Saka 11 Folad

Cowa ka ngaˈay ko Krisciyang somowal to cikaditay a sowal. Kawra, latek somowalay kita to midokaˈay to tamdaw a sowal, kawra cowa ka hapinang no niyah. O mahaenay a sowal o laliyasen ita. Tinakoen, cowa ka ngaˈay somowal kita to misakahmaway to roma serangawan a finacadan anca roma kitakit a tamdaw. Roma i, caay ka ciharateng kita tano milokesay a sowal midokaˈ to tao, ao pakalalokay to tamdaw ko hasowal. Mameten ita ko toki pakahemek to roma a tamdaw, hamaan mararid milikaf anca ngaliwngiw. Adihayay ko aakoˈiden no Israil tamdaw a demak, kawra marariday cangra ngaliwngiw, o hatiniay a harateng madoloay a midapdap. Maharatengayho iso alatek, minokay koya mamoetepay a misolapay no Israil somowalay to adihayay masofaway a sowal, telocto ‘polong no Israil tamdaw ngaliwngiway ci Mosian.’ (Saˈosi 13:31–14:4) O roma pakayraan i, mikowaday to falocoˈ no tamdaw ko pakahemekay. Mihaenay kakilimen ita ko toki mikifalocoˈ a pakahemek to roma a tamdaw. w22.04 8 fiedac 16-17 fatac

Mikitini nolitengan tahanini, ˈalomanayto ko mapadamaay ni Yihofa a wawa malo widang Ningra. Ano makahi ko wawa iso, wa ngaˈay ci Yihofa padama cangranan palahad to tangongolay kalawidang Cingranan. (1 Korinto 3:6, 7) Soˈlin caka ciharateng cangra midoko ci Yihofaan nohatini, wa kamayan Cingra padotoc a ciharateng cangranan. (ˈOlic 11:4) Ano paihkal cangra to miming ‘matatodongay a waywayan’ i, o papadama ci Yihofa cangranan. (Dmak 13:48; 2 Rayray 16:9) Itini i matatodongay a tatokian padama Cingra tisowanan somowal to matatodongay a sowal, o sowal iso itiya o kaolahan no wawa a mitengil. (Taneng 15:23) O mamikayat Cingra to cecay salikaka i kasakopang ciharateng to wawa iso alatek. Lomahadto ko wawa iso i, o papadamaen ni Yihofa cangra miharateng to nano sapasifanaˈ iso cangranan a soˈlinay kimad. (Yohani 14:26) Padadotoc kiso pakayni sasowalen ato waywayan misongilaˈ pasifanaˈ to wawa, o papalifonen ni Yihofa kiso. w22.04 21 fiedac 18 fatac

Samanen cowato ka ngaˈay ci Satan patikol i kakarayan, mangolaway cingra to itiniayho i fafekang no sera manilnilay no fangcalay saocor a Krisciyang. Cangra i, oya ‘misawacayay ci Yisan a tamdaw,’ o mitaypiyaway to Hongti Kitakit no Kawas i fafekang no sera. (2 Korinto 5:20; Ifiso 6:19, 20) Itini 1918 miheca, oya fafaloay ciˈinorongay a salikaka mapakokotay, hanaca misawkitan to hahalafin a mapalit. Cowato ka ngaˈay matayal cangra, mahecaday to mipatayanto cangra. (Paˈarawan 11:3, 7-11) Itini satapang no 1919 miheca matedalayto. Ikor, palahdawan ko sakokot cangranan. Onini a salikaka kalikiay miliyaw mirienang to milasilay to Hongti Kitakit a tayal. Kawra, mikitiya misatapang padadotocay ci Satan mikalisanga, ciharatengay tano sapalak a ‘cedas’ paˈalol to finawlan no Kawas. (Paˈarawan 12:15) Mihaenay, kita o kahacecay tamdaw ‘pairaen ko miememay, pairaenho ko pakasoˈlinay falocoˈ.—Paˈarawan 13:10. w22.05 5-6 fiedac 14-16 fatac

Itini mapolosi, maˈaraway no tarokos ci Yohani ko tosa ˈopo a tamdaw, midamaay cangra to pikowan ni Yihofa, hanaca micadaay to sapalifon ngaˈay milayap to midaˈocay a ˈorip. Saka cecay ˈopo a tamdaw 144,000 ko ˈaloman. Cangra i mikitiniay i fafekang no sera a piliˈen no Kawas tayra i kakarayan, malacafay ci Yisan mikapot malo Hongti Kitakit. Oniya sifo mamikowan to polong no cikiw. (Paˈarawan 5:9, 10; 14:3, 4) Itini mapolosi, maˈaraway ni Yohani cangra malacafayay ci Yisan tomirengay i Cion a Lotok i kakarayan. (Paˈarawan 14:1) Mikitini i lintad no tarokos misatapang, iraay ko masacaˈolay masaemangay a tamdaw mipiliˈan no Kawas malo 144,000 a tamdaw. (Luka 12:32; Loma 8:17) Kawra itini salikoray a romiˈad, 144,000 a tamdaw wa iraho ko miming maˈoripay itini i hekal. (Paˈarawan 12:17) Itini taˈangayay padiing a roma tatokian i, wa masaˈopo to tayra i kakarayan cangra, malacafay toya tahiraay i patay madimadi hanaca milifokay to sapalifon a tamdaw. Polong a 144,000 a tamdaw wa itinito i Hongti Kitakit no Kawas malacafay ci Yisan mala Hongti.—Matay 24:31; Paˈarawan 5:9, 10. w22.05 16 fiedac 4-5 fatac

Pasifanaˈan ni Yis ko nisawawaan matatodong ko pinengneng to niyah. Pasowalan ni Yis ko nisawawaan: ‘Ano o fokesto namo maeminay a misaˈosi.’ (Matay 10:30) Ano madoloay kita ira ko masofaway pinengneng to niyah, onini a sowal o mamikiriwiˈ a mihinom kitanan. Paihkalay ko sowal ni Yis, tada ciharatengay ko kakarayan Wama kitaanan, o kalimlaan kita sanay miharateng. Ano micadaan ni Yihofa ko pidoko ita, o ngangaˈay tahadaˈoc maˈorip i faelohay hekal saan miharateng, cowato ko cacisasa kita to pisawkit Ningra, awaay ko tatodong no niyah saan miharateng. ˈAyaw no 15 miheca, cecay lalakaw no Mikecolay palimoˈotay kitaanan pairaen ko matatodongay pinengneng to niyah. Sanay ko lalakaw: “Cowa ka ngaˈay kita patakaraw to niyah, misaˈakawang ko falocoˈ, kawra cowa ka ngaˈay pakidem ko harateng, hato misakahmaw to niyah. Patatodongen ko pinengneng ita to niyah.” w22.05 24-25 fiedac 14-16 fatac

Kita kahacecay tamdaw sasamaan mihadak to ˈicel padama to kasakopang mitafo to makakedecay hani? O mamisarocod micowat to dipayal. (Matay 5:9; Loma 12:18) O kahacecay ka talaˈayaw ita midama to ngaˈayay kalalaˈed to salikaka i, o patongalay to ˈodingar no lakoing no midokoay a pakayraan. Haratengen ita, o kahacecay tamdaw nonini a lakoing sahtoay o misolotan ni Yihofa mirienang to matatodongay a pidoko. (Yohani 6:44) Itini pinengneng ni Yihofa, sahtoay o kalimlaan ko kahacecay tamdaw i kasakopang. Ano maˈaraw Ningra ko pisaˈicel ita micowat to dipayal ato kakedec no kasakopang, maedeng o mamahemek. (Isaya 26:3; Hakay 2:7) Adihayay ko sapalemed no Kawas kitaanan, samaan ko pidemak ita wa ngaˈayto milifok to taˈangayay haepoc hani? Ngaˈayay calepen ita miharateng ko mananamay no niyah i Fangcalay Cudad a lalakaw, mihaen ko demak wa ngaˈay padama kitaanan palahad to makapahay capeling no Krisciyang, ho ngaˈay kita ‘ira ko olah no salikaka, tano damsayay masasicada.’—Loma 12:10. w22.11 12-13 fiedac 16-18 fatac

Ano pakasoˈlinay kita to misododanto ni Yihofa kita, wa milifok to ‘rihadayay a tatokian,’ tatodong i wa rihadayto ko falocoˈ ita, awa ko dangoc no makapahay falocoˈ. O mahaenay a nafalocoˈan edengan ci Yihofa ko pafeliay kitaanan. (Dmak 3:19) Ano misododanto ni Yihofa kita i, wa malecad to isalakatay ko kalangaˈay no mita, malecad to na cowaho ka raraw kita. Ano misododanto ni Yihofa kita, caayto ko papakayni i kararaw ita a mapoˈi a miroroh anca misayfang kitaanan. (Isaya 43:25) Sowal no Fangcalay Cudad: ‘Ano hakowaay ko kararaay no kawali ato kaetip i, hatiraay ko pipaliyas Ningra to raraw ita i titaanan.’ (ˈOlic 103:12) Maharateng ita to masongilaˈay ko pisodod ni Yihofa to tamdaw, i falocoˈ wa matomes ko miakoˈiday ato mikangodoay a harateng. (ˈOlic 130:4) Ci Yihofa itini pisaˈosi to sasododen ko cecay tamdaw i, cowa pinengneng to raraw nonini a tamdaw to pakidemay hokira. Malo Misangaˈay a Tatapangan ita, Patirengay to Rikec ato Misawkitay, ci Yihofa iraay ko masahciay a sifanaˈ, misaka dademakan Ningra konini a sifanaˈ misaˈosi to sasododen ko cecay a tamdaw hokira. w22.06 5 fiedac 12-14 fatac

Pafelian ni Yihofa ko polong maolahay Cingranan a tamdaw to makapahay hatokel. Kalikito, papalahdawen Ningra ko adada, roray ato patay. (Paˈarawan 21:3, 4) Pafelien Ningra ko halamhamay a mitiˈer Cingranan a tamdaw tonini a sera, hanaca padama tonini ‘misamimingay ko falocoˈ a tamdaw’ palo lakoing toniya cikiw. (ˈOlic 37:9-11) Ngaˈay kita anini miingid ci Yihofaan, pairaayto lipahak ita, kawra noikor papatongalen ni Yihofa ko kangaˈay no kalalaˈed ita Cingranan. Tada o makapahay a hatokel konini! Kawra hano ngaˈay pakasoˈlin kita o papalaˈosien no Kawas konini a sakiˈok Ningra hani? Samanen cowa pisamangah ci Yihofa. Iraay ko lalangian ita ‘halamham a mitiˈer ci Yihofaan.’ (ˈOlic 27:14) Pairaen ita ko lipahakay, mihadidi a mitala mamisahci ko Kawas a palaˈosi to araaw Ningra, mihaen o halamhamayto mitiˈer Cingranan. (Isaya 55:10, 11) Nanay padadotoc kita madimadi ci Yihofaan, pakasoˈlin Cingranan to ‘papalifon to mikifalocoˈay a micangacang Cingranan a tamdaw.’ w22.06 20 fiedac 1 fatac; 25 fiedac 18 fatac

O Kawas o Tawki no lomaˈ ita, pakasoˈlinay kita o papatireng Cingra to taˈarawan, mitoor to safalod no saka 1 Timoti 5:8 a midimokos kitanan. Ano pakasoˈlin kita to maolahay ci Yihofa kitaanan maolahayho to paro no lomaˈ no mita, wa rihadayto ko falocoˈ, pakasoˈlin to papafeli Cingra to misaalian ita. (Matay 6:31-33) Matomesay ko olah ni Yihofa, o hinapaladaˈay a Kawas, makalimay Cingra midimokos kitaanan. Misangaˈ Cingra to cikiw i, cowa ko pipafeli aca to sakaˈorip no tamdaw, ngaˈay kita maˈorip. Iraayho ko olah Ningra, misangaˈ to kasapaan a maamaan, ngaˈay kita kadofah a marenec ko kaˈorip. (Satapangan 2:9) Latekay soˈlin pasangaray ko kaˈorip ita, o mamisinanot to cecay a demak, o ngangaˈayho kita padadotoc maˈorip. Cowa pisamangah ci Yihofa, soˈlinay a midimokos kitaanan. (Matay 6:11) Haharatengen ita, o matomesay ko olah a Kawas papafeli kitanan to kadofahay a sapalemed anini ato noikor. Palalinien tonini sapalemed, o kihcod a kinafalahan ita itini nodafongan cowato ka samaan.—Isaya 65:21, 22. w22.06 15 fiedac 7-8 fatac

Cowa ko faelohay aca minanam to Fangcalay Cudad a tamdaw ko papatongal to kafanaˈ ci Yihofaan ato Fangcalay Cudad, kita polong a tamdaw mamihaen to demak. Sowal no tarokos ci Pawlo, sakadademaken ita ko mananamay a sifanaˈ, wa ngaˈay ‘pafafidaˈ to ngaˈayay ato tatiihay.’ Itini tonini pasangaray a lintad, o waywayan ato pinangan mikikakaay ko tatiih to salakatay a lintad, mihaenay sapidofdofaw to ˈakawangay palinian ni Yihofa cowa ko madoloay, kawra mikiˈokay ci Yis o ngangaˈay kita mikitini ˈaredetay ‘kakaenen’ padotoc milifok to ˈicel. Onini a ‘kakaenen’ sahtoay mikitiniay i Kimad no Kawas Fangcalay Cudad a sadaken. Malecad kita ci Yisan mikangodo to ngangan no Kawas. (Yohani 17:6, 26) Tinakoen itini 1931 miheca, misalalangiay kita to Fangcalay Cudad misaka dademak to “Misawacayay Tamdaw ni Yihofa” a ngangan. Paihkalay konini to misaaretengay kita to ngangan no Kawas, hanaca ciharateng pakafanaˈ to tao ilaenoay no ngangan no Kawas a finawlan kita. (Isaya 43:10-12) Roma i, itini telang a cudad iraay ko ngangan no Kawas a kitiraan i, mieminan no Faelohay Hekal Mihongyakan Fangcalay Cudad a mihongyak. w22.07 11 fiedac 11-12 fatac

O soˈlinay kimad no Fangcalay Cudad mahawpay ko ngaˈayay lihaf no Hongti Kitakit no Kawas. Patinakoan ni Yis ko pakayniay Hongti Kitakit a soˈlinay kimad to mahimeday a odoˈ. Itini Matay 13:44, sanay ci Yis: ‘O kakarayan a Hongti Kitakit malecaday o mahimeday i omah a odoˈ, mahelaay no tamdaw, mihimedan ningra. Tada mahemekay cingra, pacakayan ko polong a dafong, micakay toya omah.’ Sinanoten, onini a tamdaw cowa ka padeteng a mikilim to odoˈ, kawra tiya mahela ningra, hai sanay mihadak to sapiˈaca milifok tonini a odoˈ. Soˈlinay i, pacakayan ningra ko polong a dafong no niyah. Misamaanay hani? Samanen mafanaˈay cingra tada matekesay konini a odoˈ. Midoko kita ci Yihofaan, aniniho lipahakayto, noikor wa ngaˈayho itini pikowan no Hongti Kitakit no Kawas tahadaˈoc a maˈorip. Palalinien, o mihadakan no hekal sapafeli kitaanan a kihcod awaay ko kapo. Roma i, ngaˈayho kita malo ngaˈayay a widang ni Yihofa, pakayni tonini a kalimlaan a sapalemed, ano o mananto ko fafalahen ita iraay ko epoc. Ngaˈay i “kihcod a demakan pakahemek Cingranan” o kalipahakan ita a demak konini.—Kolosay 1:10. w22.08 15 fiedac 8-9 fatac; 17 fiedac 12 fatac

O saˈosi no Rikec ni Mosi to tamdaw ‘aka maˈaˈodang,’ kawra oniya Rikec itiniay tahacada ci Yosif to sakayhid ikor no 200 miheca ngaˈ malasilay. (Kasadakan 20:14) Mihaenay, hano mafanaˈ ci Yosif to tatiihay ko maˈaˈodangay a demak sanay ko pinengneng no Kawas hani? Tada cipinangay ci Yosif ci Yihofaan, mansa mafanaˈ to pinengneng no Kawas to maˈaˈodangay a demak. Tinakoen, maedeng mafanaˈay ci Yosif to pipatireng ni Yihofa to raramod i salakat o cecayay ko faˈinayan ato cecayay ko fafahiyan. Mafanaˈayho cingra, na kinatosaay ci Yihofa midipot to fofo ningra ci Saraan, eca ka maˈodang no roma faˈinayan cingra. (Satapangan 2:24; 12:14-20; 20:2-7) Misimsim ci Yosif toniya demak, mahapinangay itini pinengneng ni Yihofa o manan ko matatodongay, o manan ko mararaway. Samanen maolahay cingra ci Yihofaan, maolahayho to moecelay palinian ni Yihofa, mansa misetek to falocoˈ mitoor toniya palinian a maˈorip. w22.08 26 fiedac 1-2 fatac

Cato ka lecad to salakatay kacipinang ita, pinengneng ita tonini a paˈayawan no sinael a patikolay maˈorip cowa ko sapatinako, mitoroˈan i, cowa ko piliyaw a tomireng ko finawlan no Kawas i salikoray romiˈad, ao itiniay faelohay hekal papatikol maˈorip ko mapatayay tamdaw. Hano mihaen ko sowal hani? ‘Sera’ oniya sowal masadakay i Yopu 17:16, hanaca itini toniya sinael a ‘sera,’ malecaday to ‘Tadem’ ko tatodong. Paihkalay konini o mitoroˈan no Taniil 12:2 i papatikol maˈorip ko mapatayay tamdaw i fafekang no sera, onini a demak wa itini kahererekan no salikoray romiˈad, itini ikor no Armakiton a mifekad. Sowal no Taniil 12:2 o roma patikolay maˈorip a tamdaw ‘mamilifok to midaˈocay ˈorip,’ o maanan ko tatodong hani? O patikolay maˈorip a tamdaw itini Pikowan to Comaˈol Miheca padadotoc mitongal to kafanaˈ ci Yihofaan aci Yisan hanaca midofdof Cangranan, o mamilifok to tahadaˈocay a ˈorip.—Yohani 17:3 ato roma pihongyak. w22.09 21-22 fiedac 6-7 fatac

Sakoniya sowal makalimay ci Yihofa patelas sa kita pakasoˈlin to tao cowa ka saan, ao makalimay Cingra kitaanan ano mahapinang to ngaˈayay a pakasoˈlinen ko tao, o ngangaˈayto pakasoˈlin cangranan. O pakasoˈlinay misaaliay to toki ngaˈ ngaˈay mapatireng. Sasamaan ko pidemak iso hani? Songilaˈen ko kafanaˈ to salikaka, itini ˈayaw ato ikor no saˈopo masasowal cangranan, ngaˈayay malacafay cangranan mitosil. Pairaen ko mihadidiay cangranan, mihaen ngaˈ ira ko toki ita mihapinang to ngaˈayay pakasoˈlinen cangra. Tiya satapang mafanaˈ kiso to cecay tamdaw i, iraay ko pina a demak cowa ka kahi kiso pasowal tora tamdaw, kawra palidlid sa ngaˈay ko kalalaˈed namo, wa madoloto kiso pasayra cingranan mifohat to nafalocoˈan alatek. (Luka 16:10) Kawra o cecay salikaka ano sakahmaw sa to pakasoˈlin iso, sasamaanto hani? Aka ranikay misawad tonini a kalawidang, alatek mataˈlif ko cecay liyad a tatokian, wa ngaˈayto kiso miliyaw patireng to pakasoˈlin cingranan. O roma tamdaw patoleday tisowanan alatek, kawra aka pakayni tonini eca to pakasoˈlin to polong a salikaka. w22.09 4 fiedac 7-8 fatac

Ci Mikayase o malohemay malitengay, harateng ningra iraay ko papina malohemay malitengay na tangongolay ko pidokaˈ cingranan. Kawra, padotocay talipaˈelal ci Mikayase, misaˈicel miˈimer to masofaway harateng no niyah. Miceriday cingra mitolon ci Yihofaan pafeli to fangcalay saocor cingranan, padama cingranan padotoc mihadidi. Mikitiniayho cingra i mitepangan no likakawa a cudad mikilim to padamaay cingranan a lalakaw. Mananamay ita ko maanan hani? Ano madokaˈay no salikaka ko niyah saan kiso miharateng, ka padadotoc rihaday, misaˈicel miˈimer to masofaway harateng. Cowa ka cipinang kiso alatek, o maanan ko mikidatay to midokaˈay tisowanan a tamdaw midemak to mahaenay a demak, anca mihadak to mahaenay a sowal. Mihaenay, tolonen ci Yihofa, micangacang Cingranan padama tisowanan tano pinengneng nora tamdaw a minengneng tonini a demak. O pakasoˈlin kiso cowa ko padetengay kora tamdaw midokaˈ tisowanan, o mamadoloto misodod to tao. (Taneng 19:11) Haratengen, cipinangay ci Yihofa to pakayraan iso, o papafeli to ˈicel tisowanan, ho ngaˈay tawlik ko pisiˈayaw iso to mahaenay pakayraan.—Patnakay 5:8. w22.11 21 fiedac 5 fatac

Piliˈen ko maolahay ci Yihofaan a tamdaw malo widang iso. O mipiliˈan iso a widang itini kalomahad iso i pihakelongan taˈangayay ko pifiyor. (Taneng 13:20) Ci Colien o malohemay malitengay nohatini, sanay cingra: “Kaemangho i, mirienang to mitosilay adihayay ko kafanaˈan ako ngaˈayay a widang. Fanekfekay konini a widang, padamaayho takowanan mihapinang to kalipahakan a demak ko mitosilay. . . . Mahapinangay ako itiya, isalakat o kalecadan no mihecaan ko micawmaˈan ako, telocto malawaay ko romaroma ngaˈayay a widang.” Ano mahapinang iso micawmaˈ to cimaanan i kasakopang mamipalak to kalalaˈed iso ci Yihofaan i, sasamaanto hani? Mafanaˈay ko tarokos ci Pawlo to itiyaay a kasakopang, o waywayan no romaroma tamdaw cowa ka lecad tono Krisciyang, mansa patalipaˈelalay ci Timotian miliyas to mahaenay a tamdaw. (2 Timoti 2:20-22) Tada kalimlaan ko kalalaˈed ita ci Yihofaan, sakalawidangaw ci Yihofaan, adihayayto ko misadakan ita a ˈicel, mihaenay cowa ko mamihayi kita papipalaken ko cima tamdaw tonini kalimlaan a kalawidang. w22.08 5-6 fiedac 13-15 fatac

Caay ka lecad to ˈintehay to sapatalipaˈelal no Kawas a tamdaw, maolahay kita to taneng ni Yihofa ato palinian no waywayan Ningra. Sapadadotocaw palahad to mahaenay a waywayan, palalinien ko midofdofay ato cowa pidofdof pairaay to maanan masasiromaay a teloc. Haratengen eca pidofdof ko mafolaay tamdaw to sapatalipaˈelal no Kawas, telocto pairaay to masamaanay pasangaray no niyah. Dotoc haratengen midofdof kiso to Kawas, tada lipahakay ko minaroˈan. (ˈOlic 32:8, 10) Pairaan ni Yihofa ko toki no polong a tamdaw milifok to soˈliˈlinay a taneng, kawra cowa ka pacieci Cingra to kahacecay tamdaw micada to taneng Ningra. Kawra ihkalay Cingra mitadtad, manaˈayay to taneng a tamdaw wa ira ko maanan a teloc. (Taneng 1:29-32) Wa ‘pakayni i demak no niyah micada to tatiihay a teloc’ cangra. O pakayraan nangra maˈorip o papaira to roray ato cariraw nangra, salikor tatahadaˈoc malaˈafo. Roma i, oya mipiliˈay midofdof ci Yihofaan a tamdaw, mikiˈokay ci Yihofa: ‘Midofdofay Takowanan a tamdaw wa dipayal ko kaˈorip, milifok to rihaday, caay ka talaw to pades.’—Taneng 1:33. w22.10 21 fiedac 11-13 fatac

Tatodong no mangodoay ci Yihofaan i, tada mikangodoay kita Cingranan, caay ka ciharateng midemak to kapiliˈan Ningra a demak. (Taneng 16:6) Mihaenay, papadadotoc kita misaˈicel, mitoor to patirengan ni Yihofa i Fangcalay Cudad a ngaˈayay tatiihay a palinian a maˈorip. (2 Korinto 7:1) Ano midemak kita to kaolahan ni Yihofa a demak, misawad to kapiliˈan Ningra a demak, o lalipahak. (ˈOlic 37:27; 97:10; Loma 12:9) Cecay tamdaw mafanaˈay to iraay ko fadangalan ni Yihofa patireng to ngaˈayay tatiihay palinian alatek, kawra cangoˈotayho konini, o mamitoor cingra tonini a palinian midemak. (Loma 12:2) Wa tano waywayan kita paihkal to soˈlinay pakasoˈlin ko niyah, midofdof to palinian ni Yihofa o sangaˈayay a pakayraan maˈorip. (Taneng 12:28) Iraay ko mahaenay a harateng ni Tafiti, sanay ko sowal ningra ci Yihofaan: ‘Pasifanaˈen Iso kako to sakaˈorip a lalan. Itini kaˈayaw Iso, iraay ko kadofahay a lipahak; itini kawanan Iso, iraay ko midaˈocay a sakaraheker.’—ˈOlic 16:11. w22.10 8 fiedac 9-10 fatac

Tada misapoeneray ko falocoˈ ni Yis, padadotocay matatodong ko pinengneng to niyah. ˈAyaw no tayni i hekal, misarocoday cingra to falocoˈ ato ˈicel matayal saki Yihofaan, adihayay ko midemakan kasapaan a demak. Tinakoen, o maamaan i paro no kakarayan ‘sahtoay pakayniay cingranan a sangaˈen.’ (Kolosay 1:16) Ikor no micada to paputisem cingra, maharatengay ko na midemakan a kihcod i tatihi no kakarayan a Wama. (Matay 3:16; Yohani 17:5) Kawra cowa ka pakayni tonini a malitaˈang cingra. Na cowa ka pisaˈakawang cingra to niyah, misakahmaw to tao. Pasowalan ningra ko nisawawaan, tayni cingra i fafekang no sera ‘cowa ko mamatayal ko tamdaw saki cingranan, ao mamatayal saki tamdaw, hanaca patafang to ˈorip malo sapilidong to ˈalomanay tamdaw a sapatefoc.’ (Matay 20:28) Misamimingay ko falocoˈ ningra a pasowal, ano o mananto ko demak cowa pitoor to harateng no niyah a midemak. Tada misapoeneray ko falocoˈ ni Yis, tada o ngaˈayay a taˈarawan ita! w22.05 24 fiedac 13 fatac

Ano misaˈosi ci Yihofa to sasododen ko cecay mararaway a tamdaw, wa misimsim to o padetengay a mararaw hokira, itini Luka 12:47, 48 ihkalay ko sowal ni Yis, o cecay tamdaw ano mafanaˈayto cecay tatiihay a demak, cowa ko mihaydaan no Kawas a demak, kamayan mihalaka a midemak, o pakidemayto ko raraw ningra. O mahaenay a tamdaw cowa ko mamilifok to sasodod no Kawas alatek. (Marko 3:29; Yohani 9:41) Kawra, wa iraho ko hatokel ita milifok to sasodod no Kawas han? Iraay! Wa miharateng ci Yihofa to mikifalocoˈay pasasiyor konini a mararaway tamdaw hokira. Tatodong no pasasiyoray i, mifalicay to harateng, waywayan anca o mihalakaan, ngaˈayay mitoroˈ to cecay tamdaw pakayni kararaw no demak anca cowa pidemak to dademaken, makesem ato adada ko falocoˈ. Masomad ko harateng ningra, cowa ko pakayniay aca i raraw no niyah, maharateng ningra to cowa pitafo ko niyah to ngaˈayay kalalaˈed ci Yihofaan hato mararaway ko demak, onini tada pakasomaday Cingranan. w22.06 5-6 fiedac 15-17 fatac

O ˈada ita wa pakayni i sinfon ato sapicawmaˈ malawidang a wangcan milasil to cowa ko soˈlinay a lihaf, midokaˈ to ciˈinorongay faˈinayan salikaka i likakawa no Kawas. (ˈOlic 31:13) O roma faˈinayan salikaka malepelay ato mapakokot. Saka 1 hahekalan iraay ko malecaday pakayraan, tiya mapaoraf ato malepel ko tarokos ci Pawlo i, o romaroma Krisciyang miliyasay cingranan. (2 Timoti 1:8, 15; 2:8, 9) Haratengen hakowaay ko kasomad ni Pawlo itiya. Na pakayniay cingra tonini a Krisciyang mihadidi to adihayay a pasangaray, hanaca makahi a kinafalah to ˈorip no niyah, ˈarawhan itini pisaalian ni Pawlo to sapadama a tatokian i mifalahay cangra i cingranan. (Dmak 20:18-21; 2 Korinto 1:8) Aka a malecad kita cangranan! Ano tahacada to sapalak ko ciˈinorongay faˈinayan salikaka i, cowa ko fafahkaˈen kita. Misaka dademakay ci Satan to mahaenay a saˈodis patalaw kitaanan, ho ecato ka madimadi kita ci Yihofaan. (1 Pitiro 5:8) Padadotoc midama to salikaka, aka piliyas cangranan.—2 Timoti 1:16-18. w22.11 16-17 fiedac 8-11 fatac

ˈAyaw no mapatay ci Yis, oniya pasasiyoray a ciraraway o Yutaya tamdaw alatek. O Yutaya tamdaw o Kawas aca ko midokoan, kawra adihayay ko midokoan no ˈalafang tamdaw a kawakawas. (Kasadakan 20:2, 3; 1 Korinto 8:5, 6) Oniya ciraraway ano o ˈalafang tamdaw, wa saan ko sowal alatek: ‘Cowa ka talatalaw kiso to kawakawas han?’ Roma i, miocoran ci Yis tayni fafekang no sera, mamitosil to ‘moraraway a siri finawlan no Israil,’ ao cowa ko ˈalafang tamdaw. (Matay 15:24) Roma i, na patahkalan no Kawas ko Israil tamdaw, noikor papatikolen Ningra paˈorip ko mapatayay tamdaw. Onini pasasiyoray a ciraraway mafanaˈay tonini alatek, mikitini i sowal ningra mahapinangay ita, pakasoˈlinay cingra papatikolen ni Yihofa paˈorip ci Yis hanaca itini Hongti Kitakit no Kawas a mikowan. Mahapinangay, makalimay konini a tamdaw patikolen no Kawas paˈorip cingra. Onini pasasiyoray a ciraraway, ano o Yutaya tamdaw, o mamafanaˈ ci Ataman aci Ifaan, mafanaˈho to pakamaroˈan ni Yihofa cangra i Lakoing a mikilomaˈ. Mihaenay, tiya somowal ci Yis to Lakoing i, maedeng cipinangay cingra o itiniay fafekang no sera a Lakoing ko misowalan ni Yis.—Satapangan 2:15. w22.12 8-9 fiedac 2-3 fatac

Edengan mitiˈer kita to sadama no fangcalay saocor no Kawas, ngaˈ ngaˈay malahci ko mitosilay a tayal. Misamaanay hani? Samanen mamilood ci Satan kitaanan, sapicongedaw kitaanan mitosil. (Paˈarawan 12:17) Mikitini pinengneng no tamdaw, cowa ko papakafilo kita ci Satanan. Kawra padadotoc kita misawacay ci Yihofaan, o papakalowid ci Satanan! (Paˈarawan 12:9-11) Hano mahaen ko sowal hani? Mirienang kita to mitosilay a tayal o paihkalay cowa ka mapadik no sapatalaw ni Satan ko niyah. O kahacecay a pitosil ita, o mipadikay ci Satanan. Misawacayay konini, iraay ko fangcalay saocor midama kitaanan, milifokayho to pihayda ni Yihofa. (Matay 5:10-12; 1 Pitiro 4:14) Ano tahalifato to maanan pasangaray, o fangcalay saocor no Kawas o papadama kitaanan miremo. (2 Korinto 4:7-9) Samaan ko pidemak ita, o ngangaˈay padadotoc milifok to fangcalay saocor hani? O kodait a padadotoc kita a mitolon, hanaca pakasoˈlin to papacaˈofen ni Yihofa kita. w22.11 5 fiedac 10-11 fatac

Misaˈicel kita dipayal a malacafay to salikaka, paihkal to maolahay kita cangranan. Saˈicelen ita mitodong ci Yihofa, mikifalocoˈ misodod to tao. Pakayni sapisododaw to raraw ita, ci Yihofa hayi sanay kinafalah to kaolahan a Wawa. Mihaenay i, ano ira ko pakararaway kitaanan a salikaka, o mamikifalocoˈ kita misodod cangranan. Ci Yis itini sapatinako masowalay ko cecay mariˈangay a koli, soˈlin palasawaden no tawki ko adihayay a tadah ningra, kawra cowa ka kahi cingra palasawad to mimingay a tadah no roma a koli. Caay ka ciharateng kita malecad cingranan. (Matay 18:23-35) Ano iraay ko lacongis iso to cimaanan a salikaka i, ˈayaw no mirienang to Piharatengan a Saˈopo, wa ngaˈay kiso talaˈayaw malaliˈay cingranan han? (Matay 5:23, 24) Ano mihaen ko demak iso, paihkalay to tangongolay ko olah iso ci Yihofaan aci Yisan. w23.01 29 fiedac 8-9 fatac

Sasamaan mafanaˈ to o manan ko saali no salikaka hani? Cecay pakayraan sakadademaken ko salicay mikayat cangranan pasowal to soˈlinay a harateng. (Taneng 20:5) Maedengay ko kakaenen nangra, o sapaiyo ato roma saali han? Wa awato ko katayalan nangra, anca awato ko sapateli to saesoy no lomaˈ han? Misaaliay cangra to papadamaen misingsi i sifo to sadama han? Misaaliay ci Yihofa kitaanan polong a tamdaw masasipakalalok, madadama. (Kalatiya 6:10) Soˈlin mimingay a demak, wa ngaˈay pakalalok to adadaay a tamdaw. Tinakoen, o wawa ngaˈayay misangaˈ to kato anca mikonis to coka pafeli to faˈinayan salikaka pakalalok cingranan, o kapah a tamdaw ngaˈayay padama to cecay fafahiyan salikaka micakay to dafong, o roma tamdaw ngaˈayayho patado to adadaay tamdaw mitangtang to kakaenen. Roma i, malohemay malitengay itini kalifongan a tatokian mikikaka to isalakat ko kaˈifowa, mansa o roma salikaka mikiriwiˈay mitilid to kato pasayra cangranan patalahkal to miakoˈiday. Kita kahacecay tamdaw makamihadak to ˈicel ‘padadotoc masasihinom, masasipakalalok,’ tada makapahay mihaen to demak!—1 Tisalonika 5:11. w22.12 22 fiedac 2 fatac; 23 fiedac 5, 6 fatac

O Satukay tamdaw tada mafanaˈay to saˈayaway lima maloloday cudad no Hipray Sowal Fangcalay Cudad, kawra misakahmawan nangra ko masakalimlaan a kimad. Tinakoen, marariday ko Satukay tamdaw tano patikolay maˈorip ko mapatayay a demak macacoli ci Yisan, samaanay ko pipacaˈof ni Yis cangranan. Licay hananay ni Yis cangra: ‘Pakayni to papatikol maˈorip ko mapatayay, itini i Rikec ni Mosi, o maˈoningay a sowal i matodohay a cicekaay a semot, hananay no Kawas ci Mosi, “o Kawas ni Apraham Kako, o Kawas ni Isak, o Kawas ni Yakop,” caho ka maˈosi namo saw?’ (Marko 12:18, 26) O Satukay tamdaw maedeng kinapinaayto miˈosi tonini a maˈoningay, nikawrira ora licay ni Yis paihkalay, misakahmawan nangra ko masakalimlaan a kimad no Fangcalay Cudad, to papatikol maˈorip ko mapatayay a tamdaw. (Luka 20:38) Mamananam ita ko maanan hani? Miˈosi to Fangcalay Cudad i, sinanoten ita kora sinael ato cecay maˈoningay i Fangcalay Cudad a kimad. Hamaan o kacipinang aca to pina kantangay a kimad, ao calepenho a misimsim, cipinang to tangongolay a kimad no sinael ato safalod. w23.02 11 fiedac 9-10 fatac

Masowalay no aniniay a sinael a misawacayay tamdaw na tahasiˈayaway to pasangaray katalawan a demak, kawra padadotocay cangra madimadi to Kawas ci Yihofaan. (Hipray 11:36-40) O pihadidi nangra ato karoray sahtoay awaay ko epoc han? Cowa ka hatira. Itiniho cangra toniya hekal i, soˈlin cowa pakaˈaraw to kalaˈosi no sakiˈok no Kawas, kawra kamayanho padotoc halamham a mitiˈer ci Yihofaan. Pakasoˈlinay cangra malifokayto no niyah ko pihayda no Kawas, mansa pakasoˈlin to papakaˈaraw ko niyah to mamalaˈosi maemin ko sakiˈok no Kawas. (Hipray 11:4, 5) O taˈarawan nangra o papaˈicel to pisetek ita to falocoˈ, pakalalok kitaanan padadotoc halamham a mitiˈer ci Yihofaan. Anini, o pakayraan no hekal mangalefay ko tatiih. (2 Timoti 3:13) Padotocay ci Satan paira to pasangaray no finawlan no Kawas. Ano o maananto ko masiˈayaway ita a pasangaray, o mamisetek kita to falocoˈ padadotoc misaˈicel matayal saki Yihofaan, pakasoˈlin o halamhaman ita i, ‘o soˈlinay materek a Kawas.’—1 Timoti 4:10. w22.06 25 fiedac 17-18 fatac

Misaˈicel kita padotoc patanektek to tireng, o cecay kalimlaan a lalangian i, mihaen ngaˈ ngaˈay kita misarocod midoko ci Yihofaan. (Marko 12:30) Mihaenay, ano mafanaˈ kita to cecay demak mamipalak to tireng no niyah, cowato ko mamidemak. (Loma 12:1) Manaokaniw, ano samaanto ko pisaˈicel ita, awaay ko pinang to cowato ko aadada tahadaˈoc. Kawra mamisaˈicel kita, samanen mangalayay kita pasayra i kakarayan Wama paihkal to tada misalimlaay kita to sapafeli Ningra a kalimlaan a ˈorip. Ano adada kita, anca matoˈasayto, caayto ka lecad to isaˈayaway adihay ko midemakan alatek. Telocto, matoleday anca masomaday ko falocoˈ ita alatek. Kawra aka pisawad a midimokos to tireng no niyah. Misamaanay hani? Samanen ano hakowato ko mihecaan ita, hakowaay ko pakidem no adada, wa ngaˈay kita malecad ci Tafitian padadotoc pakahemek ci Yihofaan. Soˈlin matoˈasayto malonayayto ko tireng ita, ci Yihofa kamayan misalimla kitaanan. Mafanaˈ tonini, tada mitemeray to falocoˈ ita! (Matay 10:29-31) Soˈlinto mapatay kita, makalimay Cingra patikol paˈorip kitaanan. (Yopu 14:14, 15) Mihaenay i, o mamisaˈicel kita midimokos to tireng no niyah, midipot to ˈorip. w23.02 20-21 fiedac 3-5 fatac

Ilalomaˈay no roma lopayˈay siri a taˈangayay ˈopo a tamdaw ikor no milakowit to Armakiton, papadadotoc materek ko ngangan nangra i sakaˈorip a cudad han? Hai. (Paˈarawan 7:14) Sowal ni Yis, sano lopayˈay siri a tamdaw wa ‘milifok to midaˈocay a ˈorip.’ (Matay 25:46) Kawra o milakowitay to taˈangayay padiing a tamdaw cowa ko tatangsol milifok tonini a sapalemed. Itini Pikowan to Comaˈol Miheca, ci Yis ‘papakaen cangranan, mikerid cangranan tayra i pipowaran no sakaˈorip a nanom.’ Ano midofdof cangra to sakayat ni Yis, hanaca salikor misaˈosian ni Yihofa to madimadiay a tamdaw, tatahadaˈoc materek ko ngangan nangra i sakaˈorip a cudad. (Paˈarawan 7:16, 17) Kawra, sano lotokay a siri a tamdaw, itini Armakiton a lalood wa masongilaˈ cangra mapalaˈafo. Sowal ni Yis onini ˈopo a tamdaw wa ‘tahadaˈoc a malaˈafo.’ (Matay 25:46) Itini sakayat no fangcalay saocor, sanay ko sowal ni Pawlo: ‘Onini a tamdaw mamicada to sasawkit, tahadaˈoc malaˈafo.’—2 Tisalonika 1:9; 2 Pitiro 2:9. w22.09 16 fiedac 7-8 fatac

Mapolong ko paro no lomaˈ miingid to serayan o ngaˈayay a pisalama, mamatongal ko ngaˈayay kalalaˈed no paro no lomaˈ. Itini i cikiw adihayay ko nisangaˈan ni Yihofa sano cokaay makapah a pala, itini makapahay a kitiraan, ngaˈayay haratengay saan kita midemak to ciepocay to tireng a demak. ˈAlomanay paro no lomaˈ maolahay cangra malacafay tayra i inaka, lotolotokan, lawac no riyar a misalama. Itini faelohay a hekal, wama wina ato wawa, ngangaˈay sao haratengay saan masaloen to nisangaˈan ni Yihofa a kihcod. Itiyato i, cowato ko mamatalaw kita to pinaˈorip, cowa ko mamatalaw ko pinaˈorip kitaanan. (Isaya 11:6-9) Awaay ko tolas no toki ita masaloen to nisangaˈan ni Yihofa a makapahay a maamaan. (ˈOlic 22:26) Kawra wama wina, aka tahirato ngaˈ, padama to wawa minanam a masaloen to tadamaanay a demak ni Yihofa, nohatiniho misatapang! Kamo ano tano nisangaˈan a maamaan pasifanaˈ to wawa mafanaˈ ci Yihofaan i, mamatirato ko wawa to Hongti ci Tafitian pakahemek ci Yihofaan: ‘Yihofaaw, awaay ko pakafiloay to nika tadamaan Iso.’—ˈOlic 86:8. w23.03 25 fiedac 16-17 fatac