa mafanaˈ ci Yihofaan, ceriden ko wawa a milengo to nidemakan ni Yihofa i tisowanan a demak. (Limoˈot 6:6, 7) Ano cowa ko Krisciyang ko ramod iso, cowa ko ngangaˈay itini i lomaˈ micerid malacafay to wawa minanam to Fangcalay Cudad, ka pikiriwiˈ kiso mikilim to toki malalengo to wawa pakayni ci Yihofaan. Cecay fafahiyan salikaka ci Kristing sanay ko sowal: “O kalalengo ako ato wawa pakayni ci Yihofaan a toki cowa ka adihay, mihaenay mamameten ako ko kihcod a toki.” O roma i, tawliken a milengo ko likakawa ni Yihofa ato salikaka, aka pitongangan to malohemay malitengay. O nano sowal iso papadama to wawa makahi itini i pisaalian a tatokian pasayra cangranan micangacang to sapadama. Itini i lomaˈ mamicowat to rihaday. Micerid paihkal to maolahay kiso to faˈinay ato wawa, tano mikangodoay sidaˈitay a pakayraan milengo to faˈinay iso, halo pasifanaˈ to wawa mamihaen to demak. Ano mihaen i, wa ngaˈayto kiso paira to rihadayay no lomaˈ, wa ngaˈayho padama tisowanan madolo pasifanaˈ to wawa mafanaˈ ci Yihofaan.—Yakop 3:18. w22.04 18 fiedac 10-11 fatac

Sowal ni Yis to itiniay i Ifiso a Krisciyang soˈlin misiˈayaway to adihayay a sapalifet, kamayan padadotoc mihadidi, caka pisawad a midoko ci Yihofaan. Kawra, o salakatay a olah nangra mafasawayto. O mamiliyaw cangra fanekfek a maolah to Kawas, ano eca i, o pidoko nangra cowa ko mamilifok to pihayda no Kawas. Malecaday, cowa ko pihadidi aca ita maedengto, o papairaen ko matatodongay a araaw no falocoˈ mihadidi, samanen o kaciharatengan no Kawas cowa ko midemakay to maanan kita, misaaretengayho hano mihaen ko demak ita. Makalimay Cingra kitaanan pakayniay ka tangongol noka olah ato piakoˈid ita ko sapidoko Cingranan. (Taneng 16:2; Marko 12:29, 30) Oha papadadotoc kita talipaˈelal. I Satisay a kasakopang a Krisciyang iraay ko roma pasangaray. Soˈliˈlin na fanekfekay cangra matayal saki Kawas, kawra nohatini mafasawayto cangra. Mihaenay palimoˈotan ni Yis cangra ka ‘palalto.’ (Paˈarawan 3:1-3) Manaokaniw, cowa ka pawan ci Yihofa to na midemakan ita Cingranan a tayal.—Hipray 6:10. w22.05 3 fiedac 6-7 fatac

Sowal ni Solomon, malifokay a lipahak mikitini karoray matayal i ‘o sapafeli no Kawas a sidaˈit.’ (Patnakay 5:18, 19) Matinakoay ni Solomon konini. Na adihayay ko tayal ningra, tinakoen palomaay to fadisosoˈ, patirengay to lomaˈ, paloma to kilang ato fanaw, mitomadawayho to adihayay niyaroˈ. (1 Hongti 9:19; Patnakay 2:4-6) Sahtoay o taˈangayay patirengay a tayal konini, mikitini maedeng milifokay cingra to karenec. Kawra mafanaˈay ci Solomon, sapilifokaw to soˈliˈlinay a lipahak, cowa konini aca ko hademak, mamirienangho to midokoay ci Yihofaan a demak. Tinakoen, mikantok cingra to patirengay to fangcalay sefi a tayal, pitoay miheca ko pipatireng tonini a makapahay fangcalay sefi. (1 Hongti 6:38; 9:1) Midemak to masakenakenaay a demak ikor, mahapinangay ni Solomon matayal saki Yihofaan ikakaay ko kalimlaan to picangacang to romaroma a demak. Sanay cingra: ‘Tolasen ko sowal i: Kangodoen ko Kawas, kaˈimeren a midoedo ko limoˈot Ningra.’—Patnakay 12:13. w22.05 22 fiedac 8 fatac

Itini Fangcalay Cudad maasipay ita, na misododay ci Yihofa to ˈalomanay tamdaw. Cima ko maharatengay iso hani? Maharatengay iso ko Hongti ci Manasi alatek. Onini a ciraraway a tamdaw adihayay ko tatiihay a demak, pakararaw ci Yihofaan. Miowingay cingra to mararaway a pidoko, mipatayay to wawa no niyah, patafang to makaniway kawas malo sapatoˈaya. Mangalefay satimolo sanay miteli to mitoˈtoˈan no niyah a samiyay i fangcalay sefi ni Yihofa. Sowal no Fangcalay Cudad: ‘Adihayay ko midemakan ningra a tatiihay demak i pinengneng ni Yihofa, pakararaw to Kawas.’ (2 Rayray 33:2-7) Kawra ikorto mikifalocoˈay a pasasiyor ci Manasi, makahiay ci Yihofa misodod cingranan. (2 Rayray 33:12, 13) Maharatengayho iso ko Hongti ci Tafiti alatek. Midemakay cingra to maˈaˈodangay ato mipatayay to tamdaw a taˈangayay raraw, pakararaw ci Yihofaan. Kawra, tiya mikifalocoˈ a pasasiyor ci Tafiti, mihayi to raraw i, misododan ni Yihofa cingra. (2 Samuil 12:9, 10, 13, 14) I fafekangay a tinakoan pakasoˈlinay kita, makalimay ci Yihofa misodod kitaanan. w22.06 3 fiedac 7 fatac

Sapikedecaw a mitafo to hatokel cowa ko madoloay. Itini pitala ita ci Yihofaan a tatokian, mamaˈisang alatek. Kawra haratengen, o midaˈocay ci Yihofa, o pinengneng Ningra to toki cowa ka lecad kitanan. (2 Pitiro 3:8, 9) Cowa ka itini i pitalaan ita a tatokian midemak Cingra alatek, kawra wa misaka dademak Cingra to sangaˈayay a pakayraan palaˈosi to araaw no Niyah. Itini pihadidi mitala ci Yihofaan palaˈosi to araaw Ningra i, o maanan ko ngangaˈay padama kitanan mikedec mitafo to hatokel hani? (Yakop 5:7) Padadotoc kita patanektek to kalawidang ci Yihofaan, wa ngaˈayto mikedec mitafo to hatokel no niyah. Soˈlinay i, palalitingan no Fangcalay Cudad ko hatokel ato pakasoˈlinay falocoˈ, sowal sa papakasoˈlin kita to iraay ci Yihofa materek, pakasoˈlinho to ‘papalifonen Ningra ko micangacangay Cingranan a tamdaw.’ (Hipray 11:1, 6) Matongal ko pakasoˈlin ita to soˈlinay materek ci Yihofa, wa matongal ko pakasoˈlin to papalaˈosien Ningra ko polong a sakiˈok no Niyah. Ano sapikedecaw mitafo to hatokel i, ka pasayra ci Yihofaan mitolon, micekiwho to Kimad Ningra. Soˈlin cowa ka ˈaraw ita ci Yihofa, kawra ngangaˈay miingid Cingranan. Itini satolon ngaˈay kita pasayra Cingranan mihadak to nafalocoˈan, pakasoˈlin Cingranan mamitengil to sowal ita.—Yirimiya 29:11, 12. w22.10 26-27 fiedac 11-13 fatac

Haratengen ko pakayraan itiya. Maroˈay ci Yopu itini ˈafoˈafoan, caay ka tomesen to adada no tireng. (Yopu 2:8) O kapatay no wawa tada mararomay a masomad ko falocoˈ ningra, ˈarawhan o widang ningra mariˈangay a miˈodis to kaˈorip ningra, sapipalakaw to ngangan ningra. O mahaenay a sapalifet malecaday o karetengay a ˈinorong mipaekelay to tireng ningra. Salakat, terep sanay caka somowal ci Yopu. (Yopu 2:13) Miharateng konini a tatoloay tamdaw awaayto ko hatokel ni Yopu, sapiliyasaw ci Yihofaan ano saan cangra i, tada mararaway cangra. Ikor, micaˈengaway ci Yopu alatek, misamocek minengneng tonini a tatoloay makaniway widang, saan ko sowal: ‘Ano tahirato i patay cowa ko mamifalah kako to madimadi to Kawas!’ (Yopu 27:5) Soˈliˈlin tahalifa to masakenakenaay sapalifet, hano ngaˈayho ci Yopu timolo a tanektek hani? Soˈlin pasangarayto ko kaˈorip ningra, kamayan ira ko hatokel, pakasoˈlin o sidaˈitay a Kawas isalikor o papairato sasayar ningra. Mafanaˈay cingra soˈlin mapatay ko niyah, o papatikolen ni Yihofa paˈorip cingra.—Yopu 14:13-15. w22.06 22 fiedac 9 fatac

Misangaˈay to kakarayan ato sera a saˈakawangay Tatapangan pafeliay kitanan to toki pakayni i satolon miingid Cingranan, tada o kalimlaanto a sapalemed konini. Haratengen hena, wa ngaˈay i kalo a toki, tano masakenaay a sowal pasayra ci Yihofaan mifowah to nafalocoˈan. Ano itinito kaadadaan a takar, anca itini kapalitan, wa ngaˈay kita pasayra Cingranan mitolon, hanaca pakasoˈlin to papacaˈof Cingra kitanan. Tada miakoˈiday kita to sidaˈitay a Wama i kakarayan pafeli kitanan tonini kalimlaan a sapalemed! Hongti ci Tafiti misaaretengay to mitolonay, itini i cecay ˈOlic pasowalay cingra ci Yihofaan sanay: “Nanay matiya o ˈacefel no exiw a macakat i kaˈayaw Iso ko pitolon ako.” (ˈOlic 141:1, 2) Itini i lintad ni Tafiti, o sapatafang no saysi i fangcalay sefi a exiw ci Yihofaan o misongilaˈan a misangaˈ. (Kasadakan 30:34, 35) Mihaen ko sowal ni Tafiti, paihkalay makalimay cingra o satolon no niyah o misongilaˈan a misimsim. Malecaday tonini ko kalim ita, samanen makalimay kita maolah ci Yihofa to satolon no mita. w22.07 20 fiedac 1-2 fatac; 21 fiedac 4 fatac

Papaikenen ci Yihofa a misayfang. Cowa pafeli ci Yihofa kitaanan to fadangalan miˈodis to pakararaway kitaanan a tamdaw. (Loma 12:20, 21) Cowa ko malefotay kita, caay ka songilaˈ ko pinengneng to demak, mihaenay awaay ko pakayraan ita malecad to Kawas matatodong ko pisawkit to demak. (Hipray 4:13) Nolatekay o nafalocoˈan ita micaraay to sapisawkit ita a inaneng. Itini sakayat ni Yihofa, sanay ci Yakop: ‘O keter no tamdaw cowa ka ngaˈay patalahkal to moecelay no Kawas.’ (Yakop 1:20) Wa ngaˈay pakasoˈlin kita, o mamatatodong ko midemakan ni Yihofa, salikor mapatalahkal ko moecelay. Misodod kita to tao, paihkalay to pakasoˈlinay ko niyah o masadafdafay ko Kawas. Patoroden ita ko demak i kamay ni Yihofa, paihkalay to pakasoˈlinay kita ci Yihofaan o papalahdaw to pairaan no raraw a kihcod a roray. Itini faelohay hekal, o malifaay a masakenaay a roray isaˈayaw “o mamatawalto ko iˈaya:way a demak a maemin.”—Isaya 65:17. w22.06 10-11 fiedac 11-12 fatac

Makaˈinteh no tamdaw kita misawacayay, o mihakelongay kita ci Kristoan, hanaca o mihaydaan ni Yihofa kita. (Matay 5:11, 12) Oniya kihcod misafelitay ci Akoma ko miocoray, kawra cowa ko papakadangar cingra ci Yisan. Ira ko sadama ni Yis, o ngangaˈay kita patengil to ngaˈayay a lihaf i polong a kasafinawlan. Nengnengen ko ilaenoay a wacay. Milasil kita to ngaˈayay a lihaf no Hongti Kitakit, o mamalifaho ko sacara no sasowalen. Itini Paˈarawan, patalahkalan ni Yis ko tarokos ci Yohani, itini romiˈad ita onini a sacara mamaremoto. (Paˈarawan 14:6, 7) Samaanay a matatodong ko sowal ni Yis hani? Misarocoday kita to ˈicel patenak to lihaf no Hongti Kitakit i kasasiroma ko sasowalen a tamdaw, paira to toki no ˈalomanay tamdaw micada to soˈlinay kimad. Anini, icowacowaay a tamdaw no hekal ngaˈayay pakayni jw.org a wangcan miˈosi to lalakaw no Fangcalay Cudad, samanen onini a wangcan mataˈlifay ko 1,000 a sowal. Roma i, nohatini misaka dademakan ita ko Layapen ko Midaˈocay ˈOrip! a cudad padama to tamdaw malo Krisciyang, o Malohemay Malitengay i Congpo mihaiyay mihongyak tonini a cudad to 700 kasasiroma no sowal. w22.07 9 fiedac 6-7 fatac

Iraay ko siniˈadaay falocoˈ ni Yis to tamdaw. Tarokos ci Matay sanay: ‘Maˈaraw ningra ko ˈalomanay tamdaw, siniˈadaay cangranan, samanen masamsamay no tamdaw cangra, awaay ko pitadiˈecan, mahecaday o awaay ko pakaenay tamdaw a lopayˈay siri.’ (Matay 9:36) Mahaenay ci Yihofa han? Sowal ni Yis: ‘O kakarayan a Wama ako caay ka kahi matekop ko cecay no sasafaay a tamdaw.’ (Matay 18:14) Onini a sowal tada padihkoay to falocoˈ no tamdaw! Soˈlinayto, matongal ko kafanaˈ ita ci Yisan, mamatongal ko olah ci Yihofaan. Roma i, adihay ko kafanaˈ iso to matenesay a salikaka, o mamatongal ko olah ci Yihofaan, mihaen o ngangaˈayto padadotoc macakat. Mahapinangay iso cangra tada lipahakay han? Misetek cangra to falocoˈ midoko ci Yihofaan, caay ka pacekos ko falocoˈ. Ngaˈayay papisowalen iso cangra to kalimlaan a nalifetan no niyah matayal saki Yihofaan. Ano mamidemak kiso to cecay kalimlaan a sasaˈosien, ngaˈayay licayen cangra iraay ko maanan a sapaini. Haratengen: ‘Mihoped to ciepocay a harateng, wa malaˈosi ko demak.’ w22.08 3 fiedac 6-7 fatac

Kita o kahacecay tamdaw tatahalifa to masakenakenaay a sapalifet. Kawra tahadaˈocto aka o niyah saan ko misiˈayaw to sapalifet. Ci Yihofa o matomesay to olah a Wama, miceriday a midimokos kitaanan. Itiniay i tatihi ita Cingra, ano hacowato a tatokian pasayra kita Cingranan micangacang, o mamitengil Cingra, hanaca makahiay a midama kitaanan. (Isaya 43:2) Papakasoˈlin kita o mamalaˈosi ko niyah misiˈayaw to pasangaray, samanen hinapaladaˈay ci Yihofa pafeli to misaalian ita a kihcod, tinakoen mihaiay Cingra kitaanan pasayra Cingranan mitolon, pafeliayho to Fangcalay Cudad, masakenakenaay pahaleday to pakasoˈlin a kakaenen ato matomesay to olah a salikaka. Onini a kalimlaan a sapatelong padamaay kitaanan ngaˈay padotoc a mihadidi i pasangaray a pakayraan. Sidaˈitay a Wama ci Yihofa padotocay midimokos kitaanan, tada miakoˈiday kita Cingranan, ‘o falocoˈ ita pakayraay Cingranan a lipahak.’ (ˈOlic 33:21) Ano sapaihkalaw kita to miakoˈiday ko harateng no niyah, o mamicada to kihcod a sapadama ni Yihofa, mamisaˈicelho a materek i olah Ningra. Ano padadotoc kita misarocod midofdof ci Yihofaan, hanaca midemak to matatodongay i pinengneng Ningra a demak, o tatahadaˈoc Cingra midimokos kitaanan! w22.08 13 fiedac 15-16 fatac

Anini, ˈalomanay tamdaw cowa ka fanaˈ to cima ko ngaˈay pakasoˈlinen no niyah. Cisasaay cangra to idahiyay ko ngangan a misasingdiay, kakakosiya ato ˈaˈideman no mirikecay to soˈlinay cangra a ciharateng to sakangaˈay nangra hokira. Roma i, cowa ka ngaˈay tiˈeren ko ˈaˈideman no kiyokay sanay cangra, orato cisasaayto ko harateng to Fangcalay Cudad, samanen sowal no ˈaˈideman no kiyokay mitooray ko niyah to Fangcalay Cudad a maˈorip ato pasifanaˈ to tamdaw sanay. O finawlan ni Yihofa pakasoˈlinay to o ‘soˈliˈlinay a Kawas’ ci Yihofa, hanaca sahtoay o sakangaˈay ita ko miharatengan Ningra. (ˈOlic 31:5; Isaya 48:17) Mafanaˈay kita to ngangaˈay pakasoˈlin kita to sowal no Fangcalay Cudad. Cecay mikakingkiway to Fangcalay Cudad sanay: “O Kimad no Kawas awaay ko mimimiming aca a mararaway, cowa ko mamalahorac. O finawlan no Kawas wa ngaˈay pakasoˈlin to Kimad no Kawas, samanen mitadiˈecay cangra to somowalay tonini a sowal no Kawas.” Mikifalocoˈay kita mihayda to sowal nonini a mikakingkiway. w23.01 2 fiedac 1-2 fatac

Padama kita to salikaka paˈicel to pakasoˈlin ci Yihofaan malecaday o pakalalokay cangranan. O romaroma salikaka malikafay no tao, roma mamiremo to pakidemay a adada no tireng anca madokaˈay ko nafalocoˈan, iraayho ko roma salikaka halafinayto mitala to kaira no faelohay hekal. O hatiniay a pakayraan palifetay to pakasoˈlin no mita. O saka 1 hahekalan a Krisciyang iraay ko malecaday a pasangaray. Sakadademakan ni Pawlo ko sinael paˈicel to pakasoˈlin no salikaka. Tinakoen, o Yutaya a Krisciyang malikafay no paro no lomaˈ alatek, ikakaay ko kangaˈay no Yutayakiyo to Kristokiyo sanay ko sowal. Tahasiˈayaw to mahaenay salikaf i, cowa ka fanaˈ cangra to sasamaan pacaˈof alatek. O mitilidan ni Pawlo a Hipray cudad maedeng taˈangayay ko sapakalalok toniya salikaka. (Hipray 1:5, 6; 2:2, 3; 9:24, 25) O pitadtad ni Pawlo tada ciˈicelay, wa ngaˈay sakadademaken no salikaka pacaˈof to malikafay cangranan a tamdaw. w22.08 23-24 fiedac 12-14 fatac

Itini hekal ni Satan, cowa ka fanaˈ ko tamdaw o cima ko pakasoˈlinen. O waywayan no adihayay misasingdiay tamdaw, o tapang no mirikecay ato ˈaˈideman no pihakelongan patoleday to tamdaw, ano widangto, fiyafiyaw anca paro no lomaˈ cowa ka ngaˈay pakasoˈlinen saan ko harateng no tamdaw. Cowa ko fafahkaˈ kita tonini, samanen paˈayawayto ko Fangcalay Cudad, tahini ‘salikoray romiˈad,’ ‘cowa ka madimadi’ ‘paorafay’ ‘pacakayay to tao’ ko tamdaw. Sakoniya sowal, patalahkalay ko tamdaw to tatiihay a capeling no kawas no hekal, ci Satan cowa ka ngaˈay pakasoˈlinen. (2 Timoti 3:1-4; 2 Korinto 4:4) Kawra, kita o Krisciyang, mafanaˈay o ngangaˈay ko niyah miemin to falocoˈ a mitadiˈec ci Yihofaan. Pakasoˈlinay kita tada maolahay ci Yihofa kitaanan, ‘cowa ko mamiliyas’ Cingra to widang no Niyah. (ˈOlic 9:10) Wa ngaˈayho mitadiˈec kita ci Yis Kristoan, samanen pakayniay cingra kitanan kinafalah to ˈorip no niyah. (1 Pitiro 3:18) Mikitini nalifetan matinakoay ita, o mihadakan no Fangcalay Cudad a sakayat ngaˈayay tiˈeren.—2 Timoti 3:16, 17 w22.09 2 fiedac 1-2 fatac

O soˈliˈlinay a lipahak cowa ko lipahakay aca ko harateng, kalikiay ira, kalikiay malahdaw, ao padadotocay i hakelong no kaˈorip. Ci Yis itini ‘Pasifanaˈ i Lotok’ sanay: ‘Makalimay mirenec to saali no nafalocoˈan a tamdaw o lipahakay.’ (Matay 5:3 ato roma pihongyak.) Mafanaˈay ci Yis, hofoc han ko tamdaw iraayto ko kalim, sakafanaˈaw ato midoko to Misangaˈay a Tatapangan nangra Kawas ci Yihofaan. O ‘saali no nafalocoˈan’ ita konini. Samanen ci Yihofa o ‘lipahakay a Kawas,’ mihaenay midokoay Cingranan a tamdaw wa ngaˈay malo lipahakay a tamdaw. (1 Timoti 1:11) O sasinoway ko kaˈorip ita ngaˈ lipahak han? Cowa. O sowal ni Yis itini pasifanaˈ i lotok, o ‘masomaday ko falocoˈ a tamdaw’ wa ngaˈay lipahak. Sanayho ko sowal ni Yis, o ‘pakayniay i moecelay micada to sapalak’ a tamdaw wa ngaˈay lipahak. (Matay 5:4, 10, 11) O sapasifanaˈ ni Yis pacipinangay kitanan, lipahak kita cowa ko pakayniay kasinoway no kaˈorip, ao pakayniay pirenec ita to saali no nafalocoˈan ato piingid to Kawas ci Yihofaan.—Yakop 4:8. w22.10 6 fiedac 1-3 fatac

Ira ko sapihapinang inaneng, wa mafanaˈ mihapinang to hacowa tatokian ‘tomerep,’ hacowa tatokian ‘somowal.’ (Patnakay 3:7) Itini roma serangawan, marariday ko tamdaw pasowal ‘o somowalay o linkim, o tomerepay o tada ekim,’ tatodong i, latekay tomerep ikakaay ko kangaˈay to somowalay. Nengnengen ko cecay tinakoan. O cecay malohemay malitengay kadofahay ko nalifetan, mihaenay ano tahalifa ko roma kasakopang to pasangaray saysayen a demak i, marariday mitahidang cingranan a padama. O roma malohemay malitengay sanay milengo tonini a salikaka: “Tocerid misinanotay cingra, caay patalahkal to mahimeday a demak no roma kasakopang.” Onini a malohemay malitengay samanen mihapinangay to demak, mansa milifokay to pikangodo no romaroma malohemay malitengay i kasakopang. Pakasoˈlinay cangra cowa ko papasowal cingra to roma tamdaw to mahimeday a demak no kasakopang. Soˈliˈlinay falocoˈ milingatay to pakasoˈlin. Wa ngaˈay pakasoˈlin kita to soˈliˈlinay ko falocoˈ a tamdaw, samanen tocerid soˈliˈlinay ko sowal ningra.—Ifiso 4:25; Hipray 13:18. w22.09 12 fiedac 14-15 fatac

O soˈliˈlinay a taneng ano ‘milekal i maci’ i, talimaan sanay ko ˈalomanay tamdaw. (Taneng 1:20) Sowal no sinael toloay masasiroma ko manaˈayay to taneng, cangra i ‘cangoˈotay ko nalifetan a tamdaw’ ‘hinalikafay a tamdaw’ ‘mafolaay a tamdaw.’ (Taneng 1:22-25) O ‘cangoˈotay ko nalifetan a tamdaw’ awaay ko kafanaˈan, madoloay mitoor to tamdaw ato malipalaw. (Taneng 14:15 ato roma pihongyak.) Haratengen hena, masapatekay masaˈofaday a tamdaw maoratay no ˈaˈideman no pihakelongan ato ˈaˈideman no mirikecay. O roma tamdaw mafanaˈ to malipalaway no ˈaˈideman ko niyah i, tada macekiday, kawra sowal no Taneng 1:22 o hatiniay tamdaw padotocay mipiliˈ malo cangoˈotay ko nalifetan a tamdaw, samanen maolahay cangra to mahaenay nokaˈorip, caay ka kahi a mifalic. (Yirimiya 5:31) Caay ka ciharateng cangra cipinang to taneng no Fangcalay Cudad, caay ka ciharateng maˈimer no palinian no Fangcalay Cudad. ˈAlomanay tamdaw padeteng sanay malo mafokilay a tamdaw, maedeng caay ka ciharateng kita malecad cangranan!—Taneng 1:32; 27:12. w22.10 19 fiedac 5-7 fatac

Sapidipotaw to rihaked ita, o likakawa no Kawas mihadakay to pina sakayat. Marariday micada kita to sapatalipaˈelal, pasowalen ko malohemay malitengay to faelohay sapilinnak a pakayraan. Mihaen, itini macalohay a pakayraan, wa ngaˈayto cangra milinnak kitaanan. Pakayni miliyas to pades, malinah, mililam to sapadama to tahapadesay tamdaw a dafong anca hacowa a tatokian, tano maanan a pakayraan padama to tao, macadaay ita ko milingatay a sakayat. Ano caka pitengil kita tonini a sakayat, o papaira to katalawan no ˈorip no niyah ato malohemay malitengay. (Hipray 13:17) ˈAlomanay salikaka pakayni i pades, fodifod ato lalood, mapacieciay miliyas to lomaˈ. Kawra misaˈicelay cangra mananam to faelohay kitiraan, kalikiayho patikol to midokoay a tayal. Malecad i saka 1 hahekalan pakayniay i sapalak maliwasak tayra icowacowa a Krisciyang, padadotocay cangra ‘milasil to ngaˈayay lihaf no kimad no Kawas.’ (Dmak 8:4) Mitosilay a tayal padamaay cangranan misamacay to harateng i Hongti Kitakit no Kawas, eca ko haharateng sa to hakowaay ko pasangar no kaˈorip no niyah. Telocto, ngaˈayay cangra padadotoc lipahak ato rihaday ko falocoˈ. w22.12 19 fiedac 12-13 fatac

Misakaretengay ci Yihofa to kahacecay a tamdaw. ˈAyaw no cacorcoren ni Yis ko tarokos mitosil i, isalakatay a padama cangranan timolo a misiˈayaw to sacoli no tao. (Matay 10:29-31) Somowalay cingra to ˈalic a ˈayam, o matenakay a ˈayam i Israil konini, itiya tora lintad awaay ko maanan a epoc no mahaenay a ˈayam. Kawra pasowalay ci Yis to nisawawaan: ‘Ano matefad ko cecay i sera i, Wama namo caay ka aeca mafanaˈ Cingra.’ Sanayho cingra: ‘Kamo i, mikikakaay to adihayay ˈalic ko nika masakalimlaan!’ Ora sowal ni Yis papipasoˈlinay to nisawawaan, o sasakaretengen ni Yihofa ko kahacecay nangra, mansa cowa ko hamamatalaw cangra to saroero. Ano itini i maci anca i inaka mitosil ko nisawawaan i, maˈaraw ko ˈalic maedeng maharatengay ko nano sowal ni Yis. Anini, ano maˈaraw iso ko mimingay a ˈayam i, haratengen tada misakaretengay ci Yihofa tisowanan a minengneng, samanen ‘mikikakaay to adihayay ˈalic ko nika masakalimlaan’ iso. Ira ci Yihofa midama tisowanan, akato makokiˈ to maamaan a sapacoli no tao. w23.03 18 fiedac 12 fatac

Nolatekay, malifaay ita ko pasangaray, tinakoen malahdaw ko katayalan anca tahacada to pisafelit no paro no lomaˈ. Ano halafinayto a tatokian kita i pasangaray a demak, alatek wa matoled ko falocoˈ. Wa sakadademaken ni Satan ko mahaenay a tatokian, pakacisasa kitaanan cowato ka olah ci Yihofa kitaanan. Papiharatengay cingra kitaanan, o pasangaray sahtoay o ci Yihofa anca likakawa ni Yihofa ko pairaay wa saan. Itiniho i Icip ko Israil tamdaw, na iraayto ko mahaenay a demak no roma tamdaw. Salakat, pakasoˈlinay cangra ci Mosian aci Aron to miocoran ni Yihofa milidong cangranan. (Kasadakan 4:29-31) Kawra ikor mitongalan ni Falaw misaareteng ko ˈinorong nangra, hato mirorohay ci Mosian aci Aronan. (Kasadakan 5:19, 20) Mirorohay cangra to sikawdan no Kawas, tada ka adayayanto! Ano hahalafin kiso misiˈayaw to pasangaray, ka itini i satolon pasayra ci Yihofaan mifowah to nafalocoˈan, hanaca mitadiˈec to sapadama Ningra. w22.11 15 fiedac 5-6 fatac

Ci Yihofa o Pafeliay to ˈOrip i tamdaw a Kawas, iraay ko ˈicel patikol paˈorip to mapatayay a tamdaw. Pafelian Ningra ko pairasolay ci Iliya tonini a ˈicel, ho ngaˈay cingra patikol paˈorip to faˈinayan wawa no cecay maponengay fafahiyan i Carifat. (1 Hongti 17:21-23) Ikor, ya pairasolay ci Ilisa mitadiˈecay to ˈicel no Kawas patikol paˈorip to cecay faˈinayan wawa no fafahiyan i Sunim. (2 Hongti 4:18-20, 34-37) Oniya maˈoningay ato roma patikolay maˈorip a tinakoan misawacayay, iraay ko ˈicel ni Yihofa patikol paˈorip to mapatayay a tamdaw. Onini a ˈicel pafelianho Ningra ci Yis, mikitini midemakan ni Yis i fafekang no sera a kafahkaˈan mafanaˈ kita tonini. (Yohani 11:23-25, 43, 44) Nohatini, patikolayto ci Yis tayra i kakarayan, milifokay to ‘fadangalan i kakarayan ato i seraay.’ Mihaenay, ngangaˈay cingra palaˈosi to mihadakan no niyah a sakiˈok, oya ‘polong i tademay a tamdaw’ papatikol maˈorip sanay, ira ko toki milifok to tahadaˈocay a ˈorip.—Matay 28:18; Yohani 5:26-29. w22.12 5 fiedac 10 fatac

O sowal ni Yihofa to aniniay a sinael maedeng parihadayay to falocoˈ ni Icikil. Manaˈay ko Israil tamdaw ci Icikilan, malecaday o manaˈayay ci Yihofaan. Caka ngaˈay ko waywayan nangra, malakisawayto ko pairasolay a tayal ni Icikil cowa ka saan. Mikiˈokay ci Yihofa ci Icikilan, ano malaˈosi to maemin ko milasilan ni Icikil sapisawkit a lihaf i, o Israil tamdaw ‘o mamafanaˈ iraay ko pairasolay ilalomaˈ nangra.’ (Icikil 2:5; 33:33) Onini a mihinomay to falocoˈ a sowal maedeng paˈicelay ci Icikilan, ngaˈay milahci to mitosilay a tayal ningra. Anini minilnilan ni Yihofa kita, mafanaˈ tonini pairaay to timolo ita mitosil to tamdaw. Panganganen ni Yihofa kita to ‘misawacayay tamdaw’ Ningra, tada malikoay kita! (Isaya 43:10) Pasowalan ni Yihofa ci Icikil ‘aka matalaw cangranan,’ anini mahaenay ko sowal ni Yihofa kitaanan: ‘Aka matalaw kamo.’ (Icikil 2:6) Hano cowa ko mamatalaw to misafelitay kitaanan a tamdaw hani? Malecad ci Icikilan, o minilnilan ni Yihofa kita, iraay ko sadama ni Yihofa, mansa cowa ko mamatalaw kita.—Isaya 44:8. w22.11 3-4 fiedac 4-5 fatac

Anini, adihayay ko ngaˈayay tiˈeren a malohemay malitengay ato dama sikawdan i kasakopang, tada miakoˈiday kita cangranan. Onini a madimadiay faˈinayan salikaka misongilaˈay midimokos kitaanan, pakayni tonini tada miakoˈiday kita ci Yihofaan. Mihaenay, wa ngaˈay kita itini maanan a pakayraan misawacay to ngaˈayay pakasoˈlinen ko niyah hani? Maolahay kita to salikaka, mansa ciharatengay to ngaˈayay ko kaˈorip nangra hokira. Kawra, o mamikangodo kita to notekedan nangra. Itini saka 1 hahekalan kasakopang no Krisciyang, o roma tamdaw ‘maolahay somowal to sanay sanay a sowal, hina capiday to demak, mihadakay to cowa ka ngaˈay sowalen a sowal.’ (1 Timoti 5:13) Caay ka ciharateng kita malecad cangranan. Ano ira ko tamdaw pasowalay kitanan to notekedan a demak, hanaca cowa ka olah cingra mafanaˈ ko tao tonini a demak, toniya tatokian sasamaan ko pidemak ita hani? Tinakoen, cecay fafahiyan salikaka pasowalay kitanan iraay ko adada no tireng ningra anca tahalifaay to cecay sapalifet, misaaliay kitanan aka sowalen konini a demak, o hamamitoor kita to sowal ningra a midemak. w22.09 10 fiedac 7-8 fatac

‘Misafaeloh’ cowa ko pidemak aca to potalay a kafalic, sakoniya sowal, latekay midemak to pina ngaˈayay demak, mihaen cowa ko mitaypiyaway to misafaelohayto ko harateng ita. Oha mamikinsa kita to i kemoday a waywayan no niyah, halo misaˈicel a mifalic, mihaen i, o pakayraan ita maˈorip mamatongalto ko pitoor to ˈakawangay a palinian ni Yihofa. Oha papadadotoc kita mihaen to demak, cowa ka ngaˈay kinacecay aca, ikor sawad sato a midemak. Malo malefotayto a tamdaw kita ikor, itini kihcod a nokaˈorip papakahemekto ci Yihofaan, kawra nohatiniho, sapilifokaw to pihayda ni Yihofa, papadadotoc kita mihadak to ˈicel. Sinanoten ko sowal ni Pawlo itini Loma 12:2, misafaeloh to harateng ato mihapinang to araaw no Kawas, onini tosa a demak iraay ko makelecay a kalaliting. Aka pakoniraen ko niyah mafiyor nonini a hekal. O mamikinsa kita to niyah, mihapinang to misaˈosian ato patosokan no niyah, makayatay no harateng no Kawas, anca makayatay nonini hekal hokira. w23.01 8-9 fiedac 3-4 fatac

Ano o maananto ko malifaay ita a demak, o mamicapid ci Yihofa a maemin han? Ano tahalifa kita to tatiihay a demak, sahtoay o pakayniay sapalaˈosiaw no Kawas to cecay a araaw han? Cowa, cowa ka haen ko pinengneng no Fangcalay Cudad. (Patnakay 8:9; 9:11) Nikawrira, ngaˈay pakasoˈlinen ita i, ihkalay ko kafanaˈ ni Yihofa tahalifaay kita nohatini to maanan a sapalifet, hanaca ano pasayra kita Cingranan a micangacang i, o tatengilen Ningra. (ˈOlic 34:15; Isaya 59:1) Cowa ka hatini aca, wa ngaˈayho ci Yihofa padama kitaanan malaˈosi ko pihadidi to pasangaray. Wa samaan ko pidemak Ningra hani? O cecay pakayraan ni Yihofa padama kitaanan i, pafeliay to sahinom ato sapakalalok kitaanan, hanaca marariday Cingra itini matatodongay a tatokian mihaen to demak. (2 Korinto 1:3, 4) Wa ngaˈay maharateng iso itini pisaalian iso a tatokian na pafeliay ci Yihofa to sahinom ato sapakalalok tisowanan, padama tisowanan milifok to ˈicel han? Tocerid mataˈlifto ko sapalifet ikor ngaˈ mahapinangay samaanay ci Yihofa padama kitaanan. w23.01 17-18 fiedac 13-15 fatac

Ano nengnengen konini a ˈaˈadopen malecaday toya pitoay ko fongoh a ˈaˈadopen, dengan kahngangay ko kodong nira, panganganan cimira to ‘sasing no ˈaˈadopen’ o ‘saka falo a hongti.’ (Paˈarawan 13:14, 15; 17:3, 8) Sowal no Paˈarawan onini a hongti masadakay to cecay liyad malahdawayto, ikor miliyaway masadak. Mahaenay ko kalingad no demak no Makomoday Kitakit. Onini a lekakawa misaˈicelay midipot to sakangaˈay no kalo a kitakit, salakat masadak cira o Koksay Linmong, ikor itini Saka Tosa Lalood no Hekal malahdaway. Miliyaw cira masadak i, o kafanaˈan ita nohatini a Makomoday Kitakit. O mitaypiyaway tonini a ˈaˈadopen a ˈicel no mirikecay mifekaday to sapilasil a piˈodis, miowing to polong a tamdaw micoˈay ci Yihofaan ato finawlan Ningra. Malecad o misowalan no Paˈarawan, onini a ˈaˈadopen misaˈopoay to ‘polong a hongti no hekal,’ itini ‘romiˈad no malefotay ko ˈicel a Kawas’ mirienang to Armakiton a lalood.—Paˈarawan 16:13, 14, 16. w22.05 10 fiedac 10-11 fatac

Mafanaˈto ci Yis miasip to Fangcalay Cudad ikor, cowa ko kafanaˈ aca ningra, maolahayho to Kimad no Kawas, hanaca micadaay to sakayat no Kimad no Kawas. Haratengen ko nalifetan ni Yis i kaemangho i fangcalay sefi. Itiya 12 ko mihecaan ningra, kawra oya matenesay to Rikec ni Mosi a singsi maemin ‘fahkaˈay to kacipinang ato sapacaˈof ningra. (Luka 2:46, 47, 52) Hatira kita ci Yisan, ano mararid micekiw to Fangcalay Cudad i, mamatongal ko kafanaˈ to lalomaˈay a lalakaw, halo matongal ko kaolah to Kimad no Kawas. Haratengen ita ko nano sowal ni Yis to ˈaˈideman no pihakelongan. Itiya i, oya mitodongay mitilid to Fangcalay Cudad a tamdaw, o Farisay ato Satukay a tamdaw, soˈliˈlin marariday miˈosi to Fangcalay Cudad, mafanaˈay to lalomaˈay a lalakaw, kawra caay ka soˈlin a milifok to epoc. Somowalay ci Yis to tolo cowa ka toor nangra a demak, ora nano sowal ningra papadama kitaanan (1) pacakat to kacipinang, (2) mikilim to odoˈ no sinael, (3) mapahatatanam no Kimad no Kawas. w23.02 8-9 fiedac 2-3 fatac

O ihkalay mahapinang a katalawan, mahawpay ko mikalonaay, haliepahay, cowa pakaˈimer to kakaenen, tatiihay a sasowalen, malaˈodotay a kamok ato maˈodangay a lalakaw, o hatiniay a demak oha laliyasen ita. (ˈOlic 101:3) Ci Akoma Satan mikakilimay to toki sapipalakaw to kalawidang ita aci Yihofa. (1 Pitiro 5:8) Ano eca ka padadotoc talipaˈelal kita, aitini i ponoˈ ato falocoˈ ita mikosam cingra to ˈinap, misamangahay, maˈanofay, ˈintehay, misatakaraway ato mangolaway a sapaloma. (Kalatiya 5:19-21) Ano caka tangsolen ita a mifaˈenot, hahatira o ciwarakay a semot lomahad, salikor mamidokaˈ kitaanan. (Yakop 1:14, 15) O laliyasen ita a cecay cowa ka hapinang a katalawan i, o tatiihay a cawmaˈ. Haharatengen ita, micawmaˈan ita a tamdaw o tataˈangay ko pifiyor kitaanan. (1 Korinto 15:33) Sapisinanotaw kita to niyah, laliyasen ita ko cowa pidoedo to palinian ni Yihofa a tamdaw, aka picawmaˈ cangranan. (Luka 21:34; 2 Korinto 6:15) Hahapinangen ita ko mahimeday a katalawan, hanaca tangsol palaliyoc a miliyas. w23.02 16 fiedac 7 fatac; 17 fiedac 10-11 fatac

Matongal ko kacipinang iso ci Yihofaan, mamatongal a tangongol ko olah iso i Cingranan. Maedeng ciharatengay kiso sapadadotocaw a miingid Cingranan, tahira i daˈoc. Mamadangar iso mihaen to demak. Pakalalokay Cingra tisowanan a misaˈicel a pakahemek to falocoˈ Ningra. (Taneng 23:15, 16) Cowa ko pakayni aca i sasowalen, ngaˈayayho pakayni i waywayan a mihaen to demak. O pakayraan no kaˈorip iso paihkalen to soˈlinay maolah kiso Cingranan. O mahaenay a nokaˈorip iso o sangaˈayay a mipiliˈan a patosokan no kaˈorip. Ano ihkalen ko sowal, sasamaan kiso paihkal to olah no niyah ci Yihofaan hani? Salakat, mikiriwiˈ a mitolon ci Yihofaan, pasowal to misetekay kiso to falocoˈ patafang to hakelong no ˈorip i Cingranan. (ˈOlic 40:8) Ikorto i, mipaputisem kiso a paihkal to patafangayto kiso to tireng ci Yihofaan. Tada kahemekan konini, tona o pitekaan konini, o faelohayho a pisatapangan. Ikorto i, mamisafaeloh kiso to pakayraan a maˈorip, caayto ka pakayni i niyahan a maˈorip, ao pakayniay ci Yihofaan a maˈorip. (Loma 14:8; 1 Pitiro 4:1, 2) Misaˈosi tonini a masakalimlaan demak tada cowa ko madoloay, kawra ano mihaen kiso a misaˈosi i, airato ko sangaˈayay nokaˈorip iso. w23.03 5-6 fiedac 14-15 fatac