Saka 12 Folad

Cecay tapang no Iciyopiya sapicadaaw to paputisem, kawra maharekayto cingra misaday han? Onini tapang no Iciyopiya ‘na tayraay i Yirusalim midoko to Kawas.’ (Dmak 8:27) Mihaenay haw i, maedeng o mihakelongay to Yutayakiyo cingra. Mikitini i Hipray Sowal Fangcalay Cudad mafanaˈay cingra to pinapina pakayniay ci Yihofaan a demak, nikawrira sakacipinangawho cingra to adihayay. Tiya malitemoh ni Filip i lalan cingra i, maˈaraway to misarocoday cingra micekiw to maloloday cudad no pairasolay a Isaya. (Dmak 8:28) Sapadadotocaw cingra mitongal to kacipinang to Fangcalay Cudad, mikitini cingra i Iciyopiya malingad tayra i Yirusalim, pakayniay sapidokoaw ci Yihofaan i fangcalay sefi. Oya tapang no Iciyopiya mikitiraay ci Filipan minanam to pina faelohay masakalimlaan a soˈlinay kimad, mahawpay ‘ci Misiya ci Yis’ sanay a soˈlinay kimad. (Dmak 8:34, 35) Matongalayto ko olah ningra ci Yihofaan aci Yisan, saka misetek to falocoˈ mifalic to nokaˈorip, micada to paputisem malo Krisciyang. Mahapinangay ni Filip to maherekayto cingra misaday, hato patadoay cingranan mipaputisem. w23.03 8-9 fiedac 3-6 fatac

Ano misamangah kita, cowa ko papakahemek ci Yihofaan. (Taneng 6:16, 17) Soˈlin o matatodongay ko misamangahay saan ko harateng no ˈalomanay tamdaw, kawra cowa ka ngaˈay kita misamangah, samanen o mararaway konini sanay ci Yihofa. (ˈOlic 15:1, 2) Manaokaniw cowa ka ngaˈay kita misamangah, kawra cowa ka ngaˈay kita padeteng a mihimed to soˈlinay a demak miorat to tao. Roma i, hamaan miyakayak to sanay sanay a sowal. (Taneng 25:23; 2 Tisalonika 3:11) Ano masasowal ko ˈalomanay i, mahapinang iso to misatapangay somowal to sanay sanay a sowal, tanamen a mifalic ko misowalan a demak, o tawlikay a demak ko sowalen. O kaˈoripan ita a hekal matomesay to masakenakenaay tatiihay a sowal. O mamisaˈicel kita ngaˈ eca ka lecad to ˈalomanay tamdaw, ngaˈay pakahemek ci Yihofaan. Itini kita pitosilan, saˈopo ato cerid kasasowal misaˈicel somowal to tawlikay a sowal, o papalemeden Ningra kita. Ikor no malaˈafo konini ciraraway a hekal, wa madoloto kita tano sasowalen a pakahemek ci Yihofaan.—Yuta 15. w22.04 9 fiedac 18-20 fatac

Haratengen hakowaay ko nika olah ni Yihofa aci Yis tisowanan, maedeng mamasemer ko falocoˈ iso, sapatikoaw to olah Nangra. (1 Yohani 4:10) Ano mahapinang iso ko pikinafalah ni Yis to ˈorip saki tisowanan i, mamangalef ko kaolah Cangranan. Mahaenay ko falocoˈ no tarokos ci Pawlo, itini Kalatiya cudad matomesay ko piakoˈid ningra, sowal sa: ‘Wawa no Kawas . . . maolahay takowanan, kinafalah to ˈorip no niyah saki takowanan.’ (Kalatiya 2:20) Tona iraay ko sapatefoc, misolotan ni Yihofa kiso tayra i raringid Ningra, mala widang Ningra. (Yohani 6:44) Minengnengay ci Yihofa to kangaˈayan iso, pasadak to matekesay a sapiˈaca to sakangaˈay iso mala widang Ningra, mafanaˈ toninian i, coko dihkoay ko falocoˈ iso saw? Onini coko mitongalay to kaolah iso ci Yihofaan aci Yisan han? Licayen ita ko niyah: “O mahaenay a noka olah micoracoray takowanan misamaan ko pidemak hani?” Ano maolah kita ci Yihofaan aci Yisan i, o mamaolah kita to tao.—2 Korinto 5:14, 15; 6:1, 2. w23.01 28 fiedac 6-7 fatac

O Kawas ci Yihofa tano Fangcalay Cudad, padama to finawlan Ningra ‘makakedec a midoko Cingranan.’ O pitilid to Fangcalay Cudad tada mikiriwiˈay, adihayay a sinael no Fangcalay Cudad, edengan o misapoeneray ko falocoˈ a tamdaw ko cipinangay. (Luka 10:21) Miasipay to Fangcalay Cudad ko paro no kakarayanay a tamdaw. Kawra, edengan o misapoeneray ko falocoˈ a tamdaw ngaˈ, soˈlinay a cipinang to Kimad no Kawas, hanaca midoedoay to mananamay a midemak. (2 Korinto 3:15, 16) Mahapinang ita o iraay ko taneng ni Yihofa ilalomaˈ no Fangcalay Cudad. Cowa ka tano Fangcalay Cudad aca pasifanaˈ ci Yihofa to polong finawlan Ningra, tano Fangcalay Cudad mikayat ato mihinom to kahacecay a tamdaw. Mankora, ano miˈosi kita to Fangcalay Cudad i, o mamatinako ko kaciharateng ni Yihofa kitaanan. (Isaya 30:21) Kinapinaay a mahapinang iso ko cecay sinael hato mikiriwiˈay pakayni tisowanan a tiliden han? Haratengen hena, o Fangcalay Cudad o sapaˈaraw to ˈalomanay tamdaw, kawra matatodongay to saali no miso, milingatay to nokaˈorip iso. Hano mahaen hani? Cecayay aca ko lalangian: Papitiliday to Fangcalay Cudad a Yihofa o tada citanengay a Kawas.—2 Timoti 3:16, 17. w23.02 4-5 fiedac 8-10 fatac

O soˈliˈlinay a Krisciyang kita, tangongolay ko olah ci Yihofaan, makalimay patafang to sangaˈayay no niyah Cingranan. Sapihaenaw kita to demak, mamipatireng to pina patosokan, tinakoen palahad to adihayay a ngaˈayay capeling no Krisciyang, minanam to ciepocay a inaneng, ato mikilim to adihayay a toki matayal saki tao. Hano papadotoc kita macakat hani? Salakat, makalimay kita pakahemek to ciolahay a Wama i kakarayan ci Yihofa. Maˈaraway Ningra ko pisaˈicel ita misaka dademak to inaneng no niyah matayal saki Cingranan, maedeng masemeray. Roma i, makalimayho kita adihay ko sapadama i salikaka. (1 Tisalonika 4:9, 10) Ano hakowato ko halafin ita micada to paputisem, wa ngaˈay padadotoc macakat. w22.04 22 fiedac 1-2 fatac

Cato ka halafin polong a mikowanay no hekal wa miˈodis to Taˈangayay Papilon, oya polong mararaway pihakelongan no hekal. O tahapinangan konini to misatapangay ko taˈangayay padiing. Itiya o mamisaˈosi ko ˈalomanay tamdaw misatapang midoko ci Yihofaan hokira? Cowa. Masafelitay, pasowalay ko Paˈarawan saka 6 fedengan kitaanan, tora kacalohan a tatokian, oya cowa pidoko ci Yihofaan a tamdaw papasayra i ‘taˈangayay lotok,’ o lekakawa no mirikecay ato misasingdiay micangacang to sadipot. Samanen cowa pipiliˈ cangra midama to Hongti Kitakit no Kawas, o misaˈadaay wa saan ko pinengneng ni Yihofa cangranan. (Luka 11:23; Paˈarawan 6:15-17) Itini taˈangayay padiing tonini pasangaray a tatokian, o madimadiay a finawlan ni Yihofa wa mahapinang ko kasasiroma to ˈalomanay. Toniya hekal edengan cangra ko cowa pidama to ‘ ˈaˈadopen,’ tanektekay midoko to Kawas ci Yihofaan.—Paˈarawan 13:14-17. w22.05 16-17 fiedac 8-9 fatac

O finawlan no Kawas cowa ko pilasil aca to ngaˈayay lihaf no Hongti Kitakit, o mamidamaho to coyoh midemak to roma a demak. (Matay 24:14) Masowalay no Paˈarawan i saka 8 tangasa 10 fedengan, milasilay ko coyoh oya manaˈayay to pikowan no Hongti Kitakit no Kawas a tamdaw wa tahacada to adihayay a pades. Mihaenay, padotocay ko Misawacayay Tamdaw ni Yihofa milasil to malecaday o ‘soeda ato namal’ a sasawkit a lihaf, mifanaˈ to tamdaw to mamicada to maanan a sasawkit konini a hekal ni Satan. (Paˈarawan 8:7, 13) Oha mamafanaˈ ko tamdaw, mangataayto malaˈafo konini a ciraraway a hekal, misaaliay cangra to sapifalicaw i nokaˈorip, mihaen ngaˈ madipot ko ˈorip i kangolawan ni Yihofa a romiˈad. (Cifaniya 2:2, 3) Kawra cowa ka olah ko ˈalomanay a tamdaw tonini a lihaf, mansa milasil tonini a lihaf kalimlaan ko timoloay. Noikor itini i taˈangayay a padiing a tatokian, o salikoray a lalasilen ita sapisawkit a lihaf mamangalef ko ka pakidem.—Paˈarawan 16:21. w22.05 7 fiedac 18-19 fatac

Haratengen hena, ano caciwawato ko mararamoday. Na tahatengilayto cangra to adihayay pakayniay palahad to wawa a kimad, kawra nohatini, o masowalay no kimad a safalod no Fangcalay Cudad pakayni cangranan matongalay ko kaciepoc, samanen o papalahadto cangra to wawa no niyah. Tada kalimlaan a ˈinorong konini! Soˈlin, ano mafalic ko pakayraan i, wa mikitini to kita i faelohay a pakayraan minengneng to kafanaˈan a safalod no Fangcalay Cudad. Mihaenay, o polong a midokoay to Kawas a tamdaw mamalecad to nolitengan a Hongti no Israil, ‘hakelong no ˈorip’ wa miasip ato midotim to sowal ni Yihofa. (Limoˈot 17:19) Malo wama winaay a Krisciyang, iraay ko tatodong namo midemak to cecay kalimlaan a demak, o papasifanaˈ to wawa mafanaˈ ci Yihofaan. Manaokaniw, o patosokan namo cowa ko pasifanaˈ aca to sifanaˈ no Kawas, papadamaho cangranan mikifalocoˈ maolah Cingranan. w22.05 26 fiedac 2-3 fatac

O kakesem aca to nano raraw no niyah cangoˈotayho, oha mamidemakho. Ano misaˈosi ci Yihofa to sasododen ko cecay mararaway tamdaw i, misimsim Cingra kalimlaan a lalangian o “patatikolay” ko mararaway tamdaw hokira, tatodong i, onini a tamdaw o mamifalic, ecato pidemak to tatiihay a demak, hanaca misatapang mitoor to pakayraan ni Yihofa a maˈorip. (Isaya 55:7) Onini a tamdaw o mamifalic to harateng no niyah, minanam to malecaday ni Yihofa a piharateng. (Loma 12:2; Ifiso 4:23) O mamisetek cingra to falocoˈ, ecato ka lecad to salakatay ko pisimsim ato pidemak. (Kolosay 3:7-9) Manaokaniw, ano makalimay kita sododen ni Yihofa kita, hanaca mikorac to raraw ita, o papakasoˈlin to sapatefoc ni Yis Kristo. Kawra, edengan mihadak kita to ˈicel, misarocod a mifalic, mihaen ngaˈ pakayni ci Yihofa i sapatefoc a misodod kitaanan.—1 Yohani 1:7. w22.06 6 fiedac 16-17 fatac

Mikitini nolitengan tahanini, marariday ko tamdaw madadokaˈ. (Patnakay 8:9) Tinakoen, o cifadangalay a tamdaw patelasay misaka dademak to fadangalan, o mararaway a tamdaw tano mariˈangay midokaˈ to tao, o romaroma micudaday misamsamay to roma a cafay micudad, iraayho ko roma tamdaw misafayaˈay to paro no lomaˈ no niyah. Mansa ciˈangiay ko tamdaw to tao! Sasamaan ci Satan misaka dademak to ciˈangiay to tamdaw a falocoˈ ita hani? Ciharatengay ci Satan sapisaka dademakaw to ciˈangiay falocoˈ ita, pacieci kitaanan caayto ka pitosil anca midofdof to roma a sapalimoˈot no Kawas. Itini pifiyor ni Satan, o roma a sifo mikecengay to tayal ita, hanaca mipalakay kitaanan. (Luka 21:12) Itini toniya hekal ni Satan, ˈalomanay tamdaw patenakay to pakayniay kitanan to cowa ko soˈlinay lihaf, anca padeteng sanay midokaˈ kitaanan. O pakasoˈlinay tonini a mangah a tamdaw malikafay kitaanan alatek, tano mariˈangay a miˈodis kitaanan. (Matay 10:36) Wa pakayni kita toniya demak a fahkaˈen han? Cowa. Samanen itini saka 1 hahekalan misaka dademakanto ni Satan ko hatiniay a pakayraan.—Dmak 5:27, 28, 40. w22.06 16 fiedac 10-11 fatac

O mikeridan malo moecelay ‘ ˈalomanay tamdaw’ o cimacima hani? Iraay ko patikolay maˈorip a tamdaw, milakowitay to Armakiton a tamdaw, ato mihofocan i faelohay hekal a wawa. Itini kahererekan no Pikowan to Comaˈol Miheca i, polong a tamdaw i fafekang no sera malo malefotayto a tamdaw. Haharatengen ita, o malefotay tamdaw cowa ko fahal sanay malifok ko midaˈocay a ˈorip. Haratengen ko tinakoan ni Atam aci Ifa, o malefotay a tamdaw cangra, kawra kamayan o mamidofdof cangra to Kawas ci Yihofaan, ngaˈ ngaˈay milifok to midaˈocay a ˈorip. Kaadayayan i, cowa pidofdof cangra ci Yihofaan. (Loma 5:12) Tahinito kahererekan no Pikowan to Comaˈol Miheca i, polong a tamdaw patikolayto a malefot, kawra o polong a tamdaw wa tahadaˈoc midama to pikowan ni Yihofa han? O roma tamdaw mamalecad ci Ataman aci Ifaan, soˈlin o malefotay, kamayanho mitowakang to Kawas hokira? Onini a salicay misaaliay to papacaˈofen. w22.09 22-23 fiedac 12-14 fatac

Maˈaraw iso ko pakayraan no hekal anini i, awaayto ko hatokel noikor sanay miharateng han? Maliwasakay ko paro no lomaˈ, mangalefay ko kariˈang no tamdaw, misatekeday, mangolaway, ˈalomanay tamdaw cowa to pakasoˈlin to cifadangalay a tamdaw. Nikawrira, o hatiniay pakayraan o papaˈicel to pakasoˈlin iso. Misamaanay hani? Samanen sapairasol no Fangcalay Cudad, itini ‘salikoray a romiˈad’ o mamahaen ko tamdaw sanay. (2 Timoti 3:1-5) O soˈliˈlinay ko harateng a tamdaw o mamihayi to malaˈosiayto konini a sapairasol. Misawacayay ko demak, mala Hongtiayto no Hongti Kitakit no Kawas ci Yis Kristo. Pakayniay i Hongti Kitakit no Kawas a sapairasol adihayayho, o masalalomaˈay aca a cecay konini. Onini a sapairasol malecaday o mafolfolay a coka pakakitikitingen, hato maˈaraway ita ko masahciay a coka, mafanaˈ to itiniay ko niyah i maanan a tatokian no mihalakaan ni Yihofa a limasmas a maˈorip. w22.07 2 fiedac 1-2 fatac

Itini kalifongan a tatokian, pakayni sasamaan misikay to saˈopo ato mirienang to mitosilay tayal, macadaay ita ko ihkalay a sakayat. Kalikiay kita mifalic itini tingnaw mirienang to saˈopo ato taykay, misatapangayho kita tano tikami ato tingwa malo kalimlaan sapitosil a pakayraan. O mihadakan ita a ˈicel, milifokay to sapalemed ni Yihofa. Adihayay a fenpo mihadakay to safanaˈ, matongalay ko kacakat no mitosilay tamdaw. Soˈlinayto, ˈalomanay salikaka itini kalifongan a tatokian iraay ko pakalalokay to tamdaw a nalifetan. Harateng no roma tamdaw, itini kalifongan a tatokian pakidemay ko pirikec no likakawa no Kawas sanay, kawra misaliyaliyaway misawacay ko mifekaday a demak, o macadaay ita a sakayat sahtoay o ciepocay. Songilaˈen ita miharateng samaanay ci Yis tano olah a mikayat to aniniay a Krisciyang, o papakasoˈlin, ano o mananto ko mifekaday a demak i kaˈayaw, ci Yihofa ato kaolahan a Wawa Ningra papadotoc a mikapot kitaanan.—Hipray 13:5, 6. w22.07 13 fiedac 15-16 fatac

Itini satolon, cowa ko pakahemek aca ita ci Yihofaan, mikifalocoˈho a miakoˈid Cingranan, samanen kadofahay ko sapafeli Ningra kitaanan a sapalemed. Tinakoen, ngaˈayay kita masemer a minengneng to masakenakenaay ko kodong a hana, mitanam to masakenakenaay ˈaredetay a kakaenen, lipahak a macacawmaˈ to ngaˈayay a widang. O matomesay to olah a Wama i kakarayan pafeli kitaanan tonini kadofahay a sapalemed, pakayniay sakalipahakaw ita a maˈorip. (ˈOlic 104:12-15, 24) Sakakaay kalimlaan i, pafeliay ci Yihofa to kadofahay sapahaled to pakasoˈlin no falocoˈ a kakaenen, pairaay to hatokel ita noikor konini, tada miakoˈiday kita Cingranan. Patadoay ci Yihofa kitaanan midemak to adihayay a demak, kawra madoloay kita a mapawan miakoˈid Cingranan. Pakayni sapiharatengaw a miakoˈid ci Yihofaan, ngaˈay kita misamaan ko pidemak hani? Tanamen a mitilid ko cacangacangen iso i Kawas a demak, hanaca rariden mihadak a minengneng, haratengen samaanay Cingra pacaˈof kitaanan, dotoc mitolon miakoˈid Cingranan.—Kolosay 3:15. w22.07 22 fiedac 8-9 fatac

Mafanaˈay kita o pinanam aca to soˈlinay kimad cangoˈotayho. Sapilifokaw to taˈangayay a epoc, o tatooren ita ko soˈlinay kimad a maˈorip, itini kaˈorip sakadademaken ko mananamay a soˈlinay kimad. Edengan mihaen ko demak, papaira to soˈliˈlinay a lipahak ita ko soˈlinay kimad. (Yakop 1:25) Sasamaan kita mihapinang to mitooray ko niyah to soˈlinay kimad a maˈorip hani? Malecad o sowal no cecay faˈinayan salikaka, wa ngaˈay kita misongilaˈ mikinsa to niyah, minengneng o maanan ko ngaˈayay a demak no niyah, itini maanan a pakayraan papadotocho a macakat. Malecad o misowalan no tarokos ci Pawlo, sanay cingra: ‘Ano tahacowaay ko kacakat ita i, tooren a midoedo ko malecaday a lalan, masierod a padadotoc talaˈayaw.’ (Filipi 3:16) Haratengen hena, misarocod kita ‘mitoor to soˈlinay kimad a maˈorip,’ hakowaay ko malifokay a epoc! Cowa ko pisalof aca to kaˈorip no niyah, pakahemekayho ci Yihofaan ato salikaka. (Taneng 27:11; 3 Yohani 4) Onini ko kalimlaan a lalangian ita maolah to soˈlinay kimad ato mitoor to soˈlinay kimad a maˈorip! w22.08 19 fiedac 16-18 fatac

O malohemay malitengay sasamaan paihkal to nika olah ci Yihofaan aci Yisan hani? O cecay masakalimlaan a pakayraan i, midimokos to ‘siri’ ni Yis. (1 Pitiro 5:1, 2) Na ihkalay ci Yis palimoˈot to tarokos ci Pitiroan papihaen to demak. Kinatolo ci Pitiro misahaiken ci Yisan ikor i, maedeng sapisawacayaw to maolahay ko niyah ci Yisan. Licayen noya patikolayto maˈorip a Yisan ci Pitiro: ‘Simonaw, wawa ni Yohani, maolahay kiso takowanan han?’ Mana eca ka olah ci Pitiro ci Yisan saw. Toha sapisawacayaw tonini a olah, maedeng makahiay cingra midemak to maamaan. Oranto i, pasowalan ni Yis ci Pitiro: ‘Ka pakaenen iso a midimokos ko siri no mako.’ (Yohani 21:15-17) To hakelong no ˈorip ningra, misongilaˈay ci Pitiro midimokos to siri ni Yis, misawacay to nika olah ningra ci Yisan. O malohemay malitengay, sasamaan kamo midemak paihkal to misaaretengay minengneng ko niyah to sapalimoˈot ni Yis hani? Ka pidimokos kamo to salikaka, hanaca misaˈicel a padama to misawadayto mitosil a tamdaw minokay i tatihi ni Yihofa, o paihkalay konini to tangongolay a olah namo ci Yihofaan aci Yisan.—Icikil 34:11, 12. w23.01 29 fiedac 10-11 fatac

Cowa ko cacipinang ko tao to malifaay iso a pasangar, aka pihaen a miharateng, o mahaenay a harateng papatoled to falocoˈ iso, awato ko ˈicel padadotoc milood to mararaway a harateng. Sowal no Fangcalay Cudad: ‘Ano tahalifa kamo to sakayhid i, mamifohat Cingra to halalan, pakahadidito kamo.’ Mihaenay i, soˈlin ano pakidemto kora mararaway harateng, o ngangaˈay kita madimadi ci Yihofaan, padadotoc midemak to matatodongay a demak. Ira ko sapadama ni Yihofa i, o ngangaˈay malaˈosi kita, caayto sapitooraw to mararaway harateng. Haratengen, o cowa ka lefot a tamdaw, aawa ko mararaway harateng cowa ka saan. Kawra ano masadak ko mararaway harateng i, ngaˈayay coˈayen iso, malecad ci Yosifan malifa ningra ko pikayhid no fafahi ni Potifar i, tangsolay comikay a milaliw. (Satapangan 39:12) Aka pakiyadi han mitoor ko mararaway harateng iso! w23.01 12-13 fiedac 16-17 fatac

O masadafdafay o roma a capeling ni Yihofa, milingatay to cowa pisakakinih ko masadafdafay. (Limoˈot 32:4) O cowa pisakakinih ci Yihofa. (Dmak 10:34, 35) Ano nengnengen ita tano maanan a sasowalan a tiliden ko Fangcalay Cudad i, o mamahapinang konini. Mikiˈokay ci Yihofa, itini salikoray a lalintadan, ‘o soˈlinay a sifanaˈ,’ ‘kakadofah,’ itiyato i, cacipinang to kimad no Fangcalay Cudad ko ˈalomanay tamdaw. (Taniil 12:4) Samaanay malaˈosi konini sapairasol hani? O cecay pakayraan i, milingatay to pihongyak to Fangcalay Cudad ato mitepangan a cudad, ato mipalilaman. O finawlan ni Yihofa maharekayto a mihongyak to Fangcalay Cudad mataˈlifay ko 240 a sasowalen, caay pilipayci a palilam to tamdaw. Telocto i, polong a kasafinawlan ngangaˈay cipinang to ‘ngaˈayay lihaf no Hongti Kitakit’ itini ˈayaw no salikoray a romiˈad. (Matay 24:14) Caay pisakakinih ko Kawas, maolahay to tamdaw maemin, mansa makalimay Cingra ˈaloman ˈaloman ko tamdaw pakayni i Fangcalay Cudad mafanaˈ Cingranan. w23.02 5 fiedac 11-12 fatac

Maolahay kiso to moecelay han? Maedeng hatiraay. Kawra o cowa ka lefot a tamdaw kita, hanaca ano eca ka pinaˈon, pakayni pinengneng ita to moecelay wa madolo mafiyor no hekal. (Isaya 5:20) Pakayni “moecelay” o roma tamdaw iraay ko masofaway a harateng, pakayni “moecelay a tamdaw” tada misatakaraway, maolahay milikaf, misao moecelay saan ko harateng. Soˈlinay i, cowa ka olah ko Kawas to mahaenay a “moecelay.” Itini i fafekang no sera ci Yis i, misaˈicelay a mirikec to itiyaay a ˈaˈideman no pihakelongan, samanen patirengay cangra to niyah a moecelay a palinian. (Patnakay 7:16; Luka 16:15) Sao moecelay ko niyah saan, caay ko soˈliˈlinay a moecelay. O moecelay hananay i, o cecay makapahay a capeling. Kantangen ko sowal, o moecelay o midemakay to matatodongay a demak i pinengneng no Kawas ci Yihofa. Itini Fangcalay Cudad, tatodong no “moecelay” a sowal o mitooray to ˈakawangay a palinian ni Yihofa a maˈorip. w22.08 27 fiedac 3-5 fatac

Maˈaraway ni Yis ko adihayay raraw no nisawawaan, kawra padadotocay pakasoˈlin cangranan. (Yohani 15:16) Kinacecayay, ci Yakop aci Yohani micangacangay ci Yisan, paitini cangranan i Hongti Kitakit milifok to mikiriwiˈay a saaroˈan, cowa ka cisasa ci Yis to nafalocoˈan nangra midoko ci Yihofaan, caayto ka ngaˈay malo tarokos cangra cowa ka saan a pasowal. (Marko 10:35-40) Ikor tiya malepel ci Yis toya dadaya, polong nisawawaan mifalahay cingranan a milaliw. (Matay 26:56) Kawra, cowa ka lahdaw ko pakasoˈlin ni Yis to nisawawaan, ihkalay cingra mafanaˈ to dangoc no nisawawaan, kawra ‘tahatolasay maolah cangranan.’ (Yohani 13:1) Patikol maˈorip ci Yis ikor, hanaca pafelian ko 11 madimadiay tarokos to kalimlaan a ˈinorong, ho ngaˈay cangra mikerid to mitosilay tayal pasifanaˈ to tamdaw, hanaca midimokos to kalimlaan a lopayˈay siri ningra. (Matay 28:19, 20; Yohani 21:15-17) Soˈlin cowa ka lefot onini a nisawawaan, cowa pisakahmaw to pakasoˈlin ni Yis. Tahiraay i patay cangra madimadi. Ci Yis cowa ka pakayni i ka eca ka lefot no tao, ecato pakasoˈlin to tao, tada o ngaˈayay a taˈarawan ita cingra. w22.09 6 fiedac 12 fatac

Ano pakasoˈlin kita to maolahay ci Yihofa kitanan, hanaca wa itini tatihi ita midama kitanan, wa ngaˈayto kita mipadik to mihalakaan ni Satan. Tinakoen, mitiliday to ˈOlic 118 fedengan a tamdaw na misiˈayaway to pina pakidemay a sapalifet. I tatihi ningra adihayay ko ˈada, mahawpay ko cifadangalay iraay ko saaroˈan a tamdaw (saka 9, 10 sinael). Latekay, micadaay cingra to taˈangayay saroero (saka 13 sinael). Roma i, na micadaay cingra to pakidemay sapirikec ni Yihofa (saka 18 sinael). Kawra, mikifalocoˈay a somowal ko mitiliday to ˈOlic: ‘Cowa ko caciˈangi kako.’ Soˈlin na micadaay cingra to sapirikec, kawra mafanaˈay cingra tada maolahay ko kakarayan a Wama ci Yihofa cingranan. Pakasoˈlinay cingra ano o mananto ko masiˈayaway sapalifet, o sidaˈitay a Kawas o tatangsol a mihadak to sapadama. (ˈOlic 118:29) O papakasoˈlin kita to maolahay ci Yihofa kitanan, o papadama konini kitanan miremo to tolo marariday maˈaraw a ciˈangiay falocoˈ: (1) Calemcem cato ka ngaˈay ko niyah midimokos to sakaˈorip no paro no lomaˈ, (2) ciˈangiay to tamdaw, (3) ciˈangi mapatay. w22.06 14-15 fiedac 3-4 fatac

Papaisalakaten ita ko pidoko ci Yihofaan. O Misangaˈay a Tatapangan ita ci Yihofa, midoko kita Cingranan o matatodongay. (Paˈarawan 4:11; 14:6, 7) Mihaenay, itini kaˈorip ita, sakakaay kalimlaan i tano mihaydaan ni Yihofa a pakayraan midoko Cingranan, sakoniya sowal ‘itini sakayat no fangcalay saocor, mitoor to soˈlinay kimad midoko Cingranan.’ (Yohani 4:23, 24) Misaˈicel kita micangacang to sakayat no fangcalay saocor, ngaˈayto mitoor to soˈlinay kimad no Fangcalay Cudad midoko to Kawas. Soˈlin itini kilac ita makecengay anca macongeday ko mitosilay tayal, papaisalakaten ita ko pidoko ci Yihofaan. Nohatini, mataˈlifay ko 100 a salikaka mapalitay, o kapalit nangra samanen o Misawacayay Tamdaw ni Yihofa cangra. Soˈlin itiniay i pasangaray a pakayraan cangra, kamayan misarocod mimamet to toki a mitolon, micekiw to Fangcalay Cudad, ato pasowal to tao to pakayniay i Kawas ato Hongti Kitakit Ningra a kimad, mansa padadotocay cangra a lipahak. Ano masamsam anca mahakokay kita i, mafanaˈ kita to mikapotay ci Yihofa kitaanan, hanaca papalifon kitaanan, o lalipahakto ko falocoˈ ita.—1 Pitiro 4:14. w22.10 9 fiedac 13 fatac

Mitilidan ni Yihofa i Taneng ko caay ka taˈlif citanengay a sowal, ano tooren ita a midemak o mamasalof ko kaˈorip no niyah. Nengnengen ita ko tosa a tinakoan. Taneng 23:4, 5 palimoˈotay kitaanan: ‘Aka pisamacay micangacang to hafay. . . . O cacisapikpik ko hafay, malecad o lidep pasayra kakarayan maefer.’ Kawra anini ano cihafayayto anca manikaway tamdaw, misamacayay mietan to payci. Tocerid mikayatay konini cangranan midemak to saka tatiih no niyah a demak, telocto mipalakay to ngangan no niyah, kalalaˈed to tamdaw, anca tanoktok no tireng. (Taneng 28:20; 1 Timoti 6:9, 10) O roma i, ˈayaw no somowal saharateratengen. Ano eca pinaˈon, o mihadakan ita a sowal papaira to taˈangayay pidokaˈ to tao alatek. Sowal no Taneng 12:18: ‘Ano caay minaˈon to sowal i, matiya o mikotangay a midokaˈ to tamdaw, o citanengay a sema matiya o ngaˈayay a sapaiyo.’ Miliyas kita itini lalikor a milengo to dangoc no tao, ecato pipalak to kalalaˈed no tamdaw.—Taneng 20:19. w22.10 21 fiedac 14 fatac; 22 fiedac 16-17 fatac

O sasongilaˈen ni Icikil miˈicay ato miselip koniya lalasilen ningra a lihaf, ho tahira i falocoˈ ningra, mitemer to nafalocoˈan ningra. Dotoc, mifekaday ko caay ka harateng a demak, mahapinangay ni Icikil koya maloloday cudad ‘malecaday o ˈodal a koesan!’ (Icikil 3:3) Misamaanay hani? Harateng ni Icikil, ngaˈay mitaypiyaw ci Yihofaan mihadak to sowal tada kalikoan a demak, pakoesanay to falocoˈ ningra konini. (ˈOlic 19:8-11) Tada miakoˈiday cingra nilnilen ni Yihofa cingra malo pairasolay. Ikor, pasowalan ni Yihofa ci Icikil: ‘O kihcod nano sowal Ako tisowanan, songilaˈen iso a mitengil, naˈengen i falocoˈ.’ (Icikil 3:10) O tatodong ni Yihofa i, o sasongilaˈen ni Icikil miharateng ko sowal i maloloday cudad, hanaca misongilaˈ a misimsim. Pahaleday konini to pakasoˈlin ni Icikil, mifanaˈho cingranan o lalasilen no niyah i finawlan o ciˈicelay a lihaf. (Icikil 3:11) Nohatini, matomesay i falocoˈ ni Icikil ko kimad no Kawas, maharekayto misaday mitosil, tahira ka lahcian no patorodan no Kawas cingranan a tayal ko tolas. w22.11 6 fiedac 12-14 fatac

O madimadi iso ano pakayniay kafalic no likakawa micada to sapalifet, sasamaan ko pidemak iso hani? Saˈicelen midama to kafalic no likakawa. Ano mamalinah ko Israil tamdaw i, papina Kohat tamdaw citodongay mililid to katatelekan a lipa, hanaca itiniay kaˈayaw no polong a finawlan romakat. (Saˈosi 3:29, 31; 10:33; Yosuwa 3:2-4) Tada kalikoanto konini! Kawra, itinito i Mikiˈokan no Kawas a Pala mikilomaˈ ko Israil tamdaw i, mafalicayto ko pakayraan. Cowato ko mamararid milinah cangra to katatelekan a lipa. Mihaenay, o romaroma Kohat tamdaw manilnilay midemak to roma tayal. (1 Rayray 6:31-33; 26:1, 24) Cowa ka somowal ko Fangcalay Cudad o Kohat tamdaw na iraay ko mikiriwiˈay a ˈinorong a ngaliwngiw, anca misaali to mikiriwiˈay a saaroˈan. Mananamay ita ko maanan hani? Soˈlin o katayalan ita mafiyoray pakayni kafalic no likakawa no Kawas, o mamadimadi kita a midama to faelohay limasmas. Ano o mananto a tayal ko macadaay iso, o mamikitini a mikilim to sakalipahak. Haratengen, o epoc iso cowa ko saaroˈan matayal. Palinien to ˈinorong iso, o misaaretengan ni Yihofa i midofdofay kiso hokira. w22.11 23 fiedac 10-11 fatac

Ci Onisiforus caay pisikor to katalawan no ˈorip misaˈicel mikilim ci Pawloan, mahelato ikor mihalakaay padama ci Pawloan. Mananamay ita ko maanan hani? Aka a pakayni kaciˈangi to tamdaw a talalikor anca miliyas to micadaay to sapalak a salikaka. O tatalaˈayaw kita midama cangranan. (Taneng 17:17) Misaaliay cangra to olah ato sapadama ita. Itini pipadama to mapalitay a Krisciyang a demak, o salikaka itini Rowasiya patirengay to ngaˈayay taˈarawan no mita. Ano ira ko tamdaw tayra i hoing micada to sasawkit i, ˈalomanay salikaka tayraay i hoing midama cangranan. Mananamay ita ko maanan hani? O ciˈinorongay faˈinayan a salikaka ano mapakokot no tamdaw, malepel anca micada to sapalak, aka matalaw kita. Patadoen cangra mitolon, midimokos to paro no lomaˈ nangra, padadotoc mikilim to roma pakayraan midama cangranan.—Dmak 12:5; 2 Korinto 1:10, 11. w22.11 17 fiedac 11-12 fatac

O malohemay malitengay iraay ko ˈinorong itini noharatengan ato nofalocoˈan a pakayraan midimokos to salikaka. (1 Pitiro 5:2) Mifekad ko pades ikor, wa tangsol ko malohemay malitengay cipinang to rihakeday ko salikaka hokira, iraay ko kakaenen, iraay ko rikoˈ, iraay ko kitiraan hokira. Kawra, soˈlin halafinayto mataˈlif ko pades, o salikaka kamayan misaali to padadotoc no malohemay malitengay a ciharateng cangranan alatek, hanaca tano Fangcalay Cudad pakalalok cangranan. (Yohani 21:15) Ci Halote o Iing no Fenpo, na milisoˈay to adihayay tahacadaay to pades a salikaka, sanay cingra: “Mikitini kapadesan milifok to sasayar misaaliay to toki. O kaˈorip no salikaka palidlid sanay patatikol ko ngaˈayay kaˈorip alatek, kawra milaliw to katalawan a nalifetan kamayan macerid a maharateng alatek, maˈilolayho cangra ko mapatayay a salawina widang alatek, ato roma pakayni cangranan mikiriwiˈay iraay ko epoc a dafong. Onini a nalifetan saliyaliyaw sanay mikidat to sakasomad no harateng nangra alatek. Onini cowa ko paihkalay to cangoˈotay ko pakasoˈlin, ao matatodongay a pinangan konini.” Sowal no Fangcalay Cudad ‘malacafay tomangic to tomangicay a tamdaw,’ o malohemay malitengay misaˈicelay mitoor tonini a sapalimoˈot midemak.—Loma 12:15. w22.12 22 fiedac 1 fatac; 24-25 fiedac 10-11 fatac

Toha sapadamaaw kitaanan padadotoc to matatodongay a demak, pafeliay ci Yihofa to fangcalay saocor Ningra i kitaanan. Ano micekiw kita to Fangcalay Cudad i, o micadaayto sakayat no fangcalay saocor. Ano malacafay to salikaka masaˈopo i, mamalifok ko fangcalay saocor. O salikaka milecaday kitaanan misaˈicel midemak to matatodongay demak, kalacafay cangranan mapakalalokay kita. (Hipray 10:24, 25; 13:7) Roma sa i, itini satolon mingitangit ci Yihofaan padama kitaanan micoˈay to maanan a dangoc i, papafeli ci Yihofa to fangcalay saocor kitaanan padadotoc a midemak. Midemak tonini pina a demak cowa ko papalahdaw to mararaway a harateng, kawra papaˈicel kitaanan a micoˈay. Ano mananamto kita mirienang to midokoay a demak ikor, oha papadadotocenho ita konini ngaˈayay a nanaman, hongaˈ matongal ko kalim midemak to matatodongay a demak. w23.01 11 fiedac 13-14 fatac

O Fangcalay Cudad cowa ko misamacayay milengo to sakatanoktok no tireng ato pakayniay i kakaenen a cudad, kawra mikitini ngaˈay mahapinang ita ko pinengneng ni Yihofa pakayni toniya demak. Tinakoen, palimoˈotay ci Yihofa kitaanan ka ‘piliyas to midokaˈay to tireng a demak’ sanay. (Patnakay 11:10) Macoosay to kakaenen, malasangay hananay midokaˈay to ˈorip a demak, sahtoay o mirikecan no Fangcalay Cudad. (Taneng 23:20) Pakayni mipiliˈ to komaen to maanan, minanom to maanan, ato hakowa ko mikaenan, hakowa ko minanoman, makalimay ci Yihofa kitaanan mafanaˈ miˈimer. (1 Korinto 9:25) Misaka dademak kita to inaneng a miharateng citaneng ko pisaˈosi, paihkal to misalimlaay kita to sapafeli no Kawas a ˈorip kitaanan. (ˈOlic 119:99, 100; Taneng 2:11) Tinakoen, misongilaˈ kita pafafidaˈ to ngaˈayay anca caay ka ngaˈay a kaenen. Ano maolahay kita to cecay kakaenen, kawra mafanaˈay to aadada ano kaenen i, cowato ko kakomaen kita. Roma i, o citanengay a tamdaw papairaen ko ngaˈayay kafotiˈ, padadotoc mionto to tireng mikorac to tireng ato taliyok no lomaˈ. w23.02 21 fiedac 6-7 fatac

Ano miˈosi to Fangcalay Cudad i, sasamaan mikilim to odoˈ no sinael hani? Nengnengen ko 2 Timoti 3:16, 17 mansanay ko sowal. Itini tonini sinael somowalay, polong a Fangcalay Cudad pakayni (1) sapasifanaˈ, (2) sapirikec, (3) sapisalof, (4) sapahatatanam, sahtoay o ciepocay. Soˈliˈlin, mikitini caay ka rarid a maˈosi a sinael, ngangaˈay kiso milifok tonini sepat a epoc. Folfolen to maanan ko sapasifanaˈ i tisowanan, haratengen pakayni ci Yihofaan, araaw Ningra ato safalod no Fangcalay Cudad, mamananam iso ko maanan. Haratengen konini maˈoningay itini i sapirikec iraay ko maanan a epocan, tinakoen onini a sinael patalahkalay, mararaway ko maanan a harateng ato waywayan, sasamaan padama kitaanan micoˈay to mararaway a harateng, padadotoc madimadi midoko ci Yihofaan. Haratengen konini sinael sasamaan kalasaka dademaken to sapisalof to caay ka tatodong a pinengneng, o hatiniay a pinengneng matengilay iso pasowal ko tamdaw i pitosilan alatek. Ngaˈayay haratengenho iso mikitini tonini sinael sasamaan mapahatatanam ko niyah, o papadama tisowanan minanam to pinengneng ni Yihofa to demak. Ano haratengen iso konini sepat a pakayraan mamahela ko adihayay odoˈ no sinael, mamalifokto ko adihayay a epoc itini i picekiw iso. w23.02 11 fiedac 11 fatac

O sapairasol no Taniil paˈayaway, itini koˈedaway a tatokian no ‘pito a laliyadan’ mahererek ikor, wa itini kakarayan a Hongti Kitakit misatapang mikowan ci Yis Kristo. Onini a kahemekan a demak wa ihacowa a tatokian mifekad hani? Oha ngangaˈay kita mafanaˈ han? (Taniil 4:10-17) O ‘pito a laliyadan’ mitaypiyaway to 2,520 miheca a tatokian, onini a tatokian itiniay i ˈayaw no Kongyen 607 miheca misatapang. Itiya, o mitaypiyaway to pikowan ni Yihofa i Yirusalim salikoray a hongti palasawadan no Papilon a tamdaw. O ‘pito a laliyadan’ itiniay 1914 miheca mahererek, itiya pafelian ni Yihofa ko ‘citatodongay to fadangalan a tamdaw,’ o ci Yis, malo Hongti no Hongti Kitakit no Kawas. (Icikil 21:25-27) Onini a sapairasol pakayni kitaanan iraay ko maanan a epoc? Cipinang to pakayniay ‘pito a laliyadan’ a sapairasol, padamaay kitanan pakasoˈlin to tatooren ni Yihofa ko toki palaˈosi to sakiˈok Ningra. Maherekayto ci Yihofa misaˈosi to toki pala Hongti ci Yisan, maraod ko toki palaˈosianto Ningra konini a demak. Ano mahaenay i, wa itini Cingra i misaˈosian no Niyah a tatokian palaˈosi to polong a sapairasol. Wa ngaˈay rihaday ko falocoˈ ita, o taˈangayay a romiˈad ni Yihofa ‘cowa ko mamanayar ko romiˈad!’—Hapakuk 2:3. w22.07 3 fiedac 3-5 fatac