Saka 9 Folad

Ano ngaˈay ko pisaka dademak ita to sakasasowal a inaneng, paihkalay koni to soˈlinay kita midoko ci Yihofaan, wa ngaˈayho padama to itihiay a tamdaw mihapinang ‘o midokoay to Kawas a tamdaw ato cowa pidoko to Kawas a tamdaw iraay ko maanan a kasasiromaan.’ (Malaki 3:18) Nengnengen ko nalifetan no fafahiyan salikaka ci Cinpoli. Itini i kawcong cingra i, kinacecayay mamalacafay to cecay cafay micudad milahci to cecay a demak. Onini a cafay micudad mahapinangay to cowa ka lecad ci Cinpoli to romaroma micudaday, cowa ka iaikor no tao somowal to tatiihay a sowal, cowa ka somowal to cikaditay a sowal, sahtoay o tawlikay a sowal ko misowalan ningra. Matemeray ko falocoˈ nonini a cafay micudad, ikor misatapangay malacafay ci Cinpolian minanam to Fangcalay Cudad. O sasowalen ita ano ngaˈay misolot to tamdaw to sakafanaˈaw nangra to soˈlinay a kimad, maedeng o lalipahak ci Yihofa! Makalimay kita ngaˈay paˈodingar ci Yihofaan ko sasowalen no niyah. w22.04 5-6 fiedac 5-7 fatac

Mitedalan ni Yis ci Mariya no Maktala miliyas to kapiˈimer no papitoay mariˈangay a kaloykoy, ikor i, tada miakoˈiday cingra ci Yisan! Oranto i, mikotoday ci Yisan, tano toki, ˈicel ato hafay a midama to mitosilay a tayal ni Yis. (Luka 8:1-3) Kawra, papafelienho ni Yis to sapalemed, samanen mikinafalahay ci Yis to ˈorip no niyah, ira ko toki no ‘polong mitooray cingranan a tamdaw’ tahadaˈoc ko ˈorip. (Yohani 3:16) Cowaho ka fanaˈ ci Mariya to mamilayap tonini sapalemed, kawra miakoˈidayto cingra ci Yisan, madimadi a mikotod cingranan. Ya mapasemsem ci Yis i hecek i, itiniay i ngata ci Mariya a tomireng, sapidamaaw ci Yisan cingra, ato sapihinomaw to romaroma tamdaw. (Yohani 19:25) Mapatayto ci Yis i, malahakelongay ci Mariya ato roma tatosa fafahiyan mihawikid to sapafangsis a cemel tayra i tadem, misolimet to tireng ni Yis. (Marko 16:1, 2) Lipahakay ci Mariya pakaˈaraw to nika patikol ni Yis a maˈorip, masasowalayho ci Yisan, onini a nalifetan ningra cowa ka malifet no romaroma ˈalomanay a nisawawaan.—Yohani 20:11-18. w23.01 27 fiedac 4 fatac

Cowa ka ngaˈay kita pakayni i midemakan isaˈayaw a marenec ko niyah, sawad sato a midemak nohatini saan ko harateng. Alatek caayto ka lecad to isaˈayaway adihay ko midemakan no mita, kawra o papadotoc kita ˈifowa to ‘tayal no Tapang,’ padadotoc talipaˈelal, tangasa i kahererekan. (1 Korinto 15:58; Matay 24:13; Marko 13:33) O fafanekfek kita, misarocod to falocoˈ misarocod to harateng a midoko ci Yihofaan. Mitoroˈay ci Yis to roma a pasangaray no Laotikiya a kasakopang, itini cangra i midokoay a demakan ‘caay ka kietec caay ka faedet.’ Mihaenay tonini, sowal ni Yis cangranan ‘kaadayayan, kasiniˈadaan.’ Misaaliay cangra to sapifalicaw, fanekfek ko harateng a midoko ci Yihofaan. (Paˈarawan 3:16, 17, 19) Mananamay ita ko maanan hani? Ano cowato ka fanekfek kita, o mamisongilaˈ miharateng to nano demak ni Yihofa ato likakawa Ningra kitaanan, mikitini mitongal to miakoˈiday a falocoˈ no niyah. (Paˈarawan 3:18) Aka a makalisanga ko falocoˈ micangacang to sinowayay a nokaˈorip, hato ecato paisalakaten ko midokoay a demak i nokaˈorip.—w22.05 3-4 fiedac 7-8 fatac

Pinaay caˈol miheca, padotocay ci Yihofa mitilid to cecay mikiriwiˈay a cudad, onini a cudad matiliday ko ngangan no ˈalomanay tamdaw. O sakacecay matiliday ko ngangan oya madimadiay misawacayay a Apil. (Luka 11:50, 51) Padotocay ci Yihofa mitongal to faelohay a ngangan itini tonini a cudad, tahanini cowato ka saˈosi ko matiliday a ngangan tonini a cudad. Itini Fangcalay Cudad, onini a cudad panganganan to ‘piharatengan a cudad’ anca ‘sakaˈorip a cudad.’ (Malaki 3:16; Paˈarawan 3:5; 17:8) O polong matiliday ko ngangan tonini a cudad a tamdaw sahtoay o iraay ko mangodoay falocoˈ midoko to Kawas ci Yihofaan, hanaca misalimlaay to fangcalay ngangan Ningra. Iraay ko hatatodong nangra milifok to midaˈocay a ˈorip. Anini, ano tiˈeren ita ko patafangan ni Yis Kristo a sapatefoc palahad to tangongolay kalawidang ci Yihofaan, o tatiliden Ningra ko ngangan ita tonini a mikiriwiˈay a cudad. (Yohani 3:16, 36) O hatokel ita ano tatayra i kakarayan anca itini fafekang no sera maˈorip, makalimay kita matilid ko ngangan no niyah tonini a cudad. w22.09 14 fiedac 1-2 fatac

Masowalay no Paˈarawan ko cecay ‘cinamalay taˈangayay kahngangay a kangic.’ (Paˈarawan 12:3) O taˈangayay kangic malalooday ci Yisan ato coyoh ningra. (Paˈarawan 12:7-9) Taˈangayay kangic miˈodisay to finawlan no Kawas, hanaca pafeliay to fadangalan i mitaypiyaway to mirikecay a ˈaˈadopen. (Paˈarawan 12:17; 13:4) O cima ko taˈangayay kangic hani? Cingra i oya ‘salakatay a ˈoner, ci Akoma ato ci Satan ko ngangan.’ (Paˈarawan 12:9; 20:2) Cingra i o micolohay i kaikor no misaˈadaay ci Yihofaan a mariˈangay. Wa samaan ko teloc no taˈangayay a kangic? Sowal no Paˈarawan 20:1-3, o cecay coyoh mamifahkol ci Satanan tayra i awaay ko paraˈ a ofang, o tatodong i, ci Satan cowato ka ngaˈay pasalat a dademak, malecaday o mapalitay. ‘Cowato ka ngaˈay miolat to kalo kitakit, tangasa i mahererek ko 1,000 miheca.’ Saikor i, ci Satan ato cafay ningra tatiihay coyoh wa fahkolen i ‘marengrengay ko namal a fanaw,’ tatodong i, wa masongilaˈ malaˈafo cangra. Haratengen hena, ci Satan ato cafay ningra tatiihay coyoh cowato ka ngaˈay paira to pades no tamdaw, tada o kalipahakanto a romiˈad itiya! w22.05 14 fiedac 19-20 fatac

Ci Yis o malalokay matayal a tamdaw. Kaemangho cingra i, misasayhoay ko tayal. (Marko 6:3) Misaˈicelay cingra matayal, milowanay to ˈinorong no wama wina paririˈ to paro no lomaˈ, maedeng misayaray to wama ato wina. Haratengen hena, o malefotay a tamdaw ci Yis, o idahiyay a inaneng ningra matayal maedeng adihayay ko masolotay a lafang, ano ci Yisto marenecay to nano tayal no niyah. Soˈlin mahaen, milimasmasay cingra to toki midoko to Kawas. (Yohani 7:15) Misatapang cingra miemin to toki mitosil pasifanaˈ to tamdaw ikor, pakalalokay to tao ‘aka pakayni mamapalak a kakaenen a matayal, ka pakayni i papaira to midaˈocay a ˈorip a kakaenen ko katayal.’ (Yohani 6:27) Itini kimad ni Yis i lotok sanay: ‘Ka pitaring to hafay no niyah i kakarayan.’ (Matay 6:20) O sapafeli no Kawas a taneng padamaay kitaanan matatodong ko pinengneng to tayal. Palimoˈotay ko Fangcalay Cudad to Krisciyang: ‘Ka malalok, midemak to matatodongay a tayal.’ w22.05 22 fiedac 9-10 fatac

Pakayni ci Timotian patirengay ci Iunici to ngaˈayay a taˈarawan. Maedeng mahapinangay ni Timoti o sakaira no mahaenay a demak no wina, pakayniay ka tangongol no kaolah ningra ci Yihofaan. Malecaday, anini ˈalomanay malo winaay salikaka pakayniay i waywayan mitemer to falocoˈ no paro no lomaˈ. (1 Pitiro 3:1, 2) O mamadangar iso konini! O manan ko pakayraan hani? Wa paisalakaten i kaˈorip ko kalalaˈed no niyah aci Yihofa. (Limoˈot 6:5, 6) Maedeng malecaday kiso to romaroma a wina pakayni paro no lomaˈ adihayay ko mikinafalahan. Sapisongilaˈaw midimokos to saali no wawa, kinafalahay kiso to toki, payci, kafotiˈan a toki, kawra cowa ko papakayni kiso kaˈifowa midimokos to wawa a misakahmaw to kalalaˈed no niyah aci Yihofaan. Ka pilimasmas to toki, mararid mitolon, notekedan picekiw ato mirienang to saˈopo. Mihaen ko demak iso papatanektek to kalawidang no niyah ci Yihofaan, wa patirengho to ngaˈayay taˈarawan no paro no lomaˈ ato romaroma tamdaw. w22.04 16 fiedac 1 fatac; 19 fiedac 12-13 fatac

O cecay tamdaw mamicada to masamaanay a pisawkit, cowa ko kita ko mamisaˈosi. Mafanaˈ tonini tada parihadayay kitaanan. O Saˈakawangay a Misawkitay ci Yihofa, o Cingra ko caciˈinorong tonini a kalimlaan a demak. (Loma 14:10-12) Wa ngaˈay rihaday ko falocoˈ ita, o patirengan Ningra a palinian o malefotay, hanaca o tatooren Ningra konini a palinian a misawkit. (Satapangan 18:25) Cowa ko mamisakakinih ko demak Ningra! Noikor, o sasongilaˈen ni Yihofa palahdaw ko pairaan no raraw a kihcod a roray, o macadaay ita a dokaˈ no tireng ato falocoˈ o mamasongilaˈ a maadah. Tada halamhamay kita to sakairaaw nonini a toki! (ˈOlic 72:12-14; Paˈarawan 21:3, 4) O mamatawalto ko karorayan a demak isalakat. ˈAyaw nonini, tada miakoˈiday kita ci Yihofaan, padama kitaanan mitodong Cingranan misodod to tao. w22.06 13 fiedac 18-19 fatac

O cecay ngaˈayay a misawkitay kalimlaan ko tangongolay a kafanaˈ to rikec, ihkalay mafanaˈ to o manan ko matatodongay, o manan ko mararaway. O cecay ngaˈayay misawkitay misaaliayho to manan a inaneng hani? ˈAyaw no misawkit i, oha ngangaˈay cingra misimsim to polong milingatay a demak. Itini tonini a pakayraan, o sangaˈayay a Misawkitay ci Yihofa. Cowa ka lecad tono tamdaw a misawkitay, to cerid cipinangay ci Yihofa to polong a demak. (Satapangan 18:20, 21; ˈOlic 90:8) Misawkit Cingra i caay ka lecad tono tamdaw, o maˈaraway aca anca o matengilay. Masaheciay ko kacipinang Ningra to pinangan no tamdaw, kalomahadan lalengawan ato kaˈoripan, ato harateng no nafalocoˈan ningra, mafanaˈayho onini a lalangian samanay ko pifiyor to waywayan nonini a tamdaw. Pafeselay ko pinengneng ni Yihofa to falocoˈ no tamdaw, mihapinangay Cingra to araaw no falocoˈ no tamdaw, harateng ato kalim. Itini ˈaˈayaw Ningra, awaay ko maamaan a demak to mahimeday. (Hipray 4:13) Mansa, misaˈosi ci Yihofa misodod to cecay tamdaw, o pisaˈosi Ningra pakayniay kacipinang to kihcod a demak. w22.06 4 fiedac 8-9 fatac

O sasinanoten ita tano maanan a pakayraan ci Satan miˈodis ci Yopuan, samanen wa tano malecaday a pakayraan cingra miˈodis kitanan. O sowal ni Satan, cowa ko soˈlinay kita maolah ci Yihofaan, ano ira ko katalawan no ˈorip, o mamiliyasto kita Cingraanan sanay. Roma i, somowalayho ci Satan cowa ka olah ko Kawas kitanan, cowa ko mamisalimla to kihcod nano demak ita Cingraanan. Ano mafanaˈay to pakayraan ni Satan, o halamhamay a mitiˈer ci Yihofaan a tamdaw cowato ko mamalipalaw no mangah ni Satan. O sapalifet o sapihapinangaw to niyah han a minengneng. O malifaay ni Yopu a sapalifet padamaay cingranan mihapinang to dangoc no niyah, padamaayho cingranan a mafalic. Tinakoen, mahapinangay ningra mamitongal a misapoener ko niyah. (Yopu 42:3) Ano tahalifa kita to sapalifet i, wa matongal ko kacipinang to niyah. Ano mahapinang ita ko dangoc no niyah, oha mamisaˈicel a misalof. w22.06 23 fiedac 13-14 fatac

Mikiˈokay ci Yihofa o mamidama Cingra kitaanan. Tinakoen, ˈayaw no somowal to ‘o misawacayay tamdaw Ako kamo’ sanay a sowal i, salakatay ci Yihofa mihadak to cecay sakiˈok, sanay: ‘Milakec kiso to nanom, wa kalacafayen Ako kiso. Milakec kiso to ˈalo, cowa ko mamaˈemek no nanom kiso. Mihawang kiso to namal i, cowa ko mamatodoh no namal kiso.’ (Isaya 43:2) Ano midemak to ˈinorong mitosil i, o tatahalifa kita to malecaday o cedas a saconged anca malecaday o namal a sapalifet. Kawra, ira ko sapadama ni Yihofa, wa ngaˈayho kita padadotoc a mitosil. (Isaya 41:13) ˈAlomanay tamdaw anini cowa pitengil to milasilan ita a lihaf. Haratengen ita, caka pitengil cangra, malakisaway ko pisawacay ita ci Yihofaan cowa ka saan. Mitafo kita to madimadiay, padadotoc a mitosil, o mamahemek ci Yihofa. Mafanaˈ tonini mihinomay ato paˈicelay kitaanan. Sowal no tarokos ci Pawlo: ‘O kahacecay tamdaw wa mitoor to karoray no niyah milifok to sapalifon.’—1 Korinto 3:8; 4:1, 2. w22.11 4 fiedac 5-6 fatac

Soˈlinayto anini maˈaraw ita ko katatodong no sapairasol no Fangcalay Cudad, ‘kalo kitakit cowa ka lecad ko sowal a tamdaw’ minanamay to soˈlinay kimad nohatini, somowalay to ‘makoracay a sowal.’ (Cikariya 8:23; Cifaniya 3:9) O likakawa ni Yihofa mataˈlifay ko 800 emang a tamdaw, itiniay i 240 kasakitakit kasakilac, to mihecahecaan mataˈlifay ko 10 emang a tamdaw micadaay to paputisem! Kawra mikikakaay to kaˈaloman i, o waywayan nangra. Onini a faelohay nisawawaan palahaday to makapahay ‘faelohay capeling.’ (Kolosay 3:8-10) Ilalomaˈ nangra, ˈalomanay tamdaw isalakat malafoay ko kaˈorip, misakakinihay to tamdaw, maolahay to mariˈangay ato pakakitakitay a harateng, kawra mafalicayto cangra nohatini. ‘Cowato pinanam to malalooday’ cangra, malecaday konini to sapairasol no Isaya 2:4. Misaˈicel kita micaˈedong to ‘faelohay capeling,’ o ngangaˈay misolot to tamdaw mirienang to likakawa no Kawas, ngaˈayho misawacay to mikotoday kita to kantok ci Yis Kristoan. (Yohani 13:35) Ngaˈay madangar ita konini a kihcod cowa ko fahal sanay, ao iraay ko sapadama ni Yis. w22.07 9 fiedac 7-8 fatac

Ano pasayra kita ci Yihofaan mitolon i cowa ka ngaˈay kasimaan sa, ao pairaen ko tangongolay a pikangodo. Haratengen ko maˈaraway ni Isaya, Icikil, Taniil aci Yohani a kasapaan mapolosi. Milengo cangra ci Yihofaan i, o kakangodoen kasapaan a Hongti sanay. Maˈaraway ni Isaya ‘maroˈay ci Yihofa i tadamaanay a kamaroˈan.’ (Isaya 6:1-3) Maˈaraway ni Icikil maroˈay ci Yihofa i sapilood a paliding Ningra, ‘iraay ko tomeliˈay a tediˈ itini taliyok Ningra,’ malecaday o talakal ni idek. (Icikil 1:26-28) Maˈaraway ni Taniil ko ‘Midaˈocay ko ˈOrip a Kawas’ micaˈedongay to makoracay a rikoˈ, iraay ko namal mikitira i kamaroˈan Ningra masadak. (Taniil 7:9, 10) Maˈaraway ni Yohani maroˈay ci Yihofa i tadamaanay kamaroˈan, ‘taliyok no tadamaanay kamaroˈan iraay ko talakal ni idek, malecaday o kandaway a odoˈ nengnengen.’ (Paˈarawan 4:2-4) Songilaˈen ita miharateng tada kasapaan ko ˈdil ni Yihofa, o mamaharatengto, ngaˈay ko niyah pakayni i satolon miingid Cingraanan tada o kalimlaan a sapalemed, hanaca mitolon i pairaen ko mangodoay falocoˈ. w22.07 20 fiedac 3 fatac

Kapah a tamdaw, mihalakaay ci Satan miconged tisowanan macakat i pihakelongan. O cecay pakayraan ningra itini falocoˈ iso mikosam to cisasaay a sapaloma, ho ecato pakasoˈlin kiso to pina a kimad no Fangcalay Cudad. Tinakoen, mamalitemoh iso ko miowingay to sinkalon a tamdaw. Kaemangho kiso i, caay pisongilaˈ miharateng tonini a demak alatek, kawra itini picudadan mananamay iso konini a pakangodoay to Kawas a sasowalen. O sowal no singsi hato matatodongay a tengilen, kawra na cowa pisongilaˈ cangra micekiw to wacay iraay materek ko Misangaˈay a Tatapangan. Haratengen ko safalod i Taneng 18:17, sanay ko sinael: ‘Salakatay somowal to demak a tamdaw, hato matatodongay nengnengen; ira sato ko roma tamdaw, mahapinangayto ko soˈlinay a demak.’ Itini picudadan matengil iso ko maanan, aka haemin han micada. O mamisongilaˈ kiso miharateng to Kimad no Fangcalay Cudad, mikilimho to mitepangan no likakawa a cudad. w22.08 2 fiedac 2 fatac; 4 fiedac 8 fatac

Makalimay kita cipinang to tatodong no sinael, ano caka cipinang i, cowa ko mamilifok to adihayay a epoc. Haratengen ko kasasowal ni Yis to cecay ‘matenesay to Rikec ni Mosi a tamdaw.’ (Luka 10:25-29) Milicayay ci Yisan konini a tamdaw, sasamaan milifok to midaˈocay a ˈorip, padamaan ni Yis cingra mikitini i Kimad no Kawas mikilim to sapacaˈof. Licay han ni Yis cingra: ‘O maanan ko matiliday i Rikec ni Mosi hani? Mansanay ko kacipinang iso to maˈosiay iso hani?’ Sakadademakay cingra to sinael a pacaˈof, maolah to Kawas ato samatiyaen o niyah a maolah to tao sanay. Matatodongay ko caˈof ningra. (Lifi 19:18; Limoˈot 6:5) Kawra sinanoten kora dotoc a salicay ningra: ‘Cima ko kakaolahen ako a tamdaw saw?’ Ora salicay ningra paihkalay, cowa ka cipinang cingra to soˈlinay a tatodong no sinael, mansa cowa ka fanaˈ to sasamaan midoedo to sinael i kaˈorip. Sakacipinangaw to tatodong no sinael, misaaliay kita to sapadama ni Yihofa. Cangacangen Cingra pafeli to fangcalay saocor, padama kitaanan misamacay ko harateng, micangacangho Cingranan padama tisowanan misaka dademak to maˈosiay a lalakaw. w23.02 9 fiedac 4-5 fatac

Samaanay kiso mafanaˈ to soˈlinay kimad hani? Maedeng kinapinaayto kiso pacaˈof tonini a salicay. Malalitemoh kita to salikaka i, marariday milicay tonini a salicay. Maolahay kita mitengil to samaanay ko salikaka mafanaˈ ato misatapang maolah ci Yihofaan, mahemekay kita pasowal to tao hano maolah kita to soˈlinay kimad. (Loma 1:11) Ano masowalho ita ko mahaenay a demak i, miliyaway mitikol a miharateng tada kalimlaan ko soˈlinay kimad, matongalay ko pisetek to falocoˈ ‘matoor ko soˈlinay kimad i kaˈorip,’ itini kaˈorip misaka dademak to soˈlinay kimad, misaˈicel milifok to sapalemed ato pihayda ni Yihofa. Adihayay ko lalangian ita maolah to soˈlinay kimad, sakakaay kalimlaan i, maolahay kita to Pipowaran no soˈlinay kimad Kawas ci Yihofa. Pakaynian Ningra i Fangcalay Cudad padama kitaanan cipinang, cowa ko Misangaˈay aca a Tatapangan Cingra, o sidaˈitayho a Wama i kakarayan. Tada ciharatengay Cingra kitaanan.—1 Pitiro 5:7. w22.08 14 fiedac 1, 3 fatac

Pakalalokay ci Pawlo to salikaka malecad cingranan pakayni ‘ngaˈayay demak’ patalahkal to olah. (Hipray 10:24) Ci Pawlo cowa ka somowal aca to sapakalalok to salikaka a sowal, soˈliˈlinay a midemak padama cangranan. Tinakoen, tahalifa ko i Yutiyaay a salikaka to kedal i, padamaay ci Pawlo patayra to sakaˈorip nangra. (Dmak 11:27-30) Soˈlin ˈifowaay ci Pawlo to mitosilay pakafanaˈ to tamdaw a tayal, kawra mihadakay to toki padama to manikaway a salikaka. Mihaen cingra to demak ho pakasoˈlin ko salikaka to dadimokosen ni Yihofa cangra. Anini, makahiay kita misadak to toki, ˈicel ato inaneng mirienang to mipadang to tahapadesay a tayal, ngaˈay paˈicel to pakasoˈlin no salikaka. Roma i, ngaˈayay kita mararid pakiyaho midama to tayal i paro no kakarayan. Pakaynien tonini a pakayraan anca roma pakayraan, ngaˈayto kita padama to salikaka a pakasoˈlin, cowa ko mamiliyas ci Yihofa cangranan. w22.08 24 fiedac 14 fatac

O wacay no likisi paihkalay, adihayay sapairasol no Fangcalay Cudad malaˈosiayto. O roma ˈayaw no malaˈosi to pina soˈot miheca matilidayto. Pakayni tonini cowa ko fafahkaˈen kita, samanen mafanaˈay kita o sapairasol no Fangcalay Cudad sahtoay naitiniay ci Yihofaan. Nengnengen ko milingatay to kapeleng nolitengan a Papilon a sapairasol. ˈAyaw no Kongyen saka 8 hahekalan, pairasolay a Isaya itiniay i sakayat no Kawas a paliˈayaw, taˈangayay ko ˈicel a Papilon niyaroˈ wa mapeleng no tamdaw. Hanaca masowalay ni Isaya o mamipeleng toniya niyaroˈ a tamdaw ci Kirus, hanaca ihkalay pasowal to sasamaan konini a niyaroˈ mapeleng. (Isaya 44:27–45:2) Roma i, paliˈayawayho ci Isaya, salikor wa mapalaˈafo ko Papilon, awaayto ko mamaroˈ a tamdaw. (Isaya 13:19, 20) ˈAyaw no Kongyen 539 miheca, o Papilon maˈafasayto no Mitiya ato Pirsiya a tamdaw. Nohatini, onini a na ciˈicelay isaˈayaw a niyaroˈ soˈlinay malahorac. w23.01 4 fiedac 10 fatac

Mihaiay ci Yihofa kitaanan micomod i taˈangayay paro no lomaˈ Ningra, o taˈangayay a sapalemed konini, padama kitaanan milifok to kadofahay a epoc! (Marko 10:29, 30) Itini icowacowa pala no hekal salikaka ita malecaday kitaanan maolah ci Yihofaan, misaˈicelay midofdof to palinian Ningra. Soˈlin o sowal ita, serangawan ato caˈedong cowa ka lecad alatek, kawra masasiolahay kita maemin, soˈlin sakinacecay masasoˈaraw hato kananaman saan miharateng. Mikiriwiˈay maolah kita malacafay to salikaka pakahemek ato midoko to sidaˈitay a Wama i kakarayan. Misaaliay kita makelec a malacecay to salikaka. (ˈOlic 133:1) Miladaˈay cangra to karetengay a ˈinorong ita. (Loma 15:1; Kalatiya 6:2) Pakalalokay cangra kitaanan padotoc a tanektek ko pakasoˈlin, tawlik a matayal saki Yihofaan. (Hipray 10:23-25) Haratengen hena, ano awaay ko sadipot no kasakopang, awa ko salikaka padama kitaanan micoˈay ci Akoma Satanan ato ciraraway a hekal ningra, sasamaan kita hani? w22.09 2-3 fiedac 3-4 fatac

Itini pisaka dademak to sapicawmaˈ to widang a wangcan i, sapitafoaw to miˈimeray cowa ko madoloay, ano caka pinaˈon ˈalomanto ko tamdaw mafanaˈ to hahimeden a demak. Onini a lihaf ano pasadaken itini wangcan, sasamaanen no tao misaka dademak konini a lihaf, anca onini a lihaf papaira to hakowaay ka taˈangay no pidokaˈ, cowato ko mamaˈemet ita konini. Roma pakayraan i, ano mikayhid ko misafelitay to kimad a tamdaw kitanan patalahkal to milingatay to salikaka a lihaf i, o miˈimeray wa ngaˈay padama kitanan padotoc a tomerep, midipot to salikaka. Tinakoen, itini makecengay ko mitosilay a tayal anca makecengay a kilac, o laliclicen no dimeng kita milicay alatek. Itini mahaenay pakayraan ato roma pakayraan, wa ngaˈay kita malecad to mitiliday to ˈOlic ‘mitoem to ngoyos no niyah.’ (ˈOlic 39:1) Itini pinengneng no paro no lomaˈ no niyah, widang, salikaka anca tao, o mamalo ngaˈayay pakasoˈlinen a tamdaw kita. Sakalaˈosiaw konini a demak, kalimlaan ko miˈimeray a ˈicel. w22.09 13 fiedac 16 fatac

Sapilifokaw to soˈliˈlinay a lipahak, o mamisongilaˈ komaen to sapahaled to pakasoˈlin no falocoˈ a kakaenen, o kalimlaan a saali no tamdaw konini. Mansa mihaen ko sowal ni Yis: ‘Maˈorip ko tamdaw cowa ko kakaenen aca ko mitiˈeran, o mamitiˈerho to mihadakan ni Yihofa kahacecay a sowal.’ (Matay 4:4) Mihaenay, to romiˈamiˈad o mamiasip kita to kalimlaan a Sowal no Kawas Fangcalay Cudad, komaen to sapahaled to pakasoˈlin no falocoˈ a kakaenen. Matomesay to olah a Kawas ci Yihofa pakayniay i Fangcalay Cudad pasifanaˈ kitanan to kalimlaan a kimad, padama kitanan mafanaˈ sasamaan raheker lipahak ko kaˈorip. Mananamay ita o maanan ko araaw Ningra kitanan, mananamayho ita sasamaan miingid Cingranan, ato sasamaan ko pidemak ita, ho ngaˈay masodod ko raraw no niyah. Roma i, mananamayho ita mikiˈokay Cingra pafeli kitanan to ˈodingaray a hatokel. (Yirimiya 29:11) Mikitini Fangcalay Cudad mananamay ita koniya soˈlinay kimad tada matomesay ko lipahak no falocoˈ ita. O pasangaray no kaˈorip ano patoleday kitanan, tongalen ita ko toki micekiw to Sowal ni Yihofa, hanaca misongilaˈ a midotim. w22.10 7-8 fiedac 4-6 fatac

Pakalalokay ko Fangcalay Cudad kitaanan aka padotoc malo cangoˈotay ko nalifetan a tamdaw. Tada matatodongay konini a sapatalipaˈelal. Sapilifokaw kita to nalifetan, inanengay a pakayraan i, sakadademaken ko safalod no Fangcalay Cudad i kaˈorip. Palidlid saan, matinako ita ko sapadama no safalod no Fangcalay Cudad kitaanan miliyas to pasangaray, padamaho kitaanan inaneng ko misaˈosian. Mamicerid kita misinanot to niyah itini pisakadademak to safalod no Fangcalay Cudad iraay ko maanan kacakat. Ano halafinayto kita minanam to Fangcalay Cudad ato mirienang to saˈopo, kawra caayho patafang to tireng micada to paputisem, ngaˈayay haratengen o maanan ko lalangian. Ano micadaayto kita to paputisem, ngaˈayay haratengen: Itini mitosil ato pasifanaˈ to tamdaw macakatay kako hokira? Ano misaˈosi i, misaka dademakay kako to safalod no Fangcalay Cudad han? Ano malacafay to tao i, patalahkalay kako to ngaˈayay capeling no Krisciyang han? Ano mahapinang ita iraayho ko hakacakatan no niyah, sasinanoten ko sapatalipaˈelal ni Yihofa, samanen o sapatalipaˈelal Ningra ngaˈayay ‘padama to cangoˈotay ko nalifetan a tamdaw ira ko taneng.’—ˈOlic 19:7. w22.10 20 fiedac 8 fatac

Maˈaraway ni Icikil taˈangayay ko ˈicel no fangcalay saocor no Kawas. Itini mapolosi, maˈaraway ningra cowa ko pikayat aca no fangcalay saocor to taˈangayay ko ˈicel a coyoh, ngaˈayayho parakat to taˈangayay ko kalileng no sapilood a paliding i kakarayan. (Icikil 1:21) Samaanay ko harateng ni Icikil hani? Mikangodoay ko falocoˈ ningra! Sanay cingra: ‘Maˈaraw ako mipitolosay i sera mitaˈong.’ (Icikil 1:28) Ano tikolen ni Icikil miharateng koniya kasapaan a mapolosi i, maedeng makowaday ko falocoˈ, pakasoˈlinay cingra mitadiˈec ko niyah to sadama no fangcalay saocor, o mamalahci ko mitosilay a tayal. Palimoˈotan ni Yihofa ci Icikil: ‘Wawa no tamdaw, ka tomireng, pasowalen Ako kiso.’ Onini a sowal ni Yihofa ato sapafeli Ningra ci Icikilan a fangcalay saocor pairaay to ˈicel ni Icikil a tomireng. (Icikil 2:1, 2) Ikor, itini pidemak ni Icikil to ˈinorong i, misaka dademakan ni Yihofa ko kamay Ningra, oya fangcalay saocor Ningra, mikayat ci Icikilan.—Icikil 3:22; 8:1; 33:22; 37:1; 40:1 ato roma pihongyak. w22.11 4 fiedac 7-8 fatac

Masowalay ni Isaya, malecaday o singsi ci Yihofa, romakatay Cingra i kaikor no sito pafeli cangranan to sakayat, pasowal cangranan to papasicowa a romakat. Samaanay ci Yihofa itini kaikor no mita mihadak to ngihaˈ hani? Pakayniay i Fangcalay Cudad. O Fangcalay Cudad matilidayto i salakat, malecaday to itiniay i kaikor no mita. Mihaenay, micekiw kita to Fangcalay Cudad malecaday to pakatengilay to ngihaˈ no Kawas itini kaikor ita pasowal kitaanan. (Isaya 51:4) Pafelian ni Yihofa kita to adihayay sakayat. Sasamaan kita ngaˈ mikitini milifok to taˈangayay epoc hani? Sinanoten ko masowalay ni Isaya tosa a demak: Saka 1, ‘o moecelay lalan koni.’ Saka 2, ‘ka romakat kamo tonini a lalan o matatodongay.’ Mihaenay, o kafanaˈ aca ita to moecelay a lalan koni cangoˈotayho, raromakatho tonini a lalan. O likakawa ni Yihofa padamaay kitaanan ihkal ko kacipinang to Fangcalay Cudad, mananamay ita o maanan ko saali ni Yihofa kitaanan, mananamayho sasamaan midoedo to saali Ningra midemak. Sapadotocaw kita lipahak midoko ci Yihofaan, o mamidemak tonini a tosa a demak. Edengan mihaen ko demak, ngaˈ pakasoˈlin kita to papalemeden ni Yihofa kita. w22.11 11 fiedac 10-11 fatac

O ˈalomanay tarokos ni Yis mapatay ikor caka halafin, makaniway a Krisciyang milonokay a micomod i kasakopang. (Matay 13:24-27, 37-39) ‘Pacacoˈisay cangra, misolot to sikawdan mikotod i cangranan.’ (Dmak 20:30) O makaniway a Krisciyang ikor mitenakay to mararaway a kimad, mamisaliyaliyaw ci Yis patafang to niyah sanay, ao cowa ka lecad to misowalan no Fangcalay Cudad, ci Yis ‘kinacecayay aca patafang to niyah, ngaˈayto mitamorong to raraw no ˈalomanay tamdaw’ sanay. (Hipray 9:27, 28) Anini ˈalomanay mihakelongay tamdaw maoratay nonini mararaway a kimad, marariday cangra anoca to romiˈamiˈad tayra i kiyokay mirienang to ‘Patafangay i Pimisaan.’ O romaroma kiyokay soˈlin cowa ka rarid misikay to piharatengan to kapatay ni Yis, kawra ˈalomanay mihakelongay cowa ka cipinang to pikinafalah ni Yis to ˈorip palaˈosiay to maanan. w23.01 21 fiedac 5 fatac

Ci Yis wa itini i Comaˈol Miheca Pikowan a tatokian patikol paˈorip to mapatayay tamdaw, hanaca padama to polong midofdofay ci Yihofaan a tamdaw miliyaw malefot ko tireng. Oya misaˈosian ni Yihofa a malo moecelay a tamdaw ‘mamilayap tonini a sera, rihaday ko ˈorip a tahadaˈoc.’ (ˈOlic 37:10, 11, 29) O ‘saikoray a ˈada o patay papalahdawen,’ itiya wa lipahakto kita! (1 Korinto 15:26) Mikitini Fangcalay Cudad, adihayay ko lalangian ita pakasoˈlin, iraay ko hatokel ita tahadaˈoc maˈorip. Soˈlin matomesay ko pasangar toniya salikoray a ˈawaled, kawra onini a hatokel padamaay kitaanan padadotoc madimadi ci Yihofaan. Kawra, o araaw no falocoˈ no mita midoko ci Yihofaan cowa ko pakayniay aca sapilifokaw to midaˈocay ˈorip. Madimadi kita ci Yihofaan ato ci Yisan, sakakaay a lalangian i samanen maolahay kita Cangranan. (2 Korinto 5:14, 15) Mahaenay a olah papadama kitaanan makalim mitodong Cangranan, ciharatengayho tawlik pasowal to tao tonini hatokel ita. (Loma 10:13-15) Palahaden ita ko caay pisateked a harateng, hinapaladaˈ to tamdaw, mamalo kaolahanto ni Yihofa a tamdaw, tahadaˈoc malo widang Ningra. w22.12 7 fiedac 15-16 fatac

Adihayay a demak na ngangaˈay parihaday kitanan, kawra micadaay to sapalak, hato cowa ka ngaˈay kita midemak tonini a demak. Itini sapalak, calemcemayto kita alatek, cowa ka fanaˈ mamifekad ko maanan a demak noikor. Mahaen ko harateng matatodongay, kawra o maminaˈon kita, samanen sowal ni Yis o sapalak papalahdaw to pakasoˈlin no mihakelongay cingranan a tamdaw. (Yohani 16:1, 2) Haratengen, cowa ko pipasowal aca ni Yis kitaanan misaday misiˈayaw to sapalak, mikiˈokayho o ngangaˈay kita itini sapalak madimadi to Kawas. (Yohani 15:20; 16:33) O tayal ita ano makeceng i, ngangaˈay kita mikitini i fenpo ato malohemay malitengay micada to pina sakayat. Onini a sakayat wa midipot kitaanan, ho ngaˈay kita padotoc micada to sapahaled to pakasoˈlin a kakaenen, ato padama kitaanan padadotoc mitosil itini toniya pakayraan nohatini. Ka pisarocod a midofdof. (Yakop 3:17) O roma haharatengen i, o milingatay to salikaka a lihaf, aka patalahkalen to awaay ko fadangalan mafanaˈ a tamdaw.—Patnakay 3:7. w22.12 20-21 fiedac 14-16 fatac

Anini, padadotocay ci Yis mikayat to nisawawaan ningra itini icowacowa a patenak to ngaˈayay lihaf no Hongti Kitakit no Kawas. Midemakayto cingra to dademaken ningra a tayal, pakaynian i likakawa no Kawas pahatatanam kitaanan micowat to mitosilay a tayal, hanaca pafeliay kitaanan to sapitosil a masakenakenaay a lalosidan. (Matay 28:18-20) Mihaenay, o mamidemak kita to dademaken ita a tayal, malalok a mirienang to mitosilay pakafanaˈay to tamdaw a tayal, hanaca i pitalaan to hakairaan no romiˈad ni Yihofa a tatokian padadotoc a mitapal. Ano dofdofen ita ko sapalimoˈot no Hipray 6:11, 12, o papadotocto mitala to hatokel ‘tahira i salikoray a romiˈad.’ Maherekayto ci Yihofa misaˈosi to romiˈad ato toki to sapalaˈafoaw to hekal ni Satan, o papalaˈosien Ningra ko polong mipairasolan no Niyah a sowal. Soˈliˈlin nolatekay halafinayho ko sakahererekaw nonini lekakawa sanay kita alatek, kawrira o romiˈad ni Yihofa ‘cowa ko mamanayar!’ (Hapakuk 2:3) Mihaenay i, nanay misetek kita to falocoˈ ‘padadotoc mitiˈer a halamham ci Yihofaan, mihadidi mitala to pilidong no Kawas [kitaanan].’—Mika 7:7. w23.02 19 fiedac 15-16 fatac

O patosokan no macokacokay i lotok tahira i fafekangay a taporo, kawra itini i fatad no lalan adihayay a kitiraan, ngangaˈay cingra pahanhan misongilaˈ minengneng to makapahay a pinaloma. Malecaday, o mamararid kita paterep to hawang, misongilaˈ miharateng itini pihadidian ita to pasangaray a tatokian i, samaanay ci Yihofa padama kitaanan malaˈosi ko demak. Maharerek ko kahacecay romiˈad i ngaˈayay a licayen ko niyah: “Anini mahapinangay ako samaanay ci Yihofa palemed takowanan hani? Soˈlin cowaho ka hererek ko sapalifet, kawra samaanay ci Yihofa padama takowanan padadotoc mihadidi hani?” Sapadamaaw tisowanan malaˈosi ko demak, adihayay ko sapafeli ni Yihofa a sapalemed tisowanan, ngaˈayay tanamen iso mikilim ko cecay sapalemed han? Micangacangay kiso nohatini ci Yihofaan kahnay maharerek ko macadaay iso a sapalifet alatek. Mihaen ko harateng o matatodongay. (Filipi 4:6) Kawra o sasaadihayen ita miharateng ko malifokay no niyah a sapalemed nohatini. Aka mapawan, mikiˈokay ci Yihofa pafeli to ˈicel kitaanan, padama kitaanan padotoc a mihadidi. Midamaay ci Yihofa nohatini tisowanan, aka a mapawan miakoˈid Cingranan. Mihaen o mamahapinangto iso, soˈlin pasangaray ko kaˈorip iso, kawra papadama ci Yihofa tisowanan malaˈosi ko pidemak.—Satapangan 41:51, 52. w23.01 19 fiedac 17-18 fatac

Licayen iso ko niyah: “O nokaˈorip ako paihkalay to soˈlinay mahapinang ako ko nika ngata no salikoray romiˈad nonini hekal han? O pipiliˈ ako to picudad ato katayalan, paihkalay to pidoko ci Yihofaan o sakalimlaan a demak no mako han? Pakasoˈlinay kako ci Yihofaan to mamidimokos takowanan ato paro no lomaˈ ako han?” Haratengen hena, maˈaraw ni Yihofa itini kihcod a nokaˈorip misaˈicelay kita mitoor to araaw Ningra a midemak, hakowa ko kalipahak Ningra saw! (Matay 6:25-27, 33; Filipi 4:12, 13) Mamicerid kita mikinsa to harateng no niyah, ano ira ko saali i, o mamifalic. Sowal ni Pawlo to i Korintoay a Krisciyang: ‘Ka padadotoc kamo a mikinsa to niyah mitafoay to pihakelongan hokira, padadotoc mihapinang to masamaanay a tamdaw ko niyah.’ (2 Korinto 13:5) Mihaenay, papadadotoc kita misafaeloh to harateng no niyah, oha pakayraan i, micekiw to Kimad no Kawas, minanam to pakayraan ni Yihofa a miharateng, hanaca mitoor to araaw Ningra padadotoc misalof.—1 Korinto 2:14-16. w23.01 9-10 fiedac 5-6 fatac