Saka 10 Folad

Kita o kahacecay tamdaw wa ngaˈay itini i saˈopo tawlik a mirienang, cecay a pakayraan i, malacafay taˈangay ko ngihaˈ a romadiw to sapahemek a radiw, ato mihadak to misadayan a sapacaˈof. Kawra harateng no roma tamdaw itini kaˈalomanan a kitiraan romadiw anca pacaˈof cowa ko madoloay, mahaenay kiso han? Ano mahaenay i, nengnengen ko romaroma salikaka samaanay miremo to marawraway a falocoˈ, wa taˈangay ko sapadama tisowanan. Ano romadiw i, samacayen ko falocoˈ, sanay ko harateng no roma tamdaw. Ano romadiw kita to Hongti Kitakit a radiw i, o pakahemekay ci Yihofaan. Ngaˈay kiso i lomaˈho misongilaˈ mihatatanam a romadiw, matira o pisaday to kamok no saˈopo. Ano mihatatanam a romadiw i, haratengen ora ˈolic samaanay ko kalaliting to lalangian no saˈopo, ora ˈolic ko sasinanoten, ao cowa ko ngaˈayay ko radiw no niyah saan. Itini pipacaˈof i saˈopo pasangaran nanay ko piharateng no roma tamdaw. Sasamaan ko pisalof hani? Saˈicelen mararid a pacaˈof, soˈlinto kantang pacaˈof to kalimlaan i, o ngaˈayayto. Soˈlin marawrawen ko falocoˈ, kamayanho misaˈicel a pacaˈof, manengneng ni Yihofa maedeng o mamahemek Cingra! w22.04 7-8 fiedac 12-15 fatac

O roma taˈarawan no Fangcalay Cudad sanay, mihongyakan toniya sinael ‘padama’ a tilid, mitoroˈan i, ano matengil ko piowaw no tamdaw a misaali to sapadama i, cacomikay cingra tayra a padama sanay. Haratengen hena, comikayay ci Yihofa milidong to misemsemay a tamdaw. Ihkalay a mahapinangay ita, makahiay ci Yihofa, macalohay sapadamaaw kitaanan. Ira Cingra i tatihi ita, o ngangaˈay kita ira ko lipahak mihadidi to masakenakenaay a sapalifet. Samaanay ci Yihofa padama kitaanan hani? Sapacaˈofaw tonini a salicay, nengnengen ita ko Isaya cudad. Onini a cudad hano kakiriwiˈen ita a misinanot hani? Samanen mikayatan no Kawas ci Isaya mitilid to adihayay sapairasol, onini a sapairasol milingatay to midokoay to Kawas a tamdaw anini. Roma i, o pilengo ni Isaya ci Yihofaan a sowal madoloay cipinang. Nengnengen ko Isaya 30 fedengan kasemeran a pilengo. Toniya fedengan, masowalay ni Isaya ko tolo a pakayraan ni Yihofa padama to finawlan Ningra: (1) Misinanotay Cingra mitengil ato pacaˈof to satolon ita, (2) pafeliay Cingra to sakayat kitaanan, (3) adihayay ko sapafeli Ningra a sapalemed kitaanan anini ato noikoran. w22.11 8 fiedac 2-3 fatac

Itini sapafeli ni Yis a lihaf to Smirna ato Filatilfia a kasakopang. Sowal ni Yis tahalifa cangra to sapalak i, cowa ko mamatalaw, samanen ano padadotoc cangra madimadi o mamilifok to sapalifon. (Paˈarawan 3:10) O tatalaˈayaw kita a misaday misiˈayaw to sapalak, makahiho miemem to sapalak. (Matay 24:9, 13; 2 Korinto 12:10) Somowalay ko Paˈarawan kitaanan, o finawlan no Kawas wa itini i ‘romiˈad no Tapang,’ onini a lintad no mita, mamicada to pakidemay a sapalak. (Paˈarawan 1:10) Somowalay i 12 fedengan, tomireng ko Hongti Kitakit no Kawas ikor, mifekaday ko lalood i kakarayan, ci Mikail (milifokay to ˈdil a Yisan) mikeriday to coyoh taˈangayay sofitay malalooday aci Satan ato tatiihay coyoh. (Paˈarawan 12:7, 8) Telocto, mapadikay ci Satan ato tatiihay coyoh. Mafahkolay cangra tayni i fafekang no sera, pairaay to adihayay a roray ato pades no cikiw ato tamdaw.—Paˈarawan 12:9, 12. w22.05 5 fiedac 12-13 fatac

Cowa pisakakinih ci Yihofa, o pisawkit Ningra sahtoay o masadafdafay. Cowa ka mikitini i papotal no cecay tamdaw, o hafay, saaroˈan ato taneng misaˈosi to sasododen konini a tamdaw hokira. (1 Samuil 16:7; Yakop 2:1-4) Awaay ko tamdaw to mamiroero Cingranan anca mipaˈalofo Cingranan. Cowa ka toor han Ningra ko miharatengan a midemak. (Kasadakan 34:7) Awaay ko malawaay ni Yihofa, mahapinangay ko kihcod, mihaenay o sangaˈayay a Misawkitay Cingra. (Limoˈot 32:4) Mafanaˈay ko mitiliday to Hipray Sowal a Fangcalay Cudad, awaay ko pakaliniay to pisodod ni Yihofa to tamdaw. O cecay taˈarawan cudad sanay, “o misaka dademakan nonini mitiliday a cecay Hipray a sowal, onini a sowal sahtoay mitoroˈay to pisodod no Kawas to mararaway a tamdaw, ao cowa ko mitoroˈay to pisodod no cecay a tamdaw to roma tamdaw.” Ano mikifalocoˈ pasasiyor ko cecay mararaway a tamdaw i, edengan ci Yihofa ko iraay ko fadangalan misongilaˈ misodod to raraw ningra. w22.06 4 fiedac 10-11 fatac

Ano o awaay ko faˈinay a wina kiso anca cowa ka pihakelong ko faˈinay, wa ngaˈay pakasoˈlin kiso, o madimadiay a taˈarawan iso o papakalalok to itihiay a salikaka. Ano misaˈicelayto kiso pasifanaˈ to wawa, kawra awaayho ko ngaˈayay a minaroˈan nohatini, sasamaanto hani? Aka mapawan, pasifanaˈ to wawa misaaliay to toki. Paloma kiso to cecay a sapaloma i, wa miharateng onini sapaloma o cacicengoˈ a lomahad, ira ko heci hokira. Manaokaniw, samaan ko teloc cowa ko kiso ko mamisaˈosi, kawra papadotoc kiso micefos to nanom, ho ngaˈay ko kalomahad no sapaloma. (Marko 4:26-29) Malecaday, o malo winaay, saan kiso miharateng alatek: “Wa soˈlin malaˈosi kako padama to wawa maolah ci Yihofaan han?” Soˈliˈlin sasamaan ko minaroˈan cowa ko mamaˈimer iso, kawra wa ngaˈay padadotoc kiso misarocod pasifanaˈ to wawa, pafeli cangranan to sangaˈayay a kalomahadan, ho ngaˈay cangra mala widang ni Yihofa. w22.04 20-21 fiedac 16-17 fatac

Tiya madimadi ci Solomon to Kawas i, matatodongay ko pinengneng to niyah. Kaemangho cingra tada misamimingay ko falocoˈ, mihaiyay to citolasay ko ˈicel no niyah, hanaca micangacangay to sakayat ni Yihofa. (1 Hongti 3:7-9) Satapang mikowan, mafanaˈay ci Solomon katalawan ko misatakaraway. Kaadayayan i, misowalan ni Solomon a sapirikec, cowa ka tooren no niyah. Mala hongti cingra to cecay liyad ikor mangalef mangalefay a misatakaraw, cowato pisikol to saali no Kawas. Tinakoen, o cecay sarikec no Kawas sanay: ‘Cowa ka ngaˈay adihay ko fafahi no hongti, hoeca ka piliyas ko falocoˈ ningra to matatodongay a lalan.’ (Limoˈot 17:17) Cowa pisikol ci Solomon tonini a saˈosi, 700 ko fafahi ato 300 ko kapi ningra. (1 Hongti 11:1-3) Harateng ni Solomon mihaen ko demak cowa ko papaira to katalawan no niyah sanay, kawra ikorto pakayni noka eca pidofdof ningra ci Yihofaan micadaay to kaadayayan a teloc.—1 Hongti 11:9-13. w22.05 23 fiedac 12 fatac

Anini, o tamdamdaw mamidemak to cecay masakalimlaan a saˈosi: Mipiliˈ midama to Kawas ci Yihofaan, mihayi Cingranan o Saˈakawangay Mikowanay, anca mipiliˈ midama to ˈada no Kawas, oya mariˈangay a Akoma Satan. Itini tonini a demakan, awaay ko misatenokay, o mamipiliˈ ko tamdamdaw. Ano cima ko misaˈosian nangra a midama, mamifiyor to midaˈocay a hatokel nangra. (Matay 25:31-33, 46) Itini ‘taˈangayay padiing’ a tatokian, wa masawkit cangra milifok to ˈorip anca micada to sakalaˈafo. (Paˈarawan 7:14; 14:9-11; Icikil 9:4, 6) Ano maharekayto kiso mipiliˈ midama to pikowan ni Yihofa, o inanengay ko misaˈosian iso. Nohatini, makalimay kiso padama to roma tamdaw matatodong ko mipiliˈan. Wa ira ko makapahay a hatokel no madimadiay midama to pikowan no Kawas a tamdaw. O sasongilaˈen ita misimsim konini kalimlaan a kimad, mihaen wa matongal ko pisetek no falocoˈ ita padadotoc midoko ci Yihofaan. Roma i, wa ngaˈayho sakadademaken ita konini a kimad padama to tao matatodong ko misaˈosian, hanaca kiemel a tahatolas. w22.05 15 fiedac 1-2 fatac

O sowal ni Yihofa ko tatengilen ita, cowa ko sowal no ˈada. Pasowal ci Yihofa ci Yopuan i, misinanotay ci Yopu mitengil. Tano adihayay a salicay ci Yihofa papiharateng ci Yopuan, malecaday o milicayay Cingra ci Yopuan: “Mafanaˈay Kako to mifekaday kihcod a demak i tireng iso, awaay ko pakayraan Ako midimokos tisowanan sanay kiso miharateng han?” Maherek ci Yopu mitengil misapoenerayto ko falocoˈ, mahapinangay ningra tada ngaˈayay ci Yihofa, matomesayto ko miakoˈiday a falocoˈ. Sanay ci Yopu: ‘Isalakat matengilay ako ko nano demak Iso, maˈarawayto ako Kiso nohatini.’ (Yopu 42:5) Somowal ci Yopu tonini a sowal i, maroˈayho itini i ˈafoˈafoan alatek, o dokaˈ no tireng cowaho ka adah. Soˈliˈlin cowaho ka taˈlif ko sapalifet ni Yopu, kawra maherekayto ci Yihofa paihkal to maolahay ko Niyah ci Yopuan, mihaydaayho cingranan. (Yopu 42:7, 8) Malecaday anini, misamsamay ko roma tamdaw kitanan alatek, awaay ko kapo ita saan minengneng. Mitonganganayho cangra kitanan ato likakawa ita. O tinakoan ni Yopu pahapinangay kitaanan, pakasoˈlinay ci Yihofa kitaanan, itini sapalifet o mamadimadi kita Cingranan, padadotoc halamham a mitiˈer Cingranan. w22.06 24 fiedac 15-16 fatac

Masongilaˈ mapalaˈafo ko Taˈangayay Papilon i, i kakarayan a ˈadingo a tireng maedeng o mamaacang a mahemek. Kawra ikakaay a kahemekan a demak i, itiniayho i lalikor! (Paˈarawan 19:1-3) Onini i, o saˈakawangay a demak no Paˈarawan, ‘o pisikayan to raramod no tofor a siri a toki maraodayto.’ Itini ˈayaw no Armakiton a lalood, polong no 144,000 tamdaw tayraayto i kakarayan, kawra cowaho ko pisikayan to raramod a toki itiya. (Paˈarawan 21:1, 2) Mahererek ko Armakiton a lalood, mapalahdaw ko polong a ˈada no Kawas ikor, wa itiya misikay to raramod no tofor a siri. (ˈOlic 45:3, 4, 13-17) O raramod no tofor a siri wa palaˈosi to maanan a demak hani? Malecad o mararamoday faˈinayan ato fafahiyan, onini a ‘raramod’ wa palacecay to Hongti ci Yis Kristo ato ‘fafahi’ ningra, oya 144,000 a tamdaw. Onini a kafahkaan a demak, o tahapinangan to mamikowanto konini faelohay a sifo to 1,000 miheca tonini a cikiw.—Paˈarawan 20:6. w22.05 17 fiedac 11-13 fatac

Paˈayaway ci Yis, itini salikoray romiˈad, wa nilnilen ningra ko cecay ‘madimadiay citanengay a koli’ mihadak to sapahaled to pakasoˈlin a kakaenen. (Matay 24:45) Soˈlinay mahaen ko demak! Anini, mimingay ˈopo iraay ko tokel tayra i kakarayan faˈinayan a salikaka misaka dademakan ni Yis, ‘itini matatodongay a tatokian’ mihadak to ‘kakaenen’ pafeli to finawlan no Kawas, ato maolahay to soˈlinay kimad a tamdaw. Onini a faˈinayan salikaka o mamala tawki ko niyah, mionting to pakasoˈlin no salikaka cowa ka saan miharateng. (2 Korinto 1:24) Masafelitay, mihaiay cangra edengan ci Yis Kristo ko ‘ ˈaˈideman ato kakeridan.’ (Isaya 55:4) Mikitini 1919 miheca, mitepangay to masakenakenaay a cudad ko madimadiay a koli, padama to maolahay to Fangcalay Cudad a tamdaw minanam to soˈlinay kimad, ho misatapang cangra mitanam to sapahaled to pakasoˈlin no falocoˈ a kakaenen. 1921 miheca, o madimadiay a koli mitepangay to Onkak no Kawas a cudad (Padaka), onini a cudad padamaay to ˈalomanay tamdaw mafanaˈ to taˈeneran a kimad no Fangcalay Cudad. Ikor mitooray to lintad a macakat ko madimadiay a koli, mitepangay to romaroma a cudad. O maanan a cudad ko padamaay kisowanan mafanaˈ ato maolah to kakarayan a Wama hani? w22.07 10 fiedac 9-10 fatac

Ci Yihofa o hinapaladaˈay a kakarayan Wama. Ano o mananto ko sapafeli iso Cingranan, o sapafeli Ningra tisowanan wa mikikaka ko kaadihay. (Marko 10:29, 30) Soˈlinto itini salikoray a pasangaray a lintad, ngangaˈay pakahemeken Ningra kiso, marenecen ciepoc ko kaˈorip. Kawra o satapanganho konini, tatahadaˈoc kiso midoko to ciolahay a kakarayan Wama, papadadotoc a matongal ko olah iso ato Cingranan. O kaˈorip iso mamalecad Cingranan a halafin, tatahira i daˈoc. Ikor no mipatafang to tireng micada to paputisem kiso i, irato ko toki iso pafeli ci Yihofaan to masakalimlaan a sapakaolah. Haratengen hena, o kahacecay ngaˈayay a demak no kaˈorip iso, kahacecay kalipahakan tatokian, sahtoay o sapafeli Ningra tisowanan konini, o manan ko sapatiko iso Cingranan hani? Ci Yihofa o Tatapangan no kakarayan ato sera, iraayho ko maanan kaawaan Ningra saw? Wa ngaˈayho kiso pafeli Cingranan to maanan hani? O makalimay a falocoˈ iso, misarocoday a falocoˈ matayal saki Cingranan. Onini ko sapafeli iso a sapakaolah ci Yihofaan, o sangaˈayay a pisakadademak iso to hakelong no ˈorip konini.—Yopu 1:8; 41:11; Taneng 27:11. w23.03 6 fiedac 16-17 fatac

Itini kaemangan a tatokian, ciˈicelay ko coos no tireng. Latekay miroeroay ko tao tisowanan, papidemak tisowanan to malafoay a demak. Maolahay ci Satan midoedo kiso to coos no niyah a midemak. Sasamaan kiso ngaˈ mitafo to makoracay a waywayan hani? (1 Tisalonika 4:3, 4) Ano mitolon kiso ci Yihofaan i, hadaken ko nafalocoˈan a harateng, hanaca micangacang Cingranan pafeli to ˈicel tisowanan midemak to matatodongay a demak. (Matay 6:13) Haratengen, makalimay ci Yihofa padama tisowanan, cowa ka sapilikafaw tisowanan. (ˈOlic 103:13, 14) Aka o niyah saan ko miremo tonini a pasangaray, masasowal to wama wina. Soˈlin pasowal cangranan tonini no tekedan a harateng cowa ko madoloay, kawra kalimlaan mihaen to demak. Miasip kiso to Fangcalay Cudad halo pidotim to ilalomaˈay a safalod, wa madoloto inaneng ko misaˈosian, pakahemek ci Yihofaan. Ano malitemoh iso ko cowa ka lecad a pakayraan i, soˈlin awa ko rikec mamafanaˈ a midemak, samanen cipinangayto kiso to samaanay ko pinengneng ni Yihofa to demak. w22.08 5 fiedac 10-12 fatac

O malo tawkiay no lomaˈ a Krisciyang misaaretengay minengneng to paririˈay to paro no lomaˈ a ˈinorong. Ano o tawki no lomaˈ kiso, calemcemay to cato ka ngaˈay paririˈ to paro no lomaˈ, pateli to saesoy no lomaˈ anca patikol to taykowan no lomaˈ. Ciˈangiayho kiso alatek, ano malahdaw ko tayal awaayto ko pakayraan mikilim to faelohay a tayal. Anca calemcem ano misalof to tayal, mamafiyorto ko sinowayay no kaˈorip. Misaka dademakan ni Satan ko mahaenay ciˈangiay falocoˈ, malaˈosiay miconged to ˈalomanay tamdaw eca to pisarocod to falocoˈ ato harateng midoko ci Yihofaan. Mihalakaay ci Satan papipakasoˈlin kitanan to cowa ka ciharateng ci Yihofa kitanan, cowaho ko papadama kitanan midimokos to paro no lomaˈ. Ano malipalaw ningra kita, ano samaanto o tatereken no niyah ko tayal anini saan kita miharateng alatek, mamangalefto misakahmaw to pina a safalod no Fangcalay Cudad. w22.06 15 fiedac 5-6 fatac

Ci Yihofa o ‘siniˈadaay to tamdaw, patadoay to tamdaw miharateng a Kawas, cowa ka ranikay maketer, iraay ko madimadiay a olah, soˈliˈlinay ngaˈay tiˈeren.’ (Kasadakan 34:6) Maolahay Cingra to masadafdafay. (Isaya 61:8) Maˈaraw kita misemsem, adadaay ko falocoˈ Ningra. Makalimay Cingra sapalahdawaw to kihcod a pades, hanaca maharekayto Cingra misaˈosi to toki mihaen to demak. (Yirimiya 29:11) O sapafeli ni Yihofa kitaanan a hatokel tada makapahayto! Tada maolahay kita Cingranan! O roma lalangian ita maolah to soˈlinay kimad i, pairaay ko soˈlinay kimad to adihayay haepoc no mita. Tinakoen, o soˈlinay kimad no Fangcalay Cudad mahawpay ko hatokel ita noikor. Malecad o ˈenor no tamina patanektekay to tamina, o mikitiniay i Fangcalay Cudad a tokel wa ngaˈay padama kitaanan ano tahalifa to sapalifet padadotoc a rihaday ko falocoˈ, tanektek eca ka ngiyangi. O misowalan no tarokos ci Pawlo itini to aniniay sinael a hatokel i, o hatokel no manilnilay no fangcalay saocor tatayra i kakarayan a Krisciyang. Kawra pakayni citokelay i fafekang no sera a lakoing tahadaˈoc maˈorip a Krisciyang, malecaday ira ko epoc nonini a sowal ni Pawlo. (Yohani 3:16) Mafanaˈay kita iraay ko hatokel no niyah tahadaˈoc a maˈorip, matongalay ko kaciepoc no ˈorip. w22.08 14-15 fiedac 3-5 fatac

O olah o taˈeneran no pakasoˈlinay. Itini 1 Korinto 13 fedengan pasifanaˈay kitaanan sasamaan a paihkal to olah i tao, ilalomaˈ adihayay ko kalimlaan papadama konini kitaanan patireng anca miliyaw patireng to pakasoˈlin to tao. (1 Korinto 13:4-8) Tinakoen itini saka 4 sinael sanay: ‘O olah, iraay ko mihadidiay, ato sidaˈitay.’ Soˈlin mararaw kita, pakararaw ci Yihofaan, kamayan Cingra mihadidi micada kitaanan. Mihaenay, o sowal no salikaka anca midemakan paketeray anca pasomaday kitaanan, wa ngaˈay kita mihadidi micada cangranan. Saka 5 sinael sanay, o olah ‘cowa ka ranikay maketer, cowa pisaˈosi to pairaan no tao a dokaˈ.’ Mihaenay cowa ko aˈinteh ko falocoˈ ita, mitala to sapihadakaw to raraw no tao noikor. Itini Patnakay 7:9 patalipaˈelalay kitaanan ‘aka ranikay maketer.’ Mamisarocod kita tano ni Yihofa a pinengneng a minengneng to salikaka. Maolahay ko Kawas cangranan, cowa pihacecay mitilid to nano raraw nangra, ano kitato cowa ko mamihaen to demak. (ˈOlic 130:3) Cowa ko mamisamacay kita to nano raraw nangra, ao mamisinanot to kangaˈayan nangra.—Matay 7:1-5. w22.09 4 fiedac 6-7 fatac

Patalahkalay ko Taniil itini salikoray lintad masakenakenaay taˈangayay demak mamitoor to maanan a kadadoedo a mifekad. Tinakoen, patalahkalay ko Taniil 12:1, ci Mikail ci Yis Kristo ‘padotocay tomireng paˈading’ to finawlan no Kawas. 1914 miheca, mala Hongtiay ci Yis i kakarayan, mala Hongti no Hongti Kitakit no Kawas. Mikitiya misatapang, padadotocay matatodong konini a sapairasol. Kawra, patalahkalayho ko sapairasol ni Taniil, ‘wa ira ko kapadesan a laliyadan masadak, mikitini kaira no kitakit tahanini, awaayho mifekad ko mahaenay a pades,’ toniya tatokian wa ‘tomireng’ ci Yis. Toniya ‘kapadesan a laliyadan’ o misowalan no Matay 24:21 a ‘taˈangayay padiing.’ Itini kahererekan nonini kapadesan a tatokian, wa itini Armakiton, lalomowad ci Yis midipot to finawlan no Kawas. Onini micadaay to sadipot ni Yis a tamdaw oyaan masowalay no Paˈarawan ‘mikitiniay taˈangayay padiing masadak’ taˈangayay ˈopo a tamdaw.—Paˈarawan 7:9, 14. w22.09 21 fiedac 4-5 fatac

Matiliday i sakaˈorip a cudad a ngangan anini ngaˈayay falahen anca padengen, malecaday konini satapang aca tano impican a tiliden konini a ngangan. (Paˈarawan 3:5) O mamisaˈosi kita padotoc materek ko ngangan no niyah i sakaˈorip a cudad, malecad o tano ˈekengan a impic (manihic) tiliden konini a ngangan. Iraay ko ngangan no cecay ˈopo a tamdaw matiliday i sakaˈorip a cudad, cangra o mipiliˈan no Kawas tayra i kakarayan malacafay ci Yisan mikowan a tamdaw. Mikitini sowal no tarokos ci Pawlo to Filipiay a ‘cafay matayal,’ wa ngaˈay mahapinang ita, manilnilay no fangcalay saocor a Krisciyang, oya tatayra i kakarayan malacafay ci Yisan mikowan a tamdaw, o ngangan nangra matilidayto i sakaˈorip a cudad nohatini. (Filipi 4:3) Kawra ano makalimay cangra tahadaˈoc materek ko ngangan no niyah tonini a cudad i, o tatahatolas a madimadi. Mihaen, itini ˈayaw no mapatay cangra anca ˈayaw no mifekad ko taˈangayay padiing, o mamilifok to salikoray a satopa. Mikitiya misatapang, tatahadaˈocto materek ko ngangan nangra i sakaˈorip a cudad.—Paˈarawan 7:3. w22.09 14 fiedac 3 fatac; 15 fiedac 5-6 fatac

Iraay ko mahaenay a nalifetan iso han? Ira ko misangaˈay to kaolahan iso a dateng, kawra macalohay kiso, anca miharatengay ko falocoˈ to roma demak, telocto taˈemod hananay iso, cowa pisongilaˈ mikemkem to kakaenen. Maharek komaen ikor, mahapinangay iso kalikiay soˈlin komaen ko niyah, makesemay cowa pisongilaˈ mikemkem ko niyah, mitanam to ˈaredet no kakaenen. Ano micekiw kiso to Fangcalay Cudad i, iraay ko malecaday a pakayraan han? Kalikiay soˈlin ko piˈosi iso alatek, telocto cowa pitemer i falocoˈ ko miasipan a lalakaw. Palaken ko toki misongilaˈ mitinako to kangaˈay no picekiw, haratengen maˈaraway iso ko maanan, matengilay ko maanan, haratengenho mananamay iso ko maanan. Mihaen ko picekiw ngaˈ matongal ko lipahak iso. Minilnilan ni Yis ko ‘madimadiay citanengay a koli’ itini matatodongay a tatokian mihadak to sapahaled to pakasoˈlinay falocoˈ a kakaenen, padama kitaanan milifok to sangaˈayay a pidimokos. (Matay 24:45) Misaday ko madimadiay koli tonini a “kakaenen” i, sakakaay a lalakaw o Fangcalay Cudad.—1 Tisalonika 2:13. w22.10 8 fiedac 6-8 fatac

Patalipaˈelalay ko Fangcalay Cudad kitaanan, itini salikoray romiˈad wa adihay ko milokesay a tamdaw. (2 Pitiro 3:3, 4) Maolahay cangra ‘pakihater to coos no niyah, midemak to misakahmaway to Kawas a demak.’ (Yuta 7, 17, 18) Sasamaan kita ngaˈ madipot ko niyah, hoeca ka malo hinalokesay a tamdaw hani? O cecay pakayraan i, liyasen ko hinalikafay a tamdaw. (ˈOlic 1:1) Tatodong i, cowa ko mamitengil cowa ko maminengneng to sasowalen no mitowakangay to kimad a tamdaw. Roma i, maminaˈon kita, aka hinalikaf, misatapang cisasa to pakayraan ni Yihofa a dademak ato mikitiniay i likakawa Ningra a sakayat. Ngaˈayay licayen ita ko niyah: Ano ira ko faelohay pitadtad no likakawa to sinael, anca pafeli kitaanan to faelohay sakayat i, tocerid o masofaway ko sasowalen ako han? Marariday kako malikaf to mikeriday a salikaka i likakawa han? Ano tangsol kita misalof to mararaway a waywayan no niyah, o mamaolah ci Yihofa kitaanan.—Taneng 3:34, 35. w22.10 20 fiedac 9-10 fatac

O fangcalay saocor no Kawas patimoloay ci Icikilan midemak to ˈinorong, pasayra i ‘ ˈatekakay ko katotong no fongoh’ ‘ ˈatekakay ko falocoˈ ’ a Israil tamdaw mitosil. Pasowalan ni Yihofa ci Icikil: ‘O laway nangra, o katotong no fongoh nangra hakowaay ko ˈatekak, hatiraen Ako paˈatekak ko laway iso, ato katotong no fongoh. Palecaden Ako to fakeloh ko katotong no fongoh iso, ikakaho to fakeloh ko ˈatekak . . . aka matalaw kiso cangranan, aka pakayni i pising nangra a marawraw.’ (Icikil 3:8, 9) Malecaday o pasowalay ci Yihofa ci Icikilan: ‘Aka pakayni ka ˈatekak no Israil tamdaw a matoled, patanekteken Ako a paˈicel kiso.’ Ikor norira, miˈorongan no fangcalay saocor ci Icikil tayra roma pala, sanay ci Icikil: ‘O kamay ni Yihofa itini tireng ako mihadakay to taˈangayay sapadama.’ Mipalakay cingra to cecay lipay a toki cipinang a midotim to papilasilan ni Yihofa cingranan a lihaf. (Icikil 3:14, 15) Ikor, itini sakayat ni Yihofa tayraay cingra i cecay dafdaf. Itira, ‘micomoday ko fangcalay saocor i lalomaˈ [ningra].’ (Icikil 3:23, 24) Maharekayto ci Icikil misaday misatapang mitosil. w22.11 4-5 fiedac 8-9 fatac

Pairasolay ci Hapakuk tahasiˈayaway to adihayay pasangaray a pakayraan, na cisasaay cingra ci Yihofaan to soˈlinay a ciharateng cingranan hokira. Kawra kamayan cingra itini i satolon pasowal ci Yihofaan to nafalocoˈan no niyah. Pacaˈofan ni Yihofa ko naifalocoˈay satolon ningra. (Hapakuk 2:2, 3) Misongilaˈay ci Hapakuk miharateng samaanay ci Yihofa isalakat milidong to finawlan no Niyah, miliyawayto a lipahak, hanaca pakasoˈlinay to ciharatengay ci Yihofa cingranan, o papadama cingranan mihadidi to masakenakenaay a sapalifet. (Hapakuk 3:17-19) Mananamay ita ko manan hani? Ano misiˈayaw to pasangaray i, itini i satolon pasowalen ci Yihofa to nafalocoˈan iso, hanaca tadiˈecen ko sapadama Ningra. Mihaen ko demak iso, ngaˈayto pakasoˈlin to papafelien ni Yihofa kiso to ˈicel, padama tisowanan tahatolas ko pihadidi. Ano matinako iso ko pipadama ni Yihofa, wa matongalto ko pakasoˈlin no falocoˈ. Ano padadotoc kiso mirienang to midokoay a demak, cowato ko papakayni i masakenakenaay a pasangaray anca sasa no falocoˈ a miliyas ci Yihofaan.—1 Timoti 6:6-8. w22.11 15 fiedac 6-7 fatac

Ci Yis ato tatihiay tatosa ciraraway tamdaw itiniay pisemseman hecek a misemsem, mafanaˈay cangra to mamalaˈeto ko ˈorip nangra. (Luka 23:32, 33) Oniya tatosaay ciraraway na milokesay cangra ci Yisan. (Matay 27:44; Marko 15:32) Kawra o cecay ciraraway mafalicay ko waywayan, sanay cingra: ‘Yisaw, micada kiso to fadangalan no Hongti ikor, nanay haratengen iso kako.’ O caˈof ni Yis cingranan a sowal o aniniay a sinael. (Luka 23:39-42) O sowal ni Yis to itihiay ciraraway papiharatengay kitaanan to samaanay ko kaˈorip i Lakoing alatek. Nengnengen ita ko kadipayal no pikowan ni Solomon, o mamafanaˈ to pina pakayraan no Lakoing. Ci Yis o mikikakaay ci Solomonan a kalimlaan a tamdaw, pakasoˈlinay kita cingra ato kalacafayay cingranan tayra i kakarayan mala hongti a tamdaw o mamisalof toniya cikiw malo makapahay a Lakoing. (Matay 12:42) Roma i, o ‘roma lopayˈay siri’ maedeng sakafanaˈaw to sasamaan ko demak no niyah, ho ira ko tatodong tahadaˈoc maˈorip i Lakoing.—Yohani 10:16. w22.12 8 fiedac 1 fatac; 9 fiedac 4 fatac

Mikiˈokay ci Isaya, micangacang kita ci Yihofaan, wa misongilaˈ ci Yihofa mitengil, tatangsolho a pacaˈof kitaanan. Onini mihinomay to falocoˈ a sowal padamaay kitaanan pakasoˈlin, cowa ko makahi aca ko kakarayan Wama hanaca macalohay padama to micangacangay Cingranan a tamdaw. Mafanaˈ tonini, wa ngaˈayto ira ko lipahak ita padadotoc a mihadidi. Misinanotay ci Yihofa mitengil to satolon ita o kahacecay tamdaw. Hano mafanaˈ kita hani? Saˈayaway no 30 fedengan no Isaya misaka dademakay to ‘kamo’ sanay a sowal, samanen pasayraay ci Yihofa i polong a finawlan Ningra a pasowal. Kawra, 19 sinael misaka dademakay to ‘kiso’ a sowal, samanen o sowal itini pasayraay i kahacecay tamdaw a sowalen. Sanay ci Isaya: ‘Cowa ko mamararom kiso a tomangic.’ ‘O Kawas . . . sasidaˈiten iso.’ ‘Papacaˈof Cingra . . . tisowanan.’ O sidaˈitay a Wama ci Yihofa, ciharatengay Cingra kitaanan o kahacecay tamdaw, hanaca mamisongilaˈ mitengil to satolon ita o kahacecay tamdaw.—ˈOlic 116:1; Isaya 57:15. w22.11 9 fiedac 5-6 fatac

Itini sapalak padadotoc mitosil pasifanaˈ to tamdaw papadama kitaanan milifok to lipahak ato rihaday. Itini saka 1 hahekalan, palimoˈotay ko ˈaˈideman no pihakelongan to tarokos akato mitosil sanay, kawra onini a madimadiay salikaka mipiliˈay midofdof to Kawas, padadotoc mitosil, telocto milifokay cangra to taˈangayay a lipahak. (Dmak 5:27-29, 41, 42) Manaokaniw, ano makeceng ko mitosilay tayal, ano mitosil kita i oha maminaˈon a misinanot. Kawra ano misarocod kita a midemak o mamilifok to rihaday, samanen mafanaˈay kita mahemekay ci Yihofa, hanaca o milasilan ita o sapilidong to tamdaw a lihaf. Aka calemcem, soˈlin itini pasangaray a pakayraan, wa kamayan ira ko rihaday ita. Haratengen, misaalian ita i o sapafeli no Kawas a rihaday, kantangen ko sowal, edengan ci Yihofa ko papafeli kitaanan to mahaenay a rihaday. Misiˈayaw to lifong, pades anca sapalak i, ka pitadiˈec Cingranan, kelecen mihakelong ko likakawa Ningra, halamhamho to makapahay hatokel noikor. Mihaen, ‘o pafeliay to rihaday a Kawas wa kalacafay tisowanan.’—Filipi 4:9. w22.12 21 fiedac 17-18 fatac

Tatodong i, o mamidemak kita. Mamisaˈicel a misalof to dangoc no waywayan, ho eca ka ciˈinteh ko falocoˈ, maketer ato mangolaw. (Ifiso 4:31, 32) Mihaen to demek hano cowa ko madoloay hani? Samanen o dangoc no waywayan ita ˈangongolayto ko lamit i falocoˈ. Tinakoen, sowal no Fangcalay Cudad o roma tamdaw ‘narikayay a maketer’ anca ‘narikayay mangolaw’ sanay. (Taneng 29:22) Toha sapiremoaw tonini kadangocan, ikor no micada to paputisem i, oha papadadotoc kita misaˈicel. (Loma 7:21-23) Ano iraay ko maanan pasangaray remoen a dangoc iso i, ka pasayra ci Yihofaan a mitolon, hanaca pakasoˈlin to papacaˈofen Ningra kiso, padama tisowanan. (1 Yohani 5:14, 15) Soˈlin cowa pidemak ci Yihofa to kafahkaˈan palasawad to dangoc iso, kawra papafelien Ningra kiso to ˈicel, ho eca ka piliyaw a mararaw. (1 Pitiro 5:10) Hanaca, o demak iso palecaden to satolon iso, akato midemak to mamikayhid tisowanan a mararaway demak. Aka a paˈenepen ko falocoˈ no niyah to cowa ka tatodong a coos.—Filipi 4:8; Kolosay 3:2. w23.01 10 fiedac 7, 9-10 fatac

O cecay pakayraan ita paihkal to hatiniay a olah i, fanekfek mirienang to mitosilay a tayal. Mamisaˈicel kita pasowal to malitemohay a tamdaw to soˈlinay kimad, ano caka lecad ko finacadan no tao i, aka sawad sa paladaˈ to ngaˈayay lihaf cangranan. Roma i, cowa ko kacihafay anca hakowaay ko picudadan no tao ko sapisaˈosi ita, to tatosilen cingra hokira. Ano mihaen, o midofdofayto kita to araaw ni Yihofa, samanen ‘araaw no Kawas i, mangalayay Cingra to sakaˈoripaw no masakenakenaay a tamdaw, masongilaˈ cipinang to soˈlinay kimad.’ (1 Timoti 2:4) Ano maolahay kita to Kawas aci Kristoan i, mamaolah kita to salikaka. O caciharateng kita ato midama to tahalifaay to sapalifet a salikaka. Ano mapatay ko salawina nangra, hinomen no mita cangra, ano adada cangra i, lisoˈen ita cangra, ano matoled cangra i, kowaden ita cangra. (2 Korinto 1:3-7; 1 Tisalonika 5:11, 14) Padadotoc kita mitolon saki cangranan, samanen maharatengay ita ‘o pingitangit no moecelay a tamdaw, tada ciˈicelay.’—Yakop 5:16. w23.01 28-29 fiedac 7-8 fatac

O cecay patirengay to lomaˈ a maomahay wa ngaˈay padadotoc pacakat to inaneng matayal, malecaday, itini pipadama to tao patireng to tanektekay a pakasoˈlin a demakan, wa ngaˈay kita padotoc macakat. Malacafay kita to salikaka milengo to samaanay padadotoc mihadidi ko romaroma madimadiay sikawdan no Kawas, wa ngaˈay padama to salikaka matongal ko ˈicel mihadidi to sapalifet. (Hipray 11:32-35; 12:1) Wa mararid kita mihadak to kangaˈayan no salikaka, aka papipalaken ko maamaan a demakan to kalalaˈed ita ato cangranan, misaˈicel palahdaw to masasongtolay a piharateng, ano mihaen wa ngaˈay micowat to rihaday. (Ifiso 4:3) Ngaˈayho kita masasowal to salikaka to kalimlaan a kimad no Fangcalay Cudad, hanaca pafelien cangra to ciepocay a sapadama. Ano malonay ko pakasoˈlin nangra, aka pisawad kita cangranan. Mihaen, ngaˈayto kita padadotoc pakalalok to salikaka, ho matongal ko tanektek no pakasoˈlin nangra. Mirienangay kita to roma ‘patirengay a tayal,’ o padamaay to salikaka patireng to tanektekay pakasoˈlin, o lalipahak ato marenec. O soˈlinay a mipatirengan a lomaˈ halafinto matelangayto a mapalak, kawra mirienangan ita a patirengay a demak o papaira to tahadaˈocay a minaroˈan. w22.08 22 fiedac 6 fatac; 25 fiedac 17-18 fatac

Somowalay ci Yis hahapinangen ita ko tatodong no sinael, tatodong i, sakacipinangaw kita to Kimad no Kawas kalimlaan ko inaneng a pafafidaˈ. (Matay 24:15) O maanan ko inaneng a pafafidaˈ hani? O mahaenay a inaneng papadama to tamdaw pafafidaˈ to kalalaˈed ato kasasiroma no demak. O iraay ko mahaenay a inaneng a tamdaw cowa ko papotal aca ko minengnengan, tatangongol ko pinengneng ningra. Paihkalay ci Yis, ira ko inaneng ita a pafafidaˈ, wangaˈ pakahapinang to malaˈosiayto ko maanan a sapairasol. Ano miˈosi to romaroma a lalakaw no Fangcalay Cudad i, ira ko inaneng a pafafidaˈ ngaˈ, malifok ko adihayay a epoc. Papafelien ni Yihofa to inaneng pafafidaˈ ko midokoay Cingranan a tamdaw. Mankora pasayra Cingranan a mitolon, micangacang to sapadama Ningra palahad to hatiniay a inaneng. O waywayan iso samaan malacecay to satolon hani? Songilaˈen mifolfol ko maˈosiay iso a sinael, sinanoten kora lalakaw iraay ko maanan noka pilingat to kafanaˈanto iso a demak. Hapinangen ko tatodong no sinael, hanaca mafanaˈ a misaka dademak to mananamay. (Hipray 5:14) Miˈosi to Fangcalay Cudad i, sakadademaken ko inaneng a pafafidaˈ, o kacipinang to sinael wa matongal ko tangongol. w23.02 10 fiedac 7-8 fatac

Haratengen hena, o cecay widang pafeliay tisowanan to cecay matelangayto matekesay a coka. Onini a coka malahdaway ko pina kodong, iraay ko pina kadit ato ngelaˈ. Soˈliˈlin hatira i, tada matekesay konini coka, pinaay soˈot ˈofad a payci no Padaka. Maedeng mamisalimla kiso tonini a coka, mamisongilaˈ a midipot. Malecaday, pafeliay ci Yihofa kitaanan to cecay kalimlaan a sapatelong, o ˈorip no mita. Haratengen hena, to sapilidongaw kitaanan, o Wawato no Niyah makahiyay kinafalah. Itini pinengneng Ningra tada kalimlaan ko ˈorip no mita! (Yohani 3:16) O Pipowaran no ˈorip ci Yihofa. (ˈOlic 36:9) O tarokos ci Pawlo pakasoˈlinay tonini soˈlinay kimad, sanay cingra: ‘O nika ˈorip ita ato nika dademak ita ato nika ira ita anini i, o mikitiraay Cingranan a maemin.’ (Dmak 17:25, 28) Mansa ngaˈay kita saan ko sowal, o ˈorip o sapatelong no Kawas. Roma i, mikitiniay i olah Cingra pafeli to kihcod a sakaˈorip no mita. (Dmak 14:15-17) Manaokaniw, cowa ko mamidemak ci Yihofa to kafahkaˈan midipot to ˈorip ita. Makalimay Cingra o kita ko mamidipot to tireng no niyah, padadotoc matayal saki Cingranan.—2 Korinto 7:1. w23.02 20 fiedac 1-2 fatac

Tada miakoˈiday kita to Kawas ci Yihofaan pafeli to Fangcalay Cudad! Itini tonini cudad, maˈoningay ko adihayay citanengay a sowal, padama kitaanan misiˈayaw to masakenakenaay a pasangar anini. Roma i, pakafanaˈay Cingra kitaanan, iraay ko makapahay a hatokel noikor. Masakalimlaan i, ci Yihofa pakayniay i Fangcalay Cudad pahapinang kitaanan to adihayay ko makapahay capeling Ningra. Ano misongilaˈay kita misimsim tonini a capeling i, mamasemer ko falocoˈ ita, sapiingidaw Cingranan, mala ngaˈayay widang Ningra. (ˈOlic 25:14) Makalimay ci Yihofa mafanaˈ ko tamdaw Cingranan. Itini nolitengan, pakaynian Ningra i nitiihan, mapolosi ato coyoh patalahkal to milingatay Cingranan a demak. (Saˈosi 12:6; Dmak 10:3, 4) Kawra ano awaay ko mitiliday to lihaf no nitiihan, mapolosi ato coyoh i, samaan kita a mafanaˈ to lalakaw halo misongilaˈ a minanam hani? Mihaenay, mikayatan ni Yihofa ko tamdaw ‘mitilid i maloloday cudad’ to papasifanaˈen Ningra kitaanan a demak. ‘Malefotay ko lalan no Kawas,’ mansa pakasoˈlinen ita pakaynian Ningra i Fangcalay Cudad masasowal kitaanan, hanaca mamalifok ita ko adihayay a haepoc.—ˈOlic 18:30. w23.02 2 fiedac 1-2 fatac

Patireng to ciepocay tisowanan a patosokan. O mipiliˈan iso a patosokan o papaˈicel to pakasoˈlin iso, padama tisowanan malo matenesay a Krisciyang. (Ifiso 3:16) Sapisalofaw kiso to nanaman micekiw ato miasip to Fangcalay Cudad alatek. (ˈOlic 1:2, 3) Sapiceridaw kiso a mitolon alatek, hanaca pacakat to kangaˈay no satolon. Itini pipiliˈ to salama ato misaka dademak to toki mahapinangay iso mamitongal to miˈimeray no niyah alatek. (Ifiso 5:15, 16) Padama kiso to tao, o mamalo matenesay ko niyah. Ngaˈayay patireng kiso to patosokan, padama to matoˈasay malonayay ko tireng a tamdaw i kasakopang. Alatek wa ngaˈay kiso patado cangranan micakay to dafong, anca pasifanaˈ cangranan minanam misaka dademak to tingnaw. Wa ngaˈayho kiso pasayra i potalay no kasakopang a tamdaw paihkal to ciolahay falocoˈ, pasowal cangranan to ngaˈayay lihaf no Hongti Kitakit. (Matay 9:36, 37) Ano ngangaˈay i, sarocoden micangacang ko mieminay to toki matayal saki Kawas a patosokan. w22.08 6-7 fiedac 16-17 fatac